KUCHING, 6 Mei — Kaban Parlimen (MP) P198 Puncak Borneo, Datuk Willie Mongin nyemetak madahka Perintah seruran nentuka pengelantang raban orang timpang pendiau (OKU) seruran dijaga nengah bemacham bansa bantu enggau subsidi ti disediaka.
Kelimpah ari nya, iya meransang komuniti numbuhka sereta ngerejista rasmi gerempung ari baruh Opis Pengerejista Gerempung Malaysia (ROS) dikena ngemudahka pengawa ngagihka bantu sereta ngenegapka koordinasyen pengawa komuniti nengah chara ke lebih betukuh sereta ngasi.
Iya nibarka jaku munyi tu lebuh ngulu Program Sepetang ke diatur Barthemius Ministry ba sebengkah palan makai tebilang di Rock Road, kena Hari Dua tu tadi.
Program tu ngempuruka komuniti OKU ti chakah dalam aktiviti rohani enggau pemansang diri, lalu enggau nya mandangka semengat besemekih sereta daya pengetan tinggi napi pemar pengidup.
Iya mega mantaika pengaga ati ngagai penau enggau potensial ke dikembuan komuniti nya.
Kelai sukung enggau pengibuh, iya mega bisi nyuaka pemeri diri ngagai bala penyereta ke bisi datai nyadika peransang ngagai sida ngambika terus maju, ngatika diri sereta nyadi inspirasyen ngagai komuniti.
Program baka tu mandangka pengawa ti enda ngetu dalam meri kaul ngagai komuniti ti inklusif, setipak enggau aspirasyen pemansang Sarawak nuju nengeri ti lebih maju, lantang sereta likun. -RBI
