MERADONG, 13 Mei – Siku lelaki peranak menua tu beumur 29 taun ditan Raban Petugas Indu Opis Polis Pelilih (IPD) Meradong pengudah diperesa positif dadah rambau pengawa ngenyit “Operasi Saringan Khas Sarawak” di kandang menua Bintangor kemari.

Ketuai Polis Pelilih Meradong, DSP Tansli Mering madah, saspek ditangkap urung pukul 1.55 lemai lebuh raban polis benung bejalaika operasyen khas ngelaban aktiviti dadah ba pelilih nya.

Nitihku iya, pemutus peresa ai kemi ti dipejalaika ba Opis Bagian Tasat Jenayah Narkotik (BSJND) Pelilih Meradong tetemuka saspek positif Amphetamine enggau Methamphetamine.

“Pengawa meresa baru rikod ke udah mega tetemuka saspek ngembuan rikod ke udah bekaul enggau penyalah dadah,” ku iya nengah sebengkah penerang sehari tu.

Kes tu dipansik ari baruh Seksyen 15(1)(a) Akta Dadah Berbahaya 1952 ti nyendiaka ukum mata duit enda ngelui RM5,000 tauka jil nyentuk dua taun enti dikenuku salah.

Berebak enggau nya, polis nyemetak madahka sida enda belembut ba sebarang aktiviti salah guna dadah di pelilih tu lalu ngansak mensia mayuh ngenataika penerang bekaul enggau aktiviti dadah ngagai piak bekuasa.

Penerang tau disadung terus ngagai Balai Polis Bintangor nengah lumur 084-693222. -RBI

#ruaiberitaiban#newsiban#beritaiban

Rindu | Titih | Kunsika

KUCHING, 13 Mei – Kaban Kunsil Nengeri (ADUN) Tamin Ir Christopher Gira Sambang nyukung penuh perambu nyiri Komiti Pilih Khas (SSC) ti dibai Datuk Dr. Juanda bin Jaya di Dewan Undangan Negeri (DUN) Sarawak.

Iya nerangka pengawa numbuhka komiti nya siti singkang ti besai dalam ngenegapka pengawa merintah, pengawa ti terang, akauntabiliti enggau integriti institusyen di Sarawak.

Nitih ku iya, SSC ukai semina kelai aja, tang nyadi mekanisme ti beguna dikena nentuka pengawa matau enggau meresa polisi perintah, pengawa bejalaika projek, belanja mensia mayuh enggau pengawa perintah ti lebih komprehensif.

“Rayat diatu majak bepelajar sereta mayuh akses ngagai penerang, nya alai sida ngarapka DUN ukai semina nyadi pelasar endur bejurai, tang mega nyadi institusyen ti ulih matau pengawa perintah enggau profesyenal sereta efektif,” ku iya.

Nyadi pengari rayat menua pesisir, Gira madahka mayuh pekara ti begunaka pengawa meresa enggau dalam agi nyengkaum bekal ai menua pesisir, projek jalai ti laun, pengelemi bejalaika projek, penyambung digital, pengawa meri servis mensia mayuh, koordinasyen projek Perintah Besai, MA63 sereta mega pengawa merintah ti ngaul pengeraja asal enggau industri minyak enggau gis.

“Nengah SSC, DUN ulih bejalaika tanggungpengawa ke lebih nembam iya nya minta opis menteri enggau ejensi meri penerang, meresa ripot teknikal, minta penemu pakar sereta ngatur pengawa berunding enggau mensia mayuh,” ku iya lebuh bejuraika mosyen nya.

Iya mega nyemetak madahka integriti ukai semina bekaul enggau penyalah makai suap aja, tang mega mungkur pengawa ti terang dalam ngaga pemutus, efisyen dalam bejalaika pengawa, akauntabiliti enggau pemerani ngemetulka pengelemi dalam sistem.

Kenu ku iya, rayat dekaka perintah ukai semina landik ngaga pemadah, tang mega ulih ngenataika asil enggau efektif.

“SSC mega beguna dikena nentuka jaku lalau Ombudsman ukai semina nyadi ripot nadai pengawa nangkan, tang nganti nya dikemata sereta dipejalaika belama ungkup pemaik rayat,” ku iya.

Ku Gira nambah, pengawa nya setipak enggau aspirasyen PCDS 2030 ti ngemeratka reformasyen institusyen, pengawa meri servis mensia mayuh ti efisyen, terang, inovasyen enggau atur pengawa ti betanggungjawap.

Ku iya nambah, komiti nya meseti chakah, dipebasa sereta ngembuan guna ke terang nyengkaum kuasa matau ke efektif, ripot tetap, ngaul raban ke bisi pemerat enggau mekanisme nangkan ke efektif.

“Enti Sarawak deka nyapai atur merintah tikas dunya, dia kitai mega patut ngemeranka pengawa institusyen tikas dunya,” ku iya.

Iya pechaya penumbuh SSC ulih ngenegapka agi pengandal rayat ngagai Dewan Undangan Negeri Sarawak ti nyadi sebuah institusyen ti progresif, terang sereta ngembuan integriti ti tinggi. -RBI

#ruaiberitaiban#newsiban#beritaiban

Rindu | Titih | Kunsika

SARATOK, 13 Mei — Parti Pesaka Bumiputera Bersatu (PBB) Pampang N.39 Krian ngenataika penyinu ati berindik ari pemidang ex-Ketuai PBB Pampang N.39 Krian, niang Datuk Douglas Sullang, tumu pagi tadi.

Nitihka penerang rasmi PBB Pampang N.39 Krian, pemidang niang siti pengelenyau besai ngagai parti laban iya entara orang ti numbuhka PBB Pampang N.39 Krian.

“Jasa, pengawa enggau pemeri iya ngagai parti deka seruran dikenang sepemanjai maya. Pengering enggau pengeran PBB Pampang N.39 Krian nyentuk ke sehari tu entara legasi ke ditinggalka iya,” ku penerang nya.

Penerang nya mega nerangka niang siku ketuai ti mayuh mantu dalam ngenegapka organisasyen parti di sitak Krian kelimpah ninggalka empas ke besai ngagai pemansang PBB ba renggat baruh.

PBB Pampang N.39 Krian mega bisi ngenataika sampi ngambika semengat niang diau lantang, lalu ngarapka semua sida sebilik diberi pengering enggau penegap ati napi maya penusah ati tu.

Penerang rasmi nya dipansutka PBB Pampang N.39 Krian nyadika tanda basa kepenudi ngagai jasa enggau pemeri niang ngagai parti enggau komuniti menua nya. -RBI

#ruaiberitaiban#newsiban#beritaiban

Rindu | Titih. | Kunsika

KUCHING, 13 Mei – Tuai Pemegai Menua (TYT) Sarawak, Tun Pehin Sri Dr.Haji Wan Junaidi bin Tuanku Jaafar enggau Toh Puan Datuk Patinggi Fauziah binti Mohd Sanusi, mantaika penyinu ati ketegal pemidang tukuh komuniti Dayak, Dotuk Douglas Sullang Anak Ganda kena 12 Mei 2026 ba umur 83 taun.

Nitihka penerang ari Tun Pehin Sri, niang siku tukuh ti mayuh meri jasa ngagai komuniti, kelebih agi komuniti Dayak, sereta mega ngagai pemansang Sarawak nengah pengawa iya ti chakah ngaul diri dalam pengawa nyadi ketuai, pengawa dagang enggau servis mensia mayuh.

Tun mega nerangka pemeri niang nyadi Pemungkal enggau Ex-Sapit Presiden Balai Dagang enggau Industri Dayak sereta ex-Kaban Kaban Dewan Negara entara legasi besai ti deka terus dikeingat sereta dipebasa, kelebih agi dalam pengawa ngenegapka pemansang enggau penyulut komuniti Dayak di nengeri tu.

Berindik enggau nya, TYT enggau bini iya ngenataika penyinu ati ngagai semua kaban niang sebilik sereta besampika sida diberi pengering enggau penegap ati napi maya penusah ati tu.

Iya mega ngarapka semua jasa, pengawa enggau pengingat ke ditinggalka niang terus diukir dalam pengingat komuniti sereta nyadi peransang ngagai rebak dudi hari. -RBI

#ruaiberitaiban#newsiban#beritaiban

Rindu | Titih | Kunsika

KUCHING, 13 Mei – Perintah Sarawak deka ngemansangka pengawa jurulatih ba raban pengajar, bejalaika program ngelala bakat ba mayuh bengkah lumba enggau main, ngatur pekit sekula enggau komuniti sereta ngatur jalai pemansang atlit enggau sistematik agi.

Sapit Menteri Pemansang Nembiak, Lumba enggau Orang Dagang, Datuk Gerald Rentap Jabu madah, Opis Menteri nengah Sarawak Sports Corporation (SSC) seruran meransang sereta ngenegapka kerejasama strategik entara Gerempung Lumba enggau Main Nengeri, Opis Pelajar Nengeri Sarawak enggau ejensi sereta raban ke bukai.

“Tu dikena nentuka pemansang lumba enggau main ba renggat sekula enggau renggat baruh ulih dipejalaika enggau lebih teratur sereta terus ba semua bansa lumba enggau main.

“Entara batang fokus kerejasama tu nyengkaum ngemansangka jurulatih ba raban pengajar, bejalaika program ngelala bakat ba mayuh bengkah lumba enggau main, ngatur pekit sekula enggau komuniti sereta ngatur jalai pemansang atlit enggau sistematik agi,” ku iya.

Berebak enggau nya ku Rentap, SSC mega bejalaika tanggungpengawa ke berat nengah chara seruran ngatur Kus Sains Lumba enggau Main ari Tikas 1 ngagai Tikas 3 ngambika ulih ngadaka mayuh agi jurulatih ke bisi setipikit sereta kompeten dalam mayuh bengkah disiplin lumba enggau main.

ADUN Layar nya mega nyaut tanya ba DUN, madahka projek ngangkatmanah perengka guna ba Stadium Nengeri ngagai perengka guna ke moden agi sereta nitihka standard kemaya hari tu baka Gerempung Main Bol Antarabansa (FIFA) enggau Konfederasi Main Bol Asia (AFC) dipechaya ulih ngenegapka pemansang ekosistem main bol di Sarawak.

Terang Rentap, projek ngangkatmanah perengkaguna nya deka nyendiaka rampa ke lebih kondusif endur ngatur pekit main bol ba mayuh bengkah renggat.

“Tu nyengkaum Liga Premier Sarawak ti nyadi pelasar ke beguna dikena ngemansangka pemain menua tu enggau kelab komuniti sebedau nyingkang ngagai renggat ke tinggi agi,” ku iya.

Iya madah munyi nya lebuh nyaut tanya ari Kaban Kunsil Nengeri (ADUN) Tupong Datuk Fazzrudin Abdul Rahman bekaul enggau projek ngangkatmanah Stadium Nengeri ba Aum Kunsil Nengeri (DUN) Sarawak, ditu, sehari tu.

Iya nerang agi, projek ngangkatmanah nya mega ulih ngenegapka pengawa bejalaika program pemansang renggat baruh baka Liga Juara Bola Sepak Belia PETRONAS (PYFCL) nengah chara ngena perengka guna ke bekualiti agi ungkup latih, pekit enggau pemansang bakat nembiak enggau chara ke lebih teratur.

“Kebendar iya, pengawa ngaul Gerempung Main Bol Sarawak (FAS) enggau Kuching City FC (KCFC) deka mantu ngenegapka agi jalai pemansang pemain ari renggat baruh ngagai renggat profesyenal,” ku iya.

Rentap mantaika projek ngangkatmanah Stadium Nengeri udah dikemendar enggau agih belanja RM7.05 juta lalu Sarawak Sports Corporation (SSC) udah dichiri nyadi ejensi bejalaika pengawa.

“Skop pengawa ngangkatmanah Stadium Nengeri mungkur pengawa ngemanahka enggau komprehensif dikena nentuka perengkaguna stadium likun, moden sereta nitihka standard ke diatu.

“Entara batang skop iya nya kereja ngangkatmanah penuduk orang ke meda, sistem lampu LED baru, masang skrin LED, ngangkatmanah kaunter tikit, ngemanah bilik nukar gari, jamban enggau surau sereta mega ngemanahka infrastruktur ke bisi diatu,” ku iya nambah. -RBI

#ruaiberitaiban#newsiban#beritaiban

Rindu | Titih | Kunsika

SIBU, Mei 13 — Sepital Sibu terus ngenegapka pengawa ngintu pengerai nengah pengawa ngelancharka Klinik Temuai Subspesialis Pedis keterubah iya, ti nyadika pemujur besai ngagai Unit Bius sepital nya.

Pengawa bejalaika klinik tu nandaka penyulut ke besai dalam pengawa ngangkatka kualiti ngintu pesakit nengah pengawa nyendiaka servis ngatur pemedis ke lebih spesialis, moden sereta mayuh disiplin di Sarawak Tengah.

Nengah inisiatif nya, pesakit ba kandang menua Zon Tengah diatu bisi peluang ngulihka akses ke muntang agi ngagai chara berubat intervensyen pemedis moden enggau enda ibuh dianjung ngagai palan perubat besai di luar kandang menua nya, lalu enggau nya ulih mantu ngurangka tating pejalai sereta ngenyampatka akses berubat.

Nitihka penerang ba laman Facebook rasmi Sepital Sibu, pemedis kronik ukai semina ngeruga pengerai tubuh, tang mega ngeruga pengelantang runding enggau kualiti pengidup pesakit.

“Nengah servis nemuai tu, kami komited nyendiaka pengawa ngintu ti lebih komprehensif sereta fokus ngagai pesakit nengah chara ngena chara pemadu baru bepelasarka bukti dalam bidang ubat pemedis,” ku penerang nya.

Penerang nya nambah, penumbuh klinik nya ukai semina meri kelala servis baru aja, tang mega mandangka penyulut sistem pengerai, kerejasama strategik enggau komitmen Sepital Sibu ti terus dalam pengawa ngangkatka kualiti servis pengerai ngagai komuniti.

Inisiatif tu setipak enggau aspirasyen Malaysia MADANI nuju ngenataika servis pengerai ke lebih bekualiti, inklusif sereta meruan ungkup pengelantang rayat. – RBI

#ruaiberitaiban#newsiban#beritaiban

Rindu | Titih | Kunsika

KUCHING, 12 Mei — Dewan Undangan Negeri (DUN) Sarawak sehari tu ngemendarka Rang Undang-Undang (RUU) Opis Pemansang Ekonomi Sarawak (SEDC) (Ubah) 2026, ti ngembuan tuju deka ngenegapka tanggungpengawa strategik institusyen nya dalam pemansang ekonomi nengeri nengah pengawa ngatur pengawa korporat ti manah agi sereta ngemodenka struktur organisasyen.

Pemendar RUU nya dipadahka Speaker Dewan Undangan Negeri Sarawak, Tan Sri Mohd Asfia Awang Nassar pengudah iya dibantaika Sapit Premier Sarawak, Datuk Amar Douglas Uggah Embas, sebedau dikemendar enggau sukung majoriti kaban Dewan pengudah dipejuraika 11 iku ADUN.

Nitih ku Datuk Amar Douglas Uggah Embas, ubah nya siti singkang beguna perintah Sarawak dalam nentuka Opis Pemansang Ekonomi Sarawak (SEDC) mengkang relevan, kompetitif sereta setipak enggau atur pengawa ngatur korporat pemadu manah ba tikas ke diatu.

Ku iya, pengawa ngemanahka nya mega bepelasarka pansik ti dipejalaika enggau Bank Dunya dalam taun 2022, ti ngaul pengawa beratika pengawa ngatur korporat kompeni enggi perintah nengeri, nyengkaum badan berkanun enggau kompeni bekaul enggau perintah (GLC).

“Asil ari pansik nya mega ngujungka Kaunsil Tadbir Urus Korporat ungkup dagang enterprise enggi perintah Sarawak dikemendarka Kaunsil Tetinggi Nengeri (MMKN),” ku iya lebuh ti nyimpul pejurai bekaul enggau rang undang-undang nya.

Ku iya nambah, Perintah Gabungan Parti Sarawak (GPS) komited deka ngubah SEDC nyadi entiti diempu perintah nengeri ti beprestasi tinggi enggau pemerat ngenegapka pengawa merintah, nambahka transparen, sereta nyapai prestasi wang ti meruan agi.

“Chara ngatur pengawa ti lebih komersial enggau inklusif beguna dikena nentuka SEDC terus mansang nyadi sebuah korporat tikas dunya sereta bejalaika tanggungpengawa ti lebih signifikan dalam pemansang ekonomi Sarawak,” ku iya.

Dulu agi ari nya, lebuh mantaika RUU nya, Datuk Amar Douglas Uggah Embas madahka ubah nya mega mungkur pengawa ngelakuka baru ordinan nya ngagai Ordinan SEDC dikena ngerintaika identiti institusyen nya ba renggat menua enggau antarabansa.

Entara ubah besai iya nya pengawa nukar pangku pengawa Menijar Besai enggau Ketuai Pemesai Eksekutif Kumpulan (GCEO), setipak enggau struktur organisasyen moden ti ngatur mayuh bengkah anak kompeni enggau pemerat komersial ti lebih luas.

Ubah nya mega ngerembaika skop kaban korporat ngagai individu ti ngembuan pengelandik dalam mayuh macham bidang ti bekaul, seraya ngenegapka fungsyen enggau kuasa SEDC, kelebih agi dalam pengawa numbuhka enggau ngatur kompeni strategik. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUCHING, 12 Mei — Raban Penyaga Pengelikun Mensia Mayuh Malaysia (APM) Pelilih Menua Kuching udah bejalaika operasyen nangkap siku baya ba kandang parit besemak enggau Surau Darul Aqsa, Sumber Alam, pengudah nerima notis nengah sistem MERS999 sehari tu.

Tekala nya pengudah nerima ripot nya, tim timbal APM Kuching digerah ngagai endur penusah nyadi lalu betuaika Koperal (PA) Junainah Binti Baki bejalaika pengawa enggau lengkas nangkap jelu reptilia nya.

Asil ari pengawa ke jampat sereta diperambu, tim APM mujur nangkap siku baya urung 8 kaki pemanjai enggau likun nadai sebarang penusah ke enda manah nyadi.

Operasyen nya dipejalaika nitihka prosedur pengelikun ti udah ditetapka.

Udah nya baya nya diserah ngagai Sarawak Forestry Corporation (SFC) ngambika dipejalaika enggau ngatur pengawa nitihka garis lalau ngatur jelu siga.

APM Kuching deka ngenataika terima kasih ngagai semua kaban ti ngaul diri ketegal komitmen, penyikar enggau pengawa ti jampat dalam nentuka pengelikun peranak menua nya.

Mensia mayuh dilalau ngambika seruran bejejaga sereta lengkas ngeripot sebarang jelu siga ti tau mai penusah nengah talipaun penusah ngenyit MERS999 tauka betanya ngagai APM Kuching ba lumur 082-252940 / 082-252941. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUCHING, 12 Mei — Projek pemansang padi Batang Lupar ti beungkus RM950 juta ti udah dipadahka kenyau ari taun 2013 betapi enggau bemacham pemar bejalaika pengawa kelebih agi bekaul enggau status tanah Adat Bansa Asal (NCR).

Nitihka ripot TVS, Menteri Industri Pemakai, Komoditi enggau Pemansang Kandang Menua Sarawak, Dato Sri Dr. Stephen Rundi Utom madahka projek ari baruh inisiatif National Key Economic Area (NKEA11) asal iya diperambu ngaul pemesai 5,100 hektar enggau tagit meri penguntung ngagai penyereta urung 500 iku.

Ku iya, renggat keterubah projek nya mungkur pengawa ngemansangka tanah padi pemesai 200 hektar enggau agih belanja sepenyampau RM21 juta ungkup pengawa nyendiaka infrastruktur ke penuh nyentuk ngagai renggat pelajar tinggi.

Taja pia ku iya nerang, pengawa bejalaika renggat ke nangkanka nya deka napi pemar besai ketegal ngaul tanah NCR, nyengkaum pemar ngulihka pemendar ari pengempu tanah ungkup tuju ngatur baru kandang endur nya ungkup pengawa mekanisasyen enggau pemansang sistem ai enggau parit ke lebih sistematik.

Iya madah munyi nya rambau nyimpul jaku iya ba Dewan Undangan Negeri (DUN) Sarawak nyaut tanya ari Kaban Kunsil Nengeri (ADUN) Padungan, Chong Chieng Jen bekaul enggau pemansang projek padi di Batang Lupar.

Nitihku iya, gaya nya ngujungka pemansang projek semina fokus nyendiaka infrastruktur keterubah enggau kedua baka sistem ai enggau parit.

Naka ke diatu, sepenyampau 1,306 hektar tanah udah dikemansang ngena penyampau ungkus RM148.7 juta ti meri penguntung ngagai 664 iku orang bumai.

Berebak enggau nya, iya mega ngaku bisi pengempu tanah ke udah nya nguna kandang endur nya ungkup utai tanam bukai ke lebih meri penguntung pengudah perengka guna pemun disediaka.

Ku iya, peneleba nya udah nyadi ajar beguna ngagai perintah dalam pengawa ngubah sektor padi nengeri tu enggau chara ti meruan sereta efektif agi.

Berindik ari nya, perintah nengeri diatu ngambi chara baru nengah pengawa numbuhka Kaunsil Padi enggau Beras Sarawak nengah chara ngemeratka pengawa ngemansangka kandang endur padi ba tanah enggi perintah dikena nentuka perambu timpuh panjai lebih tegap sereta efisyen.

Perintah nengeri mega merambu deka ngaga gazet tanah perintah khas ungkup pemansang padi dikena nyeliahka guna nya ditukar ngagai utai tanam bukai, ke lebih agi komersial.

Ba pemansang ke sama, iya nyemetak madahka pengawa ngaul sektor peribit nengah kerejasama perintah enggau peribit beguna amat dalam pengawa ngemodenka industri beras nengeri tu.

Ku iya, dagang mit enda ulih agi nyamin produktiviti enti nadai ngena teknologi moden enggau mekanisasyen, nya alai sektor betanam betupi begunaka mindah ari konsep ngatika diri ngagai pengawa betanam betupi ti moden sereta kompetitif. -RBI

#ruaiberitaiban#newsiban#beritaiban

Rindu | Titih | Kunsika

KUCHING, 12 Mei – Direktor Opis Kereja Raya (JKR) Sarawak, Datu Dr Cassidy Morris mantaika sukung iya ngagai produk komuniti orang dagang menua tu lebuh iya nemuai ngagai Pavilion Juma’ani beratika enggau silik agi asil pengelandik jari enggau produk menua tu kelebih agi Batik Sadong.

Nitih ku iya, tanggungpengawa nyadi Direktor Opis Kereja Raya ukai semina fokus ngagai pemansang jalai alun enggau infrastruktur, tang mega nyengkaum pengeransing ngelawa komuniti sereta nyukung produk menua tu ke ngembuan potensial ke besai dikemeratka ba makit ke besai agi.

Ku iya, produk menua tu baka Batik Sadong ukai semina mandangka kreativiti komuniti Sarawak, tang mega entara pesaka asal nengeri tu ti patut dijaga sereta diangkatka.

Sukung ari mayuh bengkah ejensi enggau opis perintah dipeda ulih mantu ngenegapka orang dagang menua tu kelimpah muka mayuh agi peluang ngagai sida besemekih dalam industri kreatif enggau dagang mit.

Penatai iya mega disambut Menijar Besai CENTEXS Komersial Sarawak Shahren Yusri, Direktor MATRADE Sarawak Suwardy Abd Shukor enggau Penulung Direktor MATRADE Aidatul Marina Abdul Ghani. -RBI

#ruaiberitaiban#newsiban#beritaiban

Rindu | Titih | Kunsika