BINTULU, 14 Mei – Siku lelaki bakal pengudah kerita Mitsubishi Xpander ke dikena iya akisiden ba Jalai Pan Borneo Simpang Bakun tumu pagi tadi.

Nitihka ripot ari Ketuai Balai Bomba enggau Penyah Penusah (BBP) Kidurong PBT II Rary Binjie, sida nerima kangau ngenyit urung pukul 1.35 pagi sebedau seraban bomba dianjung ngelawa endur penusah nyadi, iya nya urung 39 kilometer penyauh ari balai nya.

Ba operasyen nya ku Rary ti betuaika Komander Operasyen, PBK I Fabian Andy Jesi madah, lebuh datai ba endur nya urung pukul 2.20 pagi, raban iya tetemuka tudah udah mujur dipansutka mensia mayuh sebedau penatai raban bomba.

“Iya udah nya diserah ngagai Opis Menteri Pengerai Malaysia (KKM) ngambika atur nangkanka nya dipejalaika,” ku iya dalam ripot operasyen nya.

Ku iya, asil peresa nya tetemuka penusah aksiden nya ngaul sebuah kerita Mitsubishi Xpander ti dipelabaka tepawah kediri.

Ku iya nambah, raban bomba enda bejalaika operasyen nyelamat laban orang ke aksiden udah diperubat sebedau tu ari raban mensia mayuh enggau tim perubat.

Operasyen ke ngaul enam iku raban begulai enggau sebuah kerita Scania FRT nya udah dikuasa penuh pukul 2.26 pagi sebedau tembu lima minit udah nya.

Sama bisi ba endur nya dua iku raban Polis DiRaja Malaysia (PDRM) enggau dua iku pemesai Opis Menteri Pengerai (KKM). -RBI

#ruaiberitaiban#newsiban#beritaiban

Rindu | Titih | Kunsika

SARATOK, 13,Mei — Bala ketuai Parti Pesaka Bumiputera Bersatu (PBB) Sarawak sehari tu ngenataika penyinu ati berindik ari ex-Ketuai Pampang PBB N.39 Krian, niang YBhg Datuk Douglas Sullang udah midang.

Sapit Premier Sarawak ke mega Sapit Presiden PBB Datuk Amar Douglas Uggah Embas betuaika raban nya enggau ketuai perintah nengeri ke bisi datai meri basa kepenudi ngagai niang.

Sama bisi datai Menteri Industri Pemakai, Komoditi enggau Pemansang Kandang Menua Sarawak ke mega Mandal Presiden Kanan PBB Dato Sri Dr.Stephen Rundi Utom, Sapit Menteri Pemansang Nembiak, Lumba enggau Orang Dagang Sarawak ti mega Sapit Presiden PBB Dato Gerald Rentap Jabu, Kaban Parlimen Betong Dato Dr. Richard Rapu, Kaban Kunsil Nengeri (ADUN) Krian Friday Belik, Direktor Opis Betanam Betupi Sarawak Dominic Chunggat enggau Sekretari Mendam Opis Menteri Industri Pemakai, Komoditi enggau Pemansang Kandang Menua, Datu Sirai Daha.

Pemidang niang siti pengelenyau besai ngagai parti laban iya entara tukuh tumu ke bejalaika tanggungpengawa besai dalam penumbuh enggau penegap PBB Pampang N.39 Krian.

Bala ketuai ke bisi datai nerangka niang siku ketuai ke tau dikarapka sereta chukup bebendar ngenegapka organisasyen parti ba renggat baruh, kelimpah ari meri bantu ke besai ngagai pemansang komuniti menua nya.

Nitihku sida, jasa, pengawa enggau komitmen niang ngagai parti deka terus dikenang sereta nyadi legasi berega ngagai ketuai rebak dudi PBB.

Sida mega besampi ngambika semua kaban belayan niang diberi pengering, pengeliat ati enggau pengelantang napi maya penusah ati tu.

Penatai bala ketuai mandangka penyinu ati enggau basa kepenudi ngagai semua jasa enggau pemeri besai niang ngagai parti enggau rayat di kandang menua Krian. -RBI

#ruaiberitaiban#newsiban#beritaiban

Rindu | Titih | Kunsika

KUCHING, 13 Mei – Sarawak meseti terus ngenegapka penuduk nyadi ketuai ekonomi baru menua nengah fokus ngagai pemansang industri beteknologi tinggi, modal mensia ti bekualiti sereta pemansang menua pesisir ti lebih seimbang sereta inklusif.

Kaban Kunsil Nengeri (ADUN) Pelagus, Wilson Nyabong Ijang madah, Sarawak diatu udah ba tikas ke tegap asil ari penegap politik, chara ngatur belanja ke bejimat sereta iring perintah nengeri ke bisi visi ari baruh iring Premier Sarawak, Datuk Patinggi Tan Sri Abang Abdul Rahman Johari Tun Openg.

Nitih ku iya, taja pan dunya betapi enggau geopolitik ti enda tentu, tekan inflasyen, pengeruga ngagai rentayan bekal global enggau ubah teknologi ti jampat, Sarawak agi mujur ngetanka rizab wang ti tegap, narit puku enggau nyerungkai industri jemah ila.

“Sarawak kemaya hari tu ukai agi semina bejaku deka ngiga penyulut aja, tang ngengkahka diri nyadi ketuai dalam ekonomi jemah ila,” ku iya lebuh bejuraika Usul Penghargaan Tuai Pemegai Menua (TYT) Negeri Sarawak ba Aum Kunsil Nengeri (DUN) Sarawak, sehari tu tadi.

Ku Wilson, pemujur Pelin Strategi Pemansang Pengudah COVID-19 2030 (PCDS 2030) diatu bepanggai ba pemanah pengawa bejalaika enggau ngenataika projek ngagai rayat, kelebih agi di menua pesisir.

Ku iya, rayat deka meda jalai alun tembu, sekula diangkatmanah, akses internet dikemanahka agi, perengka guna pengerai ditegapka sereta peluang ekonomi diasai taja pan ba kandang menua ulu.

Iya mega nyukung pengawa perintah nengeri ti deka ngaga Sarawak nyadi hab aeroangkasa, pemintar tiru (AI), teknologi satelit enggau ekonomi digital dikena ngadaka peluang kereja ti berega tinggi sereta nambahka penegap ekonomi nengeri tu.

Taja pia, iya nyemetak madahka pemansang industri ke majak ngerembai begunaka modal mensia ke bekualiti nengah pengawa ngenegapka pelajar STEM, TVET, literasyen digital enggau pemansang penau.

Berebak enggau nya, iya muji pangku pengawa Wang Turu Ekonomi Gagasan Anak Sarawak ti chakah meri kuasa ngagai raban nembiak nengah program literasyen digital, robotik, sains data enggau AI.

Wilson mega nyambut manah komitmen perintah nengeri bejalaika Skim Pelajar Tinggi Perchuma (FTES), kelebih agi dalam bidang baka injiniring, perubat, STEM enggau undang-undang.

Ngelansa pasal pemansang menua pesisir, iya nyemetak madahka bida pemansang entara mengeri enggau menua pesisir meseti terus diperatika laban perengka guna pemun baka jalai alun, jematan, bekal ai, kuasa karan enggau telekomunikasyen nyadi pengepun besai ngagai transformasyen sosio-ekonomi rayat.

Ku iya, kandang menua baka Pelagus enggau Bagi Menua Kapit agi begunaka pengawa ngemanahka rentayan komunikasyen enggau infrastruktur dikena ngangkatka tikas pengidup peranak menua nya.

Iya mega meri pengaga ati ngagai perintah Sarawak ti bejalaika Skim Karan Alternatif Menua Pesisir Sarawak (SARES) ti udah mayuh mantu komuniti menua pesisir ngulihka kuasa karan.

Taja pia, Wilson madahka sekeda isu baka penanggul bekal enggau timpuh bateri ke mimit agi begunaka perati ke berat.

Berindik enggau nya, iya meri langgur penemu ngambika perintah berundingka pengawa ngena sistem solar hibrid dalam kluster ungkup rumah panjai enggau genturung pendiau besemak nyadika chara mutarka timpuh panjai seraya nganti pengawa ngerembaika grid kuasa karan.

Kelimpah ari nya, iya mega mantaika isu servis Sarawak Energy Berhad di Kapit ti agi bepanggai ba kaunter bebayar ngena chara manual, ngujungka sekut sereta ngenusahka penguna.

Iya meri langgur penemu ngambika SEB nambahka kiosk mayar servis kediri sereta chakah agi ngena pelasar mayar digital setipak enggau agenda transformasyen digital Sarawak.

Dalam jaku ke sama, Wilson mega ngansak ngambika sebagi ari agih belanja pemansang RM6 bilion ti udah dipadahka Perintah Besai ungkup Sarawak dikena ngenyampatka pengawa nyukat kelingi Tanah Hak Adat Bansa Asal (NCR).

Nitih ku iya, pengawa nyukat tanah NCR beguna dikena nentuka penegap undang-undang, nyaga hak rayat sereta nyukung pemansang timpuh panjai komuniti menua pesisir.

Iya mega nyemetak madahka penegap politik enggau ketuai ti konsisten nyadi faktor kunsi pemujur Sarawak dalam merambu pemansang timpuh panjai sereta nambahka pengandal pemeranak puku.

“Sarawak diatu majak dipebasaka ba renggat antarabansa dalam bidang kuasa tau dikena baru, ekonomi hidrogen, pengelantang rampa menua enggau transformasyen digital,” ku iya. -RBI

#ruaiberitaiban#newsiban#beritaiban

Rindu | Titih | Kunsika

LUBOK ANTU, 13 Mei – Ulah seiku indu ke dipelabaka bisi kaul enggau penyalah makai dadah ngujungka iya ditangkap raban polis IPD Lubok Antu maya ‘Special Scan Op’ ke dipejalaika ba kandang pasar Lubok Antu tengah hari kemari.

Ketuai Polis Pelilih Lubok Antu, DSP Pricha Azin madah, asil peresa ai kemi tetemuka saspek ke beumur urung 20-an ditemu positif Amphetamine enggau Methamphetamine.

Nitih ku iya, pengawa meresa silik mega tetemuka indu ke bekaul nya ngembuan rikod jenayah bekaul enggau kes dadah.

Ku iya, kes nya diatu benung dipansik ari baruh Seksyen 15(1)(a) Akta Dadah Berbahaya 1952.

Berebak enggau nya, iya nesau mensia mayuh ngambika terus meri kerejasama ngagai polis nengah chara meri penerang bekaul enggau aktiviti salah guna dadah dikena mantu pengawa ngelaban penyalah nya.

“Kerejasama komuniti beguna amat dikena nentuka pengelikun, pemaik enggau pengelantang mensia mayuh di pelilih Lubok Antu seruran dijaga,” ku iya. -RBI

#ruaiberitaiban#newsiban#beritaiban

Rindu | Titih | Kunsika

KUCHING, 13 Mei — Kaban Kunsil Nengeri (ADUN) Ba’Kelalan Baru Bian sekali agi mansutka perambu iya ngambika Lawas diangkat nyadi bagi menua penuh Sarawak berindik ari pemansang infrastruktur ti jampat sereta penumbuh ekonomi ti majak nyata di bagi menua utara nengeri tu.

Nitihku iya, Lawas diatu ngembuan kapasiti pentadbiran enggau infrastruktur ke tegap agi, nyengkaum ngaga Kompleks Pentadbiran Baru Lawas, kelimpah ari nerima empas ke besai ari pengawa bejalaika Projek Jalai Penyambung Sarawak-Sabah (SSLR), Jalai Besai Pantai Utara enggau pengawa ngangkatmanah Padang Bilun Lawas.

Ku iya, palan strategik Lawas besemak enggau indu nengeri baru Indonesia, Nusantara, mega ngeletakka kandang menua nya ba rintai mua ba penumbuh ekonomi meraka garis entara menua enggau integrasyen serantau.

Berindik ari nya, iya ngansak Kabinet Sarawak ngena kuasa ari baruh Ordinan Kawasan Pentadbiran 2000 dikena ngemujurka aspirasyen ngangkatka Lawas nyadi bagi menua penuh enggau lengkas.

Iya madah munyi nya lebuh bejuraika Mosyen Tuai Pemegai Menua (TYT) Negeri Sarawak Tun Pehin Sri Dr Wan Junaidi Tuanku Jaafar ba Aum DUN ditu, sehari tu tadi.

Ba pemansang ke bekaul, Baru mega mantaika isu kunteriktor menua tu di Lawas ke dipadahka majak napi penanggul belanja lebuh semina ngaul diri nyadi subkunteriktor renggat keempat enggau lima dalam pengawa bejalaika Fasa II projek SSLR, kelebih agi ungkup Pakej 3 enggau 4B.

Ku iya, gaya nya ngujungka margin penguntung nyau mimit nyentukka sekeda kompeni menua tu puntan neruska operasyen laban projek ke diterima sida nya enda ulih dikena ekonomi agi.

Berindik enggau nya, iya ngansak opis menteri ke bekaul nentuka kunteriktor besai meri peluang ke lebih adil sereta bisi reti ngagai kunteriktor menua tu ngambika penguntung ari pemansang ulih diasaika enggau komprehensif komuniti menua nya.

Kelimpah ari nya, iya mega nyambut manah perambu ngemansangka palan endur belelak enggau ngetu (R&R) sereta palan komersial ba sepemanjai SSLR ti dianggap ulih muka peluang ekonomi baru ngagai peranak di utara Sarawak. -RBI

#ruaiberitaiban#newsiban#beritaiban

Rindu | Titih | Kunsika

KUCHING, 13 Mei – Komuniti Kelabit minta industri Padi Bario diperansang baru nengah pengawa moden enggau mekanisasyen dikena nambahka pemansut padi khas nya ke diatu agi ditanam chara tradisional.

Kaban Kunsil Nengeri (ADUN) Mulu madah, Datuk Gerawat Gala madahka Premier Sarawak mega bisi bekunsika sekeda chara moden ke benung dipejalaika dalam industri betanam padi ba kandang menua bukai di Sarawak ke udah mujur nyungkak pemansut enggau nyata.

Berebak enggau nya, komuniti Kelabit mega bisi nganjung peminta nempa pangku pengawa Temenggong ungkup komuniti Kelabit sebaka enggau komuniti minoriti Orang Ulu ke bukai nyengkaum Lun Bawang, Bisaya enggau Penan.

Iya madah munyi nya pengudah nguluka penemuai meri basa ari 27 Ketuai Komuniti enggau Ketuai Raban Bansa (KMKK) ari sekeda pelilih mit di Baram begulai enggau Gerempung Kelabit Sarawak ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ba Kompleks Dewan Undangan Negeri (DUN) Sarawak ditu tadi.

Bekaul pengerembai kebukai, Gerawat mega madahka peranak menua ulu Baram deka ngasaika perengka guna jalai alun ke manah agi berindik ari pemutus Perintah Sarawak ngambi alih lebih 7,000 kilometer jalai kayu batang di serata nengeri tu ungkup dikemansangka.

Iya ke mega Sapit Menteri ba Opis Premier Sarawak (Buruh, Imigresen enggau Pematau Projek) madah, ari penyampau nya, 2,700 kilometer jalai kayu batang bepalan ba Bagi Menua Baram ti nyadi batang jalai peranak di kandang menua ulu.

Nitih ku iya, pengawa nya deka ngasuh jalai nya ulih diintu, dikemanah sereta diangkatmanah berenggat ngena belanja MARRIS ari Perintah Besai.

“Kitai amat beterima kasih lebuh Premier Sarawak madahka Perintah Sarawak udah ngaga pemutus ngambi semua jalai kayu batang di Sarawak ti ngaul lebih 7,000 kilometer.”

“Ari penyampau nya, 2,700 kilometer bisi ba Bagi Menua Baram. Lebuh jalai tu digazet nyadi jalai nengeri, dia kitai layak nerima belanja MARRIS ke tuju ngintu, ngemanah sereta ngangkatmanah jalai nya enggau chara berenggat,” ku iya.

Berebak enggau nya, Datuk Gerawat madahka komuniti ke bisi kaul mega ngenataika pengaga ati sida ngagai Premier Sarawak enggau Perintah GPS ba mayuh macham pemansang ke udah dipejalaika di Bario nyengkaum bekal kuasa karan 24 jam, akses telekomunikasyen enggau internet sereta mega bekal ai beresi.

Ku iya nambah, entara batang peminta ke dikenataika ngagai Premier Sarawak iya nya ngangkatmanah jalai batang ari Pekan Lapok ngagai Bario ke nyambung lebih 100 buah rumah panjai di menua ulu.-RBI

Sumber enggau gambar UKAS

#ruaiberitaiban#newsiban#beritaiban

Rindu | Titih | Kunsika

KUNDASANG, 13 Mei — Yang Mulia Tengku Hassanal Ibrahim Alam Shah mujur datai ba tuchung tuchung Gunung Kinabalu urung pukul 8.30 pagi tadi beserimbai enggau Ekspedisyen Mahkota Borneo, lalu enggau nya nempa kenang besejarah sereta ngemegahka ati.

Iya berengkah niki ari palan pemeresa Panalaban tumu pukul 2.30 pagi sebedau datai enggau selamat ba tuchung gunung pemadu tinggi menua tu dalam gaya hari ti manah sereta semengat ti tinggi.

Pemujur nya ngayanka pengeliat ati fizikal iya ke tinggi, disiplin enggau pengeransing ati ngemujurka misi ekspedisyen nya, kelimpah ari ngayanka semengat besemekih iya ke unik.

Ekspedisyen Mahkota Borneo mega mai pesan pemerani, penyerakup enggau pengerindu ngagai rampa menua, kelimpah meri inspirasyen ngagai raban nembiak ngambika terus enchabar diri empu sereta ngemeranka gaya pengidup ti bepengerai sereta regas.

Pengawa niki nya mega dipeda nyadi manifestasi komitmen iya dalam ngelawa rayat sereta nyukung komuniti lokal sepemanjai program ekspedisyen nya. -RBI

#ruaiberitaiban#newsiban#beritaiban

Rindu | Titih | Kunsika

PETRA JAYA, 13 Mei – Sarawak agi ngembuan kandang tanah ti besai lalu pemansang baru enda patut ngelengkaka kandang endur industri ti udah lama meri pangka ngagai ekonomi nengeri tu.

Violet Yong (DAP-Pending) madah, kandang endur industri nya ukai tanah puang tauka kandang endur ke patut dikemanahka baru, tang nyadi hub industri ke chakah ti udah dikemansangka pengelama bepuluh taun ari kompeni menua Sarawak nyengkaum orang dagang mit enggau jelan pemesai (PKS).

“DAP mantah perambu ngemansangka baru kandang endur industri Pending ti dikumbai ulih meri empas ngagai semak 500 iku orang industri sereta ngachau ekosistem dagang ti beungkus enda kurang ari RM5 bilion,” ku jaku iya.

Ku iya, nyentuk ke diatu mayuh pemain industri agi bedau nerima penerang ke nyemetak bekaul enggau perambu ngemansangka baru nya nyengkaum endur palan pengentap pendiau baru enti pengawa mindah nya dipejalaika.

“Enti pengawa mindah nya amat diperambu, dini kandang endur industri ke diganti enggau infrastruktur, perengka guna enggau sistem logistik ke patut?

“Sapa deka nanggung ungkus mindah nyengkaum ngererak jentera, ngaga baru kilang enggau ngachau operasyen dagang?” ku iya lebuh bejuraika mosyen meri terima kasih ngagai jaku Yang di-Pertua Negeri ba Aum Kunsil Nengeri (DUN) Sarawak sehari tu tadi.

Ba pengerembai ke bukai, Violet mega nyakal dawa ti madahka Dewan Undangan Nengeri Sarawak diatu dikelala enggau nama Dewan Undangan Negeri Sarawak (DUS).

Iya nyemetak madahka Konstitusyen Sarawak agi ngena leka jaku Dewan Undangan Nengeri lalu nadai ubah udah digaga dikena nukar nama rasmi DUN Sarawak.

“Semua dokumen rasmi nyengkaum notis duduk enggau rang undang-undang ti dibantai dalam dewan tu agi ngena leka jaku Dewan Undangan Negeri Sarawak,” ku iya.

Kelimpah ari nya, Violet mega betanyaka pengawa bejalaika program Langkah Rapat Transformasyen Pekereja Menua Luar (FWTA) Sarawak ti ku iya meri pemerat ngagai pengaji nengah chaj tambah ngambi pengereja pengawa ari menua luar.

Ku iya, kenyau program nya dipejalaika kena bulan Januari 2025, pengaji patut mayar RM1,854 ungkup tetiap pengereja pengawa ari menua luar tauka RM2,002.32 nyengkaum chukai jual enggau servis (SST).

Nitih ku iya, bepelasarka penyampau rasmi 106,242 pemendar pengereja pengawa ari menua luar ti dikeluarka sepemanjai taun 2025, pengumpul ari program nya dipelabaka nyauka RM200 juta setaun.

“Taja pia, nyentuk ke diatu perintah bedau nerangka enggau silik struktur bayar, penyampau ke diterima perintah nengeri enggau bagi ke diterima sektor peribit ari baruh model kerejasama awam enggau peribit (PPP) tu,” ku iya.

Iya mega betanya pasal ngena pelasar bayar piak ketiga enggau sambung sebuah Kompeni nya dikelala enggau nama FWTA Sdn Bhd ti ku iya bedau diterangka ngagai mensia mayuh.

Sumber Utusan Sarawak

#ruaiberitaiban#newsiban#beritaiban

Rindu | Titih | Kunsika

PAKAN, 13 Mei — Raban Penyaga Pengelikun Mensia Mayuh Malaysia (APM) Pelilih Pakan bejalaika pengawa enggau lengkas bejalaika operasyen netak sereta ngupas pun kayu tumbang ti ngempang jalai di Jalai Wak, Pakan, sehari tu tadi.

Operasyen nya dipejalaika Skuad Charlie APM Pakan berindik ari ripot penusah ke nyadi bekaul enggau pun kayu ke tumbang meraka jalai lalu ngeruga pejalai penguna.

Empat iku kaban dianjung ngagai endur nya bejalaika pengawa netak enggau meresi dikena nentuka jalai nya ulih dibuka baru enggau lengkas.

Asil ari pengawa jampat tim operasyen, reba kayu nya mujur dibuai abis lalu jalai nya diatu likun ditengah semua perengka pengangkut.

APM Pakan ba penerang nya ngemeratka komitmen ejensi nya terus nentuka pengelikun enggau pengelantang komuniti seruran dijaga nengah pengawa nyikap diri sereta meri timbal lengkas ngagai sebarang penusah ngenyit.

Operasyen nya mega mandangka komitmen APM nyukung rambai jaku “Sedia Pantas Integriti” ba tuju meri servis pemadu manah ngagai komuniti. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

BETONG, 13 Mei — Penusah tanah tusur ke nyadi ba kandang menua Mujau Keranggas ditu udah ngempang jalai besai ke nyambung dua buah rumah panjai, berindik ari ujan bangat ke enda ngengetu kenyau ari lemai kemari nyentuk tumu pagi tadi.

Angkatan Pertahanan Awam Malaysia (APM) Pelilih Betong nengah penerang berita madahka sida udah nerima ripot bekaul enggau penusah nya sebedau kaban dipindah ngagai endur nya bejalaika pengawa matau sereta beratika tikas pengelikun ba kandang endur ke kena penusah nya.

Asil pengawa matau nya tetemuka tanah tusur nya udah mungkur selampur jalai besai ke nyadi jalai peranak rumah panjai di kandang menua nya.

Penusah nya dipelabaka bepun ari struktur tanah nyau lemi ketegal gaya hari ke enda manah sereta ujan bangat enda ngengetu.

Nitihka penerang nya, atur tekala nya dipejalaika Opis Kereja Raya (JKR) nengah bejalaika pengawa meresi ba endur penusah nyadi dikena nentuka jalai nya ulih ditengah enggau likun baru.

Berebak enggau nya, APM Betong mega bisi ngelekatka ‘safety warning tape’ ba kandang endur ti kena penusah nya nyadika atur bejejaga ngagai penguna jalai alun enggau peranak menua nya.

“Jalai ke kena penusag nya diatu udah mujur ditengah sereta ulih ditengah semua bansa perengka pengangkut baru,” ku penerang nya.

APM Betong mega ngelalau mensia mayuh ngambika seruran bejejimat, kelebih agi lebuh nengah kandang endur ti bisi risiko kena tanah tusur berindik ari gaya hari ti enda entap diatu. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika