BETONG, 23 Mei – Sepenyampau 200 iku penerima ari sitak DUN Layar nerima pemeri beserimbai enggau Pengerami Sejambak Kasih Hari Gawai Bagi Menua Betong 2026 ke diatur ba Dewan Che Zhong Khor, Betong sehari tu.

Ari penyampau nya, 100 iku penerima bantu ari baruh Opis Pengintu Pengelantang Raban Bansa (JKM) seraya 100 iku agi penerima ari Gerempung Meninggikan Akhlak Che Zhong Khor.

Pengerami tu mega nerima kerejasama ari Opis Pengintu Pengelantang Raban Bansa Sarawak enggau Saberkas Betong nengah Program Saberkas Prihatin ti mega nyadung pemeri belanja ngagai penerima.

Pemeri nya disuaka Kaban Kunsil Nengeri (ADUN) Layar ke mega Sapit Menteri Pemansang Nembiak, Lumba enggau Orang Dagang (Pemansang Nembiak enggau Lumba), Datuk Gerald Rentap Jabu begulai enggau bini iya, Datin Rosemary Wong.

Sama bisi datai ngerichahka agi pengerami nya, Kaban Parlimen Betong, Dato Dr.Richard Rapu @ Aman Anak Begri, Residen Bagi Menua Betong, Datu Richard Anak Michael Abunawas, Pemesai Pengintu Pengelantang Pendiau Bagi Menua Betong, Abg. Ahmad Ibrahim Bin Abg. Abdul Rahman enggau Chairman Gerempung Meninggikan Akhlak Che Zhong Khor Betong, Chan Chu Chu enggau Kaunsil Tanah enggau Survei Bagi Menua Betong, Moris Anak Nayup.

Ba pengerami ke sama, lima buah serakup mega bisi nerima agih belanja ungkup Projek Mit Menua Pesisir (MRP) dikena mantu bejalaika aktiviti enggau program komuniti sida empu.

Gerempung ke nerima agih belanja nya iya nya Gerempung Meninggikan Akhlak Che Zhong Khor, Gerempung Fu Sheng Gong, Kaunsil Pengatur Sekolah Chung Hua, Gerempung Shen Tan Gong, Amanah Amal Kuil Cina Betong enggau Gerempung Buddha Betong.

Kelimpah ari nya, empat iku nembiak sekula primari mega nerima pemeri RM300 siku nyadika sukung enggau peransang laban sida deka ngarika Sarawak ba Pekit Bola Keranjang MSS di Pulau Pinang taun 2026 ila.

Pengerami Sejambak Kasih Hari Gawai 2026 diatur kelai pengibuh enggau pengawa ti enda ngetu dalam pengawa mantu sida ti begunaka bantu, kelimpah ari ngerapitka kaul komuniti bemacham pupu bansa enggau jalai pengarap sebedau pengerami Hari Gawai.

BELAGA, 23 Mei – Pengawa bejalaika Projek Genturung Pendiau Digital Sungai Asap (SADV) ti beungkus RM36 juta ari Perintah Sarawak mega dikearapka ulih ngenyampatka pemansang digital di kandang menua ulu enggau nya ngenegapka guna teknologi dalam pengawa betanam betupi enggau pelajar.

Kaban Kunsil Nengeri (ADUN) Murum, Kennedy Chukpai Ugon madah, pengawa nya setipak enggau perambu numbuhka Palan Transformasyen Betanam Betupi Pintar (SATC) ba Palan Pengentap Pendiau Bakun (BRS) Sungai Asap ti deka nyadi palan pemansang betanam betupi moden bepelasarka teknologi enggau komuniti.

Kelimpah ari nya, ADUN Murum nya madahka Program Betanam Betupi Pintar Inisiatif Tenaga Sarawak di SMK Bakun enggau SMK Belaga dipeda nyadi pelasar ke beguna dalam ngadaka rebak biak menua pesisir ti landik ngena teknologi sereta besemekih dalam sektor betanam betupi moden.

“Chara betanam betupi pintar ti diberi kelala ukai semina meri penguntung ngagai nembiak, tang mega bisi potensial ngubah landskap ekonomi komuniti menua pesisir nengah pengawa ngena teknologi digital dalam sektor betanam betupi,” ku iya.

Iya madah munyi nya lebuh bejadi Program Betanam Betupi Pintar Inisiatif Perintis Tenaga Sarawak ba Dewan SMK Bakun, Sungai Asap, kena Hari Empat tu tadi.

Nitih ku iya, penerang tumu ngagai teknologi baka Internet of Things (IoT), automasyen enggau sistem betanam betupi pintar beguna dalam nentuka rebak baru nyikap diri napi ubah industri enggau pemansang ekonomi digital kemaya hari tu.

“Program tu muka ruang ngagai bala nembiak meretika chara teknologi ulih dikena ba pengawa betanam betupi nengah chara ti lebih moden, sistematik sereta produktif.

“Kelimpah ari ngenegapka pengawa belajar di sekula, inisiatif tu mega ulih matak pengerindu raban nembiak meda pengawa betanam betupi nyadi sektor jemah ila ti bisi potensial besai,” ku iya.

Sama bisi datai Pemesai Pelilih Belaga Bidah Lujah, Sekretari Politik Menteri Besai Sarawak Thomas Balan Bang, Sapit Residen Bagi Menua Kapit Robert Liman Deli enggau SEB Power, Ketuai Pemesai Eksekutif Sarawak Energy Ir. Bunyak Lunyong. – RBI

JULAU, 23 Mei – Kuta Brooke di Nanga Meluan ngembuan rega sejarah ke tinggi sereta bisi penau dikemansangka nyadi ikon dagang temuai besai ke ulih matak penatai temuai ari dalam enggau luar menua tu.

Chairman Kaunsil Industri Kayu Ramu Malaysia, Datuk Larry Sng Wei Shien madah, komuniti menua nya dikearap begunaka awak ngerebut peluang nya nengah chara ngemansangka sektor dagang temuai komuniti enggau ekonomi menua tu lalu beambi ulih ari penyelai sejarah kandang menua nya.

Ku iya, peranak Nanga Meluan diperansang numbuhka kedai pemakai asal, bansal asil pengelandik jari enggau dagang mit ti ulih ngelakuka budaya enggau aktiviti komuniti menua nya ngagai bala temuai.

“Kuta Brooke di Nanga Meluan ngembuan rega sejarah lalu sejarah baka tu enda ulih dibeli. Tu meh awak ke pemadu manah dikena ngemansangka ekonomi peranak menua tu sereta meri kelala Julau ngagai tikas ke lebih luas,” ku iya lebuh bejaku ba Pengerami Makai Lemai SK Nanga Meluan, ditu.

Nitih ku iya, sitak tu mega engkeman dikemansangka nyadi palan eko-dagang temuai nengah pengawa ngaga rumah temuai, hotel mit tauka palan ngelantangka ati ke ulih meri peneleba ke nyelai ngagai temuai ngasaika pemanah rampa menua enggau pesaka sejarah ba sitak nya.

Berebak enggau nya, iya mega meri langgur penemu ngambika palan besejarah nya nyadi palan endur mandangka main asal enggau pesaka asal komuniti menua nya, nyengkaum aktiviti asal baka nyembui lada, nyendiaka pemakai asal enggau mandangka main asal.

Ku iya, pengawa nya ukai semina ulih ngetanka pesaka sejarah enggau budaya, tang mega muka peluang ekonomi baru ngagai peranak nengah sektor dagang temuai komuniti.

Ba pengerami ke sama, Kaban Parlimen Julau nya mega madahka SK Nanga Meluan mega bisi nerima agih belanja penyampau RM30,000 dikena ngamatka semaya ke udah digaga taun siti nyin tadi.

Iya mega ngena awak nya meri Selamat Hari Gawai Dayak ngagai selampur komuniti Dayak di Sarawak. -RBI

BINTULU, 23 Mei – Premier Sarawak, Datuk Patinggi Tan Sri Abang Johari Tun Openg madahka iya udah minta kompeni Korea Selatan ba semikonduktor di Samalaju ngambi nembiak latih industri ari universiti perintah nengeri dikena meri penerang keterubah ngagai industri nya.

Kenu ku iya, makit industri besai, lalu enggau nya nyendiaka mayuh agi peluang gawa ngagai peranak Sarawak.

“Sida ulih gawa ba kompeni nya maya kemisi semester lalu enti mandangka prestasi ke manah, sida bisi peluang diambi nyadi pengajar tauka pengereja pengawa tetap,” ku iya.

Iya madah munyi nya ba aum pengarang berita Program Sarawakku Sayang Bagi Menua Bintulu ba Tapak Padang Bilun Lama Bintulu, ditu sehari tu tadi.

Berebak enggau nya mega, iya madahka sebuah kompeni Korea Selatan begunaka urung 1,000 iku injinir ari Sarawak dikena nyukung pengawa ngemesaika palan ngeluarka polisilikon ungkup semikonduktor di Samalaju.

Terang Abang Johari, kompeni nya udah madahka pekara nya ngagai iya apin lama ke udah.

“Pengawa ngemesaika loji nya begunaka 1,000 iku injinir lalu pangku pengawa nya udah dipandangka ba Job Sarawak,” ku iya.

Berebak enggau nya, iya nerangka pengawa ngemesaika loji nya ngembuan tuju deka nambahka pemansut polisilikon ungkup pemansut semikonduktor dikena napi guna sektor baru, kelebih agi tenaga aeroangkasa.

Ku iya nambah, Perintah Sarawak diatu benung bejalaika pansik dikena ngemansangka sektor nya.

“Bisi teknologi ke ulih mechahka penampak ngambika ulih ngasilka energi iya empu lalu tu teknologi baru,” ku iya bejaku pandak. -RBI

KUCHING, 23 Mei – Pengerami main asal baka Tematu Ethnofest bejalaika tanggungpengawa ti beguna amat dalam ngajar nembiak rebak baru ngambika ngelala sereta rinduka pesaka asal bansa Sarawak, kelebih agi bansa Bidayuh.

Kenu ku Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan, pengerembai pengerami tu mega amat ngemegahka ati lebuh iya majak dikelala sereta bulih perati ari komuniti luar pengudah diatur enggau konsisten pengelama 11 taun.

Berebak enggau nya mega, iya nangkan raban nembiak rebak baru dipinta terus ngetanka identiti enggau pesaka asal menua diri taja pan majak tepejuh enggau budaya ari menua luar.

“Raban nembiak enda patut enda ingatka budaya diri empu taja pan nitihka trend pemerindang antarabansa baka K-pop enggau budaya popular ari menua bukai.

“Anang malu bejaku ngena jaku diri empu, anang malu ngena pekayan asal sereta mantaika budaya kitai ngagai dunya laban budaya tu mih identiti kitai.

“Enti ukai kitai, sapa agi ke ulih mantaika identiti kitai? Enti ukai diatu, kemaya?” ku iya lebuh bejaku ba atur pengawa Tematu Ethnofest 2026 ditu, sehari tu tadi.

Snowdan mega ngingatka nembiak rebak baru ngambika ngelala penatai enggau identiti budaya diri empu taja pan sida rinduka budaya menua luar.

“Lebuh aku meda nembiak rebak baru enggau temegah ati ngena pekayan asal, mantaika main asal sereta ngena jaku Bidayuh dalam komunikasyen ninting hari, aku pechaya pesaka asal kitai deka terus meruan sereta mansang.

“Aku nemu bisi sida ti rinduka K-pop, budaya ari Amerika Syarikat tauka Indonesia, tang anang enda ingatka budaya diri empu, identiti diri empu.Raban nembiak enda tau enda nemu nama pekayan asal diri empu sereta belajarka main asal kitai,” ku iya.

Ku iya, penyampau temuai ke majak nambah ninting taun nyata ngayanka program tu ngembuan potensial ke besai ngambika terus ngerembai nyadi sebengkah pengerami budaya ke beguna di Sarawak.

Berebak enggau nya, iya madahka opis menteri iya bisi nyendiaka agih belanja ninting taun sepenyampau RM10 juta dikena nyukung pengawa ngatur woksyop, kelas enggau program bekaul enggau seni budaya sereta pesaka asal.

Kenu ku iya, belanja nya ulih dikena ngajar main asal, bemain kereban muzik etnik, ngaga pekayan asal enggau bemacham aktiviti bekaul enggau budaya pupu bansa di Sarawak.

Kelimpah ari nya ku iya, opis menteri mega bisi nyendiaka wang turu pengawa urung RM50 juta setaun dikena nyukung pengawa ngatur program besai nyengkaum pengerami budaya.

“Kitai patut ngetanka budaya, identiti enggau nengeri Sarawak ti dikerinduka kitai,” ku iya nyemetak.

Ba pengerami ke sama, Snowdan bisi madahka agih belanja ari opis menteri nya sepenyampau RM50,000 dikena nyukung pengawa ngatur program kelimpah meri bantu kediri empu sepenyampau RM20,000.

Berebak enggau nya, Kaban Kunsil Nengeri (ADUN) Batu Kitang, Dato Lo Khere Chiang mega bisi madahka diri deka meri pemeri RM10,000 ngagai pengatur Tematu Ethnofest 2026. – RBI

BETONG, 23 Mei – Penyedar sentang pemesai guna pengelikun jalai alun majak ditegapka nengah pengawa ngatur Program Kimpin Pengelikun Jalai Alun Beserimbai enggau Hari Gawai enggau Hari Raya Aidiladha 2026 ti nyadi ba Rumah Veriland, Engkeranji Layar enggau ngelingi Jalai Besai Pan Borneo nuju ngagai Hari Raya.

Program nya dipenyadika Dato Gerald Rentap Jabu ke nyadi Sapit Menteri Pemansang Nembiak, Lumba enggau Orang Dagang Sarawak sereta Kaban Kunsil Nengeri (ADUN) sitak N.36 Layar.

Kimpin tu diatur Opis Menteri Perengka Pengangkut Sarawak begulai enggau Opis Pelilih Menua Betong nengah kerejasama mayuh bengkah ejensi ke bekaul nyadi pengeran dikena nambahka penyedar mensia mayuh ngambika seruran ngemeratka pengelikun maya deriba, kelebih agi maya musin pengerami.

Entara isi program nya nyengkaum randau pasal pengelikun jalai alun, pengawa pemandang advokasyen pengelikun enggau pengawa nyuaka pemeri ngagai penguna jalai alun ti nyadi peransang ngagai mensia mayuh ngambika seruran ngasika undang-undang jalai alun sereta ngemeranka chara deriba enggau likun.

Ba pengerami ke sama, Dato Gerald Rentap Jabu mega bisi nyuaka agih belanja Projek Mit Menua Pesisir (MRP) ngagai Komiti Pemansang enggau Pengelikun Genturung Pendiau (JKKK) ba kandang menua besemak.

Sama bisi datai iya nya Richard Micheal Abunawas ke nyadi Residen Bagi Menua Betong, Laga Kueh, Jeffery Alfrida, Inspektor Jida ak Juing ngarika IPD Betong, bala ketuai opis, ketuai kaum enggau ketuai komuniti setempat.

Dikearap ngatur program baka tu ulih nambahka tikas penyedar mensia mayuh senentang sukut pengelikun jalai alun, kelebih agi maya musin pengerami ti meda penambah penyampau perengka pengangkut enggau pejalai penguna jalai alun. -RBI

SIBU: Siku lelaki bebadi nyawa pengudah mutosikal ke ditepan iya dipelabaka tepawah tama ngagai parit ba Jalai Oya semak Sekula Sekondari Kebangsaan (SMK St.Elizabeth) ditu, pagi tadi.

Ketuai Zon Bomba Sibu, Andy Alie madah, piak iya nerima kangau ngenyit bekaul enggau penusah nya urung pukul 7.55 pagi sebedau ngatur raban ari Balai Bomba enggau Penyah Penusah (BBP) Sentral Sibu ngelawa palan penusah nyadi.

Ku iya, raban bomba datai ba palan penusah nyadi urung pukul 8.00 pagi lalu tetemuka siku lelaki mai motosikal Modenas CT100 dalam parit ke penuh enggau ai.

“Raban Bomba diberi pemendar ari polis ngambi tudah ngagai palan ke likun sebedau pemesai Opis Menteri Pengerai (KKM) ngentaska tudah bebadi ba palan penusah nyadi,” ku iya ba sebengkah penerang.

Nangkanka nya, tubuh tudah udah nya diserahka ngagai polis ngambika ulih bejalaika atur ke silik agi. Operasyen nya tembu enggau penuh urung pukul 8.28 pagi. -RBI

SARIKEI, 23 Mei — Pengawa ngaga jalai baru ti dikelala enggau nama ‘Missing Link’ ti nyambung Nanga Bangkit, Muara Lebaan ngagai Jalai Sibu–Tanjung Manis disadang nyadi pematak besai ngagai penumbuh ekonomi di menua pesisir Sarawak.

Kaban Kunsil Nengeri (ADUN) Dr. Safiee Ahmad madah, projek sepemanjai 5.6 kilometer nya deka nembuka rentayan jalai alun ke udah bisi ke sebedau tu bedau tembu ba sitak nya.

Nitih ku iya, taja pan timpuh projek nya enda lama, tang empas iya deka besai, kelebih agi ba pengawa ngemanahka akses komunikasyen sereta meransang pemansang ekonomi kandang menua.

“Enggau pengawa ngemanjaika jalai tu, peranak deka ngasaika perengkaguna komunikasyen ti lanchar agi kelimpah ari muka peluang pemansang baru ngagai pengempu tanah ba sepemanjai koridor projek,” ku iya.

Iya madah munyi nya ngagai media pengudah ngulu pengerami mayar pampas ngagai individu ke bisi kaul enggau pengawa ngambi tanah ungkup pengawa bejalaika projek nya.

Dr Safiee madah, kandang menua ke sebedau tu dikumbai jauh diatu bisi potensial dikemansang setipak enggau pengawa ngemanahka perengka guna infrastruktur.

Ku iya, projek nya diatu benung bejalai enggau lanchar lalu dipelaba tembu dalam timpuh kurang ari 30 bulan.

Iya andal amat pengawa bejalaika projek nya ulih tembu nitihka timpuh asil ari pengawa matau ti enda ngetu ari Opis Kereja Raya. -RBI

SARIKEI, Mei 23 — Siku lelaki ditemu midang ba sebuah palan makai ditu, tumu pagi kemari.

Ketuai Polis Pelilih Sarikei, Supt Aswandy Anis madahka, polis nerima penerang bekaul enggau penusah nya kena 22 Mei 2026.

Pansik tumu tetemuka lelaki nya bisi ba premis nya lalu dipelabaka tinduk ba kedai nya urung pukul 4 pagi.

Nitihka penerang pengempu kedai nya, tudah enda mukai-mukai labuh ari bangku ke alai iya duduk sebedau piak sepital ditelefon minta bantu.

Taja pia, peresa pengerai ngentaska lelaki nya udah midang ba palan penusah nyadi.

Pansik keterubah polis tetemuka nadai elemen jenayah ditemu lalu kes tu diklasifikasyen nyadi pemati ngenyit (SDR).

Tubuh tudah dibai ngagai Sepital Sarikei ngambika diputung tasat sereta dipansik enggau silik agi.

Polis mega madahka kaban belayan lelaki nya udah mujur dikelala sereta dipadah pasal penusah nya.

Mensia mayuh dilalau anang ngaga sebarang spekulasyen ti tau ngachau pansik polis. -RBI

BINTULU, 23 Mei — Ketuai Komuniti enggau Ketuai Raban Bansa (KMKK) nyadi batang penyambung entara perintah enggau rayat dalam nentuka polisi enggau garis lalau perintah ulih dikenataika enggau efektif ngagai komuniti ba renggat baruh.

Nitih ku Sapit Premier Sarawak, Datuk Amar Douglas Uggah Embas, pengawa ngemansangka Sarawak ukai semina fokus ngagai sukut fizikal enggau ekonomi aja, tang mega patut bepalan ba penyerakup komuniti ti tegap sereta bebasaka pangan diri.

“Penyerakup kitai nyadi pelasar besai dikena ngemansangka raban bansa Sarawak ti maju, entap sereta lantang,” ku iya ke mega Menteri Wang Kedua enggau Ekonomi Baru Sarawak enggau Menteri Infrastruktur enggau Pemansang Palan Penyangkai Kapal.

Iya mansutka jaku tu lebuh ngulu Pengerami Makai Lemai KMKK di Bintulu ti diatur ba Hotel Imperial Bintulu malam tu tadi.

Pengerami nya mega ngempuruka raban KMKK di Bintulu enggau mayuh bengkah ejensi ngerapitka kaul enggau kerejasama dalam meransang pemansang Bintulu enggau Sarawak ba selampur iya.

Uggah mega ngingatka pesan niang Tan Sri Adenan Satem tauka dikelala enggau nama Tok Nan ti kala ngelalau ketuai nengeri ngambika terus “nyaga Sarawak” dikena nentuka penegap enggau pengelantang rayat pupu bansa enggau jalai pengarap dijaga.

Pesan nya ku iya, nyadi pengandal ke besai ti seruran dipegai ketuai nengeri begulai dalam neruska agenda pemansang Sarawak.

Pengerami nya mega dirichah enggau penatai Premier Sarawak, Datuk Patinggi Tan Sri (Dr) Abang Haji Abdul Rahman Zohari bin Tun Datuk Abang Haji Openg ti ngenataika pesan ngagai raban KMKK.

Sama bisi datai Sapit Premier Sarawak, Datuk Amar Awang Tengah Ali Hasan, Datuk Amar Profesor Dr. Sim Kui Hian ke mega Menteri Pengerai Mensia Mayuh enggau Pengawa Berumah enggau Perintah Lokal Sarawak, Menteri Pemansang Orang Indu, Nembiak enggau Pengelantang Komuniti Sarawak Dato Sri Hajah Fatimah Abdullah, Datuk Majang Renggi Menteri Infrastruktur enggau Pemansang Palan Penyangkai Kapal.

Bela datai mega iya nya Menteri Utiliti enggau Telekomunikasyen Sarawak Dato Sri Haji Julaihi Haji Narawi, Menteri Industri Pemakai, Komoditi enggau Pemansang Wilayah Sarawak Dato Sri Dr. Stepehen Rundi Utom, Menteri Pelajar, Inovasyen enggau Pemansang Bakat Sarawak Dato Sri Roland Sagah Wee Inn, Menteri ba Opis Premier Sarawak, Dato Sri John Sikie Tayai, Kaban Kunsil Nengeri (ADUN) Tanjong Batu Johnny Pang, ADUN Jepak Iskandar Turkee, DIrektor Opis Kereja Raya (JKR) Sarawak Datu Dr. Cassidy anak Morris enggau raban KMKK. – RBI