MERADONG, 12 Mei – Tiga iku lelaki peranak menua tu beumur 50, 33 enggau 29 taun udah ditan Raban Petugas Indu Opis Polis Pelilih Menua (IPD) Meradong dalam operasyen “Ops Saringan Khas Sarawak” kemari.

Ketuai Polis Pelilih Meradong, DSP Tansli Mering madah, pengawa ngetan nya digaga urung pukul 9.30 malam kena 11 Mei tu tadi pengudah polis nyangka semua individu nya bisi kaul enggau aktiviti salah guna dadah.

Nitihku iya, semua saspek udah nya dibai ngagai Opis Bagian Tasat Jenayah Narkotik (BSJND) Pelilih Meradong ngambika atur ke silik agi dipejalaika.

“Asil peresa ai kemi tetemuka ketiga-tiga saspek ditemu positif Amphetamine enggau Methamphetamine,” ku iya nengah penerang media sehari tu.

Ku iya, pengawa meresa rikod ke udah tetemuka saspek keterubah bisi rikod penyalah bekaul enggau dadah, lalu dua iku saspek ke bukai nadai ngembuan sebarang rikod jenayah tauka dadah.

Kes tu dipansik ari baruh Seksyen 15(1)(a) Akta Dadah Berbahaya 1952 ti nyendiaka ukum mata duit enda ngelui RM5,000 tauka jil nyentuk dua taun enti dikenuku salah.

Berebak enggau nya, polis nyemetak madahka sida beratika penyalah bekaul enggau dadah enggau berat lalu enda deka belembut ba sebarang aktiviti salah guna dadah ke enda beradat di pelilih menua nya.

Mensia mayuh ke bisi penerang bekaul enggau aktiviti dadah di pelilih Meradong dipinta ngenataika penerang ngagai polis nengah Indu Opis Polis Pelilih Meradong tauka betanya ngagai Balai Polis Bintangor nengah lumur 084-693222. -RBI

KUCHING, 11 Mei — Kompeni penerebai bilun ke diempu Sarawak, AirBorneo dipelaba deka berengkah bejalaika operasyen jet keterubah bulan Julai tu enggau jalai pemungkal ti mungkur Kuala Lumpur, Singapura, Kota Kinabalu enggau Jakarta.

Premier Sarawak, Datuk Patinggi Tan Sri Abang Abdul Rahman Johari Abang Openg madah, penumbuh serikat penerebai bilun nya ukai semina deka ngenegapka rentayan pengangkut langit nengeri tu, tang mega muka mayuh agi peluang gawa ngagai peranak Sarawak, kelebih agi dalam sektor penerebai bilun enggau industri ke bekaul.

Nitihku iya, pemansang AirBorneo setipak enggau agenda transformasyen Sarawak nuju sistem pengangkut moden sereta beteknologi tinggi.

“Ukai semina ngemansangka ART (Autonomous Rail Transit), kitai mega numbuhka kompeni penerebai bilun kitai empu ti begunaka mayuh orang ti landik nyengkaum deriba bilun.

“Insya-Allah bulan Julai tu, AirBorneo deka berengkah beoperasyen enggau jalai pemungkal ngagai Kuala Lumpur, Singapura, Kota Kinabalu enggau Jakarta,” ku iya.

Iya madah munyi nya lebuh bejaku ba Pengerami Ngintu Hari Pengereja Pengawa Renggat Sarawak 2026 ke diatur ba Palan Konvensyen Borneo Kuching kena Hari Minggu tu tadi.

Ba pemansang ke sama, iya madah projek ART ke diatu benung chakah dipejalaika nyata ngayanka pengulih Sarawak ngemansangka sistem perengka pengangkut mensia mayuh ke moden ngena belanja nengeri empu.

Ku iya, sistem pengangkut autonomi ngena teknologi hidrogen setipak enggau komitmen Sarawak ngagai pemansang gadung enggau inovasyen teknologi.

Premier Sarawak mega madahka pemansang ekonomi nengeri tu ke jampat mansang diatu matak mayuh agi peranak Sarawak ke gawa di Semenanjung pulai gawa di nengeri tu berindik ari penambah peluang kereja enggau pemansang ke majak ngerembai.

Nambahka nya, iya madahka pemansang infrastruktur nyengkaum ngaga 22 buah jematan baru enggau rentayan jalai alun di kandang menua ulu deka terus ngenegapka penumbuh ekonomi sereta ngangkatka pengelantang pendiau rayat.

“Ba bulan tu, Insya-Allah ba minggu ketiga, rayat ulih meraka Batang Lupar nengah jematan ke pemadu panjai di Malaysia ke meraka sungai,” ku iya. — RBI

LUMUT, 12 Mei — Ejensi Penerit Adat Maritim Malaysia (Maritim Malaysia) Nengeri Perak udah ngaktifka operasyen ngiga enggau nyelamat (CARILAMAT) berindik ari penusah bot ke dipelabaka ngundan Peranak Menua Luar Nadai Pemendar (PATI) ke diripotka karam ba kandang tasik Pulau Pangkor tumu pagi kemari.

Direktor Maritim Nengeri Perak, Mohamad Shukri Khotob madahka, piak iya nerima penerang pasal penusah nya urung pukul 5.30 pagi ari siku orang berikan ke tetemuka orang melepung ba tasik sebedau bantu tekala nya digaga.

“Berindik ari ripot ke diterima, Op CARILAMAT udah diaktifka pukul 6.00 pagi enggau atur pemindah aset KM GAGAH enggau BENTENG 1203 ngagai endur penusah nyadi ngambika ulih bejalaika operasyen ngiga enggau nyelamat,” ku iya nengah sebengkah penerang sehari kemari.

Ku iya, operasyen nya mega nerima kerejasama ari Raban Polis Marin, TLDM enggau komuniti orang berikan besemak.

Nitihku iya, sebuah kapal berikan menua tu mujur nyelamatka 23 iku mansa peranak Indonesia ti mungkur 16 iku lelaki enggau tujuh iku indu sebedau semua sida diiring ngena Bot PPM PAC 16 ngagai Jeti PPM Kampung Acheh ungkup tuju dokumentasyen enggau pansik ke silik agi.

“Asil pansik keterubah tetemuka penyampau semua PATI ke dipelabaka ba bot nya bisi 37 iku.

Naka ke diatu, bisi 23 iku orang ke kena penusah udah mujur dipansutka seraya ke bukai bedau dikelala lalu operasyen SAR agi dipejalaika,” ku iya nerang.

Ba pengerembai ke sama, KM GAGAH mega bisi ngeripotka tetemuka tiga beg ke ngundan gari ke dipelabaka enggi sida ba palan operasyen SAR lalu proses ngelala deka dipejalaika enggau sida ke agi idup.

Semua sida ke udah diselamatka nya udah dibai ngagai Jeti PPM Kampung Acheh sebedau diserah ngagai piak bekuasa ngambika atur nangkanka nya dipejalaika ba Indu Opis Polis Pelilih (IPD) Manjung.

Pansik tumu mega tetemuka semua PATI ke bisi kaul nya dipelabaka bekejang ari Kisaran, Indonesia kena 9 Mei tu tadi nuju ke Malaysia enggau sekeda palan ke dipelabaka nyengkaum Pulau Pinang, Terengganu, Selangor enggau Kuala Lumpur.

Operasyen SAR mega mungkur mayuh macham aset nyengkaum KD Sri Indera Sakti, Helikopter Fennec TLDM, dua buah Fast Combat Boat (FCB) TLDM, pesawat Bombardier CL-415 Ejensi Penerit Adat Maritim Malaysia enggau Bot PPM PAC 16 dikena bejalaika pengawa meresa enggau matau ba kandang endur nya.

Mohamad Shukri Khotob nyemetak madahka piak iya deka terus chakah agi bejalaika pengawa ngiga nyentukka semua orang ke tusah mujur ditemu.

Iya mega nesau mensia mayuh kelebih agi komuniti maritim ngambika ngenataika sebarang penerang nyema bisi tetemuka sida ke tusah tauka utai ti dipelaba di tasik nengah chara betelefon ngagai Palan Gerakan Maritim Nengeri Perak nengah lumur 05-683 8737 tauka talipaun penusah ngenyit 999 ngambika ulih dipejalaika enggau lengkas. — RBI

BAU, 12 Mei — Tiga iku lelaki peranak menua nya ditan pengudah diperesa positif dadah dalam operasyen penerit atur ti dipejalaika Bagi Pansik Jenayah Narkotik (BSJN), Indu Opis Polis Pelilih (IPD) Bau ngelingi Kampung Serikin, ditu kemari.

Nitihka penerang ari Ketuai Polis Pelilih Bau, Mohd Haide A. Rahman, operasyen ti dipejalaika entara pukul 11.00 pagi ngagai 12.00 tengahari nya mujur ngetan siku lelaki beumur urung 24 taun ti dipelaba bisi kaul enggau pengawa salah guna dadah.

“Udah nya, ba endur ke bukai, dua iku lelaki ke beumur entara 31 ngagai 34 taun ditan,” ku penerang nya.

Penerang nya mega madahka pemutus peresa ai kemi keterubah ba ketiga-tiga saspek tetemuka sida positif dadah.

“Semua saspek ditan ari baruh Seksyen 15(1)(a) Akta Dadah Berbahaya 1952,” ku iya.

Berebak enggau nya, Polis DiRaja Malaysia (PDRM) nyemetak madahka sebarang pengawa ngaul diri dalam aktiviti salah guna dadah deka diambi atur ke terit nitihka penetap undang-undang.

Mensia mayuh ti bisi penerang bekaul enggau aktiviti dadah dipinta ngenataika penerang nya nengah Talian Hotline JSJN Bukit Aman ba lumur 012-208 7222 tauka Talian Hotline JSJN IPK Sarawak ba lumur 017-592 9211. — RBI

BETONG, 12 Nei – Bagi Tasat Jenayah Narkotik Indu Opis Polis Pelilih Menua (IPD) Betong mujur ngetan dua iku lelaki peranak menua tu ke dipelabaka bisi kaul enggau aktiviti dadah ba pengawa ngenyit Ops Tapis Khas di kandang menua Betong.

Ketuai Polis Pelilih Betong, DSP Wan Mohamad Ali Wan Malek madah, kedua-dua saspek ke beumur 29 enggau 48 taun nya mujur ditan urung pukul 11.40 pagi sebedau dibai ngagai IPD Betong ngambika atur silik agi dipejalaika.

Nitihku iya, asil peresa ai kemi ti dipejalaika ba Opis Bagi Tasat Jenayah Narkotik IPD Betong tetemuka kedua-dua saspek positif amphetamine enggau methamphetamine.

“Pansik silik mega tetemuka kedua-dua saspek ngembuan rikod ke udah bekaul enggau penyalah dadah,” ku iya nengah penerang media.

Ku iya, kes tu dipansik ari baruh Seksyen 12(2) Akta Dadah Berbahaya 1952 ketegal ngembuan dadah ti nyendiaka ukum mata duit enda ngelui ari RM100,000 tauka jil nyentuk lima taun nyema dikenuku salah.

Kelimpah ari nya, kes nya mega benung dipansik ari baruh Seksyen 15(1)(a) akta ke sama laban ngejik dadah ngagai tubuh ti mai ukum enda ngelui ari RM5,000 tauka jil nyentuk dua taun, nyema dikenuku salah.

Berebak enggau nya, polis beratika pengawa salah guna dadah ba genturung pendiau enggau berat lalu bebendar madahka sida enda deka belembut ba sebarang pengawa bekaul enggau dadah ba pelilih menua nya.

Mensia mayuh ke bisi penerang bekaul enggau aktiviti dadah ba kandang menua Betong dipinta ngenataika penerang ngagai Balai Polis Betong ba lumur 083-472345 dikena mantu pengawa mansik enggau pengawa ngelaban penyalah dadah. -RBI

MIRI, 12 Mei – Siku lelaki peranak menua tu beumur urung 50 taun bebadi pengudah iya dipelabaka dilantak sebuah entukar ke enda dikelala ba penusah bebadi ba jalai alun di Jalai Padang Bilun Miri besemak enggau Borneo Medical Center (BMC), tumu pagi tu tadi.

Ketuai Polis Pelilih Miri, ACP Mohd Farhan Lee Abdullah madah, penusah nya nyadi urung pukul 1 pagi lebuh tudah betengahka jalai ari kanan ke ngelayang ke kiba.

Nitihka penerang iya, tudah dipelabaka dilantak ba lurung kanan jalai alun ulih sebuah entukar ke bedau dikelala identiti.

“Tudah dientaska bebadi ba palan penusah ke nyadi ketegal balat bakal,” ku iya ba sebengkah penerang.

Ku iya, kes nya dipansik ari baruh Seksyen 41(1) Akta Pengangkutan Jalan 1987.

Berindik enggau nya, piak polis minta mensia mayuh ke bisi penerang bekaul enggau penusah nya datai ke mua mantu tasat nengah chara ngaga kangau enggau Pemesai Pemansik Trafik Insp. Mohd Faizul Ab. Rahim nengah lumur 014-8582582 tauka 085-430479, tauka sebarang balai polis ke besemak.

Berebak enggau nya, penguna jalai alun dilalau ngambika seruran deriba enggau bejimat sereta ngasika atur jalai alun dikena nyeliahka sebarang penusah ke enda manah nyadi. -RBI

KUCHING, Mei 11 — Ejensi Mutarka Penusah Ngenyit Menua (NADMA) sehari tu bejalaika Operasyen Menih Remang (OPA) di Sarawak dikena mantu nambahka ujan sereta mulaika tikas ai ba kandang endur besai enggau tekat ai nengeri tu.

Operasyen ti dipejalaika ari Pangkalan Langit Kuching nya ngaul kandang endur ti ditagit iya nya Tekat Ai Bakun, Murum enggau Batang Ai nengah kerejasama Soldadu Langit Diraja Malaysia (TUDM), Opis Meteorologi Malaysia (MET Malaysia) enggau Komiti Mutarka Penusah Ngenyit Nengeri Sarawak (JPBN).

Direktor Besai NADMA, Meor Ismail Meor Akim bisi datai matau pengawa bejalaika operasyen nya begulai enggau Direktor Seksyen Pelaksanaan Operasi NADMA, Datuk Mazli Mazlan, pengari JPBN Sarawak sereta mega pemesai enggau staf MET Malaysia.

Sebuah bilun C-130 enggi TUDM dikena bejalaika operasyen nya, mai empat tangki ‘larutan garam’ sepenyampau 6,000 liter ungkup proses ngemenih remang ba kandang endur ke ditagit.

Operasyen berengkah urung pukul 1.05 lemai lebuh bilun terebai nuju kandang endur Tekat Ai Bakun enggau Murum sebedau datai urung pukul 2.06 lemai.

Dua tangki larutan garam dilepaska pukul 2.25 lemai ba kandang endur nya.

Bilun nya udah nya neruska penerebai ngagai kandang endur Tekat Ai Batang Ai lalu datai urung pukul 3.30 lemai sebedau dua tangki larutan garam ke agi tinggal disembur ba kandang endur ngelingi. Operasyen nya tembu enggau penuh pukul 4.00 lemai.

Nitihka penerang ari MET Malaysia, gaya awan ngelingi kandang endur ke ditagit nunjukka bisi remang cumulus ke engkeman dikena bejalaika operasyen nanam awan.

Peratika radar gaya hari mega tetemuka ujan berengkah labuh urung pukul 3.30 lemai ba kandang endur Tekat Ai Bakun enggau Murum, lalu kandang endur Tekat Ai Batang Ai nerima ujan berengkah ari pukul 4.30 lemai lalu majak nyadi nyentuk ke diatu.

Pengawa bejalaika OPA sehari tu dianggap mujur lebuh ujan ulih dibai nurun ba semua kandang endur ke ditagit.

Ungkup rikod, kepenudi operasyen nanam remang dipejalaika di Sarawak iya nya ba taun 2019.

Pengawa bejalaika tu digaga berindik ari peminta ari Opis Penyangga Penusah Ngenyit Sarawak berindik ari tikas ai nurun ba kandang endur nakung ai enggau tekat ai ti nyadi pun penatai bekal ai domestik di nengeri tu. — RBI

KUCHING, 11 Mei – Tuai Pemegai Menua (TYT) Negeri Sarawak, Tun Pehin Sri Wan Junaidi Tuanku Jaafar, sehari tu udah Bejadika Aum Kelima Dewan Undangan Nengeri (DUN) Sarawak Ke-19 ba Dewan Aum Kunsil Negeri Sarawak.

Penatai Tun Pehin Sri begulai enggau Toh Puan Datuk Patinggi Fauziah Mohd Sanusi disambut enggau pengawa bebaris sebedau tama ngagai balai aum lalu ngemujurka pengawa bejadika aum nya enggau rasmi.

Tun Pehin Sri disempulang Tan Sri Datuk Amar Mohamad Asfia Awang Nassar nyadi Speaker Dewan Undangan Negeri Sarawak, Sekretari Dewan Undangan Nengeri Sarawak enggau Bentara Aum.

Berebak enggau nya, TYT Tun Pehin Sri nerima teks jaku polisi ari Datuk Patinggi Tan Sri Abang Abdul Rahman Johari Abang Openg sebedau ngenataika jaku bejadika aum.

Dalam jaku dipansutka iya, TYT Tun Pehin Sri ngemeratka pemesai guna penegap politik, pengawa merintah ti efisyen enggau penyikap Sarawak napi pemar dunya nyengkaum ekonomi dunya ti enda tentu, ubah gaya hari enggau pemansang teknologi ti jampat.

Iya mega mantaika pengandal ngagai pengawa bejalaika Strategi Pemansang Pengudah COVID-19 2030 (PCDS 2030) nyadi pemansut besai transformasyen Sarawak nuju ekonomi bepenatai pemisi tinggi, kelebih agi nengah pemansang sektor kuasa tau dikena baru, ekonomi digital, industri teknologi tinggi enggau aeroangkasa.

Kelimpah ari nya, Tun Pehin Sri mega ngemeratka pengawa perintah ti seruran bebendar dalam ngerapitka seraka pemansang entara kandang mengeri enggau menua pesisir nengah pengawa ngemanahka infrastruktur pemun, penyambung, pemansang modal mensia enggau pengawa ngenataika servis mensia mayuh ti lebih efisyen, inklusif sereta bepelasarka integriti.

Iya mega minta semua Kaban Dewan terus ngenegapka penyerakup, pengelantang enggau ketuai ti bisi visyen dikena nentuka Sarawak terus mansang enggau meruan sereta lantang ngambika semua rayat ulih ngasaika.

TYT Tun Pehin Sri mega mantaika pengandal iya ngambika sesi tu bejalai enggau lanchar lalu ngambika semua Kaban Dewan ulih berandau enggau chara tuai runding, betukuh sereta bisi tanggungpengawa ungkup pemaik rayat enggau pemansang nengeri Sarawak. -RBI

PAKAN, 11 Mei – Kaunsil Pemansang Industri Getah Pekebun Mit (RISDA) diatu mangku pengawa nyadi pemeli besai produk getah ari pekebun mit dalam pengawa ngetanka rega makit sereta nentuka raban nya ngasaika penguntung ke manah sereta konsisten.

Nengah chara baru nya, pengawa meli peku getah, kelapis getah enggau getah rangkai dipejalaika terus ba rumah panjai tauka kebun dandang besai nengah pengawa ngatur RISDA Plantation Sdn Bhd enggau bayar mata duit diberi tekala nya ngagai pekebun mit.

Direktor RISDA Sarawak, Shaharuddin Saberi madah, inisiatif nya ukai semina mantu nyungkak penatai pemisi pekebun mit tang mega ulih ngurangka sida bepanggai ba orang tengah ti sebedau tu siti ari batang pemar industri getah.

Nitihku iya, RISDA mega bebendar ngemeratka pengawa bejalaika Program Getah Tebiar dikena nentuka pun getah ke udah tuai enda ditejuka tauka enda diguna, lalu ari nya ulih nyungkak produktiviti sektor nya.

Ku iya, program tu dipechaya ulih muka peluang ngagai mayuh agi pekebun mit ngambika chakah baru dalam sektor nangkal getah ke sebedau tu kurang nerima perati ketegal rega makit ke enda entap.

Iya madah munyi nya lebuh bejadi Program Pengelantang Pekebun Mit (PKPK) RISDA Bagi Menua Betong di Rumah Indit Munang, Pakan pagi tadi ke mega siti ari Genturung Pendiau Hevea Lestari ari baruh kemata RISDA Bagi Menua Betong.

Ba pemansang ke sama, RISDA pechaya ulih nyapai tagit pemansut getah menua sepenyampau satu juta metrik tan ujung taun 2030 nengah pengawa bejalaika PKPK ari baruh Pelin Strategik Pengelantang Lestari Pekebun Mit (SKEMA).

Ku Shaharuddin, program nya digaga dikena ngenegapka sosio-ekonomi komuniti pekebun mit nengah chara ti lebih fokus sereta meri empas tinggi, kelimpah ari nagit penyereta dua juta iku pekebun mit tauka Kaban Ruang Bilik (AIR) di serata menua.

Nitih ku iya, pengeransing nya berat dikena nentuka pekebun mit enda tinggal ari arus pemansang industri komoditi menua seraya meransang sida pulai gawa ba kebun dandang besai ke udah ditinggalka.

“Kitai dekaka pekebun mit chakah baru betanamka kebun dandang besai sida empu lalu RISDA deka terus ngiring sereta nyukung sida ngambika ulih ngamatka aspirasyen Sapit Menteri Besai ke mega Menteri Pemansang Menua Pesisir enggau Kandang Menua, Datuk Seri Dr Ahmad Zahid Hamidi, ngambika Malaysia nyadi sebuah ari pengeluar getah ke pemadu tebilang di dunya,” ku iya.

Kelimpah ari ngenegapka sukut ekonomi, RISDA mega mantaika pengirau ati ke pengelantang pendiau komuniti pekebun mit nengah pengawa nganjung 100 bakul pemakai ke ngundan barang ke diguna baka beras, minyak makai, tepung enggau gula.

Pemeri tu dikena mantu ngelempungka tating ungkus pengidup bala pekebun mit getah, kelebih agi dikena nyendiaka diri ngintu Hari Gawai kena 1 Jun tu ila.

Sama bisi datai Pemesai RISDA Bagi Menua Betong, Siti Hajrah Mohamed Gaus, Menijar Wilayah RISDA Plantation Sdn Bhd Sarawak, Fakrul Azfar Saadan@Sa’adon enggau Tuai Rumah Indit Munang. – RBI

SPAOH, 11 Mei — Sepenyampau 94 buah rumah panjai ba sitak Kunsil Nengeri (DUN) Bukit Saban udah nerima bantu Projek Mit Menua Pesisir (MRP) ti nyadi sebagi ari pengawa perintah Sarawak ti majak dipejalaika dikena ngenegapka pemansang komuniti sereta ngangkatka pengelantang pendiau komuniti menua pesisir.

Sapit Premier Sarawak, Datuk Amar Douglas Uggah Embas madah, bantu ke diungkupka nya ngaul pemeri ngagai Komiti Pemansang enggau Pengelikun Genturung Pendiau (JKKK) enggau Biro Indu rumah panjai dikena nyukung pengawa bejalaika program komuniti, pemansang rama enggau aktiviti komuniti besemak.

Iya madah munyi nya lebuh bejaku ba Pengerami Nyuaka Chek MRP DUN Bukit Saban ke diatur ba Spaoh, kena Hari Minggu tu tadi.

Nitihku iya, perintah Sarawak komited nentuka pemansang menua pesisir terus ditegapka nengah bemacham inisiatif ti meri penguntung terus ngagai rayat, kelebih agi ba pengawa ngangkatka tikas pengidup enggau ngenegapka ekonomi komuniti.

Berebak enggau nya, iya mega madahka sekeda projek pemansang ekonomi benung diperambu ba sitak nya, nyengkaum projek nanam sawit enggau lada dikena muka peluang mansutka penatai pemisi ngagai peranak menua pesisir.

Kelimpah ari nya, perintah mega bisi nyendiaka agih belanja sepenyampau RM5,000 ungkup tetiap pintu rumah panjai dikena bejalaika projek ngemanahka genturung pendiau dikena nentuka pengelantang enggau pengelikun peranak dijaga.

Berebak enggau nya, Kaban Parlimen Betong, Dato Dr Richard Rapu ngarapka bantu MRP ti disalur ulih dikena penuh bala penerima bejalaika program enggau aktiviti ti meri empas positif ngagai genturung pendiau rumah panjai sida empu.

Sama bisi datai Residen Bagi Menua Betong Richard Datu Michael Abunawas, Pemesai Pelilih Betong Laga Kueh, Pemesai Tadbir Spaoh Denny Lim enggau Sekretari Kaunsil Pelilih Betong Lister Clement Guwie. — RBI