KUALA LUMPUR, 22 Mei — Puan Yang Terutama (PYT) Dato’ Fenny Anak Nuli udah nerima Surat Chiri (watikah) ari Seri Paduka Baginda Yang di-Pertuan Agong, Sultan Ibrahim ba sebengkah pengerami rasmi ke diatur ba Istana Negara kena 18 Mei tu tadi.
Iya dipadu nyadi Duta Malaysia ke Austria, ti ngayanka pengarap Perintah Malaysia ba peneleba enggau ketuai iya ti mayuh dalam bidang diplomasi enggau kaul entarabansa.
PYT Dato’ Fenny ke asal ari Sri Aman, Sarawak siku graduet Ijazah Sarjana Muda Sastera (Kepujian) ari Universiti Sains Malaysia lalu nyereta pengawa Opis Menteri Luar Malaysia nyadi Pemesai Pentadbiran enggau Diplomatik dalam taun 1997.
Sebedau dichiri tu, iya kala mangku pengawa nyadi Direktor Opis Wilayah Sarawak, Opis Menteri Luar kenyau ari taun 2024.
Lebih dua dekad dalam servis diplomatik menua, iya kala nyadi Duta Besai Malaysia ke Peru ungkup timpuh 2019 ngagai 2024, kelimpah ari kala gawa ba sekeda misyen diplomatik Malaysia ba Belgium, Thailand, Poland enggau Misyen Tetap Malaysia ngagai Pertubuhan Bangsa-Bangsa Bersatu di Geneva.
Ba renggat opis menteri, iya mega mangku pengawa nyadi Sekretari Bagi Kerejasama enggau Pemansang Antarabansa sereta kala ngaul diri dalam Bagi Pekara Ekonomi enggau Rampa Menua Mayuh Piak, Sekretariat Nasional ASEAN-Malaysia enggau Bagi Pekara Wang.
Pengawa nyiri iya nyadi Duta Besai Malaysia ke Austria mega dipeda nyadi pengangkun ngagai pengulih enggau komitmen peranak Sarawak dalam ngenegapka kaul diplomatik Malaysia ba renggat antarabansa.
Ngena peluang tu, kami ari Ruai Berita Iban mega deka ngenataika jaku tabi puji, pengaga ati enggau basa ngagai Dato Fenny Anak Nuli ba pengawa nyiri iya. — RBI
#Beritalban | Ruai Berita Iban
Rinduka | Titihka | Kunsika
Kredit photo – Facebook Seri Paduka Baginda Yang di-Pertuan Agong
