SARIKEI, 14 April – Liga Sarikei nyadi batang pugu pekara dikemeratka dalam perambu Gerempung Main Bol Bagi Menua Sarikei (PBBS) ungkup taun 2026, setipak enggau pengawa ngenegapka pemansang main bol ba renggat bagi menua.
Presiden PBBS, Cr Hj Khairulddin Qalam Daud nyemetak madahka setiap Kaban Komiti Eksekutif (AJK) mesti ngembuan pemereti ati enggau tuju ti setipak enggau perambu sereta juluk program sepemanjai taun 2026.
Pekara nya dikemeratka lebuh iya nyadi chairman Aum JK Eksekutif PBBS Siri 1/2026 di ba Kompleks Lumba enggau Main Sarikei kena Hari Enam tu tadi.
Nitih ku iya, PBBS terus nyingkang nyadi sebuah gerempung main bol ti efektif nengah chara ngemeratka kaul semua piak dalam nyukung polisi pemansang Gerempung Main Bol Sarawak (FAS).
“Ari sukut nyadi ketuai, PBBS ngempuruka pengari ari mayuh macham bansa ti chakah dalam arena main bol, lalu enggau nya ngayanka semengat beserakup dalam lumba enggau main nya.
“Aku dibantu Sapit Presiden Mohd Rafi bin Sikh Ali Yusof enggau tiga iku Sapit Presiden iya nya Fakrur Redzuan bin Mahamad, Kevin Jampang anak Ranggak enggau Cr Hj Mornurazli bin Morshidi,” ku iya.
Kalinda PBBS 2026 udah diatur enggau komprehensif, berengkah enggau pengawa ngatur baru struktur pentadbiran dalam bulan Januari enggau Februari, lalu ditangkan enggau pengawa ngatur Aum Besai Ninting Taun (AGM) sebedau Ramadan.
Fokus mega diberi ngagai pengawa ngemaru Penerang ti deka Diberi (MYKB) enggau ngatur sistem organisasyen nyengkaum pengawa ngerejista kaban begulai ti ngaul kelab, gerempung ti berejista enggau kaban individu nitihka Konstitusyen PBBS.
“Ari sukut pemansang, PBBS benung merambu bejalaika Klinik Main Bol Mega ti ngaul Opis Pelajar Pelilih Julau, Meradong enggau Sarikei, ti disadang dipejalaika pemadu laun pun bulan Mei.
“Program tu deka mai nama besai dalam main bol Sarawak sereta bisi sukung ari Direktor Pelajar Nengeri Sarawak, Omar bin Haji Mahli ungkup kerejasama strategik entara sektor pelajar enggau main bol.
“Sebedau Liga Sarikei, PBBS ngemeratka pengawa ngenegapka sistem pengadil. Komiti Pengadil PBBS ti betuaika Tuan Donny Luda benung chakah ngatur baru pengawa pentadbiran sereta ngangkatka kualiti pengadil.
“Minggu nyin kemari, Seminar Undang-Undang enggau Uji Pengeregas Pengadil Zon Tengah mega bisi diatur di Sarikei, ti dipejalaika Komiti Pengadil Nengeri Sarawak enggau kerejasama unit pengadil PBBS.
“Kelimpah ari nya, kus enggau penerang pasal ngatur pekit deka dipejalaika dikena nentuka tetiap pekit diatur enggau profesional ari baruh kemata Komiti Pekit ti betuaika Cr Aziz bin Ahmad enggau bantuYazid bin Yusof,” terang Khairulddin Qalam.
Tampung iya, Liga Sarikei ti dianti-anti deka diidupka baru setipak enggau aspirasyen komuniti menua nya sereta sukung penyanding PBBS, Datuk Hj Len Talif Salleh, ADUN N41 Kuala Rajang.
Pekit tu ukai semina nyadi pelasar endur nyerungkai penau menua tu, tang mega nyadi padang endur milih pemain ngarika Sarikei ba Liga Premier Sarawak 2026 ti diperambu deka diatur urung bulan Ogos taun tu.
Berebak enggau nya, Khairulddin Qalam madahka tim nembiak Sarikei benung chakah belatih ari baruh iring jurulatih ke bepeneleba, Fadillah Bit dikena nyendiaka diri napi liga pemansang renggat nengeri ke disadang berengkah ba suku ketiga taun 2026.
“Pengawa matau penau mega ngaul kerejasama rat enggau sekula di serata pelilih menua enggau sukung raban pengajar baka Adren Akang enggau Michele Jackson ti mega kaban komiti PBBS,” terang iya enggau lenak.
Dikena nutup kalinda ninting taun, PBBS merambu deka ngatur pekit veteran Sarikei urung bulan November nyentuk Disember dikena meransang pengawa ngaul komuniti main bol ari semua renggat umur terus.
PBBS mega seruran tebuka ngagai kerejasama strategik sereta ngelaluka kaul mayuh bengkah piak dalam pengawa ngemansangka main bol Sarikei, nyengkaum randau kerejasama ti seruran dipejalai enggau Lea Sports Centre. – RBI
