BETONG, 22 Mei — Siku pekereja ladang sawit diripotka likun nadai sebarang bakal ba penusah ke nyadi bekaul enggau serang baya ba kandang endur ladang sawit di pelilih menua Betong.
Nitihka penerang berita ari Bilik Gerakan Raban Penyaga Orang Periman Malaysia (APM) Pelilih Menua Betong, sida nerima kangau ngenyit bekaul enggau penusah nya sebedau ngatur lima iku kaban ngagai endur nya ngambika bejalaika operasyen nyidi baya nya.
Lebuh datai ba endur nya, tim APM tetemuka baya nya udah mujur ditangkap sereta ditanchang pengereja pengawa ladang dalam gaya ke bakal sebedau penatai tim penyelamat.
Penerang keterubah ba endur nya tetemuka penusah nya nyadi lebuh tudah benung gawa numbuk buah sawit sebedau beberapa buah labuh ke dalam parit.
Enda mukai-mukai siku baya pansut ari kandang parit lalu nyerang ngujungka pekereja nya tekenyit lalu labuh ke dalam parit.
Dalam pengawa deka ngetanka diri, tudah ngena sandak sawit lebuh baya nya nguji deka semak.
Bala bakih ke sama gawa mega mantu nyentukka baya nya mujur enda ulih rari sereta ditanchang ba palan penusah nyadi.
Tudah ke betapi kena serang taja pia diripotka nadai bakal sereta dalam gaya ke likun.
Tim APM udah nya bejalaika pengawa ngangkut baya nya ngena lori MAN 5 tan enggau bantu pengereja pengawa kebun ladang sawit sebedau dibai ngagai PKOD Betong ngambika atur ke bukai dipejalaika.
Asil ari pengawa meresa nya, baya nya dipelabaka ngembuan pemanjai urung 11 kaki enggau pemerat urung 100 kilogram.
Baya nya udah nya diserah ngagai Kaunsil Penyaga Kampung Sarawak (SFC) ngambika atur nangkanka nya dipejalaika nitihka prosedur ngatur jelu siga.
Berindik enggau nya, APM ngelalau mensia mayuh kelebih agi komuniti ke diau tauka gawa besemak enggau kandang endur berisiko ngambika seruran bejejaga sereta lengkas ngeripot sebarang penampak jelu siga ngagai piak bekuasa dikena nyeliahka penusah ke enda dikedekaka nyadi. — RBI
#Beritalban | Ruai Berita Iban
Rinduka | Titihka | Kunsika
