KUCHING, 3 Julai – Opis Kereja Raya (JKR) Sarawak meri kelala inovasyen ‘Water Bag’ nyadi chara dikena nambahka tikas pemenuh enggau penegap tanah ami sebedau kereja ngaga jalai alun dipejalaika.

Inovasyen nya dikunsi Direktor Kereja Raya Sarawak, Datu Dr Cassidy anak Morris dalam sesi bekunsi enggau TVS seharitu tadi.

Nengah sesi nya, JKR Sarawak nerangka konsep, guna enggau penguntung ‘Water Bag’, kelebih agi dalam mantu mutarka pemar teknikal dalam bidang nya nengah chara ti lebih praktikal, likun sereta ngasi.

Teknologi nya ngemendarka pemerat tambah nya dikena enggau chara ti lebih diperambu dikena mantu ngenyampatka proses ngentapka sereta ngenegapka tanah.

Enggau nya chara nya ulih meri gaya palan ti entap agi sebedau pengawa ngaga jalai alun dipejalaika sereta pengawa ke nangkanka nya dipejalaika.

Pengawa ngasilka ‘Water Bag’ tu mandangka komitmen pengereja pengawa JKR Sarawak dalam nerenakka kreativiti enggau runding inovatif dikena nambahka penyikar bejalaika pengawa sereta ngemanahka sistem meri servis ngagai rayat. – RBI

KUCHING, 3 Julai — Parti Pribumi BERSATU Malaysia (BERSATU) Sarawak ngansak Perintah Besai berundingka mekanisme khas dikena ngurangka tating rega diesel komersial di Sabah enggau Sarawak berindik ari empas iya ngagai ungkus pengidup, operasyen dagang enggau pemansang ekonomi di nengeri tu.

Ketuai Pemadah BERSATU Sarawak, Alexander Frusis madah, taja pan Sarawak enda ngaul diri dalam pengawa bejalaika rasionalisasyen subsidi diesel baka di Semenanjung, tang rega diesel komersial ti tinggi agi meri empas ngagai rayat enggau bemacham sektor ekonomi.

Ku iya, gaya nya diasai agi laban Sarawak ngembuan pemesai urung 124,000 kilometer persegi, rentayan jalai alun ke panjai, palan pengentap pendiau ke beserak sereta ungkus logistik ke tinggi agi enti dibanding enggau tebal agi nengeri bukai.

Nitih ku iya, sektor pengawa ngaga, perengka pengangkut, betanam betupi, kebun dandang besai, berikan, kereja kayu batang enggau dagang mit enggau jelan pemesai bepanggai ba diesel dikena bejalaika operasyen ninting hari.

“Lebuh ungkus minyak niki, ungkus operasyen mega niki lalu pengujung iya meri empas ngagai penguna nengah rega barang, kereban dikena ngaga rumah, pemakai enggau bemacham servis ke majak tinggi,” ku iya nengah penerang media sehari tu tadi.

Ku Alexander, penambah ungkus operasyen mega meri pejal ngagai kunteriktor menua tu ti bejalaika projek perintah, bepotensial ngeruga penguntung sereta ngasuh projek pemansang laun dipejalaika enti nadai atur mitigasi dipejalaika.

Berindik enggau nya, iya madahka polisi bekaul enggau minyak enda tau enda beratika struktur geografi, logistik enggau ekonomi Sabah enggau Sarawak, ti ​​bebida ari Semenanjung.

Iya mega ngansak Perintah Besai berundingka mekanisme khas dikena mantu sektor kunsi ti nyadi penyungkak ekonomi nengeri tu, kelimpah ari ngarapka Perintah Sarawak deka terus ngentan chara mutarka penanggul ti ulih nyaga pemerat rayat enggau industri menua tu.

Nitihku iya, BERSATU Sarawak nyukung pengawa perintah nentuka bantu dikenataika nengah chara ti ditagit sereta ngurangka pemansut, tang tetiap polisi meseti dipejalai enggau beratika empas ke bendar ngagai rayat.

“Rayat Sarawak ukai minta diintu khas.Sida semina dekaka polisi ti adil, betatika pekara ke amat nyadi ba renggat baruh lalu enda nambahka tating ungkus pengidup ke majak mayuh pemar,” ku iya.

Ku iya, polisi ke manah ukai semina ulih ngelimatka belanja perintah, tang mega nentuka ekonomi rayat majak ngerembai lalu pemansang nengeri enda tekeruga. – RBI

KUCHING, Julai 3 – AZAM Sarawak bekerejasama enggau Yayasan Joel Yi mujur ngenegapka literasyen digital ba raban nembiak nengah pengawa ngatur Sesi Akademi Deploy AI, woksyop pemansang pemintar tiru (AI) ti berengkah ari bulan April nyentuk Julai ba Kompleks AZAM Sarawak.

Program tu mungkur penyereta urung 20 iku ti mungkur raban nembiak, kaban AZAM Young Souls enggau staf AZAM Sarawak.

Sepemanjai program nya, bala penyereta dipandangka enggau konsep pemun pemintar tiru, ngena chara AI enggau betul sereta betanggungjawap kelimpah ari latih praktikal dalam ngemansangka ‘bot’ AI ti ulih dikena ngangkatka komunikasyen, produktiviti, belajar enggau mutarka penanggul.

Yayasan Joel Yi nyadi pengatur, pengajar enggau kaban bekunsi penemu strategik, seraya AZAM Sarawak nyendiaka perengka guna latih sereta ngatur penyereta sepemanjai program nya.

Nitihka penerang ari AZAM Sarawak, pengawa ngatur woksyop nya mandangka komitmen sida ti seruran ngenegapka raban nembiak enggau pengelandik digital ti relevan dikena nangkup guna Revolusyen Industri 4.0 enggau pemansang teknologi pemintar tiru ti jampat mansang.

Pengerami nutup program nya nyadika pemujur bejalaika siri latih ti ukai semina ngangkatka penemu teknikal bala penyereta, tang mega nerenakka pengarap ati deka mansik inovasyen bepelasarka AI enggau betanggungjawap.

AZAM Sarawak mega meri besai terima kasih ngagai Yayasan Joel Yi ketegal komitmen bekunsika pengelandik sereta ngembing bala penyereta sepemanjai program nya, seraya ngarapka penemu ke diulih nya deka dikena ungkup pemansang diri, penyulut komuniti sereta nyukung aspirasyen transformasyen digital Sarawak. – RBI

KUCHING, 3 Julai – Apresiasyen DNA Opis Kereja Raya (JKR) Sarawak meseti nyadi prinsip lalau tetiap iku pengereja pengawa dalam nempa budaya organisasyen ti bepelasarka integriti, beprestasi tinggi sereta bepelasar ngenataika servis pemadu manah ngagai rayat, ku Direktor Kereja Raya Sarawak, Datu Dr Cassidy anak Morris.

Ku iya, tetiap pemesai ukai semina mesti ngembuan kompetensi teknikal, tang mega mesti nanam nilai asai ngempu, asai ati ti jampat, integriti enggau kereja beraban dikena nentuka tetiap projek enggau servis ti dipejalaika nyapai tikas pemadu tinggi.

“Nyadi orang gawa perintah, kami megai pengandal ke besai.Tetiap pengawa enggau pemutus ke digaga meseti bepelasarka profesionalisme, akauntabiliti enggau komitmen ngemeratka guna rayat enggau pemansang Sarawak,” ku iya lebuh bejadika Pengerami Nutup Kus Induksyen Khusus Opis Kereja Raya Sarawak Siri 2/2026 demalam ti digulu 250 iya pemesai opis nya.

Nitih ku iya, kus induksyen nya nyadi pelasar ke beguna dikena nempa pemereti ati rayat baru ba budaya gawa, nilai organisasyen enggau pangku pengawa strategik JKR Sarawak nyadi ejensi ketuai nengeri tu ungkup pemansang infrastruktur.

Iya mega ngelalau bala penyereta ngambika terus mai semengat “Just Keep Rising” lebuh bejalaika tanggungpengawa sida, kelimpah ari nyadika DNA JKR Sarawak nyadika lalau dikena nempa kereja ti chukup manah, iya nya ngembuan integriti sereta ulih meri empas positif ngagai organisasyen enggau komuniti.

Ku iya, komitmen nya setipak enggau aspirasyen JKR Sarawak ti deka terus ngenegapka pengawa meri infrastruktur ti bekualiti, efisyen sereta meruan nengah rambai jaku “We Build For You.”

Pengawa nutup nya nyadika pengujung Kus Induksyen Khusus Siri 2/2026 ti ngembuan tuju ngenegapka penemu, profesionalisme enggau identiti pemesai baru dikena nyendiaka diri mangku tanggungpengawa dalam servis mensia mayuh. – RBI

SRI AMAN, 2 Julai — Projek ngaga Jematan Batang Lupar 2 ngerikod siti agi pemujur ke beguna lebuh Pengerami ‘Final Stitching Ceremony’ dipenyadi Sapit Premier Sarawak, Datuk Amar Douglas Uggah Embas, kelai pengawa nyambung kepenudi struktur batang jematan nya.

Pengerami besejarah nya kelai pemujur bejalaika siti ari projek infrastruktur strategik Perintah Sarawak ti deka ngenegapka rentayan perengka pengangkut nengeri tu sereta ngemanahka agi penyambung entara Sri Aman enggau Betong nengah Jalai Besai Kedua (STR) Sarawak.

Jematan Batang Lupar 2 dipelaba deka dibuka ngagai mensia mayuh dalam bulan Ogos 2026 pengudah batang kereja ngaga Jematan udah mujur tembu nitihka perambu.

Digaga nitihka standard JKR R5, jematan nya ngembuan pemanjai sepenyampau 870 meter nyengkaum jalai navigasyen pemesai 200 meter enggau peninggi 23 meter dikena ngemendarka pejalai kapal.

Struktur ikonik nya mega disikap ngena dua menara kabel peninggi 145.5 meter ti nyadi entara kelai baru pemansang infrastruktur di Sarawak.

Kelimpah ari pengawa ngaga jematan nya, projek tu mega ngaul pengawa ngaga jalai tama sepemanjai 2.08 kilometer ti lengkap enggau sistem parit, perengka guna jalai alun enggau mayuh macham pekara pengelikun dikena nentuka pengelantang enggau pengelikun penguna.

Enti udah tembu penuh ila, Jematan Batang Lupar 2 deka nyendiaka jalai alternatif ti nyambung Sri Aman enggau Betong, lalu enggau nya ulih ngurangka penyauh pejalai ari 73 kilometer nengah Jalai Besai Pan Borneo ngagai semina 37 kilometer nengah Jalai Besai Kedua (STR) Sarawak.

Pengawa ngurangka penyauh pejalai tu dikearapka ulih meri empas ke manah ngagai pemansang ekonomi pelilih menua tu nengah chara ngenyampatka pejalai mensia mayuh enggau barang, kelimpah ari meransang penumbuh sektor dagang, betanam betupi enggau dagang temuai ba sepemanjai koridor Sri Aman–Betong.

Projek ti meri empas tinggi tu mega nyukung agenda pemansang sosio-ekonomi Sarawak ti meruan agi nengah pengawa nyendiaka infrastruktur moden enggau bekualiti, setipak enggau aspirasyen perintah ngenegapka penyambung sereta ngangkatka pengelantang pendiau rayat.

Pemujur tu mega ngayanka komitmen Opis Kereja Raya (JKR) Sarawak ti seruran bebendar nentuka tetiap projek infrastruktur strategik dipejalaika nitihka standard pemadu tinggi ari sukut kualiti, pengelikun enggau injinir, lalu enggau nya nyendiaka perengka guna ti meri penguntung timpuh panjai ngagai rayat sereta nyukung pemansang nengeri ti meruan. — RBI

KUCHING, 1 Julai – Direktor Kereja Raya Sarawak,

Datu Dr.Cassidy anak Morris ngulu Program Bejaku Ba Mua Mensia Mayuh beserimbai enggau Kus Induksyen Khas (KIK) Opis Siri 2/2026 ti nyadi manifestasyen komitmen Opis Kereja Raya (JKR) Sarawak ngenegapka pemansang modal mensia nengah pengawa ngenegapka pengelandik komunikasyen pemesai baru.

Program tu meri penerang ngagai penyereta bekaul teknik komunikasyen ti meri empas tinggi, chara ngenataika jaku ti efektif sereta strategi dikena nempa pengarap ati diri lebuh bejaku enggau mayuh macham raban.

Inisiatif nya ngembuan tuju deka ngadaka pemesai ti ukai semina ngembuan penau teknikal, tang mega ulih berandau enggau profesyenal sereta efektif, lalu ari nya ulih ngenegapka imej enggau kredibiliti JKR Sarawak ngenataika servis ngagai rayat.

Penatai Dr.Cassidy mega ngayanka sukung ti terus ari raban pengatur atas nuju pengawa nerenakka pelajar sepemanjai umur sereta ngangkatka kompetensyen pengereja pengawa setipak enggau aspirasyen opis nya ngasilka pengereja pengawa ti kompetitif, ngembuan integriti sereta bejalaika pengawa enggau manah.

Program tu entara inisiatif ngemansangka penau ti enda ngetu dipejalaika JKR Sarawak dikena nentuka tetiap pemesai baru ngembuan timbang entara pengelandik teknikal enggau lembut, enggau nya nyukung pengawa ngenataika servis mensia mayuh ti lebih efisyen, profesyenal sereta bekualiti. – RBI

#ruaiberitaiban#newsiban#beritaiban

Rindu | Titih | Kunsika

KUALA LUMPUR, 1 Julai — Kaban Parlimen Lubok Antu, YB Roy Angau Gingkoi, nyemetak madahka Rang Undang-Undang (RUU) Jenayah Siber 2026 begunaka pengawa nempa timbang entara pengawa ngenegapka pengelikun siber menua enggau pengawa nyaga hak privasi rayat sereta bebasa ngagai kedaulatan data undang-undang nengeri.

Ngambi bagi dalam pejitai pasal Rang Undang-undang (RUU) nya ba Dewan Rakyat sehari tu, iya mantaika sukung ngagai komitmen Perintah dalam meri kelala undang-undang ti lebih komprehensif dikena mutarka keruga jenayah siber ti majak kompleks, tang bepenemu sekeda atur patut ditapis dikena nentuka pengawa bejalaika atur nya lebih setipak enggau prinsip kedaulatan undang-undang.

Kenu ku iya, batang pemar ke ditapi menua kemaya hari tu ukai agi pengurang teknologi, tang lebih agi penyampat pemansang teknologi ti ngelui pengulih langkar undang-undang ke bisi diatu.

Keruga siber diatu ngelui ari pengawa nyerungkai sistem komputer, mungkur manipulasyen penerang, eksploitasyen data diri enggau pengawa jai ke diatur ti meraka garis entara menua, kelebih agi ba jeman pemintar tiru (AI), identiti digital enggau ekonomi bepelasarka data.

Iya nyemetak madahka pengawa ngenegapka pengelikun siber meseti dipejalaika setipak enggau pengawa nyaga hak privasi rayat, pemansang ekonomi digital ti meruan sereta penetap ungkup pemekuh industri enggau nadai muka ruang ngagai salah guna kuasa.

Ngenang pasal Fasal 50 bekaul enggau penumbuh Sistem Penerang Bersepadu, Roy Angau mantaika tanya bekaul enggau kuasa ke diberi ngagai Ketuai Eksekutif Ejensi Pengelikun Siber Nasional (NACSA) ngulihka penerang ari sebarang Entiti Perintah, nyengkaum perintah nengeri enggau PBT.

Ku iya, isu kedaulatan data enggau autonomi nengeri begunaka perati ke berat laban Sarawak diatu benung ngemansangka ekosistem digital enggau pangkalan data kediri empu enggau standard pengelikun enggau resia ke tinggi.

Berindik enggau nya, iya merambu numbuhka mekanisme konsultasyen formal enggau garis lalau ke terang dikena nyemelaka pematut bekunsi penerang enggau bebasaka bidang kuasa perintah nengeri, setipak enggau semengat Sempekat Malaysia 1963 (MA63).

Bekaul enggau Fasal 51, bekaul enggau tanggungpengawa am penyendia servis, iya bepenemu leka jaku “langkah ti beguna” patut dipejuraika enggau silik dikena nyeliahka penetap undang-undang entara penyendia servis digital enggau pemeranak puku industri teknologi.

Nitih ku iya, chara ngatur bepelasarka risiko baka ke dipejalaika di Singapura patut diperatika, kelimpah ari pengawa ngaga kod pengawa ke terang enggau nadai ngeruga pengelikun ‘sistem penyulitan hujung ke hujung’ (end-to-end encryption) enggau hak privasi pengguna.

Ngenang pasal Fasal 52 pasal pematut nyimpan data, Roy Angau nyemetak madahka patut bisi bida ke terang entara pengawa ngintu data ke ditagit ungkup tuju pansik ke spesifik enggau pengawa nyimpan data am ke bisi potensi ngujungka ngumpul data bebala mayuh rayat ke nadai kaul enggau sebarang penyalah.

Iya bepenemu, sebarang akses, nyaga tauka mantaika data komunikasyen diri patut dipegai mekanisme meresa enggau timbang undang-undang, nyengkaum nengah perintah Kort Tinggi, dikena nentuka hak privasi rayat terus dijaga.

Iya meri perambu ngambika Malaysia berunding bejalaika langkar beratika isi AI ti meri mandat ngena tanda ai digital, ikon visual tauka jaku tangkan nyawa ungkup isi ti dipansutka ngena teknologi pemintar tiru, sebaka enggau chara ti diberi kelala nengah Akta AI Kesatuan Eropah (EU AI Act).

Nitih ku iya, atur tu ulih nambahka transparen ba pengawa ngena teknologi AI, nagang salah nguna teknologi nya ungkup tuju nipu enggau jenayah, kelimpah nentuka inovasyen enggau pengelepas kreatif terus mansang enggau tanggungpengawa.

Lebuh nyimpulka pejurai iya, Roy Angau ngarapka semua langgur penemu ke dibantai ulih diperatika Perintah ngambika Rang Undang-Undang Jenayah Siber 2026 ulih bendar ngenegapka pengelikun siber menua enggau enda ngelalaika pengawa nyaga hak rayat, privasi, pengawa ngatur data enggau prinsip merintah menua. — RBI

#RuaiBeritaiban#News|ban

#Beritalban | Ruai Berita Iban

Rinduka | Titihka | Kunsika

Ba tebal agi orang, mahkota ratu pemajik ngelambangka pemajik, elegan enggau pemenang.

Taja pia, ba Lydia Desmond Bangga, gelar Mrs National World Malaysia 2026 baru-baru tu tadi mai reti ke jauh besai agi.

Iya ukai semina ngaku personaliti enggau gamal aja, tang lebih agi pengandal dikena meri servis ngagai komuniti, champion orang indu sereta ngangkatka maruah budaya Malaysia, kelebih agi pesaka asal komuniti Dayak.

Indu Iban ke datai ari Sri Aman, Sarawak nya pechaya pelasar ke dikembuan iya kemaya hari tu meseti dikena meri empas ke meruan ngagai mensia mayuh.

“Aku pechaya tetiap gelar datai enggau tanggungpengawa. Mahkota tu ukai semina kelai pemenang aja, tang peluang negu pengidup orang bukai, meri inspirasyen sereta mai ubah positif,” ku iya dalam randau eksklusif enggau Ruai Berita Iban.

Komitmen tu terang disalin nengah penatai khas iya nyadi Penatai Khas ba Pengerami Merarau Ngiling Bidai Dayak 2026 Pelilih Pantu, ti ngempuruka komuniti ngelingi dalam ngintu main asal, ngenegapka semengat beserakup sereta ngetanka pesaka asal Dayak.

Nitih ku Lydia, tetiap kangau ke diterima iya ukai semina dikena ngamatka jadual rasmi aja, tang mega nyadi ruang endur semak ngagai komuniti sereta ngenataika pesan ke alai budaya nyadi identiti ke patut ditanka tetiap rebak.

“Aku amat temegah ati nerima kangau nyadi temuai khas ba pengawa tu. Terima kasih ngagai pengatur pengawa ketegal pengarap, pengaga ati enggau basa ti diberi.”

“Siti basa begulai enggau komuniti ngintu pesaka budaya ti kaya baka tu, kelimpah ari bisi peluang begulai enggau mayuh individu ti meri inspirasyen,” ku iya.

Ari Renggat Pekit, Meri Inspirasyen Ngagai Komuniti

Ba Lydia, gelar Mrs National World Malaysia 2026 ukai pengujung pejalai iya ba dunya pekit pemajik gamal. Tang nya nya nyadika pun ungkup misyen ke besai agi nyadi sada nyawa ungkup orang indu sereta duta ungkup budaya.

Iya mega diberi gelar Mrs Elegance, kelimpah ari nerima kelala nyadi Grand Ambassador Mrs of Malaysia Borneo 2026, Aspiring Queen dan Mrs Most Talented, lalu enggau nya ngayanka pemujur iya ukai semina bepelasarka pemajik luar, tang mega personaliti, penau enggau nyadi ketuai.

Taja pia, taja pan semua pengangkun nya, Lydia meda pemujur ke bendar baka lebuh iya ulih meri penguntung ngagai komuniti.

“Tiap kali ngayanka diri ba mua mayuh nyadi peluang dikena meri inspirasyen, meri kuasa ngagai komuniti sereta ngangkatka budaya kitai enggau elegan, pengarap ati sereta tuju ti terang.”

“Aku ngarapka ulih terus meri servis, meri inspirasyen sereta meri bantu pulai ngagai komuniti jemah ila,” ku iya.

Pejalai Lebih Sedekad Ngaga Mimpi

“Pemujur ke dijapai sehari tu ukai utai ke datai sekelip mata aja” ku Lydia.

Lebih sedekad, Lydia nempa peneleba, pengarap diri enggau nyadi ketuai nengah mayuh macham pekit pemajik nyentukka pengujung iya mujur ngasuh Malaysia temegah ati.

Entara pemujur iya nyengkaum Gelar Lumur Dua Ratu Kebaya Nyonya Pesta Benak 2023, Kumang Gawai Entanggor 2015, Kumang Gawai Sri Aman 2014, Miss Tourism Benak 2012, Miss Photogenic Benak 2011 dan Kumang Gawai Zon Engkilili 2011.

Ba iya, tetiap pekit ukai semina deka ngulihka gelar, tang proses belajar ti nempa disiplin, penegap runding, pengelandik komunikasyen enggau pengarap ati diri.

“Aku belajar pemujur ukai datai enggau mudah. ​​Iya begunaka penetap ati, disiplin sereta pengeran deka terus belajar sereta ngemanahka diri,” ku iya.

Ngeringka Orang Indu Nengah Penemu

Di belakang imej siku ratu pemajik, Lydia mai agenda sosial ti terang.

Iya deka ngena pelasar iya mantu orang indu kelebih agi indai tunggal enggau indu ke baru nengah penusah rumah tangga, ngambika sida ulih nempa baru pengidup sida enggau lebih andal sereta bebasa.

Kenu ku iya, bantu ke diguna ukai semina sukung moral aja, tang mega penemu ke ulih ngubah pengidup sida jemah ila.

“Aku deka meda mayuh agi orang indu ngembuan penemu ba pekara wang ngambika sida ulih ngatur pekara wang sida enggau manah agi sereta ulih ngatika diri.”

“Berebak enggau nya, aku dekaka sida ngemansangka pengelandik nyadi ketuai, nambahka pengangkun diri sereta belajarka chara ngatur emosyen enggau manah agi ngambika sida ulih nempa baru pengidup sereta nempa suasana ruang bilik ti harmoni agi.”

“Pekara ke udah nyadi ukai nentuka pengidup sesiku orang jemah ila. Tetiap iku indu patut bulih peluang ngambika ulih gerai, mansang, angkat sereta nyadi versyen diri ke pemadu manah,” ku iya.

Iya pechaya, orang indu ke ngembuan penemu, pengarap ati enggau sukung deka nyadi pelasar ubah ruang bilik enggau komuniti ti tegap agi.

Pesaka Dayak Dikemegahka

Nyadi siku Iban ke bendar ari Sri Aman, Lydia beratika budaya ukai semina pesaka aki ini iya aja, tang nyadi identiti ke patut ditan sereta diberi kelala ngagai rebak dudi hari.

Iya bebendar deka ngena pelasar antarabansa iya ngelakuka penyelai budaya Dayak sereta meri kelala pengaya budaya Sarawak ngagai komuniti dunya.

“Ba aku, budaya nyadi identiti kitai. Tinggi agi kitai, besai agi tanggungpengawa nentuka pesaka tu terus dipebasa sereta dipeturun ngagai rebak dudi,” ku iya.

Mahkota Enggi Semua Orang

Dalam pengagit ati ngintu pemujur, Lydia enda ngelalaika individu ti nyadi tulang belakang pejalai pengidup iya.

Iya ngenataika pengaga ati ngagai indai iya, bala anak, sida sebilik, tim ke gawa di belakang, bala bakih enggau semua penyukung ke seruran meri sampi, undi enggau jaku peransang.

“Pemujur tu ukai enggi aku aja. Iya asil ari sukung semua orang ti pechayaka aku sereta bejalai enggau aku sepemanjai pejalai tu,” ku iya.

Enggau rambai jaku “Beauty with Purpose, Grace with Impact.”, Lydia Desmond Bangga deka ngayanka pemajik ti bendar ukai semina disukat ngena gamal aja, tang ngena pengulih orang ti meri penguntung ngagai mensia mayuh.

Ngujungka randau enggau Ruai Berita Iban, Lydia nyemetak madahka mahkota nya semina pemungkal tanggungpengawa ke besai agi, nyadi sada nyawa ungkup orang indu, duta budaya sereta inspirasyen ngagai rebak baru berani bemimpi, angkat napi pemar sereta nempa ubah ke bisi reti. — RBI

#RuaiBeritaiban#News|ban

#Beritalban | Ruai Berita Iban

Rinduka | Titihka | Kunsika

KUCHING, 1 Julai — CUEPACS Nengeri Sarawak ngansak Opis Menteri Dagang Dalam Nengeri (KPDN) ngaluska agi mekanisma bejalaika subsidi minyak diesel enggau petrol RON95 nengah chara beratika guna ke bendar pengereja pengawa perintah di nengeri tu, kelebih agi pengajar ke gawa di menua pesisir enggau menua ulu.

Chairman CUEPACS Nengeri Sarawak ke mega Presiden Gerempung Pengajar Sarawak (STU) Kullin Djayang madah, piak iya nyambut manah pemutus perintah ti nginsil perambu bekaul enggau subsidi minyak lalu nerangka nya singkang ke betul dalam nyaga pengelantang pendiau orang gawa perintah.

Ku iya, KPDN begunaka pengawa mansik ke lebih komprehensif dikena ngelala penguna ke bendar diesel enggau petrol RON95 ngambika sebarang polisi ke diberi kelala lebih ditagit, kelimpah ari nyeliahka ari tiris sereta enda meri pemerat ngagai pengereja pengawa perintah.

“Kitai merambu ngambika KPDN bekerejasama enggau Opis Pelajar Pelilih Menua (PPD) dikena ngelala sekula enggau pengajar ti amat begunaka diesel enggau petrol RON95 dalam bejalaika pengawa sida, kelebih agi di menua pesisir,” ku iya nengah penerang berita sehari tu.

Nitih ku iya, perintah mega patut beratika pengawa ngena minyak diesel ba sekula ti agi bepanggai ba injin generator nyadi pun penatai bekal kuasa karan, kelimpah ari ngena minyak petrol RON95 ungkup enjin sepit ti nyadi batang perengka pengangkut bala pengajar ngagai sekula ti semina ulih dilawa nengah sungai aja.

Ku iya, geografi Sarawak ti besai sereta gaya tanah ti agi dikelingi kampung enggau rentayan sungai reti nya bepanggai ba minyak diesel enggau petrol RON95 agi tinggi, kelebih agi ba pengawa ngenataika servis mensia mayuh.

Berindik enggau nya, iya mega merambu ngambika KPDN ngatur ‘kaul’ enggau semua opis perintah di Sarawak dikena ngulihka data ke betul bekaul enggau orang gawa perintah ti nyadi penguna besai minyak diesel enggau petrol RON95.

“Kitai dekaka polisi subsidi ti dipejalaika nya amat ditagit, ukai meri pemerat ngagai orang gawa perintah sereta beratika realiti enggau utai ti amat diguna rayat Sarawak,” ku iya. – RBI

#ruaiberitaiban#newsiban#beritaiban

Rindu | Titih | Kunsika

KUCHING, 1 Julai — Agih belanja urung RM100,000 setaun ti disediaka dikena ngenegapka pemansang pelajar di sitak Katibas udah mujur mantu mayuh agi nembiak menua pesisir nampung pelajar sida ngagai Palan Pelajar Tinggi (IPT), enggau 150 iku ari 240 iku Sijil Pelajaran Malaysia (SPM) graduet mujur nampung pelajar sida taun nyin tadi.

Kaban Kunsil Nengeri (ADUN) N.55 Katibas, Lidam Assan, madahka agih belanja ninting taun nya dikena melanja mayuh bengkah inisiatif pelajar nyengkaum nyendiaka kereban sekula, komputer, kereban malin, program motivasyen enggau aktiviti akademik dalam pengawa nambahka akses pelajar ba raban nembiak, kelebih agi ba kandang menua pesisir.

Ku iya, pemujur nya nyata ngayanka nembiak ari rumah panjai enggau menua ulu sereta entigis bisi penau besemekih sereta nempa pemujur lebuh diberi peluang, sukung enggau perengka guna pelajar ke chukup.

“Ba rumah panjai tauka menua ulu sereta entigis, kitai endang amat nemu pelajar nya chara pemadu manah dikena ngemansutka diri ari kandang penyeranta sereta nentuka nembiak rebak baru enda terus tinggal ari mayuh bengkah sukut,” ku iya madah ngagai RTM pengudah ngerikod Program Randau Pemasang WAIfm ditu.

Nitihku iya, pemujur nya dipunka kerejasama rat entara sekula, pengajar, apai indai enggau sukung ti enda ngetu ari Palan Servis DUN Katibas ti udah ngemeratka pemansang pelajar dalam ngasilka modal mensia ti kompetitif.

Kelimpah ari nya, genap iku nembiak ke mujur nampung pelajar ngagai IPT mega nerima insentif RM500 asil ari kerejasama entara Palan Servis DUN Katibas enggau Parlimen Kapit dikena mantu nampung ungkus pemungkal baka meli bup, tambang pejalai enggau barang ke diguna lebuh berengkah belajar.

Ku Lidam, iya mega ngerembaika akses ngagai perengkaguna internet enggau laptop kelimpah ari ngatur sesi meri penerang enggau palan pelajar tinggi sereta ejensi ke bekaul dikena nentuka nembiak enggau apai indai bulih penerang ke betul bekaul enggau peluang pelajar.

Ku iya, pengeransing nya ukai semina betuju nambahka tikas masuk ngagai IPT, tang mega ngadaka mayuh agi raban nembiak ti bepenemu, bepengelandik sereta bepenau nyadi ketuai enggau profesyenal ti meri pangka ngagai pemansang Katibas enggau Sarawak.

“Lebuh siku anak mujur ngindikka kaki ngagai universiti, ukai semina pengidup dudi hari sida berubah, tang pengidup semua ruang bilik mega bulih penguntung.Nya kebuah kami deka terus ngemeratka pelajar nyadi puku ke pemadu manah ungkup rebak dudi,” ku iya.

Iya ngarapka mayuh agi nembiak di Katibas deka terus bebendar nyapai penyulut sereta beambi ulih ari genap peluang pelajar ti disediaka dikena nempa pengidup dudi hari ti lebih manah ungkup diri empu, ruang bilik enggau mensia mayuh. – RBI

#ruaiberitaiban#newsiban#beritaiban

Rindu | Titih | Kunsika