SIBU, 13 April — Kaban Parlimen Sibu Oscar Ling nyemetak madahka isu tiga serangkai bekaul enggau darah tinggi, kemi manis enggau kolestrol tinggi di Malaysia diatu majak nuntung raban nembiak.
Kenu ku iya, enti chara makai enda berubah, gaya nya deka nyadi tating besai ngagai sistem pengerai jemah ila.
Berindik enggau nya, iya ngelalau mensia mayuh nyukung kimpin ‘bibas gula sepengelama sebulan’ dikena nerenakka disiplin dalam nyaga pengerai.
Iya mega ngarapka program pengerai renggat baruh baka pengawa meresa pengerai kediatur Rumah Luat ulih dipajakka jemah ila.
Program meresa pengerai enda bebayar ke diatur ba Rumah Luat, Kemuyang kena Hari Minggu tu tadi mantaika sekeda pengirau pengerai peranak menua nya.
Program komuniti ke diatur Palan Servis Parlimen Sibu nya meda 42 iku peranak menua nya beperesa pengerai pemun.
Program nya mega dipejalaika nengah kerejasama Gerempung Bidan Sarawak enggau Komiti Pengelikun enggau Pemansang Genturung Pendiau (JKKK) rumah panjai nya.
Kelimpah ari pengawa meresa pengerai pemun, servis khas ungkup orang indu baka peresa pap smear (tisih riman mua kain) enggau meresa tusu mega bisi disediaka.
Nampung penerang ari Borneo Post, ari penyampau nya, 17 iku individu ditemu ngembuan tikas gula dalam darah tinggi, lapan iku dikelala napi penyakit darah tinggi, lalu tiga iku agi ngayanka tikas kolestrol ke enda normal.
“Asil pansik tu terang nunjukka pengambi gula enggau garam kelalu mayuh ba peranak menua nya,” ku penerang nya.
