TELAGA AIR, Jun 6 – Komitmen ngenegapka pengelantang pendiau komuniti kelebih agi orang tuai majak ditegapka nengah pengawa ngatur Program ISM @ Komuniti: “Menua Sihat, Komuniti Sejahtera ti nyadi ba Dewan Komuniti Kampung Telaga Air kena Hari tu tadi.

Program nya dipenyadika Kaban Parlimen Santubong, Dato Sri Hajah Nancy Shukri, ke mega bisi ngelimpangka awak begulai enggau peranak rumah panjai sereta nyereta bemacham aktiviti ke bisi disediaka.

Nitih ku iya, program ke bansa tu bejalaika tanggungpengawa besai dalam ngangkatka penyedar komuniti ba pekara pengerai, pengelikun enggau pengelantang rama, kelebih agi ba raban orang tuai.

Bemacham aktiviti diatur sepemanjai program nya nyengkaum randau pengerai, meresa pengerai enggau pending, penerang ngagai pengelikun internet kelimpah ari aktiviti volunteer komuniti ti ngembuan tuju nempa komuniti ti lebih siru, inklusif sereta tan.

Iya mega meri besai terima kasih ngagai Institut Sosial Malaysia, Universiti Malaysia Sarawak (UNIMAS), Suruhanjaya Komunikasyen enggau Multimedia Malaysia, Eartistic enggau semua piak ti bisi kaul ngemujurka program nya.

Nyadi Kaban Parlimen Santubong, Nancy madahka pengawa bejalaika program nya di Kampung Telaga Air ukai semina ngenyemakka servis ngagai rayat, tang mega ngenegapka semengat begulai, volunteer enggau penyerakup dalam komuniti lokal.

Ba pemansang ke sama, iya mega meri besai terima kasih lebuh projek Ngangkatmanah enggau Ngemanahka Jelatung Kayu Tebelian Kampung Telaga Air ke beungkus RM200,000 udah tembu lalu diatu meri penguntung ngagai peranak Kampung Telaga Air, Kampung Sungai Aur, Kampung Sibu Laut enggau Kampung Mersan.

Nitih ku iya, perengka guna ke diangkatka nya mega meri penguntung ngagai nembiak menua tu, pengajar enggau orang berikan ke bepanggai ba jelatung nyadi jalai ninting hari sereta perengka guna ke beguna ungkup aktiviti ekonomi komuniti.

“Dikearapka pengawa baka tu deka terus nyadi pematak pemansang komuniti ti lebih lantang, siru sereta tan ungkup pengelantang rayat di Santubong,” ku iya.

Program tu ngayanka pengawa ti seruran dipejalaika mayuh bengkah ejensi enggau komuniti dalam ngenegapka pengelantang rama enggau ngangkatka kualiti pengidup komuniti menua pesisir nengah chara komprehensif enggau inklusif. – RBI

#ruaiberitaiban#newsiban#beritaiban

Rindu | Titih | Kunsika

BINTULU, 6 Jun – Pengawa jampat raban ari Balai Bomba enggau Penyah Penusah (BBP) Kidurong mujur ngerara api ti bepun ari tiang karan ti mansutka pechie api sebedau nyerarai ngagai mandang lalang semak Rumah Panjai Ambong, lemai tu tadi.

Ketuai BBP Kidurong, PBT II Rary anak Binjie, madahka piak iya nerima kangau ngenyit ari siku orang ke ngaga sebana urung pukul 3.27 lemai sebedau lima iku raban bomba ngagai endur penusah nyadi, ke bepalan urung s6 kilometer ari 12 kilometer.

“Nitihka ripot komander operasyen, lebuh penatai raban bomba ba palan nya urung pukul 3.54 lemai, ditemu endang amat bisi penusah angus ti ngaul tiang karan ti mansutka pechie api lalu nangkanka nya ngujungka api nyerarai ngagai lalang besemak.

“Madang lalang ke angus dipelabaka urung 100 kaki pemanjai enggau 30 kaki pemesai.Endur penusah nya nyadi besemak enggau Rumah Panjai Ambong baka ke dipadah orang ke betelefon nya,” ku iya.

Tampung Rary, operasyen nya betuaika PBK I Mohd Raziz Zulkepeli.

Tim operasyen tekala nya bejalaika pengawa beratika keterubah (size-up) sebedau berengkah enggau pengawa madamka api ngena arus bantu tumu ari tangki mesin enggau dua unit ‘fire beater’.

Asil ari pengawa begulai raban bomba, api mujur dirara urung pukul 4.35 lemai lalu dipadam abis enggau nadai bakal tauka bebadi nyawa diripotka.

Pengudah nentuka gaya nya likun bendar sereta nadai risiko angus nyadi baru, operasyen nya tembu pukul 4.36 lemai sebedau tim nya mupuk ngagai stesyen nya.

Sama bisi ba endur nya bisi dua iku pemesai ari SESCO mantu matau enggau pengawa bekaul enggau bekal kuasa karan nya.

Raban bomba mega ngelalau mensia mayuh ngambika lengkas ngeripot sebarang penusah ke nyadi bekaul enggau infrastruktur kuasa karan ti ngasilka pechie api dikena nyeliahka risiko penusah angus ke besai agi nyadi. – RBI

#ruaiberitaiban#newsiban#beritaiban

Rindu | Titih | Kunsika

SIBU, 6 Jun – Menteri Dagang Temuai, Seni enggau Main Asal, Dato Sri Tiong King Sing ngarapka semengat penyerakup ti tegap entara komuniti rumah panjai terus ditan, seraya ngelalau mayuh agi raban nembiak enggau orang indu datai ke mua ngambika chakah bejalaika tanggungpengawa ngemansangka genturung pendiau.

Kenu ku iya, penyulut sesebuah raban bansa ukai semina bepanggai ba pemansang fizikal aja, tang kebendar iya begunaka kaul semua renggat raban bansa, kelebih agi raban nembiak rebak baru ti deka nyadi aris nyadi ketuai jemah ila.

“Raban nembiak patut terus ngaul diri dalam aktiviti komuniti enggau pemansang kandang menua. Sida nyadi aset ti beguna ti deka nentuka kuing enggau jemah ila komuniti rumah panjai,” ku iya.

Iya madah munyi nya pengudah nembuka renggat penemuai beserimbai enggau pengerami Hari Gawai taun tu nengah pengawa ngabas lima buah rumah panjai kepenudi iya nya Rh Tonnie Ak Ili, Rh David Ngendang Ak Emui, Rh Ujang Ak Gubal, Rh Chendang Ak Ambau enggau Rh Andrew Ak Patrick Gundai.

Enggau nya penemuai tu nembuka pejalai tiga hari iya ngagai 12 buah rumah panjai ngintu pengerami Hari Gawai begulai sereta ngelawa komuniti ba renggat baruh.

Rambau penemuai nya, iya mega ngambi awak ningaka kediri penemu, guna enggau pemar ke ditapi peranak menua nya, nyengkaum infrastruktur jalai alun, bekal ai, perengka guna telekomunikasyen enggau pemansang genturung pendiau.

Kenu ku iya, timbal ke diterima nya beguna amat dikena nentuka guna rayat ulih diberi perati ke patut sereta ngambika pemansang ulih dipejalaika enggau ngasi agi nitihka gaya ke bendar ba renggat baruh.

Berebak enggau nya, Tiong nerangka semengat begulai ti dipandangka komuniti rumah panjai nyadi pekara ti amat dikemegah sereta patut diteladan.

Ku iya, penyerakup enggau penegap nyadi pelasar besai ngagai penyulut sesebuah komuniti laban gaya ke lantang ngemendarka pemansang dipejalaika enggau lanchar agi, ekonomi ngerembai lalu pengelantang pendiau rayat majak dikemanah.

“Lebuh mensia diau begulai sereta bekerejasama enggau pangan diri, bemacham pemar ulih diputarka enggau muntang agi. Semengat tu patut ditegapka dikena nentuka komuniti rumah panjai terus maju sereta besemekih,” ku iya.

Kelimpah ngulu pengerami ngintu Gawai, iya mega bisi nyereta pengerami Numbangka Ranyai sereta meda bemacham pengawa mandangka budaya ti mandangka pengaya pesaka asal komuniti Dayak.

Kenu ku iya, Ranyai ukai semina kelai pengerami Hari Gawai aja, tang mega kelai rega beterima kasih, bekunsi enggau penyerakup ti udah nyadi tulang belakang pengidup komuniti rumah panjai kenyau ari setiap rebak.

Beduduk enggau nya, iya ngarapka pesaka main asal ke nyadi identiti komuniti Dayak ulih terus dijaga sereta ditampung ngagai rebak dudi ngambika meruan relevan dalam arus pemansang moden.

Iya mega ngenataika pengaga ati ngagai semua peranak rumah panjai ti nerima penatai iya sepemanjai siri penemuai nya lalu nerangka pengawa nerima pengabang ti diberi nya nyadika bukti kaul rat entara bala ketuai enggau rayat. – RBI

#ruaiberitaiban#newsiban#beritaiban

Rindu | Titih | Kunsika

MIRI, 6 Jun — Menteri Perengka Guna enggau Telekomunikasyen Sarawak, Dato Sri Julaihi Narawi sehari tu beratika diri empu tikas penyendia Sarawak Water napi pengawa bejalaika kereja ngemanahka paip besai ba Batu 7, Jalai Miri-Lambir ti diperambu deka diatur kena 10 Jun tu ila.

Nitihka penerang ari Sarawak Water Sdn Bhd, penemuai ngagai Loji Meresi Ai Lambir nya dikena nentuka kompeni utiliti nya ngaga penyikap enggau silik dikena nentuka operasyen lanchar sereta ngurangka empas penanggul bekal ai ngagai penguna ti kena empas.

“Tuju penemuai tu dikena nentuka Sarawak Water benung ngaga penyikap enggau silik sebedau kereja ngemanahka paip ba Batu 7, Jalai Miri-Lambir kena 10 Jun minggu baru,” ku penerang nya.

Rambau penemuai nya, Julaihi mega mansik pun penatai bekal ai ari Sungai Liku, Miri dikena nentuka kapasiti bekal ai chukup disalur ngagai kandang endur ke deka kena pangka ketegal pengawa nutup sementara bekal ai sekumbang timpuh kereja ngemanah.

Nitihka penerang ari Sarawak Water, pengawa nya berat dikena nentuka guna penguna ulih ditangkup lalu sebarang pengawa ngachau ulih dikurangka.

“Iya mega ngabas diri empu pun penatai bekal ai ari Sungai Liku, Miri dikena nentuka nya chukup dikena mekal sida ti deka kena pangka ketegal bekal ai nya tejanggal,” ku penerang nya.

Penemuai nya mandangka komitmen perintah Sarawak enggau ejensi utiliti ke bekaul dalam nentuka perambu enggau bejalaika kereja ngintu infrastruktur bekal ai dipejalaika belama dikena nyamin servis terus ngagai rayat.

Sama bisi nyempulang penemuai nya, Ir George Lee, Pemangku Sekretari Mendam Opis Menteri Perengka Guna enggau Telekomunikasyen Sarawak; Puan Malseni Jamal, Pemangku Ketuai Pemesai Eksekutif Sarawak Water; Ts. Haji Tamida Da’adi, Sapit Direktor Opis Bekal Ai Menua Pesisir Sarawak sereta mega sekeda pemesai kanan Ai Sarawak. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

BINTULU, 6 Jun – Pengawa jampat raban ari Balai Bomba enggau Penyah Penusah (BBP) Kidurong udah mujur nagang sereta madamka api ti ngaul kabel ba tiang substesyen semak SMK Assyakirin tumu pagi tadi.

Nitihka Ketuao BBP Kidurong, PBT II Rary anak Binjie, sida nerima kangau ngenyit pukul 6.09 pagi sebedau luching ngenyit bemunyi seminit udah nya.

Ku iya, sebuah kerita FRT Scania enggau lima iku raban betuaika PBK II (TBBK I) Hashim Tembam terus ngesah ngagai palan penusah ke nyadi ke bepalan urung lima kilometer ari stesyen nya.

Raban bomba datai ba endur nya urung pukul 6.15 pagi lalu nemu penusah angus nya endang udah nyadi ba kabel tiang substesyen baka ke diripotka orang ke betelefon nya.

Nitihka penerang ari Komander Operasyen, asil pengawa meresa keterubah (size-up) tetemuka urung 70 peratus kabel ba tiang substesyen nya udah angus.

Bala bomba udah nya diasuh bejalaika pengawa madamka api ngena unit perengka pengerara api nyentukka api abis padam.

Penusah angus nya mujur dipadam urung pukul 6.33 pagi, lalu enggau nya ulih nagang api ari nyerarai sereta ngasuh pengerusak ke besai agi ngagai perengka guna ke dikerandau.

Pengudah nentuka nadai agi elemen angus sereta kandang endur nya likun, tim operasyen bejalaika pengawa meresa kepenudi sebedau mutuska operasyen pukul 7.19 pagi.

Nadai mansa diripotka bisi kaul enggau penusah nya lalu kebuah penusah angus nya nyadi naka ke diatu bedau ditemu.

Operasyen nya dipejalaika lima iku kaban BBP Kidurong ari baruh iring PBK II (TBBK I) Hashim Tembam nyadi Panglima Operasyen. Nadai ejensi bukai ngaul diri dalam operasyen nya. -RBI

#ruaiberitaiban#newsiban#beritaiban

Rindu | Titih | Kunsika

BETONG, 6Jun – Rega beribu keresa pekayan asal ke dipandangka beserimbai enggau Pengawa Niti Daun Gawai di Betong sehari tu ngayanka pesaka asal ukai semina kelai identiti komuniti aja, tang mega bisi potensial ke besai dikena ngadaka ekonomi sereta ngenegapka industri kreatif Sarawak.

Sapit Menteri Pemansang Nembiak, Lumba enggau Orang Dagang Sarawak, Dato Gerald Rentap Jabu madah, pengawa bejalai ti ngempuru urung 2,200 penyereta ari 32 kontinjen nya mandangka bemacham barang pekayan asal ti berega tinggi ti diasilka enggau pengelandik sereta seni ti diturunka setiap serak.

Nitih ku iya, tetiap barang ke dipandang ukai semina pekayan budaya biasa aja, tang iya nya produk asil jari ti ngaul pengawa ngena manik, tenun, aksesori enggau perengka pengias asal ke bisi rega komersial kediri empu.

“Lebih 2,000 iku penyereta nyereta pengawa bejalai tu ngena bemacham bansa pekayan asal ti ngembuan rega ke tinggi.Enti dikira sechara selampur, penyampau rega nya besai endar.

“Tu ngayanka budaya ukai semina patut diintu nyadi pesaka asal, tang mega ulih nyadi pengeraja ekonomi ti meri penguntung ngagai rayat,” ku iya lebuh bejaku ba Pengawa Niti Daun Gawai ditu, sehari tu tadi.

Ku iya, pengawa ngasilka pekayan asal ngaul mayuh macham industri nyengkaum penenun, orang dagang manik, tukang ngaga aksesori, tukang jait enggau orang ti rinduka asil pengelandik jari menua tu ti bejalaika tanggungpengawa ti beguna dalam nentuka penulin pesaka asal terus dijaga.

Ku iya, penambah peminta ba pekayan enggau perengka asal ninting musin pengerami enda terus muka peluang penatai pemisi ngagai komuniti lokal sereta mantu ngemansangka sektor ekonomi kreatif nengeri tu.

Gerald ke mega Kaban Kunsil Nengeri (ADUN) Layar madah, pengerami ngintu Hari Gawai tu mega pelasar ke pemadu manah dikena ngelakuka produk budaya menua tu ngagai temuai ari dalam enggau luar Sarawak.

Berebak enggau nya, iya nyemetak madahka pengawa Niti Daun Gawai ukai semina nyadi pengerami budaya aja, tang nyadi kelai penyerakup entara rayat bemacham pupu bansa di Sarawak lebuh disereta komuniti ari bemacham penatai asal nyengkaum Iban, Melayu, Cina enggau pengari Gerempung Main Asal Kadazan Dusun (KDCA).

“Pengawa bejalai tu mandangka penyelai komuniti Sarawak ti diau likun sereta bebasaka budaya pangan diri.Tu meh penegap ti dikemegahka kitai nyadi peranak Sarawak,” ku iya.

Ku iya nambah, pemanah pekayan asal ke bisi dipandang ukai semina narit ati komuniti menua nya aja, tang mega ngembuan potensial nyadi aset dagang temuai ke ulih ngangkatka Sarawak nyadi palan dagang temuai budaya antarabansa. -RBI

#ruaiberitaiban#newsiban#beritaiban

Rindu | Titih | Kunsika

KUCHING, 6 Jun – Aktivis hak asasi mensia Sarawak, Peter John Jaban ngansak perintah ngenyampatka pengawa bejalaika operasyen AirBorneo nengah chara ngemeratka guna rayat Sabah enggau Sarawak ke diatu betapi enggau ungkus pejalai bilun ke majak niki berindik ari peminta penerebai bilun ke majak nambah di rantau Borneo.

Ku iya, pengawa numbuhka AirBorneo ulih Premier Sarawak, Datuk Patinggi Tan Sri Abang Johari Tun Openg enggau Perintah Sarawak nyadi siti singkang strategik ti patut dipuji laban nya ukai semina projek penerebai bilun komersial aja, tang lebih agi ngayanka pengawa ngenegapka autonomi ekonomi enggau pengawa beranakka puku timpuh panjai ungkup Sarawak.

Nitih ku iya, laban perambu kompeni penerebai bilun nya majak semak enggau pengawa operasyen, batang pengawa iya meseti meruan terang, iya nya ngemeratka rayat Sabah enggau Sarawak.

“Peminta servis penerebai bilun di Borneo diatu majak nambah ba tikas ke enda kala dipeda sebedau tu.

“Gaya tu dipejalai ketegal pemansang ekonomi Sarawak ke jampat ngaul sektor kuasa, industri berat ba hab strategik baka Bintulu, pemansang ekonomi digital enggau penatai puku dagang menua luar ke berega tinggi,” ku iya.

Ku iya nerang, pemansang ekonomi ti majak ngerembai udah nambahka pejalai raban profesyenal, pemeranak puku, pakar teknikal enggau ruang bilik pulai mansang dalam enggau luar pelilih menua tu.

Taja pia, iya nyemetak madahka rayat Malaysia Timur diatu nanggung empas negatif ari pemujur tu laban tambang bilun majak niki ketegal faktor makit ti ngemeratka penguntung ari utai ti diguna rayat.

“Ungkup rayat Sabah enggau Sarawak ti bepanggai ba perengka pengangkut langit, penerebai bilun ukai utai ti patut tang utai ti diguna nyadi pekara pemun, sama beguna enggau jalai alun, jematan enggau infrastruktur digital,” ku iya.

Berindik enggau nya, Peter ngansak pengawa bejalaika AirBorneo dikelengkas bepelasarka polisi “Borneo First” ti ngeletakka pemerat rayat menua tu nyadi pekara ti pemadu dikemeratka.

Nitihku iya, taja pan pelin timpuh panjai deka muka jalai antarabansa baka nyambung Kuching enggau Nusantara di Indonesia tauka destinasyen bukai di Kalimantan ngembuan potensial ekonomi ke besai, tang AirBorneo enda ulih ngelalaika tuju asal penumbuh iya.

“Pemerat meseti diberi ngagai akses penerebai domestik ti lebih sebaka sereta mudah ungkup rayat Sarawak enggau Sabah sebedau ngerembaika operasyen ngagai menua luar,” ku iya nyemetak.

Iya mega nyemetak madahka rayat patut ngasaika tambang bilun ti entap sereta ulih dibeli sepemanjai taun, kelebih agi maya musin pengerami, pengawa budaya enggau pekara ti beguna ba ruang bilik.

Ku iya, nadai siku rayat patut ditagang pulai ke menua asal semina ketegal rega tikit niki langit, lalu ngujungka ngeruga penyerakup ruang bilik enggau integrasyen nasional.

“Peminta penerebai bilun ti majak nambah diatu nyata ngayanka makit tu amat begunaka kompeni penerebai bilun menua tu ti amat meretika guna rayat Borneo.

“AirBorneo meseti jampat ngisi penyelai tu lalu nentuka penyulut ekonomi Sarawak disalin ngagai mobiliti ke manah agi, tambang ke adil agi sereta kaul ruang bilik ke tegap agi ungkup semua rayat Sabah enggau Sarawak,” ku iya. -RBI

#ruaiberitaiban#newsiban#beritaiban

Rindu | Titih | Kunsika

PAKAN, 6 Jun – Hari Gawai ukai semina nyadi pengerami ninting taun pengudah musin ngetau padi, tang mega nyadi pelasar ke beguna dalam nyaga adat, budaya sereta ngerapitka kaul ruang bilik enggau komuniti Dayak ke udah ditampung ari setiap serak.

Chairman Kaunsil Industri Kayu Ramu Malaysia (MTIB), Datuk Larry Sng Wei Shien madah, Hari Gawai nyadi kelai terima kasih ngagai asil ke udah diulih, kelimpah ari nyadi pelasar dikena nentuka pesaka asal komuniti Dayak terus dijaga sereta dikerinduka rebak dudi hari.

Kenu ku iya, taja pan diatu mayuh nembiak rumah panjai mindah ke mengeri tauka ngentapka pendiau diri ba luar kandang menua asal sida ketegal pengawa, pelajar enggau peminta pengidup moden tang pengerami Gawai mengkang nyadi siti pengerami ti dianti enggau ati ti gaga ninting taun.

“Pengerami tu meri awak ngagai komuniti pulai ke menua asal, begempuru enggau diri sebilik sereta begulai baru enggau kaban belayan, bala bakih sereta komuniti menua nya.

“Ngagai sida ke nadai peluang pulai ketegal komitmen kereja enggau sekeda tanggungpengawa, semengat Gawai agi diintu nengah nilai begulai, beserakup sereta angkunka pesaka asal ke nyadi kelai komuniti Dayak,” ku iya lebuh ngulu Pengerami Ngabang Hari Gawai Dayak, ba Rumah Ranggak Manding Baru empai lama.

Iya mega nyemetak madahka semengat kerejasama enggau pangan diri enggau penyerakup ti diterenak nengah tradisyen nemuai sereta aktiviti komuniti bejalaika tanggungpengawa ti beguna dalam ngenegapka pengelantang enggau pemansang komuniti pupu bansa di Sarawak.

Berebak enggau nya, Larry ke mega kaban Parlimen Julau ngarapka pengerami Gawai taun tu mai pengaga, pengelantang enggau berekat ngagai semua rayat, kelimpah ari besampi ngambika komuniti tu terus diberekat enggau pengerai ti manah, pengidup ti lantang sereta pemujur ba tetiap bidang ti dikereja sida.

Ba pengawa ke sama, iya mega madahka pengawa nyuaka agih belanja penyampau RM29,000 ngagai sekeda gerempung komuniti dikena nyukung pengawa bejalaika aktiviti enggau pemansang kandang menua.

Entara penerima pemeri iya nya Komiti Pemansang enggau Pengelikun Genturung Pendiau (JKKK) Rumah Ranggak Manding Baru, Biro Indu Rumah Ranggak, Biro Indu Rumah Indit, Biro Indu Rumah Eddy, Manding enggau Biro Indu Rumah Gata.

Nyimpul jaku iya, Larry meri selamat “Gayu Guru, Gerai Nyamai” ngagai selampur komuniti Dayak seraya nesau semengat beserakup enggau begulai ti nyadi teras pengerami Gawai terus ditan ungkup penyulut begulai. – RBI

#ruaiberitaiban#newsiban#beritaiban

Rindu | Titih. | Kunsika

BAU, 6 Jun — Siku nembiak timpang pendiau (OKU) ari Kampung Jagoi Duyoh ditu udah diripotka lenyau kenyau ari Hari Satu tu tadi, lalu mensia mayuh dipinta datai ke mua mantu nyadung sebarang penerang dikena nyidi penunga iya.

Nembiak nya benama Kasli Anak Senon, 17, ke bisi penimpang runding, kepenudi iya dipeda pansut ari rumah sida sebilik di Kampung Jagoi Duyoh kena 1 Jun urung pukul 2 lemai mai beg sandik.

Nitihka penerang ke Indu Opis Polis Pelilih (IPD) Bau, Kasli enda ulih ditelefon pengudah pansut ari rumah lalu bedau pulai nyentuk ke sehari tu, lalu enggau nya meri pengirau ati ngagai sida sebilik.

Berindik ari pengelenyau nya, polis udah mansutka notis orang lenyau lalu minta kerejasama mensia mayuh mantu nyidi nembiak nya.

Laban Kasli tu siku individu OKU, barang sapa ke betemu enggau iya tauka bisi penerang pasal endur enggau pemindah iya dipinta lengkas madah ngagai piak bekuasa dikena nentuka pengelikun enggau pengelantang iya dijaga.

Sebarang penerang tau dikenataika ngagai Pemesai Pemansik, Insp. Vimal Nathan nengah lumur 016-5456454 tauka sebarang balai polis ke besemak.

Mensia mayuh mega diperansang bekunsika pemadah tu dikena ngerembaika pengawa ngiga sereta mantu ngiga Kasli enggau sida sebilik enggau naka pengelengkas. – RBI

#ruaiberitaiban#newsiban#beritaiban

Rindu | Titih | Kunsika

BETONG, 5 Jun — Pengawa ngaga Jalai Besai Kedua Sarawak (STRR) Ulu Paku–Ulu Kota Link Road ke benung dipejalai diatu disadang deka meri empas ke besai ngagai pemansang sosioekonomi enggau rentayan penyambung jalai peranak di kandang menua ulu, kelebih agi di Pakan enggau kandang ngelingi Betong, Julau.

Nengah penerang Facebook, Pauline Bret madahka projek nya entara perengkaguna infrastruktur ti lama udah dianti komuniti menua nya lalu deka ngubah landskap penyambung jalai di menua pesisir.

Iya bekunsika peneleba diri ti ngayanka ubah ke besai asil ari pemansang infrastruktur ba kandang menua nya.

Kenu ku iya, kelia, pejalai ngabas rumah panjai niang indai iya di Sungai Ipoh, Pakan begunaka pejalai kaki sepemanjai hari ketegal nadai jalai alun ti nyambung kandang menua nya.

“Suba, enti deka nemuai ngagai rumah panjai niang indai di Sungai Ipoh, Pakan patut bejalai kaki sepemanjai hari sebedau bisi jalai alun.

“Udah bisi jalai, agi mih bejalai bejam-jam sebedau nuan bisi perengka pengangkut kediri empu.

Diatu, urung 15 minit aja pejalai nengah jalai kampung,” ku iya.

Ku iya, lebuh projek jalai alun baru nya tembu ila, timpuh pejalai ngelawa kandang endur nya dipelabaka dipandakka ngagai semina urung lima minit aja.

Nitih ku Pauline, projek nya ukai semina meri pemaik ngagai peranak menua tu aja, tang mega deka nyadi jalai alternatif ti beguna nyambung selatan Sarawak enggau kandang menua tengah enggau utara nengeri tu.

“Enti jalai tu udah tembu, pejalai ari selatan Sarawak ke Betong pia mega ke Pakan, Julau, Sarikei, Sibu ke utara Sarawak ulih ngena jalai pandak nengah Simpang Ulu Paku,” ku iya.

Iya nerangka projek nya nyadi berekat pemansang ti dianti komuniti menua pesisir pengelama bepuluh taun lalu dipechaya ulih ngangkatka pengelantang rayat sereta ngenyampatka penumbuh ekonomi kandang menua.

“Sarawak Second Trunk Road (STRR) entara projek infrastruktur strategik ti dipejalaika perintah Sarawak dikena ngenegapka rentayan jalai alun nengeri tu, ngemanahka penyambung entara menua pesisir enggau mengeri, sereta ngerapitka seraka pemansang di serata Sarawak” ku iya. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika