SARATOK, 3 Julai — Raban Penyaga Mensia Mayuh Malaysia (APM) Pelilih Saratok mujur bejalaika operasyen nangkap siku ular sawa batik ba kandang Taman Muhibbah malam kemari, pengudah nerima kangau ngenyit ari mensia mayuh.

Nitihka ripot operasyen, kangau ngenyit nya diterima urung pukul 8.20 malam sebedau tim raban Skuad Bravo dianjung ngagai endur nya dua minit udah nya lalu datai urung pukul 8.26 malam.

Lebuh datai ba endur nya, raban APM tetemuka ular sawa batik ba baruh sebuah kerita repuk enggi orang ke ngaga sebana nya.

Operasyen nangkap tekala nya dipejalaika ngena perengka khas nyengkaum penyepit enggau perengka nangkap ular.

Operasyen nangkap siku ular sawa batik ti dipelabaka pemanjai urung 14 kaki enggau pemerat urung 20 kilogram nya mujur tembu urung pukul 8.41 malam

Tim operasyen udah nya mulaika diri ngagai Palan Kawalan Operasi Pelilih Menua (PKOD) urung pukul 8.48 malam.

Sepemanjai operasyen nya, gaya nya ulih dijaga lalu nadai penusah ke enda manah diripotka nyadi.

APM Pelilih Saratok mega ngelalau mensia mayuh ngambika seruran bejejaga, kelebih agi ba genturung pendiau enggau rampa menua ke berisiko nyadi palan jelu siga, lalu lengkas betanya ngagai piak bekuasa nyema penusah baka nya bisi nyadi.

PADAWAN, 3 Julai — Sebuah menara komunikasyen komersial ke diempu Sacofa Sdn. Bhd di Kampung Semaru, Padawan, Kuching angus pukul 6.00 lemai, 1 Julai 2026.

Urung 1,000 penguna ngelingi Kampung Semaru, Kampung Biya Parang, Kampung Sapit, Kampung Kiding, Kampung Pesang enggau Kampung Subang dituntung ketegal penusah angus nya.

Penguna ba kandang endur ke kena empas dipelaba ngasaika servis komunikasyen tejanggal nyengkaum bungkur arus penyambung ke kurang sereta sambung ke enda konsisten.

Kebuah penusah angus nyadi agi benung dipansik piak bekuasa.

Pengudah penusah nya dikelala, Suruhanjaya Komunikasyen enggau Multimedia Malaysia (MCMC) udah ngasuh penyendia servis ke bisi kaul enggau lengkas bejalaika atur mitigasi, nyengkaum optimumka bungkur rangkaian ke bisi ba kandang endur ke besemak sereta bejalaika Stesyen Penerima Pangkalan Mudah Alih (PBTS) dikena nentuka penerus servis komunikasyen penuh ungkup dipulaika baru.

Sekumbang timpuh ngemanahka baru, penguna ke kena empas dilalau ngena perengka guna ba NADI Kampung Darul Islam Belimbing, NADI Kampung Bengoh enggau NADI Kampung Braang Bayur dikena ngulihka servis komunikasyen enggau perengka guna digital ke bekaul.

MCMC deka terus matau gaya nya sereta bekerejasama rat enggau Sacofa Sdn Bhd, penyendia servis, enggau ejensi ke bekaul dikena nentuka pengawa mulaika pemanah dipejalaika enggau lanchar, lalu enggau nya ngenyampatka pengawa mulaika servis komunikasyen ngagai penguna ke kena empas. — RBI

SRI AMAN, 2 Julai — Pengawa bejalaika mayuh bengkah projek infrastruktur ti meri empas ke besai ba Sarawak nyadi bukti ke nyata Perintah Gabungan Parti Sarawak (GPS) terus bebendar ngenegapka pemansang nengeri tu, ngemanahka agi penyambung sereta nentuka pengelantang pendiau rayat dijaga.

Sapit Premier Sarawak Datuk Amar Douglas Uggah Embas ke mega Menteri Infrastruktur enggau Pemansang Palan Penyangkai Kapal Sarawak, madah pemujur bejalaika projek strategik tu mandangka pengulih perintah nengeri merambu sereta bejalaika agenda pemansang enggau konsisten, sistematik sereta efektif.

Nitih ku iya, Jematan Batang Lupar 2 ke diatu benung ba renggat kepenudi digaga entara projek infrastruktur strategik ti deka meri empas ke besai ngagai pemansang pelilih menua, kelebih agi ba pengawa ngemanahka aksesibiliti enggau nyungkak aktiviti sosio-ekonomi komuniti ngelingi.

“Suba, penyakal madahka Premier Sarawak semina bejaku sengapa aja “Cakap ai liur sahaja” Diatu, sida iya meliur.”

“Munyi ku orang Iban, “nitik ai liur” Utai ke disemaya suba diatu udah tebukti sereta ulih dipeda kita empu.

“Tu mih ke ngemegahka ati rayat Sarawak,” ku iya lebuh bejaku ba Pengerami Sambung Kepenudi (Final Stitching) Jematan Batang Lupar 2 di Sri Aman, sehari tu tadi.

Uggah nyemetak madahka pemujur tu asil ari iring YAB Premier Sarawak, Datuk Patinggi Tan Sri Abang Johari Tun Openg, ti seruran ngemeratka pemansang infrastruktur nyadi pelasar penumbuh ekonomi enggau pengelantang rayat selampur.

Ku iya, pengawa Premier Sarawak ti seruran bebendar ngulihka perengka guna belanja dikena bejalaika projek besai udah ngemuntangka agenda pemansang nengeri tu dipejalaika enggau sistematik agi, enggau empas ti besai sereta enda ngetu.

“Tu meh visyen enggau misyen Premier Sarawak nentuka semua kandang menua kelebih agi menua pesisir ulih disambung enggau manah agi nengah pengawa nyendiaka infrastruktur ti bekualiti.

“Pengeransing iya ngulihka belanja ungkup projek pemansang patut diberi puji laban nya meri penguntung terus ngagai rayat,” ku iya.

Berebak enggau nya, iya nyemetak madahka Perintah GPS deka terus ngemeratka pemansang menua pesisir nengah pengawa bejalaika projek jalai alun, jematan enggau perengka guna pemun ke bukai dikena ngerapitka seraka pemansang entara kandang mengeri enggau menua pesisir.

Iya mega minta rayat beratika pengawa perintah bepelasarka pengulih enggau asil pemansang ke udah nyadi nyata, ukai semina bepelasarka dawa tauka tuduh ari piak ke nadai tanggungpengawa aja.

Nitihku iya, pemujur bejalaika projek strategik di serata Sarawak nyata ngayanka Perintah GPS ukai semina merambu pemansang aja, tang nentuka tetiap perambu dipejalaika ungkup pemaik rayat.

Chara tu ku iya nerang, deka terus nyadi penyungkak ngagai pemansang ti lebih setimbang, ngenegapka rentayan penyambung sereta muka mayuh agi peluang ekonomi ngagai rayat di serata Sarawak.

Sama bisi nyempulang Sapit Menteri Infrastruktur Enggau Pemansang Palan Penyangkai Kapal Sarawak, Datuk Ir Aidel Lariwoo, Kaban Kunsil Nengeri (ADUN) Lingga YB Puan Dayang Noorazah binti Awang Sohor, Sekretari Mendam bagi Opis Menteri Infrastruktur enggau Pemansang Palan Penyangkai Kapal Sarawak (MIPD) Datu Chiew Chee Yau, Direktor Opis Kereja Raya (JKR) Sarawak Datu Adj. Prof. Ir. Ts. Gs. Br. PMr. QPr. Dr. Cassidy anak Morris sereta ketuai-ketuai opis ke bukai. — RBI

MIRI, 2 Julai — Opis Bomba enggau Penyah Penusah Malaysia (JBPM) Zon 6 Sarawak, Balai Bomba enggau Penyah Penusah Lutong, udah mujur bejalaika operasyen servis khas nangkap siku ripong ba sebuah palan pengentap pendiau di Lot 5806, Taman Senadin, Jalai Sena 1E, ditu sehari tu.

Kangau ngenyit nya diterima urung pukul 12.54 tengah hari sebedau jentera FRT Scania ari Balai Bomba enggau Penyah Penusah Lutong dipindah ngagai palan nya urung pukul 12.55 tengahari lalu datai urung pukul 1.02 tengahari.

Lebuh datai ba endur nya, tim operasyen ti betuaika Pemesai Operasyen bejalaika pengawa meresa keterubah gaya (size-up) lalu ngentaska bisi ripong ti ngembuan pemanjai urung 1.5 meter ba kandang endur diau baka ti diripotka.

Tim nya bejalaika pengawa enggau jampat ngena perengka khas nangkap ular sebedau mujur nagang sereta nangkap reptilia nya enggau likun, nadai sebarang penusah ke enda manah nyadi.

Operasyen nya tembu urung pukul 1.23 lemai pengudah kandang endur nya dientaska likun, sebedau raban nya mulaika diri ngagai stesyen enggau operasyen dijaga.

JBPM ngelalau mensia mayuh ngambika seruran bejejaga, kelebih agi ba genturung pendiau ke besemak enggau semak tauka kandang endur ke tebuka, lalu lengkas betelefon ngagai talipaun penusah ngenyit 999 nyema bisi betapi enggau situasyen berisiko.

Operasyen tu ngaul raban lima iku enggau sebuah kerita Scania FRT ari Balai Bomba enggau Penyelamat Lutong. — RBI

SRI AMAN, 2 Julai – Projek Ngaga Jematan Batang Lupar 2 nyapai siti agi jerana besejarah lebuh Pengerami Kepenudi dipenyadika Sapit Premier Sarawak, Datuk Amar Douglas Uggah Embas sehari tu, kelai pengawa nyambung kepenudi struktur jematan nya ke nyadi sebengkah ari projek infrastruktur strategik Perintah Sarawak.

Pengerami nya kelai pemujur bejalaika projek ti deka ngenegapka rentayan perengka pengangkut nengeri sereta ngemanahka agi sambung entara Sri Aman enggau Betong nengah Jalai Kedua Sarawak.

Jematan Batang Lupar 2 dipelaba deka dibuka ngagai mensia mayuh dalam bulan Ogos 2026 lalu deka meri empas ke besai ngagai sistem komunikasyen di tengah Sarawak nengah chara nyendiaka jalai ke lebih efisyen, likun sereta selamat.

Digaga nitihka standard JKR R5, jematan nya ngembuan pemanjai sepenyampau 870 meter nyengkaum jalai pemesai 200 meter enggau peninggi 23 meter dikena napi guna jalai sungai.

Struktur ikonik tu mega disukung dua menara kabel peninggi 145.5 meter ti udah nyadi tanda baru ba kandang menua nya.

Skop projek nya mega mungkur pengawa ngaga jalai tama sepemanjai 2.08 kilometer ti menyana enggau sistem parit, perengka guna jalai alun enggau tukuh pengelikun dikena nentuka pengelantang enggau pengelikun penguna.

Enti udah tembu penuh ila, jematan nya deka nyambung Sri Aman enggau Betong nengah Jalai Kedua Sarawak, lalu enggau nya ngemandakka penyauh pejalai ari 73 kilometer nengah Jalai Besai Pan Borneo ngagai semina 37 kilometer aja.

Pengawa ngurangka penyauh pejalai tu dikearapka ulih ngangkatka pemanah logistik, ngenyampatka pemindah mensia mayuh sereta meransang penumbuh sektor dagang, betanam betupi enggau dagang temuai ba sepemanjai koridor Sri Aman–Betong.

Projek tu mega setipak enggau agenda pemansang ti meruan Sarawak ba pengawa ngenegapka rentayan infrastruktur moden, nambahka penyambung serantau enggau ngerapitka seraka pemansang entara kandang mengeri enggau menua pesisir.

Pemujur Pengerami Kepenudi nya ngayanka komitmen Opis Kereja Raya Sarawak ti seruran bejalaika pengawa nentuka tetiap projek strategik dipejalaika nitihka standard ti pemadu tinggi ari sukut kualiti, pengelikun, injinir enggau ngatur projek, lalu enggau nya nyukung aspirasyen Perintah Sarawak ti deka nyendiaka infrastruktur tikas dunya ti lebih lama. – RBI

LAWAS, 2 Julai — Pengawa jampat raban Balai Bomba enggau Penyah Penusah (BBP) Lawas mujur madamka api, penusah angus ti ngaul sebuah kerita Proton Saga BLM semak Sekolah Kebangsaan (SK) Pusat, Jalai Trusan, pagi tadi.

Palan Operasyen Opis Bomba enggau Penyah Penusah Malaysia (JBPM) nerima kangau ngenyit bekaul enggau penusah nya urung pukul 8.27 pagi sebedau sebuah entukar Mercedes Atego begulai enggau sebuah entukar Unit Servis Penyah Penusah Perubat Ngenyit (EMRS) dianjung ngagai endur nya.

Raban bomba datai urung pukul 8.29 pagi lalu tekala nya berengkah bejalaika operasyen pengudah bejalaika pengawa beratika keterubah (size-up).

Nitihka penerang ari Komander Operasyen, penusah angus nya mungkur bonet mua sebuah kerita Proton Saga BLM taun 2008.

Tim bomba bejalaika pengawa madamka api ngena hos bantu ari entukar nyentukka api abis padam.

Dikena nentuka nadai risiko angus baru, raban bomba muka bonet mua entukar ngena ‘crowbar’ ngambika ulih diperesa enggau silik agi.

Tim nya mega masang empang pengelikun ngelingi entukar sebedau ngetuka operasyen.

Operasyen nya mujur dikuasa penuh urung pukul 8.45 pagi lalu tembu lima minit udah nya.

Semua raban enggau aset operasyen udah nya pansut ari palan nya lalu selamat datai baru ba stesyen pukul 8.57 pagi.

Kerita ke bisi kaul nya sebuah kerita Proton Saga BLM bechura coklat-unggu. Nadai penusah bebadi nyawa tauka bakal diripotka nyadi ba penusah nya.

Kebuah penusah angus nyadi enggau anggar pengerugi agi dalam pansik Opis Pengerara Api enggau Penyah Penusah Malaysia. — RBI

SEBAUH, 2 Julai — Sebauh Agrofest 2026 sekali agi deka ngerichahka kalinda pengawa betanam betupi Sarawak enggau mayuh macham aktiviti ti ngerinduka ati sepengelama tiga hari bepun ari 10 nyentuk 12 Julai 2026 ba Palan Entepan Kerita BDA, Pasar Sebauh.

Berambai jaku “Inovasyen Betanam Betupi Ke Pengelikun Pemakai”, pengerami ke diatur Opis Betanam Betupi Sarawak ngempuruka mayuh macham program bepelasarka pengawa betanam betupi, pengawa dagang, pemansang komuniti enggau pemerindang dikena matak penyereta ari komuniti lokal sereta mega temuai ari luar kandang menua nya.

Entara batang pematak ke bisi disediaka iya nya Jualan Agro Sarawakku Sayang ari PPK enggau FAMA, pengawa pemandang enggau pengawa bejual produk betanam betupi menua tu, kelimpah ari Sebauh Kitchen ke bisi nyendiaka bemacham pemakai khas.

Ungkup orang ti rinduka aktiviti luar enggau rekreasyen, piak pengatur mega bisi ngatur Sebauh Agrofest Fun Run, pekit nginti undang enggau kasam ikan tapah sereta mega kus ngaga baja organik ti mantaika penyereta chara betanam betupi ti meruan.

Pengerami nya mega dirichah enggau pekit nyura, ngaga kek asal, Battle of the Band, final The Voice of Sebauh, pemerindang ari artis menua tu enggau nyabut tikit benasit ti bisi nyendiaka bemacham perais ti narit ati ngagai bala temuai.

Pengerami Bejadi enggau Pengerami Nangguhka Agrofest Sebauh 2026 mega diperambu deka diatur sepemanjai pengerami nya.

Mensia mayuh dilalau merambu penemuai sida nengah chara belalauka tusun program ti udah disedia dikena nentuka sida enda tinggal ari aktiviti ti dipilih sida.

Raban pengatur ngarapka Sebauh Agrofest 2026 ukai semina nyadi pelasar dikena ngelakuka asil betanam betupi Sarawak enggau produk menua tu empu, tang mega ulih ngenegapka kaul entara pekebun, orang dagang enggau komuniti dalam pengawa ngenegapka sektor agro-pemakai dikena nentuka pengelikun pemakai menua enggau nengeri tu. – RBI

KUCHING, 2 Julai — Kontinjen Sarawak sekali agi ngayanka penyulut sida dalam seni pemerindang lebuh sida mujur bulih tiga gelar champion ari lima kategori ke dipasuk sida ba Pekit ‘Tarian Sekolah-Sekolah Malaysia’ (TASEEM) Renggat Nasional 2026 ke diatur ba Hotel Sunway Big Box, Johor, berengkah ari 28 Jun hingga 1 Julai 2026.

Pemujur ke chukup manah tu mandangka komitmen Opis Pelajar Nengeri (JPN) Sarawak ti terus ngenegapka pengerembai penau seni ba raban nembiak, kelimpah nyaga sereta negika pesaka main asal menua tu nengah pelajar.

Ba kategori Duo Tarian Asal Melayu Sekula Primari, SK Nanga Tada, Opis Pelajar Pelilih (PPD) Kanowit dipadu nyadi champion.

Sekula nya mega nerima Anugerah Koreografi Pemadu Manah enggau Anugerah Penari Indu Pemadu Manah.

Ungkup kategori Tarian Rentak Malaysia Sekolah Rendah, SK Nanga Kota, PPD Julau mega mujur nyadi champion, kelimpah ari teulihka tiga anugerah khas iya nya Anugerah Tusun Muzik Pemadu Manah, Anugerah Koreografi Pemadu Manah enggau Anugerah Penari Lelaki Pemadu Manah.

Berebak enggau nya, SMK Kapit No.2, PPD Kapit mujur menang ba kategori Main Rampai Asal Melayu Sekolah Sekondari, kelimpah ari nerima Anugerah Kostum enggau Tatarias Pemadu Manah, Anugerah Koreografi Pemadu Manah enggau Anugerah Penari Indu Pemadu Manah.

Ba kategori Tarian Rakyat Cina Sekula Sekondari, SMK Chung Hua (CF) Miri, PPD Miri mujur bulih lumur tiga sereta nerima Anugerah Juri Khas.

Berebak enggau nya, SMK Bakun, PPD Belaga mega ngemegahka nengeri tu lebuh bulih penuduk lumur tiga ba kategori Trio Tari Rakyat Etnik/Kreatif Sekolah Menengah.

Pemujur tu asil ari pengawa begempung semua piak ti bekaul, nyengkaum pemesai ari Opis Pelajar Nengeri Sarawak, Opis Pelajar Pelilih Menua, sekula, pengajar embing, apai indai enggau pesereta ti udah ngayanka komitmen, disiplin enggau dedikasyen ti tinggi sepemanjai timpuh latih enggau pekit.

Opis Pelajar Nengeri Sarawak meri besai terima kasih ngagai Pegawai Meja Kesenian JPN Sarawak, Cikgu Dayang Nur Azuree binti Awang Ghazali, Pengurus Pasukan Cikgu Lenny anak Jimbai enggau Cikgu Juti anak Belong, sereta raban Pegawai Teknikal Negeri Kesenian (Seni Tari) iya nya Cikgu Hasbi bin Yahya, Cikgu Mohamad Zuzy bin Abd Sani, Cikgu Hairi bin Haider, Cikgu Bermas anak Julin dan Cikgu Jaya bin Abdul Manan, ketegal pengawa nyadi ketuai, iring enggau komitmen sida sepemanjai pekit tu.

Pengerindu mega dikenataika ngagai semua pengajar mentor, apai indai enggau penyaga ti seruran meri sukung ti tegap dalam nentuka penyereta kontinjen Sarawak nyapai tikas pemadu manah.

Pemujur tu ukai semina ngemesaika nama Sarawak ba panggau nasional, tang mega ngayanka penau nengeri tu ngadaka rebak baru ti nyulut dalam bidang seni enggau main asal.

Pemujur tu mega ngenegapka aspirasyen Opis Pelajar Nengeri Sarawak ngambika terus nerenakka penyulut pelajar sechara holistik, setipak enggau pengawa ngemansangka modal mensia ti kreatif, bebudaya sereta kompetitif.

Pemujur ke dijapai ba TASEEM 2026 nyadi bukti ke bukai ti madahka dedikasyen, kerejasama enggau komitmen ari semua piak ulih ngangkatka prestij main sekula ngagai tikas ke tinggi agi, lalu enggau nya mai basa ngagai Sarawak ba panggau nasional. — RBI

LAWAS, 2 Julai — Projek Pemansang Pengelandik Komuniti (PPKK) Lawas, Sarawak ti majak ngenegapka agenda pemansang sosioekonomi komuniti menua pesisir nengah pengawa bejalaika Makmal Pemansang enggau Pemansut Produk Kraf Manik sereta Makmal Pengemansang enggau Pemansut Produk Linut (Renggat 3) ke diatur pengelama empat hari berengkah 22 ngagai 25 Jun 2026 ke bepalan ba Dewan Stadium Tertutup Lawas, Sarawak.

Program Makmal Pemansang enggau Pemansut Produk Kraf Manik (Renggat 3) digulu 20 iku pesereta, lalu Makmal Pemansang enggau Pemansut Produk Kraf Batik Linut (Renggat 3) mungkur 15 iku pesereta.

Kededua program nya dipejalaika serentak nyadi chara besepadu dalam ngenegapka pengelandik komuniti dalam bidang kraf bepelasarka pesaka asal menua tu.

Sepemanjai timpuh bejalaika pengawa, pesereta ngulu sesi belajar teori enggau sesi latih praktikal ti dipejalaika ninting hari ari pukul 8.00 pagi nyentuk 5.00 lemai.

Modul latih nya mungkur aspek ngasilka produk, pemansang langkar, ngangkatka kualiti enggau ngangkatka rega komersial produk kraf dikena nambahka daya besemekih ba makit.

Sesi embing enggau latih nya dipejalaika pemesai ari Kraftangan Malaysia nengah Kraftangan Sarawak, enggau pengawa ngaul orang dagang kraf menua tu, Johiam Jitui.

Sama bisi ngaul diri iya nya pemesai ari PKKM Pampang Sarawak ti bejalaika pengawa, ngemata enggau koordinator program ba renggat baruh.

Pengawa bejalaika makmal tu sebagi ari inisiatif ti seruran dipejalaika dikena ngenegapka komuniti lokal nengah pengawa mindahka penemu, ngangkatka pengelandik teknikal enggau pemansang dagang bepelasarka industri kraf.

Pengawa tu dikearapka ulih nambahka potensial penatai pemisi ruang bilik sereta nempa peluang ekonomi baru, meruan agi ungkup komuniti Lawas.

Bala pengatur meri besai terima kasih ngagai semua pesereta ketegal komitmen enggau pemujur sida mujur nembuka kesemua program.

Dikearapka semua penemu enggau pengelandik ke diulih ulih dikena enggau ransing dalam pengawa ngenegapka ekonomi ruang bilik enggau komuniti ngelingi.

Program tu mega ngayanka komitmen ti seruran dipejalaika dikena ngenegapka industri kraf nyadi siti ari pemansut besai pemansang ekonomi menua pesisir ti inklusif sereta kompetitif. — RBI

KUCHING, 3 Julai — Chairman Angkatan Zaman Mansang (AZAM) Sarawak, Datuk Haji Ismawi bin Haji Ismuni, sehari tu ngerintaika tuju baru gerempung nya nengah aspirasyen “AZAM Progresif” ti ngemeratka pengawa ngenegapka komunikasyen strategik, penegap pemansang nembiak.

Kuing tu ngembuan tuju deka ngenegapka pangku pengawa AZAM nyadi gerempung komunikasyen ‘partisipatif’ ti progresif, inklusif sereta responsif ngagai guna komuniti enggau agenda pemansang Sarawak.

Iya nyemetak madahka chara baru tu nyadi penerus legasi AZAM ke udah digaga lebih empat dekad, tang ditegapka enggau chara ke lebih dinamik setipak enggau ubah rampa komunikasyen ke diatu.

Nitih ku iya, AZAM ukai semina nyadi pemanchar penerang aja, tang lebih agi befungsyen nyadi pelasar pemereti ati, nempa pengarap sereta meransang penyereta komuniti dalam proses pemansang nengeri.

“Komunikasyen kemaya hari tu ukai agi semina ngenataika penerang aja. Komunikasyen begunaka pengawa nempa pemereti ati.

“Ari pemereti ati datai pengarap. Ari pengarap datai penyereta. Lalu ari penyereta datai pemansang ti lebih inklusif sereta meruan,” ku iya.

Iya madah munyi nya lebuh ngenataika jaku pemungkal nyadi Chairman AZAM Sarawak beserimbai enggau Gempuru Gawai AZAM Sarawal 2026 berambaika leka jaku “Berindik Ka Adat, Bejalai Ka Pemansang”, ti ngempuruka Kaunsil Direktor, pengatur pengawa, pengereja pengawa, kaban gerempung AZAM Young Souls (AYS), alumni strategik organisasyen.

Datuk Haji Ismawi mega nyemetak madahka rambai jaku pengerami Gawai taun tu mandangka komitmen AZAM ngetanka nilai, budaya enggau identiti gerempung, seraya mansik chara baru ti lebih relevan enggau guna ke diatu.

Iya nyemetak madahka timbang entara ngetanka tradisyen enggau tebuka ngagai ubah nyadi pelasar ti beguna dalam nentuka pengelantang gerempung.

“Penyulut ke bendar ukai milih entara tradisyen tauka ubah, tang baka ni kitai nyemelaka dua nya, ngetanka nilai ke manah seraya berani mansik chara baru ungkup pemaik komuniti,” ku iya.

Ngenang pasal pangku pengawa jemah ila, AZAM deka terus ngenegapka komunikasyen pemansang nengah mayuh bengkah pelasar nyengkaum pemansang nembiak, isi digital, penerbitan, inovasyen teknologi enggau kerejasama strategik enggau ejensi perintah, institusyen pelajar, industri enggau komuniti.

Chara tu betuju nentuka komuniti ukai semina nerima penerang aja, tang mega meretika polisi, arapka penerang ti dibantai sereta chakah ngambi bagi dalam agenda pemansang nengeri.

Iya mega nyemetak madah, pemujur organisasyen ukai patut disukat semina bepelasarka pemayuh program ti dipejalaika, tang lebih agi nengah tikas pengandal enggau penyereta komuniti dalam inisiatif ti benung dilanchar.

“Aku deka meda AZAM terus mansang nyadi gerempung ti dikearap, dipebasa sereta relevan; nyadi jematan entara komuniti, perintah, institusyen pelajar, industri enggau kaban strategik nengah komunikasyen ti konstruktif,” ku iya.

Berindik enggau nya, iya minta semua pengereja pengawa AZAM terus ngenegapka budaya kereja ti bepelasarka integriti, profesionalisme, inovasyen enggau semengat diri sebilik nyadi pelasar penyulut organisasyen.

Gempuru Gawai AZAM Sarawak 2026 nyadi pelasar ti beguna amat dalam ngerapitka kaul entara Kaban Lembaga Pengarah, pengurusan, pengereja pengawa, alumni, AZAM Young Souls (AYS) enggau bakih strategik, kelimpah ari ngerami penyelai budaya ti nyadi tiang pengelantang dalam komuniti Sarawak.

Setipak enggau aspirasyen “Movement for Progress”, AZAM komited deka terus ngenegapka pangku pengawa nyadi organisasyen komunikasyen ti progresif nengah pengawa ngenataika penerang ti inklusif, ngenegapka komuniti enggau kerejasama strategik ti nyukung pemansang ti meruan di Sarawak.

Sama bisi datai Associate Prof Madya Dr Margaret Chan Kit Yok
(Setiausaha Kehormat, AZAM Sarawak), Mdm. Norjanah Haji Razali (Ahli Lembaga
Pengarah, AZAM Sarawak), Mr Ali Bin Suhaili (Ketua Pegawai Eksekutif, AZAM Sarawak), Barisan Ahli Lembaga Pengarah AZAM, Ahli-Ahli AZAM, Rakan-rakan strategik AZAM. — RBI