Ba tebal agi orang, mahkota ratu pemajik ngelambangka pemajik, elegan enggau pemenang.
Taja pia, ba Lydia Desmond Bangga, gelar Mrs National World Malaysia 2026 baru-baru tu tadi mai reti ke jauh besai agi.
Iya ukai semina ngaku personaliti enggau gamal aja, tang lebih agi pengandal dikena meri servis ngagai komuniti, champion orang indu sereta ngangkatka maruah budaya Malaysia, kelebih agi pesaka asal komuniti Dayak.
Indu Iban ke datai ari Sri Aman, Sarawak nya pechaya pelasar ke dikembuan iya kemaya hari tu meseti dikena meri empas ke meruan ngagai mensia mayuh.
“Aku pechaya tetiap gelar datai enggau tanggungpengawa. Mahkota tu ukai semina kelai pemenang aja, tang peluang negu pengidup orang bukai, meri inspirasyen sereta mai ubah positif,” ku iya dalam randau eksklusif enggau Ruai Berita Iban.
Komitmen tu terang disalin nengah penatai khas iya nyadi Penatai Khas ba Pengerami Merarau Ngiling Bidai Dayak 2026 Pelilih Pantu, ti ngempuruka komuniti ngelingi dalam ngintu main asal, ngenegapka semengat beserakup sereta ngetanka pesaka asal Dayak.
Nitih ku Lydia, tetiap kangau ke diterima iya ukai semina dikena ngamatka jadual rasmi aja, tang mega nyadi ruang endur semak ngagai komuniti sereta ngenataika pesan ke alai budaya nyadi identiti ke patut ditanka tetiap rebak.
“Aku amat temegah ati nerima kangau nyadi temuai khas ba pengawa tu. Terima kasih ngagai pengatur pengawa ketegal pengarap, pengaga ati enggau basa ti diberi.”
“Siti basa begulai enggau komuniti ngintu pesaka budaya ti kaya baka tu, kelimpah ari bisi peluang begulai enggau mayuh individu ti meri inspirasyen,” ku iya.
Ari Renggat Pekit, Meri Inspirasyen Ngagai Komuniti
Ba Lydia, gelar Mrs National World Malaysia 2026 ukai pengujung pejalai iya ba dunya pekit pemajik gamal. Tang nya nya nyadika pun ungkup misyen ke besai agi nyadi sada nyawa ungkup orang indu sereta duta ungkup budaya.
Iya mega diberi gelar Mrs Elegance, kelimpah ari nerima kelala nyadi Grand Ambassador Mrs of Malaysia Borneo 2026, Aspiring Queen dan Mrs Most Talented, lalu enggau nya ngayanka pemujur iya ukai semina bepelasarka pemajik luar, tang mega personaliti, penau enggau nyadi ketuai.
Taja pia, taja pan semua pengangkun nya, Lydia meda pemujur ke bendar baka lebuh iya ulih meri penguntung ngagai komuniti.
“Tiap kali ngayanka diri ba mua mayuh nyadi peluang dikena meri inspirasyen, meri kuasa ngagai komuniti sereta ngangkatka budaya kitai enggau elegan, pengarap ati sereta tuju ti terang.”
“Aku ngarapka ulih terus meri servis, meri inspirasyen sereta meri bantu pulai ngagai komuniti jemah ila,” ku iya.
Pejalai Lebih Sedekad Ngaga Mimpi
“Pemujur ke dijapai sehari tu ukai utai ke datai sekelip mata aja” ku Lydia.
Lebih sedekad, Lydia nempa peneleba, pengarap diri enggau nyadi ketuai nengah mayuh macham pekit pemajik nyentukka pengujung iya mujur ngasuh Malaysia temegah ati.
Entara pemujur iya nyengkaum Gelar Lumur Dua Ratu Kebaya Nyonya Pesta Benak 2023, Kumang Gawai Entanggor 2015, Kumang Gawai Sri Aman 2014, Miss Tourism Benak 2012, Miss Photogenic Benak 2011 dan Kumang Gawai Zon Engkilili 2011.
Ba iya, tetiap pekit ukai semina deka ngulihka gelar, tang proses belajar ti nempa disiplin, penegap runding, pengelandik komunikasyen enggau pengarap ati diri.
“Aku belajar pemujur ukai datai enggau mudah. Iya begunaka penetap ati, disiplin sereta pengeran deka terus belajar sereta ngemanahka diri,” ku iya.
Ngeringka Orang Indu Nengah Penemu
Di belakang imej siku ratu pemajik, Lydia mai agenda sosial ti terang.
Iya deka ngena pelasar iya mantu orang indu kelebih agi indai tunggal enggau indu ke baru nengah penusah rumah tangga, ngambika sida ulih nempa baru pengidup sida enggau lebih andal sereta bebasa.
Kenu ku iya, bantu ke diguna ukai semina sukung moral aja, tang mega penemu ke ulih ngubah pengidup sida jemah ila.
“Aku deka meda mayuh agi orang indu ngembuan penemu ba pekara wang ngambika sida ulih ngatur pekara wang sida enggau manah agi sereta ulih ngatika diri.”
“Berebak enggau nya, aku dekaka sida ngemansangka pengelandik nyadi ketuai, nambahka pengangkun diri sereta belajarka chara ngatur emosyen enggau manah agi ngambika sida ulih nempa baru pengidup sereta nempa suasana ruang bilik ti harmoni agi.”
“Pekara ke udah nyadi ukai nentuka pengidup sesiku orang jemah ila. Tetiap iku indu patut bulih peluang ngambika ulih gerai, mansang, angkat sereta nyadi versyen diri ke pemadu manah,” ku iya.
Iya pechaya, orang indu ke ngembuan penemu, pengarap ati enggau sukung deka nyadi pelasar ubah ruang bilik enggau komuniti ti tegap agi.
Pesaka Dayak Dikemegahka
Nyadi siku Iban ke bendar ari Sri Aman, Lydia beratika budaya ukai semina pesaka aki ini iya aja, tang nyadi identiti ke patut ditan sereta diberi kelala ngagai rebak dudi hari.
Iya bebendar deka ngena pelasar antarabansa iya ngelakuka penyelai budaya Dayak sereta meri kelala pengaya budaya Sarawak ngagai komuniti dunya.
“Ba aku, budaya nyadi identiti kitai. Tinggi agi kitai, besai agi tanggungpengawa nentuka pesaka tu terus dipebasa sereta dipeturun ngagai rebak dudi,” ku iya.
Mahkota Enggi Semua Orang
Dalam pengagit ati ngintu pemujur, Lydia enda ngelalaika individu ti nyadi tulang belakang pejalai pengidup iya.
Iya ngenataika pengaga ati ngagai indai iya, bala anak, sida sebilik, tim ke gawa di belakang, bala bakih enggau semua penyukung ke seruran meri sampi, undi enggau jaku peransang.
“Pemujur tu ukai enggi aku aja. Iya asil ari sukung semua orang ti pechayaka aku sereta bejalai enggau aku sepemanjai pejalai tu,” ku iya.
Enggau rambai jaku “Beauty with Purpose, Grace with Impact.”, Lydia Desmond Bangga deka ngayanka pemajik ti bendar ukai semina disukat ngena gamal aja, tang ngena pengulih orang ti meri penguntung ngagai mensia mayuh.
Ngujungka randau enggau Ruai Berita Iban, Lydia nyemetak madahka mahkota nya semina pemungkal tanggungpengawa ke besai agi, nyadi sada nyawa ungkup orang indu, duta budaya sereta inspirasyen ngagai rebak baru berani bemimpi, angkat napi pemar sereta nempa ubah ke bisi reti. — RBI
#Beritalban | Ruai Berita Iban
Rinduka | Titihka | Kunsika
