PENAMPANG, 12 Jun — Siku lelaki peranak menua tu beumur 34 taun ditemu lesi semak lobi sebuah kondominium di pelilih Penampang pengudah iya dipechayaka labuh ari unit endur diau ba ringkat 26 begunan nya.

Ketuai Polis Pelilih Penampang, Superintenden Sammy Newton, nengah siti penerang kemari madahka, Indu Opis Polis Pelilih (IPD) Penampang nerima ripot bekaul enggau penusah nya kena Hari Empat tu tadi.

Nitihku iya, pansik tumu tetemuka mansa dipelabaka labuh ari unit endur diau sebedau ditemu lesi semak lobi kondominium nya.

“Peresa ba palan penusah udah dipejalaika Bagi Siasatan Jenayah, IPD Penampang begulai enggau Tim Forensik D10, Indu Opis Kontinjen Polis (IPK) Sabah lalu tetemuka nadai elemen jenayah ditemu ke ulih dikaitka enggau penusah tu,” ku iya.

Ku iya, tubuh mansa udah dianjung ngagai Opis Perubat Forensik, Sepital Queen Elizabeth I, Kota Kinabalu ngambika diperesa, dikena nentuka kebuah pemidang ke bendar.

Nitih ku iya, kes nya udah diklasifikasyen nyadi Ripot Pemati Ngenyit (SDR) nganti pemutus buntas tasat enggau pansik ke silik agi.

Superintenden Sammy mega ngelalau mensia mayuh anang ngaga sebarang spekulasyen ti tau ngachau pansik polis.

“Mensia mayuh mega dipinta ngetu ngerembaika gambar tauka video penusah nya dikena bebasa sereta nyaga sensitiviti sida sebilik enggau kaban belayan mansa,” ku iya.

Ku iya, sebarang penerang bekaul enggau penusah nya tau dikenataika ngagai pemesai pansik kes, Sarjan Mejar Patrick Duffy Francis ba lumur 013-838 5335 tauka betanya ngagai IPD Penampang nengah lumur 088-712222. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SRI AMAN, 12 Jun — Raban Penyaga Pengelikun Mensia Mayuh Malaysia (APM) Pelilih Sri Aman mujur nangkap siku ular sawa batik urung lima kaki pemanjai ke ditemu ba kandang manuk di Kampung Tengah, ditu, sehari tu tadi.

Nitihka penerang ari APM Sri Aman, sida bisi nerima kangau ari siku peranak genturung pendiau bekaul enggau penatai jelu reptilia nya ti dipelabaka tama ngagai kandang manuk iya.

Tekala nya pengudah nerima penerang nya, seraban raban APM Sri Aman udah dianjung ngelawa endur penusah nyadi ngambika bejalaika operasyen nangkap ular sawa nya.

Asil peresa tetemuka siku ular sawa batik bisi dalam kandang nya.

Operasyen nangkap reptilia nya mujur dipejalaika ngena teknik nyintak, sebedau ular nya mujur ditangkap enggau likun nadai ngaul sebarang penusah ke enda dikedeka nyadi.

APM Sri Aman ba penerang nya mega ngelalau mensia mayuh ngambika seruran bejejaga lalu anang ngambi atur kediri empu nyema betapi enggau jelu bisa tauka jelu siga ke bisi potensial tau ngeruga pengelikun.

Mensia mayuh dilalau lengkas betanya ngagai talipaun penusah ngenyit tauka piak bekaul ngambika atur ke patut ulih dipejalaika enggau lengkas.

Pengawa ti jampat raban APM Sri Aman betapi enggau penusah nya sekali agi ngayanka penyikap ejensi nya dalam nentuka pengelikun genturung pendiau seruran dijaga. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

LAWAS, 12 Jun – Projek Ngaga Tambah Empat Unit Rumah Pengajar enggau perengka guna ke bekaul di SK Long Luping, Lawas udah ngerikod penyulut ke meransang lebuh iya udah manggai 80.87 peratus penyulut fizikal, lalu enggau nya 22.87 peratus dulu ari timpuh ke udah ditetapka.

Pemujur nya entara batang fokus penemuai kereja Direktor Kereja Raya Sarawak, Datu Dr.Cassidy anak Morris, ti neruska pengawa iya meresa palan projek dikena beratika pemansang ke diatu sereta nentuka pengawa bejalaika iya bejalai enggau lanchar.

Penyulut ke dijapai nya ngayanka komitmen tinggi enggau kerejasama rat semua piak ke bisi kaul dalam nentuka projek ulih ditembuka tumu agi ari pelin asal enggau nadai ngeruga sukut kualiti, pengelikun enggau spesifikasyen ke udah ditetapka.

Projek tu mungkur pengawa ngaga tambah empat unit rumah pengajar begulai enggau perengka guna ke bekaul ti ngembuan juluk deka ngangkatka pengelantang, pengelikun enggau perengka guna endur diau raban pengajar di menua pesisir.

Pengawa nyendiaka perengka guna endur diau ti lebih nyamai sereta kondusif dikearapka ulih mantu narit sereta ngetanka staf pengajar di menua pesisir, lalu enggau nya nyukung pengawa ngenegapka pengawa ngenataika pelajar ti bekualiti ngagai komuniti lokal.

Penemuai nya mega meri awak ngagai Direktor Kereja Raya Sarawak beratika diri empu status pengawa bejalaika projek sereta nentuka tetiap komponen pemansang dipejalaika nitihka standard ti udah ditetapka dikena nangkup guna peranak menua nya. – RBI

#ruaiberitaiban#newsiban#beritaiban

Rindu | Titih | Kunsika

SARIKEI, 12 Jun – Balai Bomba enggau Penyah Penusah (BBP) Sarikei udah ngatur Pengerami Ramah Tamah Raya, Pengerami Ngiling Tikai enggau Lambaian Kasih Sanjungan Budi nengah kerejasama Raban Bomba Volunteer (PBS) Lubok Lemba ba BBP Sarikei malam tadi.

Program ti berengkah pukul 7.00 lemai nya ngembuan tuju deka ngempuruka Opis Bomba Sarikei beserimbai enggau pengerami nya, kelimpah ari meri besai terima kasih ngagai jasa enggau pengawa kaban ti udah meri servis ngagai opis nya.

Pengerami nya mega ngerami PBK II (TBK I) Wan Hamzah bin Wan Malek ti deka pinchin enggau pemindah PBK II (TBK I) Jaffariza bin Ismail, kelai meri terima kasih ngagai servis enggau dedikasyen sida sepemanjai gawa enggau BBP Sarikei.

Nyadi simbolik nutup pengerami Hari Gawai 2026, pengerami Ngiling Tikai diatur pengudah pengawa pemerindang Ngajat ti dibantaika kaban PBS Lubok Lemba, enggau nya ngerichahka agi gaya pengerami enggau isi budaya komuniti Dayak.

Pengerami nya udah dipenyadi Ketuai Stesyen BBP Bagi Menua Sarikei, PPgB Vincent Baling Yabi. Sama bisi datai iya nya Ketuai Stesyen BBP Bintangor, PPgB Mahmudin Naruddin, Pemesai Operasyen Stesyen, Chairman PBS Lubok Lemba enggau bala raban.

Ngatur program baka tu ukai semina ngenegapka kaul pangan diri entara raban bomba enggau diri sebilik, tang mega nyadi pelasar dikena meri terima kasih ngagai pemeri bala kaban sereta nerenakka semengat beserakup enggau begulai dalam komuniti. – RBI

#ruaiberitaiban#newsiban#beritaiban

Rindu | Titih | Kunsika

LAWAS, 12 Jun – Sarawak nempa siti agi sejarah beguna ba pemansang infrastruktur lebuh pengawa ngaga terowong keterubah di nengeri tu diatu benung dipejalai di Bukit Pagon, Lawas.

Projek ti meri empas tinggi nya nerima perati lebuh Direktor Kereja Raya Sarawak, Datu Dr. Cassidy anak Morris, bejalaika penemuai kereja ngagai palan endur ngaga projek nya dikena beratika diri empu pejalai projek ke diatu, ti dianggap nyadi kelai baru dalam pemansang injiniring enggau jalai alun Sarawak.

Terowong nya nyadi komponen besai ari baruh Pakej 4 Projek Jalai Penyambung Sarawak-Sabah (SSLR) Fasa 2, projek strategik ti dipejalaika ari baruh Opis Menteri Kereja Raya Malaysia.

Penatai terowong keterubah di Sarawak ukai semina mandangka pemansang teknologi enggau penau injinir ti majak nambah di nengeri tu, tang mega kelai transformasyen infrastruktur ti deka ngubah landskap perengka pengangkut di utara Sarawak.

Pengudah tembu ila, projek SSLR Fasa 2 dikearapka ulih ngenegapka rentayan sambung darat entara Sarawak enggau Sabah, seraya mega muka akses ti lebih efisyen, likun sereta jampat ngagai genturung pendiau di kandang menua ulu.

Semua iya, SSLR Fasa 2 ngaul pengawa ngaga 335.54 kilometer jalai alun lalu naka ke diatu udah nyapai penyulut fizikal 11.39 peratus.

Pengawa ngaga terowong keterubah Sarawak dipeda nyadi siti singkang ke besejarah ke nyadi kelai nengeri tu nyingkang ngagai jeman baru pemansang infrastruktur moden, lalu enggau nya ulih ngenegapka agenda pemansang pelilih menua sereta nambahka penyambung ungkup pemaik rayat. – RBI

#ruaiberitaiban#newsiban#beritaiban

Rindu | Titih | Kunsika

SPAOH, 11 Jun — Sesi Lihat Urus Projek Infrastruktur ari baruh Ejensi Pemansang Bagi Menua Betong (BDDA) ke diatur ba Balai Mensia Mayuh Spaoh sehari tu nyadi pelasar ke beguna dikena ngenegapka koordinasyen enggau ngenataika penerang bekaul enggau pengawa bejalaika projek pemansang infrastruktur ba kandang menua N.37 Bukit Saban.

Program tu udah digulu Kaban Parlimen Betong, Dato Dr Richard Rapu, ngarika Sapit Premier Sarawak ke mega Kaban Kunsil Nengeri (ADUN) N.37 Bukit Saban, Datuk Amar Douglas Uggah Embas.

Nitihka penerang ari Dato Dr Richard Rapu, sesi nya ngembuan tuju deka meri penerang enggau kelala ngagai bala ketuai komuniti enggau raban bekaul enggau perambu sereta bejalaika projek infrastruktur ti deka dipejalaika ba kandang menua nya.

Ku iya, penerang dikenataika ejensi ti bejalaika pengawa nyengkaum Kaunsil Pelilih Betong, BDDA enggau ejensi ti bekaul dikena nentuka tetiap projek ti diperambu ulih dipejalaika enggau teratur, ngasi sereta meri penguntung ti optimum ngagai rayat.

“Nengah sesi baka tu, penemu, langgur enggau timbal ari komuniti ulih digumpul sereta diperesa dikena nentuka pemansang ti dipejalaika nya amat nangkup guna peranak menua nya,” ku iya nengah sebengkah penerang pengudah program nya.

Ku iya nambah, chara ti ngemeratka pengawa ngaul komuniti beguna amat dalam nentuka tetiap inisiatif pemansang ti dipejalaika meri empas positif enggau penguntung timpuh panjai ngagai peranak menua tu.

Iya mega ngarapka pengawa ti terus dipejalaika nengah pengawa bejalaika projek infrastruktur ari baruh BDDA deka terus ngenegapka pemansang infrastruktur, nyungkak pemansang menua pesisir sereta ngangkatka pengelantang pendiau rayat, kelebih agi ba kandang DUN Bukit Saban.

Sesi ngaul diri mega ngempuruka bala ketuai komuniti enggau pengari ari mayuh bengkah ejensi ngulihka timbal terus bekaul enggau projek pemansang ke diperambu ungkup kandang menua nya. — RBI

#ruaiberitaiban#newsiban#beritaiban

Rindu | Titih | Kunsika

BETONG, 11 Jun — Siku orang tuai bebadi nyawa seraya siku agi bakal ba penusah bebadi ba jalai alun ti mungkur sebuah kerita Perodua Axia di Jalai Pan Borneo semak P-Turn Skrang, jalai Sri Aman-Betong, lemai tu tadi.

Palan Operasyen Opis Bomba enggau Penyah Penusah (JBPM) Sarawak nerima kangau ngenyit bekaul enggau penusah nya urung pukul 1.46 lemai.

Berindik ari nya, seraban raban ari Balai Bomba enggau Penyah Penusah (BBP) Betong berumban ngesah ke palan penusah ke nyadi ke bepalan urung 20 kilometer ari balai nya.

Lebuh datai ba palan nya urung pukul 2.07 lemai, raban bomba tetemuka sebuah kerita Perodua Axia dipechayaka tepawah sebedau ngelantak empang jalai ba kandang endur P-Turn Skrang.

Penusah bebadi nya ngaul dua iku mansa lelaki, enggau siku penumpang bakal seraya deriba ditemu tepekul ba penuduk deriba.

Komander Operasyen, PBK II (TBK I) Mohamad Faizal Haji Rashid madah, raban bomba terus bejalaika pengawa meresa keterubah ba endur nya sebedau Unit Servis Perubat enggau Penyelamat Ngenyit (EMRS) meri perubat keterubah ngagai sida ke bakal.

“Mansa ke bakal udah nya diserah ngagai Opis Menteri Pengerai Malaysia (KKM) ngambika diperubat enggau silik agi, seraya raban bomba bejalaika operasyen nyelamat mansutka deriba ke tepekul,” ku iya.

Taja pia, deriba entukar nya dientaska bebadi nyawa ba palan penusah nyadi ulih pemesai perubat KKM pengudah mujur dipansutka ari entukar nya.

Mansa ke parai nya dikelala enggau nama Liang Ak Sait, 64 taun, lalu mansa ke bakal nya Stanley Embawa Anak Liang, 30 taun.

Tubuh mansa udah nya disuaka ngagai Polis DiRaja Malaysia (PDRM) ngambika atur silik agi dipejalaika sereta dipansik dikena ngelala kebuah kebendar penusah nya nyadi.

Pengudah operasyen nyelamat tembu, raban bomba mega bisi bejalaika pengawa meresi kandang jalai dikena muai uras ari penusah bebadi ti tau ngeruga pengelikun penguna jalai alun.

Operasyen ti ngaul Tender Penyelamat Bomba (FRT), sebuah entukar EMRS enggau enam iku raban bomba mujur dijaga urung pukul 3.15 lemai sebedau tembu urung pukul 3.20 lemai.

Sama bisi ba endur nya tujuh iku kaban PDRM enggau tiga iku pemesai KKM begulai enggau sebuah ambulans.

Sepemanjai operasyen nya, raban penyelamat betapi enggau pemar ketegal penyekut jalai alun enggau palan P-Turn ke jauh ari jalai besai. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUCHING, 11 Jun — Sarawak majak ngenegapka agenda pemansang industri ti meruan lebuh ngelancharka Inisiatif Kluster Peralihan Industri Sarawak (TIC) ti deka nyadi pemangkin ngagai transformasyen industri kurang karbon enggau penumbuh ekonomi ti tegap di nengeri tu.

Nitihka penerang ari Sapit Premier Sarawak, Datuk Amar Douglas Uggah Embas, inisiatif ti dilanchar ba Palan Konvensyen Borneo Kuching nya nyadika sebengkah agi singkang strategik Sarawak dalam ngenyampatka transisyen sektor industri nuju pemansang ti meruan agi sereta ulih besemekih ba renggat antarabansa.

Ku iya, Bintulu udah nempa sejarah nyadi kluster industri keterubah di Malaysia nyereta Rentayan Kluster Industri Peralihan ari baruh Forum Ekonomi Dunya, lalu enggau nya ulih nyambung Sarawak enggau 39 kluster industri di 20 buah menua.

Nitihka penerang nya, rangkaian global nya ngarika pemansut ekonomi ti berega USD808 billion, nyendiaka 6.6 juta peluang kereja sereta ngembuan potensi ngurangka nyentuk 870 juta tan pemansut karbon di serata dunya.

“Inisiatif TIC ditumbuhka dikena ngenyampatka transformasyen industri ba koridor penumbuh Bintulu-Samalaju nengah kerejasama rat entara pengemeran industri, ejensi perintah, penyendia teknologi enggau institusyen wang dalam langkar pengawa ti bestruktur,” ku penerang nya.

Penerang nya mega nerangka penyereta dalam rangkaian global ngemendarka Sarawak ngulihka akses ngagai pengelandik antarabansa, teknologi inovatif enggau kerejasama strategik dalam bidang kuasa beresi, hidrogen, ngatur karbon, digitalisasyen enggau pemansang pengereja pengawa.

Kelimpah ari nya, TIC ditumbuhka bepelasarka lima batang pekara iya nya polisi, pembiayaan, teknologi, kerejasama enggau infrastruktur, seriris enggau mayuh bengkah inisiatif strategik nengeri nyengkaum Polisi Transisyen Tenaga Sarawak, Pelin Jalai Ekonomi Hidrogen enggau Strategi Sifar Beresi Sarawak ke diatu benung ditumbuhka.

Nitihka penerang Sapit Premier, inisiatif tu dikearap ulih bejalaika tanggungpengawa ti beguna dalam mantu Sarawak ngetanka status negatif karbon beresi, kelimpah ari muka peluang baru beranakka puku, ngerembaika industri enggau nambahka daya tahan ekonomi nengeri tu.

Pengerami ngelancharka program nya dipenyadika YAB Premier Sarawak Datuk Patinggi Tan Sri (Dr) Abang Abdul Rahman Zohari Tun Openg.

Inisiatif TIC ngayanka komitmen Sarawak ti terus ngetuaika pemansang industri ti kurang karbon, narit puku ti meruan sereta ngengkahka nengeri tu nyadi hab besai ungkup transisyen kuasa enggau transformasyen industri di rantau tu.

Sama bisi datai Sapit Premier Sarawak Datuk Amar Douglas Uggah Embas, Datuk Amar Profesor Dr Sim Kui Hian, Speaker Dewan Undangan Negeri Sarawak Tan Sri Datuk Amar Mohamad Asfia Awang Nassar, Menteri Digital Gobind Singh Deo, Menteri-Menteri Kabinet Sarawak, Sekretari Perintah Sarawak Datuk Amar Mohamad Abu Bakar Marzuki, Sapit Menteri Digital Datuk Wilson Ugak Kumbong, Sapit Menteri Kuasa dan Pengintu Rampa Menua Sarawak Datuk Dr Hazland Abang Hipni, Sapit Menteri Sarawak, Direktor Pengatur Forum Ekonomi Dunia Neo Gim Huay enggau temuai ke bukai. – RBI

#ruaiberitaiban#newsiban#beritaiban

Rindu | Titih. | Kunsika

KUCHING, 11 Jun – Sarawak majak ngenegapka penuduk nyadi ketuai dalam transformasyen industri di rantau tu nengah pengawa ngelancharka Kluster Industri Peralihan Bintulu (TIC), pelasar strategik ti deka nyungkak pemansang industri ti meruan, ngangkatka daya besemekih ekonomi sereta nyukung penumbuh timpuh panjai nengeri tu.

Premier Sarawak, Datuk Patinggi Tan Sri Dr Abang Haji Abdul Rahman Zohari Tun Datuk Abang Haji Openg, madahka landskap dagang dunya diatu majak begunaka pemansut ti nitihka standard rampa menua enggau pemanah rampa menua, kelimpah ari faktor rega aja.

Nitih ku iya, makit antarabansa kemaya hari tu mega beratika baka ni sebengkah produk diasilka nyengkaum proses ngasil, tikas intensiti karbon enggau nitihka standard rampa menua ke udah ditetapka.

Iya madah munyi nya lebuh bejadika pengawa ngelancharka TIC Industrial Clusters in the Next Energy Era di Palan Konvensyen Borneo Kuching (BCCK), sehari tu tadi.

“TIC Bintulu ukai semina inisiatif baru aja, tang pelasar strategik dikena ngenyampatka transformasyen industri, ngangkatka daya besemekih sereta ngengkahka Sarawak ba rintai mua pemansang industri rebak baru,” ku iya.

Iya nyemetak madahka penumbuh ekonomi jemah ila enda agi bepanggai ba projek tauka perengka guna individu, tang deka dipejalaika ekosistem industri ti begempung enggau sektor kuasa, industri, teknologi, penau enggau inovasyen dalam langkar ti komplementer.

Ngelansa pasal pengawa milih Bintulu nyadi palan besai ungkup inisiatif nya, iya madahka mengeri tu kelai ngempung penegap industri Sarawak ke diatu enggau aspirasyen pemansang nengeri tu jemah ila.

“Begulai enggau Samalaju, Bintulu nyadi siti ari koridor kuasa enggau industri ke pemadu strategik di Asia Tenggara,” ku iya.

Nitih ku iya, Bintulu udah lama bejalaika tanggungpengawa ke besai dalam pemansang ekonomi Sarawak nyadi palan siti ari kompleks gis cecair (LNG) pemadu besai di dunya, lalu enggau nya nyadi pintu penama kunsi nyambung pengeraja asal, industri enggau eksport nengeri tu ngagai makit dunya.

Bepelasarka penegap nya, Sarawak ngerembaika agenda industri nengah pengawa bejalaika Koridor Kuasa Tau Dikena Baru Sarawak (SCORE) enggau terus beranakka puku dalam pemansang infrastruktur kritikal, kapasiti kuasa enggau ekosistem industri dikena narit mayuh agi puku sereta ngemayuhka struktur ekonomi nengeri.

Iya mega nyemetak madahka pemansang Samalaju nyadi komponen kunsi strategi nya.

Kandang endur industri nya diatu endur bemacham industri ti ngena kuasa mayuh nyengkaum aluminium, ferroalloy, petrokimia enggau pengawa ngaga beteknologi tinggi, ti udah ngenegapka penuduk Sarawak nyadi hab besai industri enggau kuasa di rantau tu.

Berebak enggau nya, Abang Johari madahka TIC Bintulu ditumbuhka nyadi pelasar kolaboratif ti ngempuruka industri, perintah, institusyen wang enggau bakih teknologi ba baruh visyen ke sama dikena ngenyampatka transformasyen industri.

“Nengah kerejasama strategik tu, Sarawak ulih ngenegapka daya besemekih ekonomi seraya neruska komitmen ngagai agenda pemanah rampa menua enggau pemansang kurang karbon,” ku iya.

Pengawa ngelancharka TIC Bintulu nyadi siti agi singkang beguna dalam pengawa Sarawak ngemansangka ekosistem industri jemah ila ti bepelasarka kuasa beresi, inovasyen teknologi enggau pemansang ti meruan, setipak enggau aspirasyen nengeri tu deka nyadi ekonomi bepenatai pemisi tinggi ti tan sereta kompetitif ba renggat global.

Sama bisi datai Sapit Premier Sarawak Datuk Amar Douglas Uggah Embas, Datuk Amar Profesor Dr Sim Kui Hian, Speaker Dewan Undangan Negeri Sarawak Tan Sri Datuk Amar Mohamad Asfia Awang Nassar, Menteri Digital Gobind Singh Deo, Menteri-Menteri Kabinet Sarawak, Sekretari Perintah Sarawak Datuk Amar Mohamad Abu Bakar Marzuki, Sapit Menteri Digital Datuk Wilson Ugak Kumbong, Sapit Menteri Kuasa dan Pengintu Rampa Menua Sarawak Datuk Dr Hazland Abang Hipni, Sapit Menteri Sarawak, Direktor Pengatur Forum Ekonomi Dunia Neo Gim Huay enggau temuai ke bukai. – RBI

#ruaiberitaiban#newsiban#beritaiban

Rindu | Titih. | Kunsika

BINTULU, 11 Jun – Sepenyampau 140 iku penyereta ngulu Program Licha Pengelikun Penusah Angus ke diatur ba Dewan Mayuhguna Flat Sungai Plan, Jalai Tanjung Kidurong, sehari tu tadi.

Pengawa tu beserimbai enggau Program Satelit Kimuniti Rayat Madani KEMAS Bintulu ke diatur ari pukul 10.00 pagi nyentuk pukul 2.00 lemai nya dikemujur raban Balai Bomba enggau Penyah Penusah (BBP) Kidurong ti betuaika Pemesai Bomba Kanan II (PBT II) Rary Anak Binjie.

Sama bisi enggau ngemujurka program tu iya nya PBB Nazri Bin Joha, PBB Aiman Ahmad Aqil Bin Sahran enggau PBB Carl Aldo Anak Sardi.

Sepemanjai program nya, bala penyereta diberi licha pengelikun penusah angus enggau penerang mindah dalam begunan ti dipejalaika enggau tetap sereta nitihka sukut pengelikun ti udah ditetapka.

Nengah sesi meri penerang nya, peranak diterangka enggau kebuah penusah angus nyadi, chara nagang enggau pengawa ke patut dipejalaika enti sema bisi penusah angus nyadi.

Program tu mujur nambahka tikas penyedar enggau nyikap diri bala penyereta bekaul enggau sukut pengelikun angus, lalu enggau nya ulih mantu ngenegapka budaya pengelikun ba komuniti menua nya.

BBP Kidurong ngarapka program baka tu ulih diteruska ari setiap maya dikena nentuka komuniti seruran nemu sereta nyikap diri napi sebarang penusah ngenyit ke tau nyadi bekaul enggau penusah angus.- RBI

#ruaiberitaiban#newsiban#beritaiban