KUALA LUMPUR, 1 Julai — Perintah terus ngenegapka bemacham mekanisme enggau strategi dikena ngurangka tekan ungkus pengidup nengah chara bersepadu ti nyengkaum pengawa nagang rega barang, jamin bekal pemakai, subsidi ke ditagit, matau makit enggau bejalaika bemacham bantu ngagai rayat.

Menteri Dagang Dalam Menua enggau Kos Pengidup (KPDN) madah munyi nya lebuh nyaut tanya lisan ari Kaban Parlimen Sri Aman, Dato’ Sri Doris Sophia Anak Brodie kemari, ti minta penerang senentang mekanisma enggau strategi opis menteri nya dalam ngurangka ungkus pengidup nyengkaum rega barang pemakai, electric, diesel enggau pekara rumah lebuh inflasyen dikena nambahka kuasa meli rayat sereta ngurangka penekan ngagai rayat.

Nitihka penerang KPDN, pejalai rega barang ketegal bemacham faktor nyengkaum bekal enggau peminta, rega mata duit, pemansang geopolitik enggau kos pemansut baikka dalam tauka antarabansa setipak enggau sistem ekonomi menua ti ngemeranka prinsip makit bibas.

KPDN madah, bepelasarka Ripot Pansik Belanja Ruang Bilik (HES) 2024 ari Opis Statistik Malaysia (DOSM), belanja pemakai enggau kereban mata nyadi komponen pemadu besai ba belanja ruang bilik, iya nya urung 15.7 peratus.

“Dalam pekara tu, Perintah MADANI seruran bejalaika bemacham atur intervensyen enggau mitigasyen dikena nentuka rayat terus bisi akses ngagai barang ke diguna enggau rega ti entap sereta ulih dibeli,” ku iya.

Nitihka penerang KPDN, tikas inflasyen menua tu ngayanka trend jelan lebuh ngerikod 1.4 peratus ba taun 2025 dibandingka enggau 1.8 peratus ba taun 2024, 2.5 peratus ba taun 2023 enggau 3.3 peratus ba taun 2022.

Nitih ku iya, pemansang tu mandangka pemanah polisi enggau atur nagang rega barang ti dipejalaika perintah, kelimpah ari penambah penatai pemisi ruang bilik ti mega mantu ngenegapka daya meli rayat.

Ku iya, pukul rata penatai pemisi ruang bilik ke ulih dikena niki ngagai RM7,584 ba taun 2024 dibandingka enggau RM7,111 ba taun 2022.

KPDN mega madah, pengawa bejalaika inisiatif bekaul enggau ungkus pengidup iya nya koordinasyen nengah Kaunsil Tindakan Kos Hidup Menua (NACCOL) ti mungkur tujuh kluster ba selampur opis menteri.

Entara nya, Kluster Pemakai ti betuaika Opis Menteri Betanam Betupi enggau Pengelikun Pemakai (KPKM) ngemeratka pengawa nentuka bekal pemakai, Kluster Utiliti ari baruh Opis Menteri Transformasyen Tenaga enggau Transformasyen Ai (PETRA) mansik isu kos elekterik, Kluster Perengka Pengangkut ti betuaika Opis Menteri Perengka Pengangkut (MOT) ti meri fokus ngagai kos pengangkut enggau Opis Menteri Pengawa Berumah enggau Kaunsil Kandang Menua (KPKT) ngenegapka akses ngempu rumah.

Kelimpah ari nya, Kluster Penatai Pemisi ti betuaika Opis Menteri Ekonomi ngemeratka pengawa ngangkatka penatai pemisi enggau kuasa meli rayat.

Ba renggat Opis Menteri Dagang Dalam Menua enggau Kos Pengidup (KPDN), Program Nyual Rahmah MADANI udah ditambah ngagai 30,000 siri di serata menua sepemanjai taun 2026 ngambika rayat ulih meli barang ke diguna ninting hari enggau rega 10 ngagai 30 peratus baruh ari rega makit menua tu.

KPDN madah, pengawa bejalaika Sistem Kawalan Diesel Bersubsidi (SKDS) enggau Sistem Kawalan Minyak Bersubsidi (SKPS) mega mantu nentuka penambah kos operasyen industri enda dipeturun ngagai penguna nengah peniki rega barang enggau servis.

Berebak enggau nya, Opis Menteri Ekonomi Menua majak chakah agi neritka atur nengah chara matau pejalai rega sereta ngambi atur ngelaban sebarang pengawa ngulihka penguntung enggau niki rega ti enda masuk akal.

Dikena terus ngelempungka tating pengidup rayat, perintah mega udah bejalaika mayuh bengkah inisiatif sepemanjai taun 2026, nyengkaum Bantu Tunai Rahmah (STR), Bantu Pemun Rahmah (SARA), Pas Bulanan My50, Program Transformasyen Servis Bas Ngetu-Ngetu (SBST), Program Residensi Rayat (PRR), ‘Program Pembasmian Kemiskinan Bandar’ (PPKB), Program Rebat Bil Elektrik sereta NUR@PETRA.

Nitihku Menteri nya, Perintah MADANI tetap komited nentuka isu ungkus pengidup diputarka enggau komprehensif nengah polisi, intervensyen makit enggau bantu ti ditagit dikena ngangkatka pengelantang pendiau enggau kuasa meli rayat. — RBI

#RuaiBeritaiban#News|ban

#Beritalban | Ruai Berita Iban

Rinduka | Titihka | Kunsika

KUALA LUMPUR, Julai 1 – Opis Menteri Pelajar Malaysia (KPM) meri jamin sebarang sekula di Sarawak ke ditemu bisi penurun ba standard pengelikun kelebih agi ngaul sistem wayar elekterik, deka dikemeratka ungkup pengawa ngemanahka enggau lengkas dikena nentuka pengelikun nembiak sekula enggau semua staff sekula, pengajar seruran dijaga enggau likun.

Jaku jamin nya dipansutka Menteri Pelajar lebuh nyaut tanya lisan ari Kaban Parlimen Igan, YB Tuan Haji Ahmad Johnie bin Zawawi, ba Aum Kedua Penggal Kelima Parlimen Kelima Belas.

Ahmad Johnie dalam tanya iya minta Opis Menteri Pelajar madahka sekalika audit pengelikun elekterik ti komprehensif udah dipejalaika ba semua sekula di Sarawak sereta mega penyampau sekula ti ditemu enda nitihka standard sistem sambung wayar elekterik.

Nimbal tanya nya, Menteri Pelajar madahka KPM seruran beratka sukut pengelikun infrastruktur institusyen pelajar, nyengkaum pengerusak sistem elekterik, risiko angus enggau isu ke bekaul ti tau ngeruga pengelikun staf sekula.

Nitihku iya, Opis Menteri Pelajar nengah Opis Pelajar Nengeri (JPN) Sarawak enggau Opis Pelajar Pelilih Menua Sarawak (PPD) bejalaika pengawa meresa pengelikun wayar elekterik berenggat enggau kerejasama Opis Kereja Raya (JKR) Sarawak.

Pengawa meresa nya berengkah enggau sekula ke udah beumur 50 taun ke atas lalu ngaul pengawa meresa enggau komprehensif komponen besai sistem elekterik baka papan ngagihka elekterik (Distribution Board), pemutus litar mit (Miniature Circuit Breaker), pemutus litar ke bumi (Earth Leakage Circuit Breaker), soket, lampu sereta kipas.

Ku iya, pengudah pengawa meresa nya tembu, ripot teknikal ari Opis Kereja Raya Sarawak deka dibantaika ngagai JPN Sarawak ungkup tuju minta agih belanja dikena bejalaika kereja ngemanah ke patut.

Kelimpah ari nya, Opis Menteri mega bejalaika pengawa meresa fizikal nengah chara berenggat nengah Sistem Maklumat Pengurusan Pendidikan (EMIS KPM), ti befungsyen nyadi pangkalan data pusat dikena ngerikod sereta matau gaya fizikal sekula ari sesiti maya ngagai sesiti maya.

Nengah sistem nya, analisis data maya nyata ulih dikena mantu opis menteri ngaga pemutus bekaul enggau pengawa magi agih belanja ungkup operasyen sekula, ngintu, ngaduka baru, ngintu, ngemanah enggau ngangkatka projek enggau chara ti lebih ditagit nitihka pemerat.

Menteri Pelajar nya mega nyemetak madahka sebarang sekula di Sarawak ti dikelala bisi isu pengelikun tauka wayar elekterik ti enda nitihka standard agi deka dikemeratka ungkup pengawa ngemanah enggau lengkas dikena nentuka pengelikun semua staf sekula.

Dalam pengawa ngenegapka budaya pengelikun ba palan pelajar, iya mega madahka Opis Menteri Pelajar udah ngelancharka Garis Lalau Pengatur Sekula Likun enggau Polisi Nyaga Nembiak Sekula ari baruh Opis Menteri Pelajar kena 11 Jun 2026.

Garis lalau nya nyadi batang referens ungkup semua palan pelajar ari baruh Opis Menteri Pelajar dalam ngenegapka aspek pengelikun, pengelantang enggau nyaga nembiak, nyengkaum nentuka sebarang pengawa tambah pendawaian enda dipejalaika enti nadai pemendar ari Opis Kereja Raya. — RBI

#RuaiBeritaiban#News|ban

#Beritalban | Ruai Berita Iban

Rinduka | Titihka | Kunsika

SARIKEI, 1 Julai — Pengawa betanam betupi moden bepelasarka teknologi ulih nyadi kereja ti bepenatai pemisi tinggi sereta kompetitif, lalu enggau nya muka peluang ngagai raban profesyenal enggau raban nembiak ngereja pengawa ba sektor agro nyadi pun penatai pemisi ti meruan.

Menteri Industri Pemakai, Komoditi enggau Pemansang Kandang Menua Sarawak, Dato Sri Dr. Stephen Rundi Anak Utom, madahka peragam ti ngumbai sektor betanam betupi semina engkeman ungkup sekeda raban aja patut diubah laban pemansang teknologi udah ngubah industri nya nyadi lebih produktif, efisyen sereta meri penguntung.

Iya madah munyi nya lebuh ngenataika pesan ba Pengerami Pesan Begulai Opis Betanam Betupi Bagi Menua Sarikei ke diatur ba Honey Restaurant, Sarikei, kena Hari Dua tu tadi.

Dalam jaku dipansutka iya, Dr. Stephen Rundi bekunsika cherita pemujur siku injinir mekanikal di Bintulu ti mujur ngulihka penatai pemisi urung RM6,000 sebulan nengah chara betanamka utai tanam ba tanah pemesai setengah hektar aja.

Nitih ku iya, orang dagang nya nanam buah melon emas enggau daun sup ngena chara betanam betupi ti betul, iya nya sistem betanam betupi moden ti ngena teknologi Internet of Things (IoT) enggau ngena data dikena matau enggau betul guna utai tanam, lalu enggau nya ulih nambahka efisyen pemansut.

Ku iya, ngena teknologi tu ngemendarka kesemua operasyen ladang diatur semina siku tauka dua iku pengereja pengawa aja enggau nadai ngeruga produktiviti, lalu enggau nya ngayanka pengawa betanam betupi moden ulih meri asil ke tinggi taja pan ditanam ba kandang endur ke mit.

Dr Stephen Rundi madahka, cherita pemujur baka tu patut dikemeratka nyadi chunto pemadu manah dikena meransang mayuh agi raban nembiak enggau profesyenal nyereta sektor betanam betupi.

Nitih ku iya, opis menteri seruran nguji ngadaka mayuh agi ikon orang dagang betanam betupi ti nyulut dalam mayuh bengkah bidang nyadika peransang ngagai komuniti, kelebih agi rebak baru.

“How are you going to entice, influence people so that they have the interest in whatever you do? In English, you call it icon. We have to create icon,” ku iya.

Ku iya, pengawa nempa ikon betanam betupi udah dipejalaika nengah mayuh macham inisiatif nyengkaum mantaika orang dagang ti mujur dalam nanas MD2, nanas SG1, kelapa pandan enggau komoditi bukai nengah pengawa ngatur AgroFest enggau program pemansang orang dagang opis menteri nya.

Berebak enggau nya, iya ngingatka pemujur dalam bidang betanam betupi meseti meruan lalu ukai semina ba pemujur timpuh pandak aja.

“Pemujur nya sekali aja, ukai pemujur. Pemujur meseti meruan,” ku iya nyemetak.

Berindik ari nya, Dr.Stephen Rundi minta orang dagang betanam betupi terus nambahka daya bepekit sida nengah pengawa ngasilka produk ti bisi nilai tambah, ngena teknologi moden, chara betanam betupi ti pintar sereta pengawa ngiga makit baru dikena nentuka dagang sida terus mansang enggau meruan.

Ku iya, jerita pemujur injinir ari Bintulu tu nyata ngayanka pengawa betanam betupi moden ukai agi semina pengawa asal aja, tang ngembuan potensi nyadi kereja profesyenal ti ulih mansutka penatai pemisi ti mai penguntung lebuh diteruska ngena chara beteknologi, inovatif sereta beorientasyenka makit.

Ku iya, perintah Sarawak nengah opis menteri deka terus ngenegapka pemansang sektor agro nengah chara ngemeratka pengawa ngena teknologi, inovasyen enggau pemansang modal mensia dikena matak mayuh agi raban nembiak nyereta industri tu, lalu enggau nya ngenegapka agenda pengelikun pemakai nengeri enggau penumbuh ekonomi. — RBI

#RuaiBeritaiban#News|ban

#Beritalban | Ruai Berita Iban

Rinduka | Titihka | Kunsika

KUALA LUMPUR, 1 Julai — Ejensi Kawalan enggau Nyaga Sempadan Malaysia (AKPS) diatu bisi 8,204 iku staf di serata menua enggau penyampau semua orang ke nguan 83.1 peratus, nyadi sebagi ari pengawa perintah ngenegapka pengawa merintah sereta ngangkatka pemanah sistem pengawa meri servis ba renggat menua.

Menteri Dalam Menua (KDN) madahka pekara nya nengah saut lisan ba Dewan Rakyat dikena nyaut tanya ari Kaban Parlimen Lubok Antu, Roy Angau anak Gingkoi Hari Satu tu tadi, bekaul enggau penyampau kaban AKPS ba tetiap Kompleks Imigresyen, Kastam, Kuarantin enggau Pengelikun (ICQS), nyengkaum ba ICQS Lubok.

Nitih ku KDN , penumbuh AKPS bepelasarka ‘Akta Ejensi Kawalan dan Perlindungan Sempadan Malaysia 2024’ (Akta 860) ti udah digazet kena 17 Oktober 2024 dikena nempa siti ejensi tunggal ti ngatur fungsyen ngawal ba palan tama menua.

Nengah penumbuh nya, AKPS ngambi alih fungsyen enggau pengawa ngawal ke sebedau tu dipejalaika sekeda ejensi iya nya Opis Imigresen Malaysia, Opis Kastam Diraja Malaysia, Opis Perkhidmatan Kuarantin enggau Pemeriksaan Malaysia (MAQIS), Opis Menteri Pengerai Malaysia enggau Opis Perengka Pengangkut Jalai (JPJ) enggau ‘Jabatan Perlindungan Hidupan Liar dan Taman Negara’ (PERHILITAN).

Ku KDN, ari penyampau 8,204 pangku pengawa ke udah dikemendarka, 6,816 pangku pengawa udah diisi, lalu 1,388 pangku pengawa ke bukai agi puang.

“Ari penyampau semua pengawa puang nya, 864 iya nya pangku pengawa baru ke baru diterima, lalu 524 agi ngaul pangku pengawa ke udah bisi.”

“Proses ngisi kededua kategori pangku pengawa tu dipejalaika AKPS begulai enggau Opis Menteri Dalam Menua (KDN) enggau kerejasama opis enggau ejensi teras sereta mega semua ketuai servis ti bekaul,” ku iya.

Bekaul enggau ICQS Lubok Antu, KDN madahka sepenyampau lapan pangku pengawa udah dipindah ngagai AKPS ti ngaul tujuh pangku pengawa ari Opis Imigresyen Malaysia enggau siti pangku pengawa ari Opis Kastam Diraja Malaysia.

KDN mega nyemetak madahka AKPS komited deka terus nambahka penyampau pangku pengawa ba palan penama menua nitihka guna operasyen ke diatu, bepanggai ba pengawa berunding enggau pemendar ari ejensi pusat, kelebih agi Opis Pengereja Pengawa Perintah (JPA).

Penambah pangku pengawa dikearapka ulih ngenegapka pengulih AKPS nentuka pengawa nyaga adan menua ti lebih efisyen, begempung sereta efektif seriris enggau juluk penumbuh ejensi nya. — RBI

#RuaiBeritaiban#News|ban

#Beritalban | Ruai Berita Iban

Rinduka | Titihka | Kunsika

Kredit photo — MK

SRI AMAN, 30 Jun — Peranak Tuai Rumah Panjai Johnny Kota di Kampung Dadak B, Pantu diatu ngasaika perengka guna jalai tama ke lebih lantang sereta likun agi pengudah projek ngemanahka jalai pemanjai 240 meter tembu nengah Agih Projek Mesra Rakyat (PMR) 2025 enggau penyampau ungkus sepenyampau RM100,000.

Kaban Parlimen Sri Aman, Dato’ Sri Doris Sophia Brodie madah, projek nya dipejalaika nyadi sebagi ari pengawa perintah ti majak bejalaika pengawa ngemanahka perengka guna infrastruktur pemun di menua pesisir dikena ngangkatka pengelantang pendiau komuniti.

Nitihku iya, sebedau projek nya dipejalaika, peranak rumah panjai ke bisi 24 pintu nya patut nengah jalai semin ke udah lama, merekah, pechah sereta belubang, ngeruga pengelantang sereta ngeruga pengelikun penguna.

“Gaya jalai alun nyadi berisiko agi kelebih agi maya ujan lebuh jalai nya lichin lalu tau ngundang penusah bebadi ngagai penguna,” ku iya lebuh ditelefon.

Ku iya, enggau penembu projek nya, peranak diatu ulih ngena jalai ke lantang agi, likun sereta lanchar dikena bejalaika mayuh macham aktiviti ninting hari.

Nitihku iya, palan nya ukai semina ngemudahka pemindah peranak nyengkaum nganjung anak besekula, tang mega ngelancharka aktiviti ekonomi sereta ngangkatka tikas pengelikun enggau kualiti pengidup komuniti ngelingi.

Iya mega nyemetak madahka pengawa nyendiaka perengka guna pemun ti bekualiti deka terus diberi perati dikena nentuka pemansang menua pesisir ulih dipejalaika enggau inklusif sereta meri penguntung terus ngagai rayat.

Projek nyeleti jalai tama nya entara inisiatif ti dipejalaika ari baruh Agih Projek Mesra Rayat (PMR) 2025, senutuk enggau komitmen perintah ngenegapka rentayan infrastruktur asas enggau ngangkatka tikas pengidup peranak di menua pesisir. — RBI

#RuaiBeritaiban#News|ban

#Beritalban | Ruai Berita Iban

Rinduka | Titihka | Kunsika

Kredit photo — Opis Pemansang Nengeri Zon Sri Aman

Doris Sophia Brodie

SIMANGGANG, 30 Jun — Sepenyampau 468 iku penerima ari sitak Kunsil Nengeri (DUN) Bukit Begunan, Simanggang enggau Lingga nerima 620 Surat Pala Tanah ari baruh Seksyen 18 Kanun Tanah Sarawak (KTS) ba Pengerami Nyerahka Warta Rizab Komunal Bumiputera Seksyen 6 KTS enggau Surat Pala Tanah Seksyen 18 KTS bagi menua Sri Aman, sehari tu.

Pengerami nya dipenyadika Sapit Premier Sarawak, Datuk Amar Awang Tengah Ali Hasan ti ngemeratka komitmen Perintah Sarawak terus ngenegapka hak ngempu tanah rayat kelebih agi tanah Hak Adat Bansa Asal (NCR) nengah pengawa bejalaika Program Inisiatif Baru Nyukat Tanah.

Nitih ku iya, naka 31 Mei 2026, Opis Tanah enggau Survei (JTS) Sarawak udah mujur nyukat sepenyampau 1,238,159 hektar tanah NCR di serata Sarawak iya nya nambah ari 1,217,766 hektar ti dirikod kena 30 September 2025.

Ari penyampau nya, 966,938 hektar udah digazet ari baruh Seksyen 6 Kanun Tanah Sarawak nyadi Rizab Komunal Bumiputera.

Ku iya, sebedau Program Nyukat Tanah NCR Inisiatif Baru diberi kelala dalam taun 2010, semina urung 260,000 hektar tanah NCR udah mujur disukat.

“Taja pia, nengah pengawa bejalaika program nya, lebih 1.2 juta hektar tanah NCR udah mujur disukat dalam timpuh 15 taun” ku iya.

Berindik enggau nya, Datuk Amar Awang Tengah ngelalau pengempu tanah NCR ke bedau nyereta program tu ngambika lengkas nganjung peminta dikena nentuka hak ngempu tanah diri sebilik terus diintu ungkup rebak dudi hari.

Ku iya, pengawa nya beguna amat berindik ari mayuh rebak baru diatu diau ba mengeri, luar nengeri tauka menua luar lalu nyangka kurang nemu garis entara tanah adat sida sebilik ke bendar.

“Pengawa nyukat sereta ngentaska adan tanah deka meri penetap pasal pengempu sereta mantu nyeliahka penyarut tauka enda sepenemu bekaul enggau tanah jemah ila,” ku iya.

Kelimpah ari pengawa nyuaka Surat Pala Tanah Seksyen 18, pengerami nya mega bisi nyuaka 72 Gazet Rizab Komunal (Betanam Betupi) Bumiputera ari baruh Seksyen 6 Kanun Tanah Sarawak ngagai penerima ari sitak DUN Balai Ringin, Bukit Begunan enggau Simanggang.

Sama bisi datai iya nya Sapit Menteri Pelajar, Inovasyen enggau Pemansang Bakat Sarawak Datuk Francis Harden Hollis, Kaban Kunsil Nengeri (ADUN) Bukit Begunan Datuk Mong Dagang, ADUN Lingga Dayang Noorazah Awang Sohor, Direktor Pemansang Nengeri Sarawak Dato Jasni Jubli, Residen Bagi Menua Sri Aman Mahra Salleh, Pengari Direktor JTS Sarawak Sr Roslan Putit, Pemesai Pelilih Sri Aman Shariff Bujang enggau Penguasa Opis Tanah enggau Survei Sri Aman Michaelson Nyisin. — RBI

#RuaiBeritaiban#News|ban

#Beritalban | Ruai Berita Iban

Rinduka | Titihka | Kunsika

GEDONG, 30 Jun — Perintah Sarawak terus ngenegapka agenda pemansang menua pesisir nengah pengawa bejalaika projek infrastruktur strategik ti deka ngemanahka agi penyambung sereta nyungkak penumbuh ekonomi ba kandang menua Gedong enggau Simunjan.

Bejaku ba Pengerami Nyambut Hari Gawai Pelilih Menua Gedong 2026 di Kampung Keniong Jaya kemari, Premier Sarawak, Datuk Patinggi Tan Sri (Dr) Abang Haji Abdul Rahman Zohari bin Tun Datuk Abang Haji Openg madah, mayuh macham projek jalai alun benung sereta deka dipejalaika, nyengkaum jalai alun ke nyambung ngagai kandang menua Hulu Simunjan, Gedong, Sebuyau enggau kandang ngelingi dikena ngemandakka timpuh pejalai sereta ngerembaika akses ungkup rayat.

Nitih ku iya, pengawa ngaga rentayan jalai alun baru ti nyambung Samarahan, Gedong, Simunjan ngagai Sri Aman deka nempa koridor pemansang baru ti deka ngenyampatka mobiliti peranak sereta meransang aktiviti ekonomi di bagi menua Selatan enggau tengah Sarawak.

Ku iya, perintah Sarawak mega ngemeratka pengawa nyendiaka perengka guna pemun nyengkaum bekal ai beresi enggau kuasa karan ti deka terus dikemanah berenggat nyentuk ke taun 2030 dikena nentuka pengelantang pendiau rayat dijaga.

Pemujur Sarawak nyungkak penatai pemisi nengeri ngemendarka perintah ngadaka penguntung nya pulai ngagai rayat nengah pengawa bejalaika projek pemansang ti meri empas terus ngagai pengidup komuniti, ku iya nambah.

Berebak enggau nya, iya nyemetak madahka pemansang Gedong enggau Simunjan patut dipeda nyadi ekosistem ti sama begunaka laban kededua kandang menua nya ngembuan potensial mansang nyadi hab penumbuh baru lebuh rentayan jalai alun tembu penuh.

Chara pemansang ti diperambu enggau komprehensif dikearapka ulih muka mayuh agi peluang beranakka puku, nambahka rega ekonomi kandang menua sereta ngenegapka kaul entara menua pesisir enggau palan penumbuh besai nengeri tu.

Berindik enggau nya, iya minta rayat terus begempung sereta nyukung agenda pemansang perintah dikena nentuka semua perambu ulih nyadi nyata, lalu ari nya ulih mai penyulut ke meruan ngagai Sarawak.

Pengawa bejalaika projek infrastruktur besepadu dikearapka ulih nyadi penyungkak ngagai transformasyen sosio-ekonomi di Gedong enggau Simunjan, lalu enggau nya ulih ngenegapka agi pengawa Perintah Sarawak dalam ngerapitka seraka pemansang entara menua pesisir enggau mengeri ungkup pengelantang rayat enggau penyulut selampur nengeri tu. — RBI

#RuaiBeritaiban#News|ban

#Beritalban | Ruai Berita Iban

Rinduka | Titihka | Kunsika

SEBUYAU, 30 Jun — Sarawak deka nempa siti agi pemujur beguna dalam pemansang infrastruktur lebuh Jematan Batang Lupar 1 deka dipenyadika Premier Sarawak, Yang Amat Berhormat Datuk Patinggi Tan Sri (Dr) Abang Haji Abdul Rahman Zohari bin Tun Datuk Abang Haji Openg kena 9 Julai 2026.

Pengerami bejadika pengawa nya ti diperambu deka diatur pukul 10.00 pagi ba palan Jematan Batang Lupar 1, Sebuyau ngelai siti agi pemujur besai Perintah Sarawak ba pengawa ngenegapka rentayan infrastruktur perengka pengangkut nengeri tu.

Pengawa ngaga jematan ikonik nya mandangka komitmen Perintah Sarawak ti terus ngemanahka agi penyambung entara kandang menua, lalu ari nya ulih ngenyampatka pejalai mensia mayuh, ngemuntangka pemindah barang enggau servis sereta meransang penumbuh ekonomi di menua tebing tasik enggau menua pesisir.

Kelimpah ari nyadi penyungkak ngagai pemansang sosio-ekonomi, Jematan Batang Lupar 1 dikearapka ulih ngangkatka aksesibiliti ungkup peranak menua nya, ngenegapka rentayan jalai alun nengeri tu sereta nyukung pengawa perintah nempa sistem pengangkut ti lebih efisyen sereta likun.

Pengawa bejadika jematan nya dikearapka nyadi siti agi momen besejarah dalam agenda pemansang Sarawak, lalu enggau nya ngayanka komitmen Perintah Sarawak deka terus bejalaika projek ti meri empas tinggi ti meri penguntung terus ngagai rayat sereta nyukung pemansang pelilih menua ti sebela sereta meruan. — RBI

#RuaiBeritaiban#News|ban

#Beritalban | Ruai Berita Iban

Rinduka | Titihka | Kunsika

Sumber, grafik — JKR Sarawak

MUKAH, 30 Jun — Pengawa ngelaban salah guna dadah enda ulih dipejalaika ejensi penerit adat aja, tang begunaka kerejasama rat ari apai indai, sekula, gerempung komuniti enggau selampur komuniti dikena ngadaka rebak ti nadai penanggul dadah.

Chairman Raban Anti Dadah Nengeri Sarawak ke mega Kaban Kunsil Nengeri (ADUN) N.57 Tellian, Royston Valentine madah, pelajar nagang dadah meseti dipejalaika berengkah ari umur agi biak ngambika bala anak mansang besai nyadi individu ke tan enggau ngembuan integriti sereta penau nyadi ketuai jemah ila.

Iya madah munyi nya lebuh bejadika Pengerami Kem Pintar 2.0 Bagi Menua Mukah 2026 enggau Program Permata Ruang Bilik di Dewan SK Kampung Petanak, Mukah, sehari tu tadi.

Program pengelama dua hari berunggu berengkah ari 29 ngagai 30 Jun tu diatur Ejensi Anti Dadah Menua (AADK) Mukah enggau kerejasama Tim Anti Dadah Nengeri Sarawak, Saberkas Pampang Tellian, Gerempung Nembiak Parlimen Mukah, Ajakcut enggau Opis Pelajar Pelilih Mukah.

Sepenyampau 100 iku nembiak Primari Dua ari semilan buah sekula di Bagi Menua Mukah nyereta program nya ti betuju nambahka penyedar tumu bekaul enggau penusah salah guna dadah, kelimpah ari nempa ulah, disiplin, identiti enggau semengat nyadi ketuai nengah bemacham aktiviti bepelasarka pelajar, pemansang diri enggau kereja beraban.

Program Permata Ruang Bilik, ba sepiak bukai, ngemeratka pengawa apai indai enggau institusyen ruang bilik nyadi batang pengetan dalam nempa nembiak ti ngembuan ulah ti manah sereta lepas ari rampit penyakit rama.

Berebak enggau nya, Royston mega meri besai terima kasih ngagai AADK Mukah enggau semua ejensi sereta bakih strategik ti besaup ngemujurka program nya.

Iya ngarapka Kem Pintar 2.0 Bagi Menua Mukah 2026 enggau Program Permata Ruang Bilik deka meri empas positif ngagai bala penyereta dalam nempa rebak ti bepengerai, nyulut sereta nadai ngaul dadah, lalu enggau nya meri pangka ngagai pengelantang komuniti enggau pemansang ti meruan di Sarawak.

Sama bisi datai Nolin anak Gendang ti nyadi pengari Pemesai Pelilih Menua Mukah, Insp. Kamarul Aiman ​​bin Kamarazi ngarika IPD Mukah, Awang Yusri bin Awang Adeni, Pemesai Pelajar Bagi Menua Mukah, Felynora binti Joseph Na, Ketuai Ejensi Nagang Dadah Nasional Bagi Menua Mukah, ketuai raban bansa, ketuai komuniti, apai indai enggau penyereta kem. – RBI

#ruaiberitaiban#newsiban#beritaiban

Rindu | Titih | Kunsika

BINTULU, 30 Jun — Sepenyampau 189 iku pengempu tanah nerima Surat Pala Tanah ari baruh Seksyen 18 Kanun Tanah Sarawak (KTS), lalu 39 iku agi nerima Lisin Pengani Sementara (Temporary Occupation Licence, TOL) ba Pengerami Nyuaka Surat Pala Tanah enggau TOL ungkup sitak Bintulu ke diatur ba Auditorium BDA, Wisma Bintulu kena Hari Satu tu tadi.

Pengerami nya dipenyadika Sapit Premier Sarawak, Datuk Amar Awang Tengah Ali Hasan, ke mega bisi nyuaka surat pala tanah enggau TOL ngagai bala penerima.

Superintenden Tanah enggau Survei Bagi Menua Bintulu, Sr Haslinda Hamdan, madahka pengawa mantaika nya ngayanka komitmen Perintah Sarawak ti terus ngenyampatka pengawa ngeluarka pala tanah ngagai rayat nengah pengawa bejalaika Inisiatif Hak Tanah Adat Bansa Asal (NCR).

Nitihku iya, sepenyampau 189 surat pala tanah ari baruh Seksyen 18 Kanun Tanah Sarawak udah disuaka ti ngaul penyampau pemesai 761.437 hektar, seraya 39 Lisin Pengani Sementara (TOL) mega udah disua ti mungkur 39 lot.

Ku iya, Surat Pala Tanah nya ngaul kandang menua Sungai Senunok enggau Sungai Kelebu ba sitak Kunsil Nengeri (DUN) Kakus, Sungai Rasan di Tubau ti mungkur DUN Murum enggau Kemena, sereta Sungai Sepadoh di DUN Jepak.

Ba pengawa nyerahka TOL, iya ngaul 39 iku penerima ari baruh Skim Ngemesaika Genturung Pendiau (SPK) Kampung Melayu Tubau ti nyadi pengawa perintah nyendiaka mayuh agi palan endur diau ti diperambu sereta lantang ungkup peranak menua nya.

Ku Haslinda, Opis Tanah enggau Survei Sarawak deka terus chakah agi bejalaika pengawa ngenyampatka pengawa nyukat tanah enggau ngeluarka surat pala tanah dikena nentuka mayuh agi orang bulih penetap enggau jamin bekaul enggau pengempu tanah sida.

Iya mega nyemetak madahka pengawa bejalaika Seksyen 18 KTS nyadi siti ari chara ke berat Perintah Sarawak dalam ngaku sereta nyaga hak ngempu tanah rayat kelebih agi Tanah Adat Bansa Asal, seraya nyukung pemansang sosioekonomi komuniti ti meruan.

Sama bisi datai Menteri Industri Pemakai, Komoditi enggau Pemansang Kandang Menua Sarawak ke mega Kaban Kunsil Nengeri (ADUN) Kemena, Dato Sri Dr Stephen Rundi Utom, Menteri ba Opis Premier Sarawak ke mega ADUN Kakus, Dato Sri John Sikie Tayai, Sapit Menteri Infrastruktur enggau Pemansang Palan Penyangkai Kapal Sarawak ke mega ADUN Samalaju, Datuk Majang Renggi, ADUN Murum, Kennedy Chukpai Ugon enggau ADUN Jepak, Iskandar Turkee. — RBI

#RuaiBeritaiban#News|ban

#Beritalban | Ruai Berita Iban

Rinduka | Titihka | Kunsika