BINTULU, 23 Mei — Premier Sarawak Datuk Patinggi Tan Sri (Dr) Abang Abdul Rahman Johari Abang Openg nyemetak madahka pemansang ekonomi di Bintulu diatu benung nyingkang ngagai jeman baru laban sitak nya majak digerakka nyadi hab industri kurang karbon betikas antarabansa ti bepelasarka kuasa gadung, teknologi moden enggau industri berega tinggi ti meruan.

Nitih ku iya, transformasyen mengeri Bintulu ke sebedau tu dikelala enggau nama palan pemansut gis asli cecair (LNG) diatu mansang seriris enggau agenda ekonomi gadung Sarawak nengah pemansang industri kurang karbon ti ngemeratka pemanah enggau inovasyen teknologi.

Iya madah munyi nya lebuh bejadika Program Sarawakku Sayang (SKS) Bintulu 2026 ditu, sehari tu tadi.

Ku iya, pemujur Sarawak ngemansangka Bintulu nyadi kandang endur industri ti meruan mega udah nerima pengangkun antarabansa lebuh Forum Ekonomi Dunya ngaku Bintulu nyadi kluster industri kurang karbon.

“Pengangkun tu nyadika bukti dunya meda sereta ngelala penau Sarawak dalam ngemansangka kandang endur industri ti kurang karbon ti moden, meruan sereta siru enggau rampa menua,” ku iya.

Ku iya nerang, pemansang industri di Bintulu enda agi bepanggai sepenuh iya ba minyak fosil, tang ditambah enggau penegap nengah pengawa beranakka puku ba kuasa hidrogen, kuasa tau dikena baru bepelasarka biomass, solar enggau teknologi semikonduktor ti deka nyadi pemansut ekonomi nengeri tu jemah ila.

Ku iya nambah, Bintulu mega bejalaika tanggungpengawa ke berat dalam strategi Sarawak nambahka rega pengeraja asal gis nengeri tu nengah pengawa ngeluarka produk hiliran ke berega tinggi baka metanol, lalu enggau nya ulih ngenegapka penuduk kandang menua nya nyadi hab tenaga besai enggau petrokimia menua tu.

Berebak enggau nya, iya andal amat Bintulu deka terus mansang nyadi model pemansang industri gadung ti ulih nyemelaka penumbuh ekonomi enggau pengelantang rampa menua, kelimpah ari nyadi pemangkin ngagai aspirasyen Sarawak deka mansang nyadi ketuai dalam ekonomi gadung enggau teknologi maju di rantau tu manggai ba taun 2030. — RBI

SIBU, 23 Mei — Pengerami Malam Mantar Gawai Dayak Bagi Menua Sibu 2026 nyadi manifestasyen pengelantang enggau penyerakup rayat Sarawak ti majak tegap dalam ngerami penyelai budaya enggau pesaka asal komuniti Dayak.

Menteri Penyerakup Menua, Datuk Aaron Ago Dagang madah, pengerami ke diatur ba Hotel Kingwood Sibu mujur ngempuru mensia mayuh ari bemacham penatai asal ngerami adat, main asal enggau main asal komuniti Dayak ke udah diturunka serak turun temurun.

Kenu ku iya, Hari Gawai ukai semina pengerami ninting taun aja, tang lebih agi mai kelai terima kasih, begulai enggau semengat beserakup ti nyadi batang penegap rayat Sarawak.

“Penyelai pengerami tu mega mandangka pengelantang komuniti pupu bansa ti begempung ngerichahka agi budaya enggau main asal nengeri tu,” ku iya nengah sebengkah penerang beserimbai enggau pengawa nya.

Iya mega nyemetak madahka penyelai budaya ti diintu begulai meseti terus dijaga nyadika pelasar ngenegapka penyerakup bansa sereta nerenakka semengat bebasaka pangan diri entara komuniti ti mayuh macham.

Pengerami Malam Mantar Gawai Dayak 2026 Bagi Menua Sibu bela dirias enggau pengawa mandangka main asal sereta penatai bala ketuai komuniti enggau temuai ari mayuh bengkah komuniti di Bagi Menua Sibu. — RBI

BINTULU, 23 Mei — Program Sarawakku Sayang (SKS) 2026 Renggat Bagi Menua Bintulu udah nyadi pelasar beguna dalam pengawa ngelawa rayat sereta ngenegapka agenda pemansang nengeri tu, enggau penatai lebih 5,000 iku temuai ba palan Padang Bilun Lama Bintulu, sehari tu.

Program nya dipenyadi YAB Premier Sarawak, Datuk Patinggi Tan Sri Abang Johari Tun Openg, ke mega bisi ngenataika pesan bekaul enggau kuing pemansang Sarawak.

Sama bisi datai ngerichahka agi program nya tiga iku Sapit Premier Sarawak iya nya Datuk Amar Douglas Uggah Embas, Datuk Amar Awang Tengah Ali Hasan enggau Datuk Amar Prof. Dr. Sim Khui Hian.

Program SKS 2026 Bintulu iya nya siri ketiga pengawa pengudah Limbang kena 10 ngagai 12 April 2026 ba Kompleks Lumba enggau Main Limbang, enggau Miri kena 24 ngagai 26 April 2026 ba Stadium Miri, lalu tiap bengkah nya mega nerima timbal ti meransang ari rayat menua nya.

Sapit Menteri Besai, Datuk Amar Fadillah Yusof madah, pengawa ngatur program tu mandangka penerus pengawa Perintah Sarawak dalam nentuka pemansang ti lebih inklusif sereta sebela ulih diasaika semua rayat ba mayuh bengkah renggat.

“Perintah Sarawak ari baruh pentadbiran Gabungan Parti Sarawak terus ngemeratka agenda pemansang strategik, kelebih agi ba pengawa ngenegapka sektor ekonomi baru baka kuasa tau dikena baru, ekonomi digital enggau ekonomi gadung nyadi pengerembai penumbuh nengeri jemah ila” ku iya.

Berebak enggau nya, penatai rayat bemacham pupu bansa ti ngemenuhka lokasi program nya mega mandangka sukung ti tegap ngagai inisiatif pemansang ti seruran dipejalaika perintah nengeri.

Sama bisi datai Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom, Sekretari Perintah Nengeri Sarawak Datuk Amar Mohamad Abu Bakar Marzuki enggau Speaker Dewan Undangan Negeri Sarawak, Tan Sri Datuk Amar Mohamad Asfia Awang Nassar. — RBI

BINTULU, 23 Mei – Pengawa ngaga dua jalai kerita ari Jematan Tun Taib nuju Padang Bilun Bintulu diatu ngerikod pemujur dulu ari timpuh ti udah ditetapka, ti mandangka komitmen perintah Sarawak ngenegapka rentayan infrastruktur enggau penyambung di kandang menua tengah nengeri tu.

Nitihka penerang ari Sapit Premier Sarawak, Datuk Amar Douglas Uggah Embas ke mega Menteri Infrastruktur enggau Pemansang Palan Penyangkai Kapal, penemuai palan begulai enggau Premier Sarawak Datuk Patinggi Tan Sri (Dr) Abang Johari Tun Abang Openg udah diatur dikena beratika baru pejalai projek strategik ti dipejalaika Opis Kereja Raya Sarawak.

Ku iya, projek ke beungkus RM69.94 juta nya mungkur pengawa ngaga dua jalai kerita pemanjai 4.1 kilometer ti nyambung Bulatan Jepak ngagai Bulatan Padang Bilun Bintulu, nyengkaum ngaga dua ‘P-turn’, jematan pemanjai 95 meter, jalai ‘spur’ enggau ngangkatmanah Bulatan Padang Bilun Bintulu.

“Naka bulan April 2026, projek tu udah nyapai penyulut fizikal 15.34 peratus dibandingka enggau taga asal 12.42 peratus, lalu enggau nya ngerikod penyulut ngelui 2.92 peratus,” ku penerang iya.

Ku iya nambah, pengawa bejalaika projek nya dikearap ulih meri penguntung ke besai ngagai penguna jalai alun nengah chara ngurangka penyekut jalai alun sereta ngemandakka timpuh pejalai entara Mengeri Bintulu, Padang Bilun Bintulu enggau jalai ke Tatau enggau Sibu.

Sama bisi datai Sapit Premier Sarawak, Datuk Amar Dr Sim Kui Hian, Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom, Sekretari Perintah Sarawak, Datuk Amar Abu Bakar Marzuki, ADUN Tanjong Batu, Johnny Pang Leong Ming; ADUN Jepak, Iskandar Turkee; Sapit Sekretari Perintah Sarawak (Pentadbiran), Datu Felicia Tan Ya Hua, Sapit Sekretari Perintah Sarawak (Pengatur Ekonomi enggau Pemansang), Datu Dr Muhammad Abdullah Zaidel, Sekretari Tetap Opis Menteri Infrastruktur enggau Pemansang Palan Penyangkai Kapal, Datu Ir Chiew Chee Yau; Direktor JKR Sarawak, Datu Dr Cassidy Morris enggau raban pengatur JKR Sarawak. – RBI

SARATOK, 23 Mei — Raban Penyaga, Pengelikun Mensia Mayuh Malaysia (APM) Pelilih Saratok mujur nangkap siki ular sawa batik ke ditemu belalai dalam tumpuk barang ba mua sebuah rumah di Kampung Masjid Hulu, sehari tu tadi.

Nitihka penerang APM Saratok, operasyen nya dipejalaika pengudah sida nerima kangau ngenyit ari mensia mayuh bekaul enggau penatai jelu reptilia nya ba sebengkah genturung pendiau.

Tiga iku raban APM dianjung ngagai endur nya lalu tetemuka siku ular sawa batik urung tiga kaki pemanjai ti belalai ba tumpuk barang ba mua rumah orang ke ngaga kompelin.

“Operasyen nangkap ular nya mujur dipejalaika ngena teknik nyepit enggau bala raban ngena perengka pengelikun diri (PPE) sepemanjai operasyen nya dipejalaika,” ku penerang nya.

Ular nya mujur ditangkap enggau likun sebedau dibai ngagai Palan Kawalan Operasyen (PKOD) Pelilih Saratok ngambika atur nangkanka nya dipejalaika.

Operasyen nya diripotka udah tembu enggau nadai sebarang penusah ke enda manah nyadi.

Mensia mayuh dilalau ngambika seruran bejejaga sereta lengkas ngaga kaul enggau piak bekuasa nyema bisi betemu enggau ukui siga ti tau ngeruga pengelikun.

Ngagai sebarang penusah ngenyit, mensia mayuh tau betanya ngagai APM Saratok nengah lumur 083-436094 tauka talipaun penusah ngenyit 999. — RBI

BINTULU, 23 Mei – Sarawak merambu pemansang teknologi kuasa solar baru ti ulih nyimpan kuasa dalam timpuh ke lama agi enggau enda bepanggai ba sistem nyimpan bateri (BESS), nengah kerejasama pansik enggau pakar universiti menua tu.

Premier Sarawak, Datuk Patinggi Tan Sri Dr Abang Johari Tun Openg madah, perambu nya dikerandau enggau Naib Canselor Universiti Kebangsaan Malaysia (UKM) sereta tim pemansik ari Fakulti Injinir ti ngembuan pengelandik dalam bidang kuasa.

Ku iya nerang, Sarawak ngembuan potensial ke besai dalam industri semikonduktor kelimpah ari pengaya ramu baka silika enggau silikon ke ulih dikena ngemansangka teknologi nyimpan kuasa rebak baru.

Ku iya, pengawa tu dipeda ulih ngenegapka penuduk Sarawak nyadi ketuai dalam pemansang kuasa meruan enggau teknologi gadung di rantau tu.

Iya madah munyi nya lebuh bejadika Program Sarawakku Sayang 2026 Bagi Menua Bintulu, ditu, sehari tu tadi.

Ba pengerembaika bukai, Abang Johari madahka Perintah Sarawak deka ngemansangka kandang menua Kampung Nyalau ditu nyadi palan mengeri baru dikena nyukung penumbuh industri beranakka puku di Samalaju.

Ku iya, pemansang nya deka dipejalaika enggau enda ngeruga peranak di kandang menua nya.

Nitih ku iya, pengawa nya nyadi sebagi ari pelin besai timpuh panjai perintah nengeri nyentuk taun 2050.

“Kandang endur baru sereta moden tu deka nyadi sistem sukung ngagai pemeranak puku ke datai ke Samalaju,” ku iya.

Program siri ketiga mega digulu Sapit Menteri Besai, Datuk Amar Fadillah Yusof enggau bini iya Datin Amar Ruziah Mohd Tahir, tiga iku Sapit Premier Sarawak, Datuk Amar Douglas Uggah, Datuk Amar Awang Tengah Ali Hasan enggau Datuk Amar Prof Dr Datuk Sim Kui Bacred Hian, Datuk Marzuki enggau Menteri Industri Pemakai, Komoditi enggau Pemansang Kandang Menua Dato Sri Dr Stephen Rundi Utom.

Sama bisi datai Speaker DUN Sarawak, Tan Sri Datuk Amar Mohamad Asfia Awang Nassar, sereta bala menteri kabinet enggau menteri muda Sarawak.

Lebih 5,000 iku orang datai ngulu program nya ke bisi mandangka mayuh macham aktiviti ke ngerinduka ati.

Berebak enggau nya, dalam aum pengarang berita iya, Premier nerangka tiga buah genturung pendiau ba kandang menua Kuala Nyalau deka dipasuk dalam pemansang pelin besai ti mungkur kandang menua Jepak enggau Samalaju.

Ku iya, pengawa nya mega deka ngenegapka rentayan pemansang Bintulu sereta ngangkatka ekonomi peranak menua nya. – RBI

SEBUYAU, 23 Mei — Penguna jalai alun ti betengahka jalai Sebangan–Sebuyau enggau Sebuyau–Sebangan dipinta nambahka tikas bejejaga berindik ari penusah ke nyadi ti nuntung sebuah van ti dipelabaka bepun ari kabel tiang utiliti ti chundung nuju jalai alun di Kampung Bajong Ili, kemari.

Nitihka penerang penguna Facebook, Zulmel-d Sai, penusah nyadi urung pukul 4.30 lemai lebuh kabel ari tiang nya dipadahka chundung sebedau tesangkut ba van ke ditepan orang ke dituntung penusah.

Iya mega madahka gaya ba endur penusah nya nyadi petang sereta ba endur ti betiku, lalu enggau nya nambahka risiko penusah bebadi ngagai penguna jalai alun ti bekenaka jalai alun nya, kelebih agi maya malam hari.

“Minta perati ngagai penguna jalai alun ba kandang menua Sebangan ke Sebuyau enggau Sebuyau ke Sebangan ngambika bejejimat laban bisi tiang miring nuju jalai nya,” ku tulis iya ba Facebook

Naka urung pukul 7.30 malam, iya madahka nadai sebarang pengawa ari piak bekuasa tauka piak bekaul ba palan penusah nyadi.

Berindik enggau nya, penguna jalai alun dilalau ngambika bejimat cheremat sereta seruran bejejaga lebuh nengah kandang endur Kampung Bajong Ili nyentukka pengawa matau enggau pengawa nangkanka nya dipejalaika piak ke bekaul. — RBI

NIAH, 23 Mei — Siku baya ke ngembuan pemesai urung 9 kaki 8 inchi pemanjai mujur ditangkap peranak Rumah Dura Suim pengudah jelu reptilia nya tepekul ba pukat selambau ba kandang Sungai Suai, Niah pagi tadi.

Ba penusah ke sama, dua iku anak baya mega ditemu mati pengudah dipelaba tesangkut ba pukat ke di nan ba kandang sungai nya.

Nitihka penerang siku peranak menua nya ke dikelala enggau nama Melroger, baya ba kandang menua Sungai Suai enggau Niah suah meri pengirau ati peranak laban dipadahka chukup mangah sereta suah ayan besemak enggau batang jalai sungai ke ditengah komuniti besemak.

“Baya tu selalu ngeruga peranak ke benung bekayuh ngena perau nyengkaum maya pulai gawa enggau sekula,” ku iya lebuh dirandau Ruai Berita Iban.

Ku iya, baya besai nya dianggarka pemerat lebih 100 kilogram lalu begunaka tujuh iku peranak menua nya nangkap sereta ngangkatka reptilia nya pansut ari sungai.

Melroger mega bisi ngenang, kena 13 Mei tu tadi, peranak menua nya betemu enggau siku agi baya ke jauh besai agi lebuh bejalaika aktiviti nginti udang di Sungai Suai.

Nitihka penerang iya, baya nya dipelabaka urung 16 kaki pemanjai, lalu nyau deka sebaka pemesai enggau tayar kerita Toyota Hilux.

Ba penusah nya, peranak ke benung ba sungai nya terus ngelarika diri ke darat pengudah sedarka penatai jelu reptilia nya, ti dipadahka benung semak ngagai kandang endur sida nginti undang.

Penusah nya sekali agi ngenataika pengirau senentang pengelikun penguna sungai, kelebih agi peranak ti bepanggai ba perengka pengangkut ai enggau pengeraja asal sungai ungkup aktiviti ninting hari ba kandang menua Sungai Suai enggau Niah.

Peranak menua nya ngarapka pengawa matau enggau pengelikun bekaul enggau keruga baya ulih terus dikemanahka agi dikena nyeliahka penusah ke enda dikedekaka nyadi jemah ila. — RBI

BETONG, 23 Mei – Sepenyampau 200 iku penerima ari sitak DUN Layar nerima pemeri beserimbai enggau Pengerami Sejambak Kasih Hari Gawai Bagi Menua Betong 2026 ke diatur ba Dewan Che Zhong Khor, Betong sehari tu.

Ari penyampau nya, 100 iku penerima bantu ari baruh Opis Pengintu Pengelantang Raban Bansa (JKM) seraya 100 iku agi penerima ari Gerempung Meninggikan Akhlak Che Zhong Khor.

Pengerami tu mega nerima kerejasama ari Opis Pengintu Pengelantang Raban Bansa Sarawak enggau Saberkas Betong nengah Program Saberkas Prihatin ti mega nyadung pemeri belanja ngagai penerima.

Pemeri nya disuaka Kaban Kunsil Nengeri (ADUN) Layar ke mega Sapit Menteri Pemansang Nembiak, Lumba enggau Orang Dagang (Pemansang Nembiak enggau Lumba), Datuk Gerald Rentap Jabu begulai enggau bini iya, Datin Rosemary Wong.

Sama bisi datai ngerichahka agi pengerami nya, Kaban Parlimen Betong, Dato Dr.Richard Rapu @ Aman Anak Begri, Residen Bagi Menua Betong, Datu Richard Anak Michael Abunawas, Pemesai Pengintu Pengelantang Pendiau Bagi Menua Betong, Abg. Ahmad Ibrahim Bin Abg. Abdul Rahman enggau Chairman Gerempung Meninggikan Akhlak Che Zhong Khor Betong, Chan Chu Chu enggau Kaunsil Tanah enggau Survei Bagi Menua Betong, Moris Anak Nayup.

Ba pengerami ke sama, lima buah serakup mega bisi nerima agih belanja ungkup Projek Mit Menua Pesisir (MRP) dikena mantu bejalaika aktiviti enggau program komuniti sida empu.

Gerempung ke nerima agih belanja nya iya nya Gerempung Meninggikan Akhlak Che Zhong Khor, Gerempung Fu Sheng Gong, Kaunsil Pengatur Sekolah Chung Hua, Gerempung Shen Tan Gong, Amanah Amal Kuil Cina Betong enggau Gerempung Buddha Betong.

Kelimpah ari nya, empat iku nembiak sekula primari mega nerima pemeri RM300 siku nyadika sukung enggau peransang laban sida deka ngarika Sarawak ba Pekit Bola Keranjang MSS di Pulau Pinang taun 2026 ila.

Pengerami Sejambak Kasih Hari Gawai 2026 diatur kelai pengibuh enggau pengawa ti enda ngetu dalam pengawa mantu sida ti begunaka bantu, kelimpah ari ngerapitka kaul komuniti bemacham pupu bansa enggau jalai pengarap sebedau pengerami Hari Gawai.

BELAGA, 23 Mei – Pengawa bejalaika Projek Genturung Pendiau Digital Sungai Asap (SADV) ti beungkus RM36 juta ari Perintah Sarawak mega dikearapka ulih ngenyampatka pemansang digital di kandang menua ulu enggau nya ngenegapka guna teknologi dalam pengawa betanam betupi enggau pelajar.

Kaban Kunsil Nengeri (ADUN) Murum, Kennedy Chukpai Ugon madah, pengawa nya setipak enggau perambu numbuhka Palan Transformasyen Betanam Betupi Pintar (SATC) ba Palan Pengentap Pendiau Bakun (BRS) Sungai Asap ti deka nyadi palan pemansang betanam betupi moden bepelasarka teknologi enggau komuniti.

Kelimpah ari nya, ADUN Murum nya madahka Program Betanam Betupi Pintar Inisiatif Tenaga Sarawak di SMK Bakun enggau SMK Belaga dipeda nyadi pelasar ke beguna dalam ngadaka rebak biak menua pesisir ti landik ngena teknologi sereta besemekih dalam sektor betanam betupi moden.

“Chara betanam betupi pintar ti diberi kelala ukai semina meri penguntung ngagai nembiak, tang mega bisi potensial ngubah landskap ekonomi komuniti menua pesisir nengah pengawa ngena teknologi digital dalam sektor betanam betupi,” ku iya.

Iya madah munyi nya lebuh bejadi Program Betanam Betupi Pintar Inisiatif Perintis Tenaga Sarawak ba Dewan SMK Bakun, Sungai Asap, kena Hari Empat tu tadi.

Nitih ku iya, penerang tumu ngagai teknologi baka Internet of Things (IoT), automasyen enggau sistem betanam betupi pintar beguna dalam nentuka rebak baru nyikap diri napi ubah industri enggau pemansang ekonomi digital kemaya hari tu.

“Program tu muka ruang ngagai bala nembiak meretika chara teknologi ulih dikena ba pengawa betanam betupi nengah chara ti lebih moden, sistematik sereta produktif.

“Kelimpah ari ngenegapka pengawa belajar di sekula, inisiatif tu mega ulih matak pengerindu raban nembiak meda pengawa betanam betupi nyadi sektor jemah ila ti bisi potensial besai,” ku iya.

Sama bisi datai Pemesai Pelilih Belaga Bidah Lujah, Sekretari Politik Menteri Besai Sarawak Thomas Balan Bang, Sapit Residen Bagi Menua Kapit Robert Liman Deli enggau SEB Power, Ketuai Pemesai Eksekutif Sarawak Energy Ir. Bunyak Lunyong. – RBI