SIBU, 5 Julai — Sepenyampau 13 iku nembiak ari sitak DUN Tamin udah nerima bantu pelajar sepenyampau RM6,500 ti dikenataika Kaban Kunsil Nengeri (ADUN) Tamin, Ir. Christopher Gira Sambang, nyadi pengawa ti enda ngetu dikena ngenegapka pelajar enggau pemansang modal mensia di menua pesisir, ditu kemari.
Bantu nya disuaka ngagai bala nembiak ti nampung pelajar ba mayuh bengkah palan pelajar tinggi, ti mungkur bemacham bidang akademik.
Berebak enggau nya, bala penerima enggau sida sebilik meri besai terima kasih ngagai pengibuh enggau sukung ti enda ngetu diberi nyengkaum ruang bilik ari Rumah Lawrence Radin, Sungai Pasai Bon, Sibu, ti nerangka bantu nya chukup besai reti dalam ngelempungka tating penyikap pelajar anak sida.
Siku penerima, Hazel Melissa anak John, begulai enggau sida sebilik mega ngenataika pengaga ati ti ngagai Gira ketegal bantu ti diterima, ti dikumbai nyadika peransang besai nampung pelajar sida ngagai tikas ti tinggi agi.
Berebak enggau nya, Ir. Christopher Gira Sambang nyemetak madahka komitmen iya deka terus mantu bala nembiak di kandang menua Tamin ngambika sida enda tinggal ari peluang pelajar, setipak enggau agenda pemansang nengeri ti ngemeratka pelajar enggau pengelantang rayat.
Iya mega ngelalau bala nembiak ngambika seruran bebendar gawa dalam pelajar, ngemeranka disiplin diri sereta ngena memanah peluang ke diberi.
“Pelajar nyadi pelasar pengidup jemah ila.Guna meh awak tu numbuhka pemujur ungkup diri empu, diri sebilik sereta mega komuniti.Anang mudah putus pengarap dalam neruska juluk diri,” ku iya lebuh ditelefon Ruai Berita Iban. – RBI
#ruaiberitaiban#newsiban#beritaiban
Rindu | Titih | Kunsika
