SELANGAU, 4 Julai — Program Sematam Kemerdekaan 2026 udah diatur enggau chukup pengeransing ba kompaun Opis Pelilih Selangau sehari tu, lalu enggau nya nyadi pelasar beguna dalam ngenegapka penyerakup, talukka menua enggau pemansang komuniti lokal.
Pengerami bejadi nya dipenyadika Kaban Kunsil Nengeri (ADUN) sitak N.59 Tamin, Ir. Christopher Gira Sambang.
Dalam jaku dipansutka iya, iya meri besai terima kasih ngagai Unit Komunikasyen Mensia Mayuh Sarawak (UKAS) Bagi Menua Sibu ti udah ngatur program nya, ti dikumbai iya nyadi platform ti efektif dalam nerenakka ulah talukka menua ba renggat baruh.
Iya nyemetak madahka merdeka ukai semina pengawa simbolik ngibarka Jalur Gemilang enggau nyadaka lagu Negaraku aja, tang lebih agi minta komitmen ti enda ngetu ari semua rayat dalam ngetanka pemaik, pengelantang enggau penyerakup ungkup pemaik menua jemah ila.
Berebak enggau nya, iya mega meri besai terima kasih ngagai ketuai Perintah Sarawak ari baruh iring YAB Premier Sarawak, Datuk Patinggi Tan Sri Abang Johari Openg ti enda ngetu ngemansangka kandang menua pesisir enggau komprehensif.
Nitih ku iya, kenyau ari taun 2016, bemacham projek pemansang udah dipejalaika ba DUN Tamin ti ngaul infrastruktur jalai alun, bekal ai, pelajar, pengerai, telekomunikasyen enggau perengkaguna lumba enggau main ti meri penguntung terus ngagai rayat.
Iya mega madahka projek ngangkatmanah Loji Meresi Ai Selangau enggau Loji Meresi Ai Stapang/Sekuau dikearapka ulih mutarka isu bekal ai ba sekeda kandang endur DUN Tamin, asil ari kerejasama ejensi ti bejalaika pengawa nyengkaum JBALB Sarawak, Sarawak Water enggau ejensi ti bekaul.
Ngelansa pasal sukut pemansang Pasar Selangau, iya madahka penumbuh premis dagang baru baka Hotel Roxy enggau Pasar Besai LePapa sereta mega perambu pemansang ‘food court’ moden, pasar basah enggau dewan mayuh guna ari Tecktonic & Son Holdings Sdn. Bhd deka nyungkak agi aktiviti ekonomi menua tu.
Inisiatif tu dikearap ulih muka mayuh agi peluang gawa, ngerembaika ruang dagang ungkup orang dagang menua tu sereta meri penguntung ngagai raban nembiak enggau aktivis seni enggau main asal, kelimpah ari matak pemeranak puku ngagai kandang menua Selangau.
Iya andal enggau sukung ti seruran diberi Perintah Sarawak, Pasar Selangau ngembuan potensial mansang nyadi palan penumbuh ekonomi baru ba kandang menua tengah Sarawak ti lebih moden, progresif sereta kompetitif.
Berindik enggau nya, iya nesau semua komuniti ngambika terus idup nitihka semengat “Segulai Sejalai” dalam ngenegapka penyerakup sereta nentuka pemansang DUN Tamin enggau Selangau terus dipejalaika setipak enggau aspirasyen Sarawak Maju Makmur 2030.
Sama bisi ngulu atur pengawa nya, Jelani Ajang ngarika Direktor UKAS Sarawak, Pemesai Pelilih Menua Selangau Yalin Anak Asan, ketuai raban bansa enggau ketuai komuniti (KMKK), kaunselor enggau peranak menua nya. — RBI
#Beritalban | Ruai Berita Iban
Rinduka | Titihka | Kunsika
