MIRI, 4 Julai – Perintah Sarawak nagit abis nadai 70 peratus rayat di nengeri tu landik ngena digital manggai ba taun 2030 dikena nentuka sida ulih nguasa teknologi sereta nangkup guna ekonomi digital jemah ila.
Premier Sarawak Datuk Patinggi Tan Sri (Dr) Abang Haji Abdul Rahman Zohari Bin Tun Datuk Abang Haji Openg madah, pemansang mengeri pintar enggau ekonomi digital semina deka mujur enti rayat ngembuan penemu enggau pengelandik nguna teknologi enggau optimum.
“Aku ngasaika di Sarawak, ambis nadai 70 peratus ari penyampau tubuh kitai meseti nyadi rayat ke pintar.
“Kitai patut nyikap rayat enggau penemu sereta pengelandik ngambika sida ulih nguasa teknologi, ukai semina nguna aja,” ku iya lebuh bejaku ba Pengerami Bejadika Palan Perintah Mengeri Pintar Miri Majlis Bandaraya Miri di Hotel Imperial, ditu, kena Hari Enam tu tadi.
Nitihku iya, dikena nyukung tagit nya, Perintah Sarawak melabaka entara 39,000 ngagai 48,750 peluang kereja digital bepengelandik tinggi deka diadaka manggai ba taun 2030.
Ku iya, pengawa nya setipak enggau atur perintah ti deka nyendiaka pengereja pengawa ti kompetitif nengah pelajar tinggi enda bebayar, latih pengelandik enggau pemansang modal mensia dikena nangkup guna industri ti bepelasarka teknologi.
Ku Abang Johari, kenyau ari taun 2018, lebih 540,000 iku penyereta udah nyereta program ngangkatka pengelandik enggau penau baru ti dipejalaika Perintah Sarawak.
Nitihku iya, penyampau nya dipelaba deka majak nambah laban mayuh agi orang nyengkaum peranak menua pesisir enggau orang tuai mujur nelebaka diri ngena teknologi digital dalam aktiviti ninting hari baka bayar enda ngena tunai nengah Program Barang Pemun (SKAS) Sarawak.
Ku iya, pengawa ngenegapka literasyen digital deka terus diangkatka nengah mayuh bengkah inisiatif nyengkaum penerang ngagai teknologi ‘pemintar tiru’ (AI) dikena nentuka peranak Sarawak nyikap diri napi ubah rampa ekonomi dunya. – RBI
#ruaiberitaiban#newsiban#beritaiban
Rindu | Titih | Kunsika
