KUCHING, 4 Julai – Gerempung Graduet Dayak Sarawak (SDGA) terus ngenegapka rentayan kerejasama strategik dalam pengawa meri kuasa ngagai komuniti asal lebuh nyereta Pengerami Gawai-Kaamatan Ke-17 begulai enggau Balai Dagang enggau Industri Dayak (DCCI) sereta Balai Dagang Kadazan (KKCI) pengerami budaya komuniti asal Sarawak enggau Sabah.
Pengerami nya dipenyadika Premier Sarawak, Datuk Patinggi Tan Sri (Dr) Abang Haji Abdul Rahman Zohari Tun Datuk Abang Openg nyadi temuai dipebasa, ke digulu bala ketuai perintah, pengari sektor industri, balai dagang, gerempung komuniti ari semua komuniti dagang.
Raban SDGA nya betuaika Presiden iya, Ts. Rizzo Mungka begulai enggau kaban Komiti Eksekutif sereta kaban gerempung nya mantaika komitmen SDGA ti terus ngerembaika kerejasama rentas sektor dikena nyukung pemansang modal mensia enggau penyulut sosio-ekonomi komuniti Dayak enggau bansa asal.
Kelimpah ari ngerami semengat Gawai Dayak enggau Pesta Kaamatan ti nyadi kelai penyerakup enggau pengaya pesaka asal Borneo, pengawa tu mega nyadi pelasar ti beguna dikena ngerapitka kaul enggau kaban strategik, betukar penemu enggau nyerungkai peluang kerejasama baru ti ulih meri empas positif ngagai komuniti.
Penyereta SDGA ba atur pengawa tu mega mandangka aspirasyen gerempung nya deka terus bejalaika tanggungpengawa nyadi penyambung entara graduet Dayak, sektor korporat, ejensi perintah enggau gerempung komuniti dalam ngenegapka pelajar, nyadi ketuai enggau pemansang ti meruan.
SDGA mega meri besai terima kasih ngagai DCCI, KCCI enggau semua kaban pengatur laban udah mujur ngatur pengerami nya ti ukai semina ngetanka nilai penyerakup enggau penyelai budaya, tang mega nyadi pelasar ti beguna dalam ngenegapka rentayan kerejasama entara mayuh bengkah piak.
Gerempung tu ngarapka kerejasama tu deka terus ditegapka agi nengah pengawa bejalaika mayuh macham inisiatif ti meri empas tinggi ti ulih nempa peluang ke besai agi ngagai komuniti asal, lalu enggau nya meri pangka ngagai pemansang inklusif enggau penyulut ti meruan di Sarawak enggau Sabah. – RBI
#ruaiberitaiban#newsiban#beritaiban
Rindu | Titih | Kunsika
