SARATOK, 4 Julai — Raban Penyaga Pengelikun Mensia Mayuh Malaysia (APM) Pelilih Saratok udah bejalaika operasyen ngenyit dikena mantu siku mansa dalam penusah jalai alun kediri empu ti ngaul sebuah mutosikal ke nyadi ba kandang menua Padang Kaunsil Pelilih Saratok (MDS), sehari tu.
Nitihka penerang ari Palan Kawalan Operasyen APM Saratok, kangau ngenyit bisi diterima ari mensia mayuh urung pukul 12.50 tengah hari sebedau raban penyelamat dianjung ngagai palan penusah nyadi.
Sebuah tim ti mungkur empat (4) iku raban APM datai ba palan nya urung pukul 12.52 tengahari lalu tekala nya bejalaika pengawa meresa keterubah mansa.
Asil pansik ba endur nya tetemuka siku indu ke besai tuai bakal mimit pengudah penusah ba jalai alun ngena mutosilal kediri empu.
Mansa diripotka sedar enggau bakal sereta rajai ba patung kiba enggau buku lali kiba ke bisi telih.
Tim APM udah nya bejalaika pengawa berubat keterubah nyengkaum meresi bakal enggau ngengkahka sukung ba kaki ke bakal dikena ngetanka gaya mansa sebedau dipindahka.
JULAU, 4 Julai — Kaban Kunsil Nengeri (ADUN) Pakan, Tan Sri William Mawan ngenataika pengaga ati ke pemadu tinggi sereta tabi puji ngagai SK Nanga Kota, Julau ketegal pemujur ti ngemegah ati lebuh dipadu nyadi champion Tarian Rentak Malaysia (Sekula Primari) ba Pekit ‘Tarian Sekolah-Sekolah Malaysia Peringkat Kebangsaan Tahun 2026 (TASEEM) ke diatur ari 28 Jun nyentuk 1 Julai 2026 ba Hotel Sunway Big Box, Johor, tu tadi.
Nitih ku iya, pemujur nya mandangka komitmen tinggi, disiplin enggau pengeransing ti enda ngetu ari bala pesereta, pengajar enggau semua piak ti ngaul diri dalam nentuka pemerindang ti bekualiti ti mujur mai basa ngagai Sarawak ba renggat nasional.
“Pemujur tu ukai semina ngasuh sekula enggau pelilih Julau temegah ati, tang mega ngangkatka prestij seni main asal Sarawak ba panggau menua,” ku iya lebuh dirandau.
Iya mega ngenataika pengaga ati ngagai pesereta nembiak ti udah mandangka semengat ngelaban enggau dedikasyen ti besai sepemanjai sesi latih enggau pekit, enggau nya ngayanka penau besai ti dikembuan nembiak rebak baru Sarawak dalam bidang seni.
Berebak enggau nya, Tan Sri William Mawan mega meri besai terima kasih ngagai embing bala pengajar ti udah meri komitmen sida ti enda bechiping ngembing sereta ngelatih tim nya nyentukka sida teulihka pemujur ti nyulut ba renggat nasional.
“Puji mega diberi ngagai Opis Pelajar Pelilih Menua (PPD) Julau laban ti seruran meri sukung enggau koordinasyen ti efektif dalam nentuka pengawa nyikap tim nya bejalai enggau lanchar sereta teratur.” ku iya.
Tan Sri William Mawan meri puji ngagai Apai Indai ketegal enda tanggungpengawa sida enggau penyaga ti seruran meri sukung ti tegap, peransang enggau pengandal sepemanjai timpuh latih enggau pekit.
“Aku ngarapka pemujur tu deka nyadi penyungkak terus ngadaka mayuh agi penau biak dalam bidang main asal, kelebih agi di Julau enggau selampur Sarawak, kelimpah ari ngenegapka penuduk nengeri tu dalam arena seni nasional.
“Manah pengawa baka nya sereta meri pengaga ati ngagai SK Nanga Kota, Julau. Terus nyulut sereta mai basa ngagai Sarawak,” ku iya ngujung ke randau. — RBI
BETONG, 4 Julai – Dua bengkah projek pemansang pelajar di Bagi Menua Betong benung dipejalaika nitihka timpuh ke udah ditetapka lalu dipelaba tembu berenggat entara suku keempat taun tu enggau suku keterubah taun 2027.
Pemansang nya dikelala nengah penemuai matau projek pemansang Perintah Besai ari Opis Pemansang Nengeri Sarawak (ICU Sarawak) ngagai dua palan projek ke dikerandau nya.
Penemuai nya betuaika Sapit Direktor Pemansang Nengeri Sarawak I, Wan Fadillah Wan Ahmad begulai enggau pemesai ari Opis Pemansang Nengeri Sarawak, Opis Pelajar Nengeri Sarawak, Opis Pelajar Pelilih Betong enggau Opis Kereja Raya (JKR) Bagi Menua Betong.
Palan keterubah iya nya Projek Sekula Repuk Sarawak (2022) ti mungkur pengawa nganti 10 unit rumah pengajar di Sekula Primari (SK) Issu/Bangat.
Projek nya diatu benung dipejalaika nitihka timpuh ke udah ditetapka lalu dipelaba tembu ba suku keempat taun 2026.
Raban nya udah nya ngabas Projek Ngemansangka Baru Sekula Repuk Sarawak (Renggat 3) ke beungkus RM1 Bilion di SK Saka.
Skop projek nya nyengkaum ngaga blok pentadbiran empat ringkat, dua blok buding enggau bilik mandi seretw jamban, dewan makai, blok prasekula enggau blok kuarters.
Projek tu mega dipejalaika nitihka timpuh ke udah ditetapka lalu dipelaba tembu ba suku keterubah taun 2027.
Penemuai matau nya mandangka komitmen Perintah Sarawak enggau Perintah Besai ti seruran dipejalai dalam nentuka projek pelajar dipejalai nitihka perambu sereta dipatau enggau silik.
Enti udah tembu ila, kedua-dua projek nya dikearapka ulih nyendiaka perengkaguna ti bekualiti sereta likun agi ungkup bala pengajar enggau nembiak di Sarawak. – RBI
KUCHING, 4 Julai – Siku indu ditemu angus dalam jamban seraya indai iya betu tikas dua pengudah rumah sida di Kampung Tubih Batu Raung, Serian angus diempa api tumu pagi tadi.
Tudah ke bebadi nya dikelala ngena nama Nurul Farhana Amerudin, 37, lalu indai iya, Sharifah Bok Wan Muhsin, 65, bakal ba mua, rekung, punggung, jari enggau tapa kaki.
Opis Bomba enggau Penyah Penusah (JBPM) Sarawak madahka sida nerima kangau ngenyit urung pukul 12.29 tengah malam sebedau raban ari Balai Bomba enggau Penyah Penusah (BBP) Serian dianjung ngelawa endur nya.
Penusah angus nya ngaul sebuah rumah tetap setingkat enggau pemesai 48 x 70 kaki ti udah angus lengis.
Sharifah Bok Wan dianjung berubat ngagai Sepital Serian, lalu tubuh tudah anak iya diserah ngagai polis ngambika atur ke silik agi dipejalaika.
KUCHING, 4 Julai — Pengerami Ngintu Ulang Taun Ke-20 Gerija St. Basil ke diatur ba Palan Sembiang Ekumenikal Kristian kemari nyadi kelai tegap pengelantang jalai pengarap, penyerakup komuniti enggau komitmen Perintah Sarawak ti terus ngenegapka pengelantang pendiau rayat ke nadai ngira penatai bepengarap.
Pengerami nya dipenyadi Sapit Premier Sarawak YB Datuk Amar Douglas Uggah Embas, ke mega Menteri Pekara Wang enggau Ekonomi Baru Kedua sereta Menteri Infrastruktur enggau Pemansang Palan Penyangkai Kapal.
Dalam jaku iya, iya meri besai terima kasih ngagai peluang ngintu ulang taun besejarah nya begulai, ti digambarka iya ukai semina pengerami dua dekad kenyau ari penumbuh gerija tang mega nyadika testamen ngagai penegap pengarap, pengorbanan enggau komitmen komuniti gerija ti harmoni enggau buil.
Iya mega nyemetak madahka Sarawak mengkang nyadi chunto ketuai ari sukut pengelantang entara jalai pengarap, lebuh komuniti bemacham jalai pengarap nyengkaum Kristian, Islam, Buddha, Hindu enggau Sikh diau dalam pendiau bebasaka pangan diri sereta meretika pupu bansa.
Nitih ku iya, pengelantang tu udah lama diterenak nengah pengawa nyadi ketuai ti bisi visyen sereta pangku pengawa institusyen pengarap ti terus ngemeratka rega basa, pengerindu enggau penyerakup entara komuniti.
YB Datuk Amar Douglas Uggah mega meri besai terima kasih ngagai Premier Sarawak YAB Datuk Patinggi Tan Sri (Dr) Abang Haji Abdul Rahman Zohari bin Tun Datuk Abang Haji Openg ti udah bejalaika Strategi Pemansang Pengudah COVID-19 2030 (PCDS2030) pemanah rampa menua, enggau prinsip “nadai orang deka ditinggalka”.
Berebak enggau nya, iya ngemeratka komitmen Perintah Sarawak nengah Unit Pekara Jalai Pengarap Bukai (UNIFOR) ke nyadi entara inisiatif beguna dalam ngenegapka pengelantang jalai pengarap di nengeri tu.
Ari taun 2017 ngagai 2026, sepenyampau RM565 juta udah diungkupka ngagai UNIFOR dikena nyukung 2,640 projek rumah sembiang di serata Sarawak, ti ngaul pengawa ngaga, ngangkatmanah, nyeruri sereta ngemanahka rumah sembiang enggau rumah sembiang ukai Islam.
Iya mega madahka Gerija St.Basil udah nerima agih belanja sepenyampau RM2.45 juta ungkup pengawa ngaga Palan Parish, nyengkaum tambah RM1 juta ti dikemendarka dalam taun 2026.
Taja pia, iya ngelalau ngambika agih belanja ke diagih nya patut dikena enggau bejimat sereta sistematik, seraya ngemeratka UNIFOR deka terus matau pengawa bejalaika projek dikena nentuka transparensyen enggau atur pengawa ke manah.
Kelimpah ari nya, iya mega meri besai terima kasih ngagai pemeri besai gerija dalam pemansang rama komuniti, nyengkaum dalam bidang pelajar, pengelantang pendiau enggau nempa ulah nembiak rebak baru.
Nitih ku iya, institusyen gerija enggau sekula indu misi udah lama bejalaika tanggungpengawa ti beguna dalam ngadaka mayuh ketuai, profesyenal enggau pengereja pengawa perintah di Sarawak, nengah pemerat ba nilai disiplin, pengelurus enggau tanggungpengawa.
Gerija mega ku iya, terus bejalaika tanggungpengawa ti beguna dalam pemansang raban nembiak nengah bemacham program baka aktiviti nyadi ketuai, muzik, lumba enggau main sereta servis komuniti ti mantu nempa raban nembiak rebak baru ti kompeten sereta kompetitif.
Lebuh nyimpul jaku iya, iya nyemetak madahka penegap sebuah gerija ke bendar ukai disukat ari fizikal begunan iya, tang lebih agi bepanggai ba penegap pengarap, semengat begulai enggau komitmen dalam gawa ke komuniti.
Kelai sukung ti terus diberi, iya mega madahka diri deka nyuaka pemeri RM50,000 ngagai komuniti St.
Pengerami nya diatur dalam suasana pengelantang enggau pemanah ati, mandangka penyelai Sarawak nyadi nengeri model ba penyelai jalai pengarap enggau budaya.
Sama bisi datai Sapit Premier Sarawak YB Datuk Amar Professor Dr.Sim Kui Hian, Menteri Pengerai Mensia Mayuh, Pengawa Berumah enggau Perintah Menua Sarawak, YBhg. Datin Amar Dato’ Doreen Mayang, YBg. Joseph Dusit Ijau Vicar Gerija St.Basil, Batu Kawa enggau Puan Datin Kumbun, Temenggong Nelson Kloni Kanang, Ketuai Komuniti Iban Bagi Menua Kuching enggau Puan Florence Esa
SRI AMAN, 3 Julai — Opis Pengerara Api enggau Penyah Penusah Malaysia (JBPM) Sarawak udah mujur nagang penusah angus ke nyadi ba sebuah rumah peranak besemak enggau Kampung Putat, Sri Aman, kena malam Hari Empat.
Kangau ngenyit nya diterima urung pukul 11.24 malam (23:24 jam), sebedau raban ari Balai Bomba enggau Penyah Penusah (BBP) Sri Aman datai ba palan penusah nyadi urung pukul 11.44 malam, urung 12 kilometer ari balai nya.
Komander Operasyen, PBK I Mohamad Fadhli Bin Buyong, madahka penusah angus nya bepun ari litar pintas ba wayar elekterik ba siling rumah nya.
Api enda ngerekai ngagai struktur besai rumah lalu semina ngaul pengerusak mit ti dipelabaka urung dua peratus ngagai siling.
Tim operasyen bejalaika pengawa beratika situasyen (size up) enggau pengawa madamka api ngena hos bantu tunggal dikena nentuka nadai agi pun penatai api ke aktif ba palan penusah nyadi.
Rumah nya urung 20 kaki pemesai enggau 35 kaki pemanjai mujur dijaga pukul 12.25 tengah malam, sebedau operasyen diketuka pukul 12.28 tengah malam pengudah gaya nya disahka likun.
Nadai penusah bebadi nyawa tauka bakal diripotka nyadi ba penusah nya. Nyadi orang ke empu rumah nya Ensanggai Anak Labon dientaska likun.
Anggar pengerugi enggau kebuah ke bendar penusah nya nyadi benung dipansik Pemesai Pemansik Bomba (FIO) JBPM.
Operasyen nya mungkur tujuh iku raban enggau bantu siti Tender Penyelamat Bomba (FRT) enggau siti unit EMRS.
Semua raban enggau jentera pulai ngagai stesyen pukul 12.55 tengah malam pengudah operasyen tembu penuh.
JBPM Sarawak ngelalau mensia mayuh ngambika seruran nentuka sistem wayar elekterik dalam gaya ke manah sereta bejalaika pengawa meresa ari maya ke maya dikena nyeliahka penusah angus. — RBI
BETONG, 3 Julai — Pengerami Nutup Pekit Atletik Kaunsil Sukan Sekolah Bagi Menua Betong (MSSB) 2026 diatur enggau mujur ba Kompleks Sukan Betong, lalu enggau nya ngelai pengawa nutup rasmi pengawa ngatur pekit lumba enggau main sekula bagi menua nya.
Kaunsil Lumba Sekolah Bagi Menua Betong (MSSB) enggau kerejasama Opis Pelajar Pelilih Betong udah mujur ngatur pekit tu enggau sukung tegap ari bala pengajar, jurulatih, apai indai enggau semua piak ti bekaul terus enggau enda terus.
Sepemanjai pekit tu, atlit sekula udah mandangka semengat lumba enggau main, disiplin enggau daya bepekit ke tinggi.
Pekit MSSB tu ukai semina nyadi arena pekit aja, tang mega befungsyen nyadi pelasar dikena ngemansangka bakat sereta nempa ulah nembiak nengah nilai lumba enggau main.
Kaban Parlimen Betong, Dato Dr. Richard Rapu ba penerang iya ngenataika pengaga ati sereta pengaga ati ngagai semua atlit enggau pengatur ti udah nentuka pengelanchar pekit nya bejalai.
“Manah pengawa sereta meri pengaga ati ngagai semua atlit ke udah mandangka ulah lumba enggau main, disiplin enggau daya besemekih sepemanjai pekit tu.
“Pemenang ukai batang ukur, tang peneleba, pengepuh enggau semengat tim ti digaga deka nyadi perengka guna ti berega jemah ila.” ku iya.
Iya mega nyemetak madahka pekit baka tu patut dipajakka nyadi pelasar dikena ngadaka mayuh agi atlit bepenau ti ulih mai mulia ngagai nama Bagi Menua Betong, Sarawak enggau menua tu.
“Ngarapka pekit tu terus nyadi pelasar dikena ngadaka mayuh agi atlit bepenau ti ulih mai mulia ngagai nama Betong, Sarawak enggau menua tu,” ku iya nambah.
Iya mega meri besai terima kasih ngagai Opis Pelajar Pelilih Betong, MSSB Betong, bala pengajar, jurulatih enggau apai indai ketegal komitmen enggau pengeransing sida mujur ngatur pekit nya.
Pengerami nutup nya diatur dalam pengerami ti richah sereta penuh enggau gaya lumba enggau main, lalu enggau nya mujur nutup MSSB Betong 2026. — RBI
SARATOK, 3 Julai — Raban Penyaga Pengelikun Mensia Mayuh Malaysia (APM) Pelilih Saratok udah bejalaika operasyen ngemunaska sarang manyi lalat ti tau mai penusah ba Kampung Bunga Raya, Saratok pengudah nerima kangau ngenyit ari mensia mayuh, lemai tu tadi.
Palan Kawalan Operasyen (PKOD) Pelilih Saratok udah ngerapitka seraban ngagai endur nya pengudah nerima ripot bekaul enggau pemisi sarang manyi lalat nya ba pun mangga ba genturung pendiau peranak menua nya.
Lebuh datai ba endur nya, tim nya tetemuka sarang manyi kira-kira pemesai tapak jari orang besai tuai ba peninggi urung lima kaki ari tanah.
Tim APM udah nya bejalaika pengawa ngerusak ngena perengka khas enggau teknik nguru dikena nentuka sarang nya ulih dipunaska abis enggau nadai ngeruga mensia mayuh.
Operasyen ti ngaul tiga (3) iku raban nya mujur dipejalaika enggau lanchar sereta dijaga enggau nadai sebarang penusah ti enda dikedekaka nyadi.
Semua perengka ke dikena mega diperesa sebedau dibai pulai ngagai PKOD Saratok.
APM Saratok ngemeratka komitmen sida ti seruran meri timbal jampat ngagai sebarang sebana ngenyit ti ngaul ancaman ari jelu ti tau mai penusah ungkup pengelikun komuniti setempat.
LIMBANG, 3 Mei – Opis Menteri Pengerai Malaysia nengah Opis Pengerai Nengeri (JKN) Sarawak madahka kudi ti disempulang ribut deras enggau ujan bangat nyadi...
