JULAU, 23 Mei – Kuta Brooke di Nanga Meluan ngembuan rega sejarah ke tinggi sereta bisi penau dikemansangka nyadi ikon dagang temuai besai ke ulih matak penatai temuai ari dalam enggau luar menua tu.

Chairman Kaunsil Industri Kayu Ramu Malaysia, Datuk Larry Sng Wei Shien madah, komuniti menua nya dikearap begunaka awak ngerebut peluang nya nengah chara ngemansangka sektor dagang temuai komuniti enggau ekonomi menua tu lalu beambi ulih ari penyelai sejarah kandang menua nya.

Ku iya, peranak Nanga Meluan diperansang numbuhka kedai pemakai asal, bansal asil pengelandik jari enggau dagang mit ti ulih ngelakuka budaya enggau aktiviti komuniti menua nya ngagai bala temuai.

“Kuta Brooke di Nanga Meluan ngembuan rega sejarah lalu sejarah baka tu enda ulih dibeli. Tu meh awak ke pemadu manah dikena ngemansangka ekonomi peranak menua tu sereta meri kelala Julau ngagai tikas ke lebih luas,” ku iya lebuh bejaku ba Pengerami Makai Lemai SK Nanga Meluan, ditu.

Nitih ku iya, sitak tu mega engkeman dikemansangka nyadi palan eko-dagang temuai nengah pengawa ngaga rumah temuai, hotel mit tauka palan ngelantangka ati ke ulih meri peneleba ke nyelai ngagai temuai ngasaika pemanah rampa menua enggau pesaka sejarah ba sitak nya.

Berebak enggau nya, iya mega meri langgur penemu ngambika palan besejarah nya nyadi palan endur mandangka main asal enggau pesaka asal komuniti menua nya, nyengkaum aktiviti asal baka nyembui lada, nyendiaka pemakai asal enggau mandangka main asal.

Ku iya, pengawa nya ukai semina ulih ngetanka pesaka sejarah enggau budaya, tang mega muka peluang ekonomi baru ngagai peranak nengah sektor dagang temuai komuniti.

Ba pengerami ke sama, Kaban Parlimen Julau nya mega madahka SK Nanga Meluan mega bisi nerima agih belanja penyampau RM30,000 dikena ngamatka semaya ke udah digaga taun siti nyin tadi.

Iya mega ngena awak nya meri Selamat Hari Gawai Dayak ngagai selampur komuniti Dayak di Sarawak. -RBI

BINTULU, 23 Mei – Premier Sarawak, Datuk Patinggi Tan Sri Abang Johari Tun Openg madahka iya udah minta kompeni Korea Selatan ba semikonduktor di Samalaju ngambi nembiak latih industri ari universiti perintah nengeri dikena meri penerang keterubah ngagai industri nya.

Kenu ku iya, makit industri besai, lalu enggau nya nyendiaka mayuh agi peluang gawa ngagai peranak Sarawak.

“Sida ulih gawa ba kompeni nya maya kemisi semester lalu enti mandangka prestasi ke manah, sida bisi peluang diambi nyadi pengajar tauka pengereja pengawa tetap,” ku iya.

Iya madah munyi nya ba aum pengarang berita Program Sarawakku Sayang Bagi Menua Bintulu ba Tapak Padang Bilun Lama Bintulu, ditu sehari tu tadi.

Berebak enggau nya mega, iya madahka sebuah kompeni Korea Selatan begunaka urung 1,000 iku injinir ari Sarawak dikena nyukung pengawa ngemesaika palan ngeluarka polisilikon ungkup semikonduktor di Samalaju.

Terang Abang Johari, kompeni nya udah madahka pekara nya ngagai iya apin lama ke udah.

“Pengawa ngemesaika loji nya begunaka 1,000 iku injinir lalu pangku pengawa nya udah dipandangka ba Job Sarawak,” ku iya.

Berebak enggau nya, iya nerangka pengawa ngemesaika loji nya ngembuan tuju deka nambahka pemansut polisilikon ungkup pemansut semikonduktor dikena napi guna sektor baru, kelebih agi tenaga aeroangkasa.

Ku iya nambah, Perintah Sarawak diatu benung bejalaika pansik dikena ngemansangka sektor nya.

“Bisi teknologi ke ulih mechahka penampak ngambika ulih ngasilka energi iya empu lalu tu teknologi baru,” ku iya bejaku pandak. -RBI

KUCHING, 23 Mei – Pengerami main asal baka Tematu Ethnofest bejalaika tanggungpengawa ti beguna amat dalam ngajar nembiak rebak baru ngambika ngelala sereta rinduka pesaka asal bansa Sarawak, kelebih agi bansa Bidayuh.

Kenu ku Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan, pengerembai pengerami tu mega amat ngemegahka ati lebuh iya majak dikelala sereta bulih perati ari komuniti luar pengudah diatur enggau konsisten pengelama 11 taun.

Berebak enggau nya mega, iya nangkan raban nembiak rebak baru dipinta terus ngetanka identiti enggau pesaka asal menua diri taja pan majak tepejuh enggau budaya ari menua luar.

“Raban nembiak enda patut enda ingatka budaya diri empu taja pan nitihka trend pemerindang antarabansa baka K-pop enggau budaya popular ari menua bukai.

“Anang malu bejaku ngena jaku diri empu, anang malu ngena pekayan asal sereta mantaika budaya kitai ngagai dunya laban budaya tu mih identiti kitai.

“Enti ukai kitai, sapa agi ke ulih mantaika identiti kitai? Enti ukai diatu, kemaya?” ku iya lebuh bejaku ba atur pengawa Tematu Ethnofest 2026 ditu, sehari tu tadi.

Snowdan mega ngingatka nembiak rebak baru ngambika ngelala penatai enggau identiti budaya diri empu taja pan sida rinduka budaya menua luar.

“Lebuh aku meda nembiak rebak baru enggau temegah ati ngena pekayan asal, mantaika main asal sereta ngena jaku Bidayuh dalam komunikasyen ninting hari, aku pechaya pesaka asal kitai deka terus meruan sereta mansang.

“Aku nemu bisi sida ti rinduka K-pop, budaya ari Amerika Syarikat tauka Indonesia, tang anang enda ingatka budaya diri empu, identiti diri empu.Raban nembiak enda tau enda nemu nama pekayan asal diri empu sereta belajarka main asal kitai,” ku iya.

Ku iya, penyampau temuai ke majak nambah ninting taun nyata ngayanka program tu ngembuan potensial ke besai ngambika terus ngerembai nyadi sebengkah pengerami budaya ke beguna di Sarawak.

Berebak enggau nya, iya madahka opis menteri iya bisi nyendiaka agih belanja ninting taun sepenyampau RM10 juta dikena nyukung pengawa ngatur woksyop, kelas enggau program bekaul enggau seni budaya sereta pesaka asal.

Kenu ku iya, belanja nya ulih dikena ngajar main asal, bemain kereban muzik etnik, ngaga pekayan asal enggau bemacham aktiviti bekaul enggau budaya pupu bansa di Sarawak.

Kelimpah ari nya ku iya, opis menteri mega bisi nyendiaka wang turu pengawa urung RM50 juta setaun dikena nyukung pengawa ngatur program besai nyengkaum pengerami budaya.

“Kitai patut ngetanka budaya, identiti enggau nengeri Sarawak ti dikerinduka kitai,” ku iya nyemetak.

Ba pengerami ke sama, Snowdan bisi madahka agih belanja ari opis menteri nya sepenyampau RM50,000 dikena nyukung pengawa ngatur program kelimpah meri bantu kediri empu sepenyampau RM20,000.

Berebak enggau nya, Kaban Kunsil Nengeri (ADUN) Batu Kitang, Dato Lo Khere Chiang mega bisi madahka diri deka meri pemeri RM10,000 ngagai pengatur Tematu Ethnofest 2026. – RBI

BETONG, 23 Mei – Penyedar sentang pemesai guna pengelikun jalai alun majak ditegapka nengah pengawa ngatur Program Kimpin Pengelikun Jalai Alun Beserimbai enggau Hari Gawai enggau Hari Raya Aidiladha 2026 ti nyadi ba Rumah Veriland, Engkeranji Layar enggau ngelingi Jalai Besai Pan Borneo nuju ngagai Hari Raya.

Program nya dipenyadika Dato Gerald Rentap Jabu ke nyadi Sapit Menteri Pemansang Nembiak, Lumba enggau Orang Dagang Sarawak sereta Kaban Kunsil Nengeri (ADUN) sitak N.36 Layar.

Kimpin tu diatur Opis Menteri Perengka Pengangkut Sarawak begulai enggau Opis Pelilih Menua Betong nengah kerejasama mayuh bengkah ejensi ke bekaul nyadi pengeran dikena nambahka penyedar mensia mayuh ngambika seruran ngemeratka pengelikun maya deriba, kelebih agi maya musin pengerami.

Entara isi program nya nyengkaum randau pasal pengelikun jalai alun, pengawa pemandang advokasyen pengelikun enggau pengawa nyuaka pemeri ngagai penguna jalai alun ti nyadi peransang ngagai mensia mayuh ngambika seruran ngasika undang-undang jalai alun sereta ngemeranka chara deriba enggau likun.

Ba pengerami ke sama, Dato Gerald Rentap Jabu mega bisi nyuaka agih belanja Projek Mit Menua Pesisir (MRP) ngagai Komiti Pemansang enggau Pengelikun Genturung Pendiau (JKKK) ba kandang menua besemak.

Sama bisi datai iya nya Richard Micheal Abunawas ke nyadi Residen Bagi Menua Betong, Laga Kueh, Jeffery Alfrida, Inspektor Jida ak Juing ngarika IPD Betong, bala ketuai opis, ketuai kaum enggau ketuai komuniti setempat.

Dikearap ngatur program baka tu ulih nambahka tikas penyedar mensia mayuh senentang sukut pengelikun jalai alun, kelebih agi maya musin pengerami ti meda penambah penyampau perengka pengangkut enggau pejalai penguna jalai alun. -RBI

SIBU: Siku lelaki bebadi nyawa pengudah mutosikal ke ditepan iya dipelabaka tepawah tama ngagai parit ba Jalai Oya semak Sekula Sekondari Kebangsaan (SMK St.Elizabeth) ditu, pagi tadi.

Ketuai Zon Bomba Sibu, Andy Alie madah, piak iya nerima kangau ngenyit bekaul enggau penusah nya urung pukul 7.55 pagi sebedau ngatur raban ari Balai Bomba enggau Penyah Penusah (BBP) Sentral Sibu ngelawa palan penusah nyadi.

Ku iya, raban bomba datai ba palan penusah nyadi urung pukul 8.00 pagi lalu tetemuka siku lelaki mai motosikal Modenas CT100 dalam parit ke penuh enggau ai.

“Raban Bomba diberi pemendar ari polis ngambi tudah ngagai palan ke likun sebedau pemesai Opis Menteri Pengerai (KKM) ngentaska tudah bebadi ba palan penusah nyadi,” ku iya ba sebengkah penerang.

Nangkanka nya, tubuh tudah udah nya diserahka ngagai polis ngambika ulih bejalaika atur ke silik agi. Operasyen nya tembu enggau penuh urung pukul 8.28 pagi. -RBI

SARIKEI, 23 Mei — Pengawa ngaga jalai baru ti dikelala enggau nama ‘Missing Link’ ti nyambung Nanga Bangkit, Muara Lebaan ngagai Jalai Sibu–Tanjung Manis disadang nyadi pematak besai ngagai penumbuh ekonomi di menua pesisir Sarawak.

Kaban Kunsil Nengeri (ADUN) Dr. Safiee Ahmad madah, projek sepemanjai 5.6 kilometer nya deka nembuka rentayan jalai alun ke udah bisi ke sebedau tu bedau tembu ba sitak nya.

Nitih ku iya, taja pan timpuh projek nya enda lama, tang empas iya deka besai, kelebih agi ba pengawa ngemanahka akses komunikasyen sereta meransang pemansang ekonomi kandang menua.

“Enggau pengawa ngemanjaika jalai tu, peranak deka ngasaika perengkaguna komunikasyen ti lanchar agi kelimpah ari muka peluang pemansang baru ngagai pengempu tanah ba sepemanjai koridor projek,” ku iya.

Iya madah munyi nya ngagai media pengudah ngulu pengerami mayar pampas ngagai individu ke bisi kaul enggau pengawa ngambi tanah ungkup pengawa bejalaika projek nya.

Dr Safiee madah, kandang menua ke sebedau tu dikumbai jauh diatu bisi potensial dikemansang setipak enggau pengawa ngemanahka perengka guna infrastruktur.

Ku iya, projek nya diatu benung bejalai enggau lanchar lalu dipelaba tembu dalam timpuh kurang ari 30 bulan.

Iya andal amat pengawa bejalaika projek nya ulih tembu nitihka timpuh asil ari pengawa matau ti enda ngetu ari Opis Kereja Raya. -RBI

SARIKEI, Mei 23 — Siku lelaki ditemu midang ba sebuah palan makai ditu, tumu pagi kemari.

Ketuai Polis Pelilih Sarikei, Supt Aswandy Anis madahka, polis nerima penerang bekaul enggau penusah nya kena 22 Mei 2026.

Pansik tumu tetemuka lelaki nya bisi ba premis nya lalu dipelabaka tinduk ba kedai nya urung pukul 4 pagi.

Nitihka penerang pengempu kedai nya, tudah enda mukai-mukai labuh ari bangku ke alai iya duduk sebedau piak sepital ditelefon minta bantu.

Taja pia, peresa pengerai ngentaska lelaki nya udah midang ba palan penusah nyadi.

Pansik keterubah polis tetemuka nadai elemen jenayah ditemu lalu kes tu diklasifikasyen nyadi pemati ngenyit (SDR).

Tubuh tudah dibai ngagai Sepital Sarikei ngambika diputung tasat sereta dipansik enggau silik agi.

Polis mega madahka kaban belayan lelaki nya udah mujur dikelala sereta dipadah pasal penusah nya.

Mensia mayuh dilalau anang ngaga sebarang spekulasyen ti tau ngachau pansik polis. -RBI

BINTULU, 23 Mei — Ketuai Komuniti enggau Ketuai Raban Bansa (KMKK) nyadi batang penyambung entara perintah enggau rayat dalam nentuka polisi enggau garis lalau perintah ulih dikenataika enggau efektif ngagai komuniti ba renggat baruh.

Nitih ku Sapit Premier Sarawak, Datuk Amar Douglas Uggah Embas, pengawa ngemansangka Sarawak ukai semina fokus ngagai sukut fizikal enggau ekonomi aja, tang mega patut bepalan ba penyerakup komuniti ti tegap sereta bebasaka pangan diri.

“Penyerakup kitai nyadi pelasar besai dikena ngemansangka raban bansa Sarawak ti maju, entap sereta lantang,” ku iya ke mega Menteri Wang Kedua enggau Ekonomi Baru Sarawak enggau Menteri Infrastruktur enggau Pemansang Palan Penyangkai Kapal.

Iya mansutka jaku tu lebuh ngulu Pengerami Makai Lemai KMKK di Bintulu ti diatur ba Hotel Imperial Bintulu malam tu tadi.

Pengerami nya mega ngempuruka raban KMKK di Bintulu enggau mayuh bengkah ejensi ngerapitka kaul enggau kerejasama dalam meransang pemansang Bintulu enggau Sarawak ba selampur iya.

Uggah mega ngingatka pesan niang Tan Sri Adenan Satem tauka dikelala enggau nama Tok Nan ti kala ngelalau ketuai nengeri ngambika terus “nyaga Sarawak” dikena nentuka penegap enggau pengelantang rayat pupu bansa enggau jalai pengarap dijaga.

Pesan nya ku iya, nyadi pengandal ke besai ti seruran dipegai ketuai nengeri begulai dalam neruska agenda pemansang Sarawak.

Pengerami nya mega dirichah enggau penatai Premier Sarawak, Datuk Patinggi Tan Sri (Dr) Abang Haji Abdul Rahman Zohari bin Tun Datuk Abang Haji Openg ti ngenataika pesan ngagai raban KMKK.

Sama bisi datai Sapit Premier Sarawak, Datuk Amar Awang Tengah Ali Hasan, Datuk Amar Profesor Dr. Sim Kui Hian ke mega Menteri Pengerai Mensia Mayuh enggau Pengawa Berumah enggau Perintah Lokal Sarawak, Menteri Pemansang Orang Indu, Nembiak enggau Pengelantang Komuniti Sarawak Dato Sri Hajah Fatimah Abdullah, Datuk Majang Renggi Menteri Infrastruktur enggau Pemansang Palan Penyangkai Kapal.

Bela datai mega iya nya Menteri Utiliti enggau Telekomunikasyen Sarawak Dato Sri Haji Julaihi Haji Narawi, Menteri Industri Pemakai, Komoditi enggau Pemansang Wilayah Sarawak Dato Sri Dr. Stepehen Rundi Utom, Menteri Pelajar, Inovasyen enggau Pemansang Bakat Sarawak Dato Sri Roland Sagah Wee Inn, Menteri ba Opis Premier Sarawak, Dato Sri John Sikie Tayai, Kaban Kunsil Nengeri (ADUN) Tanjong Batu Johnny Pang, ADUN Jepak Iskandar Turkee, DIrektor Opis Kereja Raya (JKR) Sarawak Datu Dr. Cassidy anak Morris enggau raban KMKK. – RBI

RIYADH, 22 Mei – Cristiano Ronaldo pengujung iya nyadi champion di Arab Saudi lebuh iya ngemasukka dua gol dikena mantu Al-Nassr FC menang musim Liga Pro Saudi 2025/2026 pengudah ngalahka Damac FC 4-1 ba main kepenudi musin tu.

Ba umur 41 taun, legenda Portugis nya sekali agi ngayanka iya agi bebisa lebuh iya nguluka Al-Nassr menang gelar liga keterubah iya kenyau ari taun 2019, lalu enggau nya meri diri trofi domestik keterubah iya kenyau ari iya ninggalka Eropah ujung taun 2022.

Pemenang ke dramatik nya ngujungka Al-Nassr nembuka pekit nya enggau 86 poin, semina dua poin dulu ari chalun ke pemadu semak, Al Hilal SFC ke mega menang 1-0 ngelaban Al-Fayha FC tang patut netapka diri ba penuduk lumur dua.

Bemain ba Stadium Al-Awwal berengkah enggau ranchak lebuh Sadio Mane muka gol ba minit ke-34 enggau nanduk bol ari sepak sukut Joao Felix.

Bagi kedua terus dipegai ngagai tim tuan rumah lebuh Kingsley Coman ngemasukka gol ari luar kutak penalti ba minit ke-52.

Taja pan Morlaye Sylla ngurangka defisit enggau penalti enam minit udah nya, Ronaldo nentuka malam nya enggi Al-Nassr lebuh iya ngemasukka gol ari sipak pechuma ti ngalitka ati ba minit ke-63.

Ex-bintang Real Madrid CF enggau Manchester United nya udah nya nembuka pemenang enggau gol peribadi kedua ba minit ke-81 sebedau dipeda nyabak lebuh wisel kepenudi ditiup.

Pemenang nya nyadi trofi liga domestik keterubah Ronaldo kenyau ari nyereta Juventus FC ba taun 2020 lalu datai ba maya ke patut ungkup Piala Dunya FIFA 2026 enggau tim main bol nasional Portugal bulan Jun tu. – RBI

#ruaiberitaiban#newsiban#beritaiban

Rindu | Titih | Kunsika

JULAU, 22 Mei — Peranak ba sekeda rumah panjai di kandang menua Ng Bulo, Ulu Kanowit diatu ngasaika perengkaguna bekal kuasa karan 24 jam nengah Projek Bekal Kuasa Karan Menua Pesisir (RES) Last Miles Renggat 2, lalu enggau nya mai penampak baru nyerumba pengerami Gawai taun tu.

Kaban Kunsil Nengeri (ADUN) Meluan, Dato Rolland Duat Jubin madah, iya sehari tu ngabas sereta meresa pengawa masang meter grid di Rh Banat ak Unan begulai enggau Sarawak Energy Berhad (SEB) pengudah pulai ngulu Aum Kunsil Nengeri (DUN) Sarawak ke tembu dua hari ke udah.

Nitihku iya, Rh Banat entara sekeda rumah panjai di kandang menua Ng Bulo ke udah disambung bekal kuasa karan grid 24 jam ari baruh inisiatif Perintah Sarawak ungkup kandang menua Ulu Kanowit, Julau.

“Kelimpah ari Rh Banat, beberapa buah rumah panjai bukai ke udah dipasang meter grid kenyau dua hari ke udah iya nya Rh Julin, Rh Minggu enggau Rh Amba ti ngaul urung 60 ruang bilik nyengkaum rumah peribit.

“Udah tentu pengerami Gawai tu besai agi reti ngagai peranak di kandang menua Ng Bulo lebuh sida diatu ulih ngasaika bekal kuasa karan ti entap sereta lantang agi,” ku iya nengah sebengkah penerang sehari tu.

Ku iya, sebedau tu beberapa buah rumah panjai ba kandang menua Masit, Julau mega ngasaika perengka guna ke sama kena bulan Disember taun siti nyin tadi.

Berebak enggau nya, iya ngarapka Sarawak Energy Berhad nengah Unit RES enggau SEB Pampang Sarikei enggau Pakan deka terus ngenyampatka pengawa bejalaika projek ungkup kandang endur Last Miles Renggat 3 di Ng Ensiring, Julau.

Ku iya, pengawa nya beguna dikena nentuka mayuh agi peranak menua pesisir ulih ngasaika perengka guna bekal kuasa karan 24 jam dalam timpuh ke semak.

Iya mega meri besai terima kasih ngagai SEB, kelebih agi Unit RES enggau SEB Pampang Sarikei enggau Pakan ketegal komitmen enggau pengeran ngemujurka Projek Bekal Elekterik Menua Pesisir taja betapi enggau bemacham pemar. – RBI

#ruaiberitaiban#newsiban#beritaiban

Rindu | Titih | Kunsika