SRI AMAN, 25 Jun — Pekit Keling enggau Pekit Kumang beserimbai enggau Pengerami Ngiling Tikai Gawai Dayak Pelilih Menua Pantu 2026 ke diatur ba Dewan Suarah Sri Aman diatur enggau mujur sereta nerima timbal ke chukup meransang ari bala penyereta enggau bala temuai.

Program tu ukai semina nyadika pelasar endur mantaika penau enggau gamal ti nyulut rebak baru bansa Dayak, tang mega nyadika platform ti beguna dalam pengawa ngetan sereta negika pesaka asal komuniti menua nya.

Ari sukut pemutus pekit, ungkup kategori Pekit Keling, Champian diempu Watson Anak Mambu, Penuduk Dua diempu Brownson Barron Ijan Anak Anthony, lalu Penuduk Ketiga diempu Mixson Anak Blaki.

Ungkup kategori Pekit Kumang, gelar Champian diempu Arabella Sunta Anak Langkan, lalu ditangkan Angellyna Jawai Anak Anthony Balai nyadi Lumur Dua enggau Shannelle Ellyssa Justine ba penuduk lumur tiga.

Lebuh dikerandau pengudah tembu pekit, pemenang kategori Pekit Kumang, Arabella Sunta Anak Langkan mansutka jaku peransang ngagai pesereta ke bukai nengah chara ngelalau sida ngambika enda mudah putus pengarap ba pengawa ngiga pemujur.

Ku iya, “anang patah semangat, anang mudah nyurut ngapa. Enti orang ulih tua pan ulih, enti enda diatu tua nguji, kemaya agi,”.

Reti ku Arabella nya anang mudah putus pengarap laban pemujur ulih dijapai sapa-sapa enda ngira umur, lalu enti nuan enda nguji diatu, kemaya agi nuan deka ngambi peluang nya?

Raban pengatur meri basa enggau terima kasih ke pemadu tinggi ngagai semua pesereta ketegal penyereta enggau komitmen sida ngemujurka pekit tu.

Dikearapka pengawa ngatur program baka tu ulih diteruska jemah ila nyadika pengawa ti enda ngetu dikena nentuka pesaka asal bansa Dayak terus diintu sereta ditampung rebak dudi hari.

Sama datai temuai dipebasa nyuaka perais ngagai pemenang Sapit Menteri Dagang Temuai, Industri Kreatif enggau Seni Pemerindang Datuk Snowdan Lawan. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

BINTULU, 25 Jun — Pemansang industri hiliran dikelala nyadi batang chara mutarka pengawa nambahka rega asil betanam betupi Sarawak, lalu enggau nya ulih mantu mutarka penanggul rega produk nurun maya musin ngetau.

Menteri Industri Pemakai, Komoditi enggau Pemansang Kandang Menua, Dato Sri Dr.Stephen Rundi Anak Utom, madah, bekal kelalu mayuh buah bemusin baka nanas, rian enggau produk betanam betupi ke bukai suah ngasuh rega makit nurun nyentukka sekeda asil nya enda laku lalu ngujungka iya buruk.

Nitih ku iya, gaya nya ukai ketegal pemuntan pekebun ngeluarka utai tanam ti bekualiti, tang lebih agi ketegal pengelemi ba rentayan nilai enggau sistem proses pengudah ngetau.

“Lebuh datai musin buah, asil nya nyadi kelalu mayuh nyentukka iya ngelumpa lalu pengujung iya lenyau rega,” ku iya lebuh bejaku ba Pengerami Nyuaka Geran MRP DUN Kemena di Bintulu, sehari tu tadi.

Ku iya, chara baru nya patut ngemeratka pemansang industri hiliran nengah chara nukar produk betanam betupi mata ngagai produk ti bisi nilai tambah ti ngembuan timpuh nyimpan ti panjai agi sereta bisi potensial rembus ngagai makit ti lebih luas nyengkaum makit eksport.

Kenu ku iya, buah nanas ukai semina patut dijual agi baru, tang ulih diproses nyadi jus, pes tauka kue manis, lalu rian ulih diproses nyadi produk premium enggau rega komersial ke tinggi ba renggat antarabansa.

“Buah bemusin mega patut diproses nengah industri hiliran ngambika tan lama sereta ulih diasilka nyadi produk baru enggau rega ke tinggi agi,” ku iya.

Dr.Stephen Rundi mega nerangka konsep ke sama ulih dikerembaika ngagai pengawa ngasilka beras ke ukai semina diproses nyadi beras aja, tang mega ulih ngasilka bemacham produk bukai baka tepung, kue enggau ai irup bepelasarka beras ke meri rega ekonomi ke tinggi agi.

“Nama utai ke diasilka kitai enda tau enda disalin ngagai rega ekonomi enggau penatai pemisi, ukai semina dikena kitai empu aja,” ku iya.

Ku iya, tetiap proses ‘nilai tambah’ ulih ngadaka peluang kereja baru, nambahka penatai pemisi orang bekebun sereta ngenegapka ekonomi menua pesisir.

Beambika chunto menua China, iya madahka menua nya udah mujur ngemansangka kesemua rentayan rega betanam betupi ari pengawa ngeluarka benih nyentuk ngagai pengawa ngelakuka produk ke udah tembu, lalu enggau nya ngemuntangka tetiap produk betanam betupi ulih diproses ngambika ulih ngasilka rega ekonomi ke tinggi agi.

“Tetiap produk betanam betupi bisi rega iya diangkatka nengah proses enggau inovasyen,” ku iya.

Taja pia, iya ngaku pemar besai Sarawak maya ke diatu iya nya aspek rentayan bekal pengudah ngetau ti agi patut dikemanahka agi.

“Batang pemar diatu iya nya rentayan bekal,” ku iya.

Berindik enggau nya, iya nyemetak madahka pemansang sektor betanam betupi meseti disukung ekosistem ti menyana ti mungkur benih ti bekualiti, palan penerenak ti efisyen, proses moden enggau rangkaian makit ti tegap.

Iya mega ngasuh Opis Betanam Betupi Sarawak chakah agi bejalaika pengawa meri pelajar enggau penerang ngagai orang betanam betupi senentang pemesai guna industri hiliran ngambika sida enda agi bepanggai sepenuh iya ba pengawa nyual asil baru ti diberi ngagai rega ti enda tetap.

Ku iya, Sarawak ngembuan tanah ti ami sereta bisi potensial ngeluarka asil ti besai, tang pemujur sektor betanam betupi jemah ila bepanggai ba pengulih ngubah asil mentah nyadi produk berega tinggi ti ulih mansutka penatai pemisi ti meruan agi ngagai orang betanam betupi sereta meri pangka ngagai penumbuh ekonomi nengeri. – RBI

#ruaiberitaiban#newsiban#beritaiban

Rindu | Titih | Kunsika

KUALA LUMPUR, 25 Jun — Kaban Parlimen (MP) Sri Aman, Dato Sri Doris Sophia Brodie sehari tu mantaika sekeda pekara beguna bekaul enggau Rang Undang-Undang (RUU) Ubah Akta Jil 2026, nyengkaum pemar rumah jil kelalu sekut enggau pengawa bejalaika Perengka Pematau Elektronik dalam sistem ke adil jenayah menua tu.

Dalam pejurai ba Dewan Rakyat, iya madahka ubah nya ngayanka pengawa perintah ngenegapka sistem penyuman orang jil nengah chara ke moden agi, nyengkaum ngena teknologi matau elektronik enggau ngaul raban volunteer dalam program mulaika pemanah ulah.

Taja pia, iya nyemetak madahka isu tu patut diperatika dalam konteks ke lebih komprehensif, kelebih agi bekaul enggau gaya institusyen rumah jil menua tu ke diatu ti napi penanggul kelalu balat sekut.

Iya madah, bepelasarka ripot ke diatu naka bulan November 2025, penyampau orang jil di Malaysia udah ngelui 84,000 iku enti dibandingka enggau kapasiti rasmi urung 76,000 iku.

“Gaya tu mandangka sistem rumah jil beoperasyen ngelui ari kapasiti ke udah ditetapka, enggau urung satu pertiga ari orang jil nya mungkur orang jil riman ke bedau dipechara ba kot,” ku iya.

Nitih ku iya, gaya tu udah meri tekan ke besai ngagai sistem pentadbiran rumah jil, nyengkaum aspek pengelikun, pengerai enggau pengelantang orang jil, kelimpah ari ngeruga pemanah program penyuman ke nyadi batang sistem rumah jil moden.

Berindik enggau nya, iya mantaika sukung ngagai pengawa bejalaika Perengka Pematau Elektronik nyadi siti ari mekanisme dikena ngurangka penyekut rumah jil, nengah chara ngemendarka orang jil ke bisi risiko mit dikemata dalam komuniti enggau enda ibuh diengkah ba institusyen rumah jil.

Dato Sri Doris mega nerangka chara baka nya udah dipejalaika ba sekeda menua maju nyengkaum United Kingdom, Australia enggau Norway nyadi sebagi ari reformasyen sistem keadilan jenayah enggau pengawa ngurangka penyekut rumah jil.

Taja pia, iya nyemetak madahka pengawa bejalaika sistem nya meseti dipejalaika enggau komprehensif sereta bejimat nengah chara beratika aspek pengelikun, privasi, kos, akauntabiliti enggau pemanah pengawa bejalaika iya.

Dalam jurai ke sama, iya mantaika sekeda tanya ngagai Opis Menteri nyengkaum sekalika pengawa bejalaika perengka nya udah nengah pengawa beratika enggau komprehensif ari sukut pengelikun enggau efektiviti.

Iya mega minta penerang bekaul enggau mekanisme pengawa nyema perengka nya rusak, rajai, lenyau tauka bisi penanggul, nyengkaum timpuh timbal piak bekuasa dalam nyidi pengawa ngelanggar sereta ngambi atur ke patut.

“Aspek nyaga data diri mega bisi dibantaika kelebih agi jamin data endur enggau pemindah individu deka disimpan enggau likun, enda disalahguna, lalu semina ulih dilawa piak ke diberi kuasa,” ku iya.

Kelimpah ari nya, iya mega minta penerang bekaul enggau piak ti megai tanggungpengawa nyimpan sereta nyaga data, timpuh nyimpan data, enggau pengawa bejalaika audit pengelikun siber ari setiap maya.

Iya mega betanya sekalika pengawa bejalaika sistem tu deka dikerembaika ngagai Sabah enggau Sarawak, beratika pemar geografi enggau kandang menua ti besai ba kededua pelilih menua nya.

Ari sukut belanja, iya minta perintah meri anggar kesemua ungkus bejalaika sistem nya nyengkaum ungkus ngulihka perengka, ngintu, ngemansangka sistem matau, ngelatih pemesai, enggau ngatur data.

Iya mega meri langgur penemu ngambika perintah ngaga analisis kos-penguntung dikena nentuka chara tu lebih efektif sereta ekonomi ari chara tradisional baka ngaga rumah jil baru.

Ngemeratka sukut undang-undang, iya mega mantaika pengirau ati bekaul enggau Seksyen 63A dalam RUU nya, ti ku iya ulih nempa peragam ti madahka pengawa ti diambi ba sekeda atur nyangka enda kena atur undang-undang.

Nitih ku iya, gaya nya bisi potensial nempa isu akauntabiliti dalam pengawa ngatur mensia mayuh enti enda dipejuraika enggau manah.

Berindik enggau nya, iya merambu ngambika RUU nya dianjung baru ngagai komiti ke bekaul ngambika diperesa enggau silik agi.

Iya mega meri perambu sekeda pengawa ngemanahka polisi nyengkaum pengawa mantaika ripot ninting taun ngagai Parlimen bekaul enggau tikas penyekut rumah jil enggau pemanah perengka matau elektronik, netapka garis lalau nyaga data ke terang, menilai pemanah sistem nya ari setiap, sereta ngenegapka program penyuman enggau pematih pengelandik ungkup orang jil.

Lebuh nyimpul pejurai nya, iya nyemetak madahka pemujur sistem rumah jil enda patut disukat semina bepelasarka penyampau individu ke dijil, tang nitihka takah sistem nya udah mujur ngemanahka baru orang jil sereta ngurangka tikas penyalah ti berulang. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

JULAU, 25 Jun – Atur ti enda ngetu entara ejensi perintah nyadi pematak besai dalam nentuka tetiap projek pemansang di Pelilih Julau dipejalaika nitihka timpuh, lalu enggau nya meri penguntung ngagai rayat.

Pekara tu dikemeratka dalam Aum Komiti Pengatur Pelilih Menua (DAC) Julau Bil 2/2026 ti diatur ba Opis Pelilih Julau sehari tu lalu digulu Kaban Kunsil Nengeri (ADUN) Meluan, Dato Rolland Duat Jubin, begulai enggau ketuai opis sereta pengari mayuh bengkah ejensi perintah.

Aum nya nyadi batang pelasar dikena ngatur pengawa bejalaika projek pemansang, beratika pejalai projek ke diatu, ngelala isu enggau pemar dalam bidang nya sereta merambu pengawa nangkan nya dikena nentuka tetiap projek ulih ditembuka nitihka timpuh ke udah ditetapka.

Kelimpah ari mantaika status penyulut fizikal enggau belanja projek, tetiap ejensi mega nganjung ripot bekaul enggau nitihka taga bejalaika sereta mega isu ti begunaka perati enggau pengawa enggau lengkas.

Tekala nya pengudah aum nya, Dato Rolland enggau pemesai ari Opis Kereja Raya (JKR) Bagi Menua Sarikei bejalaika pengawa ngabas palan Projek Ngaga Stesyen Betanam Betupi Nanga Entabai di Julau beratika diri empu pejalai pengawa bejalaika iya.

Projek tu mungkur pengawa ngaga sebuah blok opis, blok tiga kuarters enggau sekeda komponen bukai nyengkaum kereja mekanikal enggau karan (M&E).

Naka ke diatu, projek nya udah nyapai 77 peratus penyulut fizikal lalu diperambu tembu dalam bulan September 2026.

“Aum DAC tu bejalaika tanggungpengawa beguna amat nyadi pelasar koordinasyen entara semua ejensi dikena nentuka tetiap projek pemansang ulih dipejalaika enggau lebih ngasi.

“Nengah pengawa matau ti enda ngetu, tetiap isu ulih dikelala tumu sereta ulih diambi enggau lengkas ngambika projek ulih ditembuka nitihka timpuh ungkup pengelantang rayat,” ku Rolland.

Ku iya, penemuai ngagai palan projek mega beguna ngambika pejalai projek ke bendar ulih diperatika terus, kelimpah ari nentuka pengawa bejalaika pengawa nitihka spesifikasyen enggau timpuh ke udah ditetapka.

Nitih ku iya, Perintah Sarawak komited deka ngenegapka pemansang menua pesisir nengah pengawa bejalaika projek ti meri empas tinggi ti ulih ngemanahka perengka guna pemun sereta nyungkak sektor betanam betupi enggau ekonomi kandang menua, setipak enggau agenda pemansang ti meruan di nengeri tu. – RBI

#ruaiberitaiban#newsiban#beritaiban

Rindu | Titih | Kunsika

BINTULU, 25 Jun — Orang bumai di Sarawak dilalau ngalih ari nyual asil betanam betupi ke baru ngagai ngeluarka produk hiliran ke berega tinggi dikena nyungkak penatai pemisi sereta ngenegapka daya bepekit sektor agro-pemakai nengeri tu.

Menteri Industri Pemakai, Komoditi enggau Pemansang Kandang Menua, Dato Sri Dr.Stephen Rundi Utom madah, chara nya beguna laban tebal agi asil betanam betupi ngembuan timpuh nyimpan ke pandak sereta mudah dikeruga ketegal dibuai maya musim ngeluarka asil.

Nitih ku iya, sektor betanam betupi enda patut semina ngasilka asil mata aja, tang lebih agi patut ditegapka nengah aktiviti proses hiliran ngambika ulih ngasilka produk ti bisi nilai tambah ti ulih meri penguntung ti tinggi ngagai orang bumai enggau orang dagang agro.

“Diatu, mayuh orang ngumbai semina minyak sawit aja ke meri penguntung, lebuh bisi bemacham produk betanam betupi bukai ke bisi potensial meri asil ke manah agi enti diproses nyadi produk hiliran,” ku iya.

Iya madah munyi nya lebuh bejaku ba Pengerami Nyuaka Chek Projek Mit Menua Pesisir (MRP) Renggat Dua Kunsil Nengeri (DUN) Kemena ba Opis Betanam Betupi Bagi Menua Bintulu, sehari tu tadi.

Ba pengerami nya, iya nyuaka agih belanja sepenyampau RM594,000 ngagai 43 iku penerima ti mungkur serakup enggau gerempung komuniti di kandang menua Kemena, Sebauh, Suai, Niah enggau sekeda kandang menua ke bukai.

Ku iya, pengawa ngagihka agih belanja tu sebagi ari pengawa perintah ngenegapka pemansang komuniti menua pesisir sereta nyukung pengawa bejalaika aktiviti sosio-ekonomi ba renggat baruh.

Nitihku iya, pemansang industri hiliran ulih nyungkak rega komoditi betanam betupi baka nanas, rian, lada burak enggau padi nengah bemacham produk tambah rega ti ngembuan potensial makit ke lebih luas sereta kompetitif agi.

Ambika chunto, beras ukai semina ulih dipasarka nyadi beras, tang mega ulih diproses nyadi produk bukai baka tepung enggau biskut ti ulih mansutka rega ekonomi ti besai agi.

Berebak enggau nya, iya mega meransang mayuh agi raban nembiak kelebih agi graduet palan pelajar tinggi ngemeranka sektor betanam betupi moden nengah chara beambi ulih ari teknologi baka Internet of Things (IoT) enggau konsep betanam betupi ‘fusion’.

Ku iya, opis menteri benung ngaga projek betanam betupi pintar di Batu 11 ti deka nyadi pelasar latih dikena ngadaka mayuh agi orang dagang betanam betupi biak ti kompetitif sereta inovatif.

“Pengudah nembuka pelajar ba universiti, guna meh penemu ke diulih kita nempa peluang ke ulih mansutka penatai pemisi, ukai semina ngulihka penatai pemisi ke tetap aja,” ku iya.

“Kebuah pia laban ngulihka penatai pemisi tetap reti iya ngulihka gaji, seraya nempa penatai pemisi nyendiaka ruang dikena numbuhka pengaya,” ku iya nambah.

Iya nyemetak madahka Opis Betanam Betupi begunaka pengawa terus ngenegapka pengawa ngiring ungkup orang bumai enggau raban nembiak dalam sukut teknologi, proses enggau makit ngambika mayuh agi asil betanam betupi ulih dikomersial nyadi produk hiliran, lalu enggau nya ngenegapka rentayan rega sektor agro-pemakai sereta nyukung pemansang ekonomi nengeri. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

LONG BANGA, 25 Jun — Pengerami bejadika Jematan Besi Modular Sungai Baleh (Jematan Bailey) di Long Banga udah dipenyadika Yang Berhormat Datuk Gerawat Gala, ti ngarika Sapit Premier Sarawak, Yang Berhormat Datuk Amar Douglas Uggah Embas.

Pengawa ngaga jematan sepemanjai 51 meter tu nyadi siti agi pemujur beguna Perintah Sarawak dalam pengawa ngenegapka rentayan infrastruktur menua pesisir, kelebih agi di kandang menua ulu, dikena nentuka perengka guna komunikasyen ti lebih likun, efisyen sereta tan ungkup pemaik peranak menua nya.

Jematan Keluli Modular Sungai Baleh (Jematan Bailey) diatu nyadi penyambung jalai strategik Long Banga–Bario ti nyadi kedap besai ungkup pemindah mensia mayuh, servis logistik enggau pengawa nganjung bekal asas ngagai kandang menua ulu.

Pengawa ngaduka baru jalai tu dikearapka meri empas terus ngagai pengelanchar mobiliti mensia mayuh, kelimpah ari ngenegapka rentayan bekal enggau akses ngagai servis asas.

Pengawa bejalaika projek tu ngayanka komitmen Perintah Sarawak ti majak ngerapitka seraka pemansang entara kandang mengeri enggau menua pesisir nengah pengawa nyendiaka infrastruktur asas ti bekualiti, likun sereta tan.

Pengawa tu setipak enggau agenda pemansang inklusif nengeri ti ngemeratka pengelantang pendiau rayat di serata nengeri Sarawak.

Opis Kereja Raya Sarawak terus komited bejalaika projek infrastruktur strategik dikena nentuka rentayan komunikasyen menua pesisir seruran ba tikas pemadu manah ke pengelantang enggau pengelikun penguna. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

BINTULU, 25 Jun — Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi anak Utom, ngelalau raban nembiak ngubah peragam sida ba sektor betanam betupi, ke diatu benung mansang nyadi industri moden bepelasarka teknologi enggau inovasyen sereta ulih mansutka mayuh agi penatai pemisi.

Ku iya, projek betanam betupi ‘precision’ bepelasarka teknologi Internet of Things (IoT) di Sungai Sebiew, Bintulu ke benung dikemansang diatu dipelaba tembu ujung taun tu lalu deka nyadi pematak ngagai pemansang betanam betupi pintar di Sarawak.

Nitih ku iya, sistem nya enda agi bepanggai ba chara betanam konvensional, tang ngena ‘sensor’ enggau aplikasyen digital dikena nyaga proses baja, ai enggau pengangat kandang endur nanam enggau chara automatik dikena nambahka efisyen pemansut.

Ku iya, enti projek nya tembu ila, perintah deka muka peluang ngagai raban nembiak betanamka utai tanam ti berega tinggi ba Taman Pengeluar Pemakai Kekal (TKPM) ngena teknologi moden, kelimpah ari nyendiaka penerang enggau latih praktikal ngagai sida.

Iya madah munyi nya lebuh bejaku ba Pengerami Nyuaka Geran MRP DUN Kemena ke diatur ba Opis Opis Betanam Betupi Bagi Menua Bintulu, sehari tu tadi.

Dr Stephen Rundi madahka, raban nembiak mega patut meda sektor betanam betupi nyadi kereja “kolar hijau”, ti begulaika pengawa ngena teknologi, inovasyen enggau pengawa dagang, lalu ukai semina fokus ngagai pengawa “kolar putih” tauka “kolar biru”.

Iya mega nerangka bida entara konsep “ngulihka duit” enggau “ngaga duit”, nengah chara nerangka pengawa begaji tetap nyadika pun penatai pemisi ti bisi sekat ti ditetapka, seraya pengulih ngena penemu enggau pengelandik dikena nempa dagang diri empu ulih nempa rega ekonomi ti besai agi.

Nitih ku iya, Sarawak ngembuan pengelebih ari sukut pemesai tanah, perengka guna teknologi enggau sukung institusyen pelajar ti bepenau ngasilka modal mensia ti bekualiti, nya alai raban nembiak begunaka pemerani nyerungkai peluang baru dalam sektor betanam betupi moden.- RBI

#ruaiberitaiban#newsiban#beritaiban

Rindu | Titih | Kunsika

KUALA LUMPUR, 25 Jun — Opis Menteri Dalam Nengeri (KDN) nimbal tanya lisan ti dikenataika Kaban Parlimen Lubok Antu, Tuan Roy Angau Anak Gingkoi bekaul enggau pengawa bejalaika sistem autogate enggau biometrik ba Kompleks Imigresen, Kastam, Kuarantin enggau Pengelikun (ICQS) Sarawak-Kalimantan temasuk kandang menua Lubok Antu.

Opis Menteri nya madahka pengawa bejalaika sistem autogate nya sebagi ari pengawa Opis Imigresyen Malaysia (JIM) ti seruran dipejalaika dikena ngenegapka pengawa nagang pengelikun garis entara menua kelimpah ari nambahka pemanah pejalai tama enggau pansut ba palan penama menua nengah inisiatif digitalisasyen.

Sepenyampau 635 unit sistem autogate deka dipasang berenggat ba palan penama menua ke udah dikelala, enggau pengawa bejalaika fokus ngagai kandang endur ICQS ke ngembuan perengka guna jalai bejalai kaki.

Berindik ari nya, semina ICQS ti nangkup peminta infrastruktur aja deka diperatika ungkup pengawa masang sistem nya, lalu ICQS ti beoperasyen khas ungkup pejalai perengka pengangkut enda disengkaum dalam skop pengawa bejalaika.

Ungkup garis entara menua Sarawak-Kalimantan, Opis Menteri Ngetan Menua nerangka ICQS Sungai Tujuh udah dikelala ba pemungkal bejalaika sistem autogate laban ngembuan perengkaguna jalai bejalai kaki ti engkeman.

Berebak enggau nya, ICQS Lubok Antu enda disengkaum dalam renggat keterubah dipejalaika laban nya jalai ke diungkupka ngagai pejalai perengka pengangkut sereta nadai ngembuan perengka guna jalai bejalai kaki ke diguna ungkup pengawa masang sistem autogate.

Opis Menteri mega ngemeratka pengawa bejalaika projek tu deka dipejalaika berenggat manggai ba taun 2028 nengah chara beratika penyedia infrastruktur, integrasyen sistem enggau aspek pengelikun data dikena nentuka pemanah sistem kawalan garis entara menua keseluruhan.

Opis Menteri Dalam Nengeri tetap komited nentuka tetiap pelin dipejalaika enggau sistematik, komprehensif sereta meri empas ke tinggi dalam pengawa ngenegapka pengelikun garis entara menua. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUALA LUMPUR, 26 Jun — Komiti Pengawa Bepilih (SPR) udah madahka proses mansik pengawa ngaga baru garis entara sitak ungkup nengeri Sarawak diatu benung ba renggat ke penudi, nyengkaum ngambi kira tambah 17 penuduk Kunsil Nengeri (DUN) ti udah dikemendarka Dewan Undangan Negeri (DUN) Sarawak enggau digazet kena 8 Ogos 2025.

Pekara tu dipadahka Menteri ba Opis Menteri Besai (Undang-Undang enggau Reformasi Institusyen), YB Dato’ Sri Azalina Othman Said dalam saut lisan ba Dewan Rakyat kena 22 Jun 2026, lebuh nimbal tanya ari Datuk Ali Anak Biju [Saratok] ti minta penerang pasal proses penerang maya kaul iya enggau pengawa bejalaika peminta satu pertiga (1/3) penuduk parlimen blok Borneo.

Nitih ku iya, timpuh lapan taun pansik ‘’persempadan” ungkup nengeri Sarawak tembu kena 21 Ogos 2023, lalu enggau nya ngemendarka SPR ngepunka baru proses pansik baru nitihka penetap Konstitusyen Perintah Besai.

Ku iya nerang, diatu SPR benung nembuka lalau ngaga garis entara menua sebedau dipandangka ngagai mensia mayuh dalam timpuh ke semak, ti ​​nyadika pemungkal proses pansik rasmi baka ke udah disediaka ari baruh Fasal 9, Artikel 113 Konstitusyen Perintah Besai.

“Pengawa mandangka lalau pansik nya deka dipejalaika SPR dalam timpuh ke semak, lalu enggau nya nyadika pemungkal rasmi pansik nya,” ku iya.

Pengudah notis pemandang nya dipansutka, SPR diberi timpuh dua taun nembuka kesemua pansik “persempadan” nitihka Seksyen 4, Jadual Ketiga Belas Konstitusyen Perintah Besai.

Berebak enggau nya, perintah mega ngemeratka pengawa bejalaika pansik tu sebagi ari proses pentadbiran pengawa bepilih ti teratur sereta ngambi kira pemansang struktur pengari ke diatu, nyengkaum aspirasyen bekaul enggau Sempekat Malaysia 1963 (MA63) enggau isu pengari ti seimbang ungkup blok Borneo, baka ti dibantaika dalam tanya Kaban Parlimen. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

JULAU, 25 Jun — Siku burung pok ke bakal pengudah dipelabaka patah sayap kiba mujur diselamatka Raban Penyaga Orang Periman Malaysia (APM) Pelilih Julau dalam operasyen nyelamat ba pelaman Kaunsil Pelilih Meradong Julau, pagi kemari.

Palan Kawalan Operasyen (PKOD) Pelilih Julau nerima kangau ngenyit ari mensia mayuh urung pukul 10.55 pagi sebedau ngatur empat iku kaban ngagai palan penusah nyadi.

Raban nya datai urung pukul 11.10 pagi lalu bejalaika operasyen ngena perengka pengelindung diri (PPE) nitihka prosedur operasyen standard.

Asil peresa tetemuka burung pok nya ba jalai pejalai kaki enda ulih terebai ketegal sayap kiba iya patah. Raban APM mujur nangkap burung nya enggau likun nadai sebarang penusah nyadi.

Burung pok nya udah nya dipindah lalu diserah ngagai Sarawak Forestry Corporation (SFC) Sibu sehari tu ngambika nerima perubat silik agi sebedau dibai ngagai palan nyaga jelu siga di Kuching ungkup proses rehabilitasi.

Operasyen nya betuaika PBT (PA) Jestine Malang anak Goh begulai enggau tiga iku kaban bukai iya nya PBT (PA) Franky anak Achong, PBT (PA) Jackson anak John Jarani enggau PBT (PA) Rickie Angking anak James.

APM Pelilih Julau ngelalau mensia mayuh anang ngatur jelu siga ke bakal kediri, tang nganti nya jampat betanya ngagai piak bekuasa dikena nentuka jelu nya ulih diselamat sereta nerima perubat ke patut. – RBI

#ruaiberitaiban#newsiban#beritaiban

Rindu | Titih | Kunsika