SELANGAU, 26 Jun — Siti agi perambu pemansang strategik di kandang menua Selangau deka nyadi nyata nengah pengawa beranakka puku sektor peribit, ti dikearapka nyadi penyungkak baru penumbuh ekonomi menua tu.

Projek pemansang bersepadu tu mungkur pengawa ngaga “Rumah Asap Food Court, Dry Market, Wet Market, Multipurpose Arena” kelimpah ari perengka guna endur ngengkah kerita moden sereta nyamai.

Enti udah tembu ila, iya dikearapka ulih nyadi palan ekonomi baru ti deka nyungkak aktiviti dagang, muka peluang kereja sereta ngangkatka tikas pengidup komuniti ngelingi.

Kaban Kunsil Nengeri (ADUN) Tamin, YB Ir Christopher Gira Sambang, madahka pemansang nya sebengkah ari inisiatif ke besai reti dalam ngenegapka ekosistem ekonomi menua pesisir ba kandang menua Selangau.

Ba penerang iya, iya ngenataika pengaga ati ti pemadu tinggi ngagai Perintah Sarawak ari baruh iring YAB Premier Sarawak Datuk Patinggi Tan Sri Abang Johari Tun Openg ketegal sukung enggau pemendar sida ba perambu pemansang nya.

“Projek tu ukai semina nyungkak aktiviti ekonomi menua tu aja, tang mega muka mayuh agi pengawa dagang enggau peluang gawa ngagai peranak menua tu,” ku iya.

Iya mega ngenataika pengaga ati iya ngagai raban pemaju ti dipechaya ngembuan pengandal ti tinggi ngagai potensial pemansang di Selangau sereta komitmen sida deka beranakka puku ungkup pemaik kandang menua nya jemah ila.

Nitih ku iya, kerejasama rat entara Perintah Sarawak enggau sektor peribit deka terus nyadi pemansut besai dalam nentuka Selangau mansang nyadi sebuah mengeri moden, progresif enggau kompetitif ba kandang menua tengah Sarawak.

“Selangau Mansang, Rayat Maju,” ku iya lebuh dirandau Ruai Berita Iban. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SELANGAU, 26 Jun — Sapit Premier Sarawak, Yang Berhormat Datuk Amar Douglas Uggah Embas udah bejalaika penemuai kereja ngagai palan Projek Ngaga Sekolah Menengah Kebangsaan (SMK) Selangau ti ngaul pengawa ngaga blok akademik, asrama nembiak, rumah pengajar enggau bemacham perengka guna sukung.

Penatai iya disambut Direktor Kereja Raya Sarawak Datu Adj. Prof. Ir. Ts. Gs. Br. PMr. QPr. Dr. Cassidy anak Morris begulai enggau pemesai Opis Kereja Raya (JKR) Sarawak.

Penerang projek nya diberi Injinir Bagi Menua Sibu ti meri penerang pasal semua skop projek, status pejalai ke diatu enggau pengawa bejalaika kereja ngaga ba palan nya.

Projek tu nyengkaum pengawa ngaga Blok Begunan Bersepadu ti mungkur 18 buah kelas, ruang pentadbiran, makmal, bengkel, surau, kantin enggau dataran gempuru.

Kelimpah ari nya, fasiliti buding lelaki enggau indu mega digaga, tiap buah bisi kapasiti 200 iku nembiak, lengkap enggau dua buah rumah warden, kelimpah ari Blok Dewan Makai ti ulih endur nyentuk 400 iku nembiak.

Perengka guna bukai ti disediaka nyengkaum dua blok rumah pengajar ti endur 20 unit Rumah Pengajar Kelas F, kelimpah ari mayuh macham perengka guna sukung baka rumah jaga, jalai bejalai kaki ti betutup, rumah pam, rumah uras, pintu penama besai, papan tanda besai, palan bemain, gelanggang kereja lumba enggau main, pagar perimeter sereta kereja landskap.

Naka ke diatu, projek nya udah nyapai penyulut fizikal 64.72 peratus lalu dulu ari timpuh asal dipejalaika. Projek tu diperambu tembu penuh dalam bulan Jun 2027.

Rambau penemuai nya, Datuk Amar Douglas Uggah Embas mantaika pengandal ati projek tu deka nyendiaka perengka guna pelajar ti lengkap, kondusif sereta bekualiti dikena napi guna belajar, pengelantang nembiak enggau pengelantang raban pendidik.

Iya mega dipadahka kunteriktor komited deka nembuka projek nya tumu ari timpuh ke udah ditetapka, iya nya ujung taun 2026.

Berindik enggau nya, iya meri pengaga ati ngagai komitmen semua piak ke bisi kaul dalam nentuka pengawa bejalaika projek bejalai enggau lanchar nitihka standard ke udah ditetapka, pia mega pengawa ngenyampatka pengawa nembuka projek ungkup pemaik komuniti setempat. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KAPIT, 26 Jun — Menteri Kereja Raya ke mega Kaban Parlimen P.215 Kapit, Dato Sri Alexander Nanta Linggi nyemetak madahka pelajar nyadi siti ari puku ke pemadu manah dikena nyamin pengidup nembiak rebak baru dudi hari, nya alai bemacham inisiatif terus dipejalaika dikena mantu nembiak nampung pelajar ngagai tikas ke tinggi agi.

“Aku seruran pechaya pelajar tu siti ari puku ke pemadu manah ungkup pengidup bala anak kitai jemah ila, aku ngarapka insentif tu deka nyadi pematak ngagai sida terus bebendar nyapai pemujur jemah ila,” ku iya.

Iya madah munyi nya lebuh bejadika Pengerami Nyuaka Insentif Nampung Pelajar Renggat 1 ungkup nembiak ari sitak Parlimen P.215 Kapit, ti meda 137 iku nembiak nerima bantu sepenyampau RM68,500 nyadika peransang nampung pelajar sida.

Ba pengerami ke sama, Nanta mega bisi nyuaka agih belanja penyampau RM144,500 ngagai 14 buah serakup enggau Komiti Pemansang enggau Pengelikun Genturung Pendiau (JKKK) dikena nyukung pengawa bejalaika bemacham aktiviti enggau pemansang komuniti di kandang menua Kapit.

Iya ngarapka tetiap agih belanja ke diberi ulih dikena enggau bejimat sereta diatur nitihka prosedur enggau atur pekara wang ke udah ditetapka ngambika ulih meri empas ke maksimum ngagai pengelantang rayat.

“Pengarap ke diberi enda tau enda dikena ungkup pemaik rayat enggau pemansang komuniti.Aku ngarapka bantu ke dibantaika sehari tu deka meri pemaik ke meruan ngagai komuniti di Kapit,” ku iya.

Sama bisi datai iya nya Sapit Menteri ba Opis Premier Sarawak (Undang-Undang enggau Adat Bumiputera) Datuk Jefferson Jamit Unyat enggau Residen Bagi Menua Kapit, Elvis Didit. – RBI

#ruaiberitaiban#newsiban#beritaiban

Rindu | Titih | Kunsika

SELANGAU, 26 Jun – Pengawa ngaga jalai tama baru ti nyambung Jalai Besai Pan Borneo ngagai Pasar Selangau ditetapka nyadi pematak dikena ngemanahka agi penyambung sereta nyungkak pemansang ekonomi enggau rama di kandang menua nya.

Pejalai projek nya diserenih Sapit Premier Sarawak, Datuk Amar Douglas Uggah Embas rambau penemuai kereja ngagai palan projek nya sehari tu dikena beratika pejalai pengawa sereta nentuka pemansang infrastruktur ke diperambu ulih dipejalaika nitihka timpuh ke udah ditetapka.

Rambau penemuai nya, Direktor Kereja Raya Sarawak Datu Dr Cassidy anak Morris meri penerang senentang skop pengawa enggau status pengawa ngaga diatu.

Projek tu mungkur pengawa ngaga jalai tama sepemanjai 450 meter ngena pelakin nitihka standard Jalai R3 JKR, lalu enggau nya nyendiaka jalai ke lebih sistematik, likun sereta efisyen ari Jalai Besai Pan Borneo nuju Pasar Selangau.

Pengawa ngaga jalai tama nya dikearapka ulih ngemanahka agi aksesibiliti peranak menua nya, ngemandakka timpuh pejalai sereta ngemudahka pemindah ngagai palan pentadbiran, perengka guna mensia mayuh, palan dagang enggau palan aktiviti komuniti.

Kelimpah ari meri pengelantang ngagai penguna jalai alun, projek tu mega dipeda ulih ngenegapka penyambung pelilih menua sereta muka ruang ungkup penumbuh ekonomi kandang menua ti meruan agi.

Berebak enggau nya, Datuk Amar Douglas Uggah Embas ngenataika pengaga ati iya ngagai Opis Kereja Raya (JKR) Sarawak ti seruran bebendar ngenyampatka pengawa bejalaika projek dikena nentuka penguntung ari pemansang ulih diasaika rayat ba renggat tumu agi.

Pengawa bejalaika projek tu mandangka pemerat Perintah Sarawak ba pengawa ngenegapka infrastruktur perengka pengangkut nyadi pelasar pemansang ti sebela sereta ngangkatka pengelantang pendiau rayat di serata nengeri. – RBI

#ruaiberitaiban#newsiban#beritaiban

Rindu | Titih | Kunsika

KANOWIT, 26 Jun — Beserimbai enggau pengawa ngelancharka Program Sarawakku Sayang ti deka diatur di Bagi Menua Kapit kena sehari tu ngagai 28 Jun 2026, Sekretari Nengeri Sarawak, YB Datuk Amar Haji Mohamad Abu Bakar Bin Marzuki betuaika deligit Khas Ketuai-ketuai Opis Perintah Sarawak nelusur Sungai Batang Rajang ari Pengkalan Kanowit nuju ke Kapit, kemari.

Raban nya mega disempulang Direktor Unit Pengelikun enggau Penerit Adat (UKPS) Sarawak, YBrs Tuan Haji Abdul Wahab bin Haji Rahim, enggau pengawa matau pengelikun ti enda ngetu ari bot interceptor Sarawak Cost guard enggau ejensi pengelikun ke bukai sepemanjai pejalai sida.

Pejalai nya berengkah pukul 9.00 pagi ari Jeti Kanowit lalu raban nya selamat datai ba Rumah Richard Nujong, Nanga Beguang urung pukul 11.30 pagi.

Ba palan nya, bala ketuai ejensi bepeluang betemu enggau peranak rumah panjai sereta beratika pemansang komuniti ngelingi sebedau neruska pejalai kapal urung pukul 3.00 lemai lalu datai ba Jeti Kapit urung pukul 5.00 lemai.

Nitihka penerang ari Unit Pengelikun enggau Penerit Adat Sarawak (UKPS) penatai pemesai pengereja pengawa perintah Sarawak ke Kapit endang nyukung tegap ngagai Program Sarawakku Sayang ti ngemeratka pengawa meri servis enggau pengawa pemandang ejensi perintah ungkup pengelantang pendiau rayat menua nya.”

Program pejalai kapal tu mandangka komitmen Perintah Sarawak ti terus ngelawa rayat di menua pesisir sereta ngenegapka pengawa ngenataika servis perintah enggau chara ti lebih inklusif sereta efektif di Bagi Menua Kapit. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SEREMBU, 26 Jun — Pengawa nyerahka Jalai Baru Kopit–Segubang pemanjai 1.5 kilometer ke udah tembu digaga ngena ungkus RM1.7 juta ari baruh Projek Greater Kuching Coordinated Development Agency (GKCDA) udah mujur diatur lalu nyadika sebengkah agi pemujur ke beguna dalam pemansang infrastruktur menua pesisir di Serembu.

Projek tu sebagi ari pengawa perintah ti seruran dipejalaika nengah GKCDA dalam ngemanahka agi rentayan jalai penyambung sereta nyungkak pemansang sosio-ekonomi kandang menua.

Penembu jalai alun nya, peranak Kampung 5S diatu ngasaika perengkaguna akses ke manah agi, kelebih agi ungkup pejalai ke Kuching enggau Siniawan.

Kelimpah ari ngemandakka timpuh pejalai, infrastruktur tu mega dikearap nyadi penyungkak sereta muka kandang endur pengentap pendiau baru enggau aktiviti ekonomi ngelingi kandang menua nya.

Sama bisi ngulu pengawa nyuaka pengawa nya, Penghulu Serembu enggau Ketua Komuniti (KK) Kopit enggau KK Segubang.

Kaban Kunsil Nengeri (ADUN) Serembu, Miro Simuh madah, projek tu nyata ngayanka komitmen perintah ti terus nentuka pengelantang pendiau rayat menua pesisir terus diberi perati.

“Enggau penembu jalai alun tu, peranak Kampung 5S ke deka ke Kuching tauka Siniawan deka bulih awak ke muntang sereta muka palan pengentap pendiau baru ba sitak tu.” ku iya.

Nitihku iya, pengawa nyendiaka infrastruktur pemun baka jalai alun ukai semina deka ngangkatka pengelantang peranak menua nya, tang mega nyadi penyungkak ngagai penumbuh ekonomi kandang menua enggau chara berenggat.

Projek tu dikearap ulih meri empas timpuh panjai ngagai pemansang kandang menua Serembu setipak enggau agenda pemansang menua pesisir ti inklusif sereta meruan. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUCHING, 26 Jun — Sektor agro-pemakai Sarawak begunaka transformasyen ke lebih komprehensif nengah chara ngemeratka pengawa ngerembaika aktiviti proses hiliran dikena nambahka rega tambah produk betanam betupi sereta ngenegapka penatai pemisi orang bumai enggau meruan.

Menteri Industri Pemakai, Komoditi enggau Pemansang Kandang Menua, Dato Sri Dr. Stephen Rundi Utom nyemetak madahka batang pemar ngagai industri betanam betupi nengeri tu ukai bepanggai ba pengulih ngasilka asil, tang lebih agi bepanggai ba pengawa nyual asil baru ti kena rega makit ti enda tetap sereta risiko muai uras.

Nitih ku iya, gaya lambak asil maya musim ngetau suah ngasuh rega nurun, kelimpah ari sekeda produk enda ulih dipasarka dalam gaya ti optimum ketegal timpuh nyimpan iya pandak.

“Lebuh musin nanas datai, asil kitai mayuh. Taja pia, rega deka nurun lalu sekeda nya buruk sebedau ulih dijual.

“Tu ukai ketegal pekebun enda rajin, tang ketegal kitai ngetu kelalu tumu ba rentayan rega,” ku iya.

Iya mega nerangka bansa baka nanas MD2 ngembuan timpuh ke sekat, lalu asil baka rian mega napi pemar ke sama lebuh kelalu mayuh ti nyadi maya penuh datai.

Situasyen tu ngasuh makit enda seimbang lebuh semua pengeluar bejual ba maya ti sama.

Berindik enggau nya, iya nyemetak madahka pemerat ngenegapka pemansang industri hiliran nyadi strategi timpuh panjai dikena ngurangka bepanggai ba pengawa nyual barang mata aja.

“Chara mutar iya nya kitai enda tau enda nyingkang nuju pengawa proses hiliran. Nanas ulih digaga nyadi jus, pes enggau produk berega tinggi.

“Rian ulih diproses ungkup makit eksport. Lada burak Sarawak endang udah dikelala ba renggat antarabansa, tang agi mayuh dijual dalam tukuh mata.

“Pia mega, padi ulih versifikasyen nyadi tepung, biskut enggau bemacham produk pemakai,” ku iya nerang.

Ku iya nambah, tetiap renggat dalam rentayan rega betanam betupi bisi penau ngasilka peluang ekonomi baru sereta nambahka asil ungkup orang bumai, orang dagang enggau pemekuh industri menua tu.

“Kitai bisi tanah enggau asil ke chukup. Utai ke diguna diatu iya nya penemu, teknologi enggau sistem ti ngemuntangka produk kitai datai ba rak supermakit, ukai semina ba tisi jalai aja.

“Nama utai ke diasilka kitai, patut disalin ngagai mata duit ringgit enggau sen,” ku iya nyemetak.

Berindik enggau nya, iya udah ngasuh Opis Betanam Betupi chakah agi ngatur program pelajar, iring enggau kelala ungkup orang bumai senentang pemesai guna transisyen ngagai industri hiliran nyadi siti singkang dikena ngenegapka daya tahan enggau daya besemekih sektor agro-pemakai Sarawak. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUCHING, 26 Jun — Gerakan Belia Parti Pesaka Bumiputera Bersatu (PBB) ngelalau Raban Nembiak DAP Sarawak (DAPSY) bebasaka pemeri Perintah Sarawak enggau pengawa ti enda ngetu dalam pemujur ngambi alih Palan Penyangkai Kapal Bintulu, seraya nyemetak madahka pengawa mulaika hak nengeri Sarawak udah lama dipegai.

Ketuai Pemadah Gerakan Nembiak PBB, Royston Valentine madah, pengawa DAPSY ti ngena visual media rama ti ngaburka imej Premier Sarawak dalam posting bekaul enggau pengawa ngambi alih Palan Penyangkai Kapal Bintulu dianggap enda patut lalu ulih nempa peragam ti salah senentang pangku pengawa ke bendar Perintah Sarawak.

Nitihku iya, pengawa ngambi alih Palan Penyangkai Kapal Bintulu ukai nyadi ngenyit, tang lebih agi asil ari komitmen Perintah Sarawak ti seruran ari baruh iring Gempung Parti Sarawak (GPS) dalam ngetanka hak nengeri tu nyengkaum nengah pengawa bejalaika Sempekat Malaysia 1963 (MA63).

Ku Royston, Perintah Sarawak mega melanja urung RM1.8 bilion ngambi alih Palan Penyangkai Kapal Bintulu, enggau nya ngemeratka palan penyangkai kapal nya ukai diserah Perintah Besai enggau chara pechuma baka ke didawa sekeda piak.

Ku iya, Raban Nembiak PBB nadai nanya pengangkun sebarang parti, tang rayat bisi hak nemu pemujur nya asil ari pengepuh enggau runding ti panjai ti betuaika Perintah Sarawak.

Ba penerang ke sama, iya bedawa naratif ke dibai DAPSY bekaul enggau isu nya bisi potensial nyaru runding rayat, kelimpah ari enda meri kelala ke patut ngagai pengawa enggau ketuai Perintah Sarawak dalam negika pemerat nengeri tu.

Royston mega madahka rayat Sarawak bepenau ngaga tisih kediri empu ba pemujur Perintah Sarawak dalam sukut pemansang infrastruktur, ekonomi, pelajar, pengelantang pendiau enggau rama ti ku iya udah nerima pengangkun baikka dalam menua enggau antarabansa.

Berindik enggau nya, iya madahka Raban Nembiak PBB deka terus meri timbal ngagai penerang ti dikumbai nyaru kelebih agi ti ditabur nengah media rama, dikena nentuka mensia mayuh nerima penerang ti betul.

Iya mega ngelalau semua piak ngemeratka penyerakup, penegap politik enggau penyulut nengeri Sarawak, seraya nulak sebarang pengawa ti tau ngeruga pengelantang enggau pemerat nengeri tu.

“Pekara ti dikemeratka kitai iya nya nentuka Sarawak terus meruan tegap, mansang sereta lantang, seraya ngetanka hak nengeri tu ungkup pemaik rayat,” ku iya nengah penerang media ti dipansutka sehari tu. – RBI

#ruaiberitaiban#newsiban#beritaiban

Rindu | Titih | Kunsika

MIRI, 26 Jun — Perintah Besai deka dipinta ngungkupka agih belanja dikena bejalaika kereja ngemanahka Jalai Padang Bilun Miri ti nyambung kandang menua Taman Delight enggau jalai pemintas padang bilun ngagai Jalai Off Bakam berindik ari pengerusak jalai enggau tanah tusur ti majak ngirauka ati.

Pekara nya dipadahka nengah penerang media begulai Kaban Parlimen P.218 Sibuti, Dato Lukanisman Awang Sauni, enggau Kaban Parlimen P.219 Miri, Chiew Choon Man, ti madahka isu nya begunaka atur lengkas laban ngaul pengelikun penguna jalai alun enggau peranak menua nya.

Nitihku sida, pengerusak ke nyadi ukai semina ngaul atas jalai aja, tang mega ngeruga struktur parit, sistem parit baruh tanah, penegap tinting enggau tanah tusur ti bisi potensial ngeruga pengelikun enti enda diputarka enggau lengkas.

Bepelasarka perati teknikal Opis Kereja Raya (JKR), kereja ngemanah nya dipelaba mungkur pengawa ngaga sereta ngemanahka parit, nyaga tinting, kereja tanah, melakin jalai enggau bejalaika atur pengelikun ke bekaul.

Taja pia, pengawa bejalaika projek nya betapi enggau penanggul ketegal status tanah ba kandang endur ti kena bungkur ari baruh Pesuruhjaya Tanah Perintah Besai bekaul enggau kandang endur Padang Bilun Miri, kelimpah ari proses nyerahka jalai nya ngagai Opis Perintah Lokal (PBT) tauka Perintah Nengeri ti bedau dipejuraika.

Taja pan napi pemar tu, kedua-dua Kaban Parlimen nya madahka semua ejensi Perintah Besai enggau Nengeri ti bekaul udah mantaika komitmen enggau pengeran sida bekerejasama nentuka pengawa ngemanahka jalai nya ulih dipejalaika kenyau ari jalai nya mayuh ditengah mensia mayuh.

Asil ari randau enggau Unit Penyelarasan Pelaksanaan, Opis Perdana Menteri (ICU JPM) Zon Miri, sida deka nganjung peminta agih belanja ngagai Perintah Besai dikena bejalaika chara mutarka timpuh panjai lalu ukai semina kereja ngemanah sementara aja.

Projek nya deka dipejalaika JKR Bagi Menua Miri nengah chara berenggat. Renggat keterubah mungkur pengawa mindah sementara tauka nyaga perengka guna ke udah bisi nyengkaum tali karan, infrastruktur telekomunikasyen enggau paip ai ti mungkur Sarawak Energy Berhad (SEB), Telekom Malaysia (TM) enggau Sarawak Water.

Sida mega madahka ungkus mindahka utiliti deka ditetapka nengah sebut rega ari kompeni utiliti ke bekaul, kelimpah ari minta runding ungkup ungkus nya dikurangka tauka dilepaska ungkup pemaik pengelikun mensia mayuh.

Renggat kedua deka ngemeratka kereja ngemanah fizikal nyengkaum ngaga baru parit, nyaga tinting, ngemanahka sistem parit enggau ngemanahka jalai alun, enggau pengawa matau terus enggau ICU JPM, JKR, Kaunsil Mengeri Miri, Pesuruhjaya Tanah Perintah Besai, Padang Bilun Malaysia enggau semua penyendia perengka guna ke bekaul.

Berebak enggau nya, kedua-dua Kaban Parlimen nya mega minta mensia mayuh besabar sepemanjai proses bejalaika projek laban beberapa prosedur teknikal, utiliti enggau status tanah patut ditembuka dulu dikena nentuka pengawa nya ulih dipejalaika enggau likun sereta teratur.

Sida mega deka terus mansik proses nyerahka jalai nya ari Pesuruhjaya Tanah Perintah Besai ngagai Perintah Nengeri tauka PBT dikena nentuka tanggungpengawa ngintu jemah ila terang agi sereta ulih dipejalaika enggau efisyen agi.

Dato Lukanisman enggau Chiew nyemetak madahka Jalai Padang Bilun Miri nyadi jalai strategik ti nyambung Padang Bilun Miri ngagai tengah mengeri sereta mega sitak Parlimen Miri enggau Sibuti, nya alai pengawa ngemanahka komprehensif deka terus dipejalai dikena nentuka pengelikun, ngelancharka trafik enggau pengelantang rayat.

“Kitai deka terus bejalaika pengawa ba selampur sitak parlimen enggau semua ejensi ke bekaul dikena nentuka kereja ngemanah ulih dipejalaika enggau naka pengelengkas lalu chara mutarka timpuh panjai ulih nyadi nyata ungkup pengelikun penguna jalai alun,” ku seduai iya. -RBI

#ruaiberitaiban#newsiban#beritaiban

Rindu | Titih | Kunsika

SELANGAU, 26 Jun – Serakup Intelektual Bansa Asal Sarawak (PERANTIS) deka ngatur Karnival Nembiak Bansa Asal 2026 kena 25 Julai 2026 ba Dewan Mayuh Guna Selangau dikena ngerembaika akses inklusif ngagai pelajar sereta ngenegapka raban nembiak enggau pengelandik digital ungkup jemah ila.

Program ke diatur begulai enggau Palan Latih Teknologi Lanjutan (ADTEC) Bintulu enggau Palan Servis DUN N.59 Tamin nya nagit penyereta nembiak, kelebih agi sida ke udah abis ba Sijil Pelajaran Malaysia (SPM) enggau Sijil Tinggi Pelajaran Malaysia (STPM), dikena ngulihka peluang belajar ke lebih dalam nyengkaum pemansang kereja enggau jalai pelajar ti engkeman enggau minat sereta potensial diri empu.

Ekspo pelajar ti nyadi batang isi karnival nya deka ngempuruka mayuh bengkah palan pelajar tinggi, kolej enggau ejensi ti bekaul di Sarawak meri kelala peluang belajar, latih pengelandik enggau bemacham inisiatif pelajar ti disediaka ngagai nembiak ke udah abis sekula.

Sekretari Komunikasyen Media Karnival Nembiak Bansa Asal 2026, Jacqueline Martin madah, pelajar nyadi pelasar besai dalam nempa pengidup mensia mayuh jemah ila sereta nyadi puku ke pemadu berega dalam pemansang modal mensia.

“Sempama jaku Tionghua madahka, enti deka pengelantang setaun, nanam gandum. Enti deka pengelantang sepuluh taun, nanam pun kayu. Enti deka pengelantang seratus taun, ngemansangka orang.Pelajar nyadi pelasar besai dalam nempa pengidup sesebengkah raban bansa jemah ila,” ku iya.

Ku iya, ba jeman ti diiri enggau teknologi, inovasyen enggau Revolusyen Industri Digital, sistem pelajar begunaka chara ti lebih dinamik, inklusif sereta nuju ke mua dikena nentuka tetiap individu bisi peluang besemekih sereta nangkup guna jemah ila.

Nitih ku iya, karnival tu mega ngemeratka pengawa nguasa teknologi digital, ngemansangka pengelandik dudi hari enggau penyikap raban nembiak napi ubah rampa kereja ti majak mayuh pemar.

“Genap iku nembiak enda ngira penatai akademik, endur tauka status sosioekonomi patut diberi awak nyerungkai potensial diri sereta milih bidang ke setipak enggau penau sereta aspirasyen sida,” ku iya.

Jacqueline madah, PERANTIS ngarapka bala nembiak ari serata Sarawak ngambi peluang ngulu Karnival Nembiak Bansa Asal 2026 ngulihka penerang terus ari palan pelajar tinggi enggau ejensi ke bekaul.

Ku iya, pengawa nya mega setipak enggau mayuh macham perambu pemansang Perintah Sarawak ti muka peluang ngagai raban nembiak dalam sektor dagang temuai, makit, budaya, seni, teknologi enggau pemansang ekonomi nengeri tu.

“Pelajar ukai semina bekaul enggau ngulihka penyulut akademik, tang mega bekaul enggau nempa individu ti ngembuan pengelandik, daya pengetan, nilai-nilai ti mulia sereta penau nelebaka diri enggau dunya ti seruran berubah.

“Enggau akses ngagai pelajar sereta pengelandik ti betul, raban nembiak ari kedua-dua kandang mengeri enggau menua pesisir ulih ngubah pengidup sida sereta mantu ngemansangka mayuh agi ruang bilik sida sereta mantu lantang Sarawak,” ku iya. – RBI

#ruaiberitaiban#newsiban#beritaiban

Rindu | Titih | Kunsika