KUCHING, 25 Jun — Opis Menteri Industri Pemakai, Komoditi enggau Pemansang Kandang Menua Sarawak (M-FICORD) deka ngatur Program Latih enggau Pemansang ICT Menua Pesisir 2026 ti berambaika jaku Strategi Pemasaran Digital enggau Asas Pengurusan Kewangan Perniagaan dalam digital ekonomi komuniti menua pesisir.

Program tu ngembuan tuju deka meri penerang sereta nambahka penemu penyereta pasal strategi makit digital ti efektif seraya ngenegapka pemereti ati sida ba pelasar ngatur wang dagang.

Pengawa ngambi bagi enda bebayar sereta dibuka ngagai komuniti menua pesisir ke beumur 20 ngagai 50.

Tetiap endur semina bisi nyendiaka 30 endur, lalu nyadika pengawa ngambi bagi semina ngagai sida ke ngerejista diri tumu.

Mensia mayuh ke bisi ati tau ngerejista diri nengah chara scan kod QR ke bisi disediaka ba poster program tauka nengah link tu:

M-FICORD ngarapka program tu ulih mantu komuniti menua pesisir nguna teknologi digital dikena ngerembaika dagang sida, lalu enggau nya ulih nambahka daya besemekih orang dagang menua tu nengah nguasa makit digital enggau ngatur belanja ti lebih sistematik. – RBI

#ruaiberitaiban#newsiban#beritaiban

Rindu | Titih | Kunsika

MERADONG, 25 Jun 2026 – Sepenyampau 60 iku individu enggau 57 buah entukar diperesa dalam Operasyen Nagang Penyalah Begulai ti dipejalaika Indu Opis Polis Pelilih Menua (IPD) Meradong dikena ngenegapka pengawa pengelikun sereta nagang aktiviti jenayah ba kandang menua pentadbiran pelilih menua tu kemari.

Ari penyampau semua individu ke diperesa, 34 iku lelaki lalu 26 iku indu. Pengawa meresa perengka pengangkut nya mungkur enam buah mutosikal, 20 buah kerita, 19 buah van enggau kerita pikap (4×4), kelimpah ari 12 buah lori.

Asil operasyen nya mega meda lima iti saman dikeluarka, tang nadai pengawa nangkap tauka ngerampas dirikod sepemanjai operasyen nya.

Operasyen nya betuaika Pemesai Medan, Insp Mohd Salman Zulfitri bin Sheekandar begulai enggau Penulung Pemesai Medan, SI Jivson anak Rockson Chin Chang enggau pengawa ngaul sepenyampau 16 iku kaban ti mungkur siku pemesai kanan polis enggau 15 iku kaban Polis Pangkat Baruh (APR).

Operasyen nya ngemeratka sekeda ‘palan angat’ ke udah dikelala nyengkaum Jalai Kelupu, Jalai KJD, Jalai Bakong, Jalai Kilang, Taman Bintang, Taman Alomara, Jalai Tulai, Taman Paris Height, Taman Vynyrd Residen, Kampung Melayu, Tanjung Genting enggau jalai tama ngelingi Bintangor.

Entara batang tuju operasyen tu iya nya ngurangka ikas jenayah indeks nengah chara operasyen begulai ti ditagit kelimpah ari ngemuntanka jenayah bekaul enggau dadah, judi enggau ulah enda beradat sereta ngenegapka penatai polis (omnipresence) ba kandang endur ti diberi perati.

Sepemanjai operasyen nya, tim polis mega bejalaika pengawa matau kerita, meresa ‘snap check’ individu enggau perengka pengangkut sereta mega Sekat Jalai (SJR) ba simpang Jalai Kelupu–Jalan Bakong, Meradong dikena nyidi individu ke disangka sereta nyekat pejalai orang ke ngereja penyalah.

IPD Meradong madah, operasyen begulai baka tu deka terus diangkatka nyadi sebagi ari pengawa Polis DiRaja Malaysia (PDRM) ti majak bejalaika pengawa nentuka pengelikun enggau atur mensia mayuh seruran ba tikas pemadu manah. – RBI

#ruaiberitaiban#newsiban#beritaiban

Rindu | Titih | Kunsika

SEBAUH, 25 Jun — Pekit nginti undang deka diatur beserimbai enggau Sebauh Agrofest 2026 ba Waterfront Sebauh nyadi sebengkah ari aktiviti rekreasyen komuniti enggau tuju meransang penyereta komuniti sereta ngelakuka chara ngena pengeraja asal menua tu enggau bejimat sereta kompetitif.

Program ti diperambu deka diatur kena 10 Julai 2026 (Hari Lima), ari pukul 8.00 pagi nyentuk 11.00 pagi, nyendiaka perais sepenyampau RM3,000 ngagai pemenang.

Entara perais ke bisi disedia baka tu iya nya Champions RM1,500, Penuduk Lumur Dua RM1,000 enggau Penuduk Lumur Tiga: RM500.

Bayar masuk pekit tu iya nya RM60 siku, lalu haribulan tutup masuk pekit iya nya kena 7 Julai 2026.

Orang ke bisi ati deka nyereta pekit tu tau ngambi pom masuk pekit ba Opis Betanam Betupi Bintulu nengah Puan Ardilla Akeng (011-39252124) enggau ba Opis Betanam Betupi Sebauh nengah Puan Maliah Ngawat (010-5916990).

Pengawa ngatur program tu dikearap ulih ngerapitka kaul rama entara komuniti lokal, kelimpah ari nyukung pengawa ngemansangka aktiviti agro-dagang temuai sereta nerenakka pengerindu ba aktiviti rekreasyen bepelasarka sungai ti bepengerai sereta meruan.

Sebauh Agrofest 2026 mega nyadi pelasar beguna dalam ngenegapka kaul komuniti dalam sektor betanam betupi enggau pengeraja asal menua tu enggau chara ti meruan. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUCHING, 25 Jun — Opis Menteri Industri Pemakai, Komoditi enggau Pemansang Kandang Menua (M-FICORD) Sarawak nandu baru komitmen ngenyampatka transformasyen digital lebuh pengawa ngena teknologi pemintar tiru (AI) deka dikerembaika enggau komprehensif ba semua opis enggau ejensi ari baruh iya.

Pekara nya dipadahka Menteri Industri Pemakai, Komoditi enggau Pemansang Kandang Menua Sarawak, Dato Sri Dr.Stephen Rundi Anak Utom, lebuh ngenataika jaku beserimbai enggau Pengerami Gala enggau Nyuaka Anugerah Inovasyen Mini Konvensyen Innovative and Creative Circle (ICC) Renggat M-FICORD 2026 ti udah diatur di Kuching, ditu kemari.

Iya nyemetak madahka tetiap opis enggau ejensi ari baruh opis menteri nya meseti bisi ambis nadai siku pemesai tauka pakar ti bekaul enggau AI nyadika singkang dikena ngenegapka pengulih digital sektor servis mensia mayuh.

“Ba opis menteri tu, ba tetiap opis tauka ejensi, nuan mesti bisi pakar AI,” ku iya seraya nyemetak madahka tu atur rasmi lalu ukai agi perambu.

Pengawa tu mega ngempuruka beratus iku pemesai enggau pemansik, kelimpah ari meda penyereta semilan tim inovasyen ari mayuh bengkah opis enggau ejensi ari baruh M-FICORD.

Dalam jaku dipansutka iya, Rundi mega mantaika evolusyen pemansang sektor betanam betupi Sarawak ti udah nengah tiga renggat besai iya nya kereja manual ngena kuasa mensia, ditangkan enggau mekanisasyen, lalu diatu masuk ngagai jeman teknologi pemintar tiru.

Nitih ku iya, ulah ti enggai berubah nyadi siti ari batang pemar dalam nentuka pendiau enggau penyulut sektor nya, kelebih agi ngagai institusyen ti udah lama ditumbuhka baka Opis Betanam Betupi Sarawak.

“Pengawa ti enda mai pemaik ngagai kitai tauka enda mai kitai sebarang endur, engkah ke tisi. Kitai mansang ke mua enggau chara baru,” ku iya nyemetak.

Tangkan bekaul enggau ngena AI mega setipak enggau tuju transformasyen M-FICORD nuju model Perusahaan Nengeri (SOE), ti ngemeratka pengulih bepelasarka data, asil ti ulih disukat enggau akauntabiliti prestasi.

Dalam konteks tu, AI dipeda ukai semina nyadi kereban sukung operasyen, tang mega nyadi instrumen ti beguna dalam ngenegapka analisis data, matau prestasi enggau efisyen meri servis ba semua renggat.

M-FICORD diatu mungkur mayuh bengkah ejensi strategik nyengkaum SALCRA sereta mega entiti ti bekaul enggau pemansang ekonomi pelilih menua enggau nengeri.

Nengah pengawa bejalaika polisi tu, Sarawak dikearapka ulih ngenegapka penuduk nyadi ketuai dalam transformasyen digital sektor betanam betupi enggau komoditi, seriris enggau pengawa ngaga ekosistem ti lebih moden, efisyen sereta ulih besemekih ba renggat global. -RBI

#ruaiberitaiban#newsiban#beritaiban

Rindu | Titih | Kunsika

KUALA LUMPUR, 24 Jun – Peniki Geran Ninting Taun ungkup Kawasan Rukun Tetangga (KRT) ari RM6,000 ngagai RM10,000 berengkah Januari 2027 disambut enggau manah nyadi singkang ke besai reti dalam ngenegapka pangku pengawa institusyen komuniti renggat baruh sereta ngenegapka agenda nasional.

Menteri Penyerakup Menua, Datuk Aaron Ago Dagang madah, penambah agih belanja nya siti pengangkun ke besai ngagai pemeri enggau pangku pengawa KRT ti udah nyadi pematak penyerakup, pengelantang enggau pengelikun rayat kenyau lebih lima dekad.

Dulu agi ari tu, penerang pasal nikika geran nya dibantaika Menteri Besai Datuk Seri Anwar Ibrahim beserimbai enggau Pengerami Bejadika Program MADANI Kita Bersama KRT kena Hari Tiga tu tadi, lalu enggau nya mandangka komitmen Perintah MADANI ngenegapka institusyen komuniti ti nyadi tiang pengelantang menua.

Nitih ku Aaron, atur nya mandangka pengeran perintah ngenegapka pejalai komuniti ba renggat baruh ti nyadi pun pengawa nempa raban bansa ti beserakup, inklusif sereta progresif.

Opis Menteri Penyerakup Menua bepenemu inisiatif nya deka meri tambah baru ngagai pengawa ngenegapka KRT nyadi pelasar ke beguna dalam nerenakka semengat besemak, ngenegapka kaul komuniti sereta nyaga penegap rama menua.

“Pengawa tu deka ngenegapka agi pangku pengawa KRT dalam bejalaika aktiviti komuniti, pengelikun genturung pendiau enggau program penyerakup ti meri penguntung terus ngagai rayat,” ku iya nengah sebengkah penerang.

Iya mega nyemetak madahka penambah geran nya dikearapka ulih nambahka pemanah pengawa bejalaika mayuh bengkah program komuniti di serata menua, kelimpah ari ngenegapka kaul rama enggau semengat penyerakup entara komuniti pupu bansa. – RBI

#ruaiberitaiban#newsiban#beritaiban

Rindu | Titih | Kunsika

MERADONG, 24 Jun – Ketuai Polis Pelilih Meradong, DSP Tansli Mering nyemetak madahka semengat gawa beraban, integriti enggau pengelantang ruang bilik nyadi pelasar beguna dalam nentuka tetiap raban Polis Diraja Malaysia (PDRM) ulih bejalaika tanggungpengawa sida enggau nyulut sereta efektif.

Dalam jaku dipansutka iya, DSP Tansli Mering ngemeratka pemesai guna nerenakka semengat “Esprit de Corps” ba pemesai enggau kaban nyadi batang pemun ngenegapka kerejasama, disiplin enggau komitmen dalam bejalaika pengandal enggau tanggungpengawa ti dipegai sida.

Iya madah munyi nya lebuh ngenataika pesan iya ba Gempuru Ninting Bulan Indu Opis Polis Pelilih (IPD) Meradong ke diatur ba Dewan Mayuhguna IPD Meradong pagi tadi.

Iya mega ngingatka raban IPD Meradong ngambika seruran ngetanka integriti nengah chara nitihka prosedur operasyen standard (SOP) tim sereta nyeliahka sebarang tukuh salah guna kuasa, makai suap, salah guna dadah enggau bemacham isu disiplin ti tau ngeruga imej enggau kredibiliti raban polis.

Nitih ku iya, timbang entara kereja enggau pengidup ruang bilik mega patut diberi perati laban ruang bilik ti likun, pelajar anak ti diintu enggau manah, pengelantang ruang bilik enggau angkunka nilai pengarap nyadi tiang penumbuh kaban ti bisi disiplin, bisi etika sereta beprestasi tinggi.

Ba pengerami ke sama, DSP Tansli Mering mega ngenataika pengaga ati ngagai bala penerima Setipikit Anugerah Perkhidmatan Cemerlang (APC) 2025 ketegal dedikasyen, komitmen enggau pemanah pengawa ti dipandangka sepemanjai pengawa sida.

Gempuru ke diatur ari pukul 7.20 pagi nyentuk 8.00 pagi nya digulu 65 iku pemesai enggau kaban nyengkaum pemesai kanan polis, pemesai bukai enggau pengereja pengawa perintah.

Pengerami nya dipunka enggau pengawa belagu lagu rasmi, macha sembiang ari Awang Hafiz Awang Jaffar, macha danji ti betuaika Aisyah Milos, sebedau ditampung enggau pesan Ketuai Polis Pelilih enggau pengawa nyuaka APC 2025.

Gempuru nya tembu enggau pengawa belagu lagu Sedia Berkhidmat. – RBI

#ruaiberitaiban#newsiban#beritaiban

Rindu | Titih | Kunsika

SONG, 24 Jun — Penemuai matau palan udah dipejalaika kemari di Nanga Beguang, Song dikena beratika pejalai pengawa bejalaika Program Pemansang Nanam Koko Song ari baruh Program Mindah enggau Ngerembai Teknologi (TOTe), ti dikemataka Unit Zon Utara (Sarikei).

Penemuai nya mungkur pemesai ari Opis Menteri Industri Pemakai, Komoditi enggau Pemansang Wilayah Sarawak (M-FICORDD), Pemesai Wilayah Sarawak enggau Menijar Pusat PPPK Kota Samarahan.

Batang tuju penemuai tu dikena beratika gaya kandang endur projek ke diatu, matau pejalai pengawa bejalaika program sereta ngelala potensial pemansang betanam koko ba kandang menua nya.

Pemansik nya mega ngemeratka pematut tanah, status penumbuh utai tanam enggau aspek ngatur kebun dikena nentuka pemanah pengawa bejalaika projek ba ladang.

Kelimpah ari pengawa matau ba palan, sesi randau mega bisi diatur enggau ejensi ke bisi kaul dikena ngulihka timbal bekaul enggau pengawa bejalaika program nya.

Randau nya mega ngemendarka pengawa ngemanahka agi diperambu dikena ngenegapka agi pemanah program nya jemah ila.

Pengawa tu ngayanka komitmen ti seruran dipejalai dikena ngenegapka pemansang industri koko di Sarawak, senutuk enggau juluk ngenegapka ekonomi menua pesisir sereta nambahka daya bepekit sektor komoditi betanam betupi nengeri tu.

Program tu dipejalaika ari baruh inisiatif Lembaga Koko Malaysia ti ngemeratka pemansang industri koko ti meruan nengah pengawa mindahka teknologi, iring teknikal enggau ngenegapka rentayan nilai industri.

Penemuai matau tu dikearap ulih nentuka pengawa bejalaika program ba renggat lapangan bejalai enggau lebih sistematik, efektif sereta nyapai juluk ti udah ditetapka. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUCHING, 24 Jun — Gerempung Graduet Dayak Sarawak (SDGA) nandu baru komitmen sida ti seruran meri kuasa ngagai graduet Dayak ngambika terus kompetitif sereta ulih nyapai tikas kelas global, setipak enggau aspirasyen pemansang modal mensia di Sarawak.

Berindik enggau nya, SDGA nyemetak madahka gerempung tu deka terus bejalaika tanggungpengawa enggau chakah ngadaka raban graduate Dayak ti beintegriti, bepenemu sereta bisi visi, kelimpah ari nentuka sida ulih mai nama Sarawak ngagai renggat antarabansa.

SDGA mega madahka pengawa ngenegapka pelajar enggau pemansang modal mensia deka terus nyadi batang agenda dalam nyukung penyulut selampur komuniti Dayak.

Pekara tu dibantaika Presiden iya, Ts. Rizzo Mungka beserimbai enggau pengawa ngulu Pengerami Makai Lemai Pengerami Gawai Dayak Sarawak 2026 ke diatur ba Palan Konvensyen Borneo Kuching (BCCK) apin lama ke udah.

Pengerami ti beprestij nya dirichahka penatai Tuai Pemegai Menua (TYT) Negeri Sarawak, Tun Pehin Sri Dr.Haji Wan Junaidi Tuanku Jaafar enggau Toh Puan Datuk Patinggi Fauziah Mohd Sanusi, kelimpah ari Menteri Besai Malaysia, Dato’ Seri Anwar Ibrahim enggau Premier Sarawak, Patinggi Tan Sri Dr Abang Johari Tun Abang Openg.

Pengerami Gawai Dayak 2026 mai rambai jaku “Segulai Sejalai: From Ruai to The World” ti mandangka pejalai komuniti Sarawak kelebih agi komuniti Dayak dalam ngangkatka penau, penemu enggau aspirasyen sida ngagai renggat nasional enggau antarabansa.

Nitih ku SDGA mega, rambai jaku nya kelai penegap penyerakup, identiti enggau semengat penyulut komuniti Sarawak enggau enda ngelalaika pun budaya enggau pesaka asal sida.

“Rambai jaku tu mandangka pejalai nyelai peranak Sarawak ti udah mai penemu, pengelandik enggau aspirasyen sida ngagai tikas ke tinggi agi, enggau nya meri pemeri ti bisi reti ba renggat nasional enggau global,” ku penerang ari Ts. Rizzo Mungka. — RBI

#ruaiberitaiban#newsiban#beritaiban

Rindu | Titih | Kunsika

BINTULU, 24 Jun — Jalai perengka pengangkut ba Lobi Besai Sepital Bintulu deka ditutup sementara berengkah ari 24 Jun nyentuk 30 Jun 2026 dikena meri awak ngagai pengawa ngemanahka atap ba kandang endur nya.

Nitihka penerang ari Sepital Bintulu, pengawa nutup sementara nya siti atur ti beguna dikena nentuka kereja ngintu ulih dipejalaika enggau likun sereta teratur enggau enda ngachau batang operasyen sepital nya.

Berindik ari nya, pesakit enggau temuai ke bejalaika pengawa nganjung enggau ngambi dipinta ngena jalai alternatif ke udah ditetapka sepemanjai timpuh penutup.

Ungkup pekara ti ukai ngenyit baka ngagai Palan Nyaga Anak Mit, wad enggau servis sepital ke bukai, mensia mayuh tau ngena Palan Paking HOD 2 nyadi jalai tama enggau pansut.

Berebak enggau nya, ungkup kes penusah ngenyit aja, jalai ngagai Opis Penusah Ngenyit enggau Trauma (ETD) ba Lobi Besai agi dibuka baka selama.

Sepital Bintulu mega ngelalau mensia mayuh ngambika seruran ngasika atur staf enggau tanda pengelikun ti disediaka dikena nentuka pejalai trafik lanchar sepemanjai timpuh gawa.

Penerang nya mega meri besai terima kasih ngagai kerejasama semua piak dalam nentuka pengelanchar operasyen sepital nya. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KOTA SAMARAHAN, 24 Jun — Polis udah mujur nangkap seraban geng perumpak ti aktif ba kandang menua Asajaya asil ari operasyen bersepadu Pampang D9 Opis Siasatan Jenayah (JSJ) IPK Sarawak begulai enggau Bahagian Siasatan Jenayah (BSJ) IPD Kota Samarahan.

Pemangku Ketuai Polis Pelilih Kota Samarahan, DSP Barry Anak William madah, penusah ngerumpak nya diripotka nyadi kena 21 Jun 2026 urung pukul 9.30 malam ba sebuah kampung rumah kandang menua Sadong Jaya ti ngaul siku orang tuai beumur 70 taun.

Nitihka penerang iya, mansa dilawa tiga iku lelaki betudung mua ti ngembuan senyata parang enggau besi sebedau nanchang kededua jari mansa ba rumah iya.

Saspek udah nya ngelarika diri mai duit RM3,000, telefon binching, dokumen diri empu enggau sekeda barang enggi mansa.

“Ripot polis udah diterima ba Balai Polis Asajaya kena 22 Jun 2026 pukul 8.48 pagi ari orang ke ngaga sebana ke mega mansa penusah nya,” ku iya nengah siti penerang sehari tu.

Berindik ari ripot nya, polis ngepunka operasyen khas dikena nyidi saspek ke bisi kaul enggau mujur nangkap empat iku lelaki peranak menua nya ke beumur entara 29 ngagai 52 taun dalam tiga pengawa nyerungkai ngelingi Asajaya. Sekeda barang ke bekaul enggau kes nya mega dirampas.

DSP Barry mega madahka, pemutus peresa ai kemi keterubah tetemuka semua saspek positif dadah lalu bisi 13 rikod sebedau tu bekaul enggau penyalah dadah, reta tengkira enggau penyalah kasar.

Kes tu dipansik nengah Seksyen 395/397 Kanun Keseksaan lalu semua saspek dibai ngagai Kort Kota Samarahan ngambika minta riman nengah Seksyen 117 Kanun Prosedur Jenayah, ti dikemendarka pengelama tujuh hari nyentuk 1 Julai 2026.

Berebak enggau nya, polis agi chakah nyidi siku agi kaban ke sama ngereja pengawa nya ke agi lari.

DSP Barry nyemetak madahka Polis DiRaja Malaysia deka terus ngangkatka pengawa ngelaban penyalah ganas dikena nentuka pengelikun enggau atur mensia mayuh seruran dijaga. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Photo — Polis Pelilih Samarahan