BINTULU, 25 Jun — Orang bumai di Sarawak dilalau ngalih ari nyual asil betanam betupi ke baru ngagai ngeluarka produk hiliran ke berega tinggi dikena nyungkak penatai pemisi sereta ngenegapka daya bepekit sektor agro-pemakai nengeri tu.
Menteri Industri Pemakai, Komoditi enggau Pemansang Kandang Menua, Dato Sri Dr.Stephen Rundi Utom madah, chara nya beguna laban tebal agi asil betanam betupi ngembuan timpuh nyimpan ke pandak sereta mudah dikeruga ketegal dibuai maya musim ngeluarka asil.
Nitih ku iya, sektor betanam betupi enda patut semina ngasilka asil mata aja, tang lebih agi patut ditegapka nengah aktiviti proses hiliran ngambika ulih ngasilka produk ti bisi nilai tambah ti ulih meri penguntung ti tinggi ngagai orang bumai enggau orang dagang agro.
“Diatu, mayuh orang ngumbai semina minyak sawit aja ke meri penguntung, lebuh bisi bemacham produk betanam betupi bukai ke bisi potensial meri asil ke manah agi enti diproses nyadi produk hiliran,” ku iya.
Iya madah munyi nya lebuh bejaku ba Pengerami Nyuaka Chek Projek Mit Menua Pesisir (MRP) Renggat Dua Kunsil Nengeri (DUN) Kemena ba Opis Betanam Betupi Bagi Menua Bintulu, sehari tu tadi.
Ba pengerami nya, iya nyuaka agih belanja sepenyampau RM594,000 ngagai 43 iku penerima ti mungkur serakup enggau gerempung komuniti di kandang menua Kemena, Sebauh, Suai, Niah enggau sekeda kandang menua ke bukai.
Ku iya, pengawa ngagihka agih belanja tu sebagi ari pengawa perintah ngenegapka pemansang komuniti menua pesisir sereta nyukung pengawa bejalaika aktiviti sosio-ekonomi ba renggat baruh.
Nitihku iya, pemansang industri hiliran ulih nyungkak rega komoditi betanam betupi baka nanas, rian, lada burak enggau padi nengah bemacham produk tambah rega ti ngembuan potensial makit ke lebih luas sereta kompetitif agi.
Ambika chunto, beras ukai semina ulih dipasarka nyadi beras, tang mega ulih diproses nyadi produk bukai baka tepung enggau biskut ti ulih mansutka rega ekonomi ti besai agi.
Berebak enggau nya, iya mega meransang mayuh agi raban nembiak kelebih agi graduet palan pelajar tinggi ngemeranka sektor betanam betupi moden nengah chara beambi ulih ari teknologi baka Internet of Things (IoT) enggau konsep betanam betupi ‘fusion’.
Ku iya, opis menteri benung ngaga projek betanam betupi pintar di Batu 11 ti deka nyadi pelasar latih dikena ngadaka mayuh agi orang dagang betanam betupi biak ti kompetitif sereta inovatif.
“Pengudah nembuka pelajar ba universiti, guna meh penemu ke diulih kita nempa peluang ke ulih mansutka penatai pemisi, ukai semina ngulihka penatai pemisi ke tetap aja,” ku iya.
“Kebuah pia laban ngulihka penatai pemisi tetap reti iya ngulihka gaji, seraya nempa penatai pemisi nyendiaka ruang dikena numbuhka pengaya,” ku iya nambah.
Iya nyemetak madahka Opis Betanam Betupi begunaka pengawa terus ngenegapka pengawa ngiring ungkup orang bumai enggau raban nembiak dalam sukut teknologi, proses enggau makit ngambika mayuh agi asil betanam betupi ulih dikomersial nyadi produk hiliran, lalu enggau nya ngenegapka rentayan rega sektor agro-pemakai sereta nyukung pemansang ekonomi nengeri. — RBI
#Beritalban | Ruai Berita Iban
Rinduka | Titihka | Kunsika
