BINTULU, 25 Jun — Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi anak Utom, ngelalau raban nembiak ngubah peragam sida ba sektor betanam betupi, ke diatu benung mansang nyadi industri moden bepelasarka teknologi enggau inovasyen sereta ulih mansutka mayuh agi penatai pemisi.
Ku iya, projek betanam betupi ‘precision’ bepelasarka teknologi Internet of Things (IoT) di Sungai Sebiew, Bintulu ke benung dikemansang diatu dipelaba tembu ujung taun tu lalu deka nyadi pematak ngagai pemansang betanam betupi pintar di Sarawak.
Nitih ku iya, sistem nya enda agi bepanggai ba chara betanam konvensional, tang ngena ‘sensor’ enggau aplikasyen digital dikena nyaga proses baja, ai enggau pengangat kandang endur nanam enggau chara automatik dikena nambahka efisyen pemansut.
Ku iya, enti projek nya tembu ila, perintah deka muka peluang ngagai raban nembiak betanamka utai tanam ti berega tinggi ba Taman Pengeluar Pemakai Kekal (TKPM) ngena teknologi moden, kelimpah ari nyendiaka penerang enggau latih praktikal ngagai sida.
Iya madah munyi nya lebuh bejaku ba Pengerami Nyuaka Geran MRP DUN Kemena ke diatur ba Opis Opis Betanam Betupi Bagi Menua Bintulu, sehari tu tadi.
Dr Stephen Rundi madahka, raban nembiak mega patut meda sektor betanam betupi nyadi kereja “kolar hijau”, ti begulaika pengawa ngena teknologi, inovasyen enggau pengawa dagang, lalu ukai semina fokus ngagai pengawa “kolar putih” tauka “kolar biru”.
Iya mega nerangka bida entara konsep “ngulihka duit” enggau “ngaga duit”, nengah chara nerangka pengawa begaji tetap nyadika pun penatai pemisi ti bisi sekat ti ditetapka, seraya pengulih ngena penemu enggau pengelandik dikena nempa dagang diri empu ulih nempa rega ekonomi ti besai agi.
Nitih ku iya, Sarawak ngembuan pengelebih ari sukut pemesai tanah, perengka guna teknologi enggau sukung institusyen pelajar ti bepenau ngasilka modal mensia ti bekualiti, nya alai raban nembiak begunaka pemerani nyerungkai peluang baru dalam sektor betanam betupi moden.- RBI
#ruaiberitaiban#newsiban#beritaiban
Rindu | Titih | Kunsika
