MERADONG, 13 April – Kaban Kunsil Nengeri (ADUN) Meradong, Datuk Ding Kuong Hiing nyemetak madahka dikena napi pemar kemaya hari, ketuai komuniti meseti seruran ransing, proaktif, siru sereta meretika ngagai guna rayat.

Iya mega ngarapka semua Ketuai Komuniti enggau Ketuai Raban Bansa (KMKK) terus bekerejasama rat enggau perintah sereta ejensi ti bekaul dikena nentuka pengawa bejalaika polisi enggau inisiatif pemansang ulih dipejalaika enggau manah ungkup pengelantang rayat.

Iya madah munyi nya lebuh bejaku ba pengerami nyuaka setipikit chiri mangku pengawa ba Dewan Opis Pelilih Meradong, kena Hari Satu tu tadi.

Ba pengawa nya, sepenyampau 61 KMKK nerima timpuh nampung setipikit mangku pengawa sida, lalu tujuh iku agi baru dipadu dalam atur ngenegapka pengawa nyadi ketuai ba renggat baruh di pelilih tu.

Datuk Ding mega nyadaka pengandal semua sida ke dichiri nya ulih bejalaika tanggungpengawa sida enggau manah.

Ku iya, pengawa nyiri nya ukai semina meri pengangkun aja, tang pengandal ke besai ti enda tau enda ditanggung enggau penuh tanggungpengawa, pengelurus ati sereta dedikasyen ngagai komuniti lokal.

“Pangku pengawa KMKK beguna amat nyadi penyambung entara rayat enggau perintah, kelimpah ari nyadi baris mua ngenataika penerang, nyaga pengelantang komuniti sereta mantu mutarka isu ba renggat baruh,” ku iya. -RBI

STAKAN, 13 April – Perintah Besai nengah Opis Menteri Transformasyen Kuasa enggau Transformasyen Ai (PETRA) sehari tu udah nyerahka dua projek selapat bah ke udah tembu penuh ngagai perintah Sarawak enggau penyampau semua RM107.2 juta.

Sapit Menteri Besai ke mega Menteri iya, Datuk Amar Haji Fadillah bin Haji Yusof madah, projek nya dipejalaika Opis Parit enggau Entali Ai (DID) lalu nyengkaum Pelan Mitigasyen Ampuh Bah Stakan (RTB) ke beungkus RM10 juta enggau RTB Sibu Fasa 3 ke beungkus RM97.20 juta.

Nitih ku iya, pengawa bejalaika RTB Stakan ngemeratka pengawa mutarka isu ampuh bah ngenyit enggau bah bemusin ba Sungai Stakan berindik ari peneras ai ba sistem parit ketegal pemansang ti jampat nyadi ba garis entara menua Kuching enggau Samarahan.

“Nengah chara injiniring ti begempung, projek tu udah mujur nambahka kapasiti ai enggau pengawa nagang ai enggau lebih efektif, lalu enggau nya meri pemaik nyaga ngagai urung 5,000 iku peranak sereta ngurangka risiko pengerusak reta tengkira,” ku iya.

Pengawa nyerahka kedua-dua projek nya diatur ba Masjid Darul Malihah, Kampung Bukit Berangan, Kota Samarahan ke bela digulu peranak menua nya.

Nerang enggau silik agi, iya madahka RTB Sibu Fasa 3 digaga dikena mutarka pemar geografi ke baruh ba mengeri Sibu, ke bepalan nanga Batang Rajang enggau Batang Igan sereta suah dituntung ai melumpa maya ujan bangat enggau fenomena ai pasang raya.

“Projek tu mega ngambi kira faktor tanah kerapa ke dikena mutarka isu tanah tusur enggau efektif agi,” ku iya.

Iya nyemetak madahka enggau penembu kedua-dua projek nya, risiko ampuh bah di kandang menua Sibu ulih dikurangka enggau nyata, lalu ari nya ulih ngenegapka pengelantang pendiau rayat sereta nentuka penerus aktiviti sosio-ekonomi kandang menua.

“Perintah besai deka terus komited nentuka pengawa bejalaika projek infrastruktur menua ti meruan, meri empas tinggi sereta tan dikena ngurangka pengerugi reta tengkira, nyaga perengka guna mensia mayuh sereta nyeliahka risiko bebadi nyawa ketegal penusah ampuh bah,” ku iya.

Ku iya nambah, inisiatif nya seriris enggau aspirasyen Malaysia MADANI dalam ngenegapka daya pengetan menua napi ubah gaya hari enggau penusah ungkup pengelantang pengidup rayat ti likun sereta lantang agi.

Ba pengawa ke sama, iya mega ngemataka pengawa nyuaka pemeri Suruhanjaya Perkhidmatan Ai Nasional (SPAN) enggau Tenaga Nasional Berhad (TNB) ke nyadi sebagi ari tanggungpengawa rama korporat sida.

SPAN udah nyuaka paip ngena ai enggau efisyen ngagai Masjid Darul Malihah, lalu TNB nengah CSR Wakalah di Sarawak meri bantu RM10,000 ngagai masjid nya.

Iya mega meri besai terima kasih ngagai Sapit Menteri Pemansang Menua Pesisir enggau Kandang Menua ti mega Kaban Parlimen Kota Samarahan, Datuk Rubiah Wang enggau Kaban Kunsil Nengeri (ADUN) N17 Stakan Datuk Hamzah Brahim ke udah meri sukung ngemujurka pengawa nya. -RBI

SIBU, 13 April — Kaban Parlimen Sibu Oscar Ling nyemetak madahka isu tiga serangkai bekaul enggau darah tinggi, kemi manis enggau kolestrol tinggi di Malaysia diatu majak nuntung raban nembiak.

Kenu ku iya, enti chara makai enda berubah, gaya nya deka nyadi tating besai ngagai sistem pengerai jemah ila.

Berindik enggau nya, iya ngelalau mensia mayuh nyukung kimpin ‘bibas gula sepengelama sebulan’ dikena nerenakka disiplin dalam nyaga pengerai.

Iya mega ngarapka program pengerai renggat baruh baka pengawa meresa pengerai kediatur Rumah Luat ulih dipajakka jemah ila.

Program meresa pengerai enda bebayar ke diatur ba Rumah Luat, Kemuyang kena Hari Minggu tu tadi mantaika sekeda pengirau pengerai peranak menua nya.

Program komuniti ke diatur Palan Servis Parlimen Sibu nya meda 42 iku peranak menua nya beperesa pengerai pemun.

Program nya mega dipejalaika nengah kerejasama Gerempung Bidan Sarawak enggau Komiti Pengelikun enggau Pemansang Genturung Pendiau (JKKK) rumah panjai nya.

Kelimpah ari pengawa meresa pengerai pemun, servis khas ungkup orang indu baka peresa pap smear (tisih riman mua kain) enggau meresa tusu mega bisi disediaka.

Nampung penerang ari Borneo Post, ari penyampau nya, 17 iku individu ditemu ngembuan tikas gula dalam darah tinggi, lapan iku dikelala napi penyakit darah tinggi, lalu tiga iku agi ngayanka tikas kolestrol ke enda normal.

“Asil pansik tu terang nunjukka pengambi gula enggau garam kelalu mayuh ba peranak menua nya,” ku penerang nya.

KUCHING, 13 April – Raffaele Langella, Duta Besai Itali ke Malaysia, enggau kaling iya udah nemuai rasmi ngagai Kampung Budaya Sarawak kena Hari Enam tu tadi, meda penyelai pesaka asal nengeri tu.

Penatai iya disambut enggau pengawa mandangka main asal Orang Ulu sebedau dibai bejalai ba sebelah Kampung Budaya ti mandangka bemacham rumah etnik baka Baruk Bidayuh, Rumah Panjai Iban, Pondok Penan enggau Rumah Tinggi Melanau sereta pematak ikonik ke bukai.

Penemuai nya meri awak ngagai iya meretika agi mayuh macham adat enggau gaya pengidup komuniti Sarawak, ke tulin dipandangka ba setiap endur.

Program nya diteruska ba Teater Budaya enggau pengawa mandangka budaya ti bechura, ke alai Raffaele Langella enggau kaling iya mega ngerindangka agi pengawa enggau nyereta segmen “Joget Bersama Penonton”.

Penemuai nya ukai semina mandangka kaul rat entara Malaysia enggau Itali, tang mega nyadi pelasar ti beguna dalam ngangkatka pemanah enggau pengaya budaya Sarawak ngagai renggat antarabansa. -RBI

KUCHING, 13 April – Sapit Menteri Pengerai Malaysia, Dato Hajjah Hanifah Hajar Taib bejalaika penemuai kereja ngagai Klinik Pengerai (KK) Braang Bayur beserimbai enggau Jelajah Pengerai Borneo (JKB) beratika terus gaya enggau guna servis pengerai di kandang menua nya.

Maya penemuai nya, iya dibai meda kediri empu operasyen ninting hari perengka guna enggau servis ke disediaka ba KK Braang Bayur, kelimpah ari ngulihka penemu ke nembam pasal pengulih ngenataika servis ngagai komuniti lokal.

Hanifah mega bisi mendingka penemu enggau pemar ti ditapi raban pengereja pengawa pengerai ba klinik nya, kelebih agi dalam nentuka servis meruan efisyen sereta bekualiti tinggi.

Penemuai nya mega disempulang raban ari Opis Menteri Pengerai Malaysia (KKM) dalam pengawa nentuka setiap isu enggau guna ti dibantai ulih diberi perati ke patut ba renggat opis menteri.

Pekara ti ditemu ari penemuai tu deka nyadi penerang ti beguna dalam ngenegapka perambu enggau ngemanahka servis pengerai, kelebih agi dikena nentuka akses pengerai ti manah sereta engkeman agi ungkup rayat di menua pesisir. -RBI

KUCHING, 13 April – Pemansang dagang mit enggau jelan pemesai (IKS) terus nyadi pemerat Perintah Sarawak nyadi pemansut besai ekonomi nengeri tu, pia ku Sapit Premier Sarawak, Datuk Amar Awang Tengah Ali Hasan.

Ku Awang Tengah, pengawa IKS ngagai pemansang ekonomi enggau Pemansut Kasar Dalam Menua (KDNK) menua chukup besai reti, kelimpah ari bejalaika tanggungpengawa ti beguna dalam ngadaka peluang kereja.

“Taja pia, agi bisi dagang mit bedau direjista. Nya alai, bemacham program dipejalai dikena mantu orang dagang ngerejista dagang sida nengah chara ti entas.

“Baka di Sarawak, kitai bisi inisiatif Jum Regista Bisnes dikena meransang pengawa ngerejista entara IKS,” ku iya.

Iya madah munyi nya lebuh bejaku ngarika Premier Sarawak, Datuk Patinggi Tan Sri Abang Johari Tun Openg ba Pengerami Teraju Aspirasi Jangkauan Sarawak 2026 di Tegas Digital Village,, sehari tu tadi.

Ku iya, pengawa bejalaika bemacham inisiatif nyengkaum program ngerejista dagang betuju nentuka data dagang menua tu lebih menyana sereta teratur.

“Kitai mega deka nentuka pangkalan data ti komprehensif digaga ngambika tukuh bantu ti diagih ulih diperambu enggau lebih ngasi,” ku iya.

Ba pemansang ke bekaul, Awang Tengah madahka lapan buah kompeni Bumiputera di Sarawak udah dikelala ngembuan potensial ke tinggi dirintaika nengah ‘Tawaran Awam Permulaan (IPO) ba Bursa Malaysia, ke alai sebuah kompeni ari nya dipelaba deka dirintaika sebedau ujung taun tu.

Ku iya, ari penyampau nya, tiga buah kompeni udah mujur nembuka Program Elevate ti dipejalaika Unit Peneraju Agenda Bumiputera (TERAJU) ti nyadika chara nyikap diri nuju rintai ba makit puku.

“Pengawa tu mega setipak enggau langkar strategik Sarawak 3-7-20 ti nagit tiga buah kompeni Bumiputera dirintai, ngadaka tujuh champian industri sereta nambahka dagang mikro 20 peratus,” ku iya.

Iya nyemetak madahka kerejasama rat entara Perintah Besai, Perintah Nengeri, ejensi pemansang enggau sektor peribit beguna amat dalam ngamatka pengingin deka ngadaka mayuh agi kompeni Bumiputera nyadi ketuai dalam transformasyen ekonomi. -RBIIKS dikemeratka, lapan kompeni Bumiputera Sarawak ditagit dalam rintai Bursa Saham Malaysoa

MARUDI, 13 April — Pengawa bejalaika Projek Jalai Miri–Marudi, Marudi–Mulu (Kuala Melinau) enggau Long Lama–Long Panai (MMMLL) Fasa 1, Projek Kick-Off 2 (KOP2) dipeda nyadi penyungkak besai pemansang sosio-ekonomi kandang menua Baram.

Kaban Kunsil Nengeri (ADUN) Mulu, Gerawat Gala madah, projek nya mandangka komitmen perintah ti terus ngenyampatka pemansang infrastruktur menua pesisir, kelebih agi ba kandang menua ti betapi enggau pemar geografi.

Nitihku iya, projek KOP2 tu ngaul pengawa ngaga jalai baru sepemanjai 6.25 kilometer ari Simpang Puyot ngagai Sungai Kalijau nitihka standard JKR R3 lalu udah berengkah enggau kereja meresi palan kenyau ari bulan Februari 2026.

“Taja betapi enggau pemar baka tanah kerapa ke dalam sereta kandang endur ke suah ampuh bah, pengawa bejalaika projek tu deka ngena chara injiniring moden nyengkaum Prefabricated Vertical Drains (PVD) sereta mega pengawa ngaga jalai ke tinggi dikena nentuka penegap enggau pengelikun,” ku iya.

Iya madah munyi nya ba sebengkah penerang beserimbai enggau Pengerami Ngelanchar Projek Jalai MMMLL Fasa 1 (KOP2) ti dipenyadika Sapit Premier Sarawak, Datuk Amar Douglas Uggah Embas ditu, sehari tu.

Berebak enggau nya, Gerawat Gala nyemetak madahka projek nya deka meri empas ke besai ngagai rayat lebuh timpuh pejalai ke sebedau tu urung 72 minit dipelabaka dipandakka ngagai semina 12 minit aja.

Ku iya, penambah akses tu ukai semina deka ngemuntangka pemindah peranak, tang mega muka peluang ke lebih luas ungkup pelajar, servis pengerai enggau aktiviti ekonomi di kandang menua ulu.

“Projek tu deka nyambung genturung pendiau menua ulu enggau rentayan jalai batang, lalu enggau nya nentuka nadai kandang endur tinggal ari arus pemansang,” ku iya nerang.

Iya mega meri besai terima kasih ngagai semua piak nyengkaum Kaunsil Pemansang Koridor Wilayah (RECODA), ejensi bejalaika pengawa, penyanding penemu projek, kunteriktor enggau komuniti menua nya ke udah meri kerejasama ngemujurka inisiatif nya.

Sama bisi ngulu pengerami nya Kaban Parlimen Baram, Dato Anyi Ngau; Kaban Kunsil Nengeri ( ADUN) Marudi, Datuk Dr Penguang Manggil; enggau Kaban Kunsil Nengeri ( ADUN) Telang Usan, Dato Dennis Ngau.

Iya ngarapka projek tu ulih dipejalaika enggau lanchar sereta meri pemaik ti enda ngetu ngagai rayat di kandang menua Baram. — RBIProjek Jalai MMMLL Renggat 1 (KOP2) Meransang Pemansang Ba Kandang Menua Baram

SRI AMAN, 13 April — Yang Amat Berhormat Premier Sarawak, Datuk Patinggi Tan Sri Dr. Abang Haji Abdul Rahman Zohari bin Tun Datuk Abang Haji Openg, ngelalau rayat ngena pelasar media rama baka TikTok enggau Facebook enggau pintar dikena mansutka penatai pemisi sereta ngenegapka ekonomi, ari ke ngerembaika petenah ti tau mechahka raban bansa.

Ngenang ripot tulis ari Facebook Sarawak First, iya nyemetak madahka ba jeman digital kemaya hari tu, rayat Malaysia entara penguna media rama ti chakah enggau tikas interaksyen enggau transaksyen ti tinggi, nya alai perengka guna teknologi nya patut dikena ungkup tuju ti nambahka rega pengidup.

Nitih ku iya, agi bisi sekeda piak ti salah guna pelasar nya ngerembaika penerang ti enda dientas sereta ngujungka laya nyadi, lalu media rama ngembuan potensial besai nyadi medium pengawa dagang, makit enggau ngulihka penatai pemisi.

“Anang ngena TikTok tauka Facebook dikena ngerembaika petenah.

“Orang bukai ngena platform tu dikena ngulihka duit, tang kitai nyau ngena nya malas penerang ti bebalas saut ti semina meri penguntung ngagai platform nya,” ku iya lebuh bejaku ba Pengerami Nangguhka Forum Ekonomi Dewan Undangan Negeri Lingga di Dewan Suarah Sri Aman, kena Hari Minggu.

Iya mega ngingatka budaya nyerang pangan diri sereta nyadung petenah ba media rama ukai semina ngeruga pengelantang mensia mayuh, tang mega bisi potensial ngeruga penegap politik enti enda ditagang.

Ku iya nambah, mensia mayuh ke pambar deka ngujungka politik enda tentu lalu udah nya ngeruga pengulih perintah ngemeratka agenda pemansang enggau pengelantang rayat.

Berindik enggau nya, iya nyemetak madahka pemansang infrastruktur digital nyengkaum internet enggau komunikasyen meseti dikena penuh dikena nempa raban bansa ti lebih progresif, beserakup sereta landik ngena chara digital.

Berebak enggau nya, iya mega ngansak orang dagang menua tu ngena media rama enggau agresif agi ngelakuka produk sereta ngerembaika tuju makit ngagai renggat antarabansa.

“Kena teknologi tu dikena ngiga duit, ukai nyadung petenah,” ku iya nyemetak. — RBI

MIRI, 13 April — Projek ngangkatmanah jalai nuju Kampung Ulu Teru di Marudi sepemanjai 23.4 kilometer ke beungkus RM45.2 juta dipelaba tembu tumu agi ari perambu asal, nitihka ripot TVS.

Sapit Premier Sarawak, Datuk Amar Douglas Uggah Embas madah, bepelasarka sempekat kunterik nya, projek nya diperambu tembu dalam timpuh 24 bulan, tang kunteriktor udah meri jamin tembu dalam timpuh 18 bulan.

Ku iya nerang, gaya hari ke angat diatu enggau ke deka nyadi dalam kandang beberapa bulan ti deka datai enda disadang meri sebarang penekul besai ngagai pengawa bejalaika projek nya.

“Perintah dekaka projek tu tembu tumu agi dikena nentuka rayat ulih ngasaika perengkaguna infrastruktur ke manah agi tekala nya,” ku iya lebuh dikerandau raban media ba pengerami nasih tanah projek melakin jalai Kampung Ulu Teru, kemari.

Nitihku iya, projek nya deka meri pemaik ngagai urung 31 buah rumah panjai sepemanjai jalai nya ti sebedau tu bepanggai ba jalai batu, lalu ari nya ulih ngangkatka tikas penyambung di menua pesisir.

Ku iya nambah, peranak menua tu udah lama napi bemacham penusah ketegal gaya jalai ke enda dibelakin, nya alai pengawa bejalaika projek tu amat dikearapka.

Berebak enggau nya, iya nyemetak madahka projek nya deka nyadi penyungkak ngagai pemansang ekonomi kandang menua, kelebih agi dalam sektor nanam sawit ke nyadi siti ari batang pengawa di kandang menua nya.

“Enti udah tembu ila, jalai tu deka ngemuntangka pemindah peranak, ngenyampatka agi logistik sereta mantu sida ngemansangka tanah diri empu enggau ngasi agi,” ku iya.

Iya mega madah, palan Kampung Ulu Teru ti semina urung dua jam pejalai ngena kerita ari Miri meri pengelebih ngagai iya ari sukut akses ngagai pasar enggau perengka guna pemun. — RBI

SARATOK, 12 April — Peranak di Tembawai Kapok, Awik narit seput lantang lebuh rumah baru ke digaga ari baruh ‘Bantuan Ehsan Kebakaran Rumah’ (BEKR) mujur tembu sereta disua enggau rasmi ba sebengkah pengerami kena Hari Lima tu tadi.

Rumah panjai enggi Tr Ason anak Sandom sebedau tu kala dituntung penusah angus dalam taun 2021, lalu enggau nya meri empas ngagai pengidup peranak ke bisi kaul.

Irauka nasit sida ke tasah nya, Perintah Sarawak nengah Komiti Mutarka Penusah Ngenyit Nengeri udah ngemendarka bantu belanja ungkup pengawa ngaga baru palan pengentap pendiau nya.

Pengawa ngaga rumah baru nya udah tembu penuh ujung bulan Mac tu tadi, seraya pengawa nyerahka rumah simbolik nya dipejalaika Opis Kereja Raya (JKR) lalu dikemataka Pemesai Pelilih Saratok, Muhammad Dino bin Amid.

Kaban Kunsil Nengeri (ADUN) Krian, YB Friday Belik, ba penerang iya meri besai terima kasih enggau pengaga ati ngagai peranak menua nya ke pengujung iya ulih ngasaika pengidup ti lantang agi pengudah nganti ngelama tu.

“Pengawa nyerah tu chukup besai reti, kelebih agi lebuh peranak menua tu bisi awak ngintu Gawai 2026 ba rumah baru sida,” ku iya seraya ngenataika pengaga ati enggau jaku selamat ngagai semua piak ke bisi kaul ngemujurka projek tu.

Ngalih hari, iya mega bisi ngulu Aum Komiti Tindakan Pelilih Menua (DAC) Saratok ti diatur ba Bilik Aum Opis Pelilih Menua Saratok.

Aum nya bechairmanka Pemesai Opis Pelilih Saratok sereta digulu Kaban Kunsil Nengeri (ADUN) N38 Kalaka, Mohamad Duri, sereta mega bala ketuai opis nengeri enggau perintah besai.

Nitih ku iya, aum nya nyadi pelasar ke beguna ngagai ejensi bejalaika pengawa baka Opis Kereja Raya, Opis Entali Ai enggau Parit (JPS), Kaunsil Pelilih Saratok (MDS), Suruhanjaya Komunikasyen enggau Multimedia Malaysia (MCMC), Perbadanan Ekonomi Digital Sarawak (SDEC) enggau Opis Pemansang Nengeri (SDO) bejalaika isu prestasi sereta mantaika isu prestasi projek nya.

“Aum tu ngemendarka pengari rayat ngulihka penerang terus ari pemesai ba renggat baruh, lalu enggau nya mantu merambu chara mutarka tetiap isu ke nyadi enggau lebih komprehensif sereta efektif,” ku iya nerang.

Iya mega ngenataika pengaga ati ngagai semua piak ti bisi kaul ngemujurka aum nya sereta bejalaika projek pemansang di pelilih menua nya. — RBI