Berambaika leka jaku “Melestarikan Seni Sarawak”, program tu ngempuruka mayuh macham program ti ngerinduka ati nyengkaum pemerindang seni, muzik asal, pemandang seni visual enggau pemerindang industri kreatif ti mantaika penyelai enggau bemacham budaya Sarawak.

Nitihka penerang pengatur, pengawa tu ukai semina ngembuan tuju deka ngerami seni enggau budaya menua tu, tang mega nyadi pelasar ke beguna dalam ngenegapka ekosistem industri kreatif nengeri tu sereta nyendiaka ruang ngagai artis mantaika penau enggau asil sida ngagai mensia mayuh.

Sepemanjai program tu, bala temuai deka bepeluang meda pengawa pemerindang seni ti ngalitka ati, ngasaika muzik asal ti narit ati sereta mansik mayuh macham pengawa pemandang seni visual enggau inovasyen kreatif ti dibantaika nengah chara interaktif.

Pengawa tu diatur ba Plaza Merdeka enggau jam operasyen berengkah ari pukul 10.00 pagi nyentuk 10.00 malam ninting hari.

Pengawa tama enda bebayar sereta dibuka ngagai semua serak pengidup.

Mensia mayuh diperansang datai begulai enggau diri sebilik sereta bala bakih dikena ngerichahka agi gaya sereta ngidupka pengerindu ngagai seni enggau budaya menua tu.

Majlis Seni Sarawak ti nyadi pengatur besai tetap bebendar ngenegapka agi pemansang seni sereta nentuka pesaka main asal Sarawak terus diintu, dikerindu sereta dipeturun ngagai rebak dudi hari. — RBI

KUALA LUMPUR, 14 April — Menteri Kereja Raya, Dato Sri Alexander Nanta Linggi nyemetak madahka penyarut geopolitik global ti majak nyadi ukai agi semina isu luar aja, tang mega meri empas terus ngagai sektor pengawa ngaga pemansang menua.

Nitihku iya, peniki rega minyak dunya udah nambahka ungkus bemacham komponen ti beguna nyengkaum minyak, bitumen, besi, semin enggau logistik, lalu enggau nya meri penekan ngagai pengawa bejalaika projek pemansang.

Berindik enggau nya, iya nyemetak madahka Opis Menteri Kereja Raya (KKR) enggau ejensi iya patut bejalaika pengawa enggau lengkas, realistik sereta bepelasarka data dalam mutarka gaya nya.

“KKR begunaka koordinasyen pelin pengawa tekala nya enggau Opis Kereja Raya (JKR), Lembaga Pembangunan Industri Pembinaan Malaysia (CIDB) enggau ejensi ke bekaul ngambika seruran matau empas rega minyak niki ngagai ungkus ngaga,” ku iya.

Iya madah munyi nya lebuh bejaku ba Gempuru Ninting Bulan KKR sehari tu tadi.

Ku iya nambah, data ke diulih ari pengawa matau nya patut dikena ngenyampatka proses ngaga pemutus, kelebih agi dalam mantu projek ke kena empas ketegal pengeruga rentayan bekal global.

Entara atur ke benung diserenih nyengkaum beratika pematut ubah bejalaika projek baka ubah ba skop pengawa, meri timpuh ngelanjar sereta ngatur baru pengawa dikena nentuka projek terus dipejalaika.

Berebak enggau nya, iya mega ngasuh semua ejensi ari baruh KKR ngemeratka pengawa proses tuntut ke lengkap, ngenyampatka pengawa ngentas sereta nentuka bayar interim enggau kepenudi enda laun enti nadai kebuah ke patut.

Atur tu ku iya nerang, beguna amat dikena nentuka arus wang kunteriktor meruan tegap kelimpah ari ngetanka penerus rentayan pengawa dalam sektor pengawa ngaga pemansang

Kelimpah ari nya, KKR deka terus ngerembaika peluang ngagai kunteriktor menua tu, kelebih agi dagang mit enggau jelan pemesai, ngambika sida enda dikelaungka napi ungkus operasyen ti majak nambah.

Dalam pengawa timpuh panjai, iya ngemeratka pengawa ngurangka sektor ngaga bepanggai ba ungkus minyak nengah chara ngena teknologi baka Sistem Begunan Berindustri (IBS), Pemodelan Maklumat Begunan (BIM), chara prefabrikasyen pengawa matau palan digital enggau optimasyen langkar.

“Setipak enggau aspirasyen Malaysia MADAN, prinsip Opis Menteri nya terang – projek rayat enda tau enda diteruska.

“Dalam gaya dunya ke enda tentu, pangku pengawa Opis Menteri iya nya nentuka krisis luar enda nyadi tating dua kali lipat ngagai rayat dalam menua tu,” ku iya. — RBI

Sri AMAN, 14 April — Tim Indu PRS Bagi Menua Simanggang mujur ngetanka gelar champian ba Pekit Futsal Indu Parti Rakyat Sarawak (PRS) Siri-6 bepekit ngerebut “Piala Dato’ Sri Doris Sophia Brodie” ti diatur enggau penuh pengelama dua hari iya nya 10 enggau 11 April 2026 di Gelanggang RPR Taman Sentosa.

Nitihka penerang Kaban Parlimen Lubok Antu Roy Angau Anak Gingkoi, pekit tu dipenyadika berengkah enggau pekit rasmi iya begulai enggau Kaban Parlimen Sri Aman Dato Sri Doris Sophia Brodie kena 10 April 2026, lalu enggau nya meransang semengat lumba enggau main ba bala pesereta.

Ku iya, pekit nya mega mandangka Tim Indu PRS Balai Ringin bulih penuduk lumur dua pengudah mandangka pemanah prestasi iya nya niki sitid penuduk enti dibandingka enggau taun sebedau tu, lalu penuduk lumur tiga diempu Tim Indu PRS Bagi Menua Senadin.

“Sepenyampau 19 tim ari semua bagi menua PRS di Sarawak nyengkaum tim Central Women’s Exco nyereta edisyen tu, lalu enggau nya ngasuh pekit tu lebih kompetitif, richah sereta beprestij,” ku penerang iya sehari tu.

Pengerami nutup pekit nya dipenyadika Datuk Malcolm Mussen Lamoh, Sekretari Besai PRS ke mega Sapit Menteri Dagang Antarabansa enggau Pemeranak Puku Sarawak, ke bisi datai ngarika Presiden PRS, Dato Sri John Sikie Tayai.

Ku iya nambah, pengawa ngatur pekit tu terang mandangka komitmen ti terus ngenegapka penyereta orang indu nengah pelasar lumba enggau main, kelimpah ari ngenegapka semengat beserakup enggau kerejasama entara kaban Indu PRS di serata Sarawak. — RBI

KAPIT, 14 April — Sebuah lori ke ngundan batu bata diripotka tepawah pengudah aksiden ba Jalai Kapit–Song, besemak enggau kandang menua Bleteh, ditu kemari.

Penusah nya ngujungka lori nya tepawah lalu nyau deka ngempang kesemua jalai besai ba kandang endur nya.

Taja pia, jalai sepiak kanan ari Kapit nuju ke Song agi ulih ditengah entukar, lalu enggau nya mantu ngurangka penyekut jalai alun.

Ngambi penerang ari tulis Ruai Brita Kapit kemari, bedau bisi penerang rasmi bekaul enggau orang ke aksiden tauka kebuah penusah nya nyadi.

Penguna jalai alun dilalau bejejimat agi lebuh nengah endur nya sereta nitihka atur piak bekuasa dikena nentuka pengelikun semua piak. — RBI

KUCHING, 14 April — Sepenyampau 45 iku peranak menua luar ditan dalam operasyen neritka atur ti dipejalaika Opis Imigresen Malaysia (JIM) Sarawak ba dua palan endur ngelingi Kuching tumu pagi tadi.

Operasyen nya betuaika Ahmad Tarmizi Kemeri lalu bela disempulang Sapit Direktor Besai (Operasyen) Lokman Effendi Ramli, begulai enggau Direktor Operasyen Haji Basri Othman enggau Ketuai Penerit Adat Yusdi Morshidi ke sama bisi ba palan nya beratika pengawa bejalaika operasyen nya.

Dalam pengawa nyerungkai nya, sekeda orang ari menua luar bejalaika pengawa enggau bebendar nguji ngelarika diri nyengkaum niki struktur begunan setengah tembu lalu ngelantak pagar zink ngelingi kandang endur ngaga.

Taja pia, pengawa nguji nya mujur tejanggal lebuh kandang menua nya abis dikelingi raban penerit adat JIM Sarawak ti bejalaika pengawa enggau jampat sereta nitihka perambu.

Operasyen tu mega ngaul penyereta pengamal media ari sekeda ejensi nyadi pemerati ba palan, lalu enggau nya ngenegapka kerejasama strategik entara Opis Imigresyen Sarawak enggau media, kelimpah ari mantaika komitmen opis nya ngagai pengawa ti terang sereta efektif dalam pengawa neritka atur.

Asil ari operasyen nya, sepenyampau 39 iku lelaki enggau enam iku indu ke beumur entara 21 ngagai 50 taun ditan ketegal bemacham penyalah imigresen nyengkaum nadai dokumen pejalai ke entas, salah guna pas enggau ngelui ari timpuh.

Semua individu ke ditan dibai ngagai depo imigresyen ngambika dipejalaika enggau silik agi nitihka atur undang-undang ke dikena. — RBI

MIRI, 14 April 2026 — Institut Pendidikan Pengajar Kampus Sarawak (IPGK Sarawak) Miri udah ngatur program penemuai akademik ngagai Sepital Miri ti nyadi ba Bilik Sibuti enggau Marudi, Blok B sepital nya, kemari.

Program tu ngaul 50 iku nembiak Program Ijazah Sarjana Muda Pengajaran (PISMP) Bimbingan enggau Kaunseling ungkup pengawa ngambi bulan Ogos 2025 ngagai Julai 2029.

Penemuai nya ngemeratka pengawa bekunsi profesyenal bekaul enggau pengawa bejalaika sesi kaunseling individu, mungkur aspek penyedar pengerai runding, prosedur nganjung ngagai servis psikiatri enggau kaunseling, kelimpah ari aplikasyen pengelandik asas, teori enggau etika dalam pengawa kaunseling enggau chara ti bestruktur sereta bepelasarka integriti.

Nengah eksposur terus dalam rampa klinikal, nembiak bisi peluang meretika chara ke bendar ba pengawa nguruska kes kelimpah ari ngangkatka kompetensi enggau penyedia diri nyadi kaunselor profesional jemah ila.

Inisiatif tu dikearapka ulih ngenegapka pemereti sereta nambahka tikas kompetensi nembiak bejalaika sesi kaunseling enggau etika, ngasi sereta bepelasarka chara ti pemadu manah.

Raban pengatur pengawa mega meri besai terima kasih ngagai Sepital Miri enggau semua orang ke bisi kaul ngemujurka program tu. — RBI

SIBU, 14 April – Sepenyampau 1,362 iku nembiak udah nerima insentif pelajar ti dikenataika Palan Servis DUN Nangka dalam timpuh empat taun ke udah, nyadika pengeran dikena nentuka mayuh agi graduet Sijil Pelajaran Malaysia (SPM) ulih nampung pelajar ngagai tikas ke tinggi agi.

Nitih ku Sapit Menteri Pelajar, Inovasyen enggau Pemansang Bakat Sarawak (Pelajar enggau Inovasyen) ke mega Kaban Kunsil Nengeri (ADUN) Nangka, Datuk Dr.Annuar Rapaee, chara tu diambi dikena ngenataika pemeri insentif ngagai nembiak ke mujur nampung pelajar ngagai palan ke tinggi, politeknik, maktab enggau matrikulasi ninting taun.

Ku iya, chara tu bebida enti dibandingka enggau chara sebedau tu ti semina meri insentif ngagai nembiak SPM ti nyulut.

Ku iya nerang, nengah chara nya, bantu ke dikenataika lebih adil sereta komprehensif dalam mantu nembiak nyikap diri nampung pelajar ngagai tikas ke tinggi agi. -RBI

KUALA LUMPUR, 14 April – Kaul diplomatik dua piak ti tegap enggau menua luar mantu Malaysia dalam ngurangka empas pengeruga rentayan bekal global ketegal krisis kuasa, pia ku Direktor Besai Kaunsil Pengelikun Menua Datuk Raja Nurshirwan Zainal Abidin.

Ku iya, pengulih nempa kaul entarabansa ke rapit ngasuh Malaysia ulih napi pemar enggau lebih efektif agi menua bukai.

Ba pekara bekaul, iya madahka penemuai Menteri Besai Australia, Anthony Albanese ke Malaysia ti diperambu kena Hari Tiga tu ila, entara ke bukai deka berandauka agenda bekaul enggau bekal minyak entara kededua menua.

Iya madah munyi nya lebuh iya nyadi temuai ba program Ruang Bicara Bernama TV berambaika leka jaku ‘Mendepani Krisis Tenaga Global: Kesiapsiagaan dan Ketahanan Negara, malam tadi.

Berebak enggau nya, Datuk Raja Nurshirwan madahka penuduk strategik Malaysia dalam rentayan pengaga barang global sereta mega kaul diplomatik ke tegap enggau pemain industri antarabansa ngemuntangka menua mutarka empas krisis kuasa global enggau lebih efektif.

Nitihku iya, pengelebih tu meri Malaysia ruang enggau peluang ngulihka pun penatai minyak alternatif enti sema gaya nya jampat nyadi.

Ambika chunto, Petroliam Nasional Bhd (PETRONAS) ti ngembuan operasyen di serata dunya ulih nguna rangkaian enggau kaul rat enggau pemain industri global ungkup tuju tu.

“Kitai bepalan ba endur ti strategik dalam rentayan ngaga barang global, nya alai kitai bisi kaul enggau pemain kunsi.

“Petronas bisi operasyen di serata dunya lalu sida ulih ngena kaul nya ngulihka minyak,” ku iya.

SARIKEI, 14 April – Penyanding Penemu ba Opis Premier Sarawak (Industri Pemakai, Komoditi enggau Pemansang Kandang Menua) ke mega, Tan Sri William Mawan Ikom, madahka Perintah Sarawak nengah Kaunsil Pemansang Delta Rajang (RADDA) udah ngungkupka agih belanja sepenyampau RM105 juta dikena bejalaika sekeda projek mega di kandang menua Pakan.

Nitihku iya, ari penyampau nya, sepenyampau RM55 juta udah dikemendarka dikena bejalaika tiga komponen projek besai dikena nyendiaka perengkaguna mensia mayuh ti amat diguna rayat ba kandang menua Pakan.

“Antara projek ke udah dikemendarka iya nya Dewan Sentral, Palan Pesta Pakan enggau Waterfront Pakan.

“Semua dokumentasyen ungkup ketiga-tiga projek nya bejalai enggau lanchar lalu diatu udah datai ba renggat kepenudi, lalu enggau nya ulih berengkah ngaga kereja ngaga dalam timpuh ke semak,” ku iya ke mega Kaban Kunsil Nengeri (ADUN) Pakan.

Tan Sri William Mawan mantaika jaku tu ngagai raban pemberita sepengudah tembu Aum RADDA ti nerangka pengatur tiga buah projek besai di Pakan.

Kelimpah ari nya ku iya, RADDA mega ngemendarka agih belanja ke agi tinggal dikena ngangkatmanah jalai alun ke udah bisi ngagai Jalai Besai R1 ba sekeda kandang endur ngelingi Pakan.

Tu nyengkaum Jalai Ulu Wuak, Jalai Nunggang, Jalai Ulu Dayu, Jalai Ulu Amut/Genega kelimpah ari projek ngemendarka lalu ngangkatmanah enggau ngeluruska tiku jalai besemak enggau SMK Pakan.

Sama bisi datai ngulu aum tu kemari iya nya Pegawai Tadbir Khas RADDA Kelana bin Kipli, Pemesai Pelilih Menua Pakan William Manggoi enggau bala kebukai. -RBI

MARUDI, 13 April — Perintah Sarawak ngungkupka urung RM80 juta dikena bejalaika 50 projek jematan di kandang menua Kunsil Nengeri (DUN) Telang Usan enggau Mulu, dalam pengawa ngenegapka agi penyambung enggau ngangkatka pengelikun peranak menua pesisir.

Nitihka ripot TVS, Sapit Premier Sarawak, Datuk Amar Douglas Uggah Embas, madahka ari penyampau nya, 28 projek dipejalaika di Telang Usan lalu 22 ke bukai di Mulu.

Ku iya nerang, ba sitak Mulu, tujuh buah jematan udah tembu, tujuh buah benung dalam proses tinda, empat buah benung digaga lalu empat buah benung ba renggat ngemanahka.

“Ungkup Telang Usan, tiga buah jematan baru benung digaga, 16 buah benung ba renggat ngemanah, sebuah benung ba renggat ngaga langkar, tiga buah benung dalam proses tinda lalu lima buah udah tembu penuh,” ku iya baka ke dipansutka TVS.

Ku iya nambah, penyampau agih belanja ungkup Telang Usan iya nya RM36,137,139, lalu Mulu nerima RM44,326,913.

Ngenang silik agi, iya madahka pengawa bejalaika projek nya mega nyengkaum pengawa nganti jalai sementara enggau jematan kayu ke suah rusak, kelebih agi maya musin pengujan, lalu ari nya ulih ngangkatka tikas pengelikun enggau perengka guna penyambung ungkup peranak menua nya.

Iya madah munyi nya rambau aum pengarang berita pengudah bejadika Pengerami Nasih Tanah Projek Jalai Miri–Marudi, Marudi–Mulu (Kuala Melinau) enggau Long Panai–Long Lama (MMMLL): Pakej 2, Fasa 1 (Kick Off Project 2) ditu, sehari tu. — RBI