MERADONG, 13 April – Kaban Kunsil Nengeri (ADUN) Meradong, Datuk Ding Kuong Hiing nyemetak madahka dikena napi pemar kemaya hari, ketuai komuniti meseti seruran ransing, proaktif, siru sereta meretika ngagai guna rayat.
Iya mega ngarapka semua Ketuai Komuniti enggau Ketuai Raban Bansa (KMKK) terus bekerejasama rat enggau perintah sereta ejensi ti bekaul dikena nentuka pengawa bejalaika polisi enggau inisiatif pemansang ulih dipejalaika enggau manah ungkup pengelantang rayat.
Iya madah munyi nya lebuh bejaku ba pengerami nyuaka setipikit chiri mangku pengawa ba Dewan Opis Pelilih Meradong, kena Hari Satu tu tadi.
Ba pengawa nya, sepenyampau 61 KMKK nerima timpuh nampung setipikit mangku pengawa sida, lalu tujuh iku agi baru dipadu dalam atur ngenegapka pengawa nyadi ketuai ba renggat baruh di pelilih tu.
Datuk Ding mega nyadaka pengandal semua sida ke dichiri nya ulih bejalaika tanggungpengawa sida enggau manah.
Ku iya, pengawa nyiri nya ukai semina meri pengangkun aja, tang pengandal ke besai ti enda tau enda ditanggung enggau penuh tanggungpengawa, pengelurus ati sereta dedikasyen ngagai komuniti lokal.
“Pangku pengawa KMKK beguna amat nyadi penyambung entara rayat enggau perintah, kelimpah ari nyadi baris mua ngenataika penerang, nyaga pengelantang komuniti sereta mantu mutarka isu ba renggat baruh,” ku iya. -RBI
