MERADONG, 13 April – Siku lelaki peranak menua tu beumur 35 taun ditan tim Pasukan Petugas Indu Opis Polis Pelilih (IPD) Meradong dalam operasyen khas “Ops Tapis” di kandang menua Bintangor, lemai kemari.

Ketuai Polis Pelilih Meradong, DSP Tansli Mering madah, pengawa ngetan nya digaga urung pukul 5.30 lemai lebuh raban polis benung bejalaika operasyen ngelaban aktiviti dadah ba pelilih nya.

Nitihku iya, saspek ke ditan udah nya dibai ngagai IPD Meradong ngambika atur ke silik agi dipejalaika.

“Asil peresa ai kemi ti dipejalaika ba Opis Bagian Tasat Jenayah Narkotik (BSJND) Pelilih Meradong tetemuka saspek positif Amphetamine enggau Methamphetamine,” ku iya.

Iya mega madah, pengawa meresa baru rikod ke udah tetemuka saspek bisi dua rikod penyalah bekaul enggau dadah.

Kes tu dipansik ari baruh Seksyen 15(1)(a) Akta Dadah Berbahaya 1952, ti nyendiaka ukum mata duit enda ngelui RM5,000 tauka jil nyentuk dua taun, enti dikenuku salah.

Tansli nyemetak madahka polis beratika penyalah dadah ba genturung pendiau enggau berat lalu enda deka belembut ba sebarang aktiviti ke bekaul.

Berindik enggau nya, mensia mayuh dipinta ngenataika penerang bekaul enggau aktiviti dadah ngagai polis, kelebih agi di pelilih Meradong.

Penerang tau dikenataika ngagai Balai Polis Bintangor nengah lumur 084-693222. -RBI

MIRI, 13 April — Perintah Sarawak tetap bebendar ngerembaika pengawa ngempu tanah Hak Adat Bansa Asal (NCR) nengah pengawa bejalaika Seksyen 18 ti ngenyampatka pengawa ngeluarka pala tanah ti entas ngagai rayat.

Sapit Premier Sarawak, Datuk Amar Douglas Uggah Embas madah, chara nya dipejalaika enggau sistematik, mungkur proses nyukat, ngazet sereta ngeluarka geran tanah NCR.

Nitihka ripot TVS, iya madahka ari baruh Seksyen 18 Kanun Tanah Sarawak, sepenyampau 7,505 lot nyengkaum ba kandang menua Marudi udah diproses, enggau 2,283 lot udah dikeluarka surat pala tanah naka ke diatu.

“Ungkup Seksyen 6, sepenyampau 63,996 hektar tanah NCR udah disukat, lalu 45,681 hektar udah digazet,” ku iya baka ke diripot TVS.

Iya madah munyi nya lebuh bejaku ba Pengerami Nasih Tanah Projek Melakin Jalai nuju Kampung Ulu Teru ditu, kemari.

Ku iya nambah, inisiatif ti benung dipejalai nya mandangka komitmen perintah nengeri nentuka tanah NCR diaku nengah undang-undang, lalu ari nya meri pengelikun ngempu ngagai komuniti Bumiputera sereta ngenegapka pemansang sosioekonomi menua pesisir. — RBI

SARIKEI, 13 April — Seminar Pengadil enggau Uji Pengeregas Pengadil ke diatur Gerempung Main Bol Sarawak (FAS) enggau kerejasama Gerempung Main Bol Bagi Menua Sarikei (PBBS) mujur diatur ba Kompleks Lumba enggau Main Sarikei, ti mungkur penyereta pengadil ari Bagi Menua Sibu enggau Kapit.

Program dua hari (11-12 April) nya ngembuan tuju deka ngenegapka pemereti ati pengadil ba Undang-undang Main kelimpah ari ngangkatka tikas pengerai tubuh sida setipak enggau guna sereta pemansang main bol moden.

Seminar nya dipejalaika Pemesai Pemansang Pengadil Nengeri Sarawak, Encik Busrah bin Eri, begulai enggau pengajar Encik Nojey Naking enggau Encik Dennis Sayeng, ti meri penerang bekaul teknikal sereta ngemeratka aspek nitihka atur main.

Nitihka penerang ari Chairman Komiti Pengadil PBBS, Encik Donny Ak Luda, pengawa milih Sarikei nyadi palan endur ngatur seminar nya bepelasarka peminta Komiti Pengadil FAS sereta meri nilai tambah ngagai pemansang pengadil ba renggat bagi menua.

Iya mega nerangka program tu ukai semina ngenegapka sukut teknikal nyadi pengadil, tang mega meri ruang ngagai ketuai baru PBBS meretika pengawa ngatur enggau ngemansangka pengadil enggau lebih komprehensif.

Sapit Presiden PBBS, Encik Kevin Jampang ke mega siku pengadil tikas nasional mega bisi bejalaika tanggungpengawa nentuka pengelanchar program nya.

Berebak enggau nya, Presiden PBBS ti kala nyadi Chairman Komiti Pengadil Sarawak (2022–2025), Cr. Hj. Khairulddin Qalam bin Daud, dalam sesi bekunsi khas ngemeratka pemesai guna integriti, disiplin enggau profesionalisme entara pengadil.

“Pengadil ke bekualiti nyadi pelasar main ke lurus sereta profesional,” ku iya nyemetak.

Sama bisi datai Mandal Presiden, Sapit Presiden enggau Kaban Exco PBBS ke bela bisi ngatur Aum Komiti Eksekutif beserimbai enggau program nya.

Pengawa ngatur seminar tu dipeda nyadi inisiatif ti seruran dipejalaika dalam ngangkatka kualiti pengadil di Sarawak, setipak enggau pengawa nentuka tetiap pekit sepemanjai musim 2026 ulih dipejalaika enggau lebih profesional, enggau integriti sereta ngagai tikas ti tinggi. -RBI

KUCHING, 12 April — Opis Menteri Industri Pemakai, Komoditi enggau Pemansang Kandang Menua Sarawak (MFICORD) majak chakah agi bejalaika pengawa ngubah sektor betanam betupi nengeri tu nengah chara moden bepelasarka mekanisasyen, automasyen enggau teknologi pintar.

Menteri iya Dato Sri Dr Stephen Rundi Utom madah, sektor betanamka padi diatu begunaka chara mekanikal penuh dipejalaika, mungkur proses nugal, nanam, meri baja ngena dron, ngetau, nyentuk ngagai proses ngering enggau proses besepadu.

Setipak enggau Strategi Pemansang Pasca COVID-19 2030 (PCDS 2030), dua buah palan betanam betupi ti tepat bepelasarka teknologi Internet of Things (IoT) udah ditumbuhka di Sibu enggau Kabuloh nyadi model referen ungkup pemansang betanam betupi moden di Sarawak.

Iya nyemetak madah, transformasyen tu ukai semina nambahka produktiviti aja, tang mega ngembuan tuju matak raban nembiak nyereta sektor betanam betupi nengah gaya kereja ti lebih moden, efisyen sereta kompetitif.

KUCHING, 12 April — Polis Pelilih Padawan minta kerejasama mensia mayuh mantu ngiga siku nembiak indu beumur 18 taun ti diripotka lenyau ba kandang menua Kampung Temenggong, Jalai Matang–Telaga Air, Kuching.

Ketuai Polis Pelilih Padawan, SUPT Mohd Irwan Hafiz bin Md Radzi madahka, piak iya nerima ripot bekaul enggau pengelenyau nya ba Balai Polis Batu Kawa urung pukul 4.55 lemai 12 April 2026.

Nitihka penerang iya, tudah dikelala enggau nama Nursofea binti Jamari, 18 taun diripotka lenyau kenyau ari 8 April 2026 pukul 12.01 tengah malam.

Kepenudi mansa dipeda ngena baju T lengan panjai (coklat) enggau seluar jeans chelum.

Berindik enggau nya, piak polis benung bejalaika pansik ke silik agi lalu pengawa ngiga tudah benung dipejalai.

Mensia mayuh ke bisi penerang bekaul enggau penusah tu dipinta datai ke mua lalu ngenataika penerang ngagai Pemesai Pemansik Balai Polis Batu Kawa, Sjn Yusman bin Jemain ba lumur 019-8866740, tauka Bilik Gerakan IPD Padawan ba lumur 082-8622 33, tauka sebarang balai polis ke besemak.

Polis mega ngelalau mensia mayuh anang ngaga sebarang spekulasyen ti tau ngeruga pansik sereta bebasaka sensitiviti sida sebilik mansa. — RBI

KUCHING, 12 April — Perintah Sarawak majak ngenegapka agenda pengelikun pemakai nengeri nengah netapka tagit deka nyapai tikas pengulih ngatika diri (SSL) beras sepenyampau 60 peratus manggai ba taun 2030.

Menteri Industri Pemakai, Komoditi enggau Pemansang Kandang Menua (MFICORD) Sarawak, Dato Sri Dr Stephen Rundi Utom madah, perintah nengeri udah ngemendarka agih belanja keterubah sepenyampau RM1 bilion ungkup pemansang renggat keterubah kandang endur betanamka padi pemesai 2,000 hektar.

Nitih ku iya, Sarawak udah ngelala urung 14,000 hektar tanah ti bisi potensial endur ngemansangka padi enggau chara besai, nyadi sebagi ari pengawa nambahka pemansut padi menua tu.

Projek tu deka dipejalaika nengah chara Reka Bentuk, Ngaga, Beoperasyen enggau Mindahka (D-POT) dikena ngenyampatka pemansang infrastruktur betanam betupi moden sereta ngangkatka pemanah pengawa bejalaika pengawa.

Iya nyemetak madahka inisiatif tu beguna dalam nentuka pengelikun bekal pemakai nengeri tu ba tikas ti meruan sereta tan napi pemar dunya.

KUCHING, 12 April — Perintah Sarawak terus ngenegapka agenda pengelikun pemakai nengeri nengah chara ‘diversifikasyen’ ekonomi betanam betupi enggau sistem bepelasarka asil dikena nentuka pengelantang sektor pemakai dalam timpuh ke panjai.

Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom madah, Sarawak diatu benung ngalih ari chara subsidi ti komprehensif ngagai sistem insentif bepelasarka input enggau output dikena nentuka tetiap puku ti diperanak meri empas terus ngagai penambah pemansut.

Iya mega nerangka pemansang kluster komoditi baka dabai, tapah, purau enggau kupi deka dikerembaika dikena ngenegapka rentayan rega betanam betupi nengeri tu sereta matak puku industri ti meri empas tinggi.

Berebak enggau nya, industri nupi jelu Sarawak majak mandangka potensial ke besai, kelebih agi enggau status nadai Penyakit Kaki enggau Mulut (FMD) ti muka peluang eksport ngagai makit antarabansa nyengkaum Singapura.

Sebedau Atur Pemansang Malaysia Lumpar Ke-13 (MPK-13), MFICORD deka ngemeratka pengawa ngurangka ungkus ngasilka nengah ekonomi pelingkar nyengkaum ngena kereban menua tu ungkup pemakai jelu tupi enggau baja biomas.

Perintah nengeri nandu baru komitmen nentuka semua ejensi gawa enggau chara bersepadu dikena nyapai juluk pengelikun pemakai Sarawak selampur enggau meruan.

MIRI, 12 April — Perintah Sarawak tetap komited ngenegapka pemansang infrastruktur menua pesisir nengah pengawa bejalaika projek ngangkatmanah jalai nuju Kampung Ulu Teru ti lama udah dianti, lalu enggau nya meri penguntung ngagai semak 4,000 iku peranak di kandang menua nya.

Pengerami nasih tanah projek nya dipenyadika Sapit Menteri Besai Sarawak ke mega Menteri Wang enggau Ekonomi Baru II sereta Menteri Infrastruktur enggau Pemansang Palan Penyangkai Kapal, Datuk Amar Douglas Uggah Embas, kelai rasmi berengkah bejalaika projek meri empas tinggi nya.

Projek ti dipejalaika Opis Kereja Raya Sarawak tu mungkur pengawa ngangkatmanah jalai tanah enggau batu ke udah bisi ngambika nyadi ‘premix’ jalai belakin, kelimpah ari pengawa ngaga ‘alignment’ baru dikena ngemanahka akses ngagai Kampung Sungai Bong, Sungai Buti enggau Ulu Teru.

Inisiatif tu dipelaba ulih meri penguntung ngagai urung 3,872 iku peranak ti ngaul 23 buah rumah panjai, sebuah sekula enggau sebuah klinik ba kandang menua nya.

Sebedau tu, gaya jalai alun ti repuk sereta suah enda ulih ditengah kelebih agi maya musin ujan udah ngeruga pemindah ninting hari peranak kelebih agi sida ti bepanggai ba pengawa betanam betupi nyadika pun penatai pemisi.

Nengah pengawa bejalaika projek tu, urung 23.4 kilometer jalai deka diangkatka ngagai standard premix, lalu enggau nya nyendiaka jalai ke likun agi, lantang sereta ulih dikena belama.

Skop projek nya mega mungkur pengawa ngaga sistem parit enggau parit, kereja melakin jalai enggau pengawa masang perabot jalai nyengkaum lampu jalai solar.

Kelimpah ari nya, enam jematan bansa RSJ enggau sebuah jematan konkrit tegap deka digaga dikena nentuka penerus jalai nya lebih efisyen.

Nengah timpuh dipejalaika pengelama 24 bulan, projek tu dikearapka ulih ngangkatka pengelikun jalai alun seraya ngerapitka kaul entara menua pesisir enggau palan mengeri ke besemak.

Perengka guna infrastruktur ke udah dikemanahka tu mega dikearapka ulih meransang penumbuh sosio-ekonomi kandang menua, lalu enggau nya ulih ngangkatka tikas pengidup peranak ba kandang menua nya.

Pengawa bejalaika projek tu mandangka komitmen Perintah Sarawak ti terus chakah agi ngemansangka infrastruktur menua pesisir nengah chara ti inklusif sereta meruan ungkup pengelantang rayat. — RBI

MIRI, 12 April — Perintah Sarawak tetap komited ngenegapka pemansang infrastruktur menua pesisir nengah pengawa bejalaika Projek Melakin Jalai Kampung Ulu Teru ti dipenyadika enggau rasmi sehari tu tadi.

Pengawa nasih tanah projek nya dipenyadika Sapit Premier Sarawak, Menteri Wang enggau Ekonomi Baru II sereta Menteri Infrastruktur enggau Pemansang Palan Penyangkai Kapal Datuk Amar Douglas Uggah Embas.

Projek ti dipejalaika Opis Kereja Raya Sarawak tu ngembuan tuju deka nganti jalai tanah enggau batu ke udah bisi diatu ti suah tekeruga kelebih agi maya musin ujan, lalu ari nya ulih ngangkatka tikas pengelikun enggau pengelantang penguna.

Skop projek tu mungkur pengawa ngangkatmanah jalai ke udah bisi sereta ngaga ‘alignment’ baru sepemanjai 23.4 kilometer nitihka standard premix.

Projek tu dipelaba dipejalaika dalam timpuh 24 bulan, ti berengkah ari 18 Disember 2025 nyentuk 17 Disember 2027.

Enti udah tembu, projek tu deka nyendiaka akses penyambung jalai ti likun, lanchar sereta efisyen agi ngagai peranak ba kandang endur ngelingi, kelimpah ari ngenegapka rentayan mobiliti menua pesisir.

Kelimpah ari nya, projek tu dipelaba meri empas ke besai ngagai pemansang sosio-ekonomi kandang menua nengah meri penguntung ngagai urung 31 buah rumah panjai, dua buah sekula enggau sebuah klinik.

Perengka guna jalai alun ke manah agi tu mega deka ngemuntangka komuniti bumai ngelakuka asil betanam betupi ngagai mengeri ke besemak enggau nadai bepenanggulka gaya hari, kelimpah ari nyendiaka jalai ke tegap agi dikena ninting hari enggau penusah ngenyit.

Pengawa bejalaika projek tu mandangka komitmen Perintah Sarawak ti terus ngerapitka seraka pemansang entara kandang mengeri enggau menua pesisir, lalu ari nya ulih ngangkatka kualiti pengidup rayat selampur. — RBI

SONG, 12 April — Projek ngaga Jematan Nyemerai Sementara ungkup Jematan Bangkit diatu bejalai enggau lanchar enggau penyulut ti meransang, lalu dipelaba ulih nyambung jalai nya ari sepiak ngagai sepiak ujung bulan tu.

Kaban Kunsil Nengeri (ADUN) Katibas, Lidam Assan madah, pengawa bejalaika projek nya beguna amat dalam ngemanahka perengka guna penyambung jalai ungkup peranak menua nya sereta nyukung pengelanchar aktiviti ninting hari ungkup komuniti.

Nitihku iya, penyulut ke dijapai naka ke diatu asil ari kerejasama semua piak nyengkaum kunteriktor ti bejalaika pengawa enggau peranak menua nya ti udah meri sukung ti enda ngetu.

Berindik enggau nya, iya nesau rayat terus meri kerejasama sereta besampi ngambika projek nya lanchar ngambika ulih tembu nitihka timpuh ke udah ditetapka.

“Kerejasama komuniti beguna amat dalam nentuka tetiap renggat pengawa ngaga bejalai enggau lanchar.

“Kitai ngarapka projek tu ulih ditembuka enggau nadai sebarang penanggul ungkup pemaik begulai,” ku iya lebuh dirandau Ruai Berita Iban sehari tu tadi.

Berebak enggau nya, iya mega ningkah jaku penyakal ti madahka pengawa bejalaika projek nya bisi kaul enggau musim pengawa bepilih.

Iya nyemetak madahka projek Jematan Bangkit dipunka pengudah Pengawa Bepilih Nengeri Sarawak 2022 lalu udah dipejalaika enggau konsisten nyentuk ke diatu enda ngira pekara politik.

“Pengawa tumu tu udah dipunka kenyau ari pengudah pengawa bepilih 2022 lalu diteruska nyentuk ke diatu.

“Tu ngayanka komitmen perintah Gabungan Parti Sarawak (GPS) terus ngemansangka infrastruktur ungkup pengelantang rayat,” ku iya nerang.

Nambahka nya, perintah GPS tetap komited ngenegapka pemansang infrastruktur menua pesisir dikena nentuka rayat ngasaika perengka guna pemun ke manah sereta likun agi.

“Projek Jematan Bangkit dikearap ulih nyadi pelasar dikena ngemanahka rentayan penyambung jalai sereta nyungkak aktiviti sosio-ekonomi peranak ba kandang menua Song enggau ngelingi nya” ku Lidam. — RBI