STAKAN, 13 April – Perintah Besai nengah Opis Menteri Transformasyen Kuasa enggau Transformasyen Ai (PETRA) sehari tu udah nyerahka dua projek selapat bah ke udah tembu penuh ngagai perintah Sarawak enggau penyampau semua RM107.2 juta.
Sapit Menteri Besai ke mega Menteri iya, Datuk Amar Haji Fadillah bin Haji Yusof madah, projek nya dipejalaika Opis Parit enggau Entali Ai (DID) lalu nyengkaum Pelan Mitigasyen Ampuh Bah Stakan (RTB) ke beungkus RM10 juta enggau RTB Sibu Fasa 3 ke beungkus RM97.20 juta.
Nitih ku iya, pengawa bejalaika RTB Stakan ngemeratka pengawa mutarka isu ampuh bah ngenyit enggau bah bemusin ba Sungai Stakan berindik ari peneras ai ba sistem parit ketegal pemansang ti jampat nyadi ba garis entara menua Kuching enggau Samarahan.
“Nengah chara injiniring ti begempung, projek tu udah mujur nambahka kapasiti ai enggau pengawa nagang ai enggau lebih efektif, lalu enggau nya meri pemaik nyaga ngagai urung 5,000 iku peranak sereta ngurangka risiko pengerusak reta tengkira,” ku iya.
Pengawa nyerahka kedua-dua projek nya diatur ba Masjid Darul Malihah, Kampung Bukit Berangan, Kota Samarahan ke bela digulu peranak menua nya.
Nerang enggau silik agi, iya madahka RTB Sibu Fasa 3 digaga dikena mutarka pemar geografi ke baruh ba mengeri Sibu, ke bepalan nanga Batang Rajang enggau Batang Igan sereta suah dituntung ai melumpa maya ujan bangat enggau fenomena ai pasang raya.
“Projek tu mega ngambi kira faktor tanah kerapa ke dikena mutarka isu tanah tusur enggau efektif agi,” ku iya.
Iya nyemetak madahka enggau penembu kedua-dua projek nya, risiko ampuh bah di kandang menua Sibu ulih dikurangka enggau nyata, lalu ari nya ulih ngenegapka pengelantang pendiau rayat sereta nentuka penerus aktiviti sosio-ekonomi kandang menua.
“Perintah besai deka terus komited nentuka pengawa bejalaika projek infrastruktur menua ti meruan, meri empas tinggi sereta tan dikena ngurangka pengerugi reta tengkira, nyaga perengka guna mensia mayuh sereta nyeliahka risiko bebadi nyawa ketegal penusah ampuh bah,” ku iya.
Ku iya nambah, inisiatif nya seriris enggau aspirasyen Malaysia MADANI dalam ngenegapka daya pengetan menua napi ubah gaya hari enggau penusah ungkup pengelantang pengidup rayat ti likun sereta lantang agi.
Ba pengawa ke sama, iya mega ngemataka pengawa nyuaka pemeri Suruhanjaya Perkhidmatan Ai Nasional (SPAN) enggau Tenaga Nasional Berhad (TNB) ke nyadi sebagi ari tanggungpengawa rama korporat sida.
SPAN udah nyuaka paip ngena ai enggau efisyen ngagai Masjid Darul Malihah, lalu TNB nengah CSR Wakalah di Sarawak meri bantu RM10,000 ngagai masjid nya.
Iya mega meri besai terima kasih ngagai Sapit Menteri Pemansang Menua Pesisir enggau Kandang Menua ti mega Kaban Parlimen Kota Samarahan, Datuk Rubiah Wang enggau Kaban Kunsil Nengeri (ADUN) N17 Stakan Datuk Hamzah Brahim ke udah meri sukung ngemujurka pengawa nya. -RBI
