KUALA LUMPUR, 29 Jun — Opis Menteri Pelajar (KPM) madahka pengawa bejalaika Polisi 90:10 ngambi pengajar menua tu di Sarawak udah manggai 89.80 peratus, nyau deka nyapai tagit polisi ti ditetapka perintah.

Pekara tu diterangka KPM dalam sesi saut lisan ba Dewan Rakyat kena Hari Tiga, 24 Jun 2026, lebuh nimbal tanya ari Kaban Parlimen Saratok Datuk Ali Anak Biju bekaul enggau polisi pemadu baru ngisi kuota pengajar di Sarawak enggau tikas pengulih dasar nya naka ke tengan taun 2026.

Dalam tanya nya, iya mega nyemetak madahka taja penyulut kuantitatif 90.80 peratus udah dirikod, tang nya begunaka disalin ngagai pengawa ngangkatka kualiti pelajar dalam kelas, kelebih agi di kandang menua ulu Sarawak ti agi betapi enggau penanggul suntuk pengajar ba subjek kritikal.

Nimbal pekara nya, Opis Menteri Pelajar nerangka kelimpah ari nyapai Polisi 90:10 di Sarawak iya nya 89.80 peratus, kesemua tikas pengambi pengajar ba semua sekula KPM di nengeri tu mega manggai 97.73 peratus, lalu enggau nya mandangka tikas penempat pengajar nya entap.

Opis Menteri mega madahka bemacham chara proaktif benung sereta udah dipejalaika dikena nentuka pengawa ngambi enggau ngengkahka pengajar kelebih agi ba sekula menua pesisir enggau kandang menua ulih dipejalaika enggau lebih teratur.

Tu nyengkaum pengawa bejalaika Surat ‘Siaran Penempatan Pegawai Perkhidmatan Pendidikan Gred DG9 Bilangan 3 Tahun 2026 bertarikh 21 Mei 2026’, ti ngemeratka guna penempat ba kandang endur ti bekaul.

Kelimpah ari nya, opis menteri mega nyendiaka projeksyen ngambi pengajar lima taun ti dikemaru ninting taun, dikena nentuka perambu ngambi pengajar baru enggau latih pengajar ulih nangkup guna ke bendar di sekula KPM, nyengkaum di Sarawak.

Perambu ngambi pengajar baru mega udah dikenataika ngagai Suruhanjaya Perkhidmatan Pendidikan (SPP) ungkup tuju nyiri, enggau perambu silik nitihka zon, iya nya Semenanjung Malaysia, Sabah enggau Sarawak, dikena nentuka chara ti lebih ditagit sereta muka peluang ngagai chalun pengajar menua tu.

Opis Menteri Pelajar berebak enggau nya, ngemeratka komitmen sida ti seruran ngemeratka pengajar ke ada di Sarawak ngambika diengkah di nengeri tu, nitihka peminta pengawa puang enggau opsyen subjek, dikena nentuka penerus pelajar ti bekualiti ba semua renggat sekula. — RBI

#RuaiBeritaiban#News|ban

#Beritalban | Ruai Berita Iban

Rinduka | Titihka | Kunsika

KUALA LUMPUR, 29 Jun — Perintah nandu baru komitmen sida ti terus ngenegapka agenda integriti, reformasyen institusyen enggau transparen pengawa merintah menua nengah mayuh macham inisiatif komprehensif, seriris enggau pengawa ngangkatka penuduk Malaysia dalam Indeks Persepsyen Makai Suap (CPI).

Pekara nya dibantaika dalam aum Tanya Lisan Dewan Rakyat kena 22 Jun 2026 (Hari Satu) lebuh Kaban Parlimen Sri Aman, Dato’ Sri Doris Sophia Anak Brodie, mantaika tanya ngagai Menteri Besai bekaul enggau singkang tegap Perintah dalam ngenegapka pengawa ngaga baru integriti enggau undang-undang menua Malaysia berindik ari penuduk Indeks Persepsyen Makai Suap (CPI) ti mengkang nyadika pengirau, nyengkaum penambah fokus ngagai kes ti beprofil tinggi.

Nimbal tanya nya, Menteri ba Opis Menteri Besai (Undang-Undang enggau Reformasyen Institusyen), Dato Sri Azalina Othman Said madahka Perintah beratika penuduk Malaysia dalam CPI enggau berat laban nya ukai semina ngayanka tikas integriti pentadbiran mensia mayuh, tang mega nyadi referen ti beguna ngagai pemeranak puku antarabansa.

Perintah udah netapka tagit deka ngengkahka Malaysia ba 25 buah menua pemadu atas dalam CPI dalam timpuh 10 taun, nengah pengawa bejalaika reformasyen komprehensif nyengkaum ngenegapka atur neritka atur, ngatur wang mensia mayuh enggau ngemanahka sistem merintah.

Berindik enggau nya, Raban Petugas Khas CPI ti bechairmanka Ketuai Sekretari Perintah udah ditumbuhka dikena merambu strategi ngangkatka penuduk menua enggau chara ti lebih ditagit.

Entara batang fokus tim tu nyengkaum ngenegapka atur neritka undang-undang, ngubah baru pengawa ngatur wang turu mensia mayuh, ngurangka ulah birokrasi, reformasyen undang-undang enggau ngenegapka komunikasyen strategik dikena nambahka pengandal mensia mayuh enggau pemeranak puku.

Perintah mega udah bejalaika sekeda inisiatif kunsi nyengkaum bejalaika Strategi Nagang Penyalah Makai Suap Nasional (NACS), ngaga ‘Akta Perolehan Kerajaan’ 2026, ubah ba ‘Akta Perlindungan Pemberi Maklumat’ 2010 enggau perambu Rang Undang-undang Bebas Penerang.

Atur tu ngembuan tuju deka ngenegapka transparen, akauntabiliti enggau efisyen sistem meri servis mensia mayuh.

Berebak enggau nya, Perintah udah ngemeratka semua pengawa mansik enggau pengawa neritka atur ba kes ti beprofil tinggi deka terus dipejalaika enggau chara ngatika diri, profesyenal sereta bepelasarka undang-undang enggau nadai sebarang pengawa masuk champur ari sebarang piak.

Chara tu beguna dikena nentuka pengandal rayat enggau komuniti antarabansa ngagai institusyen penerit atur menua enggau sistem akim terus ditegapka.

Perintah mega madahka Malaysia ngerikod penambah ba penuduk iya dalam CPI, ari penuduk lumur 57 ba taun 2024 ngagai lumur 54 ba taun 2025, ti ngayanka pemanah pengawa ngemaru reformasyen enggau pengawa merintah ti benung dipejalaika.

Pengawa tu deka terus ditegapka nengah chara selampur perintah sereta mega kerejasama mayuh bengkah piak nyengkaum sektor peribit, NGO enggau CSO dikena nentuka agenda integriti menua terus ditegapka enggau komprehensif. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUCHING, 29 Jun — Kandang endur pegung engkatak ba Taman Negara Kubah deka ditutup sementara ngagai mensia mayuh berengkah ari 15 Julai 2026 dikena meri awak ngagai pengawa ngintu.

Gerempung Opis Kampung Sarawak (SFC) nengah penerang berita madahka pengawa nutup sementara nya dipejalaika dikena nentuka pengelikun bala temuai seraya mega ngemuntangka kereja ngintu enggau lanchar.

Berindik enggau nya, mensia mayuh dilalau anang tama ngagai kandang endur pegung engkatak nya sekumbang timpuh pengawa ngintu nya dipejalaika.

SFC mega madahka sebarang pemansang bekaul enggau pengawa muka baru kandang endur nya deka dipadahka ari sesiti maya ngagai sesiti maya.

Mensia mayuh dipinta meri kerejasama sereta nitihka gerah ti udah ditetapka sekumbang timpuh penutup tu.

SFC mega minta ampun ba sebarang penusah ti nyadi sereta beterima kasih ngagai pemereti ati enggau kerejasama semua piak. – RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUCHING, 29 Jun — Sarawak udah merambu numbuhka Platform Ekonomi Borneo nyadi inisiatif strategik dikena ngenegapka kerejasama ekonomi entara Sarawak, Sabah, Kalimantan enggau Brunei, lalu enggau nya ngengkahka pelilih menua Borneo nyadi blok ekonomi ti lebih kompetitif dalam napi pemar sereta ngerebut peluang ekonomi global ti gadung.

Premier Sarawak, Datuk Patinggi Tan Sri Abang Johari Tun Openg madah, pelasar nya ngembuan penau nyadi pemangkin kerejasama entara garis entara menua ke tegap agi, kelebih agi dalam dagang karbon, kuasa tau dikena baru enggau sektor beranakka puku bepelasarka teknologi gadung.

Nitihku iya, pengawa nya begunaka kaul chakah ari komuniti dagang di serata Pulau Borneo, nyengkaum Balai Dagang enggau Industri Dayak (DCCI) enggau Balai Dagang enggau Industri Kadazan Dusun (KCCI), dikena nempa kerejasama strategik enggau kaban industri di Kalimantan enggau Brunei.

“Lebuh kitai mindah nyadi tim ti begempung, Borneo ukai semina ulih ngena potensial ekonomi gadung iya enggau optimum, tang mega ulih mansutka diri nyadi pelilih ekonomi ti lebih kompetitif ba rantau tu,” ku iya.

Iya madah munyi nya lebuh bejaku ba Pengerami Makai Lemai Gala Begulai Gawai-Kaamatan Ke-17 ke diatur ba Kompleks UNIFOR, ditu, malam kemari.

Berebak enggau nya, Abang Johari madahka Pulau Borneo ngembuan pengelebih asal ti nadai banding lebuh iya ngembuan urung 60 peratus bungkur kampung ujan tropika, lalu enggau nya nyadi siti ari stor karbon pemadu besai di dunya enggau rega strategik dalam pengawa mutarka ubah gaya hari global.

Berindik enggau nya, iya nyemetak madahka aset asal tu begunaka pengawa ngatur enggau meruan sereta disalin ngagai rega ekonomi ti ulih meri penguntung ngagai rayat sereta ngenegapka penuduk Borneo nyadi hab penumbuh baru di Asia Tenggara.

Nitihku iya, pengawa ngenegapka penegap ekonomi entara Sarawak, Sabah, Kalimantan enggau Brunei ukai semina ulih nambahka arus dagang, beranakka puku enggau pemindah teknologi, tang mega ulih ngasuh Borneo bejalaika tanggungpengawa ke besai agi dalam pengawa berunding antarabansa pasal ubah gaya hari, pemansang ke meruan sereta ekonomi gadung.

Iya andal amat chara bepelasarka kerejasama serantau deka muka batang baru dalam pemansang ekonomi Borneo ti lebih inklusif, meruan sereta tan, enggau nya ngenegapka penuduk iya nyadi seiti ari serantau strategik di serantau Asia Tenggara. – RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUCHING, 29 Jun – Semua staf baru Opis Kereja Raya (JKR) Sarawak dilalau ngemerat sereta ngemeranka DNA Opis Kereja Raya Sarawak ba tetiap pengawa dikena nempa budaya kereja ti efisyen, bepelasarka integriti sereta bepelasarka penyulut.

Direktor Kereja Raya Sarawak, Datu Dr. Cassidy anak Morris madahka, pengawa ngena nilai tu beguna dikena nentuka tetiap pengarap enggau tanggungpengawa ke diatur ulih dipejalaika enggau profesyenal sereta meri empas ngagai pengawa meri servis opis ngagai mensia mayuh.

Iya madah munyi nya lebuh ngenataika pesan beserimbai enggau Kus Induksyen Khas (KIK) Opis Kereja Raya Sarawak Siri 2/2026 ti digulu 249 iku pemesai ari mayuh bengkah skim servis.

Kenu ku iya, budaya ‘Sense of Urgency’ enggau ‘Sense of Ownership’ meseti digaga nyadi pengawa ba raban pengereja pengawa ngambika tetiap pengawa ulih dipejalaika enggau lengkas, proaktif sereta enggau asai tanggungpengawa.

“Tetiap pengawa meseti dipeda nyadi tanggungjawab ti meseti ditembuka enggau naka pemanah ngambika ulih nyapai tikas meri servis ti tinggi,” ku iya.

Berebak enggau nya, iya mega nyemetak madahka integriti meseti seruran nyadi pelasar tetiap pengawa enggau pemutus laban nya bejalaika tanggungpengawa ke berat dalam ngetanka pengandal mensia mayuh ngagai institusyen tu.

Iya mega nesau semua pengereja pengawa JKR Sarawak sama-sama ngamatka aspirasyen nempa opis nya nyadi Opis Pilih ti dikelala enggau penyulut, profesionalisme, inovasyen enggau kualiti meri servis.

“Setipak enggau semengat “JKR Sarawak – Just Keep Rising” enggau rambai jaku “We Build For You”, pengereja pengawa mega dipinta terus ngenegapka penemu diri, ngangkatka pengelandik diri sereta ngenegapka diri napi ubah enggau pemar dalam industri ngaga enggau pemansang infrastruktur,” ku iya.

KIK Siri 2/2026 mungkur penyereta 50 iku Injinir Gred J9, 54 iku Penulung Injinir Gred JA5, dua iku Pelukis Pelin Gred JA1, 31 iku Pemantu Pentadbiran (Kerani/Operasyen) Gred N1, semilan iku Pemantu Pekara Wang Gred W1 enggau 103 Penulung Servis H1.

#ruaiberitaiban#newsiban#beritaiban

Rindu | Titih | Kunsika

KUCHING, 29 Jun — Pengerami Makai Lemai enggau Pengerami Ngiling Bidai PELASAR 2026 ke diatur Gerempung Pengintu Pengelantang Pendiau Bansa Asal Engkilili, Lubok Antu enggau Skrang (PELASAR) udah diatur enggau naka pengeransing ba PCC Demak, Kuching, enggau penatai lebih 700 iku temuai ari komuniti Dayak ngelingi Kuching enggau Samarahan, kena malam Hari Enam tu tadi.

Pengerami nya dipenyadika Sapit Menteri Dagang Antarabansa, Industri enggau Pemeranak Puku Sarawak, Datuk Dr.Malcom Mussen Lamoh ke mega Kaban Kunsil Nengeri (ADUN) N.34 Batang Ai.

Ba jaku bejadika pengawa nya, iya meri tabi puji ngagai PELASAR ti seruran bebendar ngemeranka pengelantang pendiau, pelajar enggau ngenegapka penyerakup komuniti Dayak, kelebih agi ba peranak asal kandang menua Batang Ai, Batang Lemanak, Engkari, Skrang enggau Engkilili ti diau di menua luar.

Iya mega nyemetak madahka PELASAR bejalaika tanggungpengawa beguna nyadi pelasar penyerakup komuniti enda ngira penatai, kelimpah ari nyadi penyambung entara komuniti menua luar enggau pemansang ba kandang menua asal.

Berindik enggau nya, iya meransang mayuh agi individu ari kandang menua nya nyereta serakup dikena ngenegapka kaul rama enggau penyerakup.

Ba pengerami ke sama, iya mega bisi nyuaka Insentif Pelajar PELASAR ngagai 21 iku penerima entara nembiak enggau kaban gerempung nyadika peransang dalam bidang pelajar.

Setipikit tabi puji sereta terima kasih mega bisi diberi ngagai raban Exco PELASAR ungkup sesi 2024–2026 nyadika tanda pengangkun ngagai pemeri enggau servis ti bebendar sida.

Dikena nyukung penerus aktiviti gerempung nya, iya mega bisi madahka agih belanja penyampau RM20,000 ngagai PELASAR enggau RM5,000 ngagai Gerempung Gendang Pampat Kuching dikena ngintu sereta negika pesaka asal komuniti Dayak.

Ba pengerami nya mega dipadahka sepemanjai timpuh ari taun 2020 ngagai 2025, PELASAR udah ngenataika 101 bantu pengelantang enggau pemati kelimpah ari 83 insentif pelajar ngagai nembiak ari renggat Diploma nyentuk ke PhD.

Gerempung tu mega chakah mantu komuniti nengah kerejasama enggau mayuh bengkah ejensi perintah dalam mutarka isu pengelantang pendiau, penusah ngenyit, penusah angus enggau pemar rama enggau ekonomi.

Pemujur enggau penerus PELASAR mega ditegapka nengah sukung enggau embing Penaung iya, ex-Kaban Parlimen Lubok Antu Jugah Muyang, ti seruran bejalaika tanggungpengawa ngenegapka tuju, rentayan kerejasama enggau pemansang nyadi ketuai gerempung.

Pengerami tu mega dirami enggau penatai Penaung PELASAR, Datin Dorothy Sylvester Pungga, kelimpah ari sukung tegap ari mayuh bengkah gerempung komuniti Dayak nyengkaum Gerempung Graduet Dayak Sarawak (SDGA), Gerempung Alumni Dayak Universiti Malaya (PADUM), Gerempung Seni & Budaya Aka Dambai Sarawak (PEKADAS), Akademi Gerempung Dayak Iban Sarawak (ASADIA), Gerempung Ngajat Asal Iban (NGASI) enggau Gerempung ARAS.

Pengerami Makai Lemai enggau Pengerami Ngiling Bidai PELASAR 2026 ukai semina nyimpul pengerami Gawai, tang mega nyadi kelai penyerakup, kerejasama enggau komitmen terus dalam ngenegapka pengelantang pendiau, pelajar enggau pemansang komuniti Dayak senutuk enggau rambai jaku “Segulai Sejalai” – Begulai Ngeringka Komuniti. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SRI AMAN, 29 Jun — Raban Parti Pesaka Bumiputera Bersatu (PBB) dipinta terus ngenegapka semengat beserakup, sepenemu enggau komited bebendar dikena nentuka penegap politik Sarawak dijaga nyadi pelasar penyulut terus.

Sapit Premier Sarawak, Datuk Amar Douglas Uggah Embas nyemetak madahka penegap politik ke diasaika Sarawak maya tu udah ngasuh perintah ulih merambu sereta bejalaika bemacham polisi enggau projek pemansang enggau enda ngetu, kelebih agi ke meri penguntung ngagai rayat di menua pesisir.

Iya madah munyi nya lebuh bejadika Pengerami Ngiling Tikai Gawai Dayak 2026 ke diatur PBB Pampang Lingga ke nyadi kena lemai Hari Minggu tu tadi.

Nitih ku iya, semua raban PBB meseti terus ngetanka semengat bejuang, ngenegapka penyerakup sereta meri sukung ti tegap ngagai ketuai YAB Premier Sarawak, Datuk Patinggi Tan Sri Abang Johari Tun Openg, dikena nentuka agenda pemansang nengeri tu ulih diteruska ungkup pengelantang rayat.

“Penegap PBB seruran bisi dalam penyerakup, penaluk enggau sepenemu entara rayat iya.

Seagi-agi kitai beserakup sereta bediri tegap ba belakang iring Premier Sarawak, kitai deka terus ngasaika penegap politik ti nyadi pelasar pemansang enggau penyulut nengeri tu,” ku iya.

“Utai ke dijapai kitai sehari tu asil ari penyerakup enggau penegap ti ditumbuh begulai.

“Nya alai, semengat bejuang tu meseti terus dikemeran ngambika tetiap perambu pemansang perintah ulih dipejalai enggau lanchar lalu penguntung ulih diasaika semua rayat,” ku iya nambah.

Iya mega nerangka penegap politik ti dijapai Sarawak udah ngemuntangka bemacham projek pemansang ulih dipejalaika ba kandang menua Lingga, lalu ari nya ulih ngemanahka perengka guna infrastruktur, nyungkak penumbuh ekonomi enggau ngangkatka tikas pengidup komuniti menua nya.

Ba pengerami ke sama, iya mega bisi madahka pemeri RM20,000 ngagai komiti pengatur pengerami kelai terima kasih ngagai komitmen sida ngemujurka Pengerami Ngiling Tikai Gawai Dayak 2026.

Berebak enggau nya, iya ngenataika pengaga ati ngagai Kaban Kunsil Nengeri (ADUN) sitak N.28 Lingga, Dayang Noorazah Awang Sohor ke nyadi chairperson komiti pengatur, pia mega semua raban komiti ketegal dedikasyen enggau kerejasama nentuka pengawa nya bejalai enggau lanchar.

Sama bisi datai Kaban Parlimen Batang Lupar, Mohamad Shafizan Haji Kepli; Kaban Dewan Negara, Senator Susan Chemerai Anding; enggau bala ketuai PBB Pampang Lingga. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUCHING, 29 Jun — Kaul rat entara Balai Dagang enggau Industri Dayak (DCCI) enggau Balai Dagang enggau Industri Kadazandusun (KCCI) mandangka semengat bekaban, penyerakup enggau aspirasyen begulai rayat Sarawak enggau Sabah dalam ngenegapka pemansang pelilih menua Borneo.

Premier Sarawak, Datuk Patinggi Tan Sri (Dr) Abang Haji Abdul Rahman Zohari bin Tun Datuk Abang Haji Openg madah, kerejasama nya udah nyadi pelasar ti beguna dikena besilih penemu sereta ngenegapka kerejasama dalam mutarka bemacham isu ti ngaul pemerat Sarawak enggau Sabah, kelebih agi bekaul enggau pengawa bejalaika Sempekat Malaysia 1963 (MA63).

Iya madah munyi nya lebuh bejaku ba Pengerami Makai Lemai Gawai Kaamatan DCCI-KCCI Ke-17 ke diatur ba Amity Hall, Kompleks UNIFOR, ditu kemari.

“Udah tentu nengah pengawa ngaul diri baka tu, kitai ulih betukar penemu dalam napi bemacham pemar menua bepelasarka semengat enggau prinsip ke bisi dalam Sempekat Malaysia 1963 (MA63),” ku iya.

Nitih ku iya, pengawa bebendar ngetanka hak Sarawak enggau Sabah ukai reti kededua nengeri enda beterima kasih ngagai penumbuh Malaysia, tang lebih agi ngembuan juluk deka nentuka semua pekara ti dipesetuju dalam MA63 dipejalai penuh setipak enggau semengat penumbuh Malaysia.

Premier Sarawak mega nyemetak madahka Pulau Borneo ngembuan pengelebih kediri empu ke nyelai nyadi palan ke endur sekeda kampung ujan tropika ke pemadu tuai di dunya, lalu enggau nya bejalaika tanggungpengawa ke beguna nyadi stor karbon asal ke mayuh meri pangka ngagai pemanah rampa menua global.

Ba pengujung jaku iya, iya meri pengaga ati ngagai DCCI enggau KCCI laban udah mujur ngatur pengerami nya ti dipadahka nyadi pelasar beguna dalam ngerapitka kaul menyadi, kerejasama ekonomi enggau penyerakup entara komuniti dagang di Sarawak enggau Sabah. – RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

PAKAN, 28 Jun – Komuniti di kandang menua Pakan dipinta seruran sedia napi arus pemansang enggau ubah nengah chara nyikap diri enggau penemu, pengelandik sereta gaya pengidup ti setipak enggau guna kemaya hari tu.

Kaban Kunsil Nengeri (ADUN) Pakan, Tan Sri William Mawan Ikom nyemetak madahka pemansang fizikal aja enda chukup enti enda disempulang enggau ubah runding, ulah enggau penambah tikas pelajar ba raban bansa.

Kenu ku iya, tetiap individu meseti seruran bebendar nambahka penemu enggau pengelandik diri ngambika ulih ngerebut peluang ke bisi ayan ari pemansang enggau pengerembai teknologi ke deras maju.

“Pemansang ke dipejalaika kitai kemaya hari deka lebih besai reti enti komuniti mega udah nyikap diri ari sukut penemu enggau pengelandik.

“Pekara tu besai lalu patut diambi ngambika rayat enda tinggal ari arus penyulut,” ku iya.

Iya mega nyemetak madahka pengelantang enggau guna rayat seruran dikemeratka perintah.

Berindik enggau nya, tetiap penanggul ke ditapi rayat kelebih agi ti ngaul perengka guna pemun, infrastruktur, pelajar enggau pengelantang pendiau deka diberi perati sereta disusun nitihka pemerat ngambika ulih diputarka enggau chara berenggat sereta efektif.

Berebak enggau nya, iya ngelalau ketuai raban bansa enggau tuai rumah ngambika terus ngenegapka kerejasama enggau perintah dalam nentuka semua polisi enggau program pemansang ulih dipejalaika enggau lebih efisyen sereta ngasi.

Kaul rat entara ketuai, ketuai komuniti enggau rayat ku iya, beguna amat dikena nentuka tetiap agih belanja pemansang ulih diguna penuh peranak menua nya.

Ngenang sukut pelajar, iya nyemetak madahka pelajar tinggi nyadi kunchi besai dalam ngangkatka tikas pengidup nembiak rebak baru.

Iya mega meransang bala nembiak milih bidang pelajar ti ngembuan peminta tinggi ba makit kereja ngambika lebih nyikap diri napi pemar jemah ila.

Kelimpah ari nya, iya nesau bala apai indai ngambika seruran nempa kerejasama rat enggau piak sekula ba pengawa matau pemansang akademik, personaliti enggau disiplin bala anak sida.

Pemujur nembiak ku iya nerang, ukai semina bepanggai ba pengeransing bala pengajar aja, tang mega sukung ti enda ngetu ari apai indai.

Ba pengerami ke sama, iya mega bejadika Pintu Penama Rumah Mulok, Jalai Pakan–Wak ti tembu nengah agih belanja ari Program Transformasyen Menua Pesisir (RTP).

Pengawa ngaga pintu penama nya ukai semina nyadi kelai baru ungkup rumah panjai nya, tang mega mandangka komitmen perintah ngangkatka perengka guna enggau infrastruktur menua pesisir ungkup pengelantang rayat.

Iya ngarapka semua pemansang ti dipejalaika deka terus meri pemaik ngagai peranak sereta ngenegapka semengat kerejasama entara perintah enggau komuniti dalam ngemansangka kandang menua Pakan enggau komprehensif sereta meruan. – RBI

#ruaiberitaiban#newsiban#beritaiban

Rindu | Titih | Kunsika

SIBU, 28 Jun – Universiti Teknologi Sarawak (UTS) beratika enggau berat insiden mabuk pemakai ti diripotka ngaul nembiak Yayasan kemari, ti dipelabaka bepun ari pemakai ti dibekal pemekal ari luar.

Chairman Kaunsil Direktor Universiti Teknologi Sarawak, Dr.Annuar Rapaee, dalam penerang rasmi iya madahka diri balat tekenyit sereta beratika enggau berat penusah nya ti udah ngeruga pengerai nembiak ke bisi kaul.

“Aku balat tekenyit sereta beratika enggau berat penusah mabuk pemakai ti diripotka nyadi ba nembiak Yayasan kemari.

“Bepelasarka penerang keterubah, penusah nya dipelabaka bepun ari pemakai ke dibekal pemekal ari luar,” ku iya.

Nitihku iya, bisi saru penemu berindik ari penerang UTS sebedau tu ti madahka universiti nya semina nyendiaka servis perengka pengangkut aja lalu enda nanggung ungkus berubat.

“Aku mega ngambi perati sereta kesal enggau penerang ti dipansutka UTS ti madahka universiti semina nyendiaka servis perengka pengangkut aja lalu enda nanggung ungkus berubat.Penerang nya bisi potensial ngasuh komuniti saru runding,” ku iya.

Berebak enggau nya, iya madahka timbal ari Pemesai Pengerai Bagi Menua, Dr.Teh, tetemuka nembiak nadai dichaj sebarang bayar berubat ba fasiliti pengerai perintah.

“Nadai bayar dipinta berubat ba klinik enggau sepital perintah laban nembiak endang layak nerima perengka guna tu.

“Taja pia, enti berubat diulih ba fasiliti pengerai peribit, ungkus berubat ditanggung pesakit,” ku iya nerang.

Ku iya nambah, Opis Pengerai Bagi Menua deka bejalaika pansik silik dikena ngelala kebuah penusah nya nyadi sereta ngambi atur ke patut ngagai pemekal pemakai ke bisi kaul.

“Opis Pengerai deka bejalaika pansik bekaul enggau pemakai ke dipelabaka nyadi pun mabuk lalu deka ngambi atur ke patut ngagai pemekal ke betanggungjawap,” ku iya.

Iya nyemetak madahka pengelikun enggau pengelantang nembiak meseti seruran dikemeratka semua piak dikena nentuka penusah baka nya enda nyadi baru jemah ila.

Nya meh iya. – RBI

#ruaiberitaiban#newsiban#beritaiban

Rindu | Titih | Kunsika