KUCHING, 29 Jun — Pengerami Makai Lemai enggau Pengerami Ngiling Bidai PELASAR 2026 ke diatur Gerempung Pengintu Pengelantang Pendiau Bansa Asal Engkilili, Lubok Antu enggau Skrang (PELASAR) udah diatur enggau naka pengeransing ba PCC Demak, Kuching, enggau penatai lebih 700 iku temuai ari komuniti Dayak ngelingi Kuching enggau Samarahan, kena malam Hari Enam tu tadi.
Pengerami nya dipenyadika Sapit Menteri Dagang Antarabansa, Industri enggau Pemeranak Puku Sarawak, Datuk Dr.Malcom Mussen Lamoh ke mega Kaban Kunsil Nengeri (ADUN) N.34 Batang Ai.
Ba jaku bejadika pengawa nya, iya meri tabi puji ngagai PELASAR ti seruran bebendar ngemeranka pengelantang pendiau, pelajar enggau ngenegapka penyerakup komuniti Dayak, kelebih agi ba peranak asal kandang menua Batang Ai, Batang Lemanak, Engkari, Skrang enggau Engkilili ti diau di menua luar.
Iya mega nyemetak madahka PELASAR bejalaika tanggungpengawa beguna nyadi pelasar penyerakup komuniti enda ngira penatai, kelimpah ari nyadi penyambung entara komuniti menua luar enggau pemansang ba kandang menua asal.
Berindik enggau nya, iya meransang mayuh agi individu ari kandang menua nya nyereta serakup dikena ngenegapka kaul rama enggau penyerakup.
Ba pengerami ke sama, iya mega bisi nyuaka Insentif Pelajar PELASAR ngagai 21 iku penerima entara nembiak enggau kaban gerempung nyadika peransang dalam bidang pelajar.
Setipikit tabi puji sereta terima kasih mega bisi diberi ngagai raban Exco PELASAR ungkup sesi 2024–2026 nyadika tanda pengangkun ngagai pemeri enggau servis ti bebendar sida.
Dikena nyukung penerus aktiviti gerempung nya, iya mega bisi madahka agih belanja penyampau RM20,000 ngagai PELASAR enggau RM5,000 ngagai Gerempung Gendang Pampat Kuching dikena ngintu sereta negika pesaka asal komuniti Dayak.
Ba pengerami nya mega dipadahka sepemanjai timpuh ari taun 2020 ngagai 2025, PELASAR udah ngenataika 101 bantu pengelantang enggau pemati kelimpah ari 83 insentif pelajar ngagai nembiak ari renggat Diploma nyentuk ke PhD.
Gerempung tu mega chakah mantu komuniti nengah kerejasama enggau mayuh bengkah ejensi perintah dalam mutarka isu pengelantang pendiau, penusah ngenyit, penusah angus enggau pemar rama enggau ekonomi.
Pemujur enggau penerus PELASAR mega ditegapka nengah sukung enggau embing Penaung iya, ex-Kaban Parlimen Lubok Antu Jugah Muyang, ti seruran bejalaika tanggungpengawa ngenegapka tuju, rentayan kerejasama enggau pemansang nyadi ketuai gerempung.
Pengerami tu mega dirami enggau penatai Penaung PELASAR, Datin Dorothy Sylvester Pungga, kelimpah ari sukung tegap ari mayuh bengkah gerempung komuniti Dayak nyengkaum Gerempung Graduet Dayak Sarawak (SDGA), Gerempung Alumni Dayak Universiti Malaya (PADUM), Gerempung Seni & Budaya Aka Dambai Sarawak (PEKADAS), Akademi Gerempung Dayak Iban Sarawak (ASADIA), Gerempung Ngajat Asal Iban (NGASI) enggau Gerempung ARAS.
Pengerami Makai Lemai enggau Pengerami Ngiling Bidai PELASAR 2026 ukai semina nyimpul pengerami Gawai, tang mega nyadi kelai penyerakup, kerejasama enggau komitmen terus dalam ngenegapka pengelantang pendiau, pelajar enggau pemansang komuniti Dayak senutuk enggau rambai jaku “Segulai Sejalai” – Begulai Ngeringka Komuniti. — RBI
#Beritalban | Ruai Berita Iban
Rinduka | Titihka | Kunsika
