PADAWAN, 30 Jun — Polis Pelilih Padawan minta kerejasama ari mensia mayuh mantu nyidi, ngiga siku lelaki beumur 27 taun ti diripotka lenyau kenyau ari tumu pagi 28 Jun tu tadi.

Ketuai Polis Pelilih Padawan, Supt Mohd Irwan Hafiz Md Radzi, madahka Balai Polis Beratok udah nerima ripot bekaul enggau pengelenyau lelaki nya kena 29 Jun 2026, urung pukul 11.28 pagi.

Nitihka penerang iya, individu ke diripotka lenyau nya dikelala enggau nama Cajetan Anak Vincent, 27, bebansa Bidayuh.

“Orang ke lenyau nya dipelabaka kepenudi dipeda kena 28 Jun 2026, urung pukul 4.00 pagi di Kampung Kuang, Batu 21, Jalai Kuching-Serian.”

Orang ke diripotka lenyau nya nepan mutosikal Yamaha Y15ZR chura chelum ungu enggau lumur rejista QCT5240 maya nya,” ku iya nengah penerang media sehari tu.

Supt Mohd Irwan Hafiz madahka, piak polis benung gawa nyidi endur mansa lalu ngarapka mensia mayuh ke bisi sebarang penerang tau datai ke mua mantu pansik.

Ku iya, individu ke bisi penerang senentang endur tauka penunga Cajetan dipinta betelefon ngagai Pemesai Pemansik Balai Polis Beratok, Sarjan Mohamad Nayan Harun nengah lumur 011-40659077 tauka Bilik Operasyen Indu Opis Polis Pelilih (IPD) Padawan nengah lumur 082-862233.

“Sebarang penerang mega ulih dikenataika ngagai sebarang balai polis ke besemak ngambika ulih mantu ngenyampatka pengawa ngiga orang ke lenyau nya,” ku iya. — RBI

#RuaiBeritaiban#News|ban

#Beritalban | Ruai Berita Iban

Rinduka | Titihka | Kunsika

Photo — Polis Pelilih Padawan

PANTU, 30 Jun — Semengat beserakup enggau begulai entara kaban parti majak ditegapka nengah pengawa ngatur Pengerami Ngiling Tikai Gawai ke diatur SUPP Pampang Pantu enggau penuh pengerichah ba Dewan Sri Pantu, kemari.

Pengerami nya dipenyadika Sapit Menteri Pemansang Bakat Sarawak ke mega Penyanding Penemu SUPP Pampang Pantu, YB Datuk Francis Harden Hollis.

Pengawa ngatur pengerami nya sebengkah ari aktiviti ninting taun SUPP Pampang Pantu kelai meri terima kasih ngagai kaban parti ti ngintu Hari Gawai Dayak, kelimpah ari ngerapitka kaul bakih entara komuniti pupu bansa.

Ba tradisyen komuniti Dayak, Gawai Ngiling Tikai kelai nutup rasmi musim pengerami Hari Gawai sereta kelai pemungkal renggat baru pengidup, kelebih agi ba pengawa neruska pengawa ngiga belanja sereta bejalaika pengawa ninting hari.

Bejaku ba pengerami nya, Datuk Francis Harden minta semua kaban parti terus ngenegapka penyerakup sereta meri sukung ke tegap ngagai Gabungan Parti Sarawak (GPS) dikena nentuka pemenang chalun gempung nya ba semua sitak ke diperebut ba pengawa bepilih ti deka datai.

Iya nyemetak madahka penegap politik nyadi pelasar ti beguna dalam nentuka agenda pemansang ulih diteruska enggau efektif ungkup pengelantang rayat Sarawak.

Berindik enggau nya, iya mega ngingatka rayat ngambika seruran pintar mansik genap iti penerang sereta anang mudah tepejuh runding enggau individu tauka parti ti nguji mechahka raban bansa tauka ngeracun runding rayat ungkup pemerat politik ti sempit, enggau enda berundingka bemacham pemansang ti udah sereta benung diasai rayat.

Ba pengawa ke sama, Datuk Francis Harden mega bisi nyuaka chek ungkup Projek Mit Menua Pesisir (MRP) sepenyampau RM45,000 ngagai lapan buah gerempung komuniti Cina di Pelilih Pantu nyadika sukung perintah dalam mantu ngatur aktiviti komuniti enggau pemansang komuniti.

Iya mega bisi nyuaka surat chiri Ketuai Raban Bansa ngagai Liew Shan Boo, ti dipaduka nyadi Kapitan Cina Pasar Lachau.

Sama bisi datai ngerichahka pengerami nya Temenggong Leonard Libau Anol, Pemanca Lee Siang Hua, Pemanca Denneil Saweng, Penghulu Lee Thong Sen, Penghulu Kang Tai Kong, Penghulu Biju Anggat, Penghulu Chungga Regih, Kepala Pengajar SJK(C) Chung Hua Bangkong, Encik Jee Chen Fui sereta Kepala Pengajar SJK(C) Chung Hua Pantu, Encik Siet Ung Ching. — RBI

#RuaiBeritaiban#News|ban

#Beritalban | Ruai Berita Iban

Rinduka | Titihka | Kunsika

SAMARAHAN, 30 Jun — Sapit Premier Sarawak, Yang Berhormat Datuk Amar Douglas Uggah Embas, bejalaika penemuai kereja sereta meresa ngagai palan Jalai Besai Kedua (SSTR) Pakej A1-B Sarawak di Bagi Menua Samarahan dikena beratika baru pejalai pengawa bejalaika projek infrastruktur empas tinggi nengeri ti nyadi entara inisiatif strategik dalam Sarawak ngenegapka rentayan jalai enggau ngemanahka agi penyambung entara menua tebing tasik enggau menua pesisir.

Projek Pakej A1-B SSTR mungkur pengawa ngaga jalai baru empat lurung dua jalai (besapit) kerita sepemanjai 13.724 kilometer nitihka standard JKR R5, berengkah ari CH8+150 ngagai Batang Sadong.

Rambau penemuai nya, penerang projek diberi Direktor Kereja Raya Sarawak, Datu Adj. Prof. Ts. Gs. Br. PMr. QPr. Cassidy anak Morris, ti nerangka enggau silik pasal skop, status penyulut enggau pengawa bejalaika pengawa ba palan nya.

Skop projek tu nyengkaum ngaga jalai 11.8 kilometer jalai beringkat (elevated road) sepemanjai 1.9 kilometer, nyadika penyampau pemanjai penuh nya 13.724 kilometer.

Naka ke diatu, projek nya udah nyapai penyulut fizikal 2.68 peratus lalu diperambu tembu dalam bulan Ogos 2030.

Enti udah tembu ila, jalai tu deka nyadi jalai pandak strategik ti nyambung Samarahan ngagai Jematan Batang Sadong, lalu ari nya ulih ngurangka timpuh pejalai, ngangkatka pemanah rentayan pengangkut sereta meransang pemansang sosio-ekonomi ba kandang endur ngelingi.

Ba sesi ke sama, Opis Kereja Raya (JKR) Sarawak mega mantaika sekeda projek besai ari baruh rentayan Jalai Besai ‘Dual Carriageway’ Serian–Gedong–Samarahan, ke nyadi sebagi ari pelin pemansang jalai alun strategik nengeri tu.

Projek keterubah ngaul Jalai Besai Dual Carriageway Serian–Gedong–Samarahan (Pakej 1: Simpang Rayang/Munggu Kopi/Tanah Puteh/Sebemban ngagai Pelilih Gedong) enggau pemanjai 18.33 kilometer nitihka standard JKR R5.

Skop projek nya nyengkaum ngaga tiga jematan, jalai Autonomous Rapid Transit (ART), jalai basikal, koridor utiliti enggau pengawa masang lampu jalai.

Naka bulan Jun 2026, penyulut fizikal udah ngerikod 16.15 peratus ungkup Seksyen 1A enggau 9.01 peratus ungkup Seksyen 1B.

Ungkup Seksyen 2 (Isthmus Simpang Gedong ngagai Simpang Lubok Teranggas), projek sepemanjai 3.7 kilometer tu ngaul pengawa ngangkatmanah jalai ke diatu ari JKR R3 ngagai JKR R5, nyengkaum ngaga jalai besapit empat lurung, jalai ART jemah ila, jalai basikal enggau jematan baru utiliti 200 meter enggau.

Projek tu udah nyapai 16.87 peratus penyulut fizikal. Nangkanka nya, Pakej 2 (Seksyen A: Kampung Benat ngagai Kampung Lubok Samsu) mungkur pengawa ngemanahka jalai ke udah bisi sepemanjai 2.1 kilometer, ngaga jalai baru dua lurung besapit empat lurung sepemanjai 12.8 kilometer, enggau jalai spur sepemanjai 0.9 kilometer.

Projek tu agi ba renggat tumu dipejalaika enggau penyulut fizikal 0.04 peratus.

Berebak enggau nya, ungkup Pakej 2 (Seksyen B: Kampung Lubok Samsu ngagai CH24+100), skop projek nya mungkur pengawa ngangkatmanah jalai ke udah bisi sepemanjai 1.8 kilometer, ngaga jalai kerita dua lurung besapit baru empat lurung sepemanjai 6.917 kilometer, kereja melakin sereta ngintu jalai sepemanjai 1.2km, pengawa ngaga jematan konkrit tegap sepemanjai 85 meter enggau jematan layang besai 27 meter.

Projek tu mega nyendiaka jalai ART enggau jalai basikal jemah ila. Naka bulan Jun 2026, penyulut fizikal projek tu udah manggai 13.14 peratus.

Pengawa bejalaika semua projek tu ngayanka komitmen Perintah Sarawak ti terus nengah Opis Kereja Raya Sarawak dalam nyendiaka rentayan infrastruktur jalai alun ti moden, likun sereta meruan.

Iya ukai semina deka ngenegapka sistem perengka pengangkut darat nengeri tu, tang mega dikearap nyadi penyungkak besai penumbuh ekonomi, pemansang pelilih menua enggau pengelantang pendiau rayat di Bagi Menua Samarahan, Serian enggau kandang menua besemak. — RBI

#RuaiBeritaiban#News|ban

#Beritalban | Ruai Berita Iban

Rinduka | Titihka | Kunsika

KUCHING, 30 Jun – Pengawa bejalaika projek infrastruktur strategik di Sarawak baka Jalai Penyambung Sarawak-Sabah (SSLR), Jalai Besai Pan Borneo Sarawak enggau Jalai Besai Trans Borneo terus nyadi pemerat perintah dalam pengawa ngenegapka rentayan komunikasyen, nyungkak penumbuh ekonomi ulih nentuka pemansang sereta diasaika rayat di menua tu.

Berindik enggau nya, Menteri Kereja Raya, Dato Sri Alexander Nanta Linggi, sehari tu nyadi chairman aum koordinasyen beratika baru status pengawa bejalaika projek infrastruktur ari baruh kemata Opis Menteri Kereja Raya (KKR) di Sarawak.

Nitihku iya, aum nya ngembuan tuju deka nentuka tetiap projek ke benung dipejalai enggau ke deka dipunka ulih nyingkang ke mua enggau chara ke lebih teratur, efisyen sereta ngasi ngambika penguntung ulih diasaika terus rayat.

Kelimpah ari projek jalai besai, aum nya mega meri perati ngagai pengawa bejalaika kereja ngintu jalai alun, tinting enggau infrastruktur ke bekaul di serata Sarawak dikena nentuka tikas pengelikun, pengelantang enggau pengandal rentayan jalai alun seruran ba tikas ke pemadu manah.

Ku iya, pemansang infrastruktur ukai semina ngaul pengawa ngaga jalai alun aja, tang lebih agi nyadi pematak kaul entara komuniti, ngemudahka pemindah mensia mayuh, muka akses ekonomi baru, ngenegapka rentayan logistik sereta ngenyampatka pemansang di kandang mengeri, menua pesisir enggau kandang menua ulu.

Dalam aum nya, iya mega ngemeratka semua ejensi pengatur ngelengkaska koordinasyen, ngenyampatka pengawa nangkan sereta mutarka tetiap pemar pengawa enggau chara begulai ngambika tetiap isu ulih diputarka enggau chara praktikal sereta efektif.

Nitihku iya, pemesai enggau pemar geografi Sarawak begunaka perambu ti lebih bejimat, bejalaika pengawa enggau efisyen sereta kerejasama rat entara Perintah Besai, Perintah Sarawak, ejensi bejalaika pengawa enggau semua raban dikena nentuka tetiap projek ulih ditembuka nitihka perambu sereta meri empas maksimum ngagai pengelantang pendiau rayat. -RBI

#ruaiberitaiban#newsiban#beritaiban

Rindu | Titih | Kunsika

SAMARAHAN, 30 Jun — Perintah Sarawak terus ngenegapka infrastruktur bekal ai nengeri tu nengah pengawa bejalaika Projek Tangki Tikas Tinggi Samarindah ti disadang meri penguntung ngagai lebih 20,000 iku peranak di kandang menua Samarindah, lalu enggau nya ulih nambahka pengandal sistem bekal ai ba kandang endur nya.

Pengerami nasih tanah Palan Ngaga Tangki Tikas Tinggi Samarindah udah dipenyadika Menteri Perengka Guna enggau Telekomunikasyen Sarawak, Dato Sri Haji Julaihi Haji Narawi, ditu sehari tu tadi.

Dalam jaku dipansutka Kaban Kunsil Nengeri (ADUN) Stakan Datuk Hamzah Brahim meri besai terima kasih ngagai Opis Menteri Perengka Guna enggau Telekomunikasyen (MUT) Sarawak laban terus bebendar ngemujurka projek nya ti dikumbai chara strategik mutarka isu bekal ai ke udah lama ditapi peranak Samarindah.

Ku iya, Samarindah nyadi siti ari kandang endur berumah ke pemadu besai di Bagi Menua Samarahan enggau lebih 5,000 buah rumah enggau anggar penyampau tubuh lebih 20,000 iku, lalu enggau nya begunaka sistem bekal ai ke lebih efisyen, entap sereta tegap.

Nitih ku iya, peranak ukai semina betapi enggau isu pejalai ai ke baruh, tang mega ngasaika bekal ai tejanggal maya ampuh bah, lalu enggau nya ngeruga pengidup ninting hari komuniti.

“Ai endang utai ke diguna dalam pengidup. Lebuh bekal ai tejanggal tauka peneras ai baruh, nya ukai semina ngenusahka peranak bejalaika pengawa sida ninting hari, tang mega ngeruga operasyen perengka guna ke beguna baka Klinik, sekula enggau premis dagang,” ku iya.

Iya andal amat pengawa ngaga Tangki Tikas Tinggi Samarindah deka nyadi chara mutarka timpuh panjai dalam nambahka pejalai enggau penegap bekal ai, lalu enggau nya ulih nangkup guna penyampau tubuh ti majak nambah ba kandang menua nya.

Datuk Hamzah mega ngenataika pengaga ati iya ngagai semua opis menteri, opis enggau ejensi ti bisi kaul ngemujurka projek nya lalu ngarapka pengawa bejalaika iya ulih ditembuka nitihka timpuh enggau spesifikasyen ti udah ditetapka.

Berebak enggau nya, iya nyemetak madahka sukut kualiti bejalaika projek meseti seruran dikemerat lalu atur ke terit patut dipejalai ngagai sebarang kunteriktor ke enda nitihka standard enggau tanggungpengawa ke udah ditetapka, nyengkaum ngetuka kunterik enti bisi pematut.

Iya mega meri besai terima kasih ngagai Dato Sri Julaihi ti udah nyadi ketuai enggau komitmen dalam nentuka pemun rayat kelebih agi pengawa nyendiaka bekal ai beresi, arus penyambung internet enggau karan ti bekualiti meruan sereta terus nyadi batang agenda pemansang Sarawak.

Pengawa bejalaika Projek Tangki Tikas Tinggi Samarindah dikearap ulih nyadi penyungkak ngagai sistem ngagihka bekal ai ti lebih efisyen, lalu enggau nya ulih ngangkatka pengelantang enggau kualiti pengidup komuniti di kandang menua Samarindah enggau kandang endur ngelingi nya.

Sama bisi datai Sapit Menteri Perengka Guna enggau Telekomunikasyen Sarawak, Datuk Liwan Lagang, Sekretari Mendam Opis Menteri Perengka Guna enggau Telekomunikasyen Sarawak, Datu Jafri Bin Lias, Ketuai-ketuai Opis, Ketuai Raban Bansa enggau Ketuai Komuniti. — RBI

#RuaiBeritaiban#News|ban

#Beritalban | Ruai Berita Iban

Rinduka | Titihka | Kunsika

BINTULU, 30 Jun — Penerima surat pala tanah di Sarawak dikeingatka ngambika enda berumban nyual tanah ke diempu sida, tang ngena aset nya dikena mansutka penatai pemisi sereta nentuka pemerat rebak dudi hari.

Sapit Premier Sarawak, Datuk Amar Awang Tengah Ali Hasan madah, pengempu tanah patut beterima kasih ngagai pengelebih ti diberi perintah laban pala tanah nya diulih enggau enda ibuh nanggung ungkus nyukat, yuran tauka premium.

“Anang semina berundingka penguntung ke jampat lebuh nyual tanah, kelebih agi ba kandang menua Bintulu tu ke benung meda pemansang ke jampat sereta rega tanah majak niki.

“Enti diperimba, tanah tu ulih mansutka penatai pemisi belipat,” ku iya.

Iya madah munyi nya lebuh bejaku ba Pengerami Nyerahka Pala Tanah ari baruh Seksyen 18 Kanun Tanah Sarawak enggau Lisin Pengani Sementara (TOL) ungkup kandang menua Bintulu ba Auditorium BDA, Wisma Bintulu, kemari.

Nitih ku iya, perintah Sarawak tetap komited ngetanka hak ngempu tanah rayat nengah pengawa bejalaika program nyukat tanah kampung Tanah Hak Adat Bansa Asal (NCR) enggau tradisional ti deka diteruska seagi-agi bisi peminta.

“Program nyukat tanah NCR enggau kampung tradisional tu nyadi inisiatif perintah ti enda ngetu dikena nyaga pengelantang pendiau rayat,” ku iya.

Ku iya, pengawa nya mega ngembuan tuju deka nentuka mayuh agi orang bulih penetap ba pengawa ngempu tanah enggau nya nyeliahka penyarut jemah ila — RBI

#RuaiBeritaiban#News|ban

#Beritalban | Ruai Berita Iban

Rinduka | Titihka | Kunsika

MIRI, 30 Jun – Ekspo Pelajar ti ngempuruka palan pelajar tinggi, kolej enggau ejensi latih pengelandik deka nyadi batang isi Karnival Nembiak Selangau 2026 dalam pengawa ngerembaika akses ngagai pelajar, ngenegapka pengelandik teknikal sereta ngasilka raban nembiak nyikap diri betapi enggau penguji ekonomi digital.

Program ke diatur Serakup Intelektual Bansa Asal Sarawak (PERANTIS) enggau kerejasama Palan Latih Teknologi Lanjutan (ADTEC) Bintulu, Sekula Pengelandik Yahos enggau Palan Servis DUN N.59 Tamin deka diatur ba Dewan Serbaguna Selangau kena 25 Julai 2022 tu ila.

Sekretari Komunikasyen Media ungkup Karnival Nembiak Bansa Asal 2026, Jacqueline Martin, madahka ekspo pelajar nya meri peluang ngagai graduet Sijil Pelajaran Malaysia (SPM) enggau Sijil Sekolah Tinggi Malaysia (STPM) ngulihka penerang pasal jalai belajar ke lebih jauh, setipikit enggau peluang pengelandik sida, minat enggau potensial diri empu.

Nitih ku iya, karnival tu mega ngemeratka pengawa ngemansangka pengelandik digital enggau teknikal nyadika penyikap ngagai raban nembiak napi ubah rampa kereja ti majak diiri enggau teknologi, inovasyen enggau Revolusi Industri 4.0.

“Genap iku orang biak enda ngira penatai, meseti diberi awak ke sama ngerembaika potensial sida nengah pelajar enggau latih pengelandik laban kedua-dua nya nyadi pelasar penumbuh modal mensia ke bekualiti,” ku iya.

Kelimpah ari ekspo pelajar, karnival tu mega bisi nyendiaka Kus Ngaga Produk Manuk Rangkai ti dipelanja penuh Program Karnival Nembiak Selangau dikena mantaika penyereta peluang dagang dalam industri memproses pemakai.

Kus sehari nya berengkah pukul 9.00 pagi nyentuk 4.30 lemai deka ngembing penyereta ngasilka empat bengkah produk iya nya Nugget Manuk, Manuk Tempura, Chicken Fingger enggau Manuk Popcorn.

Pengawa ngambi bagi enda bebayar, seraya semua produk ke diasilka sepemanjai kus tu ulih dibai pulai penyereta pengudah latih tembu.

Penyereta dipinta ngerejista diri sebedau pukul 8.30 pagi lalu nitihka kus nya enggau penuh nyentuk ke tembu pukul 4.30 lemai, kelimpah ari enti bisi pemendar ari sekretariat.

Dikena matak pengerindu raban nembiak ba teknologi enggau industri kreatif digital, karnival nya mega bisi ngatur Pekit e-Lumba enggau Main PUBG ti diatur Sekula Pengelandik Yahos.

Pekit tu nyendiaka perais sepenyampau RM1,800, ke alai Champian mai pulai perais mata duit RM800, Lumur Dua RM400, Lumur Tiga RM200 enggau empat perais sagu ati berega RM100 siku.

Pengawa ngambi bagi enda bebayar ungkup raban nembiak ke beumur 16 taun ke atas dalam tim ke bisi empat ngagai lima iku pemain.

Tetiap penyereta semina dikemendarka ngarika siti tim lalu enda tau enda mai telefon pintar kediri empu, seraya perengkaguna internet pekit tu deka disediaka pengatur.

Ku Jacqueline, gempung ekspo pelajar, kus pengelandik enggau pekit e-lumba nyadika Karnival Nembiak Selangau 2026 nyadi pelasar pemansang nembiak ke komprehensif enggau ngemeratka pekara pelajar, pengawa dagang, pengelandik teknikal enggau nguasa teknologi digital.

Iya ngarapka mayuh agi raban nembiak ari serata Sarawak ngerebut peluang nyereta program nya dikena nambahka penemu, ngulihka pengelandik baru sereta mansik peluang pelajar enggau kereja ke bisi disediaka. – RBI

#ruaiberitaiban#newsiban#beritaiban

Rindu | Titih | Kunsika

KUALA LUMPUR, 29 Jun — Opis Menteri Pemansang Orang Indu, Ruang Bilik enggau Komuniti (KPWKM) ngemeratka komitmen sida ti terus ngenegapka sistem nyaga anak mit ba Palan Nyaga Anak Mit (TASKA) berindik ari isu salah guna, enda dikeibuhka, bakal enggau pemati anak mit ti agi diripotka.

Penerang nya diberi lebuh nyaut tanya lisan Kaban Parlimen Sri Aman, Dato’ Sri Doris Sophia Brodie ba Aum Kedua, Penggal Kelima Parlimen Kelima Belas Taun 2026 di Dewan Rakyat kena 24 Jun 2026 (Hari Tiga).

Dalam tanya iya, Kaban Parlimen Sri Aman nya minta penerang ari KPWKM senentang kebuah kes nyamah anak mit ba TASK ke agi majak nyadi, nyengkaum kes beduan di sekula, taja bemacham polisi enggau intervensyen dipejalaika.

Iya mega betanya sekalika atur matau enggau neritka atur ke diatu enda ulih bejalai enggau manah.

Nimbal pekara nya, KPWKM madahka Opis Pengintu Pengelantang Raban Bansa (JKM) megai tanggungpengawa ngerejista, ngawal enggau meresa TASKA nitihka Akta Pusat Pengintu Anak Mit 1984 [Akta 308] enggau Peraturan TASKA 2012.

Berindik enggau nya, bemacham atur ngemanah udah dipejalaika enda ngetu dikena ngenegapka aspek matau, neritka atur enggau nagang kes ti ngaul nembiak mit dalam TASKA.

Entara batang inisiatif iya nya bejalaika Garis Lalau Khas Tindakan Penerit Adat enggau Perintah Nutup TASKA enggau palan pengintu ke dipansik polis ti deka berengkah dikena dalam taun 2023.

Garis lalau tu ngemendarka atur ti lengkas sereta tegap diambi ngagai premis ti bisi kaul enggau kes salah guna, enda ibuhka tauka ti tau ngeruga nembiak mit.

Kelimpah ari nya, Garis Lalau Pengelikun Nembiak Mit ba TASKA Berejista ti udah berengkah dikena kena 1 Januari 2024 mega diberi kelala enggau pengawa ngemanahka agi sukut pengelikun, nyengkaum peminta masang ‘kamera litar tertutup’ (CCTV).

Ari sukut penerit atur, pemesai ke diberi kuasa suah agi bejalaika pengawa meresa ari maya ke maya enggau ngenyit dikena nentuka nitihka standard minimum.

Ba taun 2025, sepenyampau 190 pengawa neritka atur dirikod ti ngaul 147 TASKA ti berejista enggau 43 TASKA ti bedau berejista.

KPWKM mega ngenegapka pangku pengawa komuniti nengah Tim Nyaga Anak Mit (PPKK) enggau Tim Pengintu Pengelantang Anak Mit (PKKK) ba pengawa matau, nagang enggau ngeripot kes ba renggat komuniti lokal.

Kelimpah ari nya, Program Advokasyen Nyaga Anak Mit: ‘KASIH Kanak-Kanak’ ti diberi kelala kenyau ari taun 2024 terus dipejalaika enggau ngaul mayuh bengkah ejensi nyengkaum Opis Pengintu Pengelantang Raban Bansa (JKM), Polis Diraja Malaysia (PDRM), Opis Komunikasyen enggau Multimedia Malaysia (SKMM) sereta Opi Pemansang Orang Indu (JPW).

KPWKM mega bisi nyendiaka Talian Kasih 15999 nyadi jalai sebana 24 jam ngambika mensia mayuh ulih ngeripot sebarang kes ngayah tauka enda ibuhka anak mit enggau lengkas.

Berengkah 10 Januari 2025, semua TASKA ke berejista dipinta mandangka plak ngerejista enggau kod QR, ti ngemendarka apai indai meresa status ngerejista enggau penerang TASKA enggau lebih terang.

Taja pan bemacham inisiatif udah dipejalaika, KPWKM ngaku kebuah bukai baka tekanan emosi enggau faktor individu agi ulih nyadika kebuah penusah ke enda dikedekaka nyadi.

Berindik enggau nya, opis menteri deka terus ngangkatka pengawa ngemanah sereta ngenegapka kerejasama strategik enggau semua piak nyengkaum komuniti dikena nentuka pengelikun enggau pengelantang nembiak seruran dijaga. — RBI

#RuaiBeritaiban#News|ban

#Beritalban | Ruai Berita Iban

Rinduka | Titihka | Kunsika

GUA MUSANG, 29 Jun — Opis Pengerara Api enggau Penyah Penusah Malaysia (JBPM) udah mujur nangkap siku ular sawa ti ngembuan pemerat lebih 100 kilogram pengudah reptilia nya makai siku kambin di Kampung Batu Papan, ditu sehari tu.

Ketuai Balai Bomba enggau Penyah Penusah (BBP) Gua Musang, Muhammad Azrul Izzham Zulkifli madah, jelu nya ke ngembuan pemanjai urung 4.57 meter ditangkap lebuh iya benung dalam kandang kambin.

“Raban bomba bisi nerima kangau ngenyit pasal penusah nya urung pukul 10.33 pagi tadi, sebedau sebuah kerita bomba ke bisi empat iku raban berumban ngesah ke palan penusah nyadi.”

“Ular nya benung dalam kandang maya nya pengudah makai siku kambin lalu kami begunaka timpuh 10 minit nangkap reptilia nya,” ku iya lebuh ditelefon pengarang berita sehari tu tadi.

Ku iya, ular sawa nya udah nya diserah ngagai Opis Nyaga Jelu Siga enggau Taman Negara (Perhilitan) ngambika ulih dipejalaika enggau silik agi. — RBI

#RuaiBeritaiban#News|ban

#Beritalban | Ruai Berita Iban

Rinduka | Titihka | Kunsika

Sumber, photo — Bernama

JULAU, 29 Jun – Program Bantu MyLesen Kelas B2 Renggat Parlimen Julau terus nyadi sebengkah ari inisiatif beguna perintah dalam mantu raban B40 ngulihka lisin deriba mutosikal ke entas enggau ungkus ke mudah agi, lalu ari nya ulih ngangkatka tikas pengelikun penguna jalai alun.

Kaban Parlimen Julau, Datuk Larry Sng Wei Shien madah, program tu ukai semina ngelempungka tating belanja rayat, tang mega meri awak ngagai mayuh agi peranak menua pesisir ngembuan lisin deriba ke entas enggau enda ibuh nanggung ungkus ke besai.

Nitih ku iya, ba taun 2024, sepenyampau 1,176 iku penyereta mujur bulih lisin deriba Kelas B2 nengah Program MyLesen, lalu nyentuk ke sehari tu ungkup taun 2026, sepenyampau 885 iku penyereta udah mujur nembuka program sereta bulih lisin diri empu.

“Program MyLesen B2 nyata ngayanka komitmen perintah nentuka rayat kelebih agi raban B40 bisi akses ngagai lisin deriba ke entas enggau ungkus ke ulih ke mudah.

“Kelimpah mantu ngurangka tating belanja, iya mega meri penyedar ngagai pemesai guna nitihka undang-undang jalai alun,” ku iya.

Ku iya, pengawa bejalaika program nya majak nerima perati berindik ari pengawa neritka undang-undang ti minta orang ti ngena mutosikal ngembuan lisin deriba ti entas nyengkaum dikena ngisi minyak ba stesyen minyak.

Ku iya, ari baruh Program MyLesen B2, penyereta semina dichaj urung RM250 enti dibandingka enggau ungkus biasa ngulihka lisin ke ulih manggai entara RM750 ngagai RM800, lalu enggau nya nyadika inisiatif nya sebengkah bansa bantu ke besai meri penguntung ngagai rayat.

Berindik enggau nya, Larry nesau semua penyereta ti udah mujur bulih lisin deriba ngambika seruran nitihka undang-undang enggau atur jalai alun sereta ngemeranka budaya bejimat deriba, dikena nentuka pengelikun diri empu, pesinjir enggau penguna jalai alun ke bukai.

Iya nyemetak madahka Program MyLesen B2 ukai semina peluang ngagai rayat ngulihka lisin deriba ti entas, tang mega pengawa ti enda ngetu dipejalaika perintah dikena ngenegapka pengelikun jalai alun enggau ngangkatka pengelantang komuniti nengah akses lisin ti muntang sereta mudah agi. – RBI

#ruaiberitaiban#newsiban#beritaiban

Rindu | Titih | Kunsika