MERADONG, 28 Jun – Dua iku lelaki peranak menua tu ditan dalam dua operasyen kediri ti dipejalaika Tim Petugas Indu Opis Polis Pelilih (IPD) Meradong nengah Ops Saringan Khas Sarawak di kandang menua Bintangor, sehari tu.

Ketuai Polis Pelilh Meradong, DSP Tansli Mering madah, ba kes keterubah urung pukul 11.15 pagi, siku lelaki beumur 52 taun ditan ba tisi Jalai Pedada pengudah dipelaba bisi kaul enggau aktiviti salah guna dadah.

“Asil ari pengawa meresa nya tetemuka bungkus plastik senayau ti ngundan leka kristal dipelaba methamphetamine (syabu) ti disimpan dalam beg sandik chelum ti dikena saspek,” ku iya nengah penerang berita.

Ku iya, saspek udah nya dibai ngagai Opis Tasat Jenayah Narkotik (BSJND) Pelilih Meradong lalu peresa ai kemi tetemuka lelaki nya positif amphetamine enggau methamphetamine.

Ba kes kedua ku iya, siku agi lelaki peranak menua tu beumur 35 taun ditan urung pukul 12.55 tengahari ba kandang menua Bintangor ketegal dipelabaka bisi kaul enggau aktiviti dadah sebedau dibai ngagai IPD Meradong ngambika atur silik agi dipejalaika.

“Asil peresa ai kemi tetemuka saspek mega positif amphetamine enggau methamphetamine,” ku iya.

Nitihku DSP Tansli, pengawa meresa baru rikod ke udah tetemuka kedua-dua saspek nadai ngembuan sebarang rikod jenayah tauka penyalah bekaul enggau dadah.

Kes keterubah dipansik ari baruh Seksyen 12(3) Akta Dadah Berbahaya 1952 ketegal ngembuan dadah enggau Seksyen 15(1)(a) akta ke sama ketegal salah guna dadah, lalu kes kedua dipansik ari baruh Seksyen 15(1)(a) Akta Dadah Berbahaya 192.

Enti dikenuku salah ngereja penyalah ari baruh Seksyen 12(3), pesalah nya ulih diukum mata duit nyentuk RM100,000 tauka dijil nyentuk lima taun tauka kededua nya sekali.

Ungkup penyalah ari baruh Seksyen 15(1)(a), pesalah ulih diukum mata duit nyentuk RM5,000 tauka dijil nyentuk dua taun.

Berebak enggau nya, DSP Tansli nyemetak madahka IPD Meradong enda belembut ba sebarang aktiviti salah guna dadah lalu deka terus chakah agi bejalaika operasyen neritka atur dikena ngelaban penyalah nya.

Iya mega ngelalau mensia mayuh ngambika ngenataika sebarang penerang bekaul enggau aktiviti dadah ngagai polis nengah Balai Polis Bintangor ba lumur 084-693222 dikena mantu pengawa ngelaban penyalah nya. – RBI

#ruaiberitaiban#newsiban#beritaiban

Rindu | Titih | Kunsika

KUCHING, 28 Jun – Ketuai Pemesai Eksekutif Kaunsil Pemansang Koridor Wilayah (RECODA), Datuk Haji Ismawi Haji Ismuni, dipilih nyadi Chairman baru Angkatan Zaman Mansang (AZAM) Sarawak ungkup penggal 2026–2028 ba Aum Taun Ke-43 gerempung nya.

Pengawa bepilih iya nyadika penerus agenda transformasyen AZAM nyadi gerempung komunikasyen ti meri kuasa ngagai komuniti nengah komunikasyen tegap, ngangkatka kapasiti, pemansang bakat enggau inovasyen.

Sama ngetanka pangku pengawa sida ba renggat ketuai iya nya Mohd Arif Irwani Azahari nyadi Sapit Chairman enggau Dr.Margaret nyadi Sekretari Kehormat, seraya Datu Hii Chang Kee, Sapit Sekretari Perintah Sarawak (Operasyen), dipilih nyadi Tukang Wang Kehormat baru.

Datuk Ismawi ukai orang ke baru ba AZAM, laban iya udah mangku pengawa semak 16 taun dalam mayuh macham pangku pengawa nyadi ketuai.

Iya berengkah ngaul diri nyadi Kaban Kaunsil dalam taun 2002 sebedau mangku pengawa nyadi Tukang Wang Kehormat lalu udah nya Sapit Chairman pengelama tiga penggal beturut-turut.

Peneleba iya ke mayuh dalam pemansang pelilih menua, perambu strategik enggau ngatur organisasyen, begulai enggau pangku pengawa iya nyadi CEO RECODA, dipelabaka ulih ngenegapka agi penuduk AZAM nyadi organisasyen komunikasyen ke progresif, relevan sereta meri empas ngagai komuniti.

Dalam jaku keterubah iya nyadi chairman, Datuk Ismawi meri pengaga ati ngagai pengarap ke diberi ngagai kaban AZAM sereta besemaya deka neruska legasi penyulut gerempung nya.

“Aku berasai temegah ati nerima pengarap tu lalu meri besai terima kasih ngagai semua kaban AZAM ketegal pengarap ke diberi ngagai aku.

“Begulai enggau Kaban Kaunsil Direktor baru, kami komited ngenegapka pangku pengawa AZAM nyadi gerempung komunikasyen ti progresif, inklusif sereta meri empas. nengah komunikasyen ti relevan, inovatif sereta nambahka nilai ngagai tetiap renggat mensia mayuh,” ku iya.

Ku iya, baru iring tu iya deka ngemeratka pengawa ngenegapka ekosistem komunikasyen, ngemansangka bakat, literasyen digital, ngangkatka kapasiti, volunteer enggau ngerembaika kaul raban nembiak enggau komuniti nengah chara komunikasyen ti lebih strategik, kreatif sereta inklusif.

Nitih ku iya, AZAM mega deka terus ngenegapka chara komunikasyen ti engkeman enggau guna bemacham raban ke ditagit nyengkaum raban nembiak, komuniti, institusyen pelajar, ejensi perintah, bakih industri enggau mensia mayuh dikena nentuka tetiap program meri empas ke lebih komprehensif ngagai pemansang Sarawak.

Nengah iring baru nya, AZAM deka ngerembaika kerejasama strategik enggau ejensi perintah, institusyen pelajar, sektor industri enggau gerempung komuniti, kelimpah ari ngenegapka mayuh macham inisiatif dalam bidang komunikasyen, pemansang nyadi ketuai nembiak, literasyen digital, belajar sepemanjai umur enggau pengawa ngasilka isi komunikasyen ti bekualiti.

Berebak enggau nya, AZAM meri besai terima kasih ngagai Chairman ke dulu ari nya, Datu William Patrick Nyigor ketegal pengawa nyadi ketuai enggau pemeri iya dalam ngiring proses ngaga nama baru enggau transformasyen strategik organisasyen nya.

Sepemanjai nyadi ketuai iya, bemacham program ke ngembuan empas tinggi mujur diberi kelala nyengkaum KelakaBelia, PROGRESS, Piala Pelit Jurai Trofi Premie Sarawak, AZAM Young Souls (AYS), Kelab Toastmasters AYS, program pemansang literasyen digital sereta mega bemacham inisiatif ngangkatka kapasiti ti meri pemaik ngagai komuniti nengah raban nembiak enggau Sarawak.

Masuk taun ke-44 ditumbuhka, AZAM komited deka terus ngenegapka pangku pengawa nyadi pelasar komunikasyen ti nyambung komuniti, nempa pemereti ati sereta meri kuasa ngagai komuniti nengah komunikasyen ti efektif, pemansang penau enggau inovasyen setipak enggau aspirasyen Sarawak ungkup pemansang progresif, inklusif enggau lebih nembam agi. – RBI

#ruaiberitaiban#newsiban#beritaiban

Rindu | Titih | Kunsika

BINTULU, 28 Jun – Angkatan Zaman Mansang (AZAM) Sarawak terus mansik peluang kerejasama strategik enggau Universiti Putra Malaysia (UPM) Kampus Bintulu dalam pengawa ngenegapka pemansang bakat, nyadi ketuai nembiak enggau pemansang modal mensia dikena nyukung agenda pemansang Sarawak.

Raban AZAM betuaika Menijar Seksyen Komunikasyen Strategik, Media enggau Kaul Nembiak, Mohd Hassnal Hakim Junaidi, begulai enggau pemesai AZAM tu disambut Dr.Alvin Lim Teik Zheng, Pensyarah Kanan, UPM Kampus Bintulu, begulai enggau pemesai universiti.

Sesi naggam kaul nya muka ruang ngagai kedua-dua piak betukar penemu pasal potensial kerejasama dalam mayuh bengkah bidang, nyengkaum pemansang nyadi ketuai nembiak, komunikasyen strategik, bioteknologi, pansik, literasyen digital, pemansang komuniti enggau pemansang bakat nembiak.

Maya sesi nya, AZAM mega meri kelala tuju baru iya nyadi organisasyen komunikasyen ti ngena chara Komunikasyen Penyereta dalam meri kuasa ngagai komuniti nengah komunikasyen, ngangkatka kapasiti enggau bekunsi penemu.

AZAM mega bekunsika sekeda inisiatif besai ke diatu sereta deka dipejalaika, nyengkaum Pekit Bejurai Trofi Premier Sarawak 2026, iya nya pekit jurai entara universiti ti ngembuan tuju deka ngemansangka nembiak ti bepenemu, ngembuan pengelandik nyadi ketuai enggau komunikasyen ti tegap.

Kelimpah ari nya, AZAM mega meri kelala Kelab Toastmasters AYS, iya nya pelasar bejaku ba mua mayuh enggau pemansang nyadi ketuai ti udah mujur ngadaka mayuh raban nembiak ke chukup andal sereta diaku nyadi Kelab Terbilang ari baruh Toastmasters International.

Pelasae tu entara pengawa AZAM ti seruran dipejalaika dalam nempa bakat nembiak nengah komunikasyen, nyadi ketuai enggau belajar sepemanjai umur.

Nitih ku Mohd Hassnal Hakim Junaidi, kerejasama entara institusyen pelajar enggau gerempung pemansang beguna amat dalam ngadaka graduet ti sedia napi pemar jemah ila.

“UPM Bintulu ngembuan penegap dalam bidang pansik, bioteknologi enggau pemansang modal mensia, seraya AZAM mai peneleba dalam pemansang nembiak, komunikasyen strategik enggau pemansang kapasiti.

“Begulaika pengelandik tu ulih ngasilka mayuh agi program ti meri nilai tambah ngagai nembiak, komuniti enggau pemansang Sarawak,” ku iya.

Ku iya, AZAM ngarapka randau nya deka nyadi pemungkal bejalaika mayuh agi program ti meri empas tinggi ti ngemeratka pemansang bakat, nyadi ketuai, komunikasyen, inovasyen, volunteer enggau bekunsika penemu.

Kerejasama baka tu dipelabaka ulih ngerembaika peluang belajar di luar kelas, ngenegapka pengerembai ulah nembiak sereta ngasilka rebak baru ti ukai semina nyulut dalam akademik, tang mega ngembuan pengelandik nyadi ketuai, komunikasyen enggau bepikir kritikal ti diguna dikena ngiring jemah ila.

#ruaiberitaiban#newsiban#beritaiban

Rindu | Titih | Kunsika

JULAU, 28 Jun – Pengawa ngaga Klinik Julau, empat buah sekula baru nganti sekula repuk, Balai Bomba, projek bekal ai beresi, Jalai Mujok enggau pengawa ngerembaika bungkur internet terus nyadi batang fokus pemansang di Parlimen Julau, ku Kaban Parlimen Julau, Datuk Larry Sng Wei Shien.

Ku iya, semua projek ti meri empas tinggi tu deka terus dipejalaika dikena ngangkatka tikas pengidup rayat, taja pan gaya politik menua diatu majak mar dijangka.

Nitih ku iya, projek besai begunaka sukung enggau agih belanja ari Perintah Besai, ari nya iya deka terus mai sada nyawa enggau guna rayat Julau ngagai renggat Parlimen dikena nentuka agenda pemansang kandang menua nya ulih nyadi nyata.

“Aku komited deka terus mai pengelantang enggau penguntung ngagai rayat enda ngira spekulasyen politik.Fokus aku iya nya nentuka mayuh agi pemansang ulih dibai ngagai Julau.

“Projek besai baka ngaga Klinik Julau, empat buah sekula baru dikena nganti sekula ke udah repuk, perambu ngaga Balai Bomba ke diatu benung dalam proses ngelala palan ke engkeman, projek bekal ai beresi, ngaga Jalai Mujok ngena jalai Perintah Besai sereta ngangkatka arus internet mega sukung ngagai ari Perintah,” ku iya.

Iya madah munyi nya lebuh dikerandau pengudah ngulu Pengerami Ngiling Tikai Rumah Japar di Nanga Kemalih, kena Hari Enam tu tadi.

Ku Datuk Larry, iya milih terus nurun ke ngabas rayat laban chara tu ngasuh iya ulih meretika enggau mata diri empu nama guna enggau pemar ke ditapi peranak menua nya, kelimpah ari nentuka tetiap sada nyawa rayat didinga.

“Julau tu sitak ke besai.Nya kebuah aku seruran nurun betemu enggau rayat mendingka diri empu sebana sida sereta ngiga jalai mutarka isu ke dibantaika,” ku iya.

Iya mega madahka penyampau RM4 juta diagih ninting taun dikena bejalaika bemacham program enggau inisiatif ti meri pemaik ngagai rayat di serata sitak Parlimen Julau, kelimpah ari terus nguna pelasar parlimen dikena ngetanka lalu mantaika guna pemansang kandang menua nya.

Ba pengerami nya mega, Datuk Larry bisi nyuaka agih belanja penyampau RM80,400 ngagai lapan penerima dikena nyukung pengawa bejalaika aktiviti komuniti enggau pemansang komuniti.

Penerima agih belanja tu iya nya Komiti Pemansang enggau Pengelikun Genturung Pendiau (JKKK) (JKKK) Rumah Japar, JKKK Rumah Lanau di Sungai Paku Kemalih, JKKK Rumah Kedit di Sungai Buloh, JKKK Rumah Gasah di Nanga Kemalih, JKKK Rumah Jalang di Nanga Bayu, Rumah Dudom Kakup, JKKK Rumah Ukan di Bukit Kopi enggau Biro Indu Rumah Japar. – RBI

#ruaiberitaiban#newsiban#beritaiban

Rindu | Titih | Kunsika

ENGKILILI, 28 Jun — Program Pengerami Ngiling Tikai Gawai Dayak 2026 udah diatur enggau chukup pengeransing ba Rumah Kennedy Langkang Ulu, Engkilili pukul 10.00 pagi, lalu enggau nya ngelai pengawa nutup rasmi pengerami Gawai Dayak ti penuh enggau reti penyerakup, terima kasih enggau ngetanka pesaka budaya.

Pengerami nya dipenyadika Sapit Premier Sarawak, Datuk Amar Douglas Uggah Embas ke bisi datai ngarika ketuai Perintah Sarawak, begulai enggau Sapit Premier Sarawak, Datuk Amar Prof Dr. Dim Kui Hian.

Dalam jaku dipansutka iya, Datuk Amar Douglas Uggah Embas nyemetak madahka pemesai guna milih ketuai ti ngayanka pengulih diri nengah pengawa enggau asil ti nyata dalam bidang nya, ukai semina nengah jaku disebut aja.

“Pilih ketuai ke mandangka pengawa enggau asil ke tampak, ke mai penyulut enggau pemansang, ukai semina bejaku aja,” ku iya.

Iya madah, semua peminta ke dikenataika Tuai Rumah Kennedy Langkang Ulu dikemendarka kelai Perintah beratka guna pemansang komuniti lokal.

Berebak enggau jaku Sapit Menteri Dagang Antarabansa, Industri enggau Pemeranak Puku Sarawak Datuk Dr Malcolm Mussen Lamoh madahka, pemerat ngangkatmanah infrastruktur pemar enggau lengkas ba kandang menua Engkilili kelebih agi bekaul enggau isu bekal ai enggau jalai alun, agi begunaka perati taja pan beberapa projek dikemendarka Perintah Besai enggau Nengeri tang betapi enggau pengelaun.

Ba pengerami ke sama, iya ti ngarika Presiden Parti Rakyat Sarawak (PRS) mega meri besai terima kasih ngagai Datuk Seri Dr.John Sikie Tayai ti udah meri bantu sepenyampau RM10,000 ngagai Komiti Pemansang enggau Pengelikun Genturung Pendiau (JKKK) Rumah Kennedy Langkang Ulu.

Kelimpah ari nya, bantu belanja mega bisi dipadahka ngagai JKKK Rumah Kennedy Langkang Ulu iya nya RM30,000 ari Datuk Amar Douglas Uggah Embas enggau RM20,000 ari Datuk Amar Sim Kui Hian, ti dikearapka ulih ngenegapka pengawa bejalaika aktiviti program komuniti ungkup pengelantang pendiau peranak menua tu.

Pengerami nya diatur dalam gaya ti lantang, penuh enggau adat enggau main asal, mandangka semengat Gawai Dayak ti terus nyadi kelai penyerakup, pengelantang enggau komitmen ti enda ngetu ngagai pemansang menua pesisir di Sarawak.

Sama bisi datai ngerichahka agi pengerami nya Kaban Parlimen P.203 Lubok Antu Roy Angau Gingkoi, Kaban Parlimen P.204 Betong Dr. Richard Rapu @ Aman Anak Begri, Kaban Kunsil Nengeri (ADUN) N.33 Engkilili Johnical Dr. Rayong Ngipa enggau Kaban Dewan Negara YB Senator Susan Chemerai Anding. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SERIAN, 28 Jun — Program Malam Solidariti Makai Selamat enggau Ngiling Bidai Indu Parti Rayat Sarawak (PRS) N.30 Balai Ringin 2026 diatur enggau chukup pengerichah, nyadi pelasar ngenegapka penyerakup, bekaban enggau identiti komuniti ngelingi, ditu kemari.

Program tu digulu Yang Berhormat Presiden PRS Dato Sri John Sikie Tayai begulai enggau Datin Melia Gelen, pia mega Kaban Kunsil Nengeri (ADUN) Balai Ringin Yang Berhormat Datuk Snowdan Lawan Datuk Snowdan Lawan begulai enggau Datin Melinda Claudia Bucking.

Ketuai Indu PRS Pampang Balai Ringin, Helen Jambai ke mega Ketuai Pengatur pengerami madah, pengerami nya ukai semina pengerami makai makai aja, tang mai reti ke besai agi nyadi kelai penyerakup enggau ngerapitka kaul bakih entara komuniti.

“Pengawa tu ukai semina pengerami makai lemai aja, tang nyadi kelai penyerakup sereta peluang ngagai kitai begulai enggau semengat sepenemu sereta bekerejasama ungkup pengelantang begulai,” ku iya nengah sebengkah penerang.

Iya mega nerangka adat Ngiling Bidai ti nyadi rambai jaku program nya nandaka pengawa nutup rasmi pengerami Gawai Dayak, kelai terima kasih pengudah musin pengerami sereta penegap kaul diri sebilik dalam komuniti Iban.

“Ngiling Bidai nandaka pengawa nutup Gawai Dayak, kelai terima kasih ngagai bala Petara sereta nyadi ruang endur kitai terus ngerapitka kaul dalam komuniti,” ku iya nerang.

Kenu ku iya, pemujur ngatur program tu asil kerejasama rat ari semua piak, nyengkaum ketuai raban bansa, kaban komiti, volunteer enggau orang ke melanja.

“Pemujur sesebengkah program enda ulih dijapai enti nadai semengat kerejasama rat ari semua piak,” ku iya.

Iya mega ngenataika pengaga ati ngagai semua piak ti bisi kaul ngemujurka program nya sereta penatai bala ketuai ti angkun ngerichahka agi pengawa nya.

Berebak enggau nya, pengawa nya mega dipadahka nyadi bukti penegap enggau penyerakup raban PRS ba sitak N.30 Balai Ringin, kelimpah ari nyadi pelasar ngerapitka kaul entara ketuai enggau komuniti renggat baruh.

Dikena ngujung ke jaku pengelalu, Helen meri tabi Selamat Hari Gawai ngagai bala ke bisi datai ngena rambai jaku “Gayu Guru Gerai Nyamai, Lantang Senang Nguan Menua” ti mai reti pengelantang, pengelantang enggau penyerakup komuniti.

MIRI, 28 Jun — Sebuah rumah tetap dua ringkat ba RPR 2, Jalai Dato Permaisuri ditu angus ba penusah ke nyadi ngalih hari tu tadi.

Balai Bomba enggau Penyah Penusah (BBP) Lutong nerima kangau ngenyit urung pukul 12.17 tengah hari sebedau mindahka jentera ngagai palan penusah nyadi.

Raban bomba datai urung pukul 12.31 tengahari lalu tetemuka penusah angus nya ngaul urung 60 peratus struktur begunan ke ngembuan pemesai urung 30 x 40 kaki persegi.

Komander Operasyen tekala nya bejalaika pengawa beratika keterubah (size-up) enggau pengawa madamka api enggau agresif ngena arus hos 300 kaki enggau dua muncung ai ke disambung ngagai paip bomba ke semak.

Pengudah pengawa madamka api dipejalaika, api mujur dijaga urung pukul 12.50 tengah hari sebedau operasyen diteruska enggau pengawa ngaduka baru dikena nentuka nadai agi pun penatai api ke aktif.

Operasyen nya tembu penuh pukul 2.10 lemai sebedau semua raban pulai ngagai stesyen nya.

Sepenyampau enam iku raban bomba enggau sebuah injin Scania FRT bisi ngaul diri dalam operasyen nya.

Operasyen nya mega dibantu Polis DiRaja Malaysia (PDRM) enggau tim Bulan Sabit Merah Malaysia (BSMM).

Nadai penusah bakal diripotka nyadi ba penusah nya. Kebuah penusah angus nyadi enggau penyampau pengerugi agi benung dipansik. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUCHING, 28 Jun — Perambu mantaika adan baru ngaul penambah 17 kerusi baru Kunsil Nengeri (DUN) Sarawak dipelaba enda sempat dibantai ba Parlimen taun tu, ku Sapit Menteri Besai Datuk Amar Fadillah Yusof.

Iya madah, pekara nya patut nengah sekeda proses enggau atur ba baruh Komiti Pengawa Bepilih (SPR) nyengkaum bantai ngagai mensia mayuh sebedau ruang endur mensia mayuh mansutka bantah tauka jaku timbal.

“Nitihka penerang ari SPR, dipelabaka enda sempat dibantai taun tu laban agi bisi sekeda proses enggau atur ke patut digaga.

“Pemadu jampat sida (SPR) ulih mantai ngagai mensia mayuh dulu. Pengudah dibantai, deka bisi ruang endur mantah enggau ke bukai. Nyadi dipelaba nya semina ulih dibantai ba taun baru,” ku iya.

Iya mansutka jaku nya ngagai pemberita pengudah ngulu Pengawa Nyuaka Bantu Insentif Pelajar Nyulut SPM 2025 ba Sekula Sekondari Sains Kuching Utara, ditu sehari tu tadi.

Fadillah ke mega Mandal Presiden Kanan Parti Pesaka Bumiputera Bersatu (PBB) madah, SPR ngembuan atur kediri empu ngaul pansi enggau banchi rayat.

”Pengawa nentuka kemaya perambu deka dibantai mega bepanggai penuh ngagai baruh kuasa SPR ke nadai ulih kena kachau perintah,” ku iya.

Kena Julai taun nyin kemari, Kunsil Nengeri Sarawak udah ngemendarka Rang Undang-Undang dikena nambahka 17 kerusi baru DUN, seraya nambahka penyampau kerusi ari 82 nyadi 99, bepanggai ngagai proses ngaga adan baru SPR

Kredit sumber & photo — TVS Berita Iban

SERIAN, 28 Jun — Tradisyen Ngiling Tikai terus mengkang besai reti nyadi kelai rasmi nutup pengerami Hari Gawai entara komuniti Iban di Sarawak, kelimpah ari nyadi pelasar ngenegapka penyerakup, ngerapitka kaul ketuai, organisasyen sereta ngenegapka jentera parti ba renggat pun menua.

Menteri ba Opis Premier Sarawak, Dato Sri John Sikie Tayai madah, Pengerami Ngiling Tikai suah agi diatur ba ujung bulan Jun pengudah komuniti Iban tembu ngintu Hari Gawai sereta mulaika diri ngagai pengawa ninting hari, kelebih agi sida ke gawa di mengeri.

“Pengudah pengerami Gawai tembu, tebal agi komuniti deka mulaika diri gawa sereta neruska pengawa ninting hari sida.

“Lebuh sida bisi awak begempuru baru, program Ngiling Tikai diatur dikena ngelai pengawa nutup rasmi pengerami Gawai ungkup taun tu,” ku iya.

Iya madah munyi nya lebuh nyimpul jaku bejadika Program Malam Solidariti Makai Lemai enggau Ngiling Tikai 2026 ke diatur Indu Parti Rayat Sarawak (PRS) DUN N.30 Balai Ringin, ke diatur enggau richah ba Dewan Chung Hua Serian, enggau penatai mensia mayuh ke dipelabaka urung 1,650 iku, kemari.

Pengerami tu mega nyadi pelasar beguna dalam ngenegapka penyerakup renggat baruh sereta ngerapitka kaul entara ketuai enggau komuniti setempat, kelebih agi ba kandang menua Balai Ringin.

Ketuai Parti Indu PRS, DUN Balai Ringin, Helen Jimbai ke nyadi Chairman pengatur pengawa madah, program nya ngembuan tuju deka ngenegapka penyerakup, ngerapitka kaul sereta ngetanka pesaka asal komuniti Iban ngambika ulih ditampung ngagai rebak dudi hari.

Berebak enggau nya, Datuk Snowdan Lawan dalam jaku dipansutka iya ngenataika pengaga ati iya ngagai semua kaban PRS enggau bala ke bisi datai ketegal sukung tegap sida ngagai program nya, ti dipadahka nyadi manifestasyen penyerakup enggau penegap jentera parti ba renggat pun menua.

Iya mega meri pengaga ati ngagai Dato Sri John Sikie Tayai ke udah dichiri nyadi Presiden PRS ke baru, lalu muji jasa ketuai sebedau tu nyengkaum niang Tan Sri James Jemut Masing enggau Dato Sri Joseph Salang Gandum ke udah nempa pelasar ke tegap ngagai perjuangan parti nya.

Nitih ku iya, PRS ulih ngetanka semua 11 sitak Kunsil Nengeri (DUN) ba Pengawa Bepilih Nengeri ti deka datai nyema kesemua jentera parti terus ngenegapka penyerakup enggau kereja beraban.

Iya mega nyemetak madahka sitak Balai Ringin deka terus bepegai ba prinsip “Teguh, Tegap, Tegas & Taat (4T)” ke nyadi pelasar penegap organisasyen enggau penaluk ngagai parti.

Program tu ukai semina nyadi penutup rasmi pengerami Gawai, tang mega nyadi pelasar penyerakup komuniti, ngenegapka organisasyen PRS sereta ngetanka pesaka asal nengah pengawa ngemujurka main asal komuniti Iban di Sarawak.

Sama bisi datai ngerichahka agi program nya Kaban Parlimen Sri Aman, Dato Sri Doris Sophia Brodie; Kaban Parlimen Lubok Antu, Roy Anggau Gingkoi; enggau Sekretari Politik Menteri Besai Sarawak, Susan Clement Ingun. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SERIAN, 27 Jun — Program Malam Solidariti Makai Lemai enggau Ngiling Tikai 2026 ke diatur Raban Indu Parti Rakyat Sarawak (PRS) DUN N.30 Balai Ringin udah muju diatur enggau penuh ransing sereta richah ba Dewan Chung Hua Serian, malam tu tadi.

Pengerami ke digulu urung 1,650 iku ke datai nya nyadi pelasar beguna dalam ngenegapka penyerakup renggat baruh sereta ngerapitka kaul entara ketuai enggau komuniti ngelingi ba kandang menua Balai Ringin.

Pengerami nya dirami enggau penatai Temuai Dipebasa, Menteri ba Opis Premier Sarawak YB Dato Sri John Sikie Tayai ke mega Presiden Parti Rakyat Sarawak (PRS).

Ketuai Raban Indu PRS Balai Ringin, Helen Jimbai nyadi pengatur chairman program nya berasai gaga ati sereta madahka tuju pengerami tu diatur dikena ngenegapka penyerakup, nerenakka kaul bakih sereta ngetanka pesaka asal komuniti menua nya.

Dalam jaku dipansutka iya, Kaban Kunsil Nengeri (ADUN) Balai Ringin Datuk Snowdan Lawan ngenataika pengaga ati iya ngagai semua kaban PRS enggau bala ke bisi datai ketegal sukung tegap sida ngagai program nya ti dikumbai manifestasyen penyerakup dalam jentera parti ba renggat baruh.

Iya mega ngenataika pengaga ati ngagai YB Dato Sri John Sikie Tayai ke udah dichiri nyadi Presiden PRS ke baru, lalu ngenang pemeri ketuai ke sebedau tu, iya nya niang Tan Sri James Jemut Masing enggau Dato Sri Joseph Salang Gandum, ke udah ngenegapka pelasar perjuangan parti.

“Kitai diatu ari baruh iring Presiden baru, Presiden Ketiga lalu kitai ngintu nya enggau semengat begulai,”

“Pengerami malam tu mega sebagi ari Makai Selamat ngagai Presiden Parti PRS kitai ke baru” ku iya.

Iya mega meri pegandal PRS ulih ngetanka semua 11 sitak Kunsil Nengeri (DUN) ba Pengawa Bepilih Nengeri (PRN) ti deka datai, enggau syarat kesemua jentera parti terus ngenegapka penyerakup enggau kereja beraban.

Nitih ku iya, sitak Balai Ringin bepegai tegap ba prinsip “Teguh, Tegap, Tegas enggau Taat (4T)” ke nyadi pelasar penegap enggau penaluk gerempung ngagai parti.

“Pengering kitai bepanggai ba penyerakup. Seagi-agi kitai bepegai ba prinsip 4T, kitai tetap tegap nyadi seiti tim,”

“Kuta GPS deka terus tegap sereta kering. Enti kitai ngemeranka empat prinsip tu kita enda ulih dipechahka” ku iya.

Datuk Snowdan mega nyemetak madahka pemesai guna ngetanka budaya komuniti Dayak ngambika ulih ditampung nembiak rebak baru, kelimpah ari pengawa ti enda ngetu dikena ngangkatka maruah pesaka budaya nyadi identiti ti dipebasa.

Program Malam Solidariti Makai Lemai & Ngiling Tikai 2026 mega dipeda nyadi pelasar strategik dalam ngenegapka jentera parti sereta ngenegapka sukung renggat baruh PRS di kandang menua Balai Ringin, kelimpah ari nyadi pelasar penyerakup komuniti nengah pengawa ngemeratka budaya enggau pesaka asal.

Sama bisi datai Ketuai Indu PRS Dato Sri Doris Sophia Brodie ke mega Kaban Parlimen Sri Aman, Kaban Parlimen Lubok Antu, Roy Anggau Gingkoi, Sekretari Politik ngagai YAB Premier Sarawak, Susan Clement Ingun, Ketuai Raban Bansa enggau Ketuai Komuniti sereta perenak ari baru DUN Balai Ringin — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika