SERIAN, 10 Mei – Siku orang bakal sereta patah ba kaki kiba enggau indu kaki kiba ba penusah aksiden jalai alun di Jalai Serian-Balai Ringin.

Skuad MyAspa O Alpha dianjung ngagai endur nya pengudah nerima kangau ngenyit ari mensia mayuh bekaul enggau penusah nya.

Lebuh datai ba endur nya, raban penyelamat terus meri perubat keterubah ngagai tudah nengah bantu raban bomba sebedau iya dianjung ngagai Sepital Serian ngambika diperubat enggau silik agi.

Operasyen timbal penusah ngenyit nya dipejalaika raban Raban Penyaga Orang Periman Malaysia (APM) ari Palan Pertahanan Awam Serian.

Sepenyampau empat iku kaban ngaul diri dalam operasyen nya lalu sida nembuka pengawa sida sebedau mulaika diri ngagai PKOD Serian enggau likun.

Nitihka penerang berita ari Unit Perhubungan Awam enggau Dokumentasi Angkatan Pertahanan Awam Malaysia Serian, operasyen bejalai enggau lanchar berindik ari kerejasama semua ejensi penyelamat ti ngaul diri ba palan penusah nyadi. -RBI

#ruaiberitaiban#newsiban#beritaiban

Rindu | Titih | Kunsika

KUCHING, 10 Mei – Sarawak diatu benung chakah mansik industri aeroangkasa enggau chip semikonduktor ti dipelabaka ulih muka beribu peluang kereja baru lalu enggau nya begunaka pengereja pengawa ti bepengelandik dalam mayuh bengkah bidang strategik.

Premier Sarawak, Datuk Patinggi Tan Sri Dr Abang Johari Tu Abang Openg madah, pengerembai ekonomi nengeri ke jampat mansang diatu benung beratika penambah peluang kereja ti nyata ti begunaka pengelandik teknikal, profesyenal enggau pengereja pengawa ti bepengelandik tinggi.

“Diatu kitai meda mayuh pengawa puang di Sarawak berindik ari ekonomi nengeri majak mandangka prestasi ti majak manah.

“Kitai begunaka pengelandik dalam bidang aeroangkasa ke diatu benung dipelajar nyengkaum industri chip,” ku iya pengudah bejadika Pengerami Ngintu Hari Pengereja Pengawa Renggat Nengeri Sarawak di Palan Konvensyen Borneo di Kuching sehari tu.

Nitihku iya, dikena nangkup guna pengereja pengawa jemah ila, perintah nengeri udah ngelancharka pelasar digital “JobSarawak” ti nyendiaka data kereja maya nyata dikena mantu rayat ngiga peluang gawa nitihka sektor enggau bidang pengelandik ti diguna.

Ku iya, pelasar nya ngena chara ti lebih moden sereta komprehensif enti dibandingka enggau sistem e-ngambi orang gawa sebedau tu ti dipejalaika begulai enggau Opis Tenaga Kereja laban data ti diulih maya nya enda penuh sereta enda tentu tegap.

“JobSarawak” mega disikap ngena sistem ‘papan pemuka’ ti ngemendarka perintah enggau pengaji matau peluang kereja, peminta pengelandik enggau peminta pengereja pengawa enggau lebih teratur sereta efisyen.

Abang Johari madahka Sarawak diatu begunaka mayuh agi pengereja pengawa ti ngembuan latih pengelandik, program ngangkatka pengelandik enggau penau profesyenal nyengkaum ba renggat PhD dikena nyukung agenda pemansang nengeri manggai ba taun 2030.

Iya nyemetak madahka pemansang modal mensia siti ari batang fokus perintah nengeri dalam nentuka peranak Sarawak ulih ngisi peluang kereja ti bekualiti ti ditempa nengah transformasyen ekonomi nengeri tu.

Berebak enggau nya, iya mega muji pengawa opis menteri bekaul ari baruh iring Datuk Gerawat Gala sereta mega pengawa ngatur pelasar nya ti udah mujur ngemansangka sistem matau kereja ti lebih moden sereta ngasi.

Ku iya, pelasar “JobSarawak” ukai semina ngemuntangka rayat ngulihka penerang pengawa puang enggau minta pengawa terus, tang mega mantu perintah merambu pemansang pengereja pengawa nengeri tu enggau chara ti lebih strategik sereta fokus. -RBI

#ruaiberitaiban#newsiban#beritaiban

Ribdu | Titih | Kunsika

KUCHING, 10 Mei – Perintah Sarawak merambu deka ngambi alih sekeda agi entiti strategik ari Perintah Besai nyadi siti singkang dikena ngenegapka autonomi ekonomi enggau nguasa reta tengkira ke beguna di nengeri tu.

Premier Sarawak, Datuk Patinggi Tan Sri Dr Abang Johari Tun Abang Openg madah, pengawa nya seriris enggau agenda ngerembaika hak Sarawak ari baruh Sempekat Malaysia 1963 (MA63) enggau bejalaika Strategi Pemansang Pengudah COVID-19 2030 (PCDS 2030).

Nitihku iya, dalam timpuh enam taun ke udah, Sarawak udah ngambi sekeda singkang ke besai dikena ngenegapka ekonomi nengeri tu nyengkaum ngambi alih palan kuasa Tekat Kuasa Karan Bakun ari Perintah Besai.

Kelimpah ari nya ku iya, Sarawak mega udah ngambi alih Palan Penyangkai Kapal Bintulu, numbuhka Bank Pemansang Sarawak (DBOS), PETROS, serikat penerebai bilun AirBorneo sereta bulih syer ekuiti majoriti dalam Affin Bank.

“Ke bendar, mayuh agi ke deka diambi kitai ari Perintah Besai,” ku iya lebuh bejaku ba Gempuru Hari Pengereja Pengawa Renggat Sarawak 2026 di Palan Konvensyen Borneo Kuching sehari tu.

Urung 3,000 iku pengereja pengawa ari 34 buah gerempung gawa bisi datai ngulu gempuru nya.

Taja pia, iya enda nerang enggau silik senentang entiti strategik baru ti deka diambi perintah nengeri.

Nitih ku iya, pengawa ngulih sereta numbuhka bemacham entiti strategik dikearap ulih muka mayuh agi peluang kereja ngagai peranak Sarawak.

Berindik enggau nya, iya madahka peranak Sarawak deka diberi latih ke engkeman enggau ngemeratka kus teknikal dikena nangkup guna pengereja pengawa jemah ila.

“Berengkah ari taun tu, Perintah Sarawak bisi nyendiaka 64 bengkah program ba palan pelajar tinggi ke diempu Sarawak dikena ngadaka peranak Sarawak ke landik ba bidang sains, pekara wang enggau undang-undang baru nyengkaum undang-undang siber,” ku iya.

Ba pengerami ke sama, Abang Johari mega bejadika pelasar kereja rasmi perintah nengeri ti dikelala enggau nama Job Sarawak dikena mantu orang ngiga peluang kereja, latih pengelandik enggau setipak kereja enggau pengaji menua tu.

Inisiatif tu sebagi ari pengawa perintah ngenegapka pemansang modal mensia sereta nyendiaka mayuh agi peluang kereja, kelebih agi ba sektor strategik nengeri tu.

Sumber BERNAMA

#ruaiberitaiban#newsiban#beritaiban

Rindu | Titih Kunsika

BETONG, 10 Mei – Projek STOL-Port Bebuling ke beungkus RM248.03 juta diatu udah nyapai penyulut fizikal 100 peratus, lalu enggau nya nyadi pematak beguna dalam ngenegapka rentayan pengangkut langit menua pesisir di Sarawak.

Pemansang nya dipadahka rambau penemuai kereja Sapit Premier Sarawak ti mega Menteri Infrastruktur enggau Pemansang Palan Penyangkai Kapal Sarawak, Datuk Amar Douglas Uggah Embas ngagai palan projek dikena beratika baru pengawa bejalaika pemansang infrastruktur strategik nya.

Penerang projek ke dibantai ngagai iya nyengkaum status pengawa dipejalaika diatu, skop batang pengawa enggau pemujur projek naka 30 April 2026, ke diatu udah tembu penuh nitihka taga perambu asal.

Projek tu mungkur pengawa ngaga mayuh macham perengka guna besai nyengkaum landasan, jalai teksi, apron endur bilun sangkai, begunan terminal, sistem parit, perengka guna enggau kereja mekanikal enggau karan ke bekaul.

Penemuai nya mandangka komitmen Perintah Sarawak ti seruran bejalaika pengawa dalam nentuka pemansang infrastruktur menua pesisir dipejalaika enggau efisyen ungkup pemaik rayat, kelebih agi di kandang menua ulu.

Bebuling STOL-Port dikearap ulih bejalaika tanggungpengawa ti beguna dalam nambahka aksesibiliti perengka pengangkut langit, nyungkak aktiviti sosio-ekonomi menua tu enggau ngenegapka kaul entara menua pesisir enggau mengeri di Sarawak setipak enggau agenda pemansang pelilih menua ti meruan di nengeri tu. -RBI

#ruaiberitaiban#newsiban#beritaiban

Rindu | Titih | Kunsika

SIBU, 10 Mei – Projek demo plot padi teknologi moden pemesai lapan ekar deka dikemansang ba Rh. Unjah, Sungai Melangan nyadi pengeransing ngenegapka pengelikun pemakai sereta nambahka pemansut padi menua tu di Sarawak.

Pengawa nasih tanah projek nya udah dipenyadika Direktor Betanam Betupi Sarawak, Dominic Chunggat ti deka dipejalaika Borneo Agritech Sdn. Bhd. bekerejasama enggau sekeda kaban strategik.

Projek demo plot nya deka digaga ba tanah ke dipenggi peranak Rh. Rumah panjai Unjah lalu deka nyadi sebagi ari pansik pengelama tiga taun ti mungkur sekeda bansa padi ti bisi potensial dikemansang nengah chara komersial jemah ila.

Kelimpah ari nya, kandang endur betanamka padi deka ngena teknologi enggau infrastruktur betanam betupi ke pemadu baru ke udah dikelala engkeman dipejalaika di Sarawak dikena nambahka pengulih sereta produktiviti pengawa betanam betupi.

Pansik tu mega beguna dalam beratika potensial pemansang pengawa nanam padi bedandang besai di nengeri tu, lalu enggau nya ulih mantu pengawa perintah ngenegapka pengelikun bekal pemakai sereta ngurangka bepanggai ba import padi.

Pengawa bejalaika projek tu ngaul kerejasama entara Borneo Agritech Sdn. Bhd., Universiti Malaya, Opis Betanam Betupi Sarawak enggau komuniti peranak Rh. Unjah.

Nengah gempung pengelandik ari sektor perintah, institusyen pelajar enggau sektor peribit, dikearapka projek tu ulih meri penguntung ke besai ngagai komuniti lokal, kelebih agi dalam nambahka asil padi peranak menua nya, ke tebal agi agi betanamka padi umao ngena chara tradisional.

Sama bisi datai iya nya Direktor Urusan Borneo Agritech Sdn. Bhd.Bayang Ringkat, Ketuai Penulung Direktor Bagi Padi enggau Gandum Jafaruddin, Pemesai Betanam Betupi Bagi Menua Sibu Andrew Iling, Pemesai Nguasa Pelilih Sibu Jonathan Sambang sereta pemesai ari Opis Betanam Betupi Bagi Menua enggau Pelilih Sibu. -RBI

#ruaiberitaiban#newsiban#beritaiban

Rindu | Titih | Kunsika

SPAOH, 10 Mei — Pengerami Makai Lemai Mantar Gawai Dayak Gerempung Tuai Rumah (GTR) Rimbas Ulu Debak 2026 udah diatur richah ba Balai Mensia Mayuh Spaoh malam ensanus, mandangka semengat beserakup sereta begulai enggau komuniti pupu bansa di kandang menua nya.

Pengerami nya dipenyadika Sapit Premier Sarawak Datuk Amar Douglas Uggah Embas ke mega Menteri Wang enggau Ekonomi Baru II, Menteri Infrastruktur enggau Pemansang Palan Penyangkai Kapal sereta Kaban Kunsil Nengeri (ADUN) Bukit Saban.

Penatai bala ketuai komuniti, temuai ti dikangau sereta peranak menua nya ngerichahka agi pengerami Gawai Dayak ti nyadi kelai pengelantang, penyerakup enggau pesaka asal komuniti Dayak di Sarawak.

Nengah penerang iya, Uggah meri besai terima kasih ngagai semua komiti pengatur ketegal komitmen, kerejasama enggau dedikasyen sida dalam nentuka pengerami diatur enggau lanchar, teratur sereta penuh enggau pengeransing.

Iya mega meri besai terima kasih ngagai semua temuai enggau komuniti ke bisi datai ketegal sukung enggau semengat sepenemu ti dipandangka sepemanjai program nya.

“Sama-sama meh kitai neruska pemansang Bagi Menua Betong. Betong nuju pengelantang enggau pengelikun dalam penyelai,” ku iya.

Berebak enggau nya, Kaban Parlimen Betong, Dato Dr Richard Rapu @ Aman Begri madah, pengerami nya ukai semina nyadi pelasar dikena ngerami penatai Hari Gawai, tang mega ngemeranka pengawa ngerapitka kaul pangan diri sereta semengat beserakup entara komuniti pupu bansa di nengeri tu.

Iya mega meri tabi puji ngagai komiti pengatur pengerami laban udah mujur ngatur pengerami nya.

“Arapka semengat beserakup, sepenemu enggau ulah menyadi terus ditegapka ungkup pengelantang begulai,” ku iya.

Pengawa nya tembu enggau sampi “Gayu Guru, Gerai Nyamai” ti nyadi kelai pengelantang, pengelikun enggau penyerakup rayat Sarawak. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SARATOK, 10 Mei — Pengerami Makai Lemai Mantar Gawai Dayak Renggat Pelilih Menua Saratok 2026 udah diatur enggau richah enggau penatai beribu iku temuai ari mayuh bengkah kandang menua ba Dewan SJKC Min Syn Saratok, malam kemari.

Pengerami ke diatur begulai SDNU enggau SIDS Saratok nerima sambut ke chukup meransang lebuh 115 buah mija diisi temuai ari serata Saratok enggau kandang menua besemak nyengkaum Sibu, Pakan, Julau, Sarikei, Roban enggau Betong.

Kaban Kunsil Nengeri (ADUN) Krian, Friday Belik madah, pengawa ke berambaika leka jaku “Segulai Sejalai Nuju Pemansang” ukai semina nyadi kelai pengerami nyerumba Hari Gawai, tang mega nyadi pelasar beguna dalam ngenegapka penyerakup, semengat begulai enggau pengelantang komuniti Dayak.

Dalam jaku bejadika pengerami nya, iya ngemeratka lima batang pekara ti patut diambi nyadika lalau beserimbai enggau pengerami Hari Gawai taun tu.

Kenu ku iya, komuniti meseti seruran meretika sereta belajar ari pemujur ke udah dijapai ba taun ke udah, kelimpah meri terima kasih ngagai Tuhan atas semua pemujur enggau berekat ke diulih.

Iya mega netapka pengerami Gawai nyadi pelasar pemadu manah dikena mantaika pesaka budaya, pekayan asal sereta dikena nerenakka semengat bekerejasama entara komuniti.

“Pengerami tu mega patut nyadi ruang dikena ngenegapka penyerakup, kerejasama enggau semengat bebasa dalam raban bansa ti mayuh macham,” ku iya.

Berebak enggau nya, iya nesau komuniti ngambika terus nambahka komitmen enggau pengepuh dalam napi pemar ekonomi dunya enggau chara ti positif, kreatif sereta tan.

Pengerami nya mega diias enggau pekit final Pekit Kumang Gawai Saratok 2026 ke alai lima finalis mandangka pekayan asal diri nyadi pengerami pengerami nya.

Berebak enggau nya, Friday mega ngenataika pengaga ati enggau pengaga ati ngagai SDNU enggau SIDS Saratok laban udah mujur ngatur pengawa nya enggau lanchar sereta enggau naka pengeransing.

Sama bisi datai Chairman SDNU Saratok, Encik Jeti Kumpai Endawie; Chairman SIDS Saratok ke mega Chairman Gawai 2026, Puan Sita Ingka; Prof Dato Dr Spencer Empading enggau bini iya; Chairman SDNU Sibu ke mega Sapit Presiden Kanan SDNU Nasional, Chambai Lindong; Penguasa Tanah enggau Survei Bagi Menua Betong, TPr. Morris Nayup; Pemesai Pentadbiran Pelilih Mit Roban, Encik Steve Miller; Pemanca Thomas Lamit; Ketuai raban bansa enggau ketuai komuniti (KMKK), kaunselor. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Friday Belik Official

SARIKEI, 10 Mei — Pengerami Mantar Gawai Dayak 2026 ke diatur Gerempung Tuai Rumah (GTR) Bagi Menua Sarikei nyadi pelasar ke tegap dalam ngenegapka penyerakup komuniti sereta ngetanka pesaka main asal Dayak sebedau pengerami Hari Gawai ke deka datai.

Kaban Parlimen Sarikei, Dato Sri Huang Tiong Sii madah, pengerami nya ukai semina pengawa asal dikena nyambut musim pengerami, tang mai reti ke besai agi dalam nerenakka semengat begulai sereta bebasaka pangan diri entara komuniti pupu bansa enggau rebak baru.

Kenu ku iya, pengerami Gawai nyadi kelai meri terima kasih ngagai asil ketau kelimpah ari nyadi pelasar dikena ngenegapka identiti enggau pesaka asal komuniti Dayak.

“Pengerami tu diatur kelai nyambut pengerami Gawai ti deka datai ungkup komuniti Dayak.

“Iya ukai semina ngingatka pengawa ngetau, tang mega nyadi ruang endur kitai ngemeratka pesaka sereta nerenakka rega penyerakup dalam komuniti,” ku iya lebuh bejadika Pengerami Makai Lemai Beserimbai enggau Pengerami Mantar Gawai Dayak 2026 kena Hari Lima tu tadi.

Iya mega nyemetak madahka raban nembiak megai tanggungpengawa ti beguna dalam nentuka budaya enggau adat asal komuniti Dayak terus dijaga sereta ditampung rebak dudi hari.

Ku iya, raban nembiak rebak baru ukai semina patut temegah ati enggau identiti sereta pesaka aki ini sida, tang mega patut mansang ke mua nyadi penyaga enggau pelasar penerus budaya komuniti.

Berebak enggau nya, iya mega meri besai terima kasih ngagai semua piak ke udah meri bantu sereta ngemujurka pengawa nya nyengkaum bala temuai ke bisi datai ngerichahka agi pengerami nya.

Iya mega ngena awak nya meri Selamat Hari Gawai ngagai selampur komuniti Dayak enggau pengarap pengerami tu deka mai penyenang, pengerai enggau pengelantang ngagai semua ruang bilik.

“Selamat Hari Gawai, Gayu Guru Gerai Nyamai, Lantang Senang Nguan Menua,” ku iya. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — YB Dato’ Sri Huang Tiong Sii

BETONG, 10 Mei – Projek ngaga jalai alun baru ari Rumah Panjai Maja ngagai Penurin dipeda meri empas ke besai ngagai peranak menua nya nengah rentayan komunikasyen ke manah agi sereta perengka guna pejalai ke likun sereta lantang agi.

Nitihka penerang ke dikunsi nengah Facebook South Asia Growth r, projek nya ukai semina deka ngangkatka akses komuniti menua pesisir, tang mega deka disikap ngena sistem lampu jalai alun ke ngena kuasa solar dikena nentuka lampu ke lebih entap, kelebih agi ba kandang endur ke bisi penanggul infrastruktur bekal kuasa karan.

Kompeni nya mega meri besai terima kasih ngagai Opis Kereja Raya Sarawak ketegal pengandal sereta peluang ke diberi ngaul diri bejalaika projek pemansang nya.

“Ba SAG, kami mengkang komited nyendiaka chara mutarka penanggul ti praktikal sereta meruan ti ulih meri bida ke bendar ngagai komuniti ba renggat baruh,” ku penerang nya.

Inisiatif ngena lampu jalai solar LED mega dipeda seriris enggau pengawa ngenegapka pemansang ti meruan sereta ngangkatka pengelikun penguna jalai alun di menua pesisir Sarawak. -RBI

#ruaiberitaiban#newsiban#beritaiban

Rindu | Titih | Kunsika

KUCHING, 10 Mei — Menteri Kereja Raya, Dato Sri Alexander Nanta Linggi meri tanda iya bedau sedia ninggalka dunya politik enggau penuh lebuh iya mantaika pengingin deka neruska pengawa iya ba renggat Kunsil Nengeri (DUN) Sarawak.

Kenu ku iya, enti diberi awak sereta berekat ketuai parti, iya sedia nampung servis ba renggat nengeri, kelebih agi ba sitak DUN ngelingi Kapit.

Dulu agi ari tu, Kaban Parlimen Kapit nya meri tanda iya deka mutuska jeman nyadi ketuai ba penuduk Parlimen Kapit ba Pengawa Bepilih Besai (PRU) ti deka datai.

“Ya, nyangka udah datai maya iya aku nyerah ngagai sida ke biak.

“Aku udah dalam Parlimen nyau deka manggai 30 taun. Enti bisi peluang enggau sitak DUN baru, aku mega deka terus gawa ba renggat nengeri,” ku iya.

Penerang nya tekala nya matak perati mensia mayuh lebuh iya enggau tebuka mantaika pengingin ati iya deka meri peluang ngagai rebak baru ngambi tangkup pengawa nyadi ketuai ba kandang menua nya.

Penerang nya dipeda nyadi kelai tumu ubah besai ba rampa politik di Kapit pengudah iya nyadi Kaban Parlimen bagi menua nya kenyau ari taun 1999.

Pemansang nya diatu udah nyungkak spekulasyen bekaul enggau peluang ubah ketuai besai di Kapit, nyengkaum sapa chalun ke bisi potensial nganti ke deka dibantaika Parti Pesaka Bumiputera Bersatu (PBB) enggau Gempung Parti Sarawak (GPS) ba PRU ke deka datai.

Alexander Nanta siku ari ketuai kanan Sarawak ti pemadu bepeneleba ba renggat Perintah Besai sereta kala mangku sekeda portfolio kabinet ti beguna sebedau dipadu nyadi Menteri Kereja Raya Malaysia.-RBI

#ruaiberitaiban#newsiban#beritaiban

Rindu | Titih | Kunsika