PETRA JAYA, 14 Mei — Kaban Kunsil Nengeri (ADUN) Ngemah Anyi Jana meri sukung penuh ngagai jurai Terima Kasih Ketuai Pemegai Menua (TYT) Yang di-Pertua Negeri Sarawak beserimbai enggau Pengawa Bejadika Aum Keterubah Dewan Undangan Negeri Sarawak Kelima Aum Nengeri Ke-19), ditu kemari.
Lebuh bejuraika nya ba Dewan Undangan Negeri (DUN) Sarawak iya nerangka jaku TYT Tun Pehin Sri Dr Haji Wan Junaidi bin Tuanku Jaafar nya bisi aspirasyen, komprehensif sereta ngayanka kuing strategik Sarawak dalam napi pemar dunya kemaya hari tu.
Nitihku iya, Pelin Strategik Pemansang Pasca COVID-19 2030 (PCDS 2030) mengkang nyadi lalau besai perintah ba pengawa nempa Sarawak nyadi nengeri maju, meruan sereta bepenatai pemisi tinggi manggai ba taun 2030.
Ku iya, pemujur Sarawak nyapai status nengeri bepenatai pemisi tinggi baka ti diaku Bank Dunya asil ari pengawa ngatur wang ti manah sereta polisi pemansang ti terang ari baruh iring Premier Sarawak, Datuk Patinggi Tan Sri Abang Abdul Rahman Johari Abang Openg.
Dalam jaku dipansutka iya, iya mega ngemeratka komitmen perintah Sarawak dalam ngenegapka sektor ekonomi baru enggau teknologi tinggi nyengkaum pemintar tiru (AI), aeroangkasa, ekonomi digital enggau tenaga gadung.
Ku iya, Sarawak mega ngambi singkang nyadi hab kuasa gadung serantau nengah pemansang kuasa tau dikena baru baka hidro, solar enggau bioenergi, setipak enggau Polisi Transformasyen Tenaga Sarawak enggau Pelin Jalai Ekonomi Hidrogen.
Kelimpah ari nya, iya mega ngemeratka pemesai guna pemansang modal mensia nengah pengawa ngenegapka pelajar STEM enggau TVET ngambika ulih ngadaka pengereja pengawa bepengelandik ti nangkup guna industri jemah ila.
Ku iya, pengawa bejalaika Skim Pelajar Tinggi Percuma Sarawak (FTES) berengkah ari taun 2026 nyata ngayanka komitmen perintah dalam nyendiaka akses pelajar bekualiti ngagai nembiak Sarawak, kelebih agi dalam bidang strategik baka STEM, perubat enggau undang-undang ba institusyen ke diempu perintah Sarawak.
Berebak enggau nya, iya mega minta sekula repuk kelebih agi di menua pesisir terus diangkatmanah dikena nentuka bala nembiak nerima palan belajar ti lebih lantang sereta kondusif.
Ngelansa pasal pemansang menua pesisir, iya madahka perintah Sarawak tetap bebendar deka ngerembaika perengka guna pemun baka jalai alun, jematan, bekal ai beresi, elekterik enggau rentayan telekomunikasyen dikena ngangkatka pengelantang pendiau rayat di menua ulu.
Iya mega nyukung pengawa bejalaika projek strategik baka Sistem Aliran Transit Automasi (ART) enggau penumbuh serikat penerebai bilun Sarawak empu, AirBorneo, ti dipadah ulih ngenegapka kaul domestik enggau serantau sereta nyungkak penumbuh ekonomi nengeri.
Berebak enggau nya, iya mega ngemeratka pemesai guna pengelantang pendiau rayat nyengkaum orang tuai, Orang Timpang Pendiau (OKU) enggau raban ti mudah kena tinggang penusah kelimpah nerangka inisiatif Bantu Guna Pemun Sarawak (SKAS) nyadi singkang proaktif perintah dikena mantu rayat napi ungkus pengidup ti majak niki.
Iya mega minta pengereja pengawa perintah nengeri terus ngangkatka pemanah sistem meri servis nengah chara ngemeranka semengat “sense of urgency” enggau “sense of ownership” dalam bejalaika mandat ke diberi.
Lebuh nyimpul debat iya, iya nyemetak madahka penyerakup rayat pupu bansa enggau jalai pengarap sereta mega penegap politik nyadi batang aset Sarawak ti enda tau enda terus dijaga dikena nentuka pemansang enggau pengelantang nengeri tu ulih terus meruan. — RBI
#Beritalban | Ruai Berita Iban
Rinduka | Titihka | Kunsika
