SPAOH, 11 Mei — Sapit Premier Sarawak Datuk Amar Douglas Uggah Embas udah ngungkupka pemeri sepenyampau RM30,000 ngagai Gerempung Tuai Rumah (GTR) Rimbas Ulu beserimbai enggau Pengerami Makai Lemai Mantar Gawai Dayak 2026 ke diatur ba Balai Mensia Mayuh Spaoh, malam Hari Enam tu tadi.

Ba pengawa nya mega, iya bisi madahka agih belanja khas ngagai semua Komiti Pemansang enggau Pengelikun Genturung Pendiau (JKKK) enggau Biro Indu di sitak Rimbas Ulu nyadika sukung bejalaika aktiviti komuniti enggau pemansang komuniti ngelingi.

Dalam jaku dipansutka iya, Uggah ke mega Menteri Wang enggau Ekonomi Baru II sereta Menteri Infrastruktur enggau Pemansang Palan Penyangkai Kapal madahka perintah Sarawak deka terus komited ngenegapka pemansang menua pesisir dikena ngangkatka pengelantang pendiau rayat.

Kenu ku iya, pengerami ngintu Gawai Dayak ukai semina nyadi kelai penyerakup entara pupu bansa, tang mega nyadi medium ti beguna dalam nyaga adat enggau pesaka budaya komuniti Dayak ngambika ulih ditampung ngagai nembiak rebak baru.

“Pengerami baka tu ulih nyerakupka komuniti sereta ngenegapka semengat sepenemu enggau kerejasama entara rayat pupu bansa di Sarawak,” ku iya.

Iya mega madah, projek ngangkatmanah Jalai Ulu Rimbas ke beungkus RM25 juta diatu benung dalam proses tinda lalu dipelaba berengkah dipejalaika bulan Jun tu.

Ku iya, pemansang infrastruktur ke manah agi deka meri penguntung ke besai ngagai peranak menua pesisir, kelebih agi ba pengawa ngemanahka perengkaguna komunikasyen sereta nyungkak aktiviti ekonomi kandang menua.

Berebak enggau nya, iya meransang komuniti ngambika terus bulih penguntung ari sektor betanam betupi baka sawit enggau lada nyadi pengeraja ekonomi ti ulih nyungkak penatai pemisi ruang bilik.

Uggah ke mega Kaban Kunsil Nengeri (ADUN) Bukit Saban madah, perintah mega bisi nyendiaka bemacham bansa bantu nyengkaum program ngemanahka rumah, ngemanahka infrastruktur pemun enggau subsidi ngagai orang bumai dikena nyikap diri nyapai tagit pemansang Sarawak manggai ba taun 2030.

Sama bisi datai iya nya Kaban Parlimen Betong Dato Dr Richard Rapu, Residen Bagi Menua Betong Datu Richard Michael Abunawas, Direktor JKR Sarawak Datu Ir Cassidy Morris, Ketuai Direktor Opis Biokeselamatan Kementerian Sumber Asli enggau Kelestarian Alam Malaysia, Dr. Lornie Enggong; Sapit Direktor Unit Audit Dalam Opia Premier Sarawak, Dampa Long enggau Sekretari Politik ngagai YAB Premier Sarawak, Roseline Mapong. — RBI

BAU, 11 Mei – Siku orang ke ngena basikal menua tu ke akisden ba jalai alun senentang KM 1.0 Jalai Bau-Kuching kena 1 Mei tu tadi dientaska midang lebuh nerima perubat ba Sepital Besai Sarawak kemari.

Ketuai Polis Pelilih Bau, Supt Mohd Haide A. Rahman madah, tudah ngapuska seput kena 10 Mei 2026 lebuh diperubat ba Wad Beputung Saraf HDU ketegal bakal ba untak enggau trauma.

Nitihku iya, aksiden ke nyadi urung pukul 6 pagi nya ngaul sebuah kerita Perodua Axia ke dikena siku peranak menua nya enggau basikal ke ditepan tudah.

“Pansik tumu tetemuka orang ke ngena basikal nya dipelabaka pansut ari simpang kanan deka tama ngagai jalai besai sebedau dilantak ari belakang sebuah kerita ke bejalai ari tunga Bau nuju Kuching,” ku iya nengah penerang media sehari tu tadi.

Berindik ari aksiden nya, tudah balat bakal ba pala sebedau dianjung ngagai Sepital Besai Sarawak ngambika diperubat enggau silik agi.

Diatu kes nya benung dipansik ari baruh Seksyen 41(1) Akta Pengangkutan Jalan 1987.

Berebak enggau nya, mensia mayuh dilalau ngambika seruran nemu sereta bejimat enggau gaya ke ngelingi lebuh ba jalai alun, kelebih agi ba tiku, simpang jalai enggau ba jam tumu pagi lebuh rampa enda tentu ulih dipeda.

Polis mega ngelalau mensia mayuh anang ngaga berita selebubu tauka ngerembaika penerang ke enda dientaska bekaul enggau penusah nya laban tau ngachau proses tasat polis. – RBI

SIBU, 10 Mei — Perintah Sarawak majak ngenegapka agenda pemansang komuniti nengah pengawa bejalaika Projek Ngaga Baru Palan JKKK Kampung Bahagia Jaya Teku ti udah diserah enggau rasmi ngagai Penghulu enggau Komiti Pemansang enggau Pengelikun Genturung Pendiau (JKKK) kandang menua nya ba sebengkah pengerami sehari tu tadi.

Pengawa nyerahka projek ke udah tembu digaga Opis Kereja Raya Bagi Menua Sibu udah dipenyadi sereta dikemataka Datuk Dr.Annuar Rapaee ke mega Kaban Kunsil Nengeri (ADUN) Nangka.

Pengawa bejadika projek nya mandangka komitmen perintah ti seruran bejalaika pengawa nyendiaka perengkaguna mensia mayuh ti lebih moden, lantang sereta befungsyen dikena nangkup guna rayat diatu, kelebih agi peranak Kampung Bahagia Jaya Teku.

Palan JKKK baru nya dikemansangka nyadi infrastruktur komuniti mayuh guna ti ukai semina nyukung pekara pentadbiran kandang menua, tang mega nyadi palan pemansang rama, pelajar enggau pengelantang komuniti.

Palan nya deka nyadi palan operasyen rasmi Penghulu enggau JKKK dalam bejalaika pengawa administratif, ngatur aktiviti komuniti sereta ngatur program pemansang kandang menua enggau lebih sistematik sereta ngasi.

Kelimpah ari nya, begunan tu mega nyendiaka palan belajar ti kondusif ungkup pengawa bejalaika aktiviti tuisyen enggau program pelajar dikena mantu ngangkatka penyulut akademik nembiak ba kandang menua nya.

Palan nya mega dikearap ulih nyadi pelasar integrasyen rama ti ulih ngenegapka penyerakup enggau kaul entara peranak nengah pengawa ngatur bemacham aktiviti komuniti.

Berebak enggau nya, begunan nya mega befungsyen nyadi Palan Pengenduh Sementara (PPS) endur ngengkahka mansa penusah ngenyit baka penusah angus enggau ampuh bah, lalu enggau nya ngemudahka agi proses ngenataika bantu ngagai peranak ke tasah enggau jampat agi, sistematik sereta ngasi.

Pengawa bejalaika projek tu dikearapka ulih ngangkatka pengelantang pendiau rayat sereta nyukung agenda pemansang komuniti ti lebih teratur, likun sereta meruan jemah ila. — RBI

JULAU, Mei 10 — Pengawa Bepilih Nengeri (PRN) Sarawak ti deka datai enda lama agi enda patut nyadi pun penyarut entara rayat, tang penyerakup enggau kerejasama meseti terus ditegapka ungkup pemaik begulai jemah ila.

Chairman Industri Kayu Ramu Malaysia, Datuk Larry Sng Wei Shien madahka, pekara ti dikemeratka iya dalam Program Rh Liban Nanga Sebuntang iya nya iya ngingatka rayat ngambika enda kelalu teparuk enggau sentimen politik nyentukka ngeruga kaul enggau pengelantang komuniti ba renggat baruh.

Kenu ku iya, musin politik semina sementara aja lalu bida penemu enda patut mambarka rayat ba rumah panjai.

“Maya musin politik kitai bejaku pasal politik, tang enti udah abis kitai patut ngetu bejakuka pekara nya.

“Nama ke beguna iya nya rayat terus beserakup sereta bekerejasama ngemansangka rumah panjai sereta berundingka pengidup jemah ila begulai,” ku iya.

Ku iya, semina nengah semangat kerejasama enggau penyerakup aja rayat ulih nyingkang jauh agi sereta berunding panjai agi ba pengawa sida mai pemansang ngagai kandang menua sida empu.

Ku iya nambah, dalam sistem demokrasyen, barang sapa ke menang ba pengawa bepilih deka numbuhka perintah sereta megai tanggungpengawa mai pemansang ngagai rayat.

“Politik tu pandak.Aku ngarapka rayat anang kena penyarut lalu anang belaya ketegal politik.Nama ke beguna agi iya nya kaul kitai terus meruan rat,” ku iya.

Ba program ke sama, iya bisi nyuaka bantu belanja ngagai sekeda Komiti Pemansang enggau Pengelikun Genturung Pendiau (JKKK), Biro Indu enggau penerima bantu individu.

Entara penerima bantu iya nya JKKK Rh Liban Nanga Sebuntang, JKKK Rh Lau Rantau Pitak, JKKK Rh Bedindang, JKKK Rh Ballih, Biro Indu Rh Liban, PIBG SK Udin, PIBG SK Nanga Entabai, Tabika KEMAS Nanga Bua, Tabika KEMAS Nangan Ijit enggau Tabika KEMAS Nanga Dong.

Kelimpah ari nya, bantu ari baruh Wang Turu Pelajar Larry Sng (LSEF) mega bisi disuaka ngagai Jeremy anak Kijun.

Penyampau semua bantu belanja ke diagih ba program tu iya nya RM47,500. -RBI

BETONG, 10 Mei – Bukit Sadok deka dikemansang nyadi palan pematak temuai enggau ikon dikena ngingatka sejarah enggau pesaka asal Kubu Rentap, pia ku Sapit Premier Sarawak, Datuk Amar Douglas Uggah Embas beserimbai enggau Ekspedisyen Bukit Sadok Betong 2026 sehari tu.

Nitihku iya, pengawa nya ulih ngenegapka agi nilai sejarah Bukit Sadok nyadi palan pesaka ke beguna di Sarawak kelimpah ulih matak mayuh agi temuai ngagai kandang menua nya.

Program ekspedisyen nya disereta Uggah begulai enggau Direktor Opis Kereja Raya (JKR) Sarawak, Datu Dr Cassidy Morris lalu bela digulu sapit direktor JKR enggau pemesai ari mayuh bengkah bagi menua enggau pelilih menua di serata nengeri tu.

Ekspedisyen Bukit Sadok Betong 2026 diatur nyadi inisiatif dikena nerenakka gaya pengidup bepengerai, ngenegapka semengat gawa beraban sereta ngerapitka kaul entara pengereja pengawa JKR Sarawak.

Penatai pengereja pengawa opis tu mandangka komitmen ti seruran dipejalaika JKR Sarawak dalam meri kuasa ngagai pengelantang pendiau pengereja pengawa kelimpah ari nerenakka budaya organisasyen ti positif, dinamik sereta kompetitif.

Diatur enggau penteba pemanah rampa menua enggau rega sejarah Bukit Sadok ti tebilang, program tu mega nyadi pelasar dikena nerenakka semengat begulai, pengeliat ati enggau kaul kerejasama ti tegap agi dalam gaya ti lantang tang bisi reti. -RBI

#ruaiberitaiban#newsiban#beritaiban

Rindu | Titih | Kunsika

SUAI, 10 Mei — Pekit Sepak Takraw Piala Sungai Senga ke diatur Raban Nembiak JKKK Sungai Senga, Tanjung Baru Suai enggau PBB Suai Tengah Pampang 1 diatur enggau mujur sereta nerima sambut ke chukup meransang ari raban nembiak ngelingi Suai enggau Niah.

Pengerami bejadika pekit nya udah dipenyadi Tr Lawrence ak Bana ngarika Dr Aaron Ak Rundi (Exco Nembiak PBB Sarawak) ba Rumah Douglas Akok ak Limping, Sungai Senga, Tanjung Baru Suai.

Pekit ke diatur pengelama dua hari berengkah 9 ngagai 10 Mei 2026, bisi penyereta urung 100 iku pesereta ti ngarika 20 tim.

Pekit tu chukup kompetitif enggau tetiap tim berebutka Trofi Pekit enggau semua perais mata duit RM2,400.

Nitih ku pengatur, pengawa ngatur pekit tu ukai semina ngembuan tuju deka meransang raban nembiak ngaul diri dalam aktiviti lumba enggau main, tang mega nyadi pelasar ngerapitka kaul bakih, ulah lumba enggau main sereta penyerakup entara komuniti setempat.

Timbal ti amat meransang tu ngayanka pengerindu enggau kaul ti chakah raban nembiak dalam lumba enggau main sepak takraw, lalu enggau nya nyukung pengawa ngemansangka lumba enggau main sereta nempa gaya pengidup ti bepengerai di menua pesisir.

Dikearapka pengawa ngatur pekit tu ulih diteruska nyadi pengawa ninting taun dikena terus ngenegapka pemansang nembiak sereta ngenegapka penyerakup komuniti di Suai enggau kandang menua ngelingi. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUCHING, 10 Mei – Isu pengelantang pendiau mensia mayuh kelebih agi bekaul enggau penambah aktiviti judi online, pengempu enggau rega rumah ke majak niki, sereta mega penanggul projek rumah ke ditinggalka, nyadi entara batang fokus Aum Ketiga Kaban Supreme Kaunsil (AMT) Gerakan Nembiak Parti Pesaka Bumuputera Bersatu (PBB) Sarawak sesi 2025-2028 ti diatur ba Indu Opis PBB Sarawak, ditu pagi tadi.

Ketuai Pemadah Gerakan Belia PBB Sarawak ke mega Kaban Kunsil Nengeri (ADUN) Tellian, Royston Valentine madah, pekara tu begunaka perati ke berat ari perintah dalam nentuka pengelantang pendiau raban nembiak terus dijaga nengah pengawa bejalaika polisi enggau skim ke lebih komprehensif.

“Entara pekara ti dikerandau iya nya pematut nambahka skim rumah ulih dibeli dikena mantu raban nembiak ngembuan rumah kediri empu, kelimpah ari ngambi atur ke terit ngagai pemaju ti enda mujur nembuka projek rumah,” ku iya.

Aum ti bechairmanka Datuk Martin Ben ti nyadi Ketuai Nembiak nya mega bejuraika pengawa bejalaika program Nembiak PBB ba renggat zon ti ngaul Zon Utara, Zon Tengah, Zon Kuching enggau Zon Betong, kelimpah ari pengawa nyediaka diri dulu sebedau Konvensyen PBB ti diperambu deka diatur entara bulan Julai enggau September tu ila.

Berebak enggau nya, randau nya mega ngemeratka pengawa meransang penyereta raban nembiak dalam sektor betanam betupi, ti dipeda ngembuan potensial besai nyadi pun penatai ekonomi baru ungkup Sarawak, kelimpah ari ngerembaika peluang gawa dalam industri minyak enggau gis.

Aum nya mega ngemeratka pengawa ngenegapka pengawa ngena teknologi pemintar tiru (AI) ba raban nembiak dikena nambahka penyikar ngena pelasar digital enggau media rama enggau lebih efektif sereta meri empas positif ngagai mensia mayuh.

“Raban nembiak kemaya hari tu nyadi penempa pengidup Sarawak dudi hari. Nengah penyerakup, penemu baru enggau semengat raban nembiak, kitai ulih mai Sarawak mansang ke mua sereta progresif, sereta terus komited ngetanka penegap politik ari baruh iring perintah GPS,” ku iya. -RBI

#ruaiberitaiban#newsiban#beritaiban

Rindu | Titih | Kunsika

BETONG, 10 Mei — Sapit Premier Sarawak Datuk Amar Douglas Uggah Embas sehari tu bejalaika penemuai kereja ngagai palan Projek Ngaga Jalai Bejalai Kaki di Sekolah Kebangsaan Nanga Gayau beratika pejalai projek infrastruktur ti dipejalaika Opis Kereja Raya Bagi Menua Sarawak nengah Opis Kereja Raya Bagi Menua Betong.

Sapit Premier Sarawak ke mega Menteri Wang enggau Ekonomi Baru II sereta Menteri Infrastruktur enggau Pemansang Palan Penyangkai Kapal Sarawak diberi penerang bekaul enggau pejalai projek ke beungkus RM2.38 juta ti dipejalaika SARAOIL (M) Sdn Bhd diatu.

Projek tu deka dipejalaika dalam timpuh 12 bulan berengkah 15 September 2025 lalu diperambu tembu penuh kena 14 September 2026.

Batang skop projek tu mungkur pengawa ngaga jalai baru orang bejalai kaki urung 36.4 meter pemanjai enggau 5.7 meter peninggi, nyengkaum pengawa struktur batang, masang atap, pagar pengelikun, tiang konkrit, sistem lampu enggau ngelindung kilat dikena nentuka pengelikun enggau pengelantang kelebih agi staf sekula.

Rambau penemuai nya, Datuk Amar Douglas Uggah mega nyemetak madahka projek nya dipelanja nengah agih belanja Ejensi Pemansang Bagi Menua Betong (BDDA) ke nyadi sebagi ari komitmen perintah Sarawak ke seruran ngenegapka pemansang infrastruktur menua pesisir.

Ku iya, projek nya dikearap ulih meri pemaik ke besai ngagai peranak menua nya enggau komuniti sekula nengah chara nyendiaka jalai bejalai kaki ke lebih likun, sistematik sereta kondusif, lalu ari nya ulih ngangkatka pengelantang pendiau rayat ba kandang Bagi Menua Betong.

Penemuai nya mandangka pengibuh perintah Sarawak ba pekara begunaka perengka guna pemun ti likun sereta bekualiti, kelebih agi ungkup institusyen pelajar di menua pesisir. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — JKR Sarawak

LUBOK ANTU, 10 Mei — Semengat ngaul sereta pengibuh ke rayat majak dibantaika Kaban Parlimen Lubok Antu, Roy Angau Anak Dato Gingkoi lebuh iya sanggup neresa ampuh bah nengah chara nepan sebuah trak ari Jabatan Pertahanan Awam Malaysia (JPAM) lebuh ngulu

Program Segulai Sejalai Nuju Pemansang Menua di Rumah Bruin, Tabut Skrang, Engkilili, kemari.

Penatai iya terang mandangka komitmen iya ti terus ngelawa komuniti menua pesisir sereta nentuka pengelantang pendiau rayat seruran diberi perati taja pan napi pemar gaya hari enggau gaya ke diatu.

Ba jaku bejadika pengerami nya, Roy nyemetak madahka pemansang enda patut dipeda semina ari sukut bejalaika projek fizikal aja, tang patut mungkur pengelantang rama, pengelantang enggau pemansang komuniti selampur.

Kenu ku iya, program ke bansa tu nyadi pelasar ke beguna dalam ngerapitka kaul entara ketuai enggau rayat kelimpah nyerakupka komuniti dalam pengawa ngemansangka sitak nya begulai.

“Pemansang ti meruan meseti nyingkang begulai enggau pengelantang rayat sereta penyerakup komuniti ngambika penguntung iya ulih diasaika semua renggat mensia mayuh,” ku iya.

Ba atur pengawa nya mega, iya bisi madahka penyampau agih belanja sepenyampau RM228,000 dikena nyukung pemansang enggau aktiviti komuniti di Rumah Bruin, Tabut Skrang, Engkilili.

Ari penyampau nya, sepenyampau RM200,000 diungkupka ari baruh Projek Transformasyen Menua Pesisir (RTP) 2027 dikena meli kereban dikena ngaga rumah panjai, kelimpah ari RM20,000 ngagai Komiti Pemansang enggau Pengelikun Genturung Pendiau (JKKK) enggau RM8,000 ngagai Biro Indu Rumah’.

Program tu bela digulu bala penghulu, kaunselor, tuai rumah sereta mega pengari ari mayuh bengkah ejensi perintah ke sama bela nyukung agenda pemansang komuniti setempat, kelebih agi ba kandang menua Lubok Antu enggau Engkilili. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUCHING, 10 Mei – Injin bedau idup, nya alai enda ibuh berumban berandau bekaul Pengawa Bepilih Nengeri (PRN), ku Premier Sarawak Datuk Patinggi Tan Sri Dr Abang Johari Tun Abang Openg.

Iya mantaika saut tu lebuh dipinta meri penerang bekaul enggau spekulasyen pasal PRN Sarawak ti berengkah dikerandau berindik ari penerang Sekretari Besai Gempung Parti Sarawak (GPS) Dato Sri Alexander Nanta Linggi.

Berebak enggau nya, lebuh ditanya enggau chara betundi, sekalika PRN Sarawak nyangka deka diatur pengudah pengerami Hari Gawai, Abang Johari semina ketawa aja sebedau nyaut, “Kemaya ba runding kita patut?”

Ku iya, agi kelalu tumu endur berandauka pengawa bepilih nengeri lalu nyemetak madahka pekara nya bedau datai ba renggat ti begunaka randau ke silik.

“Kitai bedau datai ba renggat nya,” ku iya lebuh dikerandau pengarang berita pengudah ngulu pengerami ngintu Hari Pengereja Pengawa renggat nengeri di Palan Konvensyen Borneo Kuching sehari tu tadi.

Penerang nya dipansutka pengudah Nanta diripotka meri tanda bisi peluang nampung pengawa politik iya ba renggat nengeri enti diberi peluang sereta nerima pemendar ari ketuai parti sebedau PRN Sarawak ti deka datai.

Kaban Parlimen (MP) Kapit ke udah mangku pengawa nyauka tiga dekad nya mega mantaika pengeran diri ninggalka politik perintah besai nyema dipilih bediri minta pilih ba PRN tu ila. – RBI

Sumber Sarawak Tribune

#ruaiberitaiban#newsiban#beritaiban

Rindu | Titih | Kunsika