SIBU, 10 Mei – Siti kangau ngenyit diterima Opis Bomba enggau Penyah Penusah Malaysia (JBPM) urung pukul 9.49 malam tadi madahka penusah bebadi balat nyadi ti mungkur sebuah kerita pikap empat taya enggau sebuah kerita MPV ba Kilometer 17.7 Jalai Sibu-Selangau, Jalai Besai Pan Borneo.

Berindik ari ripot nya, seraban bomba ari Balai Bomba enggau Penyah Penusah (BBP) Sungai Merah berumban ngesah ngagai endur nya bejalaika operasyen nyelamat.

Lebuh datai ba endur nya, raban penyelamat tetemuka sebuah kerita Perodua Aruz MPV tebalit enggau siku indu tuai tepekul ba penuduk pesinjir ba mua.

Tudah ke beumur 66 taun ditemu enda nemu diri sebedau dientaska bebadi ba palan penusah ke nyadi ulih pemesai perubat ari Opis Menteri Pengerai Malaysia (KKM).

Pengari Palan Gerakan JBPM Sarawak madah, dua iku agi pesinjir dalam MPV nya bakal seraya deriba selamat enggau nadai sebarang bakal.

Semua sida dalam entukar nya beumur entara 56 ngagai 76 taun.

Ku iya, deriba lelaki enggau tiga iku penumpang indu entukar pikap empat taya nya mega diripotka selamat sereta nadai bakal.

Raban bomba udah nya ngena perengka hidraulik mansutka tudah ke tepekul sebedau tubuh iya diserah ngagai polis ngambika bejalaika pengawa nangkanka nya.

Operasyen nyelamat enggau kereja meresi ba endur nya tembu pukul 11.14 malam. -RBI

#ruaiberitaiban#newsiban#beritaiban

Rindu | Titih | Kunsika

BETONG, 10 Mei – Orang indu dikearapka terus mansang sereta bediri setikas enggau orang lelaki ba pengawa nempa pelajar sereta ngenegapka ekonomi ruang bilik.

Nitihku Datin Rosemary Wong ke ngarika Kaban Kunsil Nengeri (ADUN) Layar Datuk Gerald Rentap Jabu, orang indu kelebih agi di menua pesisir patut bejalaika tanggungpengawa ti beguna amat dalam pemansang mensia mayuh enggau penumbuh institusyen ruang bilik ti tegap sereta kompetitif.

“Orang indu kemaya hari tu ukai semina nyadi tulang belakang ruang bilik aja, tang mega mayuh mantu dalam bidang pelajar, pengawa dagang enggau pemansang komuniti,” ku iya.

Rosemary ngenataika jaku tu ba Pengerami Merarau Beserimbai enggau Pengerami Ngintu Jubli Perak Sarakup Indu Gensurai Layar ke udah diatur ba Rumah Edward Anding, Gensurai Betong kemari.

Pengerami ti beprestij nya mega nyadi saksi timbal ti chukup meransang ati lebuh 92 mija temuai ti ngaul pengari rumah panjai ari serata sitak DUN N.36 Layar datai ngerichahka agi pengerami nya.

Program tu mega nyadika pelasar ngerapitka kaul entara komuniti rumah panjai seraya meri basa ngagai pangku pengawa orang indu dalam raban bansa.

Sama ngerichahka pengawa nya bemacham pengawa pemerindang enggau pengawa komuniti dalam gaya ti penuh enggau pengerami sereta semengat begulai. -RBI

Kredit BetongXcess

#ruaiberitaiban#newsiban#beritaiban

Rindu | Titih | Kunsika

SPAOH, 9 Mei — Perintah Sarawak terus komited ngenegapka pemansang pelajar menua pesisir lebuh sepenyampau RM268,600 diungkupka ngagai Gerempung Tiong Hua Spaoh enggau lapan buah institusyen pelajar di kandang menua Spaoh dikena ngemanahka perengka guna belajar, bejalaika program modal ICT enggau STEM nembiak.

Pemeri nya dibantaika Sapit Premier Sarawak, Menteri Wang enggau Ekonomi Baru II Datuk Amar Douglas Uggah Embas ke mega Menteri Infrastruktur enggau Pemansang Palan Penyangkai Kapal, ba Pengerami Nyuaka Chek ke diatur ba PAWE Bukit Saban, sehari tu tadi.

Pengawa nyuaka bantu nya sebagi ari pengawa bejalaika inisiatif PACU (Pemansang Infrastruktur Sekula) ti ngemeratka pengawa ngenegapka sektor pelajar, kelebih agi di menua pesisir.

Entara penerima bantu tu iya nya Gerempung Tiong Hua Spaoh enggau lapan buah sekula iya nya

SK Penom, SK Paku Central, SK Suri, SJK(C) Chung Hua Spaoh, SK St. John Nanga Tiga, SK Nanga Gayau, SK Spaoh enggau SMK Spaoh.

Ari penyampau bantu nya, sepenyampau RM70,000 diungkupka khas ungkup pengawa nyendiaka kereban bacha enggau bup belajar ngagai tujuh buah sekula primari dalam pengawa ngenegapka akses pelajar enggau ngangkatka kualiti pelajar nembiak.

Kepala Pengajar Sekula Primari (SK) Nanga Gayau, Stanley Matthew Kalong Dandan madah, bantu ke diterima nya deka dikena penuh bejalaika program bekaul ICT enggau STEM dikena ngemansangka potensial nembiak sereta ngangkatka kompetensi pengajar.

Kenu ku iya, pengeransing nya mega ulih nambahka penyikap nembiak napi pemar dunya moden ti majak bepelasarka teknologi enggau inovasyen.

Berebak enggau nya, Kepala Pengajar SK Spaoh, Edie Rahmat Salleh nerangka pemeri nya nyadi sukung ke signifikan dalam ngenegapka perengka guna sekula ke udah bisi, nyengkaum ungkup pengawa bejalaika lumba enggau main, aktiviti kokurikulum enggau pemansang ulah nembiak.

Ku iya, bantu nya ngasuh sekula ulih merambu sereta bejalaika program pemansang nembiak ke lebih komprehensif, bestruktur sereta meri empas ke tinggi.

Inisiatif nya mandangka komitmen Perintah Sarawak ti terus ngenegapka pemansang pelajar menua pesisir nuju ngadaka rebak ti holistik, kompetitif sereta kompetitif setipak enggau aspirasyen pemansang nengeri. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

LIMBANG, 9 Mei – Pengerami Pra Nangguhka Bazaar Agro Gawai Medamit 2026 ngemeratka agenda penyerakup enggau pemansang ekonomi komuniti lebuh Sapit Chairman Komiti, Clarence Ringgit ngenataika jaku sebedau pengerami nutup rasmi.

Program ke diatur Komiti Temuai Medamit Limbang begulai enggau Kaunsil Pelilih Menua Limbang ngempuruka komuniti menua nya, orang dagang, ejensi perintah enggau temuai pupu bansa dalam gaya pengelantang enggau pemanah ati.

Dalam jaku dipansutka iya, Clarence Ringgit meri besai terima kasih ngagai semua piak ke bisi kaul nyengkaum bala temuai dipebasa, ejensi perintah, orang dagang enggau komuniti menua nya ke udah meri sukung tegap ngemujurka pengerami dua hari berunggu nya.

Iya mega meri besai terima kasih ngagai pengari Menteri Penyerakup Menua, YB Datuk Aaron Ago Dagang ti diarika Tuan Pandang Semat, Sekretari Politik Menteri Premier Sarawak, Datuk Patinggi Tan Sri Abang Johari Tun Openg, laban udah datai sereta nyukung program nya.

Nitih ku iya, pengawa ngatur Bazaar Gawai Agro Medamit 2026 ukai semina nyadi pelasar aktiviti ekonomi aja, tang mega bejalaika tanggungpengawa ke berat dalam ngenegapka kaul entara komuniti pupu bansa sereta nerenakka kerejasama entara Perintah Besai, Perintah Nengeri enggau autoriti lokal (PBT).

“Program baka tu nyadi pelasar ke beguna dalam ngenegapka penyerakup komuniti sereta nerenakka semengat bebatak asur enggau kerejasama setipak enggau aspirasyen Segulai Sejalai ti mai reti seriris sereta sejalai,” ku iya.

Clarence Ringgit mega ngemeratka komiti pengatur pengawa nyadi penyambung entara sada renggat baruh enggau perintah, kelebih agi ngenataika aspirasyen enggau utai ke diguna komuniti setempat enggau lebih efektif.

Ari sukut ekonomi, iya nyemetak madahka penyereta pedagang mit enggau orang dagang menua tu udah meri empas positif ngagai ekonomi menua tu, setipak enggau pengawa ngenegapka komuniti menua pesisir.

Iya mega ngelaluka kerejasama ti terus ari mayuh bengkah ejensi perintah nyengkaum Kaunsil Pelilih Limbang dalam nentuka program baka tu ulih diteruska enggau manah agi jemah ila.

Pengerami nya mega bisi negu aspirasyen penyerakup bansa ti ditegapka nengah mayuh bengkah inisiatif ari baruh Opis Menteri Penyerakup Menua ti betuaika Aaron Ago Dagang, setipak enggau agenda MADANI Malaysia.

Lebuh nyimpul jaku iya, Mr.Clarence minta semua piak terus ngemeranka semengat begulai sereta nyaga pemeresi sepemanjai pengawa nya nengah chara bejalaika kimpin “Pesta tanpa Sampah”

Pengerami nya udah nya ditampung enggau pengawa rasmi nangguh sereta mandangka main asal ti mandangka penyelai budaya komuniti di DUN Batu Danau, lalu enggau nya ngelaika pemujur Bazaar Gawai Agro Medamit 2026. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SIBU, 9 Mei — Sepenyampau 1,300 iku pesereta nyereta Program Brisk Walk 2.0 (BW2.0) ke diatur Ejensi Anti Dadah Kebangsaan (AADK) Pelilih Sibu enggau kerejasama Komiti SKUAD Anti Dadah Pelilih Sibu, ba Dataran Terendak, Taman Tasik Permai, pagi tadi.

Berambai jaku “Singkang Bepengerai, Komuniti Bibas Dadah”, program tu ngembuan tuju deka nerenakka pengawa idup bepengerai ba komuniti, kelimpah ari ngenegapka pengawa nagang salah guna dadah nengah chara bepelasarka komuniti ti lebih lantang sereta meruan.

Pengerami ngelancharka pejalai kaki penyauh dua kilometer nya udah dipenyadi Kaunsilor Majlis Perbandaran Sibu, Michelle Law Wan Ling, urung pukul 6.30 pagi.

Sama bisi datai Ketuai AADK Pelilih Menua Sibu, Azimah Marsid; Chairman JK SKUAD, Raden Khairulzaman Raden Bustari; Ketuai Kaunsil Pengelikun Menua (Majlis Keselamatan Negara) Pampang Sibu, Nur Syahirah Samsul; enggau Pemesai Pentadbiran Opis Residen Bagi Menua Sibu, Macgyver Boi.

Sepemanjai program nya, aktiviti ngagihka pamphlet penyedar anti-dadah mega dipejalaika nengah inisiatif PESADA ari kaban SKUAD Anti-Dadah, ti mega dibantu enggau penatai khas ari raban ‘Finalis Mrs of Malaysia-Borneo 2026’ dalam pengawa ngerembaika komuniti enggau penyereta ngagai pengawa nganjung.

Berebak enggau nya, Kaunsil Pengelikun Menua mega bisi madahka pengawa ngatur Pekit Video Kreatif beserimbai enggau Bulan Pengelikun Menua ti nyendiaka perais besai RM1,500 enggau peluang masuk Grand Finale.

Program tu mega disukung mayuh bengkah piak nyengkaum Sapit JK SKUAD, Mohamad Mostapha Lasot; Pengarah Negeri Mrs Malaysia-Borneo, Sharon Frederick Asu; Penerbit Lagu “Panggau Buluh Pengerindu”, Lembat Imban (Embat Lala); sereta Chairperson Gerempung Pengarang Berita Sibu, Florence Nervyn, begulai enggau raban pengereja pengawa AADK enggau JK SKUAD.

Pengawa ngatur Program Brisk Walk 2.0 dipeda udah mujur nyapai juluk ngenegapka penyedar mensia mayuh senentang penusah dadah, seraya mega meransang kaul komuniti dalam aktiviti ti bepengerai sereta meri penguntung. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

LIMBANG, 9 Mei — Inisiatif Kaunsil Pelilih Limbang ti meri kelala konsep “Pesta Tanpa Sampah” sepemanjai pengawa ngatur program nya nerima puji ari Sekretari Politik ba Opis Premier Sarawak Pandang Semat.

Iya ti ngarika Menteri Penyerakup Menua, Dato Sri Aaron Ago Dagang madahka inisiatif nya dianggap nyadi singkang proaktif dalam nambahka penyedar mensia mayuh ba pengawa nyaga rampa menua, ngurangka pengawa ngena plastik sekali guna enggau chara pemeresi ti meruan agi.

Kenu ku iya, chara tu setipak enggau aspirasyen Malaysia MADANI ti ngemeratka pemansang inklusif, meruan sereta bepalan ba pengelantang pendiau rayat.

Iya mansutka jaku lebih bejadika Pengerami Nangguhka Bazar Gawai Medamit Agro-Tamu Limbang 2026.

Ngelansa pasal pemar ke nyadi diatu, iya nyemetak madahka pemesai guna ngenegapka ekonomi rayat ba renggat baruh berindik ari gaya ekonomi dunya ke enda tentu, ungkus pengidup ke majak niki sereta pemar pengelikun pemakai.

Perintah Besai ku iya, terus ngemeratka pemansang sektor betanam betupi enggau industri pemakai nengah bemacham inisiatif, bantu enggau program pemansang orang dagang dikena nentuka pengelikun pemakai menua terus dijaga.

“Pengerami Bazar Gawai Medamit Agro-Tamu Limbang 2026 diatur tu, kelai pemujur program ke diatur bepelasarka ekonomi rayat enggau pengawa ngenegapka komuniti menua pesisir di pelilih menua tu.

“Aku ngarika YB Menteri, meri besai terima kasih ngagai Komiti Tamu Medamit Limbang enggau Kaunsil Pelilih Limbang ketegal pemujur pengawa ngatur program manner enggau efektif,” ku iya.

Nitihku iya, pengawa ngatur Bazaar Gawai Agro-Tamu Medamit ukai semina nyadi pelasar dikena ngerami budaya enggau main asal komuniti lokal, tang mega nyadi pengepun ngenegapka ekonomi komuniti nengah penyereta orang dagang mit, pekebun, orang betupi enggau pedagang tamu.

Iya mega ngenataika pengaga ati ngagai genap 10 taun penumbuh Tamu Medamit Limbang, ti dipadahka nyadi siti pemujur ti chukup besai asil ari komitmen enggau kerejasama ti enda ngetu ari komuniti menua nya dalam ngemansangka ekonomi kandang menua Medamit.

Berebak enggau nya, Perintah Sarawak nengah Strategi Pemansang Pasca COVID-19 2030 (PCDS 2030) mega ngenegapka agenda pemansang menua pesisir nyengkaum transformasyen betanam betupi moden, ekonomi digital enggau nambahka penatai pemisi rayat.

“Projek Jalai Penyambung Sarawak-Sabah Fasa 2 (SSLR2) ti mungkur kandang menua Limbang mega laban ulih ngemanahka rentayan komunikasyen, nyungkak aktiviti ekonomi sereta muka mayuh agi peluang ngagai komuniti menua nya,” ku iya.

Iya mega ngenataika pengaga ati ngagai semengat penyerakup ti dipandangka komuniti pupu bansa sepemanjai program nya, ti dianggap nyadi kelai penegap ke bendar Sarawak dalam penyelai budaya enggau jalai pengarap.

Pengerami Gawai ku iya, ukai semina pengerami budaya aja, tang nyadi kelai terima kasih, begulai sereta beterima kasih ngagai asil pengawa komuniti. -RBI

#ruaiberitaiban#newsiban#beritaiban

Rindu | Titih | Kunsika

KUCHING, 9 Mei — Serakup Graduet Dayak Sarawak (SDGA) meri pengaga ati sereta puji ngagai Dr Florianna Lendai Anak Michael Mulok ke udah nerima Anugerah Perkhidmatan Cemerlang (APC) 2025 beserimbai enggau Majlis Anugerah Cemerlang UNIMAS (MAGU) 2026.

Nengah penerang dikunsika SDGA madahka pemujur nya nyadi pengangkun ti besai reti ngagai dedikasyen enggau komitmen Dr Florianna dalam bidang pelajar enggau pemansang modal mensia di Sarawak.

“Dr Florianna ti mega ex-Sapit Presiden gerempung tu udah bejalaika tanggungpengawa ke beguna dalam ngenegapka pengari graduet Dayak, ngangkatka pemansang profesyenal enggau ngenegapka pengawa nyadi ketuai bepelasarka komuniti.

“Pemujur iya ukai semina pekara ti dikemegahka diri empu aja, tang mega mandangka penambah pemeri raban profesyenal enggau pelajar Dayak dalam nempa modal mensia enggau penau Sarawak jemah ila,” ku penerang nya.

SDGA mega nerangka pemujur nya nyadika kelai enggau nilai pengeliat ati, dedikasyen sereta komitmen tinggi ti dikembuan Dr Florianna sepemanjai pengawa iya.

Gerempung nya mega ngambi jaku peransang Dr Florianna, “Kereja enggau pengerindu. Lebuh nuan ngepunka sesebengkah pengawa, tembuka enggau manah lalu anang ngereja iya setengah jalai.”

Berebak enggau nya, SDGA ngarapka pengawa ngaku nya ulih meri inspirasyen ngagai mayuh agi raban nembiak Dayak enggau graduet Sarawak ngambika terus nampung penyulut dalam pelajar, servis profesional enggau nyadi ketuai, seraya terus komited meri bantu ngagai pemansang komuniti enggau nengeri Sarawak. -RBI

#ruaiberitaiban#newsiban#beritaiban

Rindu | Titih | Kunsika

Kredit sumber, grafik — Sarawak Dayak Graduates Association

LIMBANG, 9 Mei — Perintah udah ngungkupka semak RM100,000 ungkup kereja nyeruri infrastruktur enggau perengkaguna ba Sekolah Kebangsaan (SK) Lubok Tekurok, berindik ari isu tanah tusur enggau ampuh bah ti benung ngeruga pengelikun enggau pengelantang kandang sekula.

Menteri Pelajar, Fadhlina Sidek madah, isu nya dikelala maya penemuai ‘Tindak Susul Parlimen’ ngagai sekula nya, lebuh iya empu dibai meresa empas ari tanah tusur ba tebing sungai ti meri empas terus ngagai kandang sekula nya.

“SK Lubok Tekurok ke dilawa kami maya program Tindak Susul Parlimen lemai kemari betapi enggau isu bekaul enggau tanah tusur sereta ampuh bah ti ngasuh sekula nya enda kondusif.

“Aku minta atur dipejalaika enggau lengkas dikena mutarka isu ke udah nyadi,” ku iya.

Nitih ku iya, agih belanja ke diungkup nya dikena nentuka kereja ngintu ulih dipejalaika enggau lengkas ungkup pengelikun nembiak, pengajar enggau semua staf sekula.

Berebak enggau nya, SK Lubok Tekurok mega benung diperunding ungkup chara mutarka pekara nya dalam timpuh ke panjai nyengkaum perambu mindah ngagai endur ke baru, likun agi sereta engkeman agi, nyema gaya nya begunaka nya.

“Kitai naka ulih gawa ungkup bala nembiak, pengajar enggau semua peranak SK Lubok Tekurok,” ku iya nambah.

Perintah deka terus mansik isu tu enggau komprehensif enggau ejensi ti bekaul dikena nentuka atur mutarka penanggul ti diambi nya meruan sereta efektif. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Fadhlina Sidek

KUCHING, 9 Mei — Sepenyampau empat Rang Undang-Undang (RUU) deka dibantai ba Aum Keterubah Penggal Kelima Aum Kunsil Nengeri (DUN) Sarawak Ke-19 ti diperambu deka diatur kena 11 ngagai 20 Mei 2026 ba Kompleks DUN Sarawak.

Speaker DUN Sarawak, Tan Sri Datuk Amar Mohamad Asfia Awang Nassar madah, pengawa mantaika rang undang-undang perintah ulih menteri ke megai tanggungpengawa deka dipejalaika kena 12 enggau 14 Mei 2026.

Nitihku iya, empat rang undang-undang ti deka dibantaika iya nya Rang Undang-Undang Bekalan Tambah (2025) 2026, Rang Undang-undang Bekalan Tambah (2026) 2026, Rang Undang-Undang Kaunsil Padi enggau Beras Sarawak 2026 enggau Rang Undang-Undang Kaunsil Pemansang Ekonomi Sarawak (Ubah) 2026.

Aum DUN tu dikearapka deka ngemeratka agenda pemansang nengeri, ngenegapka ekonomi enggau pengawa perintah ti enda ngetu dalam meri kuasa ngagai pengelantang pendiau rayat Sarawak.

Premier Sarawak, Datuk Patinggi Tan Sri Abang Abdul Rahman Johari Abang Openg sehari tu mega bisi ngulu Aum Pra Kaunsil enggau Supreme Kaunsil Parti Pesaka Bumiputera Bersatu (PBB) beserimbai enggau sesi ke diatur ba Indu Opis PBB, Jalai Bako, ditu.

Sama bisi datai Sapit Premier Sarawak, Datuk Amar Douglas Uggah Embas, Datuk Awang Tengah Ali Hasan enggau Datuk Amar Sim Kui Hian, sereta bala menteri kabinet, menteri muda enggau Kaban Kunsil Nengeri (ADUN) Sarawak. -RBI

#ruaiberitaiban#newsiban#beritaiban

Rindu | Titih | Kunsika

BINTANGOR, 9 Mei – Siku lelaki peranak Bangladesh bebadi nyawa pengudah dipechayaka kena lantak lori ba sebengkah penusah bebadi jalai alun di Jalai Serdeng semak simpang Kampung Jaluh Baru, pagi tadi.

Ketuai Polis Pelilih Meradong, DSP Tansli Mering madah, penusah nyadi urung pukul 8.50 pagi lalu mungkur sebuah lori enggau siku orang ke bejalai kaki.

Tudah dikelala enggau nama Md Fazlur Rahman, 40, ke gawa nyadi pekereja ngaga jematan, dientaska bebadi ba palan penusah nyadi ketegal balat bakal ba pala.

Nitihku iya, pansik tumu tetemuka lori nya benung bejalai ari tunga Semop nuju Sibu sebedau datai ba palan penusah ke nyadi lebuh tudah ke ba tisi kiba jalai nya dipelabaka ngenyit ngelayang jalai.

“Ketegal takah ti semak, deriba lori enda sempat nyeliahka diri ari ngelantak tudah,” ku iya nengah penerang media sehari tu tadi.

Tubuh tudah udah dianjung ngagai Sepital Sarikei ngambika diperesa tasat.

Ku iya nambah, Kedutaan Bangladesh udah dipadah pasal penusah nya, seraya menijar SACC Engineering Sdn Bhd mega bisi datai ngagai balai polis mantu pekara enggau pansik ke silik agi.

Kes tu dipansik ari baruh Seksyen 41(1) Akta Pengangkutan Jalan 1987 lalu pansik silik agi dipejalaika.

Berebak enggau nya, raban polis ngelalau mensia mayuh ngambika seruran ngasika atur jalai alun, deriba enggau bejimat sereta nemu gaya rampa menua dikena nyeliahka sebarang penusah ke enda dikedekaka nyadi.-RBI

#ruaiberitaiban#newsiban#beritaiban

Rindu | Titih | Kunsika