KAPIT, 17 Mei — Pengawa bejalaika Projek Transformasyen Menua Pesisir (RTP) di Rumah Sebelie Ngilai, Nanga Dap, Batang Rajang majak ngenegapka agenda pemansang infrastruktur menua pesisir di kandang menua Kapit nengah agih belanja ti diungkupka pengari rayat.

Kaban Kunsil Nengeri (ADUN) Pelagus, YB Wilson Nyabung Ijang, udah ngungkupka agih belanja RM300,000.00 ungkup pengawa ngangkatmanah Rumah Sebelie Ngilai ti mungkur pengawa ngaga siling rumah, wayar karan, masang lampu siling enggau kipas ungkup semua 50 pintu rumah panjai.

Pengerami bejadika projek RTP enggau Ketuai Begulai enggau Rayat dipenyadi Kaban Parlimen Kapit YB Dato Sri Alexander Nanta Linggi, ti mega ngungkupka agih belanja tambah RM408,000.00 dikena masang lantai mosaik ba rumah panjai nya.

Nitih ku YB Wilson Nyabung Ijang, pengawa bejalaika projek tu asil kerejasama rat entara pengari rayat ba renggat Dewan Undangan Negeri enggau Parlimen dalam nentuka pemansang ulih dikenataika enggau lebih komprehensif sereta meri penguntung terus ngagai rayat.

“Kerejasama tu ngemendarka pekara pemun mensia mayuh ditangkup enggau lebih teratur, lantang sereta bekualiti,” ku iya.

Iya mega ngarapka semua projek ke dipejalai nya ulih meri pemaik ungkup timpuh ke panjai sereta ngangkatka kualiti pengidup peranak Rumah Sebelie Ngilai enggau kandang ngelingi Kapit.

Sama bisi datai ngerichahka agi pengerami nya Sekretari Politik ngagai Menteri Kereja Raya Datuk Alvin Runggah Jimbun, Pemesai Opis Pelilih Kapit, pengari Residen Bagi Menua Kapit, pengari opis perintah, kaunselor, ketuai kaum enggau ketuai komuniti setempat. — RBI

KAPIT, 17 Mei — Pemansang menua pesisir di Bagi Menua Kapit majak ditegapka nengah kerejasama rat entara Perintah Besai, Perintah Nengeri enggau bala ketuai kandang menua dalam nentuka pengelantang pendiau rayat majak dijaga.

Kaban Parlimen Kapit, Dato Sri Alexander Nanta Linggi madah, rumah panjai ukai semina endur ngenduh aja, tang nyadi kelai penyerakup, pesaka enggau penegap komuniti Iban di Sarawak.

Iya madah munyi nya lebuh ngulu Aum Ketuai Begulai Enggau Rayat di Rumah Seblie Anak Ngelai, Nanga Dap, Batang Rajang, Kapit, sehari tu tadi.

Kenu ku iya, komitmen ngagai pemansang Kapit mengkang dikemerat taja iya mega megai tanggungpengawa nyadi Menteri Kereja Raya ba renggat nasional.

“Nyadi Kaban Parlimen Kapit pengelama lebih 27 taun, aku amat beterima kasih ngagai genap peluang ulih limpang sereta betemu enggau rayat, mendingka utai ke diguna komuniti sereta meda pemansang pemansang di menua pesisir,” ku iya.

Iya nyemetak madahka pemansang semina ulih ditegapka nengah kerejasama strategik semua piak nyengkaum Kaban Parlimen, Kaban Kunsil Nengeri (ADUN) enggau ketuai renggat baruh ti gawa nyadi siti tim.

Berebak enggau nya, iya madahka bemacham projek pemansang udah sereta benung dipejalaika di Bagi Menua Kapit ti mungkur infrastruktur jalai alun, jematan, bekal ai, bekal elekterik enggau perengkaguna mensia mayuh nyengkaum Projek Transformasyen Menua Pesisir (RTP).

Entara batang projek ti benung dipejalaika iya nya Jalai Nibong/Tada nuju Sungai Belawai, ngaga jematan meraka Batang Rajang di Sungai Belawai, pia mega Jalai Nanga Belawai nuju Nanga Seranau, kelimpah ari merambu pengawa ngemesaika rentayan komunikasyen ba kandang endur ngelingi Kapit.

Dalam timpuh tiga taun lima bulan iya ngiring Opis Menteri Kereja Raya, agih belanja Perintah Besai ngagai Bagi Menua Kapit udah manggai lebih RM2.1 bilion.

“Tu nyengkaum lebih RM300 juta ungkup Jematan Sungai Belawai ti meraka Batang Rajang, lebih RM400 juta ungkup Jalai Nanga Belawai nuju Nanga Seranau, sereta mega bejalaika projek baka Kolej Profesional MARA, Indu Opis Polis Pelilih Kapit ke baru sereta bemacham infrastruktur ke bukai,” ku iya.

Iya mega nerangka isu Jalai Jiwa Murni deka terus diberi perati taja pan jalai nya enda digaga nitihka spesifikasyen Opis Kereja Raya, lalu chara mutarka penanggul nya deka dipejalaika begulai enggau ADUN kandang menua nya, Perintah Nengeri enggau ejensi ke bekaul.

Nambahka nya, iya madahka Projek RTP nya siti pengawa ti enda ngetu dikena ngangkatka perengka guna pemun enggau pengelantang pendiau rayat ba renggat pun menua.

Bela bisi dikerandau iya nya pengawa bejalaika Sistem Bekal Kuasa Karan Solar (SARES) nyadi inisiatif sementara dikena nentuka komuniti menua pesisir terus bisi akses ngagai kuasa karan sebedau sambung grid penuh ulih Sarawak Energy.

Ba pengerami ke sama, iya bisi madahka agih belanja penyampau RM250,000 ungkup projek bekal ai Rumah Seblie Anak Ngelai sereta mega RM5,000 ngagai Biro Indu ungkup 20 buah rumah panjai ke nadai nerima agih belanja sebedau tu.

Iya mega bisi madahka projek ngangkatmanah Rumah Panjai Rumah Rh. Tang Anak Kok ti mungkur pengawa masang tile ba ruai rumah panjai ti beungkus RM408,000.

“Pemansang di Kapit majak mansang lalu deka majak ditegapka. Nadai sitak deka tinggal,” ku iya.

Iya nyemetak madahka kerejasama ti seruran dipejalaika entara semua renggat ketuai enggau komuniti deka nentuka mayuh agi pemansang ulih dipejalai ungkup pemaik rayat menua pesisir.

Pengerami nya dipenyadika enggau pengarap ngambika Rumah Seblie Anak Ngelai terus nyadi palan penyerakup komuniti, pesaka enggau semengat begulai ungkup rebak diatu enggau jemah ila.

Penemuai nya bela digulu Kaban Kunsil Nengeri (ADUN) Pelagus, Wilson Nyabong Ijang enggau Sekretari Politik Menteri Kereja Raya, Datuk Alvin Runggah Jimbun.— RBI

SPAOH, 17 Mei — Pengerami Pekit Futsal Bukit Saban 2026 ti diatur pengelama tiga hari berengkah 15 nyentuk 17 Mei ba Gelanggang Futsal Spaoh mujur ngempuruka penyereta mayuh bengkah tim, lalu enggau nya meransang semengat lumba enggau main sereta penyerakup entara komuniti lokal.

Nitihka penerang ari Kaban Parlimen Betong, Dato Dr Richard Rapu, iya ngarika Sapit Premier Sarawak, Datuk Amar Douglas Uggah Embas, Menteri Wang enggau Ekonomi Baru II, Menteri Infrastruktur enggau Pemansang Palan Penyangkai Kapal Sarawak, ti mega Kaban Kunsil Nengeri (ADUN) Bukit Saban udah ngulu pengerami Nangguhka Pekit Futsal Bukit Saban 2026.

Ku iya, pengawa ngatur karnival tu nyadi pelasar ke beguna dalam nyerungkai penau raban nembiak kelimpah ari meransang kaul komuniti dalam aktiviti ke bepengerai sereta meri penguntung.

“Karnival baka tu ukai semina nerenakka semengat lumba enggau main, tang mega ngerapitka kaul bakih sereta ngenegapka penyerakup entara komuniti,” ku iya dalam penerang nya.

Berebak enggau nya, iya mega meri besai terima kasih ngagai semua tim ke ngambi bagi sereta pengatur pekit ke udah bebendar sereta bebendar ngemujurka pekit nya enggau penuh ulah lumba enggau main.

Ku iya nambah, lumba enggau main sereta program beorientasyenka komuniti baka nya patut diteruska belama nyadi medium positif dalam nempa raban bansa ti regas, bepengerai sereta beserakup. — RBI

KUCHING, 17 Mei — Direktor Opis Kereja Raya Sarawak, YBhg. Datu Adj. Prof. Ts. Gs. Br. PMr. Dr. Cassidy anak Morris begulai enggau bini iya, Datin Bibiana anak Thomas Manggang ngulu Pengerami Mantar Gawai Dayak 2026 ti diatur Kelab Sosial & Rekreasyen Saribas Kuching ti diatur dalam gaya ti richah sereta lantang kemari.

Pengerami nya mega dirami enggau penatai Temuai Dipebasa, Datuk Amar Douglas Uggah Embas begulai enggau bini iya, YBhg. Dato Doreen Mayang.

Bemacham aktiviti diatur sepemanjai pengerami nya nyengkaum pengawa nyuaka insentif pelajar ngagai nembiak ke nyulut sereta meri terima kasih ngagai penerima anugerah dikena ngaku pemanah enggau pemeri sida ngagai komuniti.

Dalam jaku dipansutka iya, YB Datuk Amar Douglas Uggah Embas ngemeratka pemesai guna pangku pengawa raban nembiak dalam ngenegapka komuniti sereta nentuka pesaka budaya enggau main asal komuniti terus ditan sereta dipeturun ngagai rebak dudi hari.

Iya mega madahka pengerami baka Mantar Gawai Dayak ukai semina nyadi pelasar ngerapitka kaul enggau penyerakup komuniti, tang mega bejalaika tanggungpengawa ti beguna dalam ngetanka identiti enggau nilai budaya komuniti Sarawak ti mayuh pupu bansa.

Pengawa ngatur pengawa tu mandangka komitmen komuniti ti seruran nerenakka semengat begulai, bebaik sereta angkunka pesaka asal ti nyadi pelasar penegap komuniti di nengeri tu. — RBI

KOTA SAMARAHAN, 17 Mei — Pengawa muka Jematan Batang Lupar 1 dikearapka nyadi siti agi pemujur ke beguna dalam pemansang rentayan infrastruktur Sarawak, kelebih agi dalam ngemanahka sambung jalai darat enggau mobiliti peranak menua pesisir.

Pekara tu diperatika lebuh Direktor Opis Kereja Raya Sarawak, Datu Dr.Cassidy Morris sehari tu bejalaika penemuai nyediaka diri beserimbai enggau Pra-Bejadika Jematan Batang Lupar 1 ti diperambu deka diatur kena 21 Mei 2026.

Penemuai nya ngembuan tuju beratika baru tikas penyikap kepenudi projek ti ngaul aspek pengelikun, ngatur arus trafik, perengka guna penguna jalai alun sereta mega koordinasyen operasyen enggau ejensi sereta piak ti bekaul sebedau jematan nya dibuka ngagai mensia mayuh.

Sama bisi diberi perati rambau penemuai nya iya sukut teknikal kepenudi sereta mega penyikap raban pengatur dikena nentuka proses bejadi ulih dipejalaika enggau lanchar sereta teratur.

Pia mega, penemuai nya sebagi ari pengawa nentuka semua komponen infrastruktur enggau sistem operasyen ba tikas ti optimum dikena nentuka operasyen lanchar enggau pengelikun penguna. — RBI

KOTA SAMARAHAN, 17 Mei — Direktor Opis Kereja Raya Sarawak, YBhg. Datu Adj. Prof. Ts. Gs. Br. PMr. Dr. Cassidy Morris sehari tu bejalaika penemuai, meresa pengawa nyediaka diri beserimbai enggau Pra-Bejadika Jematan Batang Lupar 1 ti diperambu deka diatur kena 21 Mei 2026.

Penemuai nya ngembuan tuju beratika baru tikas penyikap kepenudi projek ti ngaul aspek pengelikun, ngatur arus trafik, perengka guna penguna jalai alun sereta mega koordinasyen operasyen enggau ejensi sereta piak ti bekaul sebedau jematan nya dibuka ngagai mensia mayuh.

Nitihka penerang JKR Sarawak, penemuai nya sebagi ari pengawa nentuka semua komponen infrastruktur enggau sistem operasyen ba tikas ti optimum dikena nentuka operasyen lanchar enggau pengelikun penguna.

Pengawa pra-muka jematan nya dikearapka nyadi siti agi pemujur ke beguna dalam pemansang rentayan infrastruktur Sarawak, kelebih agi dalam ngemanahka penyambung darat enggau mobiliti peranak menua pesisir.

Bela diberi perati rambau penemuai nya iya nya sukut teknikal kepenudi sereta mega penyikap raban bejalaika pengawa dikena nentuka proses bejadi ulih dipejalaika enggau lanchar sereta teratur. — RBI

SEBUYAU, 17 Mei – Sepenyampau 10 iku nembiak program Pelajar Pansik Politik enggau Perintah Taun 1, Universiti Malaysia Sarawak (UNIMAS) udah bejalaika kereja ba luar kampus nengah chara bejalaika pansik bekaul enggau guna teknologi pemadah enggau penyambung (ICT) ba peranak di Kampung Mambai, Sebuyau.

Program tu betuaika Mas Euodia Nalla anak Henry begulai enggau bakih nembiak ke bukai nyadi sebagi ari pengawa akademik sida beratika tikas guna enggau penerang ICT dalam pengidup komuniti menua pesisir.

Pengawa mansik nya mega nerima kerejasama ke manah ari sepenyampau 25 iku peranak Kampung Mambai Sebuyau ti betuaika Ketuai Kaum Aden anak Teruki sepemanjai program nya dipejalaika.

Nitihka penerang pengari nembiak, sida amat beterima kasih ngagai bantu enggau sukung ke udah diberi Chew Choon Man, Sapit Menteri Dagang Temuai, Seni enggau Main Asal ke mega Kaban Parlimen Miri, sereta mega Allan Siden Gramong, Kaban Kunsil Nengeri ( ADUN) N.50 Machan, ke udah mantu ari sukut belanja enggau program ke diguna sepemanjai taun.

Sida mega nerangka sukung nya amat besai reti dalam nentuka pansik ulih dipejalaika enggau lanchar, kelimpah ari meri peluang ngagai nembiak ngelawa komuniti sereta meretika pemar ke bendar bekaul enggau pengawa ngena ICT di menua pesisir. – RBI

KOTA SAMARAHAN, 17 Mei – Projek ngaga Jalai Kedua Sarawak (SSTR) Pakej A1-B terus ngenegapka pengawa Perintah Sarawak dalam ngemansangka rentayan jalai alun ti moden, likun sereta tegap dikena ngemanahka agi penyambung sereta nyungkak pemansang kandang menua pesisir nengeri tu.

Direktor Opis Kereja Raya Sarawak, Datu. Dr.Cassidy Morris sehari tu udah bejalaika pengawa matau ngagai palan projek SSTR Pakej A1-B di Samarahan dikena beratika pejalai pengawa bejalaika projek ti meri empas tinggi nya.

Projek tu mungkur pengawa ngaga jalai baru empat lurung dua jalai sepemanjai 13.724 kilometer berengkah ari CH8+150 ngagai Batang Sadong, nyengkaum ngaga jalai betingkat sepemanjai urung 11.4 kilometer.

Pengawa ngaga jalai betingkat nya dikearapka nyadi siti ari komponen besai dalam ngemanahka agi arus trafik kelimpah ngurangka risiko tejanggal ketegal ampuh bah ba kandang endur ke baruh ti suah ampuh, kelebih agi maya hari enda manah.

Kelimpah ari nya, projek tu mega bejalaika tanggungpengawa ti beguna amat dalam ngenegapka sambung jalai alun entara menua pesisir enggau palan penumbuh besai, lalu enggau nya muka mayuh agi peluang pemansang ekonomi enggau rama ngagai peranak menua nya.

Dalam nentuka perengka guna jalai alun ke menyana sereta nyamai agi, skop projek tu mega nyengkaum pengawa ngaga jalai standard R5 sepemanjai urung 2.3 kilometer, kereja sistem parit enggau entali ai, pengawa ngaga tiga jematan, pusin U, simpang lampu trafik enggau lampu jalai alun.

Pengawa bejalaika projek tu ngena chara teknologi moden ngayanka komitmen Opis Kereja Raya Sarawak ti seruran bebendar nyendiaka infrastruktur jalai ti bekualiti tinggi ungkup pengelantang rayat enggau pemansang ti meruan di nengeri tu. – RBI

LONDON, 17 Mei – Manchester City mujur ngalahka Chelsea 0-1 ba final Piala FA ba Stadium Wembley ketegal gol laun diasilka individu iya nya Antoine Semenyo.

Antoine Semenyo mansutka diri nyadi hero main ba minit ke-72 lebuh iya nembuka anjung bol ti manah ari Erling Haaland enggau penamat ti bekualiti tinggi.

Penyerang nya ngaga pejalai sikar sebedau ngerebut bol ngena tumit kaki kanan ti ngalahka penyaga gol Robert Sánchez.

Gol nya nyadika bida entara kededua tim nya, lalu enggau nya meri gelar champion Trofi FA ngagai Manchester City.

Pemenang nya mega nembuka siti agi trofi domestik ungkup City pengudah pemujur sida ba pekit Trofi Carabao sebedau tu, kelimpah ari ngujungka beberapa siri alah ba renggat kepenudi sebedau tu.

Ba Chelsea, alah tu nyadika siti agi pengasa ati ba final Piala FA, lalu enggau nya ngujungka musim tu nadai sebarang trofi.

Chelsea dipeda tusah deka ngelaban tempo main ba setengah main kedua taja pan nguji ngaga sekeda ubah taktikal, tang enda mujur rembus ngagai City.

Manchester City nguasa main enggau chara ke lebih teratur ba minit kepenudi dikena nentuka pengelebih sigi gol mengkang nyentuk ke wisel kepenudi disepu. — RBI

SIMANGGANG, 17 Mei – Pengawa bejalai “Niti Daun” beserimbai enggau Pengerami Gawai Dayak 2026 renggat Sri Aman udah diatur enggau penyereta 26 kontinjen ari bemacham bansa enggau tikas pengidup ba Stadium Mini MDSA, pagi tadi.

Pengawa bejalai nya dipenyadika Datuk Francis Harden Hollis Sapit Menteri Pemansang Bakat Sarawak begulai enggau bini iya Datin Simba Nalang.

Sama bisi datai Kaban Parlimen Sri Aman Dato Sri Doris Sophia Brodie sereta mega Kaban Kunsil Nengeri (ADUN) Bukit Bangunan Datuk Mong Dagang.

Pengawa bejalai nya mungkur empat kategori iya nya NGO, opis perintah, rumah panjai enggau institusyen, ke alai tetiap kontinjen mandangka pekayan asal etnik Dayak ke bechura sereta chukup manah.

Ba jaku bejadika pengerami nya, Francis Harden madahka pengawa ngatur “Niti Daun” ukai semina kelai pemungkal Pengerami Gawai Dayak, tang mega nyadi pelasar ti beguna dalam ngenegapka penyerakup enggau semengat bebatak asur entara bansa di Sarawak.

Ku iya, penyereta bemacham pupu bansa nyengkaum Melayu, Cina enggau Dayak ba pengawa bejalai nya ngayanka pengelantang rayat Sarawak meruan teguh sereta nyadi chunto penyerakup ke pemadu manah di menua tu.

“Kitai berasai temegah ati laban ketuai Sarawak ti entap udah nyamin pengelepas rayat ngintu pengerami budaya dalam gaya likun enggau pengelantang,” ku iya.

Berebak enggau nya, iya mega ngelalau komuniti Dayak ngintu pengerami Gawai enggau umbas iya sereta ngemeratka pengelikun maya pulai ke menua asal ngintu pengerami begulai enggau diri sebilik sereta bala bakih.

Sama bisi datai iya nya Residen Bagi Menua Sri Aman Mahra Salleh, Ketuai Polis Pelilih Sri Aman Denis Bunyam enggau Chairman MDSA Anthony Abell Chendan.  – RBI