KUALA LUMPUR, 6 Mei — Perintah MADANI komited nentuka semua rayat Malaysia ulih ngasaika pekit Piala Dunya FIFA 2026 ti ditabur enggau chara inklusif, entas sereta komprehensif nengah kerejasama strategik enggau sektor peribit.
Menteri Komunikasyen Fahmi Fadzil madah, pengawa nya dikena nentuka kualiti penabur ke tinggi seraya mega ngerembaika penyampau ngagai bala peminat di serata menua.
Nitih ku iya, sepenyampau 104 iti main penuh deka ditaburka sepemanjai pekit tu, ti mungkur licha besai ari penabur rasmi menua tu, Radio Televisyen Malaysia (RTM) enggau Unifi TV.
“Semua main deka ditabur terus nengah Unifi TV, lalu RTM deka mantaika tebal agi main sekalika terus tauka laun,” ku iya.
Kelimpah ari penabur televisyen, mensia mayuh mega ulih nitihka main nengah mayuh bengkah pelasar nyengkaum MYTV Broadcasting ungkup penabur pechuma, kelimpah ari pelasar over-the-top (OTT) baka RTMKlik enggau Unifi TV.
Ngambika ngemuntangka penguna, aplikasyen RTMKlik ulih dibatak turun nengah Google Play enggau App Store, lalu enggau nya ulih ngasuh bala peminat meda main nya ba sebarang endur enggau sebarang maya.
Ari sukut isi, RTM mega bisi nyendiaka program tambah nyengkaum mandangka “Grandstand” khas ari Angkasapuri, bungkur dua jaku dalam Jaku Melayu enggau English sereta mega segmen khas dalam program Selamat Pagi Malaysia.
Inisiatif tu mandangka pengeransing perintah dalam nentuka rayat enda dikelaung ari ngasaika pengerami lumba enggau main pemadu besai di dunya, seriris enggau aspirasyen MADANI Malaysia ti ngemeratka inklusiviti enggau akses ti sebaka ngagai penerang enggau pemerindang. -RBI
SERIAN, 6 Mei — Program Sejambak Kasih Gawai Dayak 2026 ke diatur Opis Pengintu Pengelantang Raban Bansa Sarawak (JKMS) Bagi Menua Serian mujur diatur ba Rumah Panjai Kampung Daha Kisau, sehari tu, nyadi sebengkah ari inisiatif perintah ti seruran dipejalaika dalam ngenegapka agenda pengelantang pendiau komuniti di nengeri tu.
Pengerami nya dipenyadika Sapit Menteri Pemansang Pengelantang Komuniti Sarawak Yang Berhormat Datuk Haji Mohammad Razi bin Sitam, enggau penatai ketuai raban bansa, ketuai opis enggau peranak menua nya ke sama ngerichahka agi pengerami beserimbai enggau Gawai Dayak 2026.
Program tu entara agenda ninting taun JKMS ti ngemeratka pengawa ngenataika bantu pengelantang pendiau ngagai raban ke ditagit, kelebih agi orang tuai, ruang bilik kurang penatai pemisi enggau individu ti begunaka sukung rama, seriris enggau pengawa perintah ti seruran dipejalaika dalam nentuka pengelantang pendiau rayat terus dijaga.
Nitihka rikod JKMS Bagi Menua Serian, sepenyampau 2,126 iku penerima aktif entara komuniti Iban enggau Bidayuh udah dikelala ari baruh skim bantu ti dipejalaika.
Ari penyampau nya, 100 iku penerima udah nerima bantu simbolik dalam tukuh mata duit enggau hamper, lalu 2,026 iku penerima ke bukai udah nerima bantu ti dikredit terus ngagai akaun bank sida empu.
Chara nyalurka bantu terus ngagai akaun penerima tu mandangka komitmen perintah Sarawak nentuka sistem meri bantu lebih efisyen, terang sereta sistematik, kelimpah ari ngenegapka jalai pengelikun rama ba renggat baruh.
Berebak enggau nya, Kaban Kunsil Nengeri (ADUN) Tebedu, Dr Simon Sinang meri pengaga ati ngagai perintah enggau JKMS ti majak bebendar ngenegapka agenda pengelantang pendiau rayat, kelebih agi di menua pesisir, lalu ngarapka mayuh agi program baka tu ulih diteruska ungkup pemaik komuniti menua nya.
Program Sejambak Kasih tu ukai semina nyadi pelasar endur nyuaka bantu pengelantang pendiau, tang mega ngerapitka kaul entara perintah enggau rayat nengah chara ke lebih renggat baruh.
Sama bisi ngulu pengerami nya, Encik Mohammad Rashdan bin Hazami, pengari Residen Bagi Menua Serian; Cik Noor Shafriena binti Ramzi, pengari Pemesai Pelilih Tebedu; YDH enggau Supt. Freddy Bian, Ketuai Polis Pelilih Menua Serian; ketuai opis enggau pengari ejensi perintah, kaunselor Kaunsil Pelilih Serian, ketuai komuniti, ketuai genturung pendiau enggau peranak menua nya. — RBI
BINTULU, 6 Mei – Siku nembiak bansa Dayak ke diatu gawa nyadi injinir ba kilang BMW di Munich, Jerman udah mujur nguna teknologi ‘pemintar tiru (AI) dikena nambahka penguntung kilang minyak sawit di Sarawak, ti ngayanka penau menua tu ulih besemekih sereta meri empas ke bendar ba renggat dunya.
Cherita pemujur nya dikunsi Menteri Industri Pemakai, Komoditi enggau Pemansang Kandang Menua Sarawak, Dato Sri Dr.Stephen Rundi Anak Utom lebuh iya bejaku ba Pengerami Pengerami Ngabang Gawai 2026 di Dinner World Restaurant Bintulu, empai lama.
“Iya anak bansa kitai, ari komuniti kami. Iya bisi penemu lalu diatu benung gawa di Jerman. Iya udah ngayanka pekara tu ulih dikereja nengah AI,” ku Dr. Rundi.
Ku iya, nembiak nya ke enda disebut nama udah betemu enggau iya bedau lama tu tadi lalu bekunsika chara ngena AI ulih mantu kilang minyak sawit di Sarawak ngurangka uras sereta nyata nambahka pemansut.
Dr.Rundi ngena cherita tu dikena meransang komuniti Dayak ngambika lebih berani mantaika penau sida, enda nekul pemujur orang bukai dalam komuniti, lalu ke pemadu beguna, lebuh udah mujur, anang enda ingatka kaban belayan ke agi tinggal di belakang.
“Anang malu.Anang enggai mandangka penau diri.Lalu lebuh kita udah mujur, bai sida ke agi tinggal enggau kitai,” ku iya nambah.
Pengerami nya udah dipenyadika Sapit Premier Sarawak, Datuk Amar Douglas Uggah Embas, nyadi temuai dipebasa. -RBI
BINTULU, 6 Mei – Gawai ukai semina beterima kasih ke asil ke udah lepas, iya mega betanya ke asil ke deka datai. Berapa, lalu enggau nama chara lalu nama teknologi ke ulih nulung, ku Menteri Industri Pemakai, Komoditi enggau Pemansang Wilayah Sarawak Dato Sri Dr. Stephen Rundi Anak Utom.
Dalam jaku iya ti begulaika dalam Jaku Melayu, Iban enggau Jaku English, dikena ngayanka realiti linguistik komuniti ke diasaika iya.
Dr.Rundi ke mega Kaban Kunsil Nengeri (ADUN) Kemena, ngemeratka tiga bengkah teknologi ke dipadahka iya beguna amat ungkup orang betanam betupi Dayak ambi meretika sereta ngemeranka iya nya AI, IoT, enggau betanam betupi pintar.
“Ukai semina jaku aja. Tu meri chunto tegap sereta sema siku nembiak bansa Dayak ke gawa nyadi injinir ba BMW di Munich, Jerman, ke udah ngayanka AI ukai semina kereban dikena kompeni besai antarabansa aja, iya ulih dikena nambahka penguntung kilang minyak sawit di Sarawak,” ku iya
Tang pemar ke dikemeratka Dr.Rundi ngelui ari teknologi. Iya bekaul enggau runding.
Ku iya, pasal ulah betanam betupi ti enda berubah ari musin ngagai musin baru, ari taun ke taun, utai ti dikumbai iya betanam betupi enggau nadai “ati” tauka nadai berundingka rega pengawa ti bendar.
“Enti sepuluh taun tu, taun baru enda tau enda mayuh agi.Nya progresif.Kitai meseti bisi pulai positif. Enti kitai alah, giga jalai bukai,” ku seraya meri peransang enggau semengat.
Iya nibarka jaku banding enggau peransang tu lebuh maya bejaku ba Pengerami Ngabang Gawai 2026 di Dinner World Restaurant Bintulu empai lama tu udah.
“Kitai enda ulih agi semina gaga sereta puas ati aja,” ku iya madah ngagai bala ke bisi datai.
Ba Dr.Rundi, dalam konteks Sarawak bejalaika Polisi Pemansang Pengudaj Covid-19 (PCDS 2030) enggau fokus ngagai kuasa gadung, ekonomi baru, sereta ngena teknologi maju, pesan iya malam nya ukai semina jaku lalau menteri ngagai rayat iya.
Tang pesan nya nyadika semengat ari pemerat ti diasaika komuniti Dayak ti bediri ba dua jalai entara tradisyen ti dikerinduka, enggau jemah ila ti minta ubah. -RBI
KUCHING, 6 Mei – Aum Komiti Penyerenih Peminta Bantu Wang Turu Rumah Sembiang Jalai Pengarap Bukai Renggat Keterubah taun tu diatur pengelama dua hari berengkah 4 ngagai 5 Mei tu tadi, dikena meresa tetiap peminta enggau silik sereta diserenih sebedau nganjung ngambika diperunding enggau silik agi.
Aum nya bechairmanka Direktor Unit Pekara Jalai Pengarap Bukai (UNIFOR), Dato Georgina Apphia Ngau dipunka enggau pengawa nyebut leka sampi nyadi sampi pemuka.
Ba sesi pagi, Pemesai Penyukat Kuantiti ari Opis Kereja Raya (JKR) Sarawak mega bisi dikangau meri penemu enggau servis meri lalau ari sukut teknikal, nyengkaum beratika baru spesifikasyen kereja enggau anggar ungkus projek.
Aum nya bejalaika tanggungpengawa ke berat dalam nentuka proses nyuaka bantu dipejalaika enggau terang, sistematik sereta bepelasarka guna ke bendar rumah sembiang jalai pengarap bukai di serata Sarawak.
Kelimpah ari nya, inisiatif tu mega ngenegapka kerejasama strategik entara UNIFOR enggau ejensi teknikal baka JKR Sarawak, lalu enggau nya nentuka pengawa bejalaika projek lebih efisyen sereta bekualiti sereta meri penguntung timpuh panjai ngagai komuniti lokal.- RBI
BETONG, 6 Mei – Siku lelaki peranak menua tu beumur 27 taun ditan raban Bagi Tasat Jenayah Narkotik Indu Opis Polis Pelilih Menua (IPD) Betong dalam operasyen Ops Tapis urung pukul 12.10 tengahari sehari tu laban dipelabaka bisi kaul enggau aktiviti salah guna dadah.
Nitihka penerang ari Ketuai Polis Pelilih Betong, DSP Wan Mohamad Ali bin Wan Malek, saspek ditan ba kandang menua Betong sebedau dibai ngagai IPD Betong ngambika atur silik agi dipejalaika.
Asil tisih ai kemi ti dipejalaika tetemuka saspek positif amphetamine enggau methamphetamine.
“Pansik silik mega tetemuka saspek ngembuan rikod ke udah bekaul enggau penyalah dadah,” ku iya nengah penerang media sehari tu tadi.
Kes tu dipansik ari baruh Seksyen 12(2) Akta Dadah Berbahaya 1952 ti nyendiaka ukum mata duit enda ngelui RM100,000 tauka jil nyentuk lima taun, enti dikenuku salah.
Saspek mega dipansik ari baruh Seksyen 15(1)(a) akta ke sama ti mai ukum enda ngelui RM5,000 tauka jil nyentuk dua taun.
Berebak enggau nya, polis ngemeratka komitmen sida deka terus ngelaban pengawa salah guna dadah di pelilih menua nya lalu enda deka belembut enggau sebarang piak ke bisi kaul.
Mensia mayuh mega dipinta ngenataika sebarang penerang bekaul enggau aktiviti dadah ngagai polis ngambika ulih mantu pengawa ngelaban dadah.
Penerang tau dikenataika terus ngagai Balai Polis Betong nengah lumur 083-472345. -RBI
SIMANGGANG, 6 Mei — Pengawa ngenegapka semengat beserakup entara komuniti pupu bansa meseti terus ditegapka nengah pengawa ngatur program enggau aktiviti komuniti ti enda ngetu.
Kaban Parlimen Sri Aman, Dato’ Sri Doris Sophia Brodie nyemetak madahka penyerakup dalam raban bansa ke mayuh macham baka nya di Sarawak beguna amat ukai semina ungkup penegap nengeri tu, tang mega laban tetiap komuniti begunaka pangan diri.
Kenu ku iya, pengelantang semina ulih ditan nengah semengat bebasa, meretika pangan diri sereta bebatak asur ke tinggi entara komuniti ari mayuh macham bansa enggau budaya.
“Nengah semengat beserakup ti tegap, kitai ulih idup begulai dalam pengelantang sereta terus ngasaika pemaik ti nyadi batang penegap Sarawak ngelama tu,” ku iya.
Iya madah munyi nya lebuh bejaku ba Pengerami Makai Lemai beserimbai enggau Konvensyen Ke-19 Persekutuan GerempungTeochew Sarawak ditu, kemari.
Ku iya, tetiap bansa enggau komuniti bisi penegap enggau pengelandik kediri empu ti ulih meri pemansang ngagai raban bansa enggau nengeri tu selampur.
Berebak enggau nya, Doris mega ngarapka konvensyen nya ulih nyadi pelasar ke beguna dalam berandauka tuju ke nyemetak dikena ngetanka pesaka enggau main asal komuniti Teochew ngambika seruran relevan ungkup rebak dudi hari.
Pengerami nya mega digulu kaban ari mayuh bengkah gerempung Teochew ari serata Sarawak, Sabah enggau Semenanjung Malaysia, nyengkaum Presiden Persekutuan Gerempung Teochew Malaysia. — RBI
LUBOK ANTU, 6 Mei — Aktiviti ngerupan ke diatur Komiti Pemansang enggau Pengelikun Genturung Pendiau (JKKK) Rumah Velly udah mujur dipejalaika enggau ngemeratka ngaga pintu penama besai enggau pagar rumah panjai dikena ngangkatka tikas pengelikun sereta ngerindang rampa genturung pendiau.
Nitihku Tuai Rumah Velly Anak Rabong (Painggie), program tu bejalai enggau lanchar asil ari kerejasama rat ari semua piak, kelebih agi kaban JKKK enggau peranak rumah panjai ti udah besaup ngemujurka aktiviti nya.
Iya mega meri besai terima kasih ngagai komitmen enggau sukung ke diberi JKKK dalam nentuka tetiap pengawa ulih dipejalaika enggau manah sereta teratur.
“Aku meri besai terima kasih ngagai JKKK sereta semua peranak ti udah meri kerejasama ti chukup manah ngemujurka pengawa ngerupan tu,” ku iya.
Berebak enggau nya, iya mega mantaika pengarap diri ngambika sukung enggau bantu ari pengari rayat ulih ditambah agi jemah ila, kelebih agi ba pengawa ngangkatmanah perengka guna pemun di rumah panjai nya.
“Kitai mega ngarapka jemah ila pengari rayat ulih mantu sereta beratika pekara ti diguna komuniti kitai, kelebih agi ari sukut perengka guna enggau pemansang,” ku iya nambah.
Program ngerupan ukai semina mujur nyapai juluk fizikal aja, tang mega ngenegapka semengat beserakup enggau kerejasama peranak Rumah Velly. -RBI
BETONG, 6 Mei — Pengawa ngaga Pakej B4 Jalai Besai Kedua ti nyambung Jematan Batang Lupar Dua ngagai Simpang Betong sepemanjai 27.84 kilometer diatu udah nyapai penyulut fizikal iya nya 76.68 peratus.
Sapit Menteri Infrastruktur enggau Pemansang Palan Penyangkai Kapal, Datuk Ir. Aidel Lariwoo madah, taja pan projek nya bisi ngasaika sekeda pengelaun tang projek nya agi ba jalai ke betul lalu disadang tembu penuh ba bulan Disember taun tu.
“Naka ke diatu, pejalai projek nya udah manggai 76.68 peratus. Taja pan bisi sekeda pengelaun tang pengawa bejalaika iya agi ulih dijaga lalu nadai isu besai dikelala ba palan endur ngaga nya,” ku iya.
Iya madah munyi nya lebuh dikerandau raban media pengudah bejalaika penemuai kereja ngagai palan projek di Jalai Lidong, sehari tu tadi.
Nitihku iya, projek ke beungkus lebih RM292 juta nya mega ditagit tembu tumu agi, setipak enggau pengawa muka Jematan Batang Lupar Dua ti disadang bulan Ogos ti deka datai.
“Enti pengawa bejalaika nya ulih dikelengkas, kami nagit projek tu tembu tumu agi urung bulan Ogos tu ila, setipak enggau penembu jematan tu.
“Berindik enggau nya, kunteriktor besai, Verde FM Sdn. Bhd udah dipinta nambahka tikas pejalai pengawa ba palan ngambika kededua projek ulih ditembuka serentak,” ku iya nerang.
Ku iya nambah, enti udah tembu ila, jalai baru nya dipelaba ulih ngemandakka penyauh pejalai ari Kuching ke Betong ngagai urung 190 kilometer, dibanding urung 250 kilometer nengah Jalai Besai Pan Borneo maya ke diatu.
Berebak enggau nya, Kaban Parlimen Betong, Dato Dr. Richard Rapu ngarapka jalai nya ulih ditengah enggau lengkas jematan nya dibuka, taja pan pengawa ngaga iya bedau tembu penuh.
“Enti enda ulih dibuka penuh, abis nadai sebagi ari jalai nya ulih ditengah.
“Ke pemadu beguna, lebuh jematan nya tembu dalam bulan Ogos tu ila, perengka pengangkut ulih mansa Betong.
“Kitai ngarapka ulih ngintu Hari Kebangsaan Malaysia ngena jalai baru tu,” ku iya.
Pengawa bejalaika Projek Jalai Besai Kedua Betong disadang meri empas ke besai ngagai pemansang sosioekonomi enggau rentayan penyambung jalai di kandang menua pesisir Sarawak.
Entara batang penguntung iya nya nyendiaka jalai pejalai ti lebih terus, lanchar sereta likun, lalu enggau nya ulih ngangkatka penyambung peranak ba semanjai kandang menua pesisir nengeri tu.
Projek tu mega ulih ngemandakka penyauh pejalai entara Sri Aman enggau Betong, seraya ngelimatka timpuh pejalai enggau ungkus logistik ngagai penguna jalai alun.
Ari sukut kualiti infrastruktur, jalai baru tu meri gaya ke manah sereta nyamai agi, lalu enggau nya ngangkatka peneleba deriba ke likun sereta efisyen agi.
Kelimpah ari nya, projek tu mega nyambung bemacham rumah panjai enggau genturung pendiau di sepemanjai Jalai Lidong, ti terus muka peluang ekonomi baru, nyungkak aktiviti ngelingi sereta nambahka penatai pemisi komuniti menua pesisir.
Sama bisi datai Kaban Kunsil Nengeri (ADUN) Engkilili, Dr. Johnical Rayong anak Ngipa, Residen Bagi Menua Betong Datu Richard anak Michael Abunawas enggau Injinir Bagi Menua Opis Kereja Raya Betong, Jason Ng Boon.
MUKAH, Mei 6 — Pengawa bejalaika program baka Sejambak Kasih Gawai nyata mandangka komitmen tinggi perintah nengeri dalam ngemeratka pengelantang pendiau rayat, setipak enggau polisi pemansang inklusif ti dikemeranka di Sarawak.
Kaban Kunsil Nengeri (ADUN) sitak N.57 Tellian, Royston Valentine madah, pengawa ngatur program ke baka nya mandangka perintah nengeri seruran beratka pengawa nentuka pengelantang pendiau rayat seruran diberi perati.
“Program Sejambak Kasih Gawai beserimbai enggau pengerami Hari Gawai tu, ukai semina nyadi pelasar ngelakuka pengawa pengasih, tang mega nyadika pelasar dikena ngenegapka semengat penyerakup, pengerindu enggau kaul entara komuniti di Sarawak,” ku Royston.
Iya bejaku munyi nya ba Pengerami Sejambak Kaish Gawai ke diatur ba rumah panjai Tuai Rumah Ajah anak Kandau seharitu tadi.
Iya nyemetak madahka pengelantang pendiau ukai semina fokus meri duit tauka barang aja, tang lebih agi nyengkaum aspek perati, pengingat enggau pengasih ngagai sida ti begunaka sukung.
Iya mega meri besai terima kasih ngagai Perintah Sarawak enggau Opis Menteri Orang Indu, Anak Mit enggau Pengelantang Komuniti Sarawak, nengah Menteri iya, Dato Sri Hajah Fatimah Abdullah, ke inisiatif meri kelala sereta bejalaika program nya kenyau ari 20 taun ke udah.
“Nyadi pengari rayat di N.57 Tellian, aku amat muji pengawa ti enda ngetu dipejalaika Menteri Orang Indu, Nembiak Mit enggau Pengelantang Komuniti begulai enggau raban Opis Pengintu Pengelantang Pendiau ti seruran mantu orang tuai, orang timpang pendiau (OKU), orang tuai, nembiak mit enggau ruang bilik ti napi penusah.
“Aku amat beterima kasih ngagai perintah Sarawak enggau opis menteri ti bekaul laban udah bebendar meri kelala sereta udah nya bejalaika program tu ti ukai semina mantu orang ti begunaka bantu, tang mega mai bala ketuai semak agi enggau rayat ba renggat pun menua,” ku iya rambau jaku iya ba pengawa nya.
Nitihku ku Royston, iya pechaya program baka tu deka terus dipejalaika jemah ila laban ukai semina ulih ngelempungka tating penerima, tang mega meri pengarap enggau peransang ngagai rayat ngambika terus idup menyana agi.
Berebak enggau nya, iya madahka rayat Sarawak diatu betuah laban ngasaika penegap politik ti tegap sereta penyerakup rat entara komuniti pupu bansa enggau jalai pengarap.
Ku iya, penegap tu udah ngasuh perintah nengeri ulih bejalaika bemacham projek pemansang ti mungkur sukut pengelantang pendiau, pelajar, ekonomi enggau infrastruktur ungkup pemaik semua rayat.
“Kitai patut beterima kasih laban perintah Sarawak udah mujur ngetanka pengelantang entara pupu bansa enggau jalai pengarap, ke nyadi pelasar beguna ngagai penyulut nengeri tu,” ku iya.
Ngelansa pasal pengerami Gawai, iya madahka pengerami nya kelai pengaga, terima kasih enggau semengat komuniti Dayak ti enda tau enda terus ditanka.
Kenu ku iya, penyelai budaya enggau main asal komuniti Sarawak nyadi pesaka ke berega ke enda tau enda diturun ngagai rebak dudi ngambika enda luya jeman.
Berindik enggau nya, iya meransang raban nembiak ngambika terus sayauka adat, budaya enggau jaku diri empu nyadi identiti ti mandangka identiti ke bendar rayat Sarawak.
Ba pengawa ke sama mega, Royston ngenataika geran aktiviti sepenyampau RM5,000 deka diberi ngagai Rumah Ajah dikena nyukung pengawa bejalaika aktiviti komuniti menua nya.
Iya ngarapka pemeri nya ulih dikena enggau manah dikena ngerapitka kaul komuniti sereta meransang mayuh agi aktiviti ti meri penguntung ba renggat baruh.
Lebuh nyimpul jaku iya, Royston ngenataika jaku Selamat Gawai Dayak ngagai semua orang ti ngintu nya, kelebih agi komuniti Dayak di nengeri tu.
“Arapka pengerami tu mai pengaga, pengelantang enggau pengelantang ngagai semua kitai sereta ngenegapka agi penyerakup ba rayat Sarawak,” ku iya.
Sama bisi datai iya nya Dato Sri Hajah Fatimah Abdullah, Menteri Orang Indu, Nembiak Mit enggau Pengelantang Komuniti, Pemangku Residen Bagi Menua Mukah Shafrie Saili, Pegawai Pelilih Menua Mukah, Pengulu Mawar anak Awang, Tuai Rumah Ajah anak Kandau, pemesai Opis Pengintu Pengelantang Komuniti Bagi Menua Mukah Dariel serta bala raban iya, Ketuai Komuniti enggau Ketuai Raban Bansa enggau semua temuai kebukai. – RBI
