KUCHING, 18 Mei — Ketuai Pemesai Eksekutif SACOFA, Jafer Sadig Abdul Lathiff, begulai enggau tim pengatur pengawa kompeni nya ngatur penemuai basa ngagai Menteri Industri Pemakai, Komoditi enggau Pemansang Kandang Menua, Dato Sri Dr. Stephen Rundi Utom ba Bengunan Kunsil

Nengeri (DUN) Sarawak baru-baru tu.

Penemuai tu meri peluang ngagai kededua piak ngerapitka kaul strategik sereta berandauka pekara bekaul enggau penyambung, pemansang infrastruktur enggau kerejasama terus dalam nyukung inisiatif pemansang digital enggau pemansang kandang menua Sarawak.

Nitihka penerang, aum nya nyadi pelasar ke beguna dalam ngenegapka kerejasama strategik entara SACOFA enggau Opis Menteri Industri Pemakai, Komoditi enggau Pemansang Kandang Menua, Sarawak (MFICORD), kelebih agi dalam aspek pemansang infrastruktur digital enggau penyambung di serata Sarawak.

Penerang nya mega ngemeratka komitmen terus kededua piak dalam ngenegapka kerejasama dikena nyukung agenda transformasyen digital nengeri tu, nyengkaum pengawa ngerembaika akses komunikasyen sereta ngenegapka pemansang pelilih menua ungkup pengelantang rayat Sarawak.

Sama bisi ngulu penemuai nya, Sapit Menteri Industri Pemakai, Komoditi enggau Pemansang Kandang Menua, Sarawak, Datuk Dr. Abdul Rahman Ismail enggau Datuk Martin Ben, sereta Sekretari Mendam opis menteri nya, Datu Sirai Anak Daha. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

MANCHESTER, 18 Mei – Casemiro meri jaku selamat tinggal enggau ati ti sinu ngagai bala peminat Manchester United pengudah mantu tim nya ngalahka Nottingham Forest 3-2 ba main kepenudi iya ba Old Trafford musin tu.

Pemain tengah Brazil ke beumur 34 taun nya diberi basa khas lebuh iya nerima tempik jari ari penyukung lebuh iya diganti ba minit ke-81, sebedau tama baru ngagai padang disempulang sida iya sebilik meri selamat tinggal ngagai bala peminat.

Penatai beribu iku peminat ba Old Trafford terang ngayanka pengaga ati ke besai ngagai Casemiro, ke deka ninggalka kelab nya lebuh kontrak iya abis timpuh musin panas tu.

Ex-bintang Real Madrid nya nyereta United ba jenila pemindah pemain musim panas taun 2022 enggau rega urung £60 juta lalu jampat nyadi pemain di nyulut ba tengah tim nya.

Sekumbang ke enggau The Red Devils, Casemiro udah bemain 160 kali lalu ngemasukka 26 gol ba semua pekit. Iya mega mantu United ngangkatka Trofi EFL 2023 enggau Piala FA 2024.

Taja pan timpuh ke enda konsisten enggau spekulasyen, Casemiro udah mansutka diri nyadi pemain nyulut ba musin tu lalu mantu tim Michael Carrick pulai ngagai pekit Eropah.

Dalam jaku pandak tang penuh enggau penyinu ngagai bala peminat pengudah main nya, Casemiro madahka iya meri besai terima kasih ngagai peminat United.

“Aku deka berengkah enggau meri terima kasih ngagai semua. Terima kasih ngagai bala pemain, staf enggau semua ba kelab tu.

“Tang utai ke pemadu manah ba kelab tu iya nya kita, bala peminat… terima kasih,” ku iya.

Pengawa beserara ti besai reti nya ngujungka pejalai ti manah ngagai Casemiro ba Old Trafford, siku pemain ti deka seruran dikeingatka bala peminat United. -RBI

#ruaiberitaiban#newsiban#beritaiban

Rindu | Titih. | Kunsika

KAPIT, 18 Mei – Menteri Kereja Raya, Dato Sri Alexander Nanta Linggi, udah bejadika Pengerami Nyuaka Chek P215 Kapit ti ngaul penyampau RM110,000 ngagai sekeda gerempung enggau komiti kandang menua dikena nyukung pengawa bejalaika program komuniti enggau aktiviti rama di kandang menua nya.

Nitihku Kaban Parlimen Kapit nya, bantu ke diagih nya dikena mantu ngenegapka bemacham inisiatif komuniti sereta nangkup guna kandang menua ti meri penguntung terus ngagai rayat.

“Bantu tu dikearapka ulih mantu ngemuntangka pengawa merambu enggau bejalaika program ke udah disediaka tetiap penerima, kelimpah ari ngenegapka kerejasama entara ketuai komuniti, komiti kandang menua enggau rayat ba kandang menua Kapit,” ku iya.

Entara penerima bantu tu iya nya Kelab Rando Opis Residen Kapit enggau tuju nyereta program Lab RTP ke diatur di Miri bulan nyin tadi, JKKK Masjid ungkup pengawa nyendiaka diri ngintu pengerami Hari Raya Korban nyengkaum pengawa meli chapi, Komiti Bazaar ungkup ngatur sebengkah ba komuniti Program Mangkung Tiang mujur ti diperambu deka diatur kena 3 Jun tu ila.

Kelimpah ari nya, bantu tambah sepenyampau RM30,000 mega bisi disuaka ngagai Kelab Rando Opis Pelilih Kapit nyadika sukung bejalaika aktiviti enggau program pemansang komuniti di kandang menua nya.

Ku Nanta, nyadi pengari rayat Parlimen Kapit, iya deka terus meri perati ngagai guna rayat sereta nyukung bemacham inisiatif komuniti ti ulih mai empas positif ngagai pemansang rama enggau pengelantang komuniti.

“Komitmen ngemansangka Kapit ukai semina ngemeratka pemansang fizikal aja, tang mega ngenegapka komuniti nengah sukung ti enda ngetu ngagai program komuniti ti nyerakupka rayat sereta meransang pengelantang bekunsi,” ku iya nambah.

Pengawa nyuaka bantu nya mandangka komitmen ti seruran dipejalai dalam nentuka pemansang inklusif terus diasai rayat setipak enggau juluk Sarawaj Maju Makmur 2030. – RBI

#ruaiberitaiban#newsiban#beritaiban

Rindu | Titih | Kunsika

PETRA JAYA, 19 Mei — Raban Komiti Gerija St.Peter Saratok ti betuaika Reverend Rodriguez Unak nemuai meri basa ngelaluka Sapit Premier Sarawak, YB Datuk Amar Douglas Uggah Embas nyadi temuai dipebasa ba Pengerami Makai Lemai beserimbai enggau genap 100 taun Gerija St.Peter Saratok.

Penemuai nya mega disempulang Kaban Kunsil Nengeri (ADUN) Krian, YB Friday Belik begulai enggau kaban komiti gerija ke bukai.

Rambau penemuai nya, komiti gerija mega bisi madahka pasal bemacham program enggau aktiviti ke udah diperambu sepemanjai taun 2026 dikena ngerichahka agi pengerami ngintu jubli besejarah nya ila.

Lebih 16 aktiviti pengarap, komuniti enggau rama diperambu deka diatur sepemanjai taun nyadi sebagi ari pengerami ngintu ulang taun nya.

Kelimpah ari nya, Raban Komiti Gerija nya mega bisi bekunsika pemansang bekaul enggau projek ngangkatmanah Gerija St.Peter Saratok Peter Saratok ti udah nerima bantu ari Unit Pekara Jalai Pengarap Bukai (UNIFOR).

Bantu nya dipeda meri penguntung ke besai ba pengawa ngemanahka perengka guna enggau pengelantang rumah sembiang ungkup guna komuniti besemak.

Penemuai basa nya mega mandangka kaul rat entara institusyen jalai pengarap, ketuai komuniti enggau komuniti dalam pengawa ngenegapka penyerakup, pengelantang enggau pemansang rama di Sarawak.

Pengerami ngintu genap 100 taun Gerija St. Peter Saratok dikearapka nyadi siti momen besejarah ti ngempuruka komuniti setempat dalam semengat beterima kasih sereta begulai enggau pemeri gerija ngagai komuniti kenyau ari penumbuh seratus taun ke udah. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

JULAU, 18 Mei – Bala nembiak di menua pesisir enda ulih terus tinggal ari arus pemansang teknologi, tang lebih agi patut nyingkang setipak enggau mensia mayuh di mengeri dikena nentuka sida ulih besemekih jemah ila.

Nitih ku Chairman Industri Kayu Ramu Malaysia (MTIB) Datuk Larry Sng Wei Shien, komuniti menua pesisir mega ngembuan penau ti ngasuh mujur enti diberi peluang, sukung enggau perengka guna pelajar ke chukup.

“Kitai patut nitihka chara komuniti mengeri belajar sereta ngena teknologi. Aku pechaya nembiak di menua pesisir mega ulih nyapai pemujur enti diberi peluang ke sama,” ku iya.

Pekara nya dikemeratka iya ke mega Kaban Parlimen Julau rambau Pengerami Ngintu Hari Pengajar 2026 ba Sekula Primari (SK) Sungai Sugai, lebuh iya minta pengawa ngena teknologi dalam pelajar terus ditegapka, kelebih agi di menua pesisir.

Berebak enggau nya, iya nangkan ambika pelajar meseti seruran dikemeratka ba semua renggat laban nya nyadi pelasar ti beguna dalam ngadaka modal mensia ti bekualiti sereta nyadi ketuai jemah ila.

Ku iya nambah, pengajar bejalaika tanggungpengawa ke besai dalam nempa disiplin enggau narak bala anak ngambika nyadi orang ke beguna ngagai mensia mayuh enggau menua.

“Hari Pengajar beguna amat dikena ngingatka jasa enggau pengawa bala pengajar ti seruran bebendar ngadaka nembiak ti mujur sereta bekualiti,” ku iya.

Berebak enggau nya, iya mega meri jamin deka terus mantu guna sekula ungkup pengelantang raban pengajar enggau nembiak ba kandang menua nya.

Ku iya, SK Sungai Sugai sebengkah ari sekula ke pemadu besai di kandang menua Julau sereta begunaka sukung ti seruran dikena nentuka pemansang pelajar ulih ditegapka agi.

Beduduk ari nya mega, iya udah ngungkupka belanja sepenyampau RM17,000 dikena mantu guna sekula nya. -RBI

#ruaiberitaiban#newsiban#beritaiban

Rindu | Titih | Kunsika

DEBAK, 18 Mei — Program Komuniti Begulai UKAS (Mantar Gawai) 2026 Pelilih Mit Debak ke diatur ba Rh Gara ak Tindin, Belassau, Debak mujur ngempuruka komuniti setempat dalam suasana pengerami enggau penyerakup sebedau pengerami Hari Gawai.

Pengerami nangguh program nya udah dipenyadi Sapit Menteri Pemansang Pengelantang Komuniti Sarawak YB Datuk Mohamad Razi Sitam ke mega Kaban Kunsil Nengeri ( ADUN) Saribas,

Kaban Parlimen Betong, Dato Dr. Richard Rapu @ Aman Begri, ba sebengkah penerang madahka pengawa bejalaika program nya mandangka penegap semengat beserakup, kerejasama enggau begulai entara komuniti menua pesisir.

Nitih ku iya, bemacham aktiviti bisi diatur dikena ngerichahka agi pengerami Mantar Gawai nyengkaum mandangka lagu, pekit Kumang, karaoke enggau pengawa nyuaka perais enggau barang pengingat ngagai pesereta enggau komuniti ke bisi kaul.

“Program baka tu ukai semina nyadi pelasar dikena ngerapitka kaul entara komuniti, tang mega bejalaika tanggungpengawa ke berat dalam nyaga pesaka asal sereta ngenegapka semengat penyerakup komuniti,” ku iya.

Iya mega ngenataika pengaga ati sereta terima kasih ngagai pengatur enggau semua komuniti ti udah begempung ngemujurka program nya enggau penuh komitmen sereta semengat beserakup.

Program Komuniti Bersama UKAS beserimbai enggau Pra Gawai dipeda nyadi pelasar beguna dalam ngelawa rayat kelimpah ari ngerichahka pengerami Gawai ba renggat baruh. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

JULAU, 18 Mei – Nguasa mayuh bengkah jaku kelebih agi Jaku English enggau Cina dipeda nyadi aset ti beguna dalam ngenegapka daya besemekih mensia mayuh ba dunya global kemaya hari tu, pia ku Kaban Parlimen Julau, Datuk Larry Sng Wei Shien.

Ku iya, kedua-dua jaku nya diatu nyadi medium besai dalam dagang entarabansa kelebih agi ngaul sektor import enggau eksport, nya alai nembiak rebak baru patut diperansang nguasa nya kelimpah ari jaku Melayu enggau jaku asal sida.

Pekara tu dikemeratka Larry ke mega Chairman Kaunsil Industri Kayu Ramu Malaysia (MTIB) lebuh ngulu program begulai enggau Gerempung Apai Indai enggau Pengajar (PIBG) di SJK (C) Su Dok minggu nyin tadi.

“Ba dunya global kemaya hari tu, jaku English enggau Cina nyadi jaku ke pemadu mayuh dikena, kelebih agi dalam bidang dagang entarabansa enggau ekonomi.

“Nguasa jaku tambah meri pengelebih ke besai ngagai individu dalam mayuh macham sukut pengidup,” ku iya.

Iya nyemetak madahka pengaji kemaya hari tu balat ngemeratka individu ti ulih berandau ngena mayuh macham jaku laban nya ngemuntangka pengawa begulai enggau mensia mayuh, kaban dagang sereta komuniti antarabansa.

Ku iya nambah, pengelandik ngena jaku mega muka peluang kereja ke lebih luas, kelebih agi dalam bidang dagang temuai, pelajar, diplomasyen, media enggau dagang, ke majak begunaka pengelandik komunikasyen meraka budaya.

Kelimpah ari nya ku iya, nguasa mayuh bengkah jaku ulih ngerapitka kaul rama sereta mantu siku orang meretika budaya enggau chara pengidup raban bansa bukai enggau dalam agi.

“Jaku ukai semina nyadi kereban komunikasyen aja, tang mega mai nilai, adat enggau identiti sesebengkah bansa.Lebuh kitai belajarka jaku bukai, kitai mega ulih meretika budaya sida enggau semak agi sereta nyeliahka salah penemu budaya,” ku iya nerang.

Datuk Larry Sng mega madah, pansik udah nunjukka individu ti nguasa lebih ari siti jaku selalu iya lebih kreatif, efisyen mutarka penanggul sereta ngembuan pengingat ti manah agi laban sida seruran chakah ngalihka guna jaku sida.

Iya mega nyemetak madahka pengelandik mayuh jaku ulih nambahka pengangkun diri lebuh betapi enggau pengawa rasmi tauka rama kelimpah ari ngemudahka akses ngagai penemu global.

“Mayuh bup, jurnal enggau pun penatai penemu di dunya tu dikeluarka dalam mayuh macham jaku.Nengah chara nguasa mayuh agi jaku, orang ulih ngulihka penerang terus ari pun penatai asal enggau enda kelalu bepanggai ba pengawa nyalin,” ku iya.

Iya ngarapka apai indai enggau sekula terus bejalaika tanggungpengawa meransang nembiak rebak baru belajarka mayuh macham jaku ungkup pengidup ti lebih manah sereta kompetitif jemah ila. -RBI

#ruaiberitaiban#newsiban#beritaiban

Rindu | Titih | Kunsika

PAKAN, 18 Mei – Gerempung Raban Pakan (GRP) sebuah aja gerempung ukai dikuasa perintah (NGO) ke nadai pampang bukai lalu seruran bejalaika pengawa pengintu pengelantang nyaup komuniti di menua nya.

Chairman GRP, Jerenang Jawa madahka GRP bejalaika pengawa ungkup komuniti pelasarka misyen enggau visyen gerempung tu ditumbuka kenyau ari taun 2016 suba.

“Kenyau ditumbuh lalu dikemendarka Opis Pengerejista Gerempung (ROS) suba, kami aktif dalam bejalaika bantu ngagai komuniti di Pakan.

“Ukai pia aja, kami mega mantu baka sekula, klinik lalu semua bantu dikenataika meri empas ngagai guna komuniti di Pakan,” ku iya.

Terang Jerenang, pekara ti dikenuluka mega iya pengintu pelantang raban ke masuk gerempung tu ti nyau udah manggai 300 lebih iku raban.

Iya mansutka penemu tu ba Pengerami Makai Lemai Mantar Gawai Dayak enggau Ngulihka Belanja GRP 2026 ti dipenyadika Tan Sri William Mawan Ikom, Penyanding Penemu ba Opis Premier Sarawak (Industri Pemakai, Komoditi enggau Pemansang Kandang Menua) ke mega ADUN Pakan.

Ba pekara bukai, iya madahka GRP sigi naka alah mantu perintah ngerembai lalu ngenataika polisi ngagai rayat.

“Ngerembaika polisi perintah mega endang tangkup pengawa ti sama disan GRP dalam mantu perintah nerangka ngagai rayat mayuh, ambika polisi datai terang agi,” ku iya.

Iya mega madahka, GRP seruran ngaul mayuh macham ejensi perintah dalam ngatur pengawa seliris enggau servis ungkup komuniti di Pakan.

Ku iya, mayuh aktiviti diatur ba Kimpin Penyedar Penusah Angus, Licha Munaska Dadah Ambika Enda Ngerekai Ba Komuniti enggau pekara bukai agi.

Iya mega meri terima kasih ngagai ADUN Pakan ti ngemendarka agih belanja RM10,000 ungkup GRP dalam bejalaika pengawa komuniti.

Sama bisi datai ngulu pengerami malam nya Pengerusi Pengatur Pengerami Johnny Banyang, Dr Jawie Jinggot @ Jenggot, raban NGO di pelililh Pakan, Julau, Sarikei enggau individu ke besaup ngemujurka program. – RBI

Kapsyen : Raban temuai dipebasa sereta komiti GRP begulai enggau Mawan (enam ari kanan) nyeradakka ai pengayu

#ruaiberitaiban#newsiban#beritaiban

Rindu | Titih | Kunsika

PETALING JAYA, 18 Mei – Ex-Mandal Presiden Parti Keadilan Rakyat (PKR), Rafizi Ramli enggau Mandal Presiden Parti Keadilan Rakyat (PKR) ke suba, Nik Nazmi Nik Ahmad kemari madahka pengawa ngambi alih Parti Bersama Malaysia nyadi pelasar baru pejalai politik sida.

Pengawa ngambi kuasa parti nya tembu nengah pengawa nyerahka enggau rasmi ari pemungkal enggau presiden iya Tan Gim Theam ba Pengerami Ngelansa Arah Tuju Politik Rafizi enggau Nik Nazmi ke diatur di Petaling Jaya.

Pengawa nya dipeda nyadi siti titik ke besai reti ba landskap politik menua lebuh dua iku orang ke tebangkar ke sebedau tu nyadi ketuai dalam PKR milih deka neruska pengawa nengah pelasar politik ke baru.

Parti Bersama Malaysia ti ditumbuhka kena 2 Disember 2016 sebedau tu chakah bejalaika pengawa di Pulau Pinang lalu diatu dipelaba deka masuk renggat baru berindik ari penyereta Rafizi enggau Nik Nazmi.

Rafizi ke mega Kaban Parlimen Pandan enggau Nik Nazmi Kaban Parlimen Setiawangsa agi mengkang nyadi kaban PKR maya tu, tang kedua-dua enda mujur ngetanka pangku pengawa sida ba pengawa bepilih parti kena 23 Mei taun nyin tadi.

Pengalah nya mega ngujungka sida ningkilka diri ari Kabinet Perintah Besai maya nya. Rafizi ngelengka pangku pengawa nyadi Menteri Ekonomi berengkah 17 Jun taun nyin tadi, lalu Nik Nazmi ngelengka pangku pengawa nyadi Menteri Pengeraja Asal enggau Pengelantang Rampa Menua berengkah 4 Julai.

Pekara ke pemadu baru tu dikearapka ulih meri dimensyen baru ngagai arena politik menua tu pengudah pengawa bepilih parti sereta pengawa nyendiaka diri napi pengawa bepilih ti deka datai. – RBI

#ruaiberitaiban#newsiban#beritaiban

Rindu | Titih | Kunsika

LONDON, 17 Mei — Manchester United nutup kimpin liga enggau gaya ke pemadu manah lalu ngentaska penuduk sida ba tiga tim ke pemadu atas pengudah ngerikod pemenang ba Old Trafford, lalu enggau nya meda kapten tim Bruno Fernandes sama enggau rikod pemadu mayuh bantu dalam siti musin.

Fernandes terus tampak nyadi pelasar United musin tu lebuh ngerikod bantu gol ke-20 iya ba kimpin nya, lalu nyemaka pemujur legenda Thierry Henry enggau Kevin De Bruyne.

Pasing silang ke bekualiti ari pemain antarabansa Portugis nya mujur ditembuka Bryan Mbeumo ungkup gol ke beguna amat ti nentuka pemenang United.

Pemenang nya ukai semina ngenegapka penuduk tim nya dalam liga, tang mega meri tanda positif ngagai tuju United sebedau musim 2026/27 pengudah ngentaska tikit sida ngagai Liga Champions UEFA.

Berebak enggau nya, main nya mega nyadi maya penuh enggau penyinu sereta basa ngagai Casemiro, ke benung ba kepenudi iya ba kandang tim diri empu bemain enggau United.

Pemisi pemain tengah Brazil ke bepeneleba nya disadang ulih muka ruang ngagai tengah tim nya digaga baru ba timpuh pemindah ke deka datai.

Menijar tim Michael Carrick ke diatu udah diberi tanggungpengawa tetap dipeda deka bejalaika tangkup pengawa ke beguna amat dalam nempa jeman baru ungkup kelab nya pengudah musin ke mayuh pemar.

Kelimpah ari gol Bryan Mbeumo, United mega ngemasukka gol nengah Luke Shaw, sebedau Matheus Cunha nembuka pemenang enggau gol ke mega ngujungka jurai berindik ari pemutus Penulung Video Pengadil (VAR).

Ba selampur iya, pemenang tu ukai semina ngujungka musin enggau nota positif ngagai Manchester United, tang mega mandangka potensial besai tim Carrick bepekit ngulihka gelar pemadu atas baru musin ti deka datai. – RBI