BINTANGOR, 17 Mei — Pengerami Mantar Gawai Dayak 2026 ke diatur ba Rumah Panjai Boniface Jaraw, Teluk Batu Baru, kemari nyadi pelasar beguna dalam ngenegapka penyerakup enggau semengat begulai komuniti pupu bansa di Sarawak.

Pengerami nya dipenyadika Kaban Parlimen Igan Tuan Haji Ahmad Johnie Zawawi ti mega bejadika pengawa bejadika Jalai Kampung Rh. Boniface Jaraw, Teluk Batu Baru dalam pengawa ngemanahka perengka guna infrastruktur enggau pengelantang peranak menua nya.

Dalam jaku dipansutka iya, Ahmad Johnie ngenataika jaku tabi Selamat Hari Gawai ngagai selampur komuniti Iban enggau rayat Sarawak lalu ngarapka pengerami taun tu diintu enggau likun, gerai sereta lantang begulai enggau sida sebilik ti dikesayauka iya.

Ku iya, pengerami Gawai tu ngayanka penyelai Sarawak ti kaya enggau nilai penyerakup enggau pengelantang komuniti pupu bansa.

Nitihku iya, raban bansa Melayu, Melanau, Bidayuh, Cina enggau bansa bukai di nengeri tu seruran ngintu bemacham pengerami begulai enggau semengat manah, bebatak asur sereta bebasaka pangan diri ti nyadi batang penegap Sarawak.

“Semengat penyerakup enggau pengelantang ti diasai kemaya hari tu patut terus ditan dikena nentuka penegap enggau penyulut nengeri tu ulih diasaika semua rayat,” ku iya.

Pengerami nya richah enggau penatai peranak menua nya, lalu enggau nya ngenegapka kaul bakih sereta semengat beserakup dalam komuniti menua pesisir.

Sama bisi datai Sapit Pemesai Pelilih Meradong, Wee Teck Min, pengari Opis Kereja Raya Bagi Menua Sarikei, SOR Anatasya Saili, Sapit Chairman Parti Pesaka Bumiputera Bersatu (PBB) N.45 Repok, Hurairah Hanapi, penghulu enggau tuai-tuai rumah ngelingi Teluk Bulat. — RBI

SONG, 17 Mei — Pengawa ngaul raban nembiak dalam pengawa ngatur Pengerami Makai Lemai Pelilih Menua Song 2026 dipeda nyadi siti singkang ke besai reti dalam nentuka adat, main asal enggau pesaka asal komuniti Dayak terus dijaga sereta ditampung ngagai rebak dudi hari.

Nitihka penerang ari Sekretari Politik ngagai Menteri Kereja Raya, Datuk Alvin Runggah Jimbun, madahka iya kemari nyempulang Menteri Kereja Raya, Dato Sri Alexander Nanta Linggi enggau bini iya, Dato Angelina Celestine Ujang ngagai pengawa nya ti diatur dalam gaya ti penuh enggau pengaga sereta begulai, kemari. Sama bisi ngulu pengawa nya, bini iya, Ivy Teo.

Datuk Alvin madah, pengawa ngaul raban nembiak rebak baru dalam komiti pengatur keterubah iya siti pemansang ti chukup ngemegahka ati laban mujur mai pengidup baru ngagai pengawa bejalaika program bepelasarka adat enggau budaya.

Iya mega ngenataika pengaga ati enggau tabi puji ngagai semua pengatur pengawa ketegal komitmen enggau pengepuh ngemujurka pengerami nya.

Nitih ku iya, penyereta raban nembiak ukai semina meri pengeransing baru ngagai organisasyen, tang mega nyadi platform ti beguna dalam nentuka pesaka asal komuniti Dayak terus dipebasa sereta diintu.

“Budaya ukai semina legasi jeman kelia, tang identiti ti nyerakupka kitai nyadi sebuah komuniti,” ku iya dalam penerang nya sehari tu.

Ku iya nambah, semengat begulai sereta rinduka adat asal meseti terus diterenak ba raban nembiak ngambika pesaka budaya komuniti Dayak meruan idup sepanjai jeman. — RBI

MIRI, 16 Mei — Siku orang ke enggau pengawa neresa kampung mujur diselamatka dalam operasyen ngiga enggau nyelamat (SAR) di Taman Negara Lambir pengudah iya kelalu lelak nyentukka enda ulih neruska pejalai pulai ngagai pintu penama besai taman nya lemai kemari.

Nitihka penerang Facebook Miri Edition, penusah ke diripot urung pukul 4.30 lemai nya mungkur empat iku orang ke niki bukit iya nya tiga iku indu enggau siku lelaki ke benung ngaga aktiviti niki bukit ba kandang taman negara.

Tim SAR ti mungkur tiga iku kaban Opis Bomba enggau Penyah Penusah Malaysia (JBPM) begulai enggau tiga iku kaban Park Ranger dianjung ngagai endur nya pengudah nerima ripot penusah nya.

Raban penyelamat udah nya mujur ngiga semua mansa sebedau meri perubat keterubah ngagai pendaki ke balat lelak.

Mansa udah nya mujur diiring pansut enggau likun nyentuk ke iya mujur dibai pansut baru ba ‘palan penama’ Taman Negara Lambir enggau nadai sebarang penusah ke enda manah nyadi.

Operasyen nya diketuka pengudah semua orang ke niki bukit nya dientaska likun sereta ulih dijaga. — RBI

MUKAH, 17 Mei — Woksyop Seni Resin Mukah udah mujur nyadi pelasar ngemansangka bakat seni kreatif menua tu lebuh nerima timbal ti meransang ari bala pesereta ti mandangka pengerindu enggau komitmen ti tinggi sepemanjai program nya diatur, kemari.

Bala pengatur program mantaika pengaga ati enggau terima kasih ke pemadu tinggi ngagai semua pesereta ketegal sukung, pengeransing enggau kerejasama ke diberi sepemanjai bengkel nya.

Nitihka Puan Angela Anne Anak Awal pengatur begulai enggau CENTEXS madahka komitmen ti dipandangka bala pesereta chukup besai reti lalu udah nyadi penyungkak semengat terus bekunsika penemu sereta ngenegapka bidang kraf jari kreatif di Sarawak.

“Tetiap kereja ti diasilka nyata ngayanka bakat enggau pengerindu ulih ngerembai lebuh diberi peluang enggau iring ti betul,” ku Angela.

Bala pengatur mega beterima kasih ngagai pengawa ti chakah ari bala pesereta ti udah ngerindangka woksyop enggau penemu ti kreatif, pengingin deka belajar sereta dedikasyen ti tinggi sepemanjai sesi nya.

Kelimpah ari nya, disiplin, kerejasama enggau suasana bebaik ti ditempa sepemanjai program nya mega nerima perati, enggau pengarap penemu enggau peneleba ti diulih ulih dikena enggau manah sereta nyadi pun peluang baru dalam bidang seni resin enggau pengawa dagang kreatif.

Berebak enggau nya, jaku puji mega diberi ngagai CENTEXS Mukah ketegal pengandal enggau kerejasama ti diberi sepemanjai dua taun ngaul diri dalam bidang seni resin.

Raban pengatur mega mantaika pengarap sida ngambika program baka tu ulih dipajakka jemah ila, nyengkaum perambu ngatur iya di Bintulu.

“Tetiap asil seni ukai semina asil aja, tang pengingat enggau kreativiti ti deka idup,” ku Angela lebuh dirandau Ruai Berita Iban — RBI

LAHAD DATU, 16 Mei — Jalai besai ti nyambung Lahad Datu ngagai Tawau di Jalai Silam ditu ditutup sementara pengudah jalai runtuh nyadi urung 50 meter ba kededua piak lemai kemari.

Penusah ke nyadi semak Kampung Dewata urung pukul 2 lemai ngujungka jalai nya enda ulih ditengah sementara penguna jalai alun.

Pemesai Pelilih Lahad Datu, Firuz Idzualdeen @ Benetty Mohd Dzul madahka, Opis Kereja Raya (JKR) pelilih menua nya tekala nya ngambi atur nengah chara nyendiaka jalai kelaung sementara dikena ngurangka pengeruga ngagai penguna.

“Jalai sementara tu mujur dibuka lalu ulih ditengah baru urung pukul 6 lemai tu tadi,” ku penerang nya.

Ku iya, penguna jalai alun dilalau bejejimat agi lebuh nengah kandang endur ti kena penusah nya sereta ngasika atur raban pengelikun enggau piak bekuasa ba palan penusah nyadi.

“Mensia mayuh mega dilalau merambu pejalai sida tumu berindik ari jalai alun ke laun bejalai,” ku iya. — RBI

SIBU, 16 Mei — Parti Demokratik Progresif (PDP) deka ngetanka semua lapan penuduk ke dipegai sida diatu ba Pengawa Bepilih Nengeri (PRN) Sarawak ke-13 tu ila.

Presiden PDP Dato Sri Tiong King Sing madah, pemutus nya digaga bepelasarka pengamat penyandang udah bebendar gawa sereta patut diberi awak terus meri servis ngagai pengundi ba sitak diri empu.

Tiong ke mega Menteri Dagang Temuai, Seni enggau Main Asal madah, pengawa begempung PDP enggau Parti Sarawak Bersatu (PSB) dalam bulan April 2024 udah nyata ngenegapka parti nya, ke diatu bisi 205,000 iku kaban di serata menua.

“Tu ngayanka pengandal rayat ba semengat enggau perjuangan kami sebilik,” ku iya lebuh bejaku ba Aum Besai Tiga Taun Sekali (TGA) PDP 2026 ti dipenyadika Premier Sarawak Datuk Patinggi Tan Sri Abang Johari Tun Openg ditu, sehari tu tadi.

Lima ari lapan penuduk nya iya nya Tasik Biru, Meluan, Krian, Marudi enggau Dudong dimenang PDP ba PRN12 Sarawak seraya ke bukai (Bawang Assan, Engkilili enggau Ba’kelalan) diulih berindik ari PSB direrak sereta nyemilik PDP.

Ku Tiong, PDP diatu udah nyadi komponen ti beguna dalam Gabungan Parti Sarawak (GPS) lalu meseti bejalaika tanggungpengawa ke besai agi dalam landskap politik Bumi Kenyalang, kelebih agi dalam ngetanka hak nengeri enggau agenda pemansang.

Iya mega nandu sukung penuh PDP ngagai iring Abang Johari dalam nentuka pengelanchar bejalaika agenda pemansang nengeri.

Berebak enggau nya, Tiong madahka prinsip bekunsi kuasa, konsensus enggau bebasaka pangan diri dalam GPS meseti terus dijaga, lalu ngenggaika sebarang chara masuk champur ti tau ngeruga pengelantang gempung politik.

Ku iya, PDP enda kala bekompromi ba pekara ti ngaul pemerat nengeri tu lalu tetap komited deka tegap ngetanka hak semua rayat Sarawak.

Tiong mega madah, TGA 2026 ukai semina proses organisasyen aja tang nyadi pelasar beguna dikena merambu strategi, ngenegapka penyerakup dalam parti sereta nyikap parti napi pengawa bepilih ti deka datai. — RBI

BINTULU, 16 Mei — Program Niti Daun 2026 Renggat Pelilih Bintulu ti diatur enggau chukup pengeransing nyadi pelasar beguna dalam ngenegapka kerejasama entara ejensi perintah, sektor peribit enggau komuniti menua tu, kelimpah ari ngenegapka semengat beserakup entara komuniti.

Program tu mujur ngempuruka lebih 3,000 penyereta ti mungkur 73 kontinjen ari mayuh bengkah jabatan, ejensi perintah, kompeni peribit enggau komuniti di serata Pelilih Bintulu.

Kaban Kunsil Nengeri (ADUN) Samalaju, Datuk Majang Renggi madah, pemujur ngatur program tu nyata ngayanka komitmen tinggi semua piak dalam ngerapitka kaul kerejasama enggau semengat begulai ba renggat pun menua.

Nitihku iya, pengawa ngatur tu asil ari pengawa begempung Opis Pelilih Bintulu begulai enggau mayuh bengkah ejensi perintah enggau peribit ti udah meri komitmen ti tegap dalam nentuka pengelanchar program nya.

“Program tu ukai semina mujur nyapai juluk organisasyen, tang mega nyadi platform pemadu manah dalam ngenegapka penyerakup enggau kerejasama entara jabatan, ejensi enggau komuniti setempat,” ku iya nengah siti penerang sehari tu.

Ba pekit ke diatur nya, Kaunsil Pemansang Bintulu (BDA) dipadu nyadi champion lalu mai pulai perais mata duit RM2,000, ditangkan KEBANA ba penuduk lumur dua enggau mata duit RM1,500, lalu lumur tiga dimenang Opis Pelajar Pelilih Bintulu enggau mata duit RM1,000.

Anugerah Pemadu Mayuh Nyereta dimenang Opis Pelilih Bintulu ti nerima perais RM500.

Iya mega meri besai terima kasih ngagai semua piak ke bisi kaul nyengkaum Opis Kereja Raya Sarawak, Polis Diraja Malaysia, Ejensi Penerit Adat Maritim Malaysia, Opis Betanam Betupi Malaysia, Opis Pemadah Malaysia, Unit Komunikasyen Mensia Mayuh Sarawak, Opis Pengintu Pengelantang Pendiau Raban Bansa, Opis Menteri Pengerai Malaysia, RELA sereta mega semua ejensi ke udah nyukung pemujur program nya.

Bela ngerichahka program tu iya nya penyereta Komiti Pemansang enggau Pengelikun Genturung Pendiau (JKKK) rumah panjai ngelingi Pelilih Bintulu ti ngaul kandang menua Jepak, Tanjung Batu enggau Samalaju ti sama-sama nyungkak semangat begulai komuniti.

Sama bisi datai ngerichahka agi program nya, Datu Nyurak Keti, Pemesai Opis Pelilih Bintulu, Ketuai Polis Pelilih Bintulu, bala ketuai opis enggau bala ketuai komuniti kandang menua nya. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SELANGAU, 16 Mei – Program Champion Digital Sarawak (SDC) ti udah dilanchar enggau rasmi pun taun 2026 terus ngenegapka agenda transformasyen digital menua pesisir nengah pengawa ngelatih sereta nyiri ejen ubah digital ba tetiap pelilih menua di Sarawak dikena meransang literasi teknologi ba raban bansa.

Nengah inisiatif ti betuaika Kaunsil Ekonomi Digital Sarawak (SDEC) enggau kerejasama Angkatan Zaman Mansang (AZAM) Sarawak ti nyadi bakih bejalaika pengawa, program nya ngemeratka pemansang Champion Digital entara pengari komuniti ti dipilih ari 45 pelilih menua di Sarawak nyadi ketuai transformasyen digital ba renggat pun menua.

Kelimpah meri kuasa ngagai komuniti enggau pengelandik teknologi, program tu mega mantu Industri Mikro, Mit enggau Jelan Pemesai (PMKS) lokal nguasa kereban enggau pelasar dagang digital, lalu enggau nya nyukung pemansang ekosistem ekonomi digital ti meruan setipak enggau rambai jaku “Inovasyen Digital, Komuniti Berkuasa”.

Berindik enggau nya, Wokshop Kamek Digital ungkup Pelilih Menua Selangau udah mujur diatur ba Palan NADI Tamin nengah atur pengawa begulai SDEC enggau AZAM Sarawak nengah program Juara Digital Sarawak.

Champion Digital Sarawak bagi menua Selangau, Ricky Anak Enteri madah, pengawa bejalaika woksyop nya mujur nengah kerejasama Pusat NADI Tamin, Kelab Nembiak Iban Mansang Bawang Assan enggau JKKK Emperan Ubah Selangau.

Nitihku iya, Siri 1 program nya mujur ngempuruka 16 iku penyereta ti mungkur orang dagang enggau raban nembiak menua tu ti ngulu bemacham sesi bekunsi bekaul enggau pengawa ngena teknologi digital enggau pemansang ekonomi komuniti.

Pengawa nyuaka setipikit ngagai bala pesereta dipenyadika Encik Mathew Anak Kalat ti nyadi Menijar Palan NADI Tamin. -RBI

#ruaiberitaiban#newsiban#beritaiban

Rindu | Titih | Kunsika

SELANGAU, 16 Mei — Perintah tetap komited ngenegapka pemansang Selangau nengah pengawa bejalaika mayuh bengkah projek infrastruktur strategik sereta meransang pengawa beranakka puku ti ulih nyungkak penumbuh ekonomi menua pesisir.

Kaban Kunsil Nengeri (ADUN) Tamin, Christopher Gira Sambang madah, pemansang ke dipejalaika di Selangau nyata ngayanka kandang menua pesisir diatu mega diberi perati ke serius ngambika ulih mansang setipak enggau kandang mengeri.

Nitihku iya, pengawa muka rasmi Hotel Roxy Selangau enggau Pasar Besai Lepapa Selangau nyadi kelai pengandal pemeranak puku ngagai potensial besai Selangau nyadi palan penumbuh ekonomi baru di Sarawak.

“Selangau ukai agi nyadi palan endur ngetu aja, tang diatu majak mansang nyadi kandang menua ke ngembuan penampak ke manah jemah ila ari sukut pemansang enggau ekonomi,” ku iya lebuh bejadika pengawa bejadika kededua premis nya ditu, sehari tu tadi.

Iya mega meri besai terima kasih ngagai kompeni Tecktonic and Sons Holdings Sdn Bhd ke udah berani beranakka puku di Selangau nengah pengawa muka Pasar Besai Lepapa Selangau ke nyadi pampang ke-13, enggau Roxy Hotel Selangau ke nyadi rentayan hotel ke-11 ke diempu kompeni nya.

Ku iya, pemisi kededua premis nya dikearap ulih muka mayuh agi peluang kereja ngagai peranak menua tu, nyungkak aktiviti ekonomi, mantu orang dagang mit enggau pemekal menua tu, sereta ngemanahka perengka guna ungkup komuniti enggau temuai.

Nitihku iya, pemisi hotel moden di Selangau mega ulih nyadi penyungkak ngagai sektor dagang temuai enggau dagang nengah chara nyendiaka perengkaguna endur diau ti lantang sereta bekualiti.

Berebak enggau nya, Christopher Gira madahka perintah benung bejalaika bemacham projek pemansang besai ba kandang menua Selangau enggau Tamin dikena ngangkatka pengelantang pendiau rayat.

Entara projek ke diatu sereta deka dipejalaika iya nya ngaga Kompleks Lumba enggau Main Mit Selangau ke beungkus RM11.5 juta, kuarters pengereja pengawa Perintah Sarawak ke beungkus RM48 juta, Opis Pelajar Pelilih Selangau ke beungkus RM35 juta, enggau ngaga SMK Selangau ke beungkus RM81 juta.

Kelimpah ari nya, projek ngangkatmanah Klinik Pengerai Tepus ti beungkus RM7 juta enggau Klinik Sekuau ti beungkus RM3 juta mega dipejalaika dikena ngangkatka kualiti servis pengerai ngagai peranak menua pesisir.

Iya mega madah, projek Jalai Ulu Mukah ke beungkus RM65 juta enggau Jalai Ulu Oya ke beungkus RM200 juta diatu benung dalam proses tinda lalu dipelaba berengkah digaga ujung taun tu.

Nengah agih belanja MiRRDA, perintah udah ngemendarka pengawa ngaga jalai baru ari Nanga Pakoh ngagai Ulu Bunau Bekikik ti beungkus RM164 juta sereta mega jalai ari Rumah Sebeli ngagai Rumah Emong Ulu Mukah ti beungkus RM175 juta dikena ngenegapka rangkaian komunikasyen menua pesisir enggau ngemudahka pengawa pengangkut produk betanam betupi.

Ku iya nambah, perintah mega beratika perambu pemansang rumah ulih dibeli enggau kandang endur industri mit enggau jelan pemesai (SMI) di Pekan Selangau dikena muka mayuh agi peluang ekonomi ngagai komuniti menua nya.

“Nembiak menua tu ukai semina nyadi pemerati pemansang aja, tang begunaka nyadi ketuai dalam pemansang kandang menua diri empu,” ku iya.

Iya ngarapka piak pengatur Hotel Roxy enggau Pasar Besai Lepapa deka terus meri servis pemadu manah ngagai komuniti sereta bejalaika tanggungpengawa chakah dalam pemansang komuniti nengah peluang gawa, latih enggau tanggungpengawa rama korporat.

Pengerami bejadika pengerami nya mega diias enggau bemacham aktiviti nyengkaum pemerindang ari artis menua tu, bansal bejual ari orang dagang komuniti enggau mandangka bungai api maya malam hari.

Sama bisi nyempulang Kaban Dewan Negara YB Puan Rita Sarimah anak Patrick Insol, Chairman Majlis Daerah Luar Bandar Sibu (MDLBS), Sempurai Petrus Ngelai sereta temuai ke bukai.

“Selamat Ari Gawai, Gayu Guru, Gerai Nyamai, Lantang Senang Nguan Menua” ku Gira. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KANOWIT, 16 Mei — Sepenyampau 88 iku penerima ti ngaul Komiti Pemansang enggau Pengelikun Genturung Pendiau (JKKK), Gerempung Apai Indai enggau Pengajar (PIBG), Sekula, Kawasan Rukun Tertangga (KRT), Gerempung enggau Kelab ba sitak DUN N.49 Ngemah nerima Projek Mit Menua Pesisir (MRP) sepenyampau RM896,000.00 ba sebengkah pengerami ti diatur ba Dewan Opis Pelilih Kanowit, sehari tu tadi.

Agih belanja nya dikenataika Kaban Kunsil Nengeri (ADUN) Ngemah, Anyi Jana dikena mantu bejalaika aktiviti komuniti sereta nyukung pemansang komuniti lokal.

Ba jaku ti dikenataika Cerislogo Sabut, iya minta komuniti terus idup nitihka semengat “Salam Segulai Sejalai” ti nyadi kelai penyerakup, kerejasama enggau begulai dalam meransang pemansang pelilih Kanowit seriris enggau aspirasyen Strategi Pemansang Pengudah COVID-19 PC300).

Iya mega meri besai terima kasih ngagai selampur komuniti Kanowit ketegal komitmen enggau sukung sida ngemujurka program Niti Daun beserimbai enggau Pengerami Main Asal Kanowit.

Kenu ku iya, program nya ukai semina mujur ngangkatka Kanowit ngagai renggat ke besai agi, tang mega nerima timbal ke chukup meransang ari komuniti luar.

Berebak enggau nya, iya mega ngenataika pengaga ati ngagai Anyi Jana ti seruran komited ngemendar sereta ngagihka agih belanja MRP ngagai peranak di kandang DUN Ngemah ungkup pengelantang rayat enggau pemansang kandang menua nya.

Iya mega minta bala komuniti terus nyukung pengeransing enggau komitmen pengari rayat dalam ngetanka pemansang enggau pengelantang peranak menua nya.

Berebak enggau nya, dalam jaku dipansutka iya, Anyi Jana madahka pengawa nyuaka agih belanja MRP ungkup sitak DUN N.49 Ngemah dipejalaika dalam dua renggat ninting taun lalu pengerami sehari tu iya nya pengawa nyuaka ungkup Renggat 1 taun 2026.

Nitih ku iya, sepemanjai timpuh iya nyadi pengari rayat ba sitak nya, tu ke-9 kali agih belanja MRP udah diagih ngagai komuniti kandang menua nya nyadi pengawa ti enda ngetu dikena mantu nangkup guna komuniti.

Ku iya, bantu ke diberi nya dikearap ulih mantu mutarka sekeda guna enggau penanggul komuniti di kandang DUN Ngemah.

Berebak enggau nya, iya mega ngingatka penerima ngena agih belanja nya enggau betul sereta nentuka tetiap guna nya dipejalaika enggau terang sereta bisi integriti.

Sama bisi ngulu pengerami nya Cerislogo Sabut, pengari opis perintah, ketuai komuniti, ketuai kaum enggau penerima agih belanja MRP — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Pusat Khidmat Masyarakat ADUN N.49 Ngemah