MIRI, 6 Mei — Pengawa jampat mayuh bengkah ejensi mujur nyelamatka nyawa siku pesakit ari komuniti Penan ba kandang menua pesisir Long Lobang nengah misi penerebai budi basa ngagai Sepital Besai Miri.

Nitihka penerang ari Kaban Kunsil Nengeri (ADUN) Mulu, YB Datuk Gerawat Gala, pesakit nya, Kuya Akeh ke mega Apai ngagai Ketuai Genturung Pendiau, Lian Kuya diripotka dalam gaya kritikal pengudah beberapa hari sakit, enggau nya begunaka perubat lengkas ba sepital.

Ku iya nerang, Long Lobang sebuah genturung pendiau ke jauh amat, enggau akses pejalai ke mayuh pemar, iya nya urung dua hari bejalai kaki nengah kampung enggau kandang endur ke bebukit ari Bario, lalu enggau nya mar mai pesakit pansut berubat.

“Peranak genturung nya udah ngaga kaul enggau aku minta bantu laban enda ulih mai pesakit ngagai Bario ketegal jalai ti mar sereta berisiko tinggi,” ku iya dalam penerang nya.

Nitihku iya, ba renggat keterubah, Sepital Besai Miri madahka prosedur operasyen standard (SOP) ke diatu enda ngemendarka pemindah berubat (medivac) ari palan ke dikerandau nya.

Taja pia, pengawa enda ngetu lebuh piak nya tekala nya ngiga alternatif bukai nengah chara ngaga kaul enggau Opis Bomba enggau Penyah Penusah Malaysia (Pangkalan Udara Wilayah Utara Miri), ke udah nya bejalaika pengawa bejalaika penerebai bantu dikena mindahka pesakit nya ari kandang endur ke jauh.

Berebak enggau nya, iya mega ngenataika pengaga ati ti pemadu tinggi ngagai Opis Residen Miri, Opis Bomba enggau Penyah Penusah Malaysia enggau Sepital Besai Miri ketegal komitmen enggau pengibuh ti dipandangka dalam ngemujurka misi kemanusiaan nya.

“Pengawa jampat sereta kerejasama semua piak nyata mandangka pemerat diberi ngagai pengelantang pendiau rayat enda ngira endur.”

Pengawa tu ukai semina nyelamatka nyawa, tang mega meri pengarap ngagai komuniti ke jauh ti madahka sida enda kala dikelaung,” ku iya.

Iya ngarapka pengawa baka tu ulih terus ditegapka jemah ila dikena nentuka pengelantang pendiau rayat Sarawak seruran dijaga, kelebih agi ungkup komuniti di kandang menua pesisir. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Gerawat Gala

BINTULU, 6 Mei — Program Hari Diri Sebilik Pampang Sebauh mujur diatur ba rumah Tuai Rumah Gini Utiat, Sungai Serakit, Jalai Sebauh, enggau batang tuju ngenegapka kaul pangan diri sereta semengat beserakup entara komuniti lokal, ditu kena Hari Minggu tu tadi.

Pengerami nya dipenyadi Menteri Industri Pemakai, Komoditi enggau Pemansang Kandang Menua Sarawak Dato Sri Dr. Stephen Rundi Utom, ke mega Kaban Kunsil Nengeri (ADUN) sitak N.69 Kemena.

Sama bisi datai iya nya Collin Patan ke nyadi Sekretari Politik ngagai Premier Sarawak begulai enggau ketuai Majlis Kerja Tertinggi (MKT), Majlis Tertinggi Wanita (MTW), Ketuai Kaum, Ketuai Komuniti enggau Pampang Indu PBB N.69 Kemena.

Bemacham aktiviti bisi diatur sepemanjai program nya, nyengkaum sesi ‘membership drive’ dikena meransang penyereta kaban baru, pengawa nganjung pom nyadi kaban Parti Pesaka Bumiputera Bersatu (PBB) ngagai temuai dipebasa, latih api, enggau aktiviti lumba enggau main ti ngaul penyereta mayuh macham renggat umur, nembiak enggau nembiak mit.

Pengawa ngatur program tu mandangka komitmen Indu PBB ti terus ngenegapka pangku pengawa gerempung ba renggat pun menua, kelimpah ngenyemakka diri enggau komuniti enggau chara ti lebih inklusif sereta komprehensif.

Berindik enggau nya, dikearapka inisiatif baka tu ulih dipajakka nyadi pelasar ti efektif dalam nerenakka semengat kerejasama, ngenegapka kaul komuniti sereta nyukung agenda pemansang rama ti meruan di menua pesisir. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Wanita PBB Sarawak

JULAU, 6 Mei — Sebuah entukar Proton Saga MC2 diripotka aksiden ba Bukit Aguk, Jalai Entabai ditu pagi tadi ngujungka siku lelaki bakal.

Nitihka LT.M (PA) Vincent Jeavie anak Johntin Pemesai Raban Penyaga Orang Periman Malaysia (APM) Pelilih Julau, kangau ngenyit bekaul enggau penusah nya diterima Palan Penyaga Operasyen (PKOD) Pelilih Menua urung pukul 10.09 pagi ari Balai Polis Julau.

Tim APM ke mungkur empat iku kaban terus dianjung ngagai endur nya urung pukul 10.14 pagi lalu datai urung 16 minit udah nya.

Lebuh datai ba palan penusah nyadi, eksiden ditemu mungkur sebuah entukar Proton Saga MC2 ke tepawah kediri.

Tudah ke siku lelaki, 37 taun, ngasaika pemedis ba bau kanan enggau belakang bahu kanan ketegal penusah nya.

Raban APM bejalaika pengawa enggau lengkas meri perubat keterubah sebedau iya dianjung ngagai Klinik Pengerai Julau ngambika diperubat enggau silik agi ulih Opis Menteri Pengerai Malaysia (KKM).

Operasyen ba endur nya tembu urung pukul 10.35 pagi sebedau raban nya ngiring tudah ngagai klinik lalu nyerahka iya ngagai piak bekuasa perubat.

Semua operasyen nya tembu enggau penuh pukul 11.35 pagi pengudah semua raban enggau logistik pulai ngagai PKOD dalam gaya ti likun sereta manah.

Nadai orang bukai diripotka bisi kaul enggau penusah nya. -RBI

#ruaiberitaiban#newsiban#beritaiban

Rindu | Titih | Kunsika

SARIKEI, 6 Mei — Raban Penyaga Mensia Mayuh Malaysia (APM) Pelilih Sarikei udah mujur bejalaika operasyen nangkap siku ular sawa ke ditemu ba sebuah palan pengentap pendiau di Lot 843, Jalai Bunga Raya pagi tadi.

Palan Kawalan Operasi (PKOD) Pelilih Menua APM Sarikei nerima kangau ngenyit ari mensia mayuh urung pukul 8.01 pagi ti madahka penatai jelu reptilia nya ba baruh almari dapur dalam rumah nya.

Penusah nya meri pengirau ati ngagai pengelikun peranak palan pengentap pendiau nya.

Berindik ari penerang nya, empat (4) iku raban APM udah dianjung ngelawa endur penusah nyadi lalu datai urung pukul 8.11 pagi.

Tim operasyen udah nya bejalaika pengawa tekala nya ngena perengka khas dikena nangkap ular nya enggau likun sereta chara ke dijaga.

Ular sawa nya dipelabaka pemanjai urung tiga (3) kaki mujur ditangkap enggau nadai sebarang penusah ke enda manah nyadi.

Operasyen nya tembu enggau penuh urung pukul 8.24 pagi pengudah gaya nya disahka likun sereta ulih dijaga.

Nadai penusah bakal diripotka ngaul peranak tauka raban ti bejalaika pengawa maya operasyen nya dipejalaika.

Berindik enggau nya, APM Sarikei ngelalau mensia mayuh ngambika seruran bejejaga, kelebih agi ba genturung pendiau besemak enggau kandang semak tauka habitat jelu siga.

Mensia mayuh mega diperansang lengkas betanya ngagai talipaun penusah ngenyit APM nyema betapi enggau penusah ngenyit ti begunaka bantu raban penyelamat. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUALA LUMPUR, 6 Mei — Program enggau pengawa pemandang “The Great Inca Empire: Integration and Diversity” ti diatur Opis Menteri Penyerakup Menua nengah Perpustakaan Negara Malaysia bekerejasama enggau Kedutaan Republik Peru di Malaysia dipenyadika Menteri Penyerakup Menua YB Datuk Aaron Ago Dagang,

Nitihka penerang rasmi ari Opis Menteri Penyerakup Menua ba Facebook, pengawa pemandang tu nyadika pelasar ke besai reti dalam ngerembaika pemereti ati mensia mayuh pasal tamadun Inca, kelimpah ari mantaika rega penyelai enggau integrasyen ke nyadi pelasar penumbuh raban bansa ke meruan.

Penerang nya mega ngemeratka Malaysia enggau Peru bekunsi penyemaka nyadi menua mayuh budaya enggau etnik, ti ​​nyadika penyelai nyadi penegap kunsi dalam nempa sebuah nengeri-bansa ti inklusif sereta tan.

Berebak enggau nya, inisiatif pemandang nya dipeda nyadi jematan budaya ti nyambung komuniti meraka garis entara menua, kelimpah ari meri pangka ngagai pengawa ngenegapka kaul dua piak entara Malaysia enggau Peru enggau chara ti lebih inklusif sereta terus.

Program tu mega ngayanka komitmen ti terus ngenegapka diplomasi budaya nengah pemereti ati ba sejarah enggau pesaka tamadun dunya, seriris enggau pengawa ngerembaika jaringan kerejasama entarabansa dalam bidang penyerakup enggau budaya. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Kementerian Perpaduan NegaraAaron Ago Dagang

SPAOH, 6 Mei — Projek ngaga baru selapat tanah tusur ba rumah panjai Tuai Rumah Guang Sabai, Nanga Paun, Ulu Paku udah mujur ditembu nengah pengawa bejalaika Projek Transformasyen Menua Pesisir (RTP) 2025, ti ngembuan tuju ngenegapka infrastruktur menua pesisir sereta ngangkatka tikas pengelikun komuniti setempat.

Pengawa nyerahka projek nya dipejalaika Opis Parit enggau Entali Ai (JPS) Bagi Menua Betong begulai enggau Palan Servis DUN N.37 Bukit Saban ba palan projek nya, Nanga Paun, Ulu Paku.

Projek tu iya nya inisiatif pemansang ti dipelanja Perintah Sarawak nengah agih belanja Projek Transformasyen Menua Pesisir ari baruh sitak DUN N.37 Bukit Saban, ti diarika Kaban Kunsil Nengeri (ADUN) Bukit Saban YB Douglas Datuk Amar Douglas Uggah Embas.

Nitihka penerang ti diambi ari ‘Facebook’ rasmi DUN Bukit Saban, projek nya udah mujur ditembu dalam timpuh ti udah ditetapka sereta nitihka spesifikasyen teknikal ti udah dikemendarka.

Pengawa ngaga selapat tu dikearapka ulih meri penguntung ti seruran diberi ngagai peranak menua nya, kelebih agi ngurangka risiko tanah tusur sereta ngangkatka tikas pengelikun ba Kandang pengentap pendiau Rumah Panjai Tuai Rumah Guang Sabai.

Pengawa bejalaika projek tu mega mandangka komitmen Perintah Sarawak ti seruran bejalaika pengawa nentuka pemansang infrastruktur menua pesisir terus ditegapka ungkup pengelantang rayat di menua ulu. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

BEKENU, 6 Mei — Sebuah rumah struktur kayu ke ngembuan pemesai urung 30 kaki x 40 kaki diripotka runtuh abis ba penusah ke nyadi di Kampung Subak A tumu pagi tadi.

Balai Bomba enggau Penyah Penusah (BBP) Batu Niah nengah penerang berita, madahka sida nerima kangau ngenyit urung pukul 6.45 pagi sebedau seraban raban ari balai nya ngesah ngelawa palan nya.

Komander Operasyen, PBK II Azalan Bin Azaman madah, bomba keterubah datai ba palan nya urung pukul 7.48 pagi pengudah bejalai penyauh urung 46 kilometer.

“Penusah tu dipelabaka nyadi urung pukul 5.50 pagi ti ngaul semua struktur rumah kayu nya runtuh.Taja pia, nadai orang tepekul laban orang ke nguan nya diripotka nadai ba rumah maya penusah nya nyadi,” ku iya.

Nitihku iya, pengawa meresa enggau silik agi tetemuka rumah runtuh nya enda likun endur tama.

“Raban bomba udah ngelalau mensia mayuh kelebih agi diri sebilik enggau peranak rumah nya ngambika enda semak tauka tama ngagai kandang endur rumah runtuh nya laban deka nyaga pengelikun,” ku iya.

Operasyen matau nya ulih dijaga urung pukul 7.53 pagi lalu tembu enggau penuh pukul 8.30 pagi pengudah piak bomba nentuka nadai risiko penusah bukai ba endur nya.

Operasyen nya mungkur tujuh iku raban begulai enggau sebuah entukar, lalu nadai ejensi bukai bisi ba endur nya maya penusah nya nyadi. – RBI

#ruaiberitaiban#newsiban#beritaiban

Rindu | Titih | Kunsika

MATU, 6 Mei — Penyikar enggau pengawa ti jampat dipejalaika raban Raban Pengelikun Mensia Mayuh Malaysia (APM) Pelilih Matu mujur mutarka kes penatai ular sawa di Kampung Sekaan Kechil, lalu enggau nya nentuka pengelikun peranak menua nya.

Nitihka penerang rasmi, Palan Kawalan Operasyen (PKOD) Pelilih APM Matu bisi nerima kangau ngenyit ari mensia mayuh bekaul enggau bisi ular sawa dalam kandang jelu tupi ke diempu orang ke ngaga sebana.

Tekala nya pengudah nerima penerang nya, raban udah dianjung ngagai palan penusah nyadi.

Lebuh datai ba palan penusah nyadi, orang ke ngaga sebana nya nunjukka endur reptilia nya ditemu.

Bala kaban udah nya nyendiaka perengka ke patut sebedau bejalaika operasyen nangkap enggau prosedur ke likun sereta dikuasa.

Asil ari operasyen nya, siku ular sawa urung 1.3 meter pemanjai mujur ditangkap enggau nadai sebarang penusah ke enda manah nyadi.

Reptilia nya udah nya dibai pansut ari kandang endur pengentap pendiau ngambika dipejalaika piak ke bekaul enggau silik agi.

Operasyen ti dipejalaika bejalai enggau lanchar lalu kandang endur penusah nyadi dientaska likun enggau penuh.

Berindik enggau nya, mensia mayuh dilalau ngambika seruran beratika rampa menua sereta lengkas ngeripot sebarang penusah ngenyit nyadi ngagai opis bekuasa dikena nentuka atur tumu ulih diambi. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

MATU, 6 Mei — Tim Angkatan Pertahanan Awam Malaysia (APM) Pelilih Matu bejalaika pengawa enggau lengkas mutarka kes ngemunaska idang indu gamang ba Kampung Bawang, ditu, kena Hari Satu tu tadi.

Palan Kawalan Operasyen (PKOD) Pelilih Menua APM Matu nerima kangau ngenyit ari mensia mayuh bekaul enggau tetemuka ida lng pemesai bol ba rumah burung besemak enggau palan pengentap pendiau orang ke ngaga sebana nya.

Lebuh datai ba endur nya, raban APM ngelala endur idang nya sebedau ngaga pengawa nyendiaka diri enggau silik ngena perengka dikena nyaga diri enggau perengka operasyen ke engkeman.

Operasyen ngemunaska nya udah nya dipejalaika ngena chara nyembur rachun indu utai enggau teknik betunu ti dikuasa dikena nentuka sarang nya dirusak abis enggau nadai meri risiko ngagai peranak ke diau ngelingi.

Pengawa tim APM ti jampat sereta efisyen mujur nagang gaya nya, lalu kandang endur nya dientaska likun pengudah operasyen tembu.

Mensia mayuh dilalau ngambika seruran bejejaga sereta lengkas ngeripot sebarang jelu bisa ke ngeruga ngagai piak bekuasa dikena nyeliahka sebarang penusah ke enda manah nyadi.

Sebarang penusah ngenyit tau disalur terus ngagai PKOD APM Pelilih Matu nengah lumur 084-832208. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

MERADONG, 6 Mei — Siku lelaki peranak menua tu bebadi nyawa ba penusah aksiden ba jalai alun ti mungkur sebuah entukar pikap enggau sebuah mutosikal di Jalai Lasi nuju ngagai Jalai KJD, lemai tu tadi.

Ketuai Polis Pelilih Meradong, DSP Tansli Mering madah, penusah nya nyadi urung pukul 5.10 lemai lebuh deriba pikap ke datai ari Jalai Lasi nuju Jalai KJD dipelabaka ensayar lebuh nengah tiku sebedau tama ngagai lurung ke betentang.

“Berindik ari nya, entukar nya ngelantak sebuah mutosikal ke datai ari Jalai KJD,” ku iya nengah penerang media sehari tu tadi.

Tudah ke bebadi dikelala enggau nama Brahim Anak Jika, 24, ari Rh Jika, Nanga Labah, Pakan dientaska bebadi ketegal balat bakal.

Nitih ku iya, empas ari penusah belantak nya ngujungka kededua entukar nya tepawah ngagai tisi kanan jalai nuju ngagai Jalai KJD.

Tudah deriba mutosikal udah nya dibai ngagai Poliklinik Julau sebedau dientaska bebadi.

Diatu kes nya benung dipansik ari baruh Seksyen 41(1) Akta Pengangkutan Jalan 1987.

Berindik ari nya, polis minta sebarang saksi penusah tauka individu ke bisi penerang nyengkaum rikod ‘dashcam’, datai ke mua mantu dalam pansik nengah chara ngaga kaul enggau Pemesai Pemansik, Insp. Mohd Zainal bin Abdul Ghafar ba lumur 011-11945095.

Berebak enggau nya, DSP Tansli mega ngelalau semua penguna jalai alun ngambika seruran bejimat, belubah lebuh nengah tiku sereta ngasika undang-undang jalai alun dikena nyeliahka penusah ke enda dikedekaka nyadi. -RBI