SRI AMAN, 8 Mei — Ketuai Komuniti enggau Ketuai Kaban Raban Bansa (KMKK) begunaka pengawa nyadi chunto ngagai komuniti lokal ngena teknologi pemadah dalam ngangkatka pengelantang rayat sereta ngenyampatka pengawa ngenataika penerang enggau servis.

Kaban Parlimen P.202 Sri Aman, Dato Sri Doris Sophia Brodie madahka, KMKK patut nyingkang setipak enggau pemansang teknologi ngambika enda tinggal.

“Aku ngarapka kita ulih ngenataika penerang, ngatur komuniti sereta mantu rayat ngulihka akses ngagai mayuh macham servis perintah nengah guna teknologi,” ku iya.

Iya nyebut jaku tu lebuh nyimpul Pengerami Nangguhka Woksyop Penegap IT KMKK ungkup Parlimen P.202 Sri Aman ti diatur enggau penyereta KMKK Sri Aman.

Ku iya nambah, pengawa ti enda ngetu ungkup ngenegapka pengelandik digital entara KMKK mega ulih ngemanahka komunikasyen entara ketuai enggau komuniti lokal enggau efektif agi.

Dalam jaku iya, mega, Doris ngemeratka pengawa belajarka pelasar IT ukai agi pilih, tang udah nyadi pekara ti beguna ba jeman digital kemaya hari tu.

Nitih ku iya, ngatur woksyop baka tu ulih ngadaka ketuai komuniti ti lebih relevan, efisyen sereta kompetitif, kelebih agi dalam sukut ngatur, ngenataika penerang enggau ngena pelasar digital.

Woksyop kelima dalam siri kerejasama entara Palan Servis Parlimen Sri Aman P.202 enggau Sarawak Skills Sri Aman ba pengawa ngenegapka literasyen digital ba renggat baruh.

Sama bisi bejaku ba pengerami nya Menijar Sarawak Skills Sri Aman, Dexter Jagit.

Entara ke bisi datai iya nya Temenggong Leonard Libau, Pemanca Daniel Sawing, KMKK ngelingi P.202 Sri Aman, bala kaunselor enggau pengajar ari Sarawak Skills Sri Aman. -RBI

#newsiban#ruaiberitaiban#beritaiban

Rindu | Titih | Kunsika

BETONG, 8 Mei — Perintah Sarawak tetap komited deka ngenyampat sereta ngerembaika pengawa bejalaika Pengawa Nyukat Tanah Hak Adat Bansa Asal (NCR) di serata nengeri tu dikena nyapai tagit nyukat 1.5 juta hektar tanah adat.

Kaban Kunsil Nengeri (ADUN) Krian, Friday Belik madah, naka ke diatu perintah Sarawak udah mujur bejalaika pengawa nyukat urung 1.2 juta hektar tanah NCR di serata nengeri tu.

Iya madah munyi nya lebuh ngulu Program Randau Nyukat Lot Individu (Seksyen 18) ke diatur ba Rumah Andrew Nyanggau, Sungai Belong, Melupa, kemari.

Program setengah hari nya diatur Opis Tanah enggau Survei Bagi Menua Betong nengah kerejasama Komiti Pemansang enggau Pengelikun Genturung Pendiau (JKKK) Rumah Andrew Nyanggau ti ngaul kandang menua Ulu Melupa, Krian, Saratok (berimbai enggau kandang menua Mapar, Babang enggau Rimbas)

Nitihka penerang Friday Belik, bepelasarka rikod Opis Tanah enggau Survei Bagi Menua Betong, pemesai tanah ke udah disukat nitihka perimeter ari baruh Seksyen 6 ti digazet kena 04 Ogos 2020 ba kandang menua Ulu Melupa iya nya kira-kira 1,700 hektar lalu dikemendar ungkup disukat lot individu (Seksyen 18) kena 17.12.2025.

Ku iya, sesi Program Randau nya diatur dikena meri penerang ngagai pengempu tanah pasal pengawa enggau proses ti patut dipejalaika sebedau kereja nyukat individu ari baruh Seksyen 18 ulih diteruska dalam timpuh ke semak.

“Aku amat beterima kasih ngagai kerejasama enggau sambut ti manah ari pengempu tanah ti seruran meri sukung ngagai Opis Tanah enggau Survei nentuka proses nyukat ulih dipejalaika enggau lanchar,” ku iya.

Iya mega ngarapka proses nyukat individu ti deka dipejalaika pengudah tu deka bejalai enggau lanchar ungkup pemaik peranak menua nya.

Kelimpah ari nya, program tu mega meri awak ngagai peranak ngenataika tanya enggau isu bekaul enggau tanah ke udah nya disaut pemesai ke bekaul.

Entara ke bisi datai iya nya Penguasa Tanah enggau Survei Bahagian Betong, TPr. Moris Anak Nayup begulai enggau staf iya, Pemesai Pelilih Menua Betong Laga Kueh, pengari Indu Opis SALCRA enggau SALCRA Saratok, Penghulu Josephine Entira sereta mega serintai Ketuai Komuniti enggau Ketuai Kaum (KMKK).

Pengudah tembu program nya, Friday mega bisi nemuai ngagai sida sebilik niang Niang Assan anak John di Sungai Brangan ngenataika penyinu ati enggau penyinu ati ngagai sida sebilik ti ditinggalka. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

BINTULU, 8 Mei – Sepital Bintulu benung nyidi sida sebilik tauka kaban belayan siku pesakit ke dikelala enggau nama Tom anak Apok ke diatu agi berubat ba Medical High Dependency Ward (MHDW) sepital nya.

Berindik enggau nya, piak sepital minta kerejasama ari mensia mayuh ke ngelala sida sebilik tauka kaban belayan ke semak pesakit ngambika lengkas datai ngagai Sepital Bintulu ungkup pekara ke bekaul.

Mensia mayuh mega tau betanya ngagai sepital nengah lumur 086-859 000 sambung 2621 dikena meri penerang bekaul enggau kaban belayan pesakit.

Piak sepital mega ngenataika pengaga ati enggau terima kasih ngagai kerejasama mensia mayuh ke udah mantu nyidi orang ke sebilik enggau pesakit nya. -RBI

#ruaiberitaiban#newsiban#beritaiban

Rindu | Titih | Kunsika

MURUM, 8 Mei — Kaban Kunsil Nengeri (ADUN) Murum, Kennedy Chukpai Ugon bejalaika pengawa nemuai ngagai palan dikena beratika pejalai projek Projek Transformasyen Jematan Menua Pesisir ungkup Sarawak (RBTP) ba Jematan Sungai Magan enggau Jematan Sungai Kijau, kelimpah beratika akses jalai nuju Long Lawen, ditu kena Hari Satu.

Penemuai nya betuju nentuka pengawa bejalaika projek infrastruktur menua pesisir bejalai nitihka perambu sereta meri empas terus ngagai pengelantang pendiau peranak menua nya ba kandang menua Murum.

Sama bisi nyereta penemuai nya, Abbas Saat ti ngarika Opis Kereja Raya (JKR) Bagi Menua Belaga/Kapit.

Ba penemuai ke sama, YB Kennedy mega bisi mansik pejalai pengawa ngaga Sekolah Kebangsaan (SK) Tegulang sereta mega gaya jalai alun ba kandang menua Tegulang ti nyadi sebagi ari pengawa matau terus projek pemansang pelajar enggau infrastruktur pemun ba kandang menua nya.

Ngelansa pasal penemuai nya, iya nyemetak madahka komitmen iya terus nentuka tetiap projek pemansang ulih dipejalai enggau lanchar sereta meri penguntung ngagai rayat.

“Sama-sama kitai besampi ngambika semua projek ti diperambu sereta dipejalaika ba kandang menua kitai bejalai enggau lanchar ungkup guna enggau pengelantang komuniti kitai,” ku iya ba sebengkah penerang.

Penemuai tu mandangka pengawa ti enda ngetu dipejalaika pengari rayat dalam ngenegapka rentayan infrastruktur menua pesisir enggau ngangkatka kualiti perengka guna asas ungkup peranak di kandang menua Murum. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Pusat Khidmat Masyarakat DUN Murum

JULAU, 8 Mei — Kaban Kunsil Nengeri (ADUN) Meluan, Dato Rolland Duat Jubin majak ngenegapka agenda pemansang enggau pengelantang pendiau komuniti nengah penemuai kereja enggau program meri pemaik ngagai komuniti di kandang menua Julau enggau Lasi kena Hari Tiga tu tadi.

Muak ke pagi, iya ngulu sesi nyerah projek ngangkatmanah Dewan Tebuka Sekolah Kebangsaan (SK) Ulu Entaih, Julau ti udah tembu sereta dipejalaika nengah agih belanja Program Transformasyen Menua Pesisir (RTP).

Projek ari baruh kemata Opis Kereja Raya (JKR) nya dipejalaika dikena ngemanahka perengkaguna infrastruktur sekula ungkup pengelantang raban pengajar enggau nembiak bejalaika mayuh macham aktiviti rasmi enggau kokurikulum.

Nitihku iya, pengawa ngemanahka perengka guna nya dikearap ulih meri pemaik ungkup timpuh ke panjai ngagai sekula enggau komuniti menua nya.

“Enggau penembu pengawa ngaga balai tu, aku ngarapka iya ulih meri mayuh agi pengelantang enggau pengelantang ngagai sekula bejalaika aktiviti sida,” ku iya nengah sebengkah penerang.

Ngalih hari, iya enggau raban iya mega bisi nemuai ngagai Rumah Mambang di Ng Linggah, Lasi meri basa kepenudi ngagai niang Maureen ak Lidum ke udah nadai tumu pagi Hari Satu tu tadi.

Nengah awak nya, iya mega ngenataika penyinu ati ngagai sida niang sebilik sereta besampika sida diberi pengering enggau penyabar napi maya ti tusah tu.

“Meri penyinu ati aku ngagai sida sebilik besai Tr Mambang. Arapka sida terus tegap sereta kering napi timpuh tusah tu. Sampi aku begulai enggau kita sereta kita sebilik,” ku iya.

Penemuai nya mandangka komitmen iya ti terus dalam nentuka pemansang sitak nya bejalai sejalai enggau pengawa ngerapitka kaul komuniti enggau pengelantang pendiau di sitak DUN Meluan. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SAMARAHAN, 8 Mei — Opis Betanam Betupi Sarawak majak ngenegapka agenda pemansang sektor betanam betupi nengeri tu nengah pengawa bejalaika Aum Pengatur enggau Pematau Pejalaika Pemansang Betanam Betupi di Pelilih Menua Gedong ke diatur kemari.

Aum enggau penemuai kereja nya betuaika Direktor Betanam Betupi Sarawak, Dominic Anak Chunggat, dikena beratika baru pejalai projek betanam betupi ti strategik sereta nentuka pengawa bejalaika iya bejalai enggau lanchar nitihka pelin ti udah ditetapka.

Entara projek ke bisi dilawa iya nya Projek Nanam Padi Lubok Punggor pemesai 10 hektar ti dipejalaika nengah kerejasama Opis Betanam Betupi Sarawak enggau Universiti Putra Malaysia Sarawak (UPMS).

Projek nya diatu benung ba renggat meresi tanah enggau ngerataka sebedau pengawa nanam bansa padi Biris diperambu berengkah ujung bulan Mei 2026.

Dikena nyukung pemansang kandang menua nya, Opis Parit enggau Entali Ai (JPS) Sarawak mega ngaul diri ba pengawa bejalaika infrastruktur entali ai enggau parit dikena nentuka sistem ngatur ai ulih diguna enggau efisyen.

Kelimpah ari nya, raban nya mega matau Projek Pemansang Kebun Nyiur Baru di Lubok Terenggas (Blok B ) ti mungkur pemesai 132 hektar ti dipejalaika ari baruh Ejensi Pemansang Wilayah Bersepadu Samarahan (IRSDA).

Pengudah penemuai kereja nya, aum koordinasyen diatur berandauka status bejalaika projek enggau chara ngemanahka agi dikena nentuka semua perambu pemansang betanam betupi ulih dipejalaika enggau manah.

Ba aum nya, iya nyemetak madahka pemujur pengawa bejalaika tetiap projek bepanggai ba komitmen enggau kerejasama rat entara semua opis enggau ejensi ti bekaul dikena nentuka juluk pemansang betanam betupi di Pelilih Gedong ulih dijapai penuh.

Sama bisi datai Pemesai Pelilih Menua Gedong, Jamain Wahab; Bala Pensyarah Kanan UPMS, Ts. Dr. Muhammad Huzaifah Mohd Roslim enggau Dr. Shiamala Devi Ramaiya, Injinir Sivil Opis JPS, Abdul Hafizh Abdul Nasir, sereta mega pemesai kanan ari opis enggau ejensi ke bekaul. -RBI

#ruaiberitaiban#newsiban#beritaiban

Rindu | Titih | Kunsika

SEBUYAU, 8 Mei 2026 – Peranak di Pelilih Menua Sebuyau dipinta meri kerejasama penuh ngagai Sarawak Energy Berhad (SEB) ngelancharka pengawa bejalaika kereja meresi sereta netak kayu semak tali karan ti deka dipejalaika dalam timpuh ke semak tu.

Nitihka penerang ti dipansutka Opis Pelilih Sebuyau, pengawa nya deka dipejalaika ba semanjai jalai alun ngelingi Pelilih Sebuyau nyadi siti singkang ke berat dikena nentuka pengelikun mensia mayuh sereta nyeliahka bekal kuasa karan tejanggal ba kandang endur ke kena bungkur penusah nya.

Opis Pelilih Menua Sebuyau mega minta kerejasama ari semua Pemanca, Penghulu, Ketuai Raban Bansa enggau Kaunselor di pelilih nya ngambika madah ngagai peranak rumah panjai sida empu ngambika bekerejasama enggau Sarawak Energy Berhad sepemanjai pengawa nya dipejalaika.

“Pengawa nebang kayu besemak enggau tali karan beguna amat dikena ngurangka risiko bekal kuasa karan tejanggal sereta nentuka pengelikun penguna,” ku penerang nya.

Berebak enggau nya, peranak menua nya mega dipadahka nadai bayar pampas deka diberi ungkup kayu ke bisi kaul enggau kereja nebang nya. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Gambar Hias — Pasar Sebuyau

KUCHING, 7 Mei — Opis Pelajar Nengeri (JPN) Sarawak ngenataika penyinu ati ngagai ruang bilik niang Fahrin Jumandy Abdullah ti udah nadai ketegal kena tangkap karan ba sebuah sekula di Sarawak.

Nengah penerang ti dipansutka sehari tu, JPN Sarawak madahka sida amat sinu enggau penusah nya lalu ngarapka sida sebilik diberi pengering ati napi penusah ti berat tu.

“Arapka semengat niang diengkah ba entara orang ke arap lalu semua sida sebilik diberi pengering enggau penegap,” ku penerang nya.

Nitih ku JPN Sarawak, pemerat iya ke diatu iya nya nentuka bantu ke pemadu manah diberi ngagai ruang bilik niang, kelimpah ari matau pengelantang siku agi nembiak ke benung nerima perubat berindik ari penusah nya.

Berebak enggau nya, piak nya mega madahka penusah nya diatu benung dipansik piak bekuasa, kelimpah ari pansik dalam benung dipejalaika dikena meresa nitihka sukut pengelikun ba sekula ke bisi kaul.

Nyadi atur bejaga-jaga, kandang endur penusah nyadi udah ditutup lalu semua nembiak, pengajar enggau staf sekula enda dikemendarka mansang semak ngagai endur nya nyentukka endur nya dientaska likun enggau penuh.

JPN Sarawak nyemetak madahka sida deka terus meri kerejasama penuh ngagai piak bekuasa dalam bejalaika pansik bekaul enggau penusah nya. -RBI

#ruaiberitaiban#newsiban#beritaiban

Rindu | Titih | Kunsika

KUCHING, Mei 7 — Direktor Kereja Raya Sarawak, Datu Dr. Cassidy anak Morris nyemetak madahka pengelandik bejaku ba mua mayuh nyadi elemen ti beguna dalam nempa pemesai Opis Kereja Raya (JKR) Sarawak ti lebih andal, profesyenal sereta bepenemu.

Nitihku iya, pengulih ngenataika penemu, timpai enggau penerang ti nyemetak sereta efektif beguna amat ukai semina dalam bejalaika pengawa ninting hari, tang mega bejalaika tanggungpengawa dalam nempa pengandal diri sereta ngenegapka imej profesyenal pengereja pengawa JKR Sarawak.

Iya madah munyi nya lebuh ngulu “Program Bejaku Ba Mua Mayuh” beserimbai enggau Kus Induksi Khas (opis) JKR Sarawak Siri 1/2026 ti diatur dikena ngenegapka pengelandik komunikasyen entara pemesai opis nya.

Ku iya, pengelandik komunikasyen ke manah ulih mantu pemesai ngenataika penerang enggau chara ke lebih betukuh, kelimpah ari nambahka pemanah interaksyen enggau mayuh bengkah renggat mensia mayuh sereta raban ke bisi pemerat.

Program tu mega meri penerang ngagai penyereta pasal chara bejaku ti efektif, chara ngenataika pesan enggau chara ti betukuh, ngena jaku tubuh ti engkeman sereta chara beinteraksyen enggau profesional enggau mensia mayuh ari mayuh renggat.

Nengah pelasar nya, penyereta bisi peluang ngasah pemerani, ngangkatka penerang sida ngenataika jaku sereta meretika komunikasyen ti efektif nyadi pelasar ti beguna dalam nentuka pengawa ngenataika servis mensia mayuh ti efisyen sereta bekualiti.

Program tu seriris enggau pengawa JKR Sarawak ti deka ngadaka pengereja pengawa ti kompeten, bepengelandik sereta bepenau ngenataika servis ti pemadu manah ngagai rayat. -RBI

#ruaiberitaiban#newsiban#beritaiban

Rindu | Titih | KunsikA

MANCHESTER, 7 Mei — Sarawak terus ngenegapka tuju nyadi nengeri bepelasarka ekonomi digital enggau teknologi tinggi nengah tagit ngelancharka satelit nano keterubah (CubeSat) manggai ba taun 2030, ti deka ngenegapka penau analisis data singka miga nengeri tu.

Premier Sarawak, Datuk Patinggi Tan Sri (Dr.) Abang Haji Abdul Rahman Zohari bin Tun Datuk Abang Haji Openg madah, teknologi jemah ila deka majak bepanggai ba chip semikonduktor, sistem satelit enggau ‘real-time artificial intelligence’ (AI).

Iya madah munyi nya lebuh ngenataika jaku ba program Lan Berambeh Anak Sarawak UK Edition 2026 di Manchester, United Kingdom.

Nitih ku iya, pemansang CubeSat deka nyadi pengepun dikena ngenegapka sistem data singka miga Sarawak, enggau nya nyukung perambu pemansang nengeri ti betul agi, bepelasarka data sereta beteknologi tinggi.

Berebak enggau nya, iya mega ngemeratka pemansang teknologi AI jemah ila enda ulih diseraraka ari pengulih chip semikonduktor, nyengkaum chip ke dikena dalam sistem satelit enggau aplikasyen luar angkasa.

Setipak enggau aspirasyen tu, industri semikonduktor Sarawak terus ditegapka nengah pemansang pengelandik menua tu, kelebih agi dalam langkar litar begulai (IC) enggau teknologi ngatur kuasa.

Semikonduktor SMD enggau Sdn. Bhd bejalaika tanggungpengawa ke beguna dalam ekosistem tu nyadi ketuai dalam pemansang teknologi semikonduktor nengeri tu, ke nyadi pelasar aplikasyen jemah ila nyengkaum sistem data geolokasi enggau sukung teknologi satelit.

Ketuai Pemesai Eksekutif SMD Semikonduktor, Shariman Jamil, bela bekunsika penemu bekaul enggau kluster Pelajar enggau Pemansang Bakat ba program nya, ngemeratka pemesai guna ngemansangka bakat peranak Sarawak dalam bidang semikonduktor, injinir chip enggau teknologi tinggi.

Ku iya, pengawa ngenegapka ekosistem pelajar enggau industri beguna amat dikena nentuka Sarawak ngembuan pengereja pengawa bepengelandik tinggi ti ulih besemekih ba renggat global.

SMD Semikonduktor mega mantaika komitmen deka terus ngenegapka penuduk Sarawak dalam rentayan rega global semikonduktor manggai ba taun 2030, seraya mega muka mayuh agi peluang rega tinggi ungkup peranak Sarawak kelebih agi sida di menua luar pulai meri bantu ngagai pemansang nengeri tu. – RBI