KUCHING, 18 Mei — Perintah Sarawak majak ngenegapka pemansang perengka guna, bekal ai, kuasa karan enggau telekomunikasyen di nengeri tu nengah pengawa bejalaika mayuh bengkah projek strategik ti beungkus RM9.29 bilion ari baruh Langgur Pemansang Malaysia Lumpar Ke-13 (RMK13) enggau ‘Pembiayaan Alternatif’.
Menteri Perengka Guna enggau Telekomunikasyen Dato Sri Julaihi Narawi madah, agih belanja ke besai nya ngayanka komitmen perintah Sarawak nentuka rayat ngasaika perengka guna ke lebih efisyen, entap sereta komprehensif nyengkaum di menua pesisir.
Nitih ku iya, sektor bekal ai nerima agih belanja pemadu besai iya nya RM5.3 bilion ti mungkur 347 projek, enggau 289 projek tauka 83 peratus tembu.
“Perintah Sarawak mega udah melanja RM188.75 juta kenyau ari taun 2020 dikena neruska subsidi bil ai enda bebayar RM5 keterubah ti sama enggau 11,300 liter ai ungkup rayat Sarawak,” ku iya lebuh nyimpul jurai ba Aum Kunsil Nengeri (DUN) Sarawak sehari tu tadi.
Ku iya, peminta ai di Sarawak diatu manggai 2,300 juta liter sehari lalu dipelaba deka nambah ngagai 3,500 juta liter sehari manggai ba taun 2030 ila.
Iya nandu baru madahka bungkur bekal ai menua pesisir diatu udah nambah ngagai 71.9 peratus seraya kandang mengeri udah manggai 99 peratus, lalu ngujungka bungkur kesemua Sarawak manggai 86.1 peratus.
Dalam pengawa ngenegapka sistem bekal ai nengeri tu, perintah bejalaika Pelin Besai Bekal Ai enggau Grid Ai Sarawak ti nyambung kandang menua Selatan, Tengah enggau Utara nengah sistem grid ai.
Ba sektor kuasa, Julaihi madahka Sarawak diatu ngembuan sistem grid kuasa karan besai ti entap sereta ulih dikearap ari Bau ngagai Lawas.
Ku iya, kapasiti ngasilka kuasa karan nengeri tu diatu manggai 5,928 Megawatt (MW) lalu ditagit deka nambah ngagai 10,000 MW manggai ba taun 2030 enggau 15,000 MW manggai ba taun 2035 enggau pemadu mimit 60 peratus pun penatai kuasa tau dikena baru.
Entara projek besai ke benung digaga diatu iya nya Tekat Ai Kuasa Karan Baleh 1,285 MW ti dipelaba deka beoperasyen dalam taun 2029, pia mega Palan Kuasa Kitar Gabungan Samalaju enggau Miri ti dipelaba tembu dalam taun 2027.
Ba pengawa nentuka peranak menua pesisir terus ngasaika bekal kuasa karan ti bekualiti, perintah udah ngungkupka belanja sepenyampau RM2.7 bilion kenyau ari taun 2018 dikena bejalaika 216 projek Bekal Kuasa Karan Menua Pesisir (BELB).
Ari penyampau nya, bisi 184 projek tauka 85.2 peratus udah tembu lalu meri penguntung ngagai semak 60,000 ruang bilik di serata Sarawak.
Iya mega madahka Projek Skim Bekal Kuasa Karan Alternatif Menua Pesisir Sarawak (SARES) diatu benung mekal kuasa karan 24 jam ngena kuasa solar ngagai 553 buah genturung pendiau enggau rumah panjai ti ngaul lebih 15,000 ruang bilik.
Ba sektor telekomunikasyen ku iya, SACOFA benung bejalaika atur ngangkatmanah enggau ngemanahka rangkaian di serata Sarawak dikena nambahka penegap enggau pengandal servis telekomunikasyen.
Julaihi mega madah, perintah Sarawak ngarapka kuasa ngatur spektrum frekuensi ulih dilempaika ngagai nengeri tu jemah ila dikena ngenegapka pengawa ngatur servis komunikasyen, pengelikun enggau telekomunikasyen nitihka guna Sarawak.
“Sarawak diatu benung ngerembaika pemansang industri aeroangkasa nengah pengawa numbuhka Kaunsil Penyanding Penemu Aeroangkasa Sarawak (SAAC) sereta mega ejensi luar angkasa nengeri ti deka ngatur pemansang teknologi satelit, semikonduktor enggau pansik aeroangkasa,” ku iya.
Ngelansa pasal kemarau ke nuntung Sarawak diatu, iya madahka opis menteri begulai enggau ejensi ke bekaul seruran matau gaya nya sereta bejalaika atur mitigasi nyengkaum merambu ‘cloud seeding’ enggau nganjung bekal ai ngena 122 buah tangki di serata nengeri.
“Taja betapi enggau kemarau, bekal kuasa karan Sarawak agi tegap berindik ari sistem pemansut kuasa ti mayuh macham sereta begempung,” ku iya. – RBI
#ruaiberitaiban#newsiban#beritaiban
Rindu | Titih. | Kunsika
