SERIAN, 19 Mei — Operasyen ngiga enggau nyelamat (SAR) siku orang tuai ke diripotka lenyau ba Kampung Koran Empaneg benung chakah dipejalaika Raban Penyaga Orang Periman Malaysia (APM) Pelilih Serian pengudah nerima kangau ngenyit ari polis urung pukul 10.42 pagi kemari.
Tudah dikelala enggau nama Baluk anak Dayu, 68 taun, bansa Bidayuh sereta ngembuan sejarah sakit darah tinggi.
Iya diripotka pansut ari rumah urung pukul 2 lemai kena 16 Mei pengudah ngulu pengawa nguburka siku ari sida sebilik di Kampung Koran Bari sebedau enda mujur pulai ke rumah.
Ripot polis bekaul enggau pengelenyau iya digaga sida sebilik urung pukul 9.23 pagi kemari pengudah pengawa ngiga sida empu enda mujur.
Operasyen SAR tu ngaul kerejasama mayuh bengkah ejensi nyengkaum APM, PDRM, JBPM enggau RELA ti ngembuan penyampau 21 iku kaban.
Pengawa ngiga nya dipejalaika ba sekeda sektor nyengkaum kandang genturung pendiau, kandang tebing sungai enggau pendam dikena nyidi penunga iya.
Taja pia, nyentuk operasyen diketuka pukul 5 lemai kemari, iya agi bedau ditemu lalu operasyen ngiga deka disambung seharitu. – RBI
