SPAOH, Mei 19 — Projek pemansang Padang Bilun Bebuling (STOLport) ke beungkus RM248.03 juta diatu udah nyapai penyulut fizikal 100 peratus lalu dikearapka nyadi pematak baru pemansang sistem pengangkut langit di kandang menua pesisir Sarawak.
Pemansang nya dikunsi Sapit Premier Sarawak ke mega Menteri Infrastruktur enggau Pemansang Palan Penyangkai Kapal, Datuk Amar Douglas Uggah Embas nengah tulis ba ‘Facebook’ rasmi iya pengudah bejalaika penemuai kereja ngagai palan projek nya kena 10 Mei tu tadi.
Nitih ku iya, projek infrastruktur strategik nya mujur dipejalaika nitihka timpuh ke udah ditetapka lalu deka meri penguntung ke besai ngagai komuniti menua pesisir, kelebih agi di kandang menua pesisir nengeri tu.
Ku iya, STOLport Bebuling ukai semina deka ngenegapka rentayan pengangkut langit Sarawak, tang mega muka mayuh agi peluang pemansang ekonomi sereta ngemanahka akses komunikasyen ungkup rayat.
Iya mega nerangka pemujur bejalaika projek nya nyadika bukti komitmen perintah Gempung Parti Sarawak (GPS) dalam nentuka genap perambu pemansang ulih nyadi nyata ungkup pengelantang rayat.
“Tu nyadika bukti perintah GPS ngamatka semaya.Nama utai ke udah diperambu, kami deka bejalaika ungkup pemaik rayat,” ku iya dalam tulis nya.
Entara batang komponen ke dikemansang nengah projek tu nyengkaum jalai bilun, jalai teksi bilun, apron endur ngengkahka bilun, begunan terminal, sistem parit, perengka guna enggau kereja mekanikal enggau karan ke bekaul.
STOLport Bebuling dikearap ulih bejalaika tanggungpengawa ti beguna dalam ngemanahka akses perengka pengangkut langit, meransang penumbuh sosio-ekonomi lokal sereta ngenegapka kaul entara menua pesisir enggau mengeri di serata Sarawak setipak enggau agenda pemansang kandang menua ti meruan.
Sama bisi datai rambau penemuai kereja nya, Kaban Parlimen P.204 Betong, Dato Dr.Richard Rapu enggau Injinir Opis Kereja Raya (JKR) Bagi Menua Betong, Jason Ng. – RBI
