MERADONG, 26 Mei — Siku nembiak indu beumur enam taun diripotka lesi pengudah dipechayaka lemas maya mandi ba pegung nyemerai ba sebuah palan di Bintangor kemari.

Ketuai Polis Pelilih Meradong, DSP Tansli Mering madah, piak polis nerima ripot bekaul enggau penusah nya urung pukul 7.03 lemai.

Nitihku iya, tudah dipadahka benung mandi enggau urung semilan ngagai 13 iku diri sebilik ba pegung nyemerai nya sebedau iya ditemu lenyau.

“Lebuh sida benung mandi, sida sebilik enda sedarka tudah udah lemas.

Tudah semina sedarka iya lenyau lebuh siku ari raban iya nurun ngiga tudah sebedau sida serumah ke bukai bela bejalaika pengawa ngiga iya,” ku Tansli nengah sebengkah penerang sehari tu tadi.

Ku iya, tudah nembiak udah nya ditemu lemas dalam pegung nya sebedau dibai niki lalu diberi CPR seraya nganti ambulans ari Sarikei datai ba palan penusah nyadi.

Taja pia, tudah enda mujur diselamatka.

Ku iya nambah, kes tu diklasifikasi nyadi Ripot Pemati Ngenyit (SDR) lalu tubuh tudah udah dibai ke Sepital Sarikei kena bejalaika pengawa beputung tasat.

Berebak enggau nya, iya mega ngelalau mensia mayuh ngambika enda ngaga sebarang spekulasyen bekaul enggau penusah nya laban pansik polis agi dipejalaika. – RBI

KUCHING, 26 Mei — Projek Sirung nengah pengawa nyain kunterik Injiniring, Bebelika Barang enggau Ngaga (EPC) dianggap nyadi siti singkang strategik ke besai ba pengawa ngenegapka ekonomi enggau jemah ila industri kuasa Sarawak setipak enggau aspirasyen pemansang timpuh panjai nengeri tu.

Premier Sarawak, Datuk Patinggi Tan Sri Dr Abang Abdul Rahman Johari Abang Openg madah, projek nya ukai semina ngemansangka sektor minyak enggau gis aja, tang lebih agi mandangka komitmen perintah Sarawak nentuka pengeraja asal nengeri tu disalin nyadi penguntung ke nyata ungkup rayat.

Nitih ku iya, Projek Sirung setipak enggau Strategi Pemansang Pengudah COVID-19 2030 (PCDS 2030) ti nagit Sarawak nyadi pelilih menua maju sereta bepenatai pemisi tinggi manggai ba taun 2030 nengah penyungkak pengelantang ekonomi, mensia mayuh ti inklusif enggau pengelantang rampa menua.

“Sarawak nagit nambahka Pemansut Kasar Dalam Menua (KDNK) ari RM136 bilion ba taun 2019 ngagai RM282 bilion manggai ba taun 2030 lalu tagit tu begunaka projek strategik baka Sirung dikena ngenegapka pelasar ekonomi nengeri tu,” ku iya.

Iya madah munyi nya lebuh bejaku ba sebengkah pengerami bekaul enggau Projek EPC Sirung ditu, sehari tu tadi.

Ku iya nambah, Sarawak mega udah ngambi singkang proaktif dalam ngenegapka penuduk fiskal enggau dominasi strategik dalam sektor minyak enggau gis, mujur nambahka penatai pemisi nengeri enggau manah agi.

Ku iya, Sarawak ngerikod penatai pemisi nengeri pemadu tinggi dalam sejarah ba taun 2024, iya nya RM14.187 bilion, nyau deka dua kali lipat enti dibanding enggau sebedau taun 2017.

“Ungkup taun 2026, penatai pemisi nengeri dipelabaka manggai RM13.049 bilion nyengkaum RM4.6 bilion ari Cukai Jualan Nengeri (SST), enggau RM3.5 bilion disadang diberi minyak mata, LNG enggau produk petroleum ke bukai,” ku iya nerang.

Iya nyemetak madah, pengawa bejalaika lima peratus SST ba produk petroleum diatu entara pengeraja asal ti beguna ti meri entara RM2.5 bilion ngagai RM4.8 bilion ninting taun ngagai Sarawak bepanggai ba rega makit dunya.

Nitihku iya, Petroleum Sarawak Berhad bejalaika tanggungpengawa ke besai dalam nentuka Sarawak teulihka rega ke tinggi agi ari pengeraja asal iya empu.

Bekaul enggau Projek Sirung, iya madahka Syarikat Awam Eksplorasi enggau Pengeluaran PTT Berhad nagit ngeluarka keterubah manggai ba taun 2028 nengah pemansang Sirung-Chenda enggau kapasiti ngeluarka urung 15,000 tong sehari.

Iya nambah, projek nya mega ngena teknologi “Zero Routine Flaring” enggau operasyen tasik ti dikuasa ari jauh ti lebih efisyen sereta ‘mesra’ rampa menua seriris enggau aspirasyen Sarawak ti kurang karbon.

Ku iya, pemansang sektor minyak enggau gis mengkang beguna dalam ngenegapka daya pengetan ekonomi nengeri tu laban makit kuasa global majak napi penekul ketegal penyarut geopolitik enggau peminta kuasa dunya ti enda tetap.

“Asil ari sektor tu deka terus dikena melanja pemansang infrastruktur enggau pengelantang rayat nyengkaum jalai alun, jematan, bekal ai, kuasa karan, sekula, klinik, rentayan digital enggau bantu rama, kelebih agi di menua pesisir,” ku iya.

Berebak enggau nya, iya madahka inisiatif Pelajar Tinggi Percuma Sarawak (FTES) deka terus ngadaka pengereja pengawa ti bepengelandik dikena nyukung industri strategik nyengkaum minyak enggau gis, kuasa, injinir enggau teknologi maju.

Iya mega muji pengawa Brooke Holding ti ngaul diri dalam projek nya nyadika pengawa dikena ngenegapka pengulih kompeni menua tu besemekih ba renggat entarabansa.

Kelimpah ari nya, iya ngelaluka kaul Affin Bank Berhad nyukung projek besai baka Sirung ti ku iya ulih ngenegapka ekosistem ekonomi Sarawak nengah kerejasama strategik entara sektor industri enggau institusyen wang.

Nitih ku iya, Sarawak diatu benung chakah nyingkang nuju pemansang ekonomi hidrogen, kuasa tau dikena baru, industri ili, infrastruktur digital, pengawa ngaga barang ti maju sereta mega teknologi semikonduktor enggau aeroangkasa.

“Strategi Sarawak ukai milih siti sektor ari ke bukai, tang nempa penegap ke udah bisi, nangkap rega enggau pintar sereta ngena pengeraja asal kemaya hari tu dikena melanja ekonomi jemah ila,” ku iya.

Iya mega nyemetak madahka Sarawak ngelaluka pengawa terus beranakka puku ari PTTEP laban kerejasama strategik enggau pemain antarabansa ulih mai puku, teknologi enggau pengandal pemeranak puku, tang pengawa beranakka puku nya meseti sebela enggau pulai ke adil ngagai nengeri tu, ngaul diri setempat enggau penguntung timpuh panjai ngagai rayat Sarawak. – RBI

SIMANGGANG, 26 Mei — Rayat Sarawak dilalau ngambika enda mudah tekuing runding enggau dawa ti salah ti udah viral ba media rama bekaul enggau projek Jematan Batang Lupar 1 ti dipolitikka sekeda orang.

Chairman Komiti Pengerai enggau Pengasih Komuniti (JAKKSA) Bagi Menua Sri Aman, Gerald Empaling madah, iya nyukung penuh penerang Sekretari Besai Parti Sa’ati Rayat Sarawak (SUPP) Datuk Sebastian Ting bekaul enggau pengawa salah ti nyadung penerang ke enda betul bekaul enggau projek nya.

Nitih ku iya, peranak Sarawak nemu projek Jematan Batang Lupar 1 mujur nyadi nyata asil ari pengeran, komitmen enggau pengulih belanja Perintah Sarawak ari baruh iring Gempung Parti Sarawak (GPS).

Ku iya, taja pan keterubah iya projek nya dikemendarka maya pentadbiran Menteri Besai ke dulu suba Najib Razak, tang pengudah betukar Perintah Besai dalam taun 2018, sekeda projek infrastruktur ke beguna di Sarawak nyengkaum Jematan Batang Lupar 1 didawa dikinsil.

Taja pia ku iya nerang, pengawa nya enda ngelemika pengeran Perintah Sarawak ti deka nentuka rayat kelebih agi di menua pesisir enggau entigis sungai erus ngasaika perengkaguna infrastruktur ti manah agi sereta peluang pemansang ekonomi ti lebih luas.

Nitihku Gerald, Perintah Sarawak ari baruh iring Premier Sarawak, Datuk Patinggi Tan Sri (Dr) Abang Johari Openg, udah nya ngambi singkang neruska projek nya ngena pemisi belanja nengeri tu empu ungkup pemaik rayat.

“Penembu Jematan Batang Lupar 1 sehari tu nyadi kelai penau, pengeran enggau komitmen Sarawak dalam ngetanka agenda pemansang nengeri tu sereta meri penguntung ke besai ngagai peranak kandang menua Besai Sri Aman,” ku iya nengah sebengkah penerang sehari tu.

Ku iya nambah, jematan nya ukai semina nyadi infrastruktur ti beguna ngagai rayat, tang mega kelai visyen enggau iring perintah GPS dalam nentuka pemansang Sarawak terus ditegapka belama.

Iya mega nerangka pengawa nguji ngaitka pemujur projek nya ngagai piak bukai enggau enda ngambi kira pekara ke bendar nyadi pengawa ke nadai tanggungpengawa ke tau ngasuh rayat saru penemu.

Berindik enggau nya, Gerald minta mensia mayuh seruran beratika penerang bepelasarka fakta enggau sejarah ke bendar pemansang nengeri tu lalu anang mudah tekuing runding enggau sekeda propaganda politik. – RBI

MIRI, 26 Mei — Siku baya pemanjai urung enam kaki udah mujur ditangkap dalam operasyen khas di kandang genturung pendiau Jalai Greenville Senadin pagi tadi.

Nitihka Ketuai Balai Bomba enggau Penyah Penusah (BBP) Lutong, PBT II Henry Jugah, sida nerima kangau ngenyit bekaul enggau penemu jelu nya urung pukul 8.38 pagi sebedau seraban bomba dianjung ngagai endur nya.

Lebuh datai ba palan nya urung pukul 8.49 pagi, Raban Timbal Operasyen (PKO) tetemuka siku baya dalam parit ba sebengkah genturung pendiau baka ke diripotka orang ke ngaga sebana.

“Komander operasyen udah nya bejalaika pengawa menilai keterubah sebedau mantu Kaunsil Pengintu Kampung Sarawa (SFC) nangkap baya nya ngena tali.

Baya nya mujur ditangkap enggau likun lalu gaya ba endur nya ulih dijaga enggau nadai sebarang bakal tauka bebadi nyawa.

Operasyen nya tembu penuh urung pukul 9.32 pagi sebedau raban bomba mupuk mulaika diri ngagai balai.

Operasyen nya mega dibantu empat iku kaban SFC. Penyauh ari palan penusah nyadi ngagai stesyen nya dipelabaka urung 10 kilometer. – RBI

MIRI, 26 Mei — Penyikar peranak sebuah rumah di Lorong 2, Bandar Baru Permai Jaya ngerara api mujur nyeliahka penusah ke balat agi nyadi ba tumu pagi tadi.

Ba penusah ke nyadi urung pukul 1 pagi nya, api dipelabaka berengkah nganguska sebuah bilik tinduk sebedau peranak rumah nya ti terus bejalaika pengawa nagang api seraya nganti penatai raban bomba.

Balai Bomba enggau Penyah Penusah (BBP) Lutong madahka sida nerima kangau ngenyit urung pukul 1.08 pagi lalu tekala nya ngelawa palan penusah nyadi.

Lebuh datai ba endur nya urung pukul 1.21 pagi, raban bomba tetemuka penusah angus nya mungkur sebuah bilik tinduk ke ngembuan pemesai urung 8×4 kaki, tang api mujur dirara tumu ulih peranak rumah nya.

Nitihka penerang ari komander operasyen nya, api nganguska urung 10 peratus bilik nya lalu mega nganguska sebuah jemari gari.

Raban bomba udah nya bejalaika pengawa meresa enggau matau enggau silik dikena nentuka nadai teda api ti agi tinggal tauka bisi risiko api idup baru ba palan penusah nyadi.

Operasyen nya mujur dijaga urung pukul 1.27 pagi sebedau diketuka urung pukul 2.02 pagi.

Nadai orang diripotka bakal ba penusah nya.

Sama bisi datai ba palan nya tiga iku raban Polis Diraja Malaysia (PDRM) enggau pemesai Sarawak Energy (SESCO) mantu nentuka kandang endur nya likun. – RBI

KINABATANGAN, 26 Mei — Jalai besai ti nyambung Sandakan ngagai Lahad Datu ba kandang WP25 Sukau, ditu, runtuh tumu pagi tadi lalu ngeruga pejalai beribu iku penguna jalai alun.

Penusah tu dipelabaka nyadi ketegal struktur tanah ke mendap ngujungka sekeda bagi jalai balat rusak.

Pemesai Pelilih Kinabatangan, Suhaimi Ejip ngentaska penusah nya lalu madahka Opis Kereja Raya (JKR) pelilih udah diasuh lengkas bejalaika pengawa meresa ba endur nya.

Ku iya, pengawa nya dikena ngelala kebuah penusah nya nyadi sereta pengawa nangkan ke patut dipejalaika dikena nentuka pengelikun penguna jalai alun.

“Kami udah ngasuh Opis Kereja Raya nurun ngagai endur nya lalu lengkas beratika gaya jalai ke dikerandau nya.”

“Penguna dilalau bejejimat lebuh nengah kandang endur nya sereta besabar enggau penekul ke nyadi,” ku iya lebuh ditelefon, sehari tu tadi.

Dipelabaka jalai di Sukau nya sebengkah ari batang jalai ti nyambung Pantai Barat enggau Timur Sabah lalu nyadi sebagi ari projek Jalai Besai Pan Borneo ke diatu benung chakah dipejalaika.

Pengerusak jalai nya udah ngenataika pengirau bala penguna, kelebih agi deriba perengka pengangkut berat ti nengah jalai nya ninting hari.

Sebedau tu, penusah ke sebaka mega bisi diripot nyadi ba kandang menua Silam, Lahad Datu ke dipelabaka bepun ari gaya tanah mendap sereta enda entap.

Naka ke diatu, piak bekuasa agi matau endur penusah nya nyadi seraya pengawa ngemanah enggau pengawa ke bukai benung dikoordinasyen. — RBI

MERADONG, 26 Mei – Tim “Task Force” Indu Opis Polis Pelilih (IPD) Meradong mujur ngetan siku lelaki peranak menua nya pengudah iya ditemu positif dadah dalam operasyen “Ops Tapis” ti dipejalaika ngelingi pelilih Bintangor, pagi tadi.

Ketuai Polis Pelilih Meradong, DSP Tansli Mering madah, saspek ke beumur 51 taun nya mujur ditan urung pukul 9.45 pagi asil ari pengawa matau enggau pemansik ke dipejalaika tim operasyen bekaul enggau aktiviti salah guna dadah ba kandang endur nya.

Nitihku iya, saspek udah nya dibai ngagai Indu Opis Polis Pelilih Meradong ngambika atur silik agi dipejalaika sebedau beperesa nisih ai kemi ba Opis Bagian Tasat Jenayah Narkotik (BSJND) Pelilih Meradong.

“Asil peresa nya saspek ditemu positif Amphetamine enggau Methamphetamine,” ku iya nengah siti penerang sehari tu tadi.

Iya mega madahka, pengawa meresa rikod ke udah tetemuka lelaki ke bisi kaul nya nadai ngembuan sebarang rikod jenayah tauka penyalah bekaul enggau dadah sebedau tu.

Kes tu dipansik ari baruh Seksyen 15(1)(a) Akta Dadah Berbahaya 1952 ti nyendiaka ukum mata duit enda ngelui RM5,000 tauka jil nyentuk dua taun enti dikenuku salah.

Berebak enggau nya, DSP Tansli nyemetak madahka polis beratika isu salah guna dadah tu enggau berat laban nya tau ngeruga pengelikun enggau pengelantang komuniti setempat.

Berindik enggau nya, iya minta mensia mayuh terus meri kerejasama ngagai polis nengah chara meri sebarang penerang bekaul enggau aktiviti dadah di pelilih Meradong.

Penerang tau dikenataika terus ngagai Balai Polis Bintangor nengah lumur 084-693222. – RBI

BETONG, 26 Mei – Sepenyampau 44 iku penerima ari komuniti Iban di kandang menua Padeh, Betong nerima Surat Pala Tanah Seksyen 18 Kanun Tanah Sarawak (KTN) ba pengerami nyerahka Surat Pala Tanah ke diatur ba Rumah Panjai Bungkang, Padeh, pagi tadi.

Pengerami nya dipenyadi Datuk Len Talif Salleh, Sapit Menteri Perambu Mengeri, Pengatur Tanah enggau Rampa Menua.

Program tu sebagi ari inisiatif perintah Sarawak ari baruh Program Inisiatif Baru NCR nengah Seksyen 6 Kanun Tanah Sarawak dikena ngenyampatka pengawa ngeluarka pala tanah ngagai peranak menua nya.

Nengah pengawa nyerah tu, kandang menua Padeh ngaul pemesai tanah 236.69 hektar enggau penyampau 48 surat pala tanah diserah ngagai 44 iku penerima ari komuniti Iban.

Seksyen 18 Kanun Tanah Sarawak iya nya ngeluarka geran pala tanah tetap ti dikeluarka ngagai pengempu tanah Hak Adat Bansa Asal (NCR).

Pengawa meri geran nya ngasuh pengempu tanah bulih jamin entas sereta meruan diempu enti dibandingka enggau status asal NCR ti bedau bisi pala tanah berejista.

Inisiatif perintah tu dipeda ulih meri penguntung ke besai ngagai peranak menua pesisir, kelebih agi ari sukut pengelikun ngempu tanah, pemansang ekonomi enggau pesaka tanah ngagai rebak dudi hari.

Sama bisi datai iya nya Kaban Kunsil Nemgero (ADUN) Layar Datuk Gerald Rentap Jabu, Kaban Parlimen Betong Dato Dr.Richard Rapu, Residen Bagi Menua Betong Datu Richard anak Michael Abunawas, TPr. Moris anak Nayup kelimpah bala ketuai opis enggau komuniti lokal. -RBI

KUCHING, 26 Mei – Bagi Pemansik enggau Pemansang, Opis Kampung Sarawak (FDS) bekerejasama enggau Bagi Servis Pengatur mujur ngatur Kus Kompetensyen Anatomi dan Pengelala Kayu ti diatur pengelama tiga minggu berengkah ari 4 ngagai 22 Mei ba Dewan Pemansik enggau Pemansang Bagian FDS.

Kus nya dipejalaika Kaunsil Pemansang Industri Kayu Sarawak (STIDC) lalu digulu 15 iku pemesai FDS ari mayuh bengkah bidang nyengkaum pengawa neritka adat, pansik enggau ngatur kampung.

Program tu diatur dikena ngenegapka kompetensyen teknikal penyereta dalam bidang anatomi enggau pengelala kayu nengah gempung sesi teori, latih praktikal enggau penilaian ti ngaul 64 bansa kayu ti ditemu di Sarawak.

Sepemanjai kus nya, bala penyereta dikenataika enggau penemu sereta pengelandik praktikal dalam ngelala tukuh anatomi kayu sereta bejalaika proses pemun ngelala kayu dikena nyukung aspek penerit atur kampung, ngentaska kayu, ngatur kampung enggau meruan sereta aplikasyen bekaul enggau industri.

Bala penyereta mega diberi kelala ngena teknologi pemintar tiru (AI) nengah sistem kereban pengelala Wood AI-assisted ti dikemansang piak nya dikena mantu proses ngelala kayu dipejalaika enggau betul sereta efisyen agi dalam aplikasyen kampung.

Pengerami nutup kus nya dipenyadika Ketuai Bagi Pansik enggau Pemansang FDS, Paulus Anak Meleng, ti ngemeratka komitmen opis nya ngenegapka pengelandik teknikal enggau pemansang profesional ti seruran dipejalaika ba raban FDS.

Iya mega meri besai terima kasih ngagai STIDC ba kerejasama enggau sukung teknikal ke udah disedia dalam ngemujurka program nya, seraya ngarapka inisiatif baka nya ulih diteruska jemah ila dikena ngenegapka kapasiti institusyen sereta ngemansangka sektor kampung Sarawak. -RBI

#ruaiberitaiban#newsiban#beritaiban

Rindu | Titih | Kunsika

SELANGAU, 26 Mei – Karnival Nembiak Selangau 2026 deka ngempuruka raban nembiak nengah bemacham program pemansang diri, pelajar enggau pengelandik ti deka diatur ba Dewan Mayuh Guna Selangau berengkah ari pukul 7.30 pagi nyentuk 6 lemai kena 25 Julai tu ila.

Program ke diatur Serakup Intelektual Bansa Asal Sarawak (PERANTIS) enggau kerejasama Palan Servis DUN N.59 Tamin deka dipenyadika Kaban Kunsil Nengeri (ADUN) N.59 Tamin, Ir Christopher Gira Sambang.

Karnival tu ukai semina deka nyadi pelasar ngagai raban nembiak ngulihka penemu enggau pengelandik, tang mega meri peluang ngagai raban nembiak nyerungkai bidang baru ti ulih nyungkak potensial enggau pengidup sida jemah ila.

Entara batang aktiviti ke bisi disediaka nyengkaum pekit e-lumba PUBG enggau Mobile Legends 2026, Woksop Instrumen Pekara Wang nyengkaum pekit bedagang, kus kulinari enggau peluang nyereta program pelajar enda bebayar ari palan pelajar tinggi (IPTA) ke diempu Perintah Sarawak.

Bela deka diperambu iya nya aktiviti TVET baka Pemandang Dron, Pekit Dron ‘Berhalangan’, Pemandang simulasyen welding, Simulasyen sistem tali karan, Servis meresa sistem airkon entukar, Servis meresa sistem ECU entukar.

Kelimpah ari aktiviti pelajar enggau pengelandik, karnival nya mega dirichah enggau penatai khas penanyi tebilang Iban, Gwen, ti tebilang enggau lagu Sanggup Aku dikearapka nyadi pematak besai temuai kelebih agi raban nembiak.

Raban pengatur mega nesau raban nembiak Selangau ngambi awak nyereta program nya dikena nambahka penemu, pengelandik sereta ngenegapka kaul rama entara raban nembiak.

Karnival mai rambai jaku “Belia Berilmu, Belia Berdaya, Selangau Gemilang” setipak enggau pengawa deka ngenegapka nembiak rebak baru nuju pengidup ti lebih manah jemah ila. – RBI

#ruaiberitaiban#newsiban#beritaiban

Rindu | Titih | Kunsika