SIBU, 16 Mei — Aum Besai Tiga Taun Sekali Parti Demokratik Progresif (PDP) 2026 nyadi pelasar beguna dalam pengawa ngenegapka penyerakup sereta ngemaruka komitmen parti komponen Gabungan Parti Sarawak (GPS) dikena nentuka penegap politik Sarawak enggau pemansang ti enda ngetu dijaga.

Nitihka penerang ari Sekretari Besai Parti Pesaka Bumiputera Bersatu (PBB), Dato Sri Alexander Nanta Linggi, gempuru besai ke diatur di Sibu nya bela digulu Premier Sarawak ke mega Chairman GPS, Datuk Patinggi Tan Sri Abang Abdul Rahman Johari Abang Openg enggau Presiden PDP Dato Seri Tiong King Sing.

Ku iya, gempuru nya ukai semina nyadi pelasar dikena ngenegapka penyerakup entara parti komponen GPS, tang mega dikena nyerakupka tuju sereta ngemaruka komitmen perjuangan politik ungkup Sarawak lebih maju sereta lantang jemah ila.

Ku iya, pesan ke dikenataika Premier Sarawak ngemeratka pemesai guna nyaga penegap politik enggau kerejasama rat dalam GPS dikena nentuka hak Sarawak ari baruh Sempekat Malaysia 1963 (MA63) terus dijuanh enggau konsisten.

“Berebak enggau nya, agenda pemansang timpuh panjai nengah Strategi Pemansang Pasca COVID-19 2030 (PCDS 2030) begunaka penegap, nyengkaum dalam bidang ekonomi digital, kuasa tau dikena baru, ekonomi gadung, pemansang infrastruktur enggau pemansang seimbang entara kandang mengeri enggau kandang menua pesisir,” ku penerang nya.

Kelimpah ari nya, penerang nya mega ngambi pesan Presiden PDP ti ngingatka parti nya patut seruran relevan, pragmatik, teratur sereta semak enggau rayat dalam napi rampa politik ke diatu ti majak mayuh pemar.

Kenu ku iya, politik kemaya hari begunaka chara ke tuai runding, beorientasyenka pemansang sereta kebendar meri penguntung ngagai rayat.

Berebak enggau nya, raban nembiak rebak baru enggau orang indu mega digambarka ngembuan tanggungpengawa ti beguna nyadi sada, pengerembai enggau penganti ketuai nengeri jemah ila.

“Kelala, peluang enggau kaul chakah raban nembiak enggau orang indu dalam organisasyen enggau gerakan politik meseti terus ditegapka ngambika sida ulih sama-sama nyaup pemansang Sarawak,” ku iya beserimbai enggau Aum Besai Tiga Taun PDP 2026 di Sibu. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

BINTULU, 16 Mei — Parti Demokratik Progresif (PDP) ngenukuka komitmen parti terus nyukung iring Premier Sarawak, Datuk Patinggi Tan Sri Abang Johari Tun Openg, dalam pengawa ngenegapka pemansang enggau penyulut nengeri tu.

Presiden PDP, Dato Seri Tiong King Sing madah, penatai Premier Sarawak bejadika Aum Besai Tiga Taun Sekali (TGA) PDP 2026 nyadi basa ke besai ngagai semua raban parti sereta ngayanka kaul kerejasama rat dalam Gabungan Parti Sarawak (GPS).

Nitihku iya, PDP deka terus meri sukung penuh ngagai ketuai Premier Sarawak dikena nentuka Sarawak terus maju, lantang sereta ulih besemekih.

“PDP deka terus bediri tegap enggau iring YAB Premier Sarawak dalam pengawa mai nengeri tu ngagai tikas ke lebih maju sereta nentuka agenda pemansang rayat ulih dipejalaika enggau efektif,” ku iya nengah penerang ke dibantai ba Facebook sehari tu.

Ba jaku iya ba pengawa nya, Tiong mega bisi mantaika pantun khas ti nyadi kelai meri puji ngagai iring Premier Sarawak enggau semengat beserakup dalam GPS.

Kelimpah ari nya, iya mega meri besai terima kasih ngagai semua pengari, raban parti enggau komiti pengatur ti udah bebendar ngemujurka TGA 2026.

Ku iya, semengat beserakup, pemaruh ati sereta bebendar gawa entara kaban parti deka terus nyadi batang penegap PDP ngambika terus relevan sereta terus nyadi pelasar semengat bejuang rayat Sarawak jemah ila. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SRI AMAN, 16 Mei — Kaban Parlimen Sri Aman YB Dato’ Sri Doris Sophia Brodie enggau laki iya ngulu Pengerami Bejadika Bazar Gawai Sri Aman 2026 ke udah nyadi kemari, ke diatur Kelab Ngepan Sri Aman.

Bazaar Gawai ti diatur kedua kali di Sri Aman nyadi pelasar ti beguna amat dalam mantaika main asal, pesaka enggau produk asal komuniti menua nya beserimbai enggau pengerami Gawai Dayak taun tu.

Pengerami bejadika pengerami nya dipenyadika Sapit Menteri Pemansang Bakat Sarawak (MEITD) YB Datuk Francis Harden Hollis, ke mega Kaban Kunsil Nengeri (ADUN) Simanggang begulai enggau bini iya.

Sepenyampau 70 bansal bejual udah dibuka di serata bazaar nya enggau penyereta pedagang mit menua tu ti nyual bemacham bansa barang nyengkaum asil pengelandik jari, pekayan asal baka ngepan bansa Dayak, bansa kueh enggau bemacham pemakai menua tu.

Pengawa ngatur program tu ukai semina nyendiaka ruang ngagai orang dagang mit enggau jelan pemesai ngelakuka produk sida, tang mega bejalaika tanggungpengawa ngenegapka agi pengawa ngetanka pesaka asal sereta ngerichahka agi pengerami pra-Gawai di Bagi Menua Sri Aman.

Bazaar Gawai Sri Aman 2026 deka diatur pengelama 10 hari nyentuk 24 Mei 2026 lalu dipelaba deka terus matak temuai ari ngelingi Sri Aman enggau kandang menua besemak — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Doris Sophia Brodie

KUCHING, 16 Mei 16 — Seni asal Gendang Pampat meseti terus dijaga sereta dikemeran nyadi pesaka budaya komuniti Iban ngambika semampai relevan sereta ulih ditampung ngagai nembiak rebak baru.

Sapit Menteri Digital, Datuk Wilson Ugak Kumbong madah, pekit ke diatur beserimbai enggau Bazaar Gawai Dayak & Festival Etnobudaya 2026 ukai semina pengawa mandangka seni budaya aja, tang nyadi pelasar ke beguna dalam pengawa ngetanka identiti enggau pesaka asal komuniti Dayak.

“Pekit tu ukai semina pengawa mandangka seni budaya aja, tang siti pengawa ke besai reti dikena ngetan sereta negika pesaka asal komuniti Iban ngambika terus idup sereta ditampung nembiak rebak baru,” ku iya lebuh bejadika Pekit Gendang Pampat, kemari.

Kenu ku iya, Gendang Pampat ngembuan rega ke besai nyadi kelai identiti, semengat begulai enggau temegah budaya komuniti Iban di Sarawak.

“Aku amat temegah ati meda komitmen bala pesereta ti terus bebendar ngetanka seni pesaka tu,” ku iya.

Iya mega meri besai terima kasih ngagai semua pesereta enggau pengatur laban udah mujur ngatur program nya, ti dikumbai iya bisi reti dalam ngenegapka seni enggau main asal menua tu.

Ku iya, pengawa ngenegapka program main asal ke bansa nya beguna amat dikena nentuka pesaka asal komuniti terus diintu sereta nyadi pekara ti dikemegahka rebak dudi hari. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — YB Datuk Wilson Ugak Kumbong

BINTULU, 16 Mei — Pengawa Bebaris Niti Daun beserimbai enggau Pengerami Ngintu Gawai Dayak Renggat Pelilih Bintulu 2026 diatur enggau chukup pengeransing sereta richah lebuh iya mujur ngempuruka 73 kontinjen ti mungkur lebih 5,000 iku pesereta ba kandang Esplanade Bintulu, sehari tu.

Program ninting taun nya diatur Opis Kereja Raya (JKR) Bagi Menua Bintulu nengah kerejasama mayuh bengkah ejensi perintah, gerempung ukai dikuasa perintah (NGO) enggau komuniti menua nya, dikena nentuka pengelanchar sereta mujur ngatur pengerami nya.

Pengerami bejadika pengawa nya dipenyadika YB Datuk Majang Anak Renggi ti nyadi Sapit Menteri Infrastruktur enggau Pemansang Penyangkai Kapal Sarawak ke mega Kaban Kunsil Nengeri (ADUN) Samalaju.

Pengawa bebaris tu nyadi kelai penyerakup entara komuniti pupu bansa di Bagi Menua Bintulu, seraya mega mantaika penyelai budaya enggau pesaka asal komuniti Dayak nengah pengawa mandangka pekayan asal, muzik etnik, main asal enggau kreativiti tetiap kontinjen ke ngambi bagi.

Sepemanjai program nya, Esplanade Bintulu penuh enggau mensia mayuh ti enda muai peluang meda pengawa bebaris nya.

Pengerami tu mega nyadi pelasar ke beguna dalam nerenakka pemanah ati, pengelantang sereta ngerapitka kaul entara komuniti setempat.

Pengawa ngatur pengerami tu dikearap ulih terus ngetan sereta ngenegapka pesaka asal komuniti Dayak, seraya mega meri kelala penyelai budaya Sarawak ngagai rebak baru enggau komuniti luar.

Sama bisi datai Datu Nyurak Keti, Pemesai Residen Bagi Menua Bintulu; Encik Awang Mohammed Nizam bin Awang Ali Bohan, Pemesai Pelilih Menua Bintulu; enggau Ir. Lau Sie Hung, Injinir Bagi Menua Bintulu. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUCHING, 16 Mei — Perintah Sarawak majak ngenegapka komitmen ngenyampatka transformasyen digital sektor palan penyangkai kapal nengeri nyadi singkang strategik dikena ngangkatka penyikar operasyen enggau kompetitif industri logistik enggau dagang setipak enggau pemansang ekonomi dunya bepelasarka teknologi.

Premier Sarawak, Datuk Patinggi Tan Sri Abang Abdul Rahman Johari Abang Openg madah, landskap operasyen palan penyangkai kapal entarabansa diatu benung ngasaika ubah ke nyata enggau aplikasyen teknologi digital, automasyen enggau analisis data maya nyata ti ngemuntangka proses dokumentasyen enggau ngelepaska kargo dipejalaika enggau jampat agi, lebih efisyen sereta sistematik.

Ku iya nerang, siti ari ubah besai dalam industri palan penyangkai kapal global kemaya hari tu iya nya pengulih nembuka dokumentasyen kapal sebedau kapal datai ba palan ke dituju, lalu enggau nya ngurangka timpuh nganti sereta ngenyampatka arus operasyen ba palan penyangkai kapal.

“Kapal bedau datai, dokumen udah tembu nengah transmisyen data digital,” ku iya seraya ngemeratka pengawa besilih penerang bekaul enggau kargo diatu ulih digaga enggau naka pengelengkas lebuh kapal bekejang ari palan penyangkai kapal, ngemendarka pengawa nyendiaka operasyen dipejalaika tumu agi sereta sistematik agi.

Iya nambah, penerang baka bansa kargo, penyampau undan enggau palan endur nganjung diatu ulih dipindah terus nengah pelasar digital ti begempung, lalu enggau nya ulih ngangkatka pemanah rentayan logistik sereta ngenegapka pengawa ngatur operasyen palan penyangkai kapal.

Ngenang senentang tuju sektor palan penyangkai kapal nengeri jemah ila, iya madahka pengawa ngena teknologi automasyen baka kren ke dikuasa ari jauh, perengka pengangkut ke nadai orang, sistem robotik enggau palan kawalan bersepadu dikearap nyadi pengawa standard dalam industri palan penyangkai kapal moden.

Berindik enggau nya, iya nyemetak madahka pemansang modal mensia meseti dikemerat kelebih agi ba staf Lembaga Pelabuhan Kuching, ngambika disediaka nengah proses ngelatih baru, ngangkatka pengelandik enggau adaptasyen teknologi dikena ngatur ekosistem palan penyangkai kapal moden enggau lebih kompeten.

Ku iya nambah, penyikap pengereja pengawa menua tu beguna amat dikena nentuka Sarawak terus kompetitif sereta terus mansang nyadi hub logistik besai di rantau ASEAN.

Iya madah munyi nya lebuh ngenataika jaku kunsi beserimbai enggau Pengerami Makai Lemai Ngintu Ulang Taun Ke-65 Lembaga Pelabuhan Kuching ke diatur ba Pullman Kuching malam kemari.

Pengerami nya mega nyadi kelai meri terima kasih ngagai pemeri Lembaga Pelabuhan Kuching ti udah bejalaika tanggungpengawa ti beguna pengelama lebih enam dekad dalam meransang pemansang sektor dagang, logistik enggau ekonomi Sarawak. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Sarawakku

KUCHING, 16 Mei — Menteri Pemansang Orang Indu, Ruang Bilik enggau Komuniti (KPWKM), YB Dato’ Sri Hajah Nancy binti Shukri ngenataika pengaga ati enggau terima kasih ngagai semua raban pengajar beserimbai enggau pengerami ngintu Hari Pengajar 2026 ketegal semua jasa sida dedikasyen pengorbanan dalam pengawa narak anak bansa.

Kenu ku iya, pangku pengawa pengajar ukai semina meri penemu dalam kelas aja, tang mega nyadi lalau, penyanding penemu enggau pun inspirasyen dalam nempa pengidup bansa jemah ila.

Ku iya, pengawa nyadi pengajar ukai pengawa ke muntang laban begunaka penyabar, berambun nyawa enggau pengering, kelimpah ari pengelurus ati dalam ngajar sereta nempa ulah nembiak.

“Di belakang tetiap pemujur sesiku orang, meseti bisi pengajar ti enda kala lelak ngajar, ngiring sereta pechaya tetiap iku nembiak bisi potensial mansang jauh agi dalam pengidup,” ku iya nengah sebengkah penerang beserimbai enggau Hari Pengajar 2026 sehari tu.

Nancy mega nyemetak madahka raban pengajar diatu betapi enggau pemar baru setipak enggau pemansang dunya digital enggau teknologi ‘artificial intelligence’ (AI), tang mengkang bebendar nentuka rebak baru enda tinggal ari arus ubah dunya.

Ku iya, tema pengerami Hari Pengajar taun tu, “Guru Bitara Nadi Negara”, amat engkeman dalam meri puji ngagai jasa enggau pangku pengawa besai raban pengajar nyadi tulang belakang pemansang modal mensia menua.

Iya mega nerangka pengajar nyadi penampak penemu enggau pengarap ungkup menua jemah ila ti seruran bejalaika tanggungpengawa ti beguna dalam nempa raban bansa ti bepenemu, moral enggau integriti.

Berindik ari nya, iya ngarapka semua jasa enggau pengelurus ati raban pengajar terus diberekat sereta nyadi pengasih ti meruan ungkup penyulut mensia mayuh enggau menua.

“Terima kasih ngagai semua pengajar ba tetiap pengibuh, jasa ti engka enda tampak, tang besai reti dalam pengidup nembiak enggau mensia mayuh,” ku iya. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SPAOH, 16 Mei — Projek Ngangkatmanah Jalai Ladang di Munggu Gernis, Spaoh ti dipejalaika nengah Program Ejensi Pemansang Bagi Menua Betong (BDDA) udah mujur tembu nitihka timpuh ti udah ditetap, lalu enggau nya ulih ngemanahka akses ungkup peranak, kelebih agi komuniti orang bumai ba kandang DUN N.37 Bukit Saban.

Nitihka penerang ari Opis Kereja Raya (JKR) Bagi Menua Betong, projek nya dipejalaika dalam timpuh lapan bulan berengkah 9 Oktober 2025 lalu diperambu tembu kena 8 Jun 2026.

Pengawa bejalaika projek tu ngembuan tuju deka ngemanahka jalai tama ke manah agi, likun sereta nyamai agi ngagai kandang endur ladang ke diempu peranak menua nya, kelimpah ari ngenegapka agi sambung ngagai kandang endur betanam betupi ngelingi Munggu Gernis.

Nengah penembu projek tu, peranak menua tu diatu ngasaika akses ti lanchar agi, lalu enggau nya ngemudahka pemindah ninting hari sereta ngenyampatka pengawa ngangkut asil betanam betupi ngagai pasar.

Berebak enggau nya, projek tu mega meri empas positif ngagai pemansang ekonomi menua pesisir nengah chara nambahka efisyen logistik enggau akses ngagai kandang endur ngeluarka asil betanam betupi.

Opis Kereja Raya Bagi Menua Betong nyemetak madahka pengawa bejalaika projek tu mandangka komitmen perintah ti terus ngenegapka pemansang infrastruktur menua pesisir ungkup pengelantang rayat sereta ngangkatka sosioekonomi komuniti setempat. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

MIRI, 16 Mei – Raban pemekuh gendang pampat patut ngena pelasar digital enggau media rama dikena ngerembaika pengawa ngelakuka pengawa sida ngagai mensia mayuh.

Sapit Menteri Digital, Datuk Wilson Ugak Kumbong madah, ngena pelasar digital ukai semina ulih meri kelala pesaka budaya ngagai mensia mayuh ke lebih mayuh, tang mega bisi potensial muka peluang ekonomi ngagai pemain gendang pampat.

“Aku dekaka raban gendang pampat ngena media rama enggau pelasar digital ngambika pengawa pemerindang sida dikelala mensia mayuh.

“Mensia mayuh ulih nemu pasal raban ti chakah bemain maya pengerami Gawai, ari nya ngemuntangka pengawa ngelakuka servis sida,” ku iya.

Iya madah munyi nya lebuh bejaku ba Pekit Gendang Pampat beserimbai enggau Bazar Gawai Dayak enggau Pesta Etnobudaya 2026 di Permyjaya, malam kemari.

“Pekit Betabuh Gendang Pampat terus nyadi medium ti beguna dalam pengawa ngetan sereta nurunka seni muzik asal komuniti Iban ngagai nembiak rebak baru.

“Gendang pampat tu sebengkah pemerindang asal ke chukup dikelala enggau pengerami Gawai kelia sereta patut dijaga ngambika enda dilalaika,” ku Wilson.

Kenu ku iya, rebak tuai megai tanggungpengawa ti beguna amat ngembing rebak baru ngambika tradisyen nya ulih diteruska jemah ila.

“Lebuh maya musin Gawai, munyi gendang pampat nyadi pemerindang komuniti kelia, rebak tuai beguna amat ngiring raban nembiak ngambika pesaka asal tu terus idup sereta nyadi temegah ati komuniti,” ku iya.

Berebak enggau nya, iya mega meransang Serakup Dayak Miri ngaga begunan tetap dikena ngenegapka pengawa ngatur aktiviti budaya sereta nyadi palan gempuru komuniti Dayak di mengeri tu.- RBI

Sumber TVS

#ruaiberitaiban#newsiban#beritaiban

Rindu | Titih | Kunsika

SRI AMAN, 16 Mei – Jaku “jari ti ngusak enyut ulih ngasuh dunya begetar” nyadika simbol pemesai jasa indai enggau pangku pengawa indai ti besai dalam ngasilka rebak ti bepenemu, bemoral sereta kompetitif, ku Kaban Parlimen Sri Aman Doris Sophia Brodie.

Kenu ku iya, pengawa, penyayau enggau pengeliat ati siku indai nyadi pelasar ke beguna dalam nempa pemujur anak enggau pengidup jemah ila sebuah ruang bilik.

Iya mansutka jaku tu lebuh ngulu sereta bejadika Pengerami Makai Lemai Hari Indai ke diatur St. Peter’s Chapel lalu disempulang laki iya, Dr. William Chua, kemari.

Dalam jaku pengerami iya, Doris mantaika pengaga ati ngagai pengawa besai indai nyadi tiang batang dalam institusyen ruang bilik sereta penumbuh mensia mayuh ti likun sereta lantang.

Ku iya nambah, budaya bebasa, sayau sereta beterima kasih ngagai indai ukai semina tanggungpengawa aja, tang nyadi puku rama ti berega amat laban nilai mulia tu deka nyadika chuan sereta dititih nembiak rebak baru jemah ila.

Pengerami nya diatur dalam chukup pengerami sereta beterima kasih nyadika kelai ngaku jasa enggau pengawa bala indai dalam pemansang ruang bilik, komuniti enggau menua.

Pengerami nya bela digulu Betty Munji, Tony Jilat George, Jecksion Tay, Daniel Sawing enggau Minging.— RBI

#ruaiberitaiban#newsiban#beritaiban

Rindu | Titih | Kunsika