SONG, 1 Jun — Tradisyen nemuai ngabang beserimbai enggau ngintu Hari Gawai Dayak terus nyadi platform ti beguna dalam ngerapitka kaul, nerenakka semengat kerejasama sereta ngenegapka penyerakup entara komuniti rumah panjai.
Program Penerima Pengabang ke diatur ba Rumah Limbi Jambar ba Temalat, enggau penatai deligit ari Rumah Tuai Rumah Sumbang Temalat mujur ngempuruka peranak ari kededua genturung pendiau dalam gaya ke penuh pengerichah enggau semengat diri sebilik.
Tuai Rumah Sumbang dalam jaku dipansutka iya nyemetak madahka pengawa nemuai nya siti pesaka budaya ti meseti terus dijaga sereta ditampung ngagai rebak dudi hari.
Kenu ku iya, main asal tu ukai semina nyadi kelai penyerakup entara komuniti Dayak, tang mega ngemeranka pengawa ngerapitka kaul entara peranak rumah panjai ke udah lama ditanggam.
“Tu meh utai ti deka dipeda aku, iya nya tradisyen nemuai terus dikemeranka. Kaul rat entara komuniti meseti seruran ditan sereta ditegapka laban tu penegap komuniti kitai,” ku iya.
Iya mega madahka tradisyen nya endang dikemeranka udah lama, tang pengawa ngidupka iya baru nyata ngayanka komitmen komuniti ngetanka adat enggau budaya ti nyadi kelai komuniti Dayak.
Berebak enggau nya, Ketuai Komiti Gawai Rumah Sumbang, Tuan Andrew madah, semengat kerejasama peranak menua nya meruan tegap taja udah bisi tiga buah rumah panjai ke diatu udah bisi pentadbiran enggau pengatur kediri empu.
Nitih ku iya, peranak menua nya agi bekerejasama dalam mayuh macham aktiviti komuniti, nyengkaum ngatur program budaya enggau ngintu pengerami.
“Taja tetiap rumah panjai bisi palan pengentap pendiau kediri empu, tang semengat kerejasama enggau besaup pangan diri tetap nyadi pengawa ke dikembuan kitai. Tu meh ke nentuka kaul entara komuniti meruan rat,” ku iya.
Iya mega madah, seraban ari Rumah Limbi udah nemuai ngagai Rumah Sumbang sehari sebedau nya, seraya bebalas ngabang ke nyadi sehari tu sebagi ari tradisyen pengabang ke dikemeranka ninting musin Gawai.
Urung 60 iku peranak ari Rumah Sumbang nyereta penemuai nya, ti mega muka ruang ngagai kededua piak besilih penemu, ngenegapka pemereti ati sereta ngenegapka agi kaul menyadi.
Program tu ngayanka komitmen komuniti setempat nyaga pesaka budaya, kelimpah ari nentuka nilai penyerakup, basa enggau kerejasama terus ngerembai dalam pengidup komuniti rumah panjai. — RBI
#Beritalban | Ruai Berita Iban
Rinduka | Titihka | Kunsika
