KUCHING, 18 Mei — Perintah Sarawak majak ngenegapka pemansang perengka guna, bekal ai, kuasa karan enggau telekomunikasyen di nengeri tu nengah pengawa bejalaika mayuh bengkah projek strategik ti beungkus RM9.29 bilion ari baruh Langgur Pemansang Malaysia Lumpar Ke-13 (RMK13) enggau ‘Pembiayaan Alternatif’.

Menteri Perengka Guna enggau Telekomunikasyen Dato Sri Julaihi Narawi madah, agih belanja ke besai nya ngayanka komitmen perintah Sarawak nentuka rayat ngasaika perengka guna ke lebih efisyen, entap sereta komprehensif nyengkaum di menua pesisir.

Nitih ku iya, sektor bekal ai nerima agih belanja pemadu besai iya nya RM5.3 bilion ti mungkur 347 projek, enggau 289 projek tauka 83 peratus tembu.

“Perintah Sarawak mega udah melanja RM188.75 juta kenyau ari taun 2020 dikena neruska subsidi bil ai enda bebayar RM5 keterubah ti sama enggau 11,300 liter ai ungkup rayat Sarawak,” ku iya lebuh nyimpul jurai ba Aum Kunsil Nengeri (DUN) Sarawak sehari tu tadi.

Ku iya, peminta ai di Sarawak diatu manggai 2,300 juta liter sehari lalu dipelaba deka nambah ngagai 3,500 juta liter sehari manggai ba taun 2030 ila.

Iya nandu baru madahka bungkur bekal ai menua pesisir diatu udah nambah ngagai 71.9 peratus seraya kandang mengeri udah manggai 99 peratus, lalu ngujungka bungkur kesemua Sarawak manggai 86.1 peratus.

Dalam pengawa ngenegapka sistem bekal ai nengeri tu, perintah bejalaika Pelin Besai Bekal Ai enggau Grid Ai Sarawak ti nyambung kandang menua Selatan, Tengah enggau Utara nengah sistem grid ai.

Ba sektor kuasa, Julaihi madahka Sarawak diatu ngembuan sistem grid kuasa karan besai ti entap sereta ulih dikearap ari Bau ngagai Lawas.

Ku iya, kapasiti ngasilka kuasa karan nengeri tu diatu manggai 5,928 Megawatt (MW) lalu ditagit deka nambah ngagai 10,000 MW manggai ba taun 2030 enggau 15,000 MW manggai ba taun 2035 enggau pemadu mimit 60 peratus pun penatai kuasa tau dikena baru.

Entara projek besai ke benung digaga diatu iya nya Tekat Ai Kuasa Karan Baleh 1,285 MW ti dipelaba deka beoperasyen dalam taun 2029, pia mega Palan Kuasa Kitar Gabungan Samalaju enggau Miri ti dipelaba tembu dalam taun 2027.

Ba pengawa nentuka peranak menua pesisir terus ngasaika bekal kuasa karan ti bekualiti, perintah udah ngungkupka belanja sepenyampau RM2.7 bilion kenyau ari taun 2018 dikena bejalaika 216 projek Bekal Kuasa Karan Menua Pesisir (BELB).

Ari penyampau nya, bisi 184 projek tauka 85.2 peratus udah tembu lalu meri penguntung ngagai semak 60,000 ruang bilik di serata Sarawak.

Iya mega madahka Projek Skim Bekal Kuasa Karan Alternatif Menua Pesisir Sarawak (SARES) diatu benung mekal kuasa karan 24 jam ngena kuasa solar ngagai 553 buah genturung pendiau enggau rumah panjai ti ngaul lebih 15,000 ruang bilik.

Ba sektor telekomunikasyen ku iya, SACOFA benung bejalaika atur ngangkatmanah enggau ngemanahka rangkaian di serata Sarawak dikena nambahka penegap enggau pengandal servis telekomunikasyen.

Julaihi mega madah, perintah Sarawak ngarapka kuasa ngatur spektrum frekuensi ulih dilempaika ngagai nengeri tu jemah ila dikena ngenegapka pengawa ngatur servis komunikasyen, pengelikun enggau telekomunikasyen nitihka guna Sarawak.

“Sarawak diatu benung ngerembaika pemansang industri aeroangkasa nengah pengawa numbuhka Kaunsil Penyanding Penemu Aeroangkasa Sarawak (SAAC) sereta mega ejensi luar angkasa nengeri ti deka ngatur pemansang teknologi satelit, semikonduktor enggau pansik aeroangkasa,” ku iya.

Ngelansa pasal kemarau ke nuntung Sarawak diatu, iya madahka opis menteri begulai enggau ejensi ke bekaul seruran matau gaya nya sereta bejalaika atur mitigasi nyengkaum merambu ‘cloud seeding’ enggau nganjung bekal ai ngena 122 buah tangki di serata nengeri.

“Taja betapi enggau kemarau, bekal kuasa karan Sarawak agi tegap berindik ari sistem pemansut kuasa ti mayuh macham sereta begempung,” ku iya. – RBI

#ruaiberitaiban#newsiban#beritaiban

Rindu | Titih. | Kunsika

MIRI, 18 Mei — Tim ari Balai Bomba enggau Penyah Penusah (BBP) Lutong mujur nangkap siku iguana ti tama ngagai sebuah rumah ba Jalai Blasam 4, Tudan, dalam operasyen servis khas tengahari tu tadi.

Nitihka ripot operasyen, piak bomba nerima kangau ngenyit urung pukul 12.08 tengahari sebedau loceng ngenyit ditebah 30 sikin udah nya.

Sebuah injin Scania BGR 4022 FRT enggau lima iku raban betuaika PBK II (TBBK I) Awang Arizal dipindah ngagai endur ke bepalan urung tujuh kilometer ari stesyen nya.

Lebuh datai ba endur nya urung pukul 12.15 tengah hari, Raban Komander Operasyen (PKO) bisi tetemuka siku iguana dalam rumah baka ke diripotka orang ke ngaga sebana.

“Pengudah ngaga ‘size-up’ PKO bejalaika pengawa nangkap iguana nya ngena perengka khas nyentukka iya mujur,” ku penerang ari komander operasyen.

Operasyen nya mujur dijaga lalu tembu enggau penuh pukul 12.24 tengah hari sebedau tim nya mupuk ke stesyen nya pukul 12.25 tengah hari.

Nadai sebarang bakal diripotka nyadi lalu gaya nya disahka selamat pengudah diperesa piak bomba. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

BINTULU, 18 Mei – Perambu numbuhka Kawasan Zon Bebas Chukai ba Palan Penyangkai Kapal Bintulu nerima pemendar ari Opis Menteri Wang Malaysia (MOF) pun taun tu tadi lalu dikearapka ulih matak mayuh agi pemeranak puku ngena palan penyangkai kapal ke bisi kaul nya.

Kelimpah ari nya, Sapit Menteri Infrastruktur enggau Pemansang Palan Penyangkai Kapal Sarawak, Datuk Majang Renggi madah, Perintah Sarawak deka bejalaika penuh semua palan penyangkai kapal besai di nengeri tu nengah Kaunsil Penyangkai Kapal Sarawak ti nyadi raban pengatur tunggal.

Iya madah munyi nya ba pengerami ngintu Gawai Dayak 2026 Renggat Pelilih Bintulu ba sebuah restoren tebilang ditu, malam kemari.

Ku iya, semua enam palan penyangkai kapal besai di Sarawak nyengkaum Palan Penyangkai Kapal Bintulu ditu deka dikorporat.

Iya mansutka jaku munyi nya nengah pengawa bejalaika Pansik Induk Palan Penyangkai Kapal Sarawak.

“Kitai deka ngaga korporat ngagai semua palan penyangkai kapal di Sarawak, nyengkaum Palan Penyangkai Kapal Bintulu, ngambika pengawa ngatur sida lebih efisyen sereta kompetitif,” ku iya.

Ku Majang, palan penyangkai kapal ti bisi kaul mega deka diatur nitihka pengelebih sida empu ngambika nadai betimpa guna sereta ulih ngangkatka prestasi. – RBI

#ruaiberitaiban#newsiban#beritaiban

Rindu | Titih | Kunsika

KUCHING, 18 Mei – Pemansang sektor telekomunikasyen di Sarawak diatu masuk ngagai renggat baru nengah pengawa ngena teknologi ti engkeman agi enggau gaya kandang menua, nyengkaum pengawa ngaga menara monopol enggau ngena sistem satelit.

Menteri Perengka Guna enggau Telekomunikasyen Datuk Seri Julaihi Narawi madah, Perintah Sarawak mega beratka isu penyekut rangkaian ti nyadi ketegal penambah guna Internet enggau data.

“Sarawak diatu udah nyapai 94.5 peratus bungkur Internet bepelasarka kandang endur pengentap pendiau di serata nengeri pengudah semua menara telekomunikasyen ari baruh projek SMART enggau JENDELA Fasa 1 tembu sereta beoperasyen penuh,” ku iya,

“Pemujur nya nyata ngayanka komitmen perintah nengeri terus nentuka rayat nyengkaum di menua pesisir ngasaika akses komunikasyen ke manah agi sereta entap agi “ Ku iya, – RBI

#ruaiberitaiban#newsiban#beritaiban

Rindu | Titihka | Kunsika

KAPIT, 18 Mei — Projek ngaga baru Sekolah Menengah Kebangsaan (SMK) Bukit Goram dipeda nyadi pelasar beguna ba pengawa ngenegapka pemansang pelajar ba kandang menua ulu Sarawak kelebih agi di Kapit.

Kaban Parlimen Kapit, Dato Sri Alexander Nanta Linggi madah, projek tu nyadi puku besai dikena nentuka nembiak di menua pesisir mega ngasaika perengka guna pelajar ti lantang, likun sereta kondusif setanding enggau sekula di kandang mengeri.

Iya madah munyi nya pengudah ngulu sesi meri penerang sereta ngabas palan projek ngaga sekula baru sebedau bekejang ke Kuala Lumpur.

Nitihku iya, projek tu mungkur pengawa ngaga sekula sekondari baru ti disikap enggau 36 buah kelas sereta bemacham perengka guna nitihka standard ke diatu.

“Entara batang komponen projek tu nyengkaum blok pentadbiran, blok akademik, sekondari Integrasi Program Pendidikan Khas (PPKI), kantin, dewan sekula, surau, Palan Penganti perengka pengangkut, palan bejalai kaki ke bebungkur enggau perengka guna sukung ke bukai,” ku iya ba sebengkah penerang.

Ku iya nambah, projek nya deka dipejalaika nengah chara ‘Design and Build’ ba pemesai tanah urung 7.189 hektar.

Nyadi Kaban Parlimen Kapit, iya nyemetak madahka genap sukut pengawa bejalaika projek meseti dipatau enggau silik dikena nentuka jadual bejalaika projek, koordinasyen entara ejensi enggau proses ngaga bejalai enggau lanchar ungkup pemaik komuniti sekula enggau komuniti besemak.

“Institusyen belajar di menua pesisir mega meseti ulih bediri tinggi sereta duduk baruh baka sekula di mengeri,” ku iya.

Iya mega dipadahka projek ngaga SMK Bukit Goram nya sebagi ari pengawa bejalaika projek pelajar ari baruh Atur Pemansang Malaysia Lumpar Ke-12 (RMKe-12) nengah tender tebuka pra-kelayakan bepelasarka kluster.

Ku iya, chara tu beguna dikena nentuka proses ngulihka barang enggau bejalaika projek ulih diatur enggau sistematik agi sereta nitihka timpuh ke udah ditetapka.

Berebak enggau nya, iya nerangka pengawa ngaga sekula baru nya kelai pengarap baru ngagai komuniti Kapit, kelebih agi bala nembiak di menua pesisir ngasaika peluang pelajar ke lebih manah sereta bekualiti.

Iya mega komited deka terus nitihka pemansang projek nya sereta mai sada nyawa komuniti Kapit ngambika pengawa bejalaika iya bejalai enggau terang sereta meri empas ke nyata ngagai komuniti.

“Ungkup Kapit enggau semua menua pesisir ke bukai, kitai dekaka bala anak kitai belajar dalam kandang endur ti meri ruang ngagai sida bemimpi besai sereta peluang nyapai nya,” ku iya. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

DUNGUN, 18 Mei – Perintah majak ngenegapka penegap sistem kuasa menua nengah pemansang teknologi nyimpan kuasa moden lebuh Pengerami Bejadika Sistem Nyimpan Kuasa Bateri Santong (BESS) 100MW/400MWh dipenggi Tenaga Nasional Berhad di Dungun udah tembu dipenyadi seharitu.

Nitihku Sapit Menteri Besai, Datuk Seri Fadillah Yusof, projek ti dikemansangka ari baruh inisiatif strategik sektor kuasa menua nya ngayanka komitmen perintah dalam napi pemar bekal ti enda tentu sereta makit kuasa global, kelimpah ari nentuka pengelikun enggau pengandal bekal kuasa karan ngagai rayat terus dijamin enggau ungkus ti ulih dibeli.

“Santong BESS entara sistem nyimpan kuasa bateri utiliti skala besai pemadu tumu di Semenanjung Malaysia enggau kapasiti 100MW/400MWh.

“Pemansang projek tu dipeda nyadi siti singkang ti beguna dalam ngenegapka penegap grid kuasa karan menua sereta nyukung integrasyen kuasa tau dikena baru (RE), kelebih agi kuasa solar, enggau lebih luas sereta efisyen,” ku iya.

Teknologi BESS beguna nyadi “bank kuasa” ti besai ti ulih nyimpan kuasa karan ti lebih sebedau ngelepaska iya baru lebuh diguna.

Sistem nya mantu ngetanka frekuensi grid, ngurangka risiko putus bekal kuasa karan sereta nambahka fleksibiliti sistem kuasa menua.

Kelimpah ari nya, pemansang BESS mega setipak enggau aspirasyen menua ti deka nyapai tagit 70 peratus kapasiti dipasang kuasa tau dikena baru manggai ba taun 2050.

Teknologi nyimpan kuasa baka tu dianggap beguna dalam nyukung agenda transisyen kuasa menua nuju sistem ti meruan agi, tan sereta kurang karbon.

Berebak enggau nya, Tenaga Nasional Berhad mega dipuji ketegal komitmen ti terus ngemansangka infrastruktur kuasa strategik ti ukai semina nyukung penegap sistem grid menua, tang mega meri penguntung terus ngagai rayat enggau industri, nyengkaum ngenegapka pengandal pemeranak puku sereta meransang penumbuh ekonomi menua.

Perintah nengah Opis Menteri Transformasyen Kuasa enggau Transformasyen Ai deka terus bekerejasama rat enggau semua piak dikena nentuka pemansang teknologi kuasa baru baka BESS ulih dipejalaika enggau meruan, likun sereta meri penguntung timpuh panjai ngagai menua enggau rayat setipak enggau aspirasyen Malaysia MADANI. – RBI

#ruaiberitaiban#newsiban#beritaiban

Rindu | Titih | Kunsika

KUCHING, 18 Mei — Ketuai Pemesai Eksekutif SACOFA, Jafer Sadig Abdul Lathiff, begulai enggau tim pengatur pengawa kompeni nya ngatur penemuai basa ngagai Menteri Industri Pemakai, Komoditi enggau Pemansang Kandang Menua, Dato Sri Dr. Stephen Rundi Utom ba Bengunan Kunsil

Nengeri (DUN) Sarawak baru-baru tu.

Penemuai tu meri peluang ngagai kededua piak ngerapitka kaul strategik sereta berandauka pekara bekaul enggau penyambung, pemansang infrastruktur enggau kerejasama terus dalam nyukung inisiatif pemansang digital enggau pemansang kandang menua Sarawak.

Nitihka penerang, aum nya nyadi pelasar ke beguna dalam ngenegapka kerejasama strategik entara SACOFA enggau Opis Menteri Industri Pemakai, Komoditi enggau Pemansang Kandang Menua, Sarawak (MFICORD), kelebih agi dalam aspek pemansang infrastruktur digital enggau penyambung di serata Sarawak.

Penerang nya mega ngemeratka komitmen terus kededua piak dalam ngenegapka kerejasama dikena nyukung agenda transformasyen digital nengeri tu, nyengkaum pengawa ngerembaika akses komunikasyen sereta ngenegapka pemansang pelilih menua ungkup pengelantang rayat Sarawak.

Sama bisi ngulu penemuai nya, Sapit Menteri Industri Pemakai, Komoditi enggau Pemansang Kandang Menua, Sarawak, Datuk Dr. Abdul Rahman Ismail enggau Datuk Martin Ben, sereta Sekretari Mendam opis menteri nya, Datu Sirai Anak Daha. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

MANCHESTER, 18 Mei – Casemiro meri jaku selamat tinggal enggau ati ti sinu ngagai bala peminat Manchester United pengudah mantu tim nya ngalahka Nottingham Forest 3-2 ba main kepenudi iya ba Old Trafford musin tu.

Pemain tengah Brazil ke beumur 34 taun nya diberi basa khas lebuh iya nerima tempik jari ari penyukung lebuh iya diganti ba minit ke-81, sebedau tama baru ngagai padang disempulang sida iya sebilik meri selamat tinggal ngagai bala peminat.

Penatai beribu iku peminat ba Old Trafford terang ngayanka pengaga ati ke besai ngagai Casemiro, ke deka ninggalka kelab nya lebuh kontrak iya abis timpuh musin panas tu.

Ex-bintang Real Madrid nya nyereta United ba jenila pemindah pemain musim panas taun 2022 enggau rega urung £60 juta lalu jampat nyadi pemain di nyulut ba tengah tim nya.

Sekumbang ke enggau The Red Devils, Casemiro udah bemain 160 kali lalu ngemasukka 26 gol ba semua pekit. Iya mega mantu United ngangkatka Trofi EFL 2023 enggau Piala FA 2024.

Taja pan timpuh ke enda konsisten enggau spekulasyen, Casemiro udah mansutka diri nyadi pemain nyulut ba musin tu lalu mantu tim Michael Carrick pulai ngagai pekit Eropah.

Dalam jaku pandak tang penuh enggau penyinu ngagai bala peminat pengudah main nya, Casemiro madahka iya meri besai terima kasih ngagai peminat United.

“Aku deka berengkah enggau meri terima kasih ngagai semua. Terima kasih ngagai bala pemain, staf enggau semua ba kelab tu.

“Tang utai ke pemadu manah ba kelab tu iya nya kita, bala peminat… terima kasih,” ku iya.

Pengawa beserara ti besai reti nya ngujungka pejalai ti manah ngagai Casemiro ba Old Trafford, siku pemain ti deka seruran dikeingatka bala peminat United. -RBI

#ruaiberitaiban#newsiban#beritaiban

Rindu | Titih. | Kunsika

KAPIT, 18 Mei – Menteri Kereja Raya, Dato Sri Alexander Nanta Linggi, udah bejadika Pengerami Nyuaka Chek P215 Kapit ti ngaul penyampau RM110,000 ngagai sekeda gerempung enggau komiti kandang menua dikena nyukung pengawa bejalaika program komuniti enggau aktiviti rama di kandang menua nya.

Nitihku Kaban Parlimen Kapit nya, bantu ke diagih nya dikena mantu ngenegapka bemacham inisiatif komuniti sereta nangkup guna kandang menua ti meri penguntung terus ngagai rayat.

“Bantu tu dikearapka ulih mantu ngemuntangka pengawa merambu enggau bejalaika program ke udah disediaka tetiap penerima, kelimpah ari ngenegapka kerejasama entara ketuai komuniti, komiti kandang menua enggau rayat ba kandang menua Kapit,” ku iya.

Entara penerima bantu tu iya nya Kelab Rando Opis Residen Kapit enggau tuju nyereta program Lab RTP ke diatur di Miri bulan nyin tadi, JKKK Masjid ungkup pengawa nyendiaka diri ngintu pengerami Hari Raya Korban nyengkaum pengawa meli chapi, Komiti Bazaar ungkup ngatur sebengkah ba komuniti Program Mangkung Tiang mujur ti diperambu deka diatur kena 3 Jun tu ila.

Kelimpah ari nya, bantu tambah sepenyampau RM30,000 mega bisi disuaka ngagai Kelab Rando Opis Pelilih Kapit nyadika sukung bejalaika aktiviti enggau program pemansang komuniti di kandang menua nya.

Ku Nanta, nyadi pengari rayat Parlimen Kapit, iya deka terus meri perati ngagai guna rayat sereta nyukung bemacham inisiatif komuniti ti ulih mai empas positif ngagai pemansang rama enggau pengelantang komuniti.

“Komitmen ngemansangka Kapit ukai semina ngemeratka pemansang fizikal aja, tang mega ngenegapka komuniti nengah sukung ti enda ngetu ngagai program komuniti ti nyerakupka rayat sereta meransang pengelantang bekunsi,” ku iya nambah.

Pengawa nyuaka bantu nya mandangka komitmen ti seruran dipejalai dalam nentuka pemansang inklusif terus diasai rayat setipak enggau juluk Sarawaj Maju Makmur 2030. – RBI

#ruaiberitaiban#newsiban#beritaiban

Rindu | Titih | Kunsika

PETRA JAYA, 19 Mei — Raban Komiti Gerija St.Peter Saratok ti betuaika Reverend Rodriguez Unak nemuai meri basa ngelaluka Sapit Premier Sarawak, YB Datuk Amar Douglas Uggah Embas nyadi temuai dipebasa ba Pengerami Makai Lemai beserimbai enggau genap 100 taun Gerija St.Peter Saratok.

Penemuai nya mega disempulang Kaban Kunsil Nengeri (ADUN) Krian, YB Friday Belik begulai enggau kaban komiti gerija ke bukai.

Rambau penemuai nya, komiti gerija mega bisi madahka pasal bemacham program enggau aktiviti ke udah diperambu sepemanjai taun 2026 dikena ngerichahka agi pengerami ngintu jubli besejarah nya ila.

Lebih 16 aktiviti pengarap, komuniti enggau rama diperambu deka diatur sepemanjai taun nyadi sebagi ari pengerami ngintu ulang taun nya.

Kelimpah ari nya, Raban Komiti Gerija nya mega bisi bekunsika pemansang bekaul enggau projek ngangkatmanah Gerija St.Peter Saratok Peter Saratok ti udah nerima bantu ari Unit Pekara Jalai Pengarap Bukai (UNIFOR).

Bantu nya dipeda meri penguntung ke besai ba pengawa ngemanahka perengka guna enggau pengelantang rumah sembiang ungkup guna komuniti besemak.

Penemuai basa nya mega mandangka kaul rat entara institusyen jalai pengarap, ketuai komuniti enggau komuniti dalam pengawa ngenegapka penyerakup, pengelantang enggau pemansang rama di Sarawak.

Pengerami ngintu genap 100 taun Gerija St. Peter Saratok dikearapka nyadi siti momen besejarah ti ngempuruka komuniti setempat dalam semengat beterima kasih sereta begulai enggau pemeri gerija ngagai komuniti kenyau ari penumbuh seratus taun ke udah. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika