Siti agi pemujur dalam pejalai belajar sepemanjai umur enggau penyulut profesyenal. Dipebasa diberi setipikit nyadi Kaban Profesional Kanan Institut Kualiti Malaysia (IQM), mai gelar profesyenal “QPr”.
#ruaiberitaiban#newsiban#beritaiban
Rindu | Titih. | Kunsika
KUCHING, 20 Mei — Premier Sarawak, Datuk Patinggi Tan Sri (Dr) Abang Abdul Rahman Johari Abang Openg sehari tu nerima penemuai basa raban ari BlackBerry enggau Universiti Kebangsaan Malaysia (UKM) ba opis iya di Begunan Kunsil Nengeri (DUN) Sarawak ditu.
Diligit UKM betuaika Sapit Canselor, Sufian Jusoh, ke mega disempulang Sapit Sapit Canselor Pemansik enggau Inovasyen, Prof Dr. Johan Mohamad, enggau Profesor Fakulti Sains Sosial enggau Kemanusiaan, Prof. Dr. Novel Lyndon.
Berebak enggau nya, diligit BlackBerry betuaika Ketuai Pemesai Eksekutif (CEO) enggau Presiden BlackBerry Limited USA, John Giamatteo, begulai enggau Ketuai Pemesai Strategi BlackBerry Limited John Dimitropoulos, Ketuai Opis BlackBerry Asia Pasifik Legal Opis Kuala Lumpur Tash Stamatelos, BlackBerry USA, BlackBerry Hematelos, BlackBerry Limited. Hal Ehwal Phil Kurtz, Direktor Enterprise BlackBerry Malaysia Raja Rizal Kamrul Abdullah enggau Direktor Servis Pelanggan BlackBerry Malaysia Abdulah Sabri Mohd Noor.
Nitihku Prof Dato’ Dr Sufian Jusoh, aum nya ngemeratka potensial kerejasama strategik entara UKM, BlackBerry enggau Perintah Sarawak dalam mayuh bengkah sektor teknologi ti meri empas tinggi.
Ku iya, entara bidang ke dikerandau iya nya pemansang kuasa solar, hidrogen, semikonduktor, ngira kuantum enggau teknologi komunikasyen ke likun, setipak enggau aspirasyen Sarawak deka nyadi hab teknologi jemah ila sereta nengeri maju manggai ba taun 2030.
“Kitai meda peluang bekerejasama enggau Perintah Sarawak sereta institusyen menua tu begulai enggau universiti antarabansa baka Institut Teknologi Massachusetts enggau Cambridge dikena ngemansangka teknologi jemah ila di Sarawak,” ku iya.
Berebak enggau nya, John Giamatteo madahka aum nya amat produktif sereta ngemeratka pemesai guna kerejasama rat entara perintah, sektor peribit enggau institusyen pelajar dalam mutarka pemar teknologi global.
Ku iya, BlackBerry komited nyukung Sarawak, kelebih agi dalam bidang komunikasyen ti likun enggau teknologi kedaulatan data dikena mantu ngenegapka pengawa nyaga penerang sensitif enggau sistem pengelikun digital perintah.
“Ba kandang endur baka Sarawak ke bisi risiko ampuh bah enggau penusah, sistem komunikasyen ngenyit enggau penerang ke likun beguna amat lalu nya entara chara mutar ke ulih diberi BlackBerry nengah kerejasama enggau UKM sereta institusyen ke bekaul,” ku iya. – RBI
#ruaiberitaiban#newsiban#beritaiban
Rindu | Titih | Kunsika
KUCHING, 20 Mei – Perambu nusun baru guna tanah ba Estet Perindustrian Pending siti pengawa strategik perintah Sarawak dikena nempa rampa mengeri ti meruan agi, kondusif sereta berega tinggi setipak enggau pengerembai pemansang mengeri Kuching ti jampat.
Sapit Premier Sarawak ke mega Menteri Kedua Pengeraja Asal enggau Pemansang Mengeri, Datuk Amar Awang Tengah Ali Hasan madah, asil pansik nya nengah pansik ‘online’ ti dipejalaika begulai enggau Opis Menteri Dagang Antarabansa, Industri enggau Pemeranak Puku (MINTRED) sereta Opis Menteri Pengeraja Asal enggau Pemansang Mengeri Sarawak ungkup kandang endur ti strategik dalam (MUDeNR).
Nitih ku iya, asil pansik nya beguna dalam pengawa nempa zon guna tanah ti bekualiti agi, betukuh sereta meruan.
“Rega reta tengkira ba kandang menua nya mega disadang deka niki asil ari pengawa bejalaika pengawa nusun baru guna tanah tu,” ku iya lebuh nyimpul jurai opis menteri nya ba Aum Kunsil Nengeri (DUN) sehari tu.
Iya nyemetak madahka industri ke engkeman deka terus dijaga, lalu industri ke begunaka pindah deka diengkah ba kandang endur ke engkeman agi.
Ku iya, kandang menua Pending diatu endur bemacham aktiviti industri nyengkaum industri berat, tengan enggau jelan, industri bepelasarka kayu baka kilang, aktiviti kapal kelimpah ari industri ti meri pangka ngagai pengamah rampa menua, nya alai begunaka pengawa nusun baru ti komprehensif.
Ku Awang Tengah, pengawa nya sebagi ari perambu timpuh panjai perintah laban mengeri Kuching majak jampat mansang sereta begunaka pelin guna tanah ti lebih komprehensif jemah ila.
Iya mega nyemetak madahka inisiatif nya ukai betuju deka muai operator industri enggau drastik, tang dipejalaika nengah chara ‘menang-menang’ ti beratika pemerat semua piak.
Ambika banding, iya madahka transformasyen mengeri enggau nusun baru guna tanah ke baka nya udah dipejalaika ba sekeda menua maju nyengkaum kandang menua Tokyo Bay di Jepun, Oslo di Norway enggau Vancouver di Kanada.
“Nulak pengawa nusun baru guna tanah enggau transformasyen mengeri mai reti milih mengkang ba kandang endur ti enda teratur, tinggal sereta enda setipak enggau aspirasyen mengeri moden enggau pintar,” ku iya. – RBI
#ruaiberitaiban#newsiban#beritaiban
Rindu | Titih | Kunsika
SEBANGAN, 20 Mei — Siku baya lelaki pemanjai 4.11 meter enggau pemerat dipelabaka urung 350 kilogram mujur dipindahka ari kandang menua Sungai Ladong dalam operasyen ti dipejalaika dikena nyaga pengelikun peranak rumah panjai ba kandang menua nya.
Nitihka penerang nengah ‘Facebook’ Sarawak Crocter, baya nya ngembuan pemesai urung 25 inchi lalu dipelabaka entara jelu reptilia ke pemadu besai ditemu ba kandang sungai nya.
“Siku baya lelaki pemanjai 4.11 meter, pemerat 350 kilogram enggau pemesai 25 inchi mujur dipindahka ungkup pengelikun peranak rumah panjai,” ku penerang nya.
Berebak enggau nya, piak ke bekaul mega ngelalau mensia mayuh ngambika lengkas ngeripot ngagai piak bekuasa nyema bisi tepedaka baya besai tauka bisi tetemuka sarang baya ba kandang endur diri empu.
Nitihka penerang nya, pengawa tumu enggau kerejasama komuniti beguna amat dikena mantu dalam pengawa nagang penyampau baya sereta ngurangka risiko ngeruga pengelikun mensia mayuh.
“Ripotka meda baya besai ba kandang endur kita ngagai piak bekuasa enggau sarang baya enti bisi ditemu dikena ngurangka penyampau baya sereta nentuka pengelikun semua,” ku penerang nya.
Peranak ke diau besemak enggau sungai mega dilalau ngambika seruran bejejaga sereta nyeliahka aktiviti berisiko ba kandang endur ke ditemu bisi jelu reptilia nya. — RBI
KUCHING, 20 Mei — Sapit Premier Sarawak, Datuk Amar Douglas Uggah Embas nerima penemuai basa ari Kaban Kunsil Nengeri (ADUN) sitak N.28 Lingga, Dayang Noorazah Awang Sohor begulai enggau delegit Parti Pesaka Bumiputera Bersatu (PBB) berserimbai Aum Kunsil Negeri (DUN) Sarawak ke-19 ba Bengunan DUN Sarawak, ditu kemari.
Raban tu datai ari Sapit Ketuai Pampang, Ketuai Pesaka, Ketuai Nembiak enggau kaban Komiti Pesaka PBB Pampang Lingga.
Penemuai basa nya betuju ngenataika tesau rasmi ngagai Datuk Amar Douglas Uggah Embas ngulu Pengerami Ngiling Tikai ke diatur PBB Pampang Lingga nyadi temuai dipebasa ti diperambu deka nyadi dalam awak ke semak tu.
Aum nya mega mandangka kaul rat entara ketuai parti enggau komuniti ba renggat baruh dalam pengawa ngenegapka penyerakup, kerejasama enggau semengat sepenemu entara rayat.
Pengerami Ngiling Tikai dikearapka nyadi pelasar ke beguna dalam pengawa ngetanka main asal enggau main asal komuniti Dayak kelimpah ari ngerapitka kaul pangan entara bala ketuai enggau komuniti setempat. — RBI
KUCHING, 20 Mei — Hari Kelapan Aum Keterubah Penggal Kelima Dewan Kunsil Nengeri (DUN) Sarawak Ke-19 deka tembu sehari tu enggau simpul pejurai deka ari Premier Sarawak, Datuk Patinggi Tan Sri Abang Johari Tun Openg, begulai enggau bala sapit iya ba Dewan Undangan Negeri Sarawak.
Sapit Premier Sarawak, Datuk Amar Douglas Uggah Embas ngenataika simpul penjurai penutup Opis Menteri Wang enggau Ekonomi Baru Sarawak nyadi Menteri Wang enggau Ekonomi Baru II.
Iya mega mantaika ‘winding up’ Opis Menteri Infrastruktur enggau Pemansang Palan Penyangkai Kapal (MIPD) Sarawak ti mungkur bemacham agenda pemansang infrastruktur strategik, rentayan jalai alun enggau pemansang palan penyangkai kapal di serata Sarawak.
Sebedau sesi winding up, iya enggau sapit iya, Datuk Majang Renggie enggau Datuk Ir. Aidel Lariwoo, sereta mega pemesai kanan ari Opis Kereja Raya (JKR) Sarawak, MIPD, piak bekuasa palan penyangkai kapal enggau ejensi bekaul begambar kenang begulai kelai komitmen enggau kerejasama ti enda ngetu dalam ngenegapka pemansang nengeri tu.
Aum Kunsil Nengeri Sarawak sekali tu meda bemacham isu bekaul enggau pemansang ekonomi, infrastruktur, pengelantang pendiau rayat enggau agenda transformasyen nengeri dipejuraika setipak enggau aspirasyen Sarawak nuju status pelilih menua maju sereta bepenatai pemisi tinggi manggai ba taun 2030. — RBI
KUCHING, 20 Mei – Pengelikun mensia mayuh enda tau dikeruga lebuh LPKP Sarawak ngambi atur terit ngetuka lisin dua buah lori semin ti bekaul enggau dua bengkah penusah aksiden ti nabanka nyawa taun tu.
Chairman LPKP Sarawak Michael Kong Feng Nian nyemetak madahka, pengawa nya dipejalaika berindik ari penusah aksiden ti balat ngenyinuka ati kena 21 April 2026 ti nabanka nyawa siku lelaki beumur 39 taun pengudah tudah bebadi ba palan penusah nyadi pengudah dilantak lori penuyau semin.
Nitihku iya, tekala nya pengudah penusah nya nyadi, Komiti Ngetuka tauka Kinsil Lisin LPKP Sarawak diasuh meri kerejasama ngagai polis sereta Opis Perengka Pengangkut Jalai Darat (JPJ) bejalaika pansik sereta ngenataika perambu atur ngagai operator ti bekaul.
“Pansik tetemuka operator ke sama mega sebedau tu kala aksiden ba siti agi penusah bebadi nyawa di Sibu kena 10 Februari 2026 lebuh lori penuyau semin iya tepawah lalu ngelantak sebuah kerita Toyota Hilux.
“Dua penusah nabanka nyawa dalam timpuh ke pandak terang mandangka bisi pengelemi ke berat ke enda ulih diambi mudah,” ku iya nengah sebengkah penerang sehari tu.
Ku iya, bepelasarka lalau komiti nya, Kaunsil LPKP Sarawak udah baum lalu sepenemu mutuska lisin kededua entukar ke bisi kaul nya diketuka pengelama enam bulan.
Kelimpah ari nya ku iya, operator nya mega dipinta nengah program latih enggau pelajar pengelikun ti komprehensif ti mungkur semua deriba enggau pengereja pengawa kompeni.
Ku iya, atur nya dikena nambahka penyedar ba sukut pengelikun jalai alun kelimpah ngemanahka ulah, disiplin enggau tikas tanggungpengawa deriba enggau staf lebuh bejalaika perengka pengangkut komersial.
“Operator mega diasuh masang Speed Limitation Device (SLD) enggau sistem nyidi GPS ba semua perengka pengangkut sida dalam timpuh enam bulan,” ku iya.
Michael Kong nyemetak madahka LPKP Sarawak deka terus bejalaika atur ti tegap, drastik sereta enda belembut ngagai sebarang operator ti enda nitihka standard pengelikun ti udah ditetapka.
“Kami enda nerima sebarang bansa pengawa enda beratika, kelebih agi lebuh pengelikun enggau nyawa mensia mayuh bisi risiko,” ku iya nyemetak. -RBI
KUCHING, 20 Mei — Sepenyampau 23 iku raban nembiak ari DUN Bukit Saban nemuai rasmi ngagai Begunan DUN Sarawak sehari tu dikena beratika diri empu prosiding Aum Pagi Hari Kelapan Aum Keterubah Penggal Kelima DUN Sarawak 2026.
Raban tu betuaika Mixson Blaki, enggau tuju deka meri penerang ngagai raban nembiak pasal sistem pentadbiran perintah nengeri, proses aum DUN enggau pangku pengawa pengari rayat dalam merambu sereta bejalaika pemansang Sarawak.
Rambau penemuai nya, raban nya bepeluang meda enggau mata diri prosiding aum DUN kelimpah beinteraksyen sereta betemu enggau sekeda Menteri Kabinet Sarawak enggau Kaban Kunsil Nengeri (ADUN).
Raban nya mega bisi nemuai meri basa ngagai Sapit Premier Sarawak, Datuk Amar Douglas Uggah Embas ba Begunan DUN Sarawak.
Penemuai nya nyadi pelasar beguna dalam ngenegapka pemereti raban nembiak nuju institusyen nengeri seraya nerenakka semengat nyadi ketuai, penyedar mensia mayuh enggau ngaul raban nembiak enggau chakah dalam pemansang Sarawak.
Inisiatif baka tu dipeda ulih ngadaka rebak nembiak ti lebih bepenemu, bisi visi sereta meretika guna enggau pangku pengawa perintah dalam meransang penyulut nengeri enggau pengelantang rayat.
Penemuai nya disempulang Sekretari Politik ngagai Premier Sarawak, Roseline Mapong, lalu sama bisi datai iya nya Datu Dr. Cassidy Morris Direktor JKR Sarawak. -RBI
BETONG, 20 Mei – Projek ngaga jematan pemintas baru ba Sekula Primari (SK) Nanga Gayau ke beungkus RM2.38 juta ti dipejalaika Opis Kereja Raya (JKR) Bagi Menua Betong dikena nentuka perengka guna lebih likun sereta lantang ungkup nembiak, pengajar enggau peranak menua nya.
Ku Sapit Premier Sarawak, Datuk Amar Douglas Uggah Embas, projek ti dipelanja nengah agih belanja Ejensi Pemansang Bagi Menua Betong (BDDA) diperambu tembu kena 14 September 2026 lalu dikearapka ulih meri pemaik ungkup timpuh panjai ngagai komuniti menua nya setipak enggau agenda pemansang inklusif perintah Sarawak.
Projek ke dipejalaika SARAOIL (M) Sdn Bhd nya mungkur pengawa ngaga jematan pemintas urung 36.4 meter pemanjai enggau 5.7 meter peninggi.
Jematan pemintas nya mega disikap enggau atap ngelindung, pagar pengelikun, sistem lampu enggau ngelindung kilat dikena nentuka pengelikun penguna seruran dijamin.
“Perintah Sarawak majak ngenegapka komitmen dalam nyendiaka perengkaguna infrastruktur ti bekualiti, kelebih agi di menua pesisir.
Iya mansutka jaku tu lebuh bejalaika penemuai kereja ngagai palan Projek Ngaga Jematan Pemintas SK Nanga Gayau empai lama.
Palan baru nya dikearapka ulih ngurangka risiko penusah bebadi kelimpah ari nyendiaka jalai ti likun agi, kelebih agi ngagai staf sekula enggau peranak ti bekenaka kandang endur nya ninting hari.
Nitih ku Douglas Uggah, projek nya mandangka pengawa perintah Sarawak ti majak dipejalaika dikena nentuka komuniti menua pesisir enda tinggal ari ngasaika pemansang moden.
“Kitai dekaka rayat di menua ulu mega ngasaika perengkaguna infrastruktur ti lantang, likun sereta bekualiti baka di kandang mengeri,” ku iya rambau penemuai nya.
Ku iya nambah, pemansang infrastruktur ukai semina meri pengelantang ngagai peranak menua nya, tang mega nyadi pematak ngagai pemansang rama enggau pelajar komuniti lokal.
“Pengelikun nembiak enggau peranak seruran dikemeratka perintah. Nya kebuah projek baka tu patut diberi perati sereta dipejalaika enggau manah,” ku iya nambah.
Sama bisi datai maya penemuai nya, Kaban Parlimen P.204 Betong, Dato Dr Richard Rapu; Injinir Opis Kereja Raya (JKR) Bagi Menua Betong, Jason Ng enggau ketuai komuniti enggau ketuai raban bansa. -RBI
KUCHING, 19 Mei – Perintah nengeri tetap bebendar deka ngidupka baru sektor industri getah dikena ngenegapka pemansang ekonomi menua pesisir.
Menteri Industri Pemakai, Komoditi enggau Pemansang Kandang Menua (M-FICORD) Dato Sri Dr Stephen Rundi Utom madah,, Premier Sarawak Datuk Patinggi Tan Sri Abang Johari Tun Openg udah ngungkupka 490 hektar kandang endur stesyen MRB Similajau ke suba ngagai Kaunsil Industri Getah Sarawak (SARIB) ba taun 2026.
“Sektor getah Sarawak ngembuan potensial besai ke bedau diguna ti ngaul pemesai urung 164,000 hektar enggau anggar rega eksport lebih RM1.4 bilion setaun.
“Dikena ngidupka baru industri tu, SARIB udah nempa kerejasama enggau pekebun mit sereta sektor peribit ngambika mujur ngempung 1,000 hektar kebun getah sereta mansutka penatai pemisi urung RM400,000 ngagai pekebun kenyau ari bulan Oktober 2025,” ku iya.
Iya madah munyi nya ba jaku penutup opis menteri iya ba Aum Kunsil Nengeri (DUN) ditu, sehari tu.
Dr Rundi nambah, SARIB mega udah meri kelala sistem nebang ‘Punching’ moden dikena nambahka penyikar nebang enggau ngumpul peku, kelebih agi maya musin pengujan.
“Nengah sukung chara agronomi ti manah agi, produktiviti udah niki ari 0.2 kilogram ngagai 1.5 kilogram sepun sebulan,” ku iya nerang.
Berebak enggau nya, Dr Rundi madahka akses makit ungkup pekebun mit mega udah dikemanahka agi nengah pedagang getah belisin enggau sistem transaksyen digital RRIMNiaga ti ngerikod RM4.9 juta transaksyen ‘real time’ dalam timpuh tiga bulan keterubah operasyen iya.
Ku iya, dikena nentuka industri getah meruan, perintah besai nengah Kaunsil Pemansang Pekebun Mit Industri Getah (RISDA) udah ngungkupka belanja sepenyampau RM29 juta ungkup pemansang pekebun mit.
Iya mega madahka ungkup program nanam baru, pemesai 1,450 hektar deka dibungkur ba taun 2026 dibandingka enggau RM24 juta ba taun 2025.
“Nengah belanja perintah nengeri, SARIB deka ngemeratka program rehabilitasyen ti ngaul 500 hektar kebun getah berengkah ari taun tu,” ku iya.
Rundi mega nerangka industri minyak sawit Sarawak majak bejalaika pengawa enggau manah taja pan geopolitik global ke enda tentu diatu, ngerikod penatai pemisi eksport sepenyampau RM5.93 bilion ungkup timpuh Januari ngagai April 2026.
Menteri Industri Pemakai, Komoditi enggau Pemansang Kandang Menua (M-FICORD) Dato Sri Dr Stephen Rundi Utom madah, dalam timpuh ke sama, pemansut minyak sawit mata (CPO) niki 5.3 peratus ari 1.27 juta tan ngagai 1.33 juta tan.
Ku iya, pemansut minyak inti sawit mata (CPKO) mega ngerikod penambah ke nyata iya nya 20.4 peratus ari 112,217 tan ngagai 135,137 tan.
“Pengawa estet sawit mega ngayanka pemanah laban pukul rata asil tandan buah segar (FFB) niki ari 4.6 tan sehektar ngagai 4.7 tan sehektar.
“Kadar ngulihka minyak (OER) mega niki ari 19.1 peratus ngagai 19.7 peratus seraya tikas ngulihka CPKO niki ari 45.6 peratus ngagai 46.2 peratus,” ku iya.
Ku Dr Rundi, taja pan geopolitik global enda tentu, industri sawit terus bulih penguntung ari penegap rega komoditi global kelimpah ari penambah peminta ngagai kuasa tau dikena baru enggau biodiesel.
“Pengerindu ti majak nambah ba biodiesel enggau minyak sayur ti meruan dikearap ulih terus ngenegapka peminta makit sereta nyukung peniki rega minyak sawit mata jemah ila,” ku iya.
Ngenang pandak pasal status pengawa bejalaika pensijilan Minyak Sawit Lestari Malaysia (MSPO) di Sarawak, iya madahka naka bulan April 2026, sepenyampau 203,000 hektar pemesai sawit individu pekebun mit, 57,000 hektar pekebun mit ke diatur enggau 1.2 juta hektar udah bulih setipikit nya. – RBI
#ruaiberitaiban#newsiban#beritaiban
Rindu | Titih | Kunsika
