BINTULU, 16 April — Pengerami Gawai Dayak taun tu di Bintulu deka dirichahka agi enggau pengawa ngatur Pasar Gawai Dayak Bintulu 2026 (PGD Bintulu 2026) ke deka diatur pengelama 18 hari berengkah ari 1 Mei nyentuk 18 Mei 2026 ba NAIM Street Mall, Paragon Bintulu.
Program tu diatur begulai Gerempung Pemansang Dayak Bintulu (BANGUN), Gerempung Dayak Bukit Kelingkang (DBK) enggau Persatuan Kebajikan Tunjang Masyarakat Sarawak (TM).
Pasar Gawai Dayak dibuka ngagai mensia mayuh ninting hari ari pukul 8.00 pagi nyentuk 11.00 malam, ti bisi nyendiaka mayuh macham produk menua tu nyengkaum pemakai asal, asil pengelandik jari enggau barang ti diasilka orang dagang komuniti Dayak.
Pengawa ngatur program tu ngembuan tuju deka ngerichahka agi pengerami Gawai Dayak seraya mega ngelakuka main asal enggau main asal komuniti Dayak ngagai mensia mayuh, kelebih agi rebak baru enggau temuai ari menua luar.
Kelimpah ari nya, PGD Bintulu 2026 mega nyadi pelasar beguna dalam ngenegapka ekonomi komuniti lokal nengah chara nyendiaka peluang ngagai orang dagang mit enggau jelan pemesai ngelakuka produk sida enggau lebih luas.
Mensia mayuh dilalau datai ngerichahka agi pengawa tu sereta ngasaika penyelai budaya enggau penyelai produk ke bisi dibantaika sepemanjai timpuh ngatur pengawa tu. — RBI
