LUBOK ANTU, 14 Jun – Pengerami Ngiling Tikai Gawai Dayak 2026 ti diintu beserebak enggau Pengerami Ngintu Ulang Taun Ke-30 Komiti Pemansang enggau Pengelikun Genturung Pendiau (JKKK) Rumah Rebicca, Lipat Ulu udah diatur dalam gaya ti chukup richah sereta rami.

Raban JKKK Rumah Rebicca meri besai terima kasih ngagai Patron pengerami, Kaban Parlimen Lubok Antu, Roy Angau Anak Dato Gingkoi ketegal sukung ti tegap, penatai enggau pemeri iya dikena nentuka pengerami tu ulih dipejalaika enggau mujur.

Apresiasyen mega diberi ngagai semua kaban JKKK, komiti bejalaika pengawa, ketuai raban bansa, temuai ti dikangau, orang melanja, penyereta program enggau semua peranak Rumah Rebicca ti udah mandangka komitmen enggau kerejasama ti chukup manah sepemanjai proses merambu enggau bejalaika program nya.

Kelimpah ari nya, terima kasih khas mega dikenataika ngagai raban media, kelebih agi RTM Sarawak, WAIFM enggau Unit Komunikasyen Mensia Mayuh Sarawak (UKAS) ketegal licha enggau publisiti ti diberi sepemanjai pengawa nya.

Sukung media dianggap nyadi pekara ti beguna dalam ngerembaika pengawa ngenataika penerang sereta ngelakuka program komuniti ngagai mensia mayuh.

Bala pengatur mega meri besai terima kasih ngagai semua piak ti bisi kaul terus tauka enda terus ngemujurka pengawa tu nengah pemeri awak, penemu, belanja enggau sukung sida.

Pengawa ti ngempuruka peranak enggau komuniti menua nya ukai semina nyadika pelasar dikena ngerami pengawa nutup pengerami Gawai Dayak taun tu, tang mega ngerapitka kaul pangan diri, semengat bekerejasama enggau gaukka pangan diri sereta bekerejasama entara komuniti.

JKKK Rh Rebicca ngarapka semengat beserakup, sepenemu enggau begulai ti dipandangka sepemanjai pengawa terus ditan sereta ditegapka ungkup penyulut enggau pengelantang komuniti jemah ila ba kandang menua tu. – RBI

#ruaiberitaiban#newsiban#beritaiban

Rindu | Titih | Kunsika

Sri Aman, 14 Jun – Opis Kereja Raya (JKR) Sarawak ngingatka mensia mayuh anang bejalaika sebarang aktiviti dagang tauka berikan ba Jematan Batang Lupar 1 dikena nentuka pengelikun enggau pengelantang semua penguna jalai alun.

Nengah infografik ti dipansutka JKR Sarawak, dua batang aktiviti ti ditagang ba jematan nya iya nya bejual enggau berikan, laban pengawa nya ulih ngachau arus trafik sereta nambahka risiko penusah aksiden.

JKR Sarawak ngemeratka sebarang aktiviti dagang tauka bejual ba jematan nya enda dikemendarka. Kelimpah ari nya, aktiviti berikan ari jematan nya mega ditagang laban tau ngeruga penguna jalai alun ke bukai.

Tagang tu betuju nentuka Jematan Batang Lupar 1 terus dikena enggau likun nyadi batang jalai pengangkut sereta enda disalahguna ungkup aktiviti ti tau ngeruga pengelikun mensia mayuh.

Berindik enggau nya, mensia mayuh dilalau ngambika seruran nitihka atur ke udah ditetapka sereta ngemeratka sukut pengelikun maya bekenaka jematan nya.

JKR Sarawak mega minta kerejasama semua piak dalam nyaga pengelikun enggau pengelanchar ngena Jematan Batang Lupar 1 ke pemaik begulai.

“Minta kita ngasika atur sereta ngemeratka pengelikun,” tekanka JKR Sarawak dalam jaku pengingat nya. – RBI

#ruaiberitaiban#newsiban#beritaiban

Rindu | Titih | Kunsika

MIRI, 14 Jun — Direktor Betanam Betupi Sarawak, Dominic Anak Chunggat minta semua pengereja pengawa Opis Betanam Betupi Sarawak terus ngenegapka semengat kerejasama, nerenakka budaya bebasaka pangan diri sereta ngetanka pengelantang ba endur gawa dikena nentuka pengawa meri servis ngagai rayat enggau pemansang sektor betanam betupi nengeri maju enggau meruan.

Pesan nya dikenataika iya lebuh bejadika Pengerami Mandat Direktor Betanam Betupi Sarawak ke diatur ba Palan Ilham, Permyjaya, Miri, ti diatur Opis Betanam Betupi Bagi Menua Miri enggau kerejasama Pertubuhan Peladang Kandang Menua (PPK) kena Hari Lima tu tadi.

Pengerami nya mega digulu bala pengereja pengawa Opis Betanam Betupi Bagi Menua Miri, Marudi, Bakong, Bekenu enggau Batu Niah, sereta mega pengari Pertubuhan Peladang Kandang Menua (PPK).

Dalam pesan iya, Encik Dominic nyemetak madahka kereja beraban enggau kerejasama ti tegap nyadi elemen ti beguna dalam nentuka pengawa ulih dipejalaika enggau manah sereta nyapai juluk ti udah ditetapka piak nya.

Ku iya, tetiap pengereja pengawa meseti terus ngemeranka semengat solidariti sereta nyukung pangan diri napi pemar pengawa ti majak kompleks, kelebih agi berindik ari pengawa bejalaika bemacham polisi enggau garis lalau baru.

Kelimpah ari nya, iya mega ngemeratka pemesai guna pengawa timbang pengidup enggau pengawa ngatur kereja enggau efektif dikena nambahka produktiviti sereta nempa rampa kereja ti lebih positif, bepengerai sereta likun.

Kenu ku iya, ulah bebatak asur, bebasaka pangan diri sereta bekerejasama meseti terus dikemeranka dikena ngetanka pengelantang dalam organisasyen.

Berebak enggau nya, iya ngingatka media rama enda patut nyadi medium mantaika asai enda puas ati ti tau ngeruga imej enggau nama opis.

Ngenang pasal sukut nyadi ketuai enggau pentadbiran, Dominic ngemeratka prinsip ti adil meseti dikemeranka enggau konsisten nengah chara nentuka genap iku pengereja pengawa diberi servis enggau lurus sereta enda ngira penatai, kelimpah ari nulak sebarang bansa diskriminasyen enggau rasis ba endur gawa.

Ku iya, chara pentadbiran ti terang, lurus sereta inklusif meseti dikena dalam tetiap sukut ngatur pengawa dikena nentuka pengelantang enggau pemerat semua pengereja pengawa seruran dijaga.

Nyimpul pesan iya, iya ngarapka semua pengereja pengawa Opis Betanam Betupi Sarawak terus ngenegapka semengat begulai, nyaga pengelantang organisasyen sereta sama-sama nyaga pemanah nama opis dikena nentuka pengawa ngenataika servis ti bekualiti ngagai rayat sereta pemansang sektor betanam betupi Sarawak ti meruan.

Sama bisi datai iya nya Kepala Penulung Direktor Bagian Perambu, Benedict Teo; Pemesai Betanam Betupi Bagi Menua Miri, Puan Chong Mui Sia; enggau Menijar Besai merangkap Penulung Kanan Pemesai Betanam Betupi, Puan Norlida binti Rawi. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Pakan 14 Jun – Tim Ultimate mujur nyadi champion Pekit Futsal Liga Komuniti Bagi Menua Sarikei 2026 pengudah mandangka penyulut ti tegap sereta konsisten sepemanjai pekit ke diatur ba Gelanggang Futsal Temenggong Mambu.

Pekit ke diatur Opis Nembiak enggau Lumba Bagi Menua Sarikei enggau kerejasama Kelab Main Bol Pakan mujur ngempung tim menua tu dalam gaya ke penuh enggau semengat lumba enggau main, lalu enggau nya nyadi pelasar dikena ngenegapka penyerakup komuniti sereta nyerungkai penau baru ba main futsal.

Penuduk lumur dua diempu tim Volsar ke mega bepekit enggau bebendar nyentuk ke main kepenudi, lalu penuduk lumur tiga begulai diempu tim Al-Assad United enggau Kerugak.

Kelai meri besai terima kasih ngagai penyulut sida, tim champian mai pulai perais mata duit RM500 disempulang midul, lalu lumur dua nerima perais mata duit RM300 enggau midul.

Kededua tim ke ba penuduk lumur tiga begulai nya bela nerima perais mata duit RM200 enggau midul.

Pengerami nutup rasmi pekit nya udah dipenyadika Kaban Parlimen Julau, Datuk Larry Sng Wei Shien ti bela nyuaka perais ngagai pemenang.

Sama bisi datai ngerichahka agi pengerami nya pengari pengari Pemesai Opis Nembiak enggau Lumba Bagi Menua Sarikei, Abdul Rani enggau Presiden Kelab Main Bol Pakan, Kevin Jampang Ranggak.

Pekit tu dipeda ukai semina ulih meransang budaya idup bepengerai enggau regas ba raban nembiak, tang mega nyadi padang dikena ngenegapka kaul komuniti nengah semengat beraban. – RBI

#ruaiberitaiban#newsiban#beritaiban

Rindu | Titih | Kunsika

SRI AMAN, 14 Jun — Siku lelaki luput pengudah kerita Toyota Hilux pacu ke ditepan iya tepawah ngagai parit ba penusah bebadi betunga mua ba Jalai Brayun, ditu, malam tu tadi.

Palan Operasyen (PGO) Opis Bomba enggau Penyah Penusah Malaysia (JBPM) Sarawak nerima kangau ngenyit bekaul enggau penusah nya urung pukul 7.28 malam sebedau ngatur seraban raban ari Balai Bomba enggau Penyah Penusah (BBP) Sri Aman ngelawa endur nya.

Nitihka penerang ari Komander Operasyen, PBK I (TBK I) Noor Faqriakmal Jamari, raban bomba ke datai ba endur nya tetemuka sebuah kerita Toyota Hilux tepawah tama ngagai parit.

Ku iya, mansa ke dipelabaka luput dibantu mensia mayuh pansut ari kerita sebedau diengkah ba belakang entukar Toyota Hilux seraya nganti penatai raban penyelamat.

“Raban Timbal Operasyen (PKO) udah nya bejalaika pengawa meresa keterubah ngena perengka pengelindung diri (PPE) ke lengkap sebedau mindahka mansa ngena papan tulang belakang lalu nyerahka iya ngagai tim ambulans Opis Menteri Pengerai Malaysia (KKM) ngambika ulih dipejalaika enggau silik agi,” ku iya.

Operasyen ti mungkur Tender Penyelamat Bomba (FRT) enggau sebuah entukar Servis Penyelamat Perubat Penusah Ngenyit (EMRS) begulai enggau enam iku raban bomba mujur dijaga urung pukul 7.40 malam lalu tembu penuh pukul 7.55 malam.

Sama bisi datai ba endur nya siku raban Polis DiRaja Malaysia (PDRM) enggau tiga iku raban KKM.

Nadai penanggul diripotka nyadi sepemanjai operasyen nya.

Raban bomba pansut ari endur nya pengudah gaya dientas likun sereta operasyen tembu penuh. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

PAKAN, 14 Jun – Direktor Betanam Betupi Sarawak, Dominic anak Chunggat nyemetak madahka industri lada di Bagi Menua Sarikei bisi potensial ke besai terus ngerembai nyadi siti ari penyaup besai ngagai sektor betanam betupi nengeri tu, lalu enggau nya ngenegapka penuduk Sarawak ba makit eksport antarabansa.

Nitih ku iya, Bagi Menua Sarikei endang amat tebilang nyadi kandang endur ngeluarka lada bekualiti tinggi ti bisi peminta ukai semina ba makit menua tu aja, tang mega dieksport ngagai menua baka Jipun, Vietnam, Filipina enggau beberapa buah menua di Eropah. Dalam menua, makit besai nyengkaum Sabah enggau Semenanjung Malaysia.

Berindik enggau nya, iya meransang pekebun lada ba kandang menua nya minta Pensijilan Amalan Pertanian Baik Malaysia (MyGAP) dikena nambahka pengandal makit ngagai produk ke diasilka.

“Pensijilan MyGAP beguna amat laban nya nentuka produk betanam betupi nitihka standard pengelikun pemakai, ulih dipansik enggau meruan ti diaku ba renggat entarabansa.

“Nengah pensijilan tu, peluang rembus ngagai makit eksport ti lebih luas deka tebuka lalu udah nya nambahka rega komersial produk menua tu,” ku iya.

Iya madah munyi nya lebuh bejaku ba Program Nangguhka Agrofest Pakan 2026i ke diatur di Pakan seharitu tadi.

Dominic mega nesau pengemeran utai tanam bukai baka buah, sayur, nanas, rian, nyiur, jagung enggau utai tanam ngulihka setipikit MyGAP nyadi singkang dikena ngangkatka kualiti enggau daya besemekih produk betanam betupi sida empu.

Nitihku iya, pengawa meri setipikit nya ukai semina nyadika bukti pengawa betanam betupi ti manah sereta likun, tang mega ulih nambahka pengandal penguna ngagai produk betanam betupi menua tu.

“Ba jeman makit ke majak kompetitif, produk ke bisi setipikit baka MyGAP muntang agi diterima supermakit besai, kompeni pemeli, industri nginjin pemakai enggau makit eksport,” ku iya nerang.

Iya andal amat penambah penyampau ladang enggau operator ti bulih setipikit MyGAP deka mantu nempa sektor betanam betupi di Bagi Menua Sarikei lebih kompetitif, meruan sereta ulih meri pangka ke besai ngagai agenda pengelikun pemakai enggau pemansang ekonomi Sarawak.

Sama bisi datai iya nya Tan Sri William Mawan anak Ikom, Penyanding Penemu ba Opis Premier Sarawak (Industri Pemakai, Komoditi enggau Pemansang Kandang Menua) ke mega ADUN Pakan, Datuk Larry Soon @ Larry Sng Wei Shien, Chairman Industri Kayu Ramu Malaysia ke mega Kaban Parlimen Julau, Sekretari Tetap Opis Menteri Industri Pemakai, Komoditi enggau Pemansang Kandang Menua, Datu Sirai anak Daha, Pemesai Pelilih Menua Pakan, Mohd Irwan bin Abdullah @ William Manggoi, Pemesai Opis Betanam Betupi Bagi Menua Sarikei, Jessyca anak Andrew Mujah, pengari ejensi perintah sereta selampur peranak Pakan. – RBI

#ruaiberitaiban#newsiban#beritaiban

Rindu | Titih | Kunsika

PAKAN, 14 Jun – Program Pakan Agrofest 2026 taja diatur dua hari mujur matak 3,640 iku temuai enggau penyampau asil jual manggai RM58,492.25 naka pukul 9 pagi, lalu enggau nya ngayanka timbal komuniti ti meransang ba pemansang sektor betanam betupi enggau agro di kandang menua tu.

Direktor Betanam Betupi Sarawak, Dominic anak Chunggat madah, Pelilih Pakan nyadi palan kedua dalam siri Roadshow Agrofest Renggat Bagi Menua ke diatur Opis Betanam Betupi Sarawak.

Nitih ku iya, pekara ti pemadu dikerinduka renggat tu iya nya Sarawak Agrofest 2026 ti diperambu deka diatur ba Padang Bilun Lama Bintulu berengkah 25 September nyentuk 4 Oktober 2026.

Iya mansutkan jaku tu ba Program Nangguhkan Pakan Agrofest 2026 ba Laman Pakan, seharitu tadi.

Ku iya nerang, Pakan Agrofest 2026 ngembuan juluk deka meri kelala bemacham program pemansang ke bisi disediaka ejensi enggau opis ke bekaul, kelimpah ari ngelakuka produk betanam betupi, berikan enggau produk hiliran menua tu.

“Program tu mega meri penerang ngagai pekebun pasal penemu enggau teknologi baru nengah kus, demonstrasyen enggau pemindah teknologi, kelimpah matak pengerindu raban nembiak ngemeranka pengawa betanam betupi,” ku iya.

Sepenyampau 38 bansal dibuka sepemanjai program nya nyengkaum 15 bansal pemandang, 13 bansal bejual enggau 10 bansal khas ari baruh Dapur Pakan ti nyendiaka ruang ngagai orang dagang menua tu ngelakuka produk sida.

Nitih ku Dominic, pengawa muka bansal nya ukai semina meri mayuh macham servis ngagai temuai, tang mega mandangka teknologi enggau inovasyen pemadu baru dalam sektor betanam betupi seriris enggau rambai jaku Agrofest taun tu, iya nya “Ngemeranka Inovasyen Betanam Betupi Ke Pengelikun Pemakai.”

Iya minta mensia mayuh nguna peluang ke bisi disedia nengah chara ngelawa tetiap bansal, nyukung produk orang dagang menua tu sereta ngulihka penemu bekaul enggau teknologi betanam betupi sereta inovasyen ke bisi dipandangka.

“Penatai enggau sukung komuniti beguna amat dalam mantu nyungkak ekonomi komuniti sereta ngenegapka sektor betanam betupi menua tu,” ku iya.

Sepemanjai program nya, tujuh bengkah sesi meri penerang udah diatur ti ngaul mayuh bengkah ejensi enggau institusyen ke bekaul, nyengkaum Penerang Pemansang Betanam Betupi Bagi Menua Sarikei, Penerang Besai Tanah Adat Bumiputera NCR, Pensijilan MSPO Minyak Sawit Lestari Malaysia, Empas ari penyakit Rabies, Agro Betanam Betupi Nengah “Perbankan”, Pengawa Ngatur Tanam Nanas sereta Program Pemansang Getah enggau Bantu Getah.

Kelimpah ari nya, bemacham demonstrasyen mega bisi diatur nyengkaum ngasilka tinduh, nanam ikan ai tabar, ngasilka filamen lia enggau teknologi ngawin buah, ti narit ati bala temuai.

Dominic meri besai terima kasih ngagai semua pemeri penerang enggau demonstrator ti bekunsika penemu, peneleba, enggau pengelandik sida enggau komuniti.

Iya andal semua isi ti disediaka sepemanjai Pakan Agrofest 2026 deka meri penguntung ke besai ngagai komuniti bumai, kelebih agi ari sukut pemindah teknologi, bekunsika penemu baru, sereta nambahka penemu bekaul enggau chara betanam betupi moden.

“Program baka tu besai dikena nentuka komuniti betanam betupi seruran betemu enggau teknologi pemadu baru sereta ulih nambahka produktiviti enggau daya besemekih sektor betanam betupi di Sarawak,” ku iya.

Sama bisi datai iya nya Tan Sri William Mawan anak Ikom, Penyanding Penemu ba Opis Premier Sarawak (Industri Pemakai, Komoditi enggau Pemansang Kandang Menua) ke mega ADUN Pakan, Datuk Larry Soon @ Larry Sng Wei Shien, Chairman Industri Kayu Ramu Malaysia ke mega Kaban Parlimen Julau, Sekretari Tetap Opis Menteri Industri Pemakai, Komoditi enggau Pemansang Kandang Menua, Datu Sirai anak Daha, Pemesai Pelilih Menua Pakan, Mohd Irwan bin Abdullah @ William Manggoi, Pemesai Opis Betanam Betupi Bagi Menua Sarikei, Jessyca anak Andrew Mujah, pengari ejensi perintah sereta selampur peranak Pakan. – RBI

#ruaiberitaiban#newsiban#beritaiban

Rindu | Titih | Kunsika

KUCHING, 14 Jun — Pengawa Persembahan Budaya Melayu SAMArindok Sarawak 2026 Siri II: Program Puisi Melayu Tradisional ke diatur Amanah Khairat Yayasan Budaya Melayu Sarawak (AKYBMS) udah diatur enggau chukup pengeransing sereta penuh enggau chura pemerindang ba Godown Amphitheatre, Tebing Ai Kuching enggau nya matak beratus ngemenuhka palan nya.

Program tu bisi mandangka pengawa pemerindang puisi tradisional Melayu ti ditempa enggau kreatif nengah gempung elemen becherita enggau pemerindang panggau kontemporari.

Chara tu mujur ngidupka baru seni pesaka enggau chara ti baru agi, dinamik sereta semak agi enggau mayuh macham renggat mensia mayuh.

Edisyen tu mantaika cherita ti diatur ba Perintah Melayu Saribas enggau Perintah Melayu Kalaka, enggau pemerat ba watak Dang Umbok enggau Dang Ukok.

Pengawa becherita nya sebagi ari asil pansik, salin enggau nyelak manuskrip Melayu Sarawak ke ditemu dalam repositori AKYBMS, ke nyadi reta tengkira pesaka nengeri ke beguna.

Pengawa ngatur SAMArindok mega ngayanka pemanah inisiatif AKYBMS dalam meri kuasa sereta ngidupka baru seni pemerindang tradisional Melayu Sarawak, seraya ngerembaika daya tarik budaya tu ngagai peninga baru.

Beserimbai enggau pengawa ngadaka penau seni rebak baru, pengawa pemerindang tu mega bisi mantaika artis biak ari baruh Ejensi Seni AKYBMS, ti bejalaika tanggungpengawa nyukung pengawa terus ngemansangka seni enggau budaya nengeri tu.

Menijar Besai AKYBMS, Datu Dr.Haji Sanib Said, dalam jaku dipansutka iya madahka pemesai guna sukung terus ari semua piak dalam pengawa ngetan sereta ngetanka pesaka asal Melayu Sarawak.

Iya mega minta kerejasama rat entara aktivis seni dikena ngenegapka ekosistem seni enggau budaya nengeri seriris enggau Pelin Strategik AKYBMS 2015–2035, kelebih agi ari baruh teras Agama enggau Budaya.

Nitih ku iya, pengawa ke enda ngetu tu beguna amat dalam ngenegapka identiti Melayu Sarawak, seraya mega ngenegapka chap budaya positif ngambika pesaka seni menua tu mengkang relevan sereta dipeturun ngagai rebak dudi hari.

Program SAMArindok ke dudi ila diperambu deka diatur kena 12 September ti berambaika leka jaku Pencak Silat, ti deka terus mandangka penyelai seni pemerindang asal Melayu Sarawak.

AKYBMS mega ngelaluka kerejasama strategik ari mayuh bengkah piak dikena ngerembaika kelala sereta nentuka penerus seni enggau budaya budaya nengeri tu terus ngerembai setipak enggau gaya pemansang kemaya hari tu. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

PAKAN, 14 Jun – Penyanding Penemu Opis Premier Sarawak (Industri Pemakai, Komoditi enggau Pemansang Kandang Menua) ke mega Kaban Kunsil Nengeri (ADUN) Pakan, Tan Sri William Mawan Ikom nyemetak madahka pengawa ngaul diri enggau chakah sektor peribit enggau aplikasyen teknologi enggau inovasyen nyadi pematak moden ngagai sektor betanam betupi Sarawak enggau meruan.

Nitihku iya, Perintah Sarawak seruran meransang kerejasama strategik entara perintah enggau sektor peribit dikena ngenegapka ekosistem betanam betupi sereta nambahka kapasiti ngeluarka pemakai di nengeri tu.

Ku iya, penyereta sektor peribit ukai semina fokus ngagai pengawa beranakka puku ba pengawa mansik enggau pemansang (R&D), tang mega ngaul pengawa ngena teknologi betanam betupi pintar, automasyen enggau mekanisme ladang, mungkus ti ‘mesra’ rampa menua enggau aplikasyen kuasa tau dikena baru ti ulih nambahka produktiviti enggau efisyen operasyen.

“Teknologi enggau inovasyen ti diberi kelala begunaka chara ti mudah diulih, praktikal sereta ulih dibeli orang bumai enggau orang dagang agro ngambika penguntung ari transformasyen betanam betupi ulih diasaika enggau komprehensif di serata Sarawak,” ku iya.

Berebak enggau nya, Tan Sri William mega nyemetak madahka pemesai guna ngubah peragam mensia mayuh senentang sektor betanam betupi ke suah dikumbai kereja tradisional sereta enda besemaya pulai penguntung ke besai.

Ku iya, pengawa betanam betupi kemaya hari tu udah mansang nyadi industri moden bepelasarka penemu, teknologi enggau inovasyen sereta ngembuan potensial besai mansutka penatai pemisi ke tinggi sereta rembus ba makit domestik enggau antarabansa.

Berindik enggau nya, iya nesau mensia mayuh kelebih agi sida ke biak ngambika ngubah chara sida berunding lalu meda sektor betanam betupi nyadi kereja ke ulih dipejalai, beprestij enggau pengidup ke manah jemah ila.

“Raban nembiak patut ngerebut peluang ke bisi dalam sektor betanam betupi moden laban bidang tu ukai semina ulih nyamin pun penatai pemisi ke meruan, tang mega bejalaika tanggungpengawa ke berat dalam nentuka pengelikun pemakai enggau pemansang ekonomi Sarawak jemah ila,” ku iya.

Sama bisi datai iya nya Datuk Larry Soon @ Larry Sng Wei Shien, Chairman Industri Kayu Ramu Malaysia ke mega Kaban Parlimen Julau, Sekretari Tetap Opis Menteri Industri Pemakai, Komoditi enggau Pemansang Kandang Menua, Datu Sirai anak Daha, Direktor Opis Betanam Betupi Sarawak Dominic anak Chunggat, Pemesai Pelilih Menua Pakan, Mohd Irwan bin Abdullah @ William Manggoi, Pemesai Opis Betanam Betupi Bagi Menua Sarikei, Jessyca anak Andrew Mujah, pengari ejensi perintah sereta selampur peranak Pakan. – RBI

#ruaiberitaiban#newsiban#beritaiban

Rindu | Titih | Kunsika

KAPIT, 14 Jun — Tradisyen Ngiling Bidai terus nyadi kelai penyerakup komuniti enggau manifestasyen pengangkun ngagai pesaka asal ti diturun ari rebak ngagai rebak, kelimpah ari ngenegapka semengat begulai dalam komuniti.

Pekara nya dibantaika nengah pengawa ngatur Program Komuniti Bibas TIBI enggau Pengerami Ngiling Bidai ke diatur ba Rumah Juntan, Nanga Elik, Sungai Sut, Kapit, ke bela digulu pengari YB Dato Sri Alexander Nanta Linggi enggau Kaban Kunsil Nengeri (ADUN) Pelagus YB Wilson Nyabong Ijang.

Nitihka penerang ari Sekretari Politik ngagai Menteri Kereja Raya Datuk Alvin Runggah Jimbun, program tu ukai semina ngemeratka pengawa nambahka penyedar komuniti senentang pengawa nagang penyakit tibi (TIBI), tang mega nyadi pelasar dikena ngenegapka kaul rama sereta ngetanka pesaka asal menua tu.

Iya nyemetak madahka sukut pengerai enggau budaya meseti bejalai sejalai dalam nentuka pemansang komuniti ti sebela sereta meruan.

Pengerai ke manah ku iya, nyadi pelasar penyulut komuniti, lalu budaya nyadi teras identiti enggau pengelantang rama.

“Program baka tu chukup besai reti laban ukai semina nambahka penyedar pengerai ba komuniti, tang mega ngenegapka penyerakup nengah apresiasyen adat enggau budaya,” ku penerang nya.

Iya mega meri besai terima kasih ngagai komiti pengatur, raban pengereja pengawa pengerai, ketuai komuniti enggau peranak Rumah Juntan ketegal komitmen enggau kerejasama ngemujurka program nya.

Ku iya nambah, semengat begulai ti dipandangka dikearap ulih terus nyadi pemangkin ngagai pemansang komuniti ti lebih progresif, bepengerai sereta lantang jemah ila. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika